1-3. (1) ¿Tleka miak ipati tlen opanok itech Pentecostés itech xiuitl 33? (2) ¿Ken omochi tlen okijto teotlajtojki Joel? (Xikita tlaixkopinal tlen ika peua tlamachtil).

DOMINGO kualkan itech xiuitl 33. Sapanoa miak ipati pampa itech altepetl Jerusalén kichiuaskiaj iluitl Pentecostés. Nin se iluitl tlen omochiuaya sejse xiuitl ijkuak peua kololoaj trigo. Non kualkan itech teokali, teopixki okichi tlamanali tlen nochipa okichiuaya. Satepan, kualkan kanaj las 9 okitemakak ome pan tlen okinchijchijkej ika achto trigo tlen okikololojkej itech non xiuitl. Pampa kimakaskej Jehová, teopixki omonekiaya kinmolinis ik nikan uan ik nepa (Levítico 23:15-20).

² Yiuejkika sejse xiuitl okimakayaj Jehová ome pan. Nin okineskayotiaya se tlamantli miak ipati tlen panoskia. Nin omochi itech Pentecostés itech xiuitl 33 itech se cuarto itech altepetl Jerusalén kanin omotlatlaujtijtokaj 120 imachtijkauan Jesús (Hechos 1:13-15). Tlen ompa opanok omochi ken okijto teotlajtojki Joel kanaj  800 xiuitl achto (Joel 2:28-32; Hechos 2:16-21). ¿Tlen opanok?

³ (Xiktlajtolti Hechos 2:2-4). Itech non tonal tlen miak ipati, toTajtsin Dios ika iespíritu santo okinpejpenki 120 imachtijkauan Jesús (Hechos 1:8). (Xikita recuadro “¿Tlen kijtosneki?”). Ijkuakon miakej tlaltikpaktlakamej oajsitoj ompa uan imachtijkauan Jesús okintlapouijkej nochi tlamantli kuali tlen okikakej uan okitakej. Tlatitlanil Pedro okinyekilui tlen opanok uan tleka miak ipati. Satepan okinmilui: “Xikilikah Dios manomechtlapojpolwi iwa xiktlakitakah, iwa ximotekawilikah manomechkuaatekikah [noso, ma namechapolaktikan] itech Itoka n Cristo Jesús, ijkó Dios nomechtlapojpolwis de nomotlajtlakolwah iwa nonkiseliskeh n Espíritu Santo”. Itech non tonal kanaj 3,000 tlaltikpaktlakamej omoapolaktijkej uan okiselijkej espíritu santo (Hechos 2:37, 38, 41).

4. (1) ¿Tleka moneki tikmatiskej tlen opanok itech Pentecostés itech xiuitl 33? (2) Miak xiuitl achto, ¿tlen uelis noijki opanok itech iluitl Pentecostés? (Xikita nota kanin tlami tlamachtil).

⁴ ¿Tlen kineskayotia ueyi teopixki uan pan tlen omotemakak itech Pentecostés? Ueyi teopixki kineskayotia Jesús. Uan ome pan kineskayotiaj imachtijkauan Jesús tlen okinpejpenkej ika espíritu santo. Tlapejpenalmej okinpejpenkej itech tlaltikpaktlakamej tlen tlajtlakolejkej. Biblia kijtoa yejuan ‘tetiachkameh’ (Santiago 1:18). ToTajtsin Dios kinselia ken ikoneuan uan okinpejpenki pampa ma tlanauatikan iuan Jesús itech Tekiuajkayotl tlen kajki iluikak (1 Pedro 2:9). Ika nin Tekiuajkayotl Jehová kinteochiuas nochtin tlaltikpaktlakamej tlen kitlakamatij. Ik non, maski tiyetoskej itech Xochitlali noso itech iluikak iuan Jesús, tinochtin moneki tikmatiskej tlen opanok itech Pentecostés itech xiuitl 33. ^[1] (Xikita nota kanin tlami tlamachtil).

5. ¿Tleka tikmatokej amo nochipa itlaj panoa ijkuak toTajtsin Dios ikaj kipejpena?

⁵ Nonmej 120 imachtijkauan Jesús tlen okatkaj Jerusalén kuali okimatiayaj yejuan okinpejpenki toTajtsin Dios ika espíritu santo itech non tonal. Ipan intsonteko okipiayaj ken se tlitl. Uan otlajtoayaj okseki tlatlamantli tlajtolmej (Hechos 2:6-12). Pero amo nochipa ijkon panoa ijkuak toTajtsin Dios ikaj kipejpena. ¿Tleka ijkon tikijtoaj? Itech non tonal, Jehová okinpejpenki oksekimej tlaltikpaktlakamej, pero itech Biblia amo moijtoa noijki okipiayaj se tlitl ipan intsonteko. ToTajtsin Dios okinpejpenki ijkuak omoapolaktijkej (Hechos 2:38). Pero ye amo kinpejpena nochtin ijkuak moapolaktiaj. Tokniuan tlen okatkaj Samaria okinpejpenki satepan ijkuak omoapolaktijkej (Hechos 8:14-17). Cornelio uan ikalchanejkauan okinpejpenki ijkuak ayamo omoapolaktiayaj (Hechos 10:44-48).

6. (1) ¿Tlen kiseliaj tlapejpenalmej? (2) ¿Ken kinpaleuia iespíritu santo toTajtsin Dios akinmej tlapejpenalmej?

⁶ Sekimej san niman kajsikamatij  yejuan tlapejpenalmej. Oksekimej yolik kimatij. Pero onka se tlamantli tlen nochtin kiseliaj. Tlatitlanil Pablo okiyekijto: “Dios ika n Espíritu Santo kisentlalia techmakas tlan yotechkakitijka techmakas” (Efesios 1:13, 14). Jehová kinmaka espíritu santo nochtin tlapejpenalmej. ¿Ken kinpaleuia? Kichiua kuali ma kimatikan yejuan tlapejpenalmej. Ik non, tlatitlanil Pablo okijto espíritu santo itlaj tlen kinmatiltia tlen kiseliskej satepan itech iluikak uan amo itech Tlaltikpak (xiktlajtolti 2 Corintios 1:21, 22; 5:5).

7. ¿Tlen moneki kichiuaskej tlapejpenalmej?

⁷ Ijkuak toTajtsin Dios ikaj kipejpena, ¿kijtosneki kema yas iluikak? Amo. Kijtosneki melauak ye tlapejpenal. Tlatitlanil Pedro okiyekijto: “Yika nokniwah ken Dios yonoméchnotski iwa yonomechpéjpenki, ximochijchikawakah iwa xinemikah ijkó kemi yonomechili, ijkó ayik nonwetsiskeh. Iwa Dios nomechintlapolis ikaltenwah itekiwajkayo n Toteko iwa Totemakixti Cristo Jesús” (2 Pedro 1:10, 11). Ik non, moneki mochijchikauaskej kipiaskej kuali inyelis. Tlapejpenalmej uelis yaskej iluikak tla mochijchikauaj amo kichiuaskej tlen amo kuali (Hebreos 3:1; Apocalipsis 2:10).

8, 9. (1) ¿Tleka miakej itekipanojkauan Jehová amo kajsikamatij tlen kipanoa se tlapejpenal? (2) ¿Ken kimati se tlaltikpaktlakatl tla toTajtsin Dios okipejpenki?

⁸ Axkan miakej itekipanojkauan Jehová amo kuali kajsikamatij tlen kinpanoa tlapejpenalmej ijkuak Jehová kinpejpena ika iespíritu santo. Ijkon kinpanoa pampa toTajtsin Dios amo okinpejpenki pampa yaskej iluikak. ToTajtsin Dios otechchijchi pampa tiyetoskej itech Tlaltikpak uan amo iluikak (Génesis 1:28; Salmo 37:29). Pero toTajtsin Dios yokinpejpenki sekimej pampa ma yetokan iluikak ken tekiuajkej uan teopixkej. Ijkuak toTajtsin Dios kinpejpena ika espíritu santo, mopatla tlen kimachiliaj uan ken mokuayejyekoaj (xiktlajtolti Efesios 1:18).

⁹ ¿Pero ken uelis ikaj kimatis ye tlapejpenal? Ma tikitakan tlen okinmilui tlatitlanil Pablo tlapejpenalmej itech altepetl Roma. Okinmilui: “In Espíritu Santo katlej Dios oamechmakak mach amechtoktia xiekan kej antlanamaktin para oksemi sa ximomawtijtokan ken nijkuak anyekaj inawak se amoteko. Sino Dios oamechmakak in Espíritu Santo katlej kichiwa namejwan xiekan ya antekonewan de Dios. Iwan ika Espíritu Santo tejwan ya tiwelij tikilwiaj in toTajtzin Dios: ‘¡Abba!’, kijtosneki ‘¡Papan!’ In Espíritu Santo techilwia ipan toyolo nik tejwan ya tiikonewan  Dios” (Romanos 1:7; 8:15, 16, NHY). Ken tikitaj, toTajtsin Dios ika iespíritu santo kichiua kuali ma kimati tlapejpenal ye yas iluikak pampa tlanauatis iuan Jesús (1 Tesalonicenses 2:12).

10. ¿Tlen kijtosneki ijkuak Biblia kijtoa “ayakmó moneki aka manomechmachti”?

¹⁰ Akinmej yaskej iluikak amo moneki ikaj kinmiluis toTajtsin Dios okinpejpenki. Jehová kinmatiltia. Tlatitlanil Juan kinmiluia tlapejpenalmej: “Nomejwah nonkipiah tlan [toTajtsin Dios, TNM] onomechtliokoli, iwa nochi nonkixmatih”. Uan noijki okinmilui: “Pero nomejwah nonkipixtokeh n tlatliokólili non [toTajtsin Dios, TNM] onomechmák. Iwa ayakmó moneki aka manomechmachti” (1 Juan 2:20, 27). Tinochtin moneki ma techmachti toTajtsin Jehová, noijki tlapejpenalmej. Pero tlapejpenalmej amo moneki ikaj ma kinmilui toTajtsin Dios yokinpejpenki. Pampa kineltokaskej, Jehová ika iespíritu santo kinmatiltia.

11, 12. (1) ¿Tlen uelis motlajtlanis se tlapejpenal? (2) ¿Tlen kuali kimatok se tlapejpenal?

¹¹ Ijkuak ikaj kipejpenaj pampa uelis yas iluikak, nochi mopatla, ik non, Jesús okijto “oksepa tlakati” noso nesi (Juan 3:3, 5). Satepan okiyekijto: “‘Nochteh kipiah de tlakatiskeh oksepa’. N ejekatl tlaxojpitsa san kan ik kineki, iwa tikkaki ijkuyuka, pero amo tikmati kan ik walewa nion kan ik yawi. Ijkó noiwa mochiwah akimeh tlakatih itech Espíritu” (Juan 3:7, 8). Ken tikitaj, akinmej mokauaskej itech Tlaltikpak amo uelis kajsikamatiskej tlen kimachilia se tlapejpenal. ^[2] (Xikita nota kanin tlami tlamachtil).

¹² Uelis se tlapejpenal motlajtlania tleka ye okipejpenkej. Uelis motekipachoa kox uelis kichiuas non tekitl. Pero ye kuali kimati toTajtsin Dios yokipejpenki pampa yetos iluikak. Ik non, yolpaki uan kitlasojkamatilia toTajtsin Dios. Tlapejpenalmej momachiliaj ken tlatitlanil Pedro, akin okijto: “Matikweyijkatlalikah Dios Itajtsi n Toteko Cristo Jesús, porke ika imikilis iwa iyolitilis n Cristo, otechyankuili toyolilis. Ika iteiknomatilis okipatlak tonemilis. Ye kichiwas xikselikah n tlatliokólili non Dios nomechtlaatilijtok ilwikak. Non tlatliokólili amo ijtlakawis, amo pochewis, nion piliwis” (1 Pedro 1:3, 4). Ijkuak tlapejpenalmej kitlajtoltiaj non, kimatokej Jehová kintlapouijtok.

13. (1) Ijkuak toTajtsin Dios kipejpena se tokni, ¿ken mopatla ikuayejyekol? (2) ¿Tleka mopatla ken mokuayejyekoa se tokni?

¹³ Ken tikitaj, ijkuak toTajtsin Dios ikaj kipejpena, tlapejpenal kipatla ken mokuayejyekoa. ¿Ken? Achto kipejpenaskiaj, uelis okichiaya yoltos nochipa itech Tlaltikpak. Uelis okichiaya kitas ken Jehová kichiuas se xochitlali uan ken kipojpolos nochi tlen amo kuali.  Uelis omokuayejyekoaya ken kiseliskia se ikalchanejka noso iyolikni tlen yomikik. Noso okinekiaya kichijchiuas se kali uan tlatokas pampa kikuas tlakilotl (Isaías 65:21-23). Pero ijkuak Jehová okipejpenki, omopatlak ken omokuayejyekoaya. ¿Tleka? ¿Ijkon kipanoa pampa omoyolkokoaya noso sapanoa otlajyoui? ¿San omokuayejyeko amo yolpakis chantis itech Tlaltikpak? ¿Noso pampa okinekiaya kimatis ken yolilistli itech iluikak? Amo. Jehová okipatlak ken omokuayejyekoaya. Ijkuak toTajtsin Dios kipejpena se tokni, kitekitiltia iespíritu santo pampa ma kipatla ken mokuayejyekoa uan kanin kineki yetos.

14. ¿Tlen mokuayejyekoaj tlapejpenalmej itech inyolilis nikan Tlaltikpak?

¹⁴ ¿Kijtosneki tlapejpenalmej kinekij mikiskej pampa yaskej iluikak? Amo. Tlatitlanil Pablo kiyekijtoa tlen kimachiliaj: “Milák ok tiyolitokeh itech nin kuerpo, titenna iwa timosotlawah. Amo kijtosneki tiknekih matechkixtilikah tokuerpo non ya wewe, yej tiknekih makiyankuilikah tokuerpo, para mapojpoliwi tokuerpo non mikki iwa matikpiakah se kuerpo non ayik mikki” (2 Corintios 5:4). Itech Traducción del Nuevo Mundo tlatitlanil Pablo okineskayoti intlalnakayo tlapejpenalmej ken se mantajkali. Yolpakij uan kinekij kitekichiuiliskej Jehová iuan inkalchanejkauan uan inyolikniuan. Pero maski san tlen ma kichiuakan, yejuan kilnamiktokej tlen toTajtsin Dios okinmilui kichiuas (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. ¿Tlen tlamantli kiteititia amo titlapejpenal?

¹⁵ Uelis timotlajtlania kox toTajtsin Dios yomitspejpenki pampa tias iluikak. Tla timokuayejyekoa kema, xikinnankili ninmej tlajtlanilmej: ¿Tikmachilia titetlapouia ika miak yolpakilistli? ¿Mitsyolpaktia timomachtis Biblia uan timomachtis tlamachtilmej tlen okachi oui? (1 Corintios 2:10). ¿Tikmachilia Jehová yomitspaleui itech tetlapouilistli? ¿Tikneki ika nochi moyolo tikchiuas tlen toTajtsin Dios kineki? ¿Sapanoa tikintlasojtla mokniuan uan tikmachilia tikneki tikinpaleuis? ¿Yotikitak ken toTajtsin Dios yomitspaleui ijkuak otikpixki ouijkayotl? Tla tejuatsin otikijto kema, ¿kiteititia tejuatsin titlapejpenal? Amo, pampa nochtin itekipanojkauan Jehová uelis ijkon kimachiliskej maski amo yaskej iluikak. Jehová uelis kitekitiltis iespíritu santo pampa kinpaleuis nochtin itekipanojkauan, maski yaskej iluikak noso mokauaskej itech Tlaltikpak. Tla tejuatsin timokuayejyekojtok kox titlapejpenal, kijtosneki amo titlapejpenal. Tlapejpenalmej amo mokuayejyekoaj kox yokinpejpenkej. Yejuan kuali kimatokej tlapejpenalmej.

16. ¿Tleka tikmatij amo nochtin akinmej kiseliaj espíritu santo yaskej iluikak?

¹⁶ Itech Biblia moijtoa miakej akinmej okitekichiuilijkej Jehová uan okiselijkej espíritu santo pero amo oyajkej iluikak. Se neskayotl, Jesús okijto Juan akin oTeapolaktiaya miak ipati, pero okijto ye amo yaskia iluikak pampa tlanauatis ken tekiua (Mateo  11:10, 11). David noijki okiseli espíritu santo uan okiyekanki (1 Samuel 16:13). Ik non, okajsikamatki miak tlamantli oui, uan okinmijkuilo seki amochmej tlen tikinmajsij itech Biblia (Marcos 12:36). Pero tlatitlanil Pedro okijto “David amo otlejkok ilwikak” (Hechos 2:34). Jehová okitekitilti iespíritu santo pampa ninmej tlaltikpaktlakamej ma kichiuakan miak tlamantli tlen tetlajtlachialtia, pero ika nin amo okinpejpenki pampa ma yakan iluikak. ¿Nin kijtosneki amo okatkaj yolmelajkej noso amo uelis itlaj kichiuaskiaj iluikak? Amo. Kijtosneki toTajtsin Dios kinyolitis itech Xochitlali (Juan 5:28, 29; Hechos 24:15).

17, 18. (1) ¿Kanin yetoskej miakej tlen axkan kitekichiuiliaj Jehová? (2) ¿Tlen timomachtiskej chikome?

¹⁷ Miakej tlen axkan kitekichiuiliaj Jehová amo yaskej iluikak. Yejuan kichiaj yetoskej itech Tlaltikpak kanin ualtlanauatis iTekiuajkayo toTajtsin Dios, ijkon ken Abrahán, David, Juan akin oTeapolaktiaya uan oksekimej tlaltikpaktlakamej tlen intoka ijkuilitok itech Biblia (Hebreos 11:10). Itech iluikak yetoskej 144,000 tlaltikpaktlakamej tlen tlanauatiskej iuan Cristo. Pero Biblia techiluia itech itlamian tonalmej ayakmo miakej tlapejpenalmej yetoskej itech Tlaltikpak (Apocalipsis 12:17). Miakej tlen pouij itech 144,000 yomikej uan yikatej iluikak.

¹⁸ Pero tla ikaj kijtoa ye tlapejpenal, ¿tlen moneki tikchiuaskej? Tla se tokni itech tonechikol peua kikua pan uan koni vino tlen motekitiltia itech iCena toTeko, ¿tlen moneki tikchiuaskej? Uan tla axkan okachi miakej mochiuaj akinmej yaskej iluikak, ¿moneki timotekipachoskej? Chikome tikinnankiliskej ninmej tlajtlanilmej.