1-3. (a)Vika via lingisile litangua lia Pentekosta ku pua lia ku lifuila? (b) Vati viuma via lingikile via muesele ku lipuisamo ca vupolofeto vua Mbimbiliya? (Talenu cikupulo ca ku vuputukilo.)

MU MUAKA ua 33, lia ca lumingu ku cimene, vantu va likunguluile mu Yelusalema. Va kele na ku linga Pentekosta cilika ca ku lela, ku vuputukilo vua ku tia vimbuto via tiliku via katete. Ku cimene caco, sasendote ua kama ua kele na ku kombeleya mu tembele kaha ku ntsimbu ya 9 ola ua hitisile vimbolo vivali via cimbaluila via ku tika na vunga vua tiliku ya iha. Sasendote ua hitisile vimbolo viaco mu ku vi kombeleya kuli Yehova. —Levitiku 23:15-20.

² Mu vihita via miaka ku nima, sasendote ua kama ua kele na ku hitisa vikombelo muaka ku muaka. Eci cikombelo cemanenene vimo via seho ya kama via lipuisilemo lia Pentekosta ya muaka ua 33. Mu ntsimbu yaco vandongesi va Yesu va ku pua 120, va likunguluile mu hondo ya kuilu mu Yelusalema. (Vilinga 1:13-15) Vunoni miaka 800 ku nima, kapolofeto Yoele ua sonekele laza viuma via solokele. (Yoele 2:28-32; Vilinga 2:16-21) Viuma vika via seho ya kama via lingikile?

 ³ Tandenu Vilinga 2:2-4. Ha Pentekosta ya muaka ua 33, Njambi ua hele sipilitu santu kuli vaze Vakua Kilistu na ku va vuavesa. (Vilinga 1:8) Kaha vantu va vengi va va zengelekele, ngeci vandongesi va putukile ku ambulula vipupu vi va muene na ku ivua. Kapostolo Petulu ua lomboluele viuma via lingikile, na seho yavio. Ngeci ua lekele ize mbunga ngueni: “alulukenu ku mitima, kaha limbatizienu mu va vose mu lizina lia Yesu Kilistu linga va mi ecele ku vipi vienu; kaha mu ka tambula vuana vua sipilitu santu.” Ku litangua liaco ngue vantu 3,000 va limbatizile.—Vilinga 2:37, 38, 41.

4. (a) Omo lia vika tua pande ku haka seho ku viuma via kele na ku lingika ha Pentekosta? (b) Viuma vika vikuavo via solokele ha litangua lize vene mu nima ya miaka ya ingi?

⁴ Sasendote ua kama na cikombelo ca kele na ku linga via puile cimueso ca vika? Sasendote ua kama uemanenene Yesu. Kaha vimbolo viemanenene vandongesi va Yesu va ku vuavesa. Vandongesi vaco va va hanguile ha kati ka vantu vakua vupi, ngeci va va tumbuile “vantuatua.” (Tiango 1:18) Njambi ua va tava ku pua vana veni, kaha ua va hangula ku ka sika na Yesu mu Vuangana vua Njambi muilu. (1 Petulu 2:9) Yehova a ka pangesa vuangana vueni mu ku vezikisa vantu vose vakua ku ononoka. Pentekosta ya muaka ua 33 ya pua ya seho kuli vose va ka yoyela muilu hamo na Yesu na kuli vose va ka yoyela ha mavu mu palandaizi. ^[1] —Talenu mezi a kuintsi.

5. Vati tua tantekeya ngecize Vakua Kilistu ka ve ku va vuavesa mu njila imo lika?

⁵ Vandongesi va kele muze mu hondo ya kuilu ka va suvile naua lize litangua liaco. Nkala muntu ha kati kavo ua kele na cimo ca monekele ngue mulengi ua tuhia ha mutue. Yehova ua va hele ngolo ya ku handeka malimi. Va kele na vusunga ngecize sipilitu santu ya va vuavesele. (Vilinga 2:6-12) Vunoni eci cikomueso caco ka ce ku soloka ku nkala Mukua Kilistu ua ku vuavesa. Ca ku muenako, Mbimbiliya ka ya handekele ngecize milengi ya tuhia ya solokele ha mitue ya makulukazi a vantu va va vavuesele ku lutue lua ntsimbu mu litangua lize vene. Vutuhu va va vuavesele na ku va mbatiza. (Vilinga 2:38) Kaha kati vose Vakua Kilistu ve ku va vuavesa ku ntsimbu ya mbatizimu. Vakua Samaliya va va vuavesele mu nima ya miaka ya yingi fume ha mbatizimu. (Vilinga 8:14-17) Kaha Koloneliu na vakua ndzivo yeni va va vuavesele tele kanda va ci va mbatize, vutuhu ca puile ca ku lifuila.—Vilinga 10:44-48.

6. Vika ve ku tambula vose va ku vuavesa kaha vati ve ku ivua?

⁶ Mua vusunga, Vakua Kilistu ve ku tantekeya mu vifua via ku liseza-seza ngecize va na va vuavesa. Kuli ve ku tantekeya mpundu ngecize Yehova na va vuavesa. Vamo co ve ku tantekeya lika mu ku hita ca ntsimbu. Vunoni kapostolo Paulu ua lomboluele vika vie ku lingika ku muntu nga ua ku vuavesa. Ua handekele ngueni: “Muli ikeye, omo mua tsiliela, va mi hakele citantekeyeso ca sipilitu santu mukua litavasiano, ikeye ntompo ua vusuana.” (Efeso 1:13, 14) Yehova ue ku pangesa sipilitu santu mu ku kuasa Vakua Kilistu va ka ya muilu va kale na vusunga vuaco. Ngeci mukemuo, sipilitu santu “ikeye ntompo,” ni nguetu citantekeyeso ci muesa ngecize tangua aka yoyela muilu.—Tandenu 2 Kolintu 1:21, 22; 5:5.

7. Vika na pande ku linga uose Mukua Kilistu ua ku vuavesa, linga a ka tambule vuana vueni muilu?

⁷ Nga Mukua Kilistu va mu vuavesa, ca lomboloka ngecize a ka tambula fueto yeni ni? Houe. Vutuhu ali na vusunga ngecize va mu lania ku ka yoyela muilu, a ka tambula lika  fueto yeni nga a tualelelaho ku ononoka Yehova. Petulu ua lomboluele ngueni: “Ngoco vene, vamuanetu, litakamesienu cikumakuma ku kolesa ku ku mi sana cenu na ku ku mi hangula cenu: muomu nga mu linga viuma evi, ka mu ka suntsuka na hamo hahi: muomu mukemuo va ka mi hie mua kamakama ku kovela mu vuangana vuze ka vue ku hua vua Muangana uetu ikeye muovole uetu Yesu Kilistu.” (2 Petulu 1:10, 11) Ngeci nkala Mukua Kilistu ua ku vuavesa ka pandele ku tavesa nkala cuma ci mu tangule ku pangela Yehova. Vutuhu va mu lania ku ka ya muilu nga ka pu mu kua vusunga ka ka tambula vuana vueni. —VaHevelu 3:1; Ku-Solola 2:10.

8, 9. (a) Omo lia vika cingi ca vantu ce ku va kaluuila ku ivuisisa vie ku lingika ku muntu nga ua ku vuavesa? (b) Vati muntu ue ku tantekeya ngecize va na mu lania ku ka yoyela muilu?

⁸ Cingi ca vangamba va Njambi ce ku va kaluuila ku ivuisisa vie ku lingika ku muntu nga Njambi a mu vuavesa. Vali na vusunga vuaco, muomu vakevo kati va ku vuavesa. Njambi mua tangele vantu ua tondele va yoye miaka yose ha mavu, kati muilu. (Njenisisi 1:28; Visamo 37:29) Vunoni Yehova na hangula vamo linga va ka pue vamiangana na vasasendote muilu. Kaha mue ku va vuavesa Njambi visinganieka viavo na lulavelelo luavo vie ku aluluka, ve ku lavelela ku ka yoyela muilu.—Tandenu Efeso 1:18.

⁹ Vuno vati muntu ue ku tantekeya ngecize va na mu lania ku ka yoyela muilu? Talenu via handekele Paulu kuli vamuanaye va ku vuavesa mu Loma va sanene “va ka ku lela,” ua va lekele ngueni: “ka mua tambuile cimbembesi ca ku puisa vumuana, eci vene tue ku tambeka naco, nguetu, Aba Tata. Sipilitu ivene; ikeye a ambulula vukaleho kumo na cimbembesi cetu, ngecize tu vana va Njambi.” (Loma 1:7; 8:15, 16) Ku hitila mu sipilitu santu Njambi ue ku hana citantekeyeso ngecize na lania muntu ku ka sika na Yesu muilu.—1 Tesalonika 2:12.

10. Vika ua lombolola mukanda ua 1 Yoano 2:27 mu ua handeka ngecize Vakua Kilistu va ku vuavesa ka ci tondeka muntu a va longese?

¹⁰ Vose ve ku lania Njambi, ka ve ku lavelela naua ku kale umo a va leke ngecize vakevo va ku vuavesa. Yehova ue ku va hana vusunga vuaco. Kapostolo Yoano ua lekele Vakua Kilistu va ku vuavesa ngueni: “Ua ku Lela na mi vuavesa, kaha viose mu vi tantekeya.” Ua handekele naua ngueni: “Kaha omo enu, ku-vuavesa cize ci mua tambuile kuli ikeye ci kala nenu, kaha ka mua pandele umosi mukua ku mi longesa; vunoni ngue omo ku vuavesa ceni ci longesa viuma viose, kaha cikeco ca vusunga, kati makuli, kaha ngue omo ca mi longesele, kalenu muli ikeye.” (1 Yoano 2:20, 27) Vakua Kilistu va ku vuavesa navo va pande ku va longesa kuli Yehova ngeci mua vantu vose. Vunoni ka ve ku lavelela muntu ava leke ngecize vakevo va ku vuavesa. Muomu Yehova na pangesa ngolo yeni ya ku lela, sipilitu santu mu ku va hana citantekeyeso ngecize na va hangula!

11, 12. Viuma vika Mukua Kilistu ua ku vuavesa a hasa ku komoka, vunoni vusunga vuka ue ku kala navuo?

¹¹ Mukua Kilistu fume ha ku mu vuavesa na sipilitu santu, ue ku aluluka cikuma ngeci, Yesu ua handekele ngueni, ve ku “semuua luvali.” (Yoano 3:3, 5) Kaha ua lomboluele naua ngueni: “Kati u komoke muomu nja ku lekele, nguange, Mua pande ku semuua luvali. Luhundzi lu huhua kuose ku lua zange, nove u ivua lizi lialuo, vunoni ka u tantekeya kuze ku lua fumine, cipue oko ku lu ku ya: ngoco vene mu va na fu vose va semuua ku sipilitu.” (Yoano  3:7, 8) Mua vusunga, muntu ua ku vuavesa ka hasa ku lombolola vati ca fua ku muntu ua ku hona ku vuavesa. ^[2]—Talenu mezi a kuintsi.

¹² Halumo muntu ua ku vuavesa a hasa ku komoka ngueni, ‘Vika Yehova na nji hanguila? Kati nga na hanguile muntu ueka?’ A hasa na ku komoka nga cili na fuila ku ka yoyela muilu. Vunoni nga Yehova na mu hangula ke ku kala ku ndzimba ni ku takania. Ngeci ue ku viukilila cikuma, omo lia vuana vuaco. Vakua Kilistu va ku vuavesa, ve ku ivua ngue Petulu mua handekele ngueni: “Ua ku sangaziala Njambi, ikeye Ise ya Muangana Yesu Kilistu, ikeye ku cikeketima ceni ca kama na tu seme luvali ku ku lavelela ca muono mu ku sanguka ca Yesu Kilistu ca vatsi, ku vu suana ka vuesi na vu tsi, ka vuesi na citoma, ka vue ku nonga, va na mi tulikilavuo muilu.” (1 Petulu 1:3, 4) Uose ua ku vuavesa mue ku tanda aa mezi, ue ku kala mpundu na vusunga ngecize Ise ali na ku handeka neni.

13. Vati vie ku aluluka visinganieka via muntu nga va mu vuavesa na sipilitu santu, kaha vika vie ku vi alulula?

¹³ Vakua Kilistu vamo va kele na lulavelelo lua ku yoyela ha mavu, ntsimbu tele Yehova kanda ava hangule. Va kele na ku lavelela ngeci tangua Yehova a ka himpula mavu ku pua palandaizi na ku fumisako mavezi ose. Va kele na ku lavelela vati ci ka fua omo va ka tambula vavusoko na va vusamba va tsa. Kaha va kele na ku singanieka ha ku ka tunga vindzivo na ku kalamo na ku tombeka miti na ku lia vusuka vuayo. (Isaya 65:21-23) Vika via alulula visinganieka viavo? Omo lia vusiua ni tuyando tua tuingi? Ni halumo va na singanieka nguavo ku yoya miaka yose ha mavu ci ka futula, kaha ka ve kevu ndzolela ya ku kalaho? Ni hamo va tonda ku kevua vati ca fua ku kala muilu? Houe. Njambi ikeye na va hanguilavio. Mua va hanguile, ua pangesele sipilitu santu yeni mu ku alulula visinganieka viavo, na viuma vi va na lavelela.

14. Vati ve ku ivua va ku vuavesa ku tuala ha muono uavo ha mavu?

¹⁴ Vuno eci ca lomboloka ngecize Vakua Kilistu va ku vuavesa va tonda ku tsa ni? Houe. Paulu ua lombolola vati ve ku ivua va ku vuavesa. Ua setekesele muvila ua vuntu ku “mbalaka” kaha ngueni: “Muomu cili vene, etu tu ci li mu mbalaka ino, tue ku vindzuoka, omo tua lemuua; kati ngue tua hianga va tu zule, vunoni va tu zike, linga eci ca vutsi ci nonge na muono.” (2 Kolintu 5:4) Ava Vakua Kilistu ka va tondo kutsa. Va lema muono, kaha va tonda ku yoya nkala litangua mu ku pangela Yehova hamo na vavusoko vuavo na vavusamba. Vunoni ka ve ku suva via va kulahesa Njambi ku lutue, mu viose vi ve ku linga.—1 Kolintu 15:53; 2 Petulu 1:4; 1 Yoano 3:2, 3; Ku-Solola 20:6.

15. Vika ka via pandele ku lingisa muntu ku singanieka ngueni va na vuavesa na sipilitu santu?

¹⁵ Mue ku takania nga Yehova ua mi hangula ku ka ya muilu ni? Nga mue ku ivua ngueni halumo va mi hangula, singaniekenu ha vihula vino via seho: Mue ku ivua ngecize mua kala na ntuima cikuma mu ku ambulula ni? Mue ku viukilila mu ku lilongesa “via ku lova via Njambi” ni? (1 Kolintu 2:10) Mue ku ivua ngecize Yehova na vezikisa cikuma cipanga cenu ca ku ambulula ni? Mua tonda lika ku panga via tonda Yehova ni? Mua lema cikuma vamuanoko kaha mue ku ivua kapandi ka ku va kuasa ku pangela Yehova ni? Mu li na vusunga ngecize Yehova na mi kuasa mu vinjila via vingi mu muono uenu ni? Nga mua kumbulula ngueni eyo, vuno eci ca lomboloka ngecize va mi hangula ku ka yoyela muilu ni? Houe kati mukemuo. Omo lia vika? Muomu  nkala ngamba ya Njambi a hasa ku ivua ngoco, a pue ua ku vuavesa ni kuahi. Yehova a hasa ku hana sipilitu santu kuli nkala ngamba yeni a pue ua ku vuavesa ni kuahi. Nga mue ku takania nguenu va mi vuavesa ni kuahi, kaha ka va mi hanguile. Muomu vose ve ku hangula Yehova ka ve ku takania ni nguetu ka vesi ku ndzimba! Vali na vusunga vuaco!

16. Vati tua tantekeya nguetu kati vose ve ku tambula sipilitu ya Njambi tangua va ka yoyela muilu?

¹⁶ Mu Mbimbiliya, mua kala mizimbu ya muesa ngecize Yehova ua hele sipilitu santu ku vangamba veni vutuhu ka va ile muilu. Umo uavo ua puile Yoano mukua ku Mbatiza. Yesu ua handekele ngueni ka kua kele yala ua ku hiana Yoano mukua ku mbatiza, vunoni Yesu ua handekele naua ngueni Yoano ka ka pu muangana muilu. (Mateo 11:10, 11) Ndaviti neni sipilitu santu ya kele na ku mu tuamenena. (1 Samuele 16:13) Ya mu kuasele ku ivuisisa viuma via ku lova ku tuala hali Yehova, kaha ya mu tuamenene ku soneka imo mikanda ya Mbimbiliya. (Mako 12:36) Vunoni kapostolo Petulu ua handekele ngueni “Ndaviti ka londele muilu.” (Vilinga 2:34) Cili, Yehova ua hele sipilitu santu mu ku kuasa vangamba veni ku panga viuma via ku komouesa, vunoni ka i pangesele mu ku va lania linga va ka yoyele muilu. Vuno eci ca lomboloka ngecize vuoloke vuavo ka vua puilemo ngeci ka va hanguile ku ya muilu ni? Houe. Muomu Yehova a ka va sangula linga va ka yoyele ha mavu mu Palandaizi.—Yoano 5:28, 29; Vilinga 24:15.

17, 18. (a) Vivezikiso vika va na lavelela cingi ca vangamba va Njambi?(b) Vihula vika tu ka lilongesa mu cilongesa ci na hatako?

¹⁷ Cingi ca vangamba va Njambi va ka yoyela ha mavu. Ngeci mua Avilahama, Ndaviti, Yoano mukua ku Mbatiza na vamala na vampuevo vavengi va ku laza, va kele na lulavelelo lua ku ka yoya ha mavu mu ku sika ca vuangana vua Njambi. (VaHevelu 11:10) Va ka suana na Yesu muilu va ku pua lika 144,000. Vunoni Mbimbiliya ya handeka via “visupo via mbuto” va ci li ha mavu ku matangua ano a ku kotokela. (Ku-Solola 12:17) Kaha cingi ca vakua civunga ca 144,000 va tsa kaha va ya laza muilu.

¹⁸ Vati co nga umo a handeka ngueni ua ku vuavesa? Vati va na pande ku mu muenamo vaze vali na lulavelelo lua ku yoyela ha mavu? Nga umo mu cikungulukilo cenu a putuka ku lia mbolo na ku nua viniu ha mulalelo, vati mua pande ku mu muenamo? Vati co nga vantu vaco va putuka ku livuezelela? Vuno mua pande ku lisosomua ni? Tu ka tantekeya vikumbululo mu cilongesa ci na hatako.