1-3. a) ¿Imaraykun 33 watapi pentecostés fiesta ancha sumaq karan? b) ¿Ima profecian chay p’unchay junt’akuran? (Kay paginapi dibujota qhaway.)

JERUSALÉN llaqtapin pentecostés fiesta sapa watan ruwakuq. 33 watapin ichaqa ancha sumaq karan. Tutallamantan uma sacerdoteqa templopi sapa p’unchay jaywana sacrificiota jaywaran. Las nueve horastan ichaqa iskay t’antata ofrendata jina jaywaran, chay t’antakunaqa “ñaupaqkaq” trigo rurumanta ruwasqan karan. Chay ofrendataqa kayman chayman maywispan jaywaran (Lev. 23:15-20). Chay qhepamanmi llaqtaqa trigo cosechayta qallariranku.

² Askha watakunañan Jehová Diosman iskay t’antata ofrendapi jaywaqku. Chaymi tuparan 33 watapi pentecostés fiestapi pasasqanwan. Jerusalén llaqtapin altos wasipi 120 iñiqkuna juñukuranku (Hech. 1:13-15). Chaypin junt’akuran 800 watakuna ñaupaqta profeta Joelpa nisqan (Joel 2:28-32; Hech. 2:16-21). ¿Iman pasaran?

³ (Leey Hechos 2:2-4). Chay p’unchaymi Diosqa santo  espiritunta qoran chay cristianokunaman, chayraykun chay watapi pentecostés fiestaqa ancha sumaq karan (Hech. 1:8). Chay p’unchayqa askha runakunan Jerusalenman chayamuranku, paykunatan cristianokunaqa rimasqanku simipi predicayta qallariranku. Chaymi apóstol Pedroqa llapa runakunaman willaran imachus sucedeshasqanta imarayku importante kasqantapas. Chaymantataq niran: “Juchaykichista saqepuspa Diosman kutirikuychis, jinaspa Jesucristoq sutinpi sapankaykichis bautizachikuychis, juchaykichis pampachasqa kananpaq, jinan santo espirituq atiy qokuyninta chaskinkichis”, nispa. Chay p’unchaymi 3.000 jina bautizakuranku santo espiritutapas chaskiranku (Hech. 2:37, 38, 41).

4. a) ¿Imaraykun llapanchis entiendenanchis 33 watapi pentecostés fiestapi pasasqanta? b) ¿Iman yaqapas pasanman karan ñaupa tiempopi chay p’unchayllapitaq? (19 paginapi willakuyta qhaway.)

⁴ ¿Pitan representan uma sacerdote? Jesustan. ¿Iskay t’antakunari? Ajllasqa cristianokunatan. Paykunatan nikun cosechapi ñaupaq kaq ruru nispa, paykunaqa pantaq runakuna ukhumantan ajllasqa karanku (Sant. 1:18). Diosmi paykunata wawankuna kananpaq aceptaran, gobiernonpi Jesuswan kuska kamachikamunankupaqtaq ajllaran (1 Ped. 2:9). Chay gobiernon llapa kasukuq runakunaman lliu necesitasqankuta qonqa. Chaymi paraisopiña otaq janaq pachapiña tiyasun chaypas entiendenanchis 33 watapi pentecostés fiestapi pasasqanta. [1]

5. Dios ajllaqtinqa manan sapa kutillachu nina rauray rijurin, ¿imaynapin chayta yachanchis?

⁵ Jerusalenpi 120 iñiqkunaqa manan iskayarankuchu santo espirituwan Diospa ajllasqan kasqankumanta. Llapallankupin nina rauray jina umanku patapi santo espíritu karan, chaymi mana jayk’aq rimasqanku simikunapi rimaranku (Hech. 2:6-12). Ichaqa manan sapa ajllakuqtinchu nina raurayqa rijurin. ¿Imaynapin chayta yachanchis? Chay p’unchayllapitaqmi Diosqa waranqanpi runakunata ajllaran. Ichaqa manan nina rauray jinaraqchu santo espirituqa umanku patapi karan. Paykunaqa bautizakusqanku ratopin ajllasqa karanku (Hech. 2:38). Wakintaq ajllasqa karanku bautizakusqankumanta tiempoq pasasqanmanña, imaynan Samaria llaqtayoq iñiqkuna ajllasqa karanku jina (Hech. 8:14-17). Chaymantapas Corneliopas wasinpi lliu kaqkunapas manaraq bautizakushaqtinkun ajllasqa karanku (Hech. 10:44-48).

6. a) ¿Imatan chaskinku llapa ajllasqa cristianokuna? b) ¿Imaraykun ajllasqa cristianokuna mana iskayankuchu janaq pachapi tiyanankumanta?

⁶ Wakin cristianokunaqa ratullan aceptanku ajllasqa kasqankuta, wakintaq pisi-pisimanta aceptanku. Imaynaña kaqtinpas llapankun santo espirituta chaskinku. Pablon niran: “Allin willakuykunapin iñirankichis, chaymi [...] Diospa prometesqan santo espirituwan sellosqa karankichis. Santo espiritun herenciata chaskinanchis señalqa”, nispa (Efes. 1: 13, 14). Pabloq nisqan jina, Jehová Diosmi llapa ajllasqa cristianokunaman santo espiritunta qon, chaymi janaq pachapi tiyanankupaq garantía jina. Chayraykun paykunaqa mana iskayankuchu ajllasqa kasqankumanta (leey 2 Corintios 1:21, 22; 5:5).

7. ¿Imatan sapanka ajllasqa cristiano ruwanan janaq pachaman rinanpaq?

⁷ Ichaqa, ¿seguroñachu ajllasqa cristianoq janaq pachapi tiyanan? Manan. Diosqa invitanmi janaq pachapi tiyananpaq, ichaqa chay cristianomantan kanqa janaq pachaman jaykunan mana jaykunanpas. Pedron niran: “Astawanraq kallpachakuychis, Diospa wajasqan kasqaykichispipas paypa ajllasqan kasqaykichispipas allin tajasqa kanaykichispaq. Chaykunatachus ruwankichis chayqa, manan jayk’aqpas urmankichischu. Chay jinapin, Señorninchis qespichiqninchis Jesucristoq wiñay qhapaqsuyunman sumaq chaskiykusqa jaykuykapunkichis”, nispa (2 Ped. 1:10, 11). Chaymi sapanka ajllasqa cristiano Jehová Diospaq junt’aq sonqo kanan (Heb. 3:1; Apo. 2:10).

8, 9. a) ¿Imaraykun yaqa llapa cristianokuna mana entiendenkuchu juj cristiano ajllasqa kaqtin imaynachus sientekusqanta? b) ¿Imaynapin juj cristiano yachan ajllasqa kasqanta?

⁸ Yaqa llapa cristianokunan mana entiendenkuchu juj cristiano ajllasqa kaqtin imaynachus sientekusqanta. ¿Imaraykun mana entiendenkuchu? Mana ajllasqa kasqankuraykun. Jinaspapas Diosqa manan janaq pachapi tiyananchispaqchu kamawaranchis, aswanpas kay pachapi tiyananchispaqmi (Gén. 1:28; Sal. 37:29). Ichaqa Jehová Diosmi wakin cristianokunata santo espiritunwan ajllan janaq pachapi tiyanankupaq, reykuna sacerdotekuna kanankupaqwan. Chay espirituq atiyninwanmi piensasqankuta cambianku. Chaymantapachan janaq pachapi tiyayta munapunku (leey Efesios 1:18).

⁹ Ichaqa, ¿imaynapin juj cristiano yachan ajllasqa kasqanta? Chayta yachanapaq piensasun Roma llaqtayoq ajllasqa cristianokunaman Pabloq nisqanta. Niranmi: “Santo espiritutaqa chaskirankichis manan yapamanta manchapakuypa kamachin kanaykichispaqchu, aswanpas Diospa wawankuna nisqa kaytan chaskirankichis, chaymi Diosmantaqa mañakunkichis: ¡Yayalláy! nispa. Santo espiritullataqmi espiritunchiswan kuska willakun Diospa wawankunapuniña kasqanchista”, nispa (Rom. 1:7; 8:15, 16). Chay textoq nisqan jina, santo espirituq atiyninwanmi cristianoqa seguro kashan janaq pachapi Jesuswan kuska kamachikamunanmanta (1 Tes. 2:12).

10. 1 Juan 2:27 textoq nisqanman jina, ¿imaraykun ajllasqa cristianokuna manan necesitankuchu ajllasqa kasqankuta jujpa ninanta?

 ¹⁰ Janaq pachapi tiyanankupaq ajllasqa kaqkunaqa manan necesitankuchu ajllasqa kasqankuta jujpa ninantaraqchu. Jehová Diosmi paykunata yanapan seguro kanankupaq. Apóstol Juanpa nisqan jina ajllasqa cristianokunaqa Jehová Diosmantan santo espirituta chaskiranku, chaymi cheqaq kaqta yacharanku. Nillarantaqmi: “[Jehová Diosmanta] chaskisqaykichis santo espiritun qankunapi kashan, chaymi mana jujpa yachachinanraqchu kankichis”, nispa (1 Juan 2:20, 27). Juanpa nisqan jina ajllasqa cristianokunaqa manan necesitankuchu ajllasqa kasqankuta jujpa willananta, aswanpas Jehová Diosmi ancha atiyniyoq santo espiritunwan willan ajllasqa kasqankuta. Chaywanpas ajllasqaña mana ajllasqaña kaspapas, llapallanchismi necesitanchis Diospa yachachisqan kayta.

11, 12. a) ¿Imatan piensanman ajllasqa cristiano? b) ¿Imamantan ajllasqa cristiano mana iskayanchu?

¹¹ Janaq pachapi tiyanankupaq cristianokuna ajllasqa kaspankuqa piensayninkutan cambiapunku, chaymi Jesusqa niran wajmanta nacesqankuta (Juan 3:3, 5). Jesusmi niran: “Wajmantan nacenaykichispuni [...]. Wayraqa may munasqanmantan wayramun, suenasqallantan uyarinki, manataqmi yachankichu maymanta jamusqantapas, maymanchus risqantapas, chay jinallataqmi espiritumanta pipas naceqqa”, nispa (Juan 3:7, 8). Chay textoq nisqan jina, mana ajllasqa cristianoqa manapunin entiendenmanchu ajllasqa cristiano imaynachus sientekusqanta. [2]

¹² Yaqapaschá ajllasqa cristianoqa piensanman: “¿Imaraykutaq noqatari ajllawaran manataq juj cristianotachu?”, nispa. Yaqapaschá piensanku janaq pachapi ruwaykunata mana ruway atinankupaq. Chaywanpas Diospa ajllasqan kasqankumantaqa manapunin iskayankuchu. Chaymi ancha kusisqa sientekunku agradecesqataq kankupas. Chhaynatan apóstol Pedropas sientekuran, chayraykun niran: “Señorninchis Jesucristoq Yayan Diosta yupaychasun, paymi jatun khuyapayakuyninman jina wañusqanmanta Jesucristoq kausarimpusqanwan wajmanta nacechiwaranchis, mana kuyuriq suyakuyniyoq kananchispaq. Chay jinapin mana ismuq, mana qhellichakuq, mana tukukuq herenciata chaskinkichis. Chaytan Diosqa qankunapaq janaq pachapi waqaychashan”, nispa (1 Ped. 1:3, 4). Chayta leespan ajllasqa cristianokunaqa entiendenku paykunapaqpuni chay simikunata Jehová Dios qelqachisqanta.

13. a) ¿Imaynatan ajllasqa cristianoq piensaynin cambian? b) ¿Pin ajllasqa cristianoq piensayninta cambian?

 ¹³ Rikumusqanchis jina, Diosmi santo espiritunwan ajllasqa cristianoq piensayninta cambian. ¿Imaynata? Manaraq ajllasqa kashaspaqa kay pachapi tiyananpichá piensaran. Rikuytachá munaran imaynatan Dios mana allinkunata tukuchispa kay pachata paraisoman tukuchinanta. Piensaranpaschá wañupuq familianta otaq munakusqan amigonta kausarimpuqtin chaskiyta. Yaqapaschá piensaran sumaqta wasinta jatarichiyta, jinaspa huertonpi plantasqan sach’akunamanta mijuyta (Is. 65:21-23). Jehová Dios janaq pachapi tiyananpaq ajllaqtinmi ichaqa chay cristiano piensayninta cambiapun. ¿Imarayku? ¿Sinchi llakiq ñit’isqan kasqanraykuchu? ¿Nishuta ñak’arisqanraykuchu? ¿Kay pachapi tiyaspa aburrikunanpaq piensaspachu? Icha, ¿kay pachapi kaspa mana kusisqa kananpichu piensaran? ¿Imaynachus janaq pachapi kausay kasqantachu yachayta munaran? Manan chaykunaraykuchu piensaynintaqa cambian. Aswanpas Jehová Diosmi santo espiritunwan chay cristianoq piensayninta cambian. Chayraykun manaña kay pachapi kausaytachu suyakun, aswanpas janaq pachapi kausaytan.

14. ¿Imatan piensanku ajllasqa cristianokuna kay pachapi kausayninkumanta?

¹⁴ Chhaynaqa, ¿wañukapullaytañachu ajllasqa cristianokuna munanku chhaynapi janaq pachaman rinankupaq? Manan. Apóstol Pablon niran: “Aycha cuerpopi kausashaspaqa llakiq ñit’isqan llakipakushanchis. Manan aycha cuerponchis chinkachiytaqa munasunmanchu, aswanpas janaq pacha cuerpoyoq kaytan munasunman. Chay jinapin wañuq cuerponchista wiñay kausay jap’ikapunqa”, nispa (2 Cor. 5:4). Chaymi rikuchin ajllasqa cristianokunaqa wañuyta mana munasqankuta. Aswanpas kay pachapi kausayninkutan anchata valoranku, kusisqataqmi Diosta servinku familiankuwan amigonkunawan kuska. Imataña ruwashaspapas Diospa promesanpi piensaspan kausanku (1 Cor. 15:53; 2 Ped. 1:4; 1 Juan 3:2, 3; Apo. 20:6).

15. ¿Imakuna ruwasqanraykun juj cristiano piensanman ajllasqa kananpaq?

¹⁵ Yaqapaschá ajllasqa kanaykipaq piensashanki raurashaq sonqowan predicasqaykirayku, Jehová Diospa yanapayninta vidaykipi sut’ita rikusqaykirayku, tukuy sonqomanta Diosta servisqaykirayku, runakunata iñiqmasikunatapas sinchita munakusqaykirayku, yanapanaykipaq tukuy imata ruwasqaykirayku, Bibliata sinchita estudiasqaykirayku, aswan-aswantaraq Diospa yachachikuyninkunata t’aqwisqaykirayku (1 Cor. 2:10). Chaykuna ruwayqa ancha allinpunin, ichaqa manan chayraykuchu ajllasqa cristiano kawaq. Llapa chaykunata ruwananchispaqmi Diosqa santo espiritunta qowanchis ajllasqaña mana ajllasqaña kaqtinchispas. Jinaspapas sichus tapukushanki ajllasqachus icha manachus kasqaykita chayqa, manan ajllasqachu kanki. Ajllasqakunaqa  manan iskayankuchu ajllasqa kasqankumanta, paykunaqa sut’itan yachanku janaq pachapi tiyanankupaq ajllasqa kasqankuta.

16. Janaq pachamanqa manan llapa santo espirituta chaskiqkunachu rinqaku, ¿imaynapin chayta yachanchis?

¹⁶ Biblian willawanchis junt’aq sonqo runakunamanta, paykunamanmi Dios santo espiritunta qoran. Jujninmi karan Bautizaq Juan, paymantan Jesusqa niran sumaq runa kasqanta ichaqa manan janaq pachamanchu riran (Mat. 11:10, 11). Davidtapas santo espiritun yanaparan (1 Sam. 16:13). Chaymi sasa entiendenakunata entienderan, Bibliamanta wakin librokunatapas qelqaran (Mar. 12:36). Ichaqa apóstol Pedron niran: “Manan Davidchu janaq pachamanqa oqarisqa karan”, nispa (Hech. 2:34). Jehová Diosmi santo espiritunwan paykunata yanaparan sasa ruwanakunata ruwanankupaq. Chaywanpas manan janaq pachapi tiyanankupaqchu ajllasqa karanku. Aswanpas Diosmi decidiran kay pachapi tiyanankupaq, chaymi paykunata kausarichinqa (Juan 5:28, 29; Hech. 24:15).

17, 18. a) ¿Maypin astawanqa tiyanqaku kay tiempopi Diosta serviqkuna? b) ¿Imakunamantan qatimuq estudiopi yachasun?

¹⁷ Kay tiempopi Diosta serviqkunaqa yaqa llapankun mana janaq pachamanchu rinqaku, aswanpas kay pachapin Diospa gobiernonpi tiyanqaku imaynan Abrahampas, Davidpas, Bautizaq Juanpas, jujkunapas tiyanqaku jinata (Heb. 11:10). Janaq pachapiqa Cristowan kuskan kamachikamunqaku 144.000 reykuna. Biblian ichaqa willaranña tukukuy p’unchaykunapi ajllasqakuna pisillaña kay pachapi qhepananta (Apo. 12:17). Chhaynaqa, yaqa llapankuñan wañupuspanku janaq pachapi kashanku.

¹⁸ Ichaqa, ¿imaynatan kay pachapi tiyanankupaq suyakuyniyoq cristianokuna qhawarinanku pipas ajllasqa kasqanta niqtin? Jesuspa wañupusqanta yuyarina p’unchaypi pi iñiqmasipas t’antata mijuqtin vinotapas ujaqtin, ¿imaynatan qhawarina? ¿Imanaqtinmi mana llakikunachu ajllasqa cristianokunaq yapakusqanmanta? Chaykunatan qatimuq estudiopi yachasun.