1-3. a) Huata 33 Pentecostés punllaca ¿imamandata sumaj carca? b) ¿Pipa shimicunata pactarirca? (Callari dibujota ricupangui).

HUATA 33 domingo tutamandami can. Pentecostés fiesta cashcamandaca cai punllaca sumaj, jatun punllami can. Cai fiestataca trigo cozecha callarijpimi cada huata Jerusalén llactamanda gentecunaca ruran carca. Chai punllapashmi sacerdotecunata mandaj sacerdoteca, shuj punllacunapishnallata sacrificiocunataca tutamanda ruran carca. Cutin ña las 9 shinataca, sacerdoteca ‘punda fucushca granohuan’ o punda fucushca trigohuan rurashca ishcai tandacunata caiman chaiman cuyuchishpami Taita Diosman cun carca (Levítico 23:15-20).

² Israelitacunaca ashtaca huatacuna huashamanllatami, Jehovamanga ishcai tandacunata cada huata caran carca. Chai ruraica, jipa punllacunapi importante cosascuna pasanatami ricuchijurca. Chai importante cosascunaca Jerusalén llactapi, huata 33 Pentecostés fiestapimi pactarirca. Chai punllami Jesusta 120 catijcunaca shuj cuartopi Taita Diosta mañanajurca (Hechos 1:13-15). Profeta Joelca, chai punlla ima pasanataca ñami 800 huatacuna huashamanllata villashcarca (Joel 2:28-32; Hechos 2:16-21). Shinaca ¿imata chai punllapica pasarca?

³ (Hechos 2:2-4, liingui). Chai sumaj punllapica, Taita Diosca paipa  espíritu santohuanmi Jesuspa 120 catijcunata agllarca (Hechos 1:8) (“¿Imatata nisha nin?” nishca recuadrota ricupangui). Chai fiesta punllaca ashtaca ashtaca gentecunami shamunajurca. Chaimandami, Jesusta catijcunaca paicuna imata ricushcata, imata uyashcata chai gentecunaman villai callarirca. Apóstol Pedroca chai punlla ima pasashcata, chai cosascuna imamanda importante cashcatami intindichirca. Chai jipaca nircami: ‘Ninanda llaquirishpa Diospaman tigrarichi. Tucuicuna Jesucristopa shutipi bautizarichi. Shina rurajpimi Diosca cangunapa juchacunata anchuchishpa, paipa jucha illaj espirituta cangunaman caramunga’ nishpa. Chaimandami, chai punllaca 3 mil gentecuna bautizarishpa, paicunapash Taita Diospa espirituta chasquirca (Hechos 2:37, 38, 41).

4. a) Huata 33 Pentecostespi ima pasashcataca ¿imamandata ali yachana capanchi? b) Chai punllapillata ashtaca huatacuna huashamanga ¿imata pasashcanga? (Cai tema tucuripi notata ricupangui).

⁴ Sacerdotecunata mandaj sacerdotepash, tandacunapash ¿imatata ricuchin? Sacerdotecunata mandaj sacerdoteca Jesustami ricuchin. Cutin, ishcai tandacunaca espíritu santohuan agllashca ungidocunatami ricuchin. Ungidocunaca juchayu gentecunapuramanda agllashcacunami can. Bibliapi nishca shinaca, paicunaca ‘punda fucushca granocuna’ cuendami can (Santiago 1:18). Paicunataca Taita Diosca huahuacunatashna chasquishpami, paipa Reinopi Jesushuan jahua cielomanda mandachun agllashca (1 Pedro 2:9). Jehová Diosca paipa Reino mandajpimi paita cazuj gentecunataca ashtaca bendicianga. Chaimandami, cai Alpapi causana o jahua cielopi causana esperanzata charishpapash, huata 33 Pentecostespi ima pasashcata ali yachana canchi [1] (cai tema tucuripi notata ricupangui).

5. ¿Imamandata ninchi, Taita Dios paipa espirituhuan pitapash agllajpica na siempre chai cosascunallata pasanllu nishpa?

⁵ Jesusta 120 catijcunaca, Jehová paipa espíritu santohuan paicunata agllashcatami tucui shunguhuan crirca. Espíritu santoca rupajuj ninashnami tucuicunapa uma jahuapi tiarirca. Chaimandami, paicunaca shuj shuj shimicunapimi parlai callarirca (Hechos 2:6-12). Shinaca, Taita Dios paipa espirituhuan pitapash agllajpica ¿siemprechu shina pasan? Na, na siempre shina pasanllu. ¿Imamandata shina ninchi? Por ejemplo, chai punllallatami Taita Diosca paipa espirituhuan ashtaca gentecunata agllarca. Shinapash, Bibliapi nishca shinaca, paicunapa uma jahuapica rupajuj ninashnaca na ricurircachu. Bautizarijpimi Taita Diosca espíritu santohuan paicunataca agllarca (Hechos 2:38). Shinapash, na tucuicunatachu bautizarijpi Taita Diosca paipa espirituhuan agllan. Samaria llactamanda Jesusta catijcunataca, paicuna bautizarishca punllamanda asha tiempo jipami agllarca (Hechos 8:14-17). Cutin Cornelio runaguta, Corneliopa familiataca paicuna nara bautizarijpillatami Taita Diosca paipa espirituhuan agllarca (Hechos 10:44-48).

6. a) ¿Imatata tucui ungidocuna chasquin? b) Espíritu santota chasquishpaca ¿imatata ungidocunaca crin?

⁶ Huaquingunaca Taita Dios paipa espirituhuan paicunata ungidocuna cachun agllashcataca ñapashmi cuenta japin. Cutin shujcunaca asha ashami cuenta japishpa rin. Imashina cajpipash, tucuicunallatami jahua cielopi imata chasquinata ali yachan. Chaimandami apóstol Pabloca nirca: ‘Shina crijpimi, carashapachami nishca paipa jucha illaj espirituhuan sellai tucushca canchi. Chai espiritumi Dios quishpichishcamanda ñucanchi imata japigrinatapash [shuj churajunatashna, NM] ricuchijun’ nishpa (Efesios 1:13, 14). Imashinami ricunchi, Jehová Diosca tucui ungidocunamanmi paipa espíritu santota cun. Espíritu santota chasquishpami, ungidocunaca jahua cieloman ringapaj ciertopacha agllai tucushcata tucui shunguhuan crin. Chaimandami apóstol Pabloca nirca, espíritu santomi shamuj punllacunapi jahua cielopi ñucanchi imata japigrinatapash shuj churajunatashna ricushpa crichun ayudan nishpa (2 Corintios 1:21, 22; 5:5, liingui).

7. Jahua cieloman ringapaca ¿imatata cada ungido rurana can?

⁷ Taita Dios paipa espirituhuan pitapash agllashpaca  ¿ña jahua cieloman rinatachu nijun? Na, na chaita nijunllu. Ungidocunaman jahua cieloman rina esperanzata Taita Dios cushcatallami nijun. Chaimandami apóstol Pedroca nirca: ‘Cangunata Dios cayashpa agllashcata yariajlla causashpami ashtahuan shinlli tucuna canguichi. Caicunata pactachishpa causashpami, ima horapash na urmashpa causanguichi. Shina causajpimi ñucanchita Mandaj, Quishpichij Jesucristo causaita causaicaman mandajuj llactaman yaicuchun saquinga. Paica na jarcashpa, cushijuihuanmi yaicuchun saquinga’ nishpa (2 Pedro 1:10, 11). Imashinami ricunchi, cada ungidomi Jehovapa ñaupajpi ali cangapaj esforzarina can. Jahua cieloman rina esperanzata chasquishpapash, ungidocunaca paicunapa tucui causaipi Jehovata sirvishpallami ciertopacha jahua cielopi causangapaj ringa (Hebreos 3:1; Apocalipsis 2:10).

8, 9. a) ¿Imamandata Jesusta ashtaca catijcunaca ungidocunata Jehová imashina agllajtaca nali intindin? b) ¿Imashinata ungidocunaca agllai tucushca cashcata cuenta japin?

⁸ Cunan punllacunapica, Jesusta ashtaca catijcunaca Jehová paipa espíritu santohuan pitapash imashina agllajtaca nali intindinllu. ¿Imamandata nali intindin? Jehová Diosca gentecunata rurashpaca cai Alpapi para siempre causana munaihuanmi rurarca. Chaimandami, Jehová paipa espirituhuan pitapash jahua cielopi causachun imashina agllajtaca na intindi ushan (Génesis 1:28; Salmo 37:29). Shinapash, Jehová Diosca huaquingunataca jahua cieloman rishpa reycunashna, sacerdotecunashna mandachunmi agllashca. Jehovapa espirituta chasquishpaca paicunapa yuyaica cambianmi. Chaimandami, cai Alpapi causana munaita charinapa randica, jahua cielopi causana munaita charin (Efesios 1:18, liingui).

⁹ Shinapash ¿imashinata ungidocunaca espíritu santohuan agllai tucushcata cuenta japin? Apóstol Pabloca Roma llactamanda ungidocunata o ‘cayai tucushcacunataca’ nircami: Cangunaca ‘gañanshna cutin manllaihuan causanata yachachij espiritutaca, na chasquishcachu canguichi. Ashtahuangarin, Diospa huahuacuna tucushpa causanata yachachij, paipa espiritutami chasquircanguichi. Paimandami Taita Diostaca: “¡Ñuca Taitalla!” nishpa caparishpa mañanajunchi. Diospa espiritullatami ñucanchi shungupica: “Cangunaca, Taita Diospa huahuacunami canguichi” nishpa yarichijun’ nishpa (Romanos 1:7; 8:15, 16). Imashinami ricunchi, Jehovapa espíritu santo ayudajpimi ungidocunaca Jehová paicunata agllashcata, Jesushuan jahua cielomanda mandana esperanzata ciertopacha charishcatapash cuenta japin (1 Tesalonicenses 2:12).

10. ¿Imamandata 1 Juan 2:27​pica nin, ungidocunaca pipash yachachichunga na minishtinllu nishpa?

¹⁰ Jahua cieloman rina esperanzata chasquijcunaca, quiquindami Jehová Diosca agllashca nishpa, pipash nijuchunga na minishtinllu. Jehovallatami paicunata agllashcata tucui shunguhuan crichun ayudan. Apóstol Juanga ungido huauquicunamanga escribircami: ‘Cangunaca, aceiteta talishpa javijpishnami Diospa jucha illaj espirituta charinguichi. Shina charishpami, imatapash tucuita yachanguichi’ nishpa. Ashtahuanbash nircami: ‘Aceiteta talishpa javinshna Diospa espirituta Cristo carajpimi, canguna chasquijpi cangunapi causajun. Shina cashpami, pitapash na yachachihuai ninguichi’ nishpa (1 Juan 2:20, 27). Tucuicunallatami ungido cashpa o na cashpapash, Jehová yachachichun minishtinchi. Shinapash, ungidocunaca quiquindaca jahua cieloman richunmi Jehová Diosca agllashca nichunga na minishtinllu. Jahua cieloman rina cashcata ciertopacha crichunga, Jehovallatami ungidocunamanga paipa espíritu santota cushpa ayudan. Espíritu santoca Diospa ninan ushaimi can.

11, 12. a) ¿Imatata ungidocunaca huaquinbica pensarin? b) ¿Imatata ungidocunaca tucui shunguhuan crin?

¹¹ Jahua cieloman rina esperanzata chasquishpaca ungidocunapa yuyaica cambianmi. Chaimandami Jesusca nirca, ‘cutinmi huacharina’ can  nishpa (Juan 3:3, 5). Ashtahuanbash nircami: ‘Cutin huacharinapachami canguichi nishcamandaca, na manllarinachu cangui. Huaira shamushpaca maita munashcata huairamunllami. Maimanda shamujujta, maiman yalijujtapash na yachanguichu. Huairataca huacashpa yalijujtallami uyangui, Diospa espiritumanda tucui huacharijcunapash shinallatami’ can nishpa (Juan 3:7, 8). Imashinami ricunchi, Jehová paipa espirituhuan imashina agllajtaca ungidocunallami alipacha intindi ushan [2](cai tema tucuripi notata ricupangui).

¹² Ungidocunaca huaquinbica cashnami pensarin: ¿Imashpashi ñucapa randica, na shuj huauquita Jehová Diosca agllarca? nishpa. Huaquinbica chai responsabilidadta na pactachi ushashachu yashpami shina sintirin. Imashina cashpapash, jahua cielopi causachun Jehová paita agllashcatami tucui shunguhuan crin. Chaimandami ninanda cushijushpa agradicin. Ungidocunaca apóstol Pedro cuendami sintirin. Paica nircami: “Ñucanchi Apunchi Jesucristopaj Taita Diosca, aligumari cangui ni tucushca cachun. Paica, huañushcacunapaj chaupimanda Jesucristota causachishpami, ñucanchitaca pai ninanda llaquijunshnallata, causaita causagrinata shuyachun, mushujta huacharishpa causanajuchun rurarca. Cangunaman carangapaj jahua pachapi alichishca tiajujta japigrichunmi, chashna rurarca. Chai caranaca, na ismunalla na mapayanalla na tucurinallachu” can nishpa (1 Pedro 1:3, 4). Ungido huauquicuna caita liishpaca, Jehová Dios paicunaman cai shimicunata nijushcatami sintin.

13. a) Jehová Dios paipa espirituhuan agllajpica ¿imashinata ungidocunapa yuyaica cambian? b) ¿Imamandata ungidocunapa yuyaica cambian?

¹³ Imashinami yachajushcanchi, Jehová paipa espirituhuan agllajpica ungidoca paipa yuyaita cambianmi. Huaquin ungidocunaca, jahua cieloman ringapaj nara agllai tucushpaca, cai Alpapi para siempre causana esperanzatami charishcanga. Shinallata, Jehová tucui nali ruraicunata tucuchishpa, cai Alpata shuj paraisota ruranatami tucui shunguhuan shuyajushcanga. Ashtahuangarin, cai Alpapi paipa familia o amigo causarijpi cushijushpa chasquinata, Paraisopi shuj huasita rurashpa, pai tarpushca frutacunata micujushcatami pensarijushcanga (Isaías 65:21-23). Shinapash, jahua cieloman rina esperanzata chasquishpaca ungidocunapa yuyaica cambianmi. ¿Imamandashi cambiarca? ¿Yapa llaquilla caimanda o ninanda sufrishpa causaimandacha cambiarca? O ¿cai Alpapi para siempre causanaca aburridomi canga yashpachu cambiarca? Na cashpaca ¿jahua cielopi causai imashina cashcata yachangapallachu shina pensari callarirca? Na, na shinachu can. Jehová paicunapa yuyaita cambiajpimi ungidocunapa yuyaica cambian. Jehová Diosca espíritu santota utilizashpami ungidocunapa yuyaita cambiashpa, jahua cielopi imata chasquinata yuyachin.

14. Cai Alpapi causaimandaca ¿imatata ungidocunaca yuyan?

¹⁴ Shinaca, ungidocunaca jahua pachaman rinata yachashpaca ¿ucha huañushcaiman nishpachu pensarin? Na. Apóstol Pabloca ungidocuna imashina sintirishcata parlashpaca nircami: “Ñucanchica cai carpa huasipi causanajushpami llaquirishpa aij ninajunchi, shaijushca sintirinajunchi. Shinapash, caitaca na chingachingapaj munanchichu. Ashtahuangarin, shujtami churaringapaj munanchi. Shinami causaica, cai huañunalla cuerpotaca langanshna tucuchinga” nishpa (2 Corintios 5:4, NM). Cai textopica, apóstol Pabloca ungidocunapa huañunalla cuerpotaca ‘carpa huasihuanmi’ chimbapurarca. Ungidocunaca na cai cuerpota chingachingapaj munanchichu nishpaca, na huañungapaj munashcatami ricuchijun. Ungidocunaca paicunapa familiahuan, amigocunahuan Jehovata sirvishpa, cushilla causashpa catingapami munan. Shinapash, imata rurajushpapash Jehová paicunaman ima caranataca na cunganllu (1 Corintios 15:53; 2 Pedro 1:4; 1 Juan 3:2, 3; Apocalipsis 20:6).

15. ¿Imashinata na ungido cashcata yachai usharin?

¹⁵ ¿Jahua cieloman richun Jehová quiquindapash agllashcatachu sintingui? Chaita sintishpaca cai tapuicunapi pensaripai: ¿Ninanda cushijushpachu siempre villachingapaj munangui?  ¿Bibliataca ninandachu yachajungapaj munangui? ¿‘Pipash na yachai ushanalla’ yuyaicunatachu yachajunata gushtangui? (1 Corintios 2:10). ¿Villachijujpi Jehová alipacha ayudashcata cuenta japishcanguichu? ¿Tucui shunguhuanllu Diospa munaita pactachingapaj munangui? ¿Huauquipanicunata ninanda juyashpachu, paicunapash Jehovata sirvichun ayudangapaj munangui? ¿Jehová ashtaca viajeta quiquinda ayudashcatachu ricushcangui? Cai tapuicunata ari nishpaca ¿quiquin ungido cashcatachu ricuchin? Na, Jehovata tucui sirvijcunami na ungidocuna cashpapash shina sintirita ushanchi. Jehová Diosca ungidocunatapash, na ungidocunatapashmi paipa espirituta cushpa ayudan. Shinapash, pipash ungidocha cani nishpa tapurijushpaca, na ungido canllu. Ungidocunaca ima horapash ungidocha cani nishpaca na tapurijunllu. Paicunaca ungido cashcataca alimi yachan.

16. ¿Imamandata ninchi, espíritu santota chasquishpapash na tucuicuna jahua cieloman ringachu nishpa?

¹⁶ Bibliapica Jehovata ashtaca sirvijcuna espíritu santota chasquishpapash, jahua cieloman na rishcatami parlan. Por ejemplo, Bautizaj Juanmandaca Jesusca alimi parlarca. Shinapash nircami, Juanga na jahua cielomanda rey shina mandangachu nishpa (Mateo 11:10, 11). Rey Davidtapashmi Jehovapa espíritu santoca ayudarca (1 Samuel 16:13). Chaimandami, Jehová Diosmanda ashtaca cosascunata Davidca intindirca. Bibliapa huaquin librocunatapash escribirca (Marcos 12:36). Shinapash, rey Davidmanda apóstol Pedro parlashpaca, ‘jahua pachaman rishcataca na nircachu’ (Hechos 2:34). Jehová Diosca chai gentecuna huaquin cosascunata rurachun paipa espirituhuan ayudashpapash, jahua cielopi causachunga paicunataca na agllarcachu. Shinaca ¿chai gentecuna Jehovata nali sirvishcata o jahua cielopi causangapaj nali cashcatachu nijun? Na, na chaita nijunllu. Cai Alpa shuj paraíso tucujpi Jehová paicunata causachinatami nijun (Juan 5:28, 29; Hechos 24:15).

17, 18. a) Ashtacacunaca ¿maipi causanatata shuyanajun? b) ¿Ima tapuicunatata shamuj temapica yachajushun?

¹⁷ Jehovata cunanbi ashtaca sirvijcunaca na tucuicuna jahua cieloman ringachu. Paicunaca Abrahán, David, Bautizaj Juan, Jehovata shuj sirvijcuna cuendami Diospa Reino cai Alpata mandajpi causanata shuyanajun (Hebreos 11:10). Jahua cielomandaca 144 mil reycunami Jesushuan mandanga. Shinapash Bibliapica ninmi, tucurimui punllacunapica ‘miraipura quedashca’ ungidocunamandaca ashacunallami cai Alpapica tianga nishpa (Apocalipsis 12:17). Cunangamanga, 144 mil ungidocunamandaca ashtacacunami ña huañushca. Paicunaca ñami jahua cielopi causanajun.

¹⁸ Shinapash, pipash ungidomi cani nijpica, cai Alpapi causana esperanzata charijcunaca ¿imatata rurana can? Jesús Huañushcata Yarina Punllapi ñucanchi congregacionmanda pipash tandata micujpi, vinota ufiajpica ¿imatata rurana canchi? Ungidocuna ashtahuan mirashpa catijta ricushpaca ¿preocuparinachu canchi? Cai tapuicunataca shamuj temapimi yachajushun.