1-3. Andi bi pasa a di Pensiti Daka di bi mbei taa a dë wan apaiti daka, nöö unfa dee soni dee bi pasa bi mbei di soni di sikifi a Bëibel pasa tuutuu? (Luku di peentje a bigi u di woto.)

A BI dë wan sonde mamate a Jelusalen. Di daka dë bi dë wan apaiti daka seei, söseei a bi dë wan piizii daka tu. Dee sëmbë bi ta hoi di Pensiti Daka. Di daka aki bi dë wan santa daka di de bi ta hoi te de bi bigi koti di soni de ta kai tarwe. A di mamate u di daka dë di Kaba Hei Begima bi ta tja di paima di de bi naa tja go da Gadu. Te nëigi juu bi kisi, nöö a bi ta tja tu bëëë di de mbei ku di fosu tarwe di de koti, go da Jehovah nasö a bi ta tja dee fosu fuuta di de bi pii, go dëën. De bi ta mbei di bëëë aki ku sooda. Te di Kaba Hei Begima bi tja bëëë go da Jehovah, nöö a bi ta wai ën nango ta ko. Disi bi dë di Pensiti Daka u di jaa 33.​—Leifitiki 23:15-20.

² Hiniwan jaa di Kaba Hei Begima bi nango paka di paima u di bëëë. Nöö de bi du ën höndöhöndö jaa longi. Di paima aki bi ta lei taa wan apaiti soni bi o pasa a di Pensiti Daka u di jaa 33. Di apaiti soni aki bi pasa ku 120 bakama u Jesosi, di bi dë ta begi makandi a wan liba wosu a Jelusalen (Tjabukama 1:13-15). Aiti höndö jaa ufö di soni aki pasa, di tjabukama Joëli bi sikifi soni u di apaiti daka aki (Joëli 2:28-32; Tjabukama 2:16-21). Andi bi pasa di daka dë, di bi mbei taa a bi dë sö wan apaiti daka?

 ³ Lesi Tjabukama 2:2-4. A di Pensiti Daka u di jaa, Gadu bi da dee Keesitu sëmbë aki di santa jeje fëën, nöö de bi ko dë salufuwan (Tjabukama 1:8). Wanlö gaan hia sëmbë bi bigi ta lomboto de. Hën wë dee bakama u Jesosi aki bigi ta taki u dee waiti soni di de bi si, ku dee soni di de bi jei. Apösutu Paulosu bi taki andi bi pasa a di daka dë, söseei faandi mbei a bi dë sö wan apaiti daka. A bi piki dee gaan hia sëmbë taa: „Un musu disa di hogilibi fuunu, be hiniwan fuunu go dopu a di në u Jesosi Keesitu. Nöö te un du sö kaa, nöö Masa Gadu an o hoi dee hogilibi fuunu a bëë möön. Nöö a o da unu di Akaa [jeje, NW] fëën tu, faa wooko a unu liba.” Söwan 3000 sëmbë bi tei dopu di daka dë, nöö di santa jeje u Gadu bi ko a de liba tu.​—Tjabukama 2:37, 38, 41.

4. (a) Faandi mbei u musu kë sabi andi bi pasa a di Pensiti Daka? (b) Un woto apaiti soni bi o sa pasa a di wan seei daka sömëni jaa pasa? (Luku di pisi a kaba u di woto.)

⁴ Andi di Kaba Hei Begima ku di paima di a bi ta tja go da Jehovah hiniwan Pensiti Daka kë taki? Di Kaba Hei Begima bi kë taki Jesosi. Dee bëëë bi kë taki dee fosu bakama u Jesosi di bi salufu ku santa jeje. Dee bakama aki bi dë zöndu libisëmbë, nöö de bi „ko dë a fesi u hii dee soni dee a mbei” (Jakobosi 1:18). Gadu bi tei dee sëmbë aki kuma miii fëën, nöö a bi tei de u tii kuma könu ku Jesosi a di Könuköndë u Gadu a liba ala (1 Petuisi 2:9). Jehovah o tei di Könuköndë fëën u mbei hii dee sëmbë di ta piki ën buka feni gaan bunu. Fëën mbei aluwasi woo go libi a liba ala ku Jesosi, nasö ee woo libi a goonliba aki, tökuseei u ta si dee soni dee pasa a di Pensiti Daka u di jaa 33 kuma gaan soni. ^[1]​—Luku di pisi a kaba u di woto.

5. Unfa u du sabi taa na hii sëmbë ta toon salufuwan a di wan seei fasi?

⁵ Dee bakama u Jesosi di bi dë a di liba wosu an bi o sa fëëkëtë di daka dë. Hiniwan u de bi abi wan soni di ta djei wan faja a de mindi hedi. Jehovah bi mbei de sa fan wan woto töngö. De bi dë seiki taa Gadu bi salufu de ku di santa jeje fëën (Tjabukama 2:6-12). Ma di soni aki an ta pasa ku hiniwan Keesitu sëmbë di toon salufuwan. Di Bëibel an ta taki taa wan soni kuma faja bi ko a dee woto dusudusu sëmbë mindi hedi u Jelusalen di bi ko toon salufuwan bakaten a di daka dë. Dee sëmbë dë bi toon salufuwan di de bi tei dopu (Tjabukama 2:38). Ma na hiniwan Keesitu sëmbë ta toon salufuwan wantewante te a tei dopu. Dee Samalia sëmbë bi toon salufuwan baka wan pisiten di de tei dopu (Tjabukama 8:14-17). Konelisi ku dee sëmbë fëën wosudendu toon salufuwan ufö de dopu seei. A bi dë wan soni di an bi pasa wan daka.​—Tjabukama 10:44-48.

6. Andi hii dee salufuwan ta kisi, nöö un wini de ta feni fëën?

⁶ A dë gbelingbelin u si taa Keesitu sëmbë ta ko fusutan a peipei fasi taa de toon salufuwan. So u de sa ko fusutan wantewante taa Jehovah salufu de. Ma wotowan ta ko fusutëën baka wan pisiten. Apösutu Paulosu bi taki andi ta pasa ku hiniwan u dee sëmbë aki. A bi taki taa: „Nöö di un jei ën nöö hën un piki ën, nöö hën a da unu di Akaa [jeje, NW] fëën kuma wan nöbu taa un dë sëmbë fëën. Nöö di Akaa [jeje, NW] u Gadu di u ta taki aki, a dë kuma wan gaan gudu a da u a fesi” (Efeise 1:13, 14). Jehovah ta mbei di santa jeje fëën heepi dee Keesitu sëmbë aki u ko fusutan gbelingbelin taa a tei de u de go libi a liba ala. A di lö fasi aki di santa jeje dë ’kuma wan gaan gudu a da de a fesi’, nasö wan soni di ta lei de taa a di ten di ta ko de o libi u teego a liba ala, ma na a goonliba aki.​—Lesi 2 Kolenti 1:21, 22; 5:5.

7. Andi hiniwan salufuwan musu du faa kisi di paka u go libi a Gadu Köndë?

⁷ A dë sö taa te wan Keesitu sëmbë ko dë salufuwan, hën da a feni di libi di a musu go libi a liba ala kaa u? Wë nönö. Sö wan sëmbë dë seiki taa Gadu kai ën faa go libi a liba ala, ma te a hoi hënseei  a Jehovah ufö a o sa go libi a liba ala. Petuisi bi taki taa: „Dee sëmbë, wan si taa Masa Gaangadu kai unu tei fuun ko sëmbë fëën nö? Wë nöö un musu biinga be a dë sö tuu a unu libi fu sëmbë si e. Biga te un biinga ku dee soni u taki dë, nöö wan o kai kumutu a di pasi u Gadu möönsö. Nöö te di juu dou, nöö de o tei unu ku gaan wai seei a di köndë ka di Heepima fuu Masa Jesosi Keesitu dë könu ta tii fu nöömö” (2 Petuisi 1:10, 11). Fëën mbei na wan Keesitu sëmbë di dë salufuwan musu mbei soni tapëën faa dini Jehovah. Hii fa Gadu kai ën u go libi nëën Köndë ala, tökuseei ee an hoi hënseei a Gadu, nöö an o kisi di paka u go libi a Gadu Köndë.​—Hebelejën 3:1; Akoalimbo 2:10

8, 9. (a) Faandi mbei a taanga da gaansë u sëmbë u fusutan andi ta pasa ku wan sëmbë te a toon wan salufuwan? (b) Unfa wan sëmbë ta sabi taa Gadu kai ën faa go libi nëën köndë ala?

⁸ Gaansë u dee dinima u Gadu a di ten aki ta feni taa a taanga u ko fusutan andi ta pasa ku wan sëmbë te Gadu salufu ën. Wë a dë sö u di deseei an dë salufuwan. Gadu mbei libisëmbë u de libi u teego a goonliba aki, ma na u go libi a liba ala (Kenesesi 1:28; Psalöm 37:29). Ma Jehovah tei so sëmbë u de dë könu ku mindima a liba ala. Fëën mbei te a salufu de, nöö di fasi fa de ta pakisei ta tooka, sö taa de sa ta pakisei u go libi a liba ala.​—Lesi Efeise 1:18.

⁹ Unfa wan sëmbë ta sabi taa Gadu kai ën faa go libi a nëën köndë ala? Luku andi Paulosu bi taki da dee salufu baaa dee bi ta libi a Loomë, dee Gadu bi kai u ko dë „apaiti sëmbë” fëën. Paulosu bi taki da de taa: „Nöö di jeje u Gadu an ta mbei u ko toon saafu möön, fuun musu ta dë fëëëfëëë hiniwan ten kumafa un bi dë a fesi. Ma di jeje mbei taa Gadu tei unu ko miii fëën. Nöö hën mbei u ta kai Gadu „Abba, Taata!” Di jeje u Gadu seei ta lei u gbelin taa u da miii u Gadu” (Loomë 1:7; 8:15, 16, NW). Gadu ta mbei di santa jeje fëën heepi wan sëmbë u ko fusutan gbelingbelin taa a kai di sëmbë dë faa go tii kuma wan könu makandi ku Jesosi a liba ala.​—1 Tesalonika 2:12.

10. Andi 1 Johanisi 2:27 kë taki te a taa dee salufuwan an abi sëmbë fanöudu u piki de taa de da salufuwan?

¹⁰ An dë u sëmbë piki dee sëmbë dee Gadu kai u go libi a liba ala, taa Gadu salufu de. Jehovah ta mbei de sabi gbelingbelin taa de da salufuwan. Apösutu Johanisi piki dee salufu bakama u Keesitu taa: „Di santawan salufu unu. Hii unu tuu sabi di tuutuu lei.” A taki tu taa: „Gadu salufu ën ku di jeje fëën, nöö di jeje ta dë a unu hati nöömö. Wan abi sëmbë fanöudu di musu lei unu möön. Ma a salufu unu, nöö a ta lei unu tuutuu soni. An ta ganjan unu. A ta lei unu hii soni. Leti kumafa di jeje lei unu, nöö un musu ta dë wan ku di sëmbë di salufu unu” (1 Johanisi 2:20, 27). Dee salufuwan seei musu kisi lei u Jehovah leti kumafa dee woto bakama u Keesitu ta kisi lei. Ma de an abi sëmbë fanöudu u piki de taa de da salufuwan. Ku di santa jeje u Jehovah, di möön taanga soni di dë a mundu a ta mbei de ko sabi gbelingbelin taa de da salufuwan!

11, 12. Andi wan salufuwan sa hakisi hënseei, ma andi a sabi seiki?

¹¹ Te dee bakama u Keesitu ta toon salufuwan, nöö libi u de ta tooka gaanfa seei. Fëën mbei Jesosi bi taki taa de ta ko dë kuma sëmbë di de „toona pai” baka (Johanisi 3:3, 5). Baka di dë, hën a taki taa: „Nöö fa mi ta fan ku i aki, taa de musu toona pai i baka, nöö an musu dë gaan soni da i sö e. Biga na hii soni mbei fii sa fusutëën wantewante. Luku fa u dë aki, di ventu ta böö nango ka a kë. Fa a ta mbei vuuu dë, di bai fëën nöö i ta jei, ma ja sabi naasë a ta kumutu, ja sabi naasë a nango tu. Wë sö nöö a dë tu ku hii dee sëmbë dee di Akaa [jeje, NW] u Gadu mbei ko pai baka fu de toona feni di njunjun libi u ta taki aki”  (Johanisi 3:7, 8). A dë gbelingbelin u si taa wan salufuwan an o sa konda finifini da wan woto sëmbë di an dë wan salufuwan, unfa de ta fii. ^[2]​—Luku di pisi a kaba u di woto.

¹² Wan sëmbë di dë wan salufuwan sa hakisi hënseei taa: ’Faandi mbei mi, Gadu tei u dë wan salufuwan? Faandi mbei na wan woto sëmbë a tei?’ A sa hakisi hënseei tu ee a bunu tjika da di faantiwöutu dë. Ma a sabi seiki taa Jehovah tei ën u dë wan salufuwan. A ta wai gaanfa seei, nöö a ta tei ën u bigi seei. Wan salufuwan ta fii leti kumafa apösutu Petuisi bi taki, di a taki taa: „Un boo ta gafa Masa Gaangadu e, dee sëmbë. Hën da di Tata fuu Masa Jesosi Keesitu ku ën Gadu tu, nöö u musu hopo ën në. Biga a bi abi gaan tjalihati fuu, nöö hën a tooka u hati mbei u ko wan hii njunjun sëmbë kuma tide pai mii. Fa a weki Jesosi Keesitu baka a dëdë dë, a mbei u ko ta abi wan gaan biibi a u hati di an ta kaba möönsö, taa woo feni libi a Gadu nöömö a bakaten. Nöö dee soni dee woon feni dë, de an dë kuma soni u goonliba aki e. Nöö de dë leti a Masa Gaangadu köndë ala, ka Gadu seei ta tjubi de da u fuu feni de a bakaten” (1 Petuisi 1:3, 4). Te dee salufuwan lesi di tëkisi aki, nöö de ta sabi seiki taa de Tata ta fan ku hiniwan u de apaiti.

13. Unfa di fasi fa wan sëmbë ta pakisei ta tooka te a toon wan salufuwan? Nöö andi ta mbei taa de ta pakisei woto fasi?

¹³ Ufö Gadu tei dee Keesitu sëmbë aki u go libi a liba ala, de bi ta biibi taa de bi o libi u teego a goonliba aki. De bi dë seei ta wakiti di ten ka Jehovah o mbei di goonliba ko toon wan paladëisi, söseei fa a o puu hogidu a goonliba. Kandë de bi ta si kaa fa de ta baasa wan famii u de nasö wan mati u de di toona ko a libi baka. De bi dë seei ta wakiti di ten ka de bi o sa mbei wan wosu u de libi, nasö u paandi peipei pau, ku fa de bi o ta njan peipei fuuta (Jesaaja 65:21-23). Faandi mbei de ko ta pakisei woto fasi? De bi ko ta pakisei woto fasi, u di de bi abi bookohedi ö, nasö u di de bi dë ku fuka? De bi ko ta pakisei taa an o suti u libi a goonliba aki u teego u, nasö taa de an bi o ta piizii aki ö? Naa de bi kë sabi unfa a o dë u go libi a Gadu Köndë? Wë nönö. Ma Gadu hën bi taki taa de musu go libi ala. Di Gadu kai de, nöö a bi wooko ku di santa jeje fëën u tooka di fasi fa de ta pakisei, söseei u mbei de kë go libi a liba ala.

14. Unfa dee salufuwan ta fii u di libi di de ta libi a goonliba aki?

¹⁴ Ma di soni aki kë taki taa dee salufuwan kë dëdë u? Paulosu bi konda unfa wan salufuwan ta fii. A bi taki u di libisëmbë sinkii u de taa: „Fa u ta libi a di sinkii fuu a goonliba aki, nöö u ta tja fuka nëën tuu. U ta tja sömëni hebi nëën. Ma nöö fa mi ta fan aki seei, ma an dë taa buuse u ta buuse di sinkii fuu aki sö e. Nönö. Ma u ta hangi fuu go libi a di oto sinkii fuu ala, be di sinkii fuu aki di ta dëdë musu tooka ko kuma di an ta dëdë möönsö” (2 Kolenti 5:4). Dee Keesitu sëmbë aki an kë dëdë. De ta piizii u di libi, nöö hiniwan daka de kë dini Jehovah makandi ku dee famii u de, söseei ku dee mati u de. Ma aluwasi andi de ta du, de an ta fëëkëtë di soni di Gadu paamusi de a di ten di ta ko.​—1 Kolenti 15:53; 2 Petuisi 1:4; 1 Johanisi 3:2, 3; Akoalimbo 20:6.

15. Andi an kë taki taa wan sëmbë dë wan salufuwan?

¹⁵ Kandë i ta hakisi iseei ee Jehovah kai i fii go libi a liba ala. Ee i ta si kuma a kai i, nöö hakisi iseei dee soni aki: I ta fii kuma i ta du di peleikiwooko fajafaja u? I lo’ u lei soni a Bëibel, söseei i lo’ u lei „dee tjubitjubi soni” u Gadu ö? (1 Kolenti 2:10). I ta fii kuma Jehovah ta mbei soni ta waka bunu da i a di peleikiwooko u? I kë du di kë u Jehovah möön hiniwan woto soni ö? I lobi wotowan gaanfa u, nöö i ta fii kuma ju abi di faantiwöutu u heepi de u dini Jehovah u? I si fa Jehovah heepi i a peipei fasi a i libi ö? Ma ee i piki aai a hii dee hakisi aki, hën da Gadu kai i fii go libi a liba ala u? Wë nönö. Faandi mbei u taki  sö? Wë u di hii dee dinima u Gadu sa fii sö tu, aluwasi de da wan salufuwan nasö ee de an dë wan salufuwan. Nöö ku di santa jeje Jehovah sa da hiniwan u dee dinima fëën di wan seei kaakiti, aluwasi ee de o libi a goonliba aki nasö a liba ala. Ma ee i ta hakisi iseei ee joo go libi a liba ala, hën da Gadu an kai i. Dee sëmbë dee Jehovah kai an ta hakisi deseei ee Gadu kai de! De sabi taa a kai de!

16. Unfa u du sabi taa na hii dee sëmbë dee bi kisi di santa jeje u Gadu bi kisi di kai u go libi a liba ala?

¹⁶ Di Bëibel ta konda woto u sëmbë di bi hoi deseei a Gadu, nöö Jehovah bi da de santa jeje, ma de an go a Gadu Köndë. Wan u dee sëmbë aki da Johanisi di Dopuma. Jesosi bi taki taa sëmbë an bi dë di bi hei möön Johanisi. Ma a bi taki tu taa Johanisi an bi o tii kuma wan könu a liba ala (Mateosi 11:10, 11). Dafiti seei di santa jeje bi ta tii (1 Samuëli 16:13). Di santa jeje bi heepi ën u fusutan dee tjubitjubi soni u Jehovah, söseei a bi tii ën u sikifi wan tu pisi u di Bëibel (Maikusi 12:36). Ma tökuseei apösutu Petuisi bi taki taa „na Dafiti bi go a Masa Gadu a liba ala” (Tjabukama 2:35). Jehovah wooko ku di santa jeje fëën u da dee womi aki kaakiti u du gaan soni, ma an wooko ku di santa jeje fëën u kai de u go libi a liba ala. Di soni aki kë taki taa de an bi ta hoi deseei a Jehovah tjika u, nasö de an bi bunu tjika u go tii a liba ala u? Wë nönö. A kë taki taa Jehovah o mbei de ko a libi baka a di Paladëisi a goonliba aki.​—Johanisi 5:28, 29; Tjabukama 24:15.

17, 18. (a) Andi gaansë u dee dinima u Gadu a di ten aki ta wakiti? (b) Un hakisi woo luku a di woto di ta ko?

¹⁷ Gaansë u dee dinima u Gadu a di ten aki an o go libi a liba ala. Leti kuma Abahamu, Dafiti, Johanisi di Dopuma ku sömëni woto womi ku mujëë fu awooten, sö nöö dee dinima u Jehovah a di ten aki, ta wakiti u libi a goonliba aki te Gadu o tii de (Hebelejën 11:10). Jesosi o tii makandi ku 144.000 sëmbë a Gadu Köndë. Ma di Bëibel ta taki soni u „dee woto mii [dee fika aki jeti, NW]”, hën da dee salufuwan dee dë a goonliba aki jeti a di kaba pisiten aki (Akoalimbo 12:17). Wë gaansë u dee 144.000 salufuwan dëdë kaa, nöö de dë a liba ala kaa.

¹⁸ Ma ee wan sëmbë taki taa hën da wan salufuwan, nöö unfa dee sëmbë dee ta biibi taade o libi a goonliba aki musu si di sëmbë dë? Unfa i musu libi ku wan sëmbë a di kemeente fii di bigi ta njan di bëëë, ta bebe di win, te u ta mëni di dëdë u Jesosi? Ma ee dee salufuwan ta ko möön hia wë, u musu ta booko u hedi ku di soni dë u? Wë woo piki dee hakisi aki a di woto di ta ko.