1-3. a) ¿Tleka Pentecostés itech xiuitl 33 xijkon katka ken okseki tonajli? b) ¿Katlejua teotlajtojli onochiuj ipan yejon tonajli? (Xkita tlaixkopinajli kampa peua tlen tomachtijtokej)

DOMINGO ika kualkan ipan Jerusalén itech xiuitl 33. Yejon tonajli xijkon katka ken okseki tonajli. Pampa miyekej tlaltikpakchanejkej kipanoltiayaj iluitl Pentecostés ijkuak kemach peua chikaui trigo. Ipan yejon kualkan ipan teopan, ueyi teopixketl kitemakaya uentli. Sakin, kanaj las 9 ika kualkan yejua kiuentlaliaya ome pan tlachijchiujtli ika trigo tlen kachtopa yotlak. Yejon ueyi teopixketl koliniaya yejon ome pan niman kimaktiliaya Jehová (Levítico 23:15-20).

² Melak yeuejkaui, nochi xiuitl, ueyi teopixketl kiuentlaliliaya Jehová ome pan. Yejon uentli iuan nasitoya tlen panoskia ika tlayekapan tlen melak ueyi kijtosnekiskia. Yejuin onochiuj ipan Pentecostés xiuitl 33 ipan se cuarto ipan Jerusalén kampa nemiyaj 120 inomachtijkauan Jesús niman san sekan kichiujtoyaj teoyotl (Hechos 1:13-15). Tlen ompa opanok ijkon onochiuj tlen yokijtoka teotlajtoketl Joel ijkuak poliuiya 800 xiuitl ika nochiuaskia (Joel 2:28-32; Hechos 2:16-21). ¿Tlenon opanok tlen melak ueyi kijtosneki?

³ (Xpoua Hechos 2:2-4). Ipan Pentecostés itech xiuitl 33,  toTajtsin okinmakak iespíritu santo niman ijkon okintlapejpeni 120 inomachtijkauan Jesús (Hechos 1:8). Kuakon, opeuj uajlauej miyekej tlaltikpakchanejkej itech inomachtijkauan Jesús, niman yejuamej opeuj kimijliaj miyek tlemach tlen kualtsin yokitakaj niman tlen yokikajkaj. Pedro, itlatitlankauj Cristo, okijto tlenon onochiuj niman tleka melak ueyi kijtosneki. Sakin okijto: “Xmoyolkuepakan niman xmo[apolaktikan] cada se de nemejuamej ikan itokatsin Jesucristo para nemotlajtlajkoluan mechtlapojpoluiliskej, niman nenkiseliskej itetlayokolil Dios yejuan on Espíritu Santo”. Ipan yejon tonajli, kanaj 3,000 onoapolaktijkej niman noijki okiselijkej espíritu santo (Hechos 2:37, 38, 41).

4. a) ¿Tleka melak noneki matikmatikan tlenon opanok ipan Pentecostés xiuitl 33? b) ¿Kanaj tlenon noijki opanok ipan yejon tonajli yeuejkaui? (Xkita nota kampa ontlami)

⁴ ¿Tlenon kineskayotia ueyi teopixketl niman pan tlen kiuentlaliayaj ipan Pentecostés? Ueyi teopixketl kineskayotia Jesús. Niman pan kineskayotia inomachtijkauan Jesús akin okintlapejpenijkej. Yejuamej okintlapejpenijkej itech tlaltikpakchanejkej tlajtlakolejkej niman notokayotiaj ken “achto ikoneuan” toTajtsin (Santiago 1:18). ToTajtsin yokintlapejpeni manochiuakan ken ikoneuan niman yokintlapejpeni matlanauatikan iuan Jesús ipan iluikak (1 Pedro 2:9). Ika yejuin Tekiuajyotl, Jehová kinteochiuas nochimej tlaltikpakchanejkej akin tetlakamatij. Ika yejon, maski san kanon tikchiaj tinemiskej, ipan Xochitlalpan noso ipan iluikak iuan Jesús, tinochimej noneki matikmatikan ika tlen opanok ipan Pentecostés xiuitl 33 melak ueyi kijtosneki ^[1] (xkita nota kampa ontlami).

5. ¿Kenon tikmatij ika xnochipa panoua tlen temojkatlachialti ijkuak toTajtsin kitlapejpenia yakaj ika iespíritu santo?

⁵ Yejon 120 inomachtijkauan Jesús akin nemiyaj san sekan ipan yejon tonajli xkeman kilkauaskiaj tlen opanok. Nochimej kipiayaj ipan intsontekon tlen nesiya kentla se tlitl. Niman noijki Jehová okichiuj ika mauelikan matlajtokan tlatlamantik noso sesejneka tlajtoltin. Yejuamej xometlamatiyaj ika toTajtsin yokintlapejpenijka ika iespíritu santo (Hechos 2:6-12). San ika, xnochipa ijkon panoskia ijkuak toTajtsin kintlapejpeniskia yakaj ika iespíritu santo. ¿Kenon tikmatij? Pampa ipan yejon tonajli toTajtsin noijki okintlapejpeni oksekimej tlaltikpakchanejkej. Niman Biblia xtlaj kijtoua tla yejon tlaltikpakchanejkej noijki okipixkej se tlitl ipan intsontekon. ToTajtsin okintlapejpeni ijkuak onoapolaktijkej (Hechos 2:38). San ika, yejua xkintlapejpenia nochimej akin kichiuaj ken Cristo ijkuak noapolaktiaj. Akin kichiuayaj ken Cristo chanejkej Samaria sakin okintlapejpeni ijkuak yonoapolaktijkaj (Hechos 8:14-17). Niman Cornelio iuan akin nemiyaj ipan ichan okintlapejpeni ijkuak xinoapolaktiayaj (Hechos 10:44-48).

6. a) ¿Tlenon kiseliaj nochimej akin kintlapejpeniaj? b) ¿Niman tlenon kichiua espíritu santo?

⁶ Sekimej akin kichiuaj ken Cristo, nimantsin kimatij ika toTajtsin yokintlapejpeni. Oksekimej ika yolik kimatij ika yokintlapejpenijkej. San ika, onka itlaj tlen kiseliaj nochimej. Pablo, itlatitlankauj Cristo, okijto: “Ijkuak onenkineltokakej, Dios omechsellaroj  ika on Espíritu Santo yejuan omechprometerouilijka. [...] On Espíritu Santo, yejua techmelajkaititia ika melauak Dios techmakas on herencia” (Efesios 1:13, 14). Ken tikitaj, Jehová kinmaka iespíritu santo nochimej akin kintlapejpenia. ¿Tlenon kichiua yejuin espíritu santo? Kichiua ika kuajli makimatikan ika yejuamej yaskej iluikak. Ijkon, espíritu santo “[kin]melajkaititia” noso kichiua makimatstiakan ika yejuamej ika tlayekapan nemiskej nochipa ipan iluikak niman xnemiskej nikan ipan tlaltikpaktli (xpoua 2 Corintios 1:21, 22; 5:5).

7. ¿Tlenon noneki kichiuaskej nochimej akin yokintlapejpenijkej niman ijkon yaskej iluikak?

⁷ Ijkuak se tokniuj kitlapejpeniaj, ¿kijtosneki  ika kuajli kimatstika ika melauak yas iluikak? Ka. Tlen kema kimatstika ika toTajtsin yokinots mauiya iluikak. Pedro, itlatitlankauj Cristo, okijto: “Xchiuakan kanika para nenkimatiskej ikan nochi nemoyojlo ika melauak Dios yomechnots niman yomechtlapejpenij. Tla ijkon nenkichiuaskej xkeman nenuetsiskej”. Kema, san ijkon uelis kiseliskej intlaxtlauil, ijkuak tlanauatiskej iuan toTeko Jesucristo ipan iluikak (2 Pedro 1:10, 11). Kuakon, nochimej akin yokintlapejpenijkej noneki yolmelaujkanemiskej itech Jehová. Yejuamej yokinnotskej mayakan iluikak, san ika, kema yaskej tla xkeman kikauaj toTajtsin (Hebreos 3:1; Apocalipsis [Revelación] 2:10).

8, 9. a) ¿Tleka miyekej itekipanojkauan toTajtsin ouijtika kitaj kasikamatiskej tlenon panoua ijkuak se tokniuj kitlapejpeniaj? b) ¿Kenon kimati se tokniuj ika toTajtsin yokitlapejpeni mauiya iluikak?

⁸ Ipan yejuin tonajli, miyekej itekipanojkauan toTajtsin ouijtika kitaj kasikamatiskej tlenon panoua ijkuak se tokniuj kitlapejpeniaj. Yejuin ijkon panoua pampa yejuamej xkintlapejpenia toTajtsin mauiyan ipan iluikak. Noijki, toTajtsin otexchijchiuj tinemiskej nikan ipan tlaltikpaktli niman xipan iluikak (Génesis 1:28; Salmo 37:29). Jehová yokintlapejpeni sekimej mauiyan ipan iluikak niman yejuamej nochiuaskej tekiuajkej niman teopixkej. Ijkuak toTajtsin kintlapejpenia ika iespíritu santo, nopatla ken tlanemiliaj niman intlamachialis. Kuakon, yejuamej san kichiaj nemiskej ipan iluikak (xpoua Efesios 1:18).

⁹ San ika ¿kenon kimati se tokniuj ika toTajtsin yokitlapejpeni? Matikitakan tlen Pablo okijto itech akin okintlapejpenijkej chanejkej Roma, akin toTajtsin okintokayoti “nenitetlajsojkayaxkauan”. Yejua okimijli: “On Espíritu Santo yejuan onenkiselijkej xmechuika para nentlanamaktin yeskej oksejpa itech nemojtilistli, yej kichiua para nentekoneuan itech Dios. Yejua ika tikijtouaj: ‘ToTajtsin.ʼ On Espíritu Santo niman toyojlo techijlia ika tiikoneuan Dios” (Romanos 1:7; 8:15, 16). Ken tikitaj, toTajtsin kikui iespíritu santo niman ijkon kichiua ika se tokniuj kuajli makimatstia ika yokitlapejpenijkej niman yas iluikak kampa tlanauatis iuan Jesús (1 Tesalonicenses 2:12).

10. ¿Tlenon kijtosneki 1 Juan 2:27 ijkuak kijtoua ika akin yokintlapejpenijkej xnoneki yakaj makinmachti?

¹⁰ Akin yokinnotskej yaskej iluikak xnoneki makiteijlikan ika toTajtsin yokintlapejpeni. Jehová kichiua ika kuajli makimatstokan ika yokintlapejpeni. Juan, itlatitlankauj Cristo, okimijli akin yokintlapejpenijkej: “Yejuan yolchipauak omechmakak iEspíritu Santo. [...] Nenmochimej nenkimatij on tlen melauak”. Niman noijki okimijli: “Xpoliui para yakaj mechmachtis, pampa iEspíritu Dios mechmachtia nochi tlajtlamach” (1 Juan 2:20, 27). Tinochimej noneki matechmachtikan, hasta akin yokintlapejpenijkej. San ika, yejuamej xnoneki yakaj makimijli ika toTajtsin yokintlapejpeni. Jehová kikui iespíritu santo niman ijkon kichiua ika maka maometlamatikan ika yejua melauak yokintlapejpeni.

11, 12. ¿Tlenon uelis notlajtoltis se tokniuj akin yokitlapejpenijkej, san ika, tlenon kema kuajli kimatstika?

¹¹ Ijkuak tokniuan kinnotsaj noso kintlapejpeniaj mauiyan iluikak, nopatlaj, pampa Jesús okijto ika yejuamej oksejpa tlakatij (Juan 3:3, 5). Sakin okijto tlenon okijtosnek: “Ma ka mitsmojkatlachalti on ika nimitsijlia: ‘Ika onkaj oksejpa titlakatis.ʼ On ajakatl tlalpitsa san kanon kineki. Tikaki on tlen yejua kakistilia, pero xtikmati kanon ualeua niman kanon yau. No ijki, tej, on yejuan tlakatij ikan on Espíritu Santo” (Juan 3:7, 8). Ken tikitaj, xuelis kuajli kasikamachiltiskej se akin xkitlapejpeniaj tlenon kimachiliaj akin yokintlapejpenijkej ^[2] (xkita nota kampa ontlami).

 ¹² Kanaj se akin Jehová okitlapejpeni uelis notlajtoltis tleka yejua niman xokitlapejpeni okse tokniuj. Kanaj najmana tla xouel okichiuj ueyi tekitl tlen yokiseli. San ika, yejua kuajli kimatstika ika Jehová yokitlapejpeni. Ika yejon, yejua melak yolpaki niman melak kitlasojkamati, niman kita ken se tetlayokolijli. Akin yokintlapejpenijkej nomachiliaj ijkon ken Pedro okijto: “Ma tikyekteneuakan Dios iTajtsin toTeko Jesucristo pampa ikan ueyi iteiknelilis otechmakak yenkuik nemilistli. Ijkon, tej, otitlakatkej oksejpa. Yejua ika tikpiaj tlamachalistli yejuan melauak, pampa Jesucristo onoyoliuitij niman onoketsteu ipan itlalkon. Niman no ijki tikpiaj se herencia yejuan Dios techeuilijtikaj ne iluikak. On herencia xkeman uelis xoxotonis, nion xuelis ijtlakauis, nion xuelis poliuis ikualtsinka” (1 Pedro 1:3, 4). Ijkuak akin yokintlapejpenijkej kipouaj yejuin tlajtoltin, kuajli kimatstokej ika Jehová kinnotstika yejuamej.

13. a) ¿Kenon nopatla ken tlanemilia se tokniuj ijkuak toTajtsin kitlapejpenia ika iespíritu santo? b) ¿Tleka nopatla ken tlanemilia se tokniuj akin yokitlapejpenijkej?

¹³ Ken yotikitakej, ijkuak toTajtsin kitlapejpenia se tokniuj, nopatla ken tlanemilia. Ijkuak Jehová xikitlapejpeniaya se tokniuj noso xkinotsaya mauiya iluikak, yejua kichiaya nemis nochipa ipan tlaltikpaktli. Yejua ika iyojlo kinekiya kitas tonajli ijkuak Jehová kikuepas tlaltikpaktli se xochitlalpan niman kipopolos nochi tlen xkuajli. Kanaj yejua tlanemiliaya kenon kinselis ijkuak oksejpa uajnemiskej ichanejkauan noso se akin iuan nouikaya. Kanaj noijki ika iyojlo kichiaya mayejko tonajli ijkuak kichijchiuas ikal kampa chantis noso kikauas itlakilyo tlen kitokaskia (Isaías 65:21-23). ¿Tleka opeuj nopatla ken tlanemilia? ¿Opeuj kipatla ken tlanemilia pampa melak najmana noso melak tlajyouiya? ¿Okinemili ika tla nemiskia nochipa ipan tlaltikpaktli tlatsiuis niman xuelis yolpakiskia? ¿Kanaj okinek kimatis kenon nemilo iluikak? Ka. Okipatlak ken tlanemilia pampa Jehová ijkon okinek mapano. Ijkuak toTajtsin kitlapejpenia se tokniuj mauiya ipan iluikak, kikui iespíritu santo ika kichiua manopatla ken tlanemilia niman itech tlen kichia kiselis.

14. ¿Kenon nomachiliaj akin yokintlapejpenijkej itech innemilis tlen kipiyaj nikan ipan tlaltikpaktli?

¹⁴ ¿Kijtosneki yejuin ika akin yokintlapejpenijkej kinekij mamikikan niman ijkon nimantsin yaskej iluikak? Ka. Pablo okijto tlenon kimachiliaj yejuamej: “Chika tinemij ikan totlaltikpaknakayo, tiktoiknotlajtlaniliaj. In xkijtosneki ika tiknekij tikpopoloskej totlalnakayo, yej tiknekij ma tikpatlakan totlaltikpaknakayo ika on iluikaknakayomej” (2 Corintios 5:4). Yejon tokniuan xkinekij mikiskej. Yejuamej pakij pampa ok yoltokej niman kinekij mojmostla kitekichiuiliskej Jehová iuan inchanejkauan niman iuan akin nouikaj. Maski san tlenon makichiujtokan yejuamej kilnamikij tlen toTajtsin yokimijli kinmakas ika tlayekapan (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. ¿Ika tlenon xkijtosneki ika tla se tokniuj yokitlapejpenijkej?

¹⁵ Kanaj tejua timotlajtoltia tla toTajtsin yomitsnots tias ipan iluikak. Tla tiknemilia ika kema, xtlanemili itech yejuin tlajtoltilistin: ¿Melak tikneki titenojnotsas ika yolchikaualistli? ¿Melak tikuelita ijkuak timomachtia Biblia niman timomachtis itech “tlajtlamach yejuan más ueyi kijtosnekij itech Dios”? (1 Corintios 2:10.) ¿Tikmachilia ika Jehová melak kualtsin ken yomitspaleui kampa titenojnotsa? ¿Tikneki ika nochi mokojtilis tikchiuas tlen Jehová kineki? ¿Melak tikintlasojtla mokniuan niman tikmachilia ika melak noneki tikinpaleuis makitekichiuilikan Jehová? ¿Yotikitak kenon toTajtsin yomitspaleui nochipa ipan monemilis? Tla tejua otikijto kema itech nochi yejuin tlajtoltilistin, ¿kijtosneki ika yomitstlapejpenijkej tias ipan iluikak? Ka, xyejon kijtosneki. ¿Tleka ijkon tikijtouaj? Pampa nochimej akin  kitekichiuiliaj toTajtsin uelis ijkon nomachiliskej maski akin xtlapejpeniltin. Jehová uelis kinmakas iespíritu santo nochimej itekipanojkauan ika kinyolchikauas, maski san kanon kichiaj nemiskej, ipan iluikak noso ipan tlaltikpaktli. Niman noijki, tla tejua timotlajtoltia tla yomitstlapejpenijkej, yejon kijtosneki ika ka. Akin yokintlapejpenijkej xnotlajtoltiaj yejon, pampa yejuamej kuajli kimatstokej ika kema. Xometlamatij ika Jehová yokintlapejpeni.

16. ¿Kenon tikmatij ika xnochimej akin kiseliaj espíritu santo yokintlapejpenijkej mauiyan iluikak?

¹⁶ Biblia tlajtoua itech miyekej akin kuajli yokitekichiuilijkej Jehová ika okiselijkej iespíritu santo, san ika, xoyajkej iluikak. Se neskayotl, ijkon opanok itech Juan Teapolaktijketl, Jesús okijto ika yejua se tlakatl katka xijkon ken oksekimej. San ika, noijki okijto ika yejua xiaskia iluikak iuan tlanauatis (Mateo 11:10, 11). Okse neskayotl, David. Yejua noijki okiyekan espíritu santo (1 Samuel 16:13). Niman espíritu santo okipaleui makasikamati seki tlamachtiltin itech Jehová niman noijki espíritu santo okiyekan makijkuilo seki itech Biblia (Marcos 12:36). San ika, Pedro, itlatitlankauj Cristo, okijto ika David “xotlejkok ne iluikak” (Hechos 2:34). Jehová ika iespíritu santo okichiuj ika yejuin tlakamej mauelikan makichiuakan miyek tlajtlamach. San ika, xokikuik iespíritu santo ika kintlapejpenis mauiyan iluikak. ¿Kijtosneki ika yejuamej xoyolmelaujkanenkej itech toTajtsin noso itlaj okinpolo ika yejon xuelis nemiskej iluikak? Ka. San kijtosneki ika Jehová kinmakas oksejpa innemilis ipan tlaltikpaktli, ipan se xochitlalpan (Juan 5:28, 29; Hechos 24:15).

17, 18. a) ¿Kanon kichiaj nemiskej miyekej akin kitekichiuiliaj toTajtsin ipan yejuin tonajli? b) ¿Katlejua tlajtoltilistin nonankiliskej ipan okse tlamachtijli?

¹⁷ Miyekej akin kitekichiuiliaj toTajtsin ipan yejuin tonajli xiaskej iluikak. Ijkon ken Abrahán, David, Juan Teapolaktijketl niman oksekimej akin yeuejkaui onenkej, yejuamej kichiaj nemiskej ipan tlaltikpaktli ijkuak tlayekanas iTekiuajyo toTajtsin (Hebreos 11:10). Ipan iluikak nemiskej 144,000 akin iuan uajtlanauatijtoskej Cristo. San ika, Biblia kijtoua ika ipan sa itlamiyan tonaltin nokauaskej san achijtsitsintin tlapejpeniltin ipan tlaltikpaktli (Apocalipsis 12:17). Yejon kijtosneki ika melak miyekej itech 144,000 yomijkej niman aman inemij ipan iluikak.

¹⁸ San ika, tla yakaj kijtoua ika yejua yokitlapejpenijkej, ¿kenon noneki kitaskej tokniuan akin kichiaj nemiskej ipan tlaltikpaktli? Tla yakaj ipan totlanechikol peua kikua pan niman koni vino ijkuak noilnamiki imikilis Cristo, ¿kenon noneki tikitaskej? Niman tla kech ika miyekej akin yokintlapejpenijkej ok miyekixtiuej, ¿noneki tajmanaskej ipampa yejon? Ipan okse tlamachtijli tikinnankiliskej yejon tlajtoltilistin.