1-3. 1) ¿Kenke tlauel ipati elki nopa Pentecostés ipan xiuitl 33? 2) ¿Kenijkatsa moaxitik ipan nopa tonali tlen Biblia kiijtojtoya? (Xikita nopa achtoui tlaixkopinkayotl.)

SE DOMINGO ika ijnalok, ne Jerusalén nochi yolpaktoyaj. Nopa tonali tlauel ipati eliyaya, pampa nochi kichijtoyaj nopa iljuitl Pentecostés. Nopa iljuitl peuayaya kichiuaj kema kipeualtiyayaj kipixkaj trigo. Ika ijnalok, ipan teokali nopa sumo sacerdote temakak tlakajkaualistli tlen ipa temakayayaj. Uan las 9 ika ijnalok temakak nopa ome pantsi tlen kichijtoyaj ika “tlayakanka pixkistli” tlen trigo. Nopa sumo sacerdote kiuisok nopa pantsi kema kimakak Jehová kej tlakajkaualistli. Ni mochijki ipan Pentecostés, xiuitl 33 (Lev. 23:15-20).

² Sejse xiuitl, nopa sumo sacerdote temakayaya nopa tlakajkaualistli. Tlauel miak xiuitl kichijtiualajtoyaj nopa iljuitl. Ni kiixnextiyaya se tlamantli tlen tlauel ipati katli panoskia teipa. Ni panok ipan Pentecostés, xiuitl 33, kema 120 Jesús itokilijkauaj momaijtouayayaj ipan se kali ne Jerusalén (Hech. 1:13-15). Ipan nopa tonali moaxitik tlen tlajtolpanextijketl Joel kiijtok kipiayaya se 800 xiuitl (Joel 2:28-32; Hech. 2:16-21). ¿Tlake panok ipan nopa tonali?

 ³ (Xijpoua Hechos 2:2-4.) Ipan Pentecostés, xiuitl 33, Jehová kintlapejpenik ika itonal 120 Jesús itokilijkauaj katli yaskiaj iluikak (Hech. 1:8). Kema asitoj miakej maseualmej, pejkej kiniljuiaj nochi tlen kiitstoyaj uan tlen kikaktoyaj. Apóstol Pedro kinixtomilik tlake panotoya uan kenke eliyaya tlauel ipati. Teipa kiniljuik: “Ximoyolkuepakaj uan xijkauakaj tlajtlakoli uan [ximoatsonpoliuiltikaj, TNM] sejse inmojuantij ipan itoka Jesucristo, uan toTeko inmechtlajtlakolkixtis uan keja se regalo inmechmakas itonal tlen tlatsejtseloltik”. Ipan nopa tonali, se 3,000 maseualmej moatsonpoliuiltijkej (Hech. 2:37, 38, 41).

4. 1) ¿Kenke moneki kuali tijmatisej tlake panok ipan Pentecostés? 2) ¿Tlake uelis nojkia panok uejkajkia ipan nopa tonali? (Xikita nopa nota kampa tlami ni tlamachtili.)

⁴ Nopa sumo sacerdote kiixnextia Jesús. Uan nopa ome pantsi kinixnextia Jesús itokilijkauaj katli kintlapejpenijtokej. Katli nojkia yasej iluikak kiniljuiaj kej nopa “achtoui tlen nochi tlakamej” pampa kintlapejpenijkej tlen nochi maseualmej katli tlajtlakolejkej (Sant. 1:18). ToTeotsij kinselijtok kej ikoneuaj uan inijuantij tlanauatisej iuaya Jesús ipan iTlanauatijkayo (1 Ped. 2:9). Ika iTlanauatijkayo, Jehová kinteochiuas nochi maseualmej katli kineltokasej. Uajka tlaj tiitstosej ne iluikak iuaya Jesús o tiitstosej ipan Xochimili, nochi moneki kuali tijmatisej tlake panok ipan Pentecostés, xiuitl 33 ^[1] (xikita nopa nota kampa tlami ni tlamachtili).

5. ¿Kenijkatsa tijmatij amo nochipa pano uejueyi tlamantli kema Jehová kintlapejpenia katli yasej iluikak?

⁵ Nopa 120 Jesús itokilijkauaj kimatiyayaj Jehová nelia kintlapejpenijtoya ika itonal. Nochi kipixtoyaj ipan inintsonteko kejuak se tlilelemektli, uan Jehová kichijki ma kamanaltikaj ipan miak tlajtoli (Hech. 2:6-12). ¿Nochipa pano uejueyi tlamantli kema Jehová kintlapejpenia katli yasej iluikak? Amo. Ipan nopa tonali, kema Jehová nojkia kintlapejpenik eyi mil maseualmej, Biblia amo kiijtoua tlaj nojkia neski ipan inintsonteko kejuak se tlilelemektli. Ya kintlapejpenik kema moatsonpoliuiltijkej (Hech. 2:38). Uan nojkia Jehová amo nochi kintlapejpenia kema moatsonpoliuiltiaj. Toikniuaj katli itstoyaj ipan Samaria kintlapejpenik kema ya moatsonpoliuiltijtoyaj (Hech. 8:14-17). Uan Cornelio uan katli itstoyaj iuaya kintlapejpenik kema ayamo moatsonpoliuiltiyayaj (Hech. 10:44-48).

6. ¿Tlake kiseliaj nochi katli kintlapejpeniaj, uan kenijkatsa kinpaleuia?

⁶ Sekij toikniuaj nima kimatij kema Jehová kintlapejpenia. Uan sekinok pano se keski tonali uan kiampa yolik kimatij nojkia kintlapejpenijtokej. Maske amo nochi sanse kinpano, Apóstol Pablo kiijtok nochi kiseliaj sanse tlamantli. Ya kiijtok: “Kema inkineltokakej Cristo, toTeko [...] inmechtlalilik isello para nesis ininaxkauaj pampa inmechmakak itonal para ma itsto inmouaya keja kitenkajtoya achtouia para kichiuaskia. Uan itonal toTeko eltok keja se tlayakankatomij tlen technextilia para temachtli tijselisej nochi tlen techtenkauilijtok techmakas” (Efes. 1:13, 14). Uajka, Jehová kinmaka itonal nochi katli kintlapejpenia. ¿Kenijkatsa kinpaleuia toTeotsij itonal? Kinmatiltia temachtli kintlapejpenijtokej yasej iluikak. Yeka, Pablo kiijtok toTeotsij itonal kejuak eliskia se “tlayakankatomij” o se tlenijki tlen kichiua ma kimatikaj teipa temachtli itstosej iluikak uan amo ipan Tlaltipaktli (xijpoua 2 Corintios 1:21, 22; 5:5).

7. ¿Tlake moneki kichiuas se toikni katli kitlapejpenijtokej tlaj kineki yas iluikak?

⁷ Kema se toikni kitlapejpeniaj, amo kiijtosneki temachtli yas iluikak. ¿Kenke tikijtouaj nopa? Pampa toTeotsij kejuak san kitlanejtok. Uelis yas iluikak tlaj nochipa kuali tlaneltokatos ipan Jehová. Pedro kiijtok: “Xinemikaj nelia kuali  para inkinextisej para toTeko temachtli inmechtlapejpenijtok uan inmechnotstok para inelisej ininaxkauaj. Intla inkichijtinemij ni tlamantli tlen niinmechiljuijtok, axkema inuetsisej ipan tlajtlakoli. Uan toueyiTeko Jesucristo, yajaya toTemakixtijka, tlen tlanauatis para nochipa, inmechkaltlapos nepa iluikak uan inmechselis ika pakilistli kema inasitij” (2 Ped. 1:10, 11). Uajka nopa toikni katli kitlapejpenijtokej moneki kichiuas kampeka amo kitlauelkauas Jehová. Tlaj ayokmo kuali tlaneltokas, amo uelis yas iluikak maske kitlapejpenijtoyaj (Heb. 3:1; Apoc. [Rev.] 2:10).

8, 9. 1) ¿Kenke miakej amo kikuamachiliaj tlake pano kema se toikni kitlapejpeniaj yas iluikak? 2) ¿Kenijkatsa se toikni kimati nelia kitlapejpenijtokej?

⁸ Miakej katli kitekipanouaj Jehová amo kikuamachiliaj tlake pano kema se toikni kitlapejpeniaj yas iluikak. Kiampa kinpano pampa inijuantij amo kintlapejpenijtokej. Nojkia pampa Jehová kinchijki maseualmej ma itstokaj ipan Tlaltipaktli uan amo ipan iluikak (Gén. 1:28; Sal. 37:29). Maske kiampa kinchijki, Jehová kintlapejpenijtok se keskij katli yasej iluikak kampa elisej tlanauatianij uan sacerdotes. Kema kintlapejpenia ika itonal, mopatla tlen moiljuiaj, uan kinekij itstosej iluikak (xijpoua Efesios 1:18).

⁹ ¿Kenijkatsa se toikni kimati nelia kitlapejpenijtokej? Xikita tlake kiniljuik Pablo katli toTeotsij ‘kiniyokatlalijtoya ma elikaj itlatsejtseloltijkatlakauaj’ ne Roma. Kiniljuik: “Inmojuantij axmoneki inkimakasisej toTeko keja tlatekipanouanij [...] [pampa] inkiselijtokej itonal toTeko tlen inmechchijtok ininkoneuaj toTeko, uan ika itonal [...] ama ueli inkinotsaj toTeko Dios: ‘[Abba,] Papá’. Uan itonal toTeko techyolmelaua ipan toyolo uan ipan totonal para tojuantij tiikoneuaj toTeko” (Rom. 1:7; 8:15, 16). Uajka toTeotsij itonal kichiua se toikni ma motemachi kitlapejpenijtokej yas iluikak uan tlanauatis iuaya Jesús (1 Tes. 2:12).

10. Kej kiijtoua 1 Juan 2:27, ¿ajkia kinmatiltia toikniuaj toTeotsij kintlapejpenijtok?

¹⁰ Toikniuaj katli kintlapejpeniaj amo moneki kiniljuisej toTeotsij kintlapejpenik, pampa Jehová yaya kinmatiltia. Apóstol Juan kiniljuia katli kintlapejpenijtokej: “Inmojuantij, axinitstokej keja yajuantij, pampa toTeko inmechmakatok itonal uan inkimatij nochi tlen melauak”. Uan nojkia kiniljuia: “ToTeko [...] itonal mokaua ipan inmoyolo uan axmoneki seyok inmechmachtis pampa itonal toTeko iselti inmechmachtia nochi tlamantli” (1 Juan 2:20, 27). Kej tojuantij, Jehová nojkia kinmachtia katli kintlapejpenijtok. Maske nojkia kinmachtiaj, amo kiijtosneki se akajya moneki kiniljuis toTeotsij kintlapejpenijtok. Inijuantij kimatij nopa pampa toTeotsij itonal tlen kipia miak chikaualistli kinmatiltia.

11, 12. ¿Tlake uelis motlajtlania se toikni katli kitlapejpenijtokej, uan tlake temachtli kimati?

¹¹ Kema toikniuaj kintlapejpeniaj yasej iluikak, tlauel mopatla tlen moiljuiaj. Yeka Jesús kiijtok kejuak sampa ‘tlakatij’ (Juan 3:3, 5). Teipa kiijtok: “Moneki yankuik titlakatis. Xikita keja eltok ika ajakatl. Tojuantij tijkakij nopa ajakatl tlen pano, pero axtijmatij kanke kistejki, yon axtijmatij kanke asiti. Nojkia kema itonal toTeko kitlakatiltia se tlakatl, tijmatij kipia yolistli yankuik, pero axueli tijmachiliaj kejatsa elki” (Juan 3:7, 8). Ni kinextia tlauel ouij tijmatisej tlake kiyolmati se toikni katli kitlapejpenijtokej ^[2] (xikita nopa nota kampa tlami ni tlamachtili).

¹² Se toikni uelis motlajtlania: “¿Kenke Jehová nechtlapejpenik na uan amo seyok?”. Uelis moiljuia amo yajatis kichiuas nochi tlen moneki. Maske kiampa kiyolmati, temachtli kimati  Jehová kitlapejpenijtok yas iluikak, uan yeka tlauel kitlaskamatilia uan yolpaki. Inijuantij nojkia kiijtouaj kej Pedro kiijtok: “Ma tijueyichiuakaj toTeko Dios yajaya tlen iTata toueyiTeko Jesucristo pampa miak techtlasojtla, uan yeka techtlakatiltijtok sampa uan techchiuilijtok ma tijpiakaj tonemilis tlen yankuik. Uan nochi tlen tijpiaj eltok pampa yajaya kiyolitik Jesucristo kema ya miktoya. Uan ama timochixtokej tlake techmakas teipa, pampa nepa iluikak techchia tlamantli tlen tlauel kuali tlen toTeko kiajoktok para techmakas teipa. Uan nopa tlamantli uejkauas para nochipa. Axpalanis, niyon nenpoliuis, niyon sosoliuis” (1 Ped. 1:3, 4). Kema inijuantij kipouaj ni texto, temachtli kimatij Jehová kinnojnotstok.

13. ¿Kenijkatsa mopatla inintlalnamikilis katli kintlapejpeniaj, uan kenke mopatla?

¹³ Kema Jehová ayamo kintlapejpeniyaya, nopa toikniuaj motemachiyayaj itstosej ipan Tlaltipaktli. Inijuantij kinekiyayaj kiitasej kenijkatsa Jehová kichiuaskia se xochimili uan kitlamiltiskia nochi tlen amo kuali. Uelis moiljuiyayaj kiitaskiaj kema moyolkuiskia se tlen ininchampoyouaj o se ininuampo. Nojkia uelis kinekiyayaj kichijchiuasej ininchaj o tlatojtokasej uan kikuasej nochi itlajka (Is. 65:21-23). Uajka, ¿kenke mopatlak inintlalnamikilis? ¿Mopatlak pampa tlauel motekipachojkej o pampa tlauel tlaijiyouijkej? ¿Uelis pampa moiljuijkej amo yolpakiskiaj tlaj itstoskiaj nochipa ipan Tlaltipaktli uan tlauel mokuesoskiaj? ¿O uelis pampa kinekij kimatisej kenijkatsa itstokej nepa iluikak? Amo. Mopatlak pampa Jehová kiampa kinejki. Kema kintlapejpenik, itonal kichijki ma mopatla inintlalnamikilis uan ma motemachikaj itstosej ipan iluikaktli.

14. ¿Kenijkatsa kiyolmatij katli kintlapejpenijtokej?

¹⁴ ¿Kinekij mikisej katli kintlapejpenijtokej? Pablo kiijtok kenijkatsa kiyolmatij. Kiijtok inintlakayo kejuak eliskia se “yoyonkali”. Ya kiijtok: “Pampa tiitstokej ipan ni Tlaltipaktli ipan totlakayo [o ‘yoyonkali’, TNM] tlen tlantia, techchiuilia ma tiayijtikaj, pero axpampa tijnekij ma miki totlakayo. Tiayijtij pampa tijnekij para toTeko ma techpatilis ni totlakayo tlen tlamis ika se totlakayo tlen kipias yolistli yankuik para nochipa” (2 Cor. 5:4). Ni kinextia inijuantij amo kinekij mikisej. Inijuantij tlauel yolpakij pampa itstokej uan mojmostla kinekij kitekipanojtosej Jehová ininuaya ininchampoyouaj uan ininuampoyouaj. Maske kichiuaj miak tlamantli, inijuantij nochipa kiilnamiktokej tlen Jehová kintenkauilijtok (1 Cor. 15:53; 2 Ped. 1:4; 1 Juan 3:2, 3; Apoc. 20:6).

15. ¿Tlake tlamantli kinextia sekij amo kintlapejpenijtokej yasej iluikak?

¹⁵ Uelis timotlajtlania tlaj Jehová nojkia mitstlapejpenijtok tias iluikak. Tlaj timoiljuia kena mitstlapejpenijtokej, xijnankili ni tlajtlanili: ¿Titlajtolmoyaua ika nochi moyolo? ¿Tlauel mitspaktia timomachtis Biblia uan tijyekos “tlen más ueyi tlen moiljuia toTeko” o tlamachtili tlen tlauel ouij? (1 Cor. 2:10.) ¿Timoiljuia Jehová tlauel mitspaleuijtok pampa mitspanotok kuajkuali tlamantli kema titlajtolmoyajtok? ¿Tlauel tikiniknelia sekinok uan tikinpaleuia ma kitekipanokaj Jehová pampa tijmati ya nopa kinamiki tijchiuas? ¿Tikitstok kenijkatsa Jehová miakpa mitspaleuijtok? Tlaj tijnankilik nochi ni tlajtlanili uan tikijtok kena, ¿kiijtosneki nojkia mitstlapejpenijtokej tias iluikak? Amo. ¿Kenke amo kiijtosneki nojkia mitstlapejpenijtokej? Pampa nochi katli kitekipanouaj toTeotsij kiampa kiyolmatij. Maske sekij yasej iluikak o itstosej ipan Tlaltipaktli, Jehová nochi kinmaka itonal. Tlaj ta timotlajtlania miak tlamantli pampa tijneki tijmatis tlaj nojkia tias iluikak, kiijtosneki amo mitstlapejpenijtokej. Katli Jehová kintlapejpenijtok amo motlajtlaniaj tlaj nojkia kintlapejpenijtokej o amo. ¡Inijuantij kimatij Jehová temachtli kintlapejpenijtok!

16. ¿Kenijkatsa tijmatij amo nochi kintlapejpenijtokej yasej iluikak maske toTeotsij nojkia kinmaka itonal?

 ¹⁶ Biblia kiijtoua maske toTeotsij kinmakak itonal miakej itekipanojkauaj, inijuantij amo yajkej iluikak. ToTeotsij kimakak itonal Juan teAtsonpoliuiltijketl, uan maske Jesús kiijtok amo itstoskia seyok tlakatl kej Juan, nojkia kiijtok ya amo yaskia tlanauatiti ne iluikak (Mat. 11:10, 11). ToTeotsij nojkia kiyakanki David ika itonal (1 Sam. 16:13). Pampa kipixtoya toTeotsij itonal, uelki kikuamachilik miak tlamantli tlen Jehová uan kiijkuilok se keski pilamochtsitsij ipan Biblia (Mar. 12:36). Maske toTeotsij kimakatoya itonal, Pedro kiijtok David amo “tlejkok iluikak” (Hech. 2:34). Uan maske Jehová kinmakak itonal se keskij tlakamej pampa kinekiyaya ma kichiuakaj miak tlamantli, ya amo kintlapejpenik. ¿Kiijtosneki nopa tlakamej amo tlauel kuali tlaneltokayayaj o amo yajatiskiaj tekichiuasej ne iluikak? Amo. Maske amo kintlapejpenik, Jehová kena kinyolkuis uan itstosej ipan Xochimili (Juan 5:28, 29; Hech. 24:15).

17, 18. 1) ¿Kanke motemachiaj itstosej miakej toTeotsij itekipanojkauaj? 2) ¿Tlake tlajtlanili tijnankilisej ipan nopa seyok tlamachtili?

¹⁷ Miakej katli kitekipanouaj toTeotsij amo yasej iluikak. Inijuantij motemachiaj itstosej ipan Tlaltipaktli kampa tekichijtos toTeotsij iTlanauatijkayo, kej Abraham, David, Juan teAtsonpoliuiltijketl uan sekinok tlakamej uan siuamej katli uejkajkia itstoyaj (Heb. 11:10). Ipan iluikaktli, nopa 144,000 tlanauatisej iuaya Jesús. Biblia nojkia kiijtoua ipan itlamia tonali itstoskiaj san se keskij katli toTeotsij kintlapejpenijtok (Apoc. 12:17). Nopa kiijtosneki miakej tlen nopa 144,000 ya mijkej uan itstokej ne iluikak.

¹⁸ Uan tlaj se akajya kiijtoskia nojkia kitlapejpenijtokej, ¿kenijkatsa kinamiki kiitasej toikniuaj katli motemachiaj itstosej ipan Tlaltipaktli? ¿Tlake tijchiuaskiaj tlaj se toikni katli monechikoua touaya kikuaskia pantsi uan kiijiskia vino kema moilnamiki Cristo imikilis? ¿Kinamiki techtekipachos tlaj tikitasej nojua momiakiliaj katli kintlapejpenijtokej? Ipan nopa seyok tlamachtili tijnankilisej ni tlajtlanili.