1-3. Nzintu nzi izyakacitika izyakapa kuti buzuba bwa Pentekosite bube bwaalubazu, alimwi mbuti zintu eezyi izyakacitika mbozyakazuzikizya cakasinsimwa mu Magwalo? (Amubone cifwanikiso icili kumatalikilo aacibalo.)

MWAKALI mu Nsondo mafwumofwumo mu Jerusalemu, oobu bwakali buzuba bwaalubazu alimwi bukkomanisya. Bantu bakali kusekelela pobwe lya Pentekosite, eeli lyakali pobwe lisetekene ilyakali kusekelelwa kumatalikilo aaciindi cakutebula wiiti. Mafwumofwumo aabuzuba oobo, mupaizi mupati wakatuula zipaizyo zyalyoonse atempele. Mpoonya kuzoosika aciindi ca 9:00hrs, wakatuula zinkwa zyobilo zijisi bumena izyakapangwa kubelesya wiiti wakusaanguna, naa micelo mitaanzi yabutebuzi. Mupaizi mupati wakaziyumba zinkwa kumbele amusyule kutegwa zyaabwe kuli Jehova. Oobu bwakali buzuba bwa Pentekosite yamumwaka wa 33.—Levitiko 23:15-20.

² Mwaka amwaka, kwamyaanda yamyaka, mupaizi mupati wakali kutuula cituuzyo eeci cakuyumba. Cituuzyo cakali kweendelana kapati acintu cimwi ciyandika kapati icakacitika lya  Pentekosite mumwaka wa 33. Alimwi cakacitikila basikwiiya ba Jesu ibali 120 ibakali kupaila antoomwe muŋanda yamujulu mu Jerusalemu. (Milimo 1:13-15) Myaka iili 800 musyule, musinsimi Joeli wakalemba kujatikizya cintu eeci icakacitika. (Joeli 2:28-32; Milimo 2:16-21) Ino ncinzi cakacitika icakali kuyandika kapati?

³ Amubale Milimo 2:2-4. Mubuzuba bwa Pentekosite yamumwaka wa 33, Leza wakapa Banakristo aabo muuya wakwe uusalala, alimwi bakananikwa. (Milimo 1:8) Mpoonya, nkamu yabantu yakatalika kubungana akati kabo, alimwi basikwiiya bakatalika kwaamba kujatikizya zintu zigambya nzyobakazwa aakubona akumvwa. Mwaapostolo Petro wakapandulula zintu izyakazwa aakucitika alimwi akaambo ncozyakali kuyandika kapati. Mpoonya, wakaambila nkamu yabantu kuti: “Amweempwe, alimwi umwi aumwi wanu abbapatizyigwe muzina lya Jesu Kristo kutegwa mulekelelwe zibi zyanu, eelyo mulatambula cipego citabbadelwi camuuya uusalala.” Mubuzuba oobo, bantu ibakali kubalilwa ku 3,000 bakabbapatizyigwa, alimwi abalo bakatambula muuya uusalala.—Milimo 2:37, 38, 41.

4. (a) Nkaambo nzi ncotweelede kuyandisya kuzyiba izyakacitika lya Pentekosite? (b) Ncintu nzi acimbi iceelede kuti cakacitika mubuzuba mbubwenya oobu myaka minji musyule? (Amubone bupanduluzi buyungizyidwe.)

⁴ Ino mupaizi mupati wakali kwiiminina ni, alimwi ino cituuzyo ncaakali kutuula mwaka amwaka lya Pentekosite cakali kwiimina nzi? Mupaizi mupati wakali kwiiminina Jesu. Zinkwa zyakali kwiiminina basikwiiya ba Jesu bananike. Basikwiiya aaba bakasalwa kuzwa akati kabantu basizibi alimwi baitwa kuti ‘micelo yakusaanguna.’ (Jakobo 1:18) Leza wakabatambula bantu aaba kuti babe bana bakwe alimwi wakabasala kuti bakalele kabali bami antoomwe a Jesu kujulu kabali cibeela ca Bwami bwa Leza. (1 Petro 2:9) Jehova uyoobelesya Bwami bwakwe kulongezya bantu boonse bamvwida. Aboobo tacikwe makani naa tuyookkala kujulu antoomwe a Jesu naa tuyookkala muparadaiso anyika, Pentekosite yamumwaka wa 33 ilayandika kapati kulindiswe. ^[1]—Amubone bupanduluzi buyungizyidwe.

5. Ino tuzyi buti kuti tabali bananike boonse ibananikwa munzila iikozyenye?

⁵ Basikwiiya ibakali muŋanda yamujulu tiibakali kukonzya kubuluba buzuba oobuya. Umwi aumwi wabo, amutwe wakwe, wakalijisi cintu icakali kuboneka mbuli mulilo. Jehova wakapa kuti bakonzye kwaambaula mumyaambo iimbi. Tiibakali kudooneka kuti bakali nanikidwe amuuya uusalala. (Milimo. 2:6-12) Pele zintu eezyi zigambya tazicitiki ku Banakristo boonse ciindi nobananikwa amuuya. Mucikozyanyo, Ibbaibbele talyaambi kuti kuli cintu icakali kuboneka mbuli mulilo icakalibonya amitwe yazyuulu zyabantu mu Jerusalemu ibakananikwa kumamanino aabuzuba oobu. Bakananikwa ciindi nobakabbapatizyigwa. (Milimo 2:38) Alimwi tabali Banakristo boonse ibananikwa aciindi nobabbapatizyigwa. Bana Samariya bakananikwa nokwakainda ciindi cili mbocibede kuzwa nobakabbapatizyigwa. (Milimo 8:14-17) Alimwi kunanikwa kumwi kutacitiki-citiki, nkunanikwa nkwaakananikwa Koneliyo abamuŋanda yakwe, ibakananikwa kabatanabbapatizyigwa.—Milimo 10:44-48.

6. Ncinzi ncobatambula bananike boonse, alimwi ino eeci cibajatikizya buti?

⁶ Cilisalede kuti Banakristo balazyiba munzila ziindene-indene kuti bakananikwa. Bamwi balalangilwa kuti bakazyiba mpoonya-mpoonya kuti Jehova wakabananika. Bambi bakazyiba mukuyakwaciindi. Pele mwaapostolo Paulo wakapandulula icicitika kuli umwi aumwi wambabo. Wakati: “Alimwi kwiinda  mulinguwe, nomwakasyoma, mwakabikkwa ciganto camuuya uusalala wakasyomezyegwa. Muuya uusalala ooyu ncisinizyo cakuti tuyoopegwa lukono lwesu kumbele.” (Baefeso 1:13, 14) Aboobo, Jehova ubelesya muuya wakwe uusalala kutegwa bazyibe Banakristo aaba kakunyina kudooneka kuti wakabasala kuti bakaunke kujulu. Munzila eeyi, muuya uusalala ‘ncisinizyo cakuti bayoopegwa lukono lwabo kumbele,’ naa mbumboni businizya kuti kumbele bayoopona kukabe kutamani kujulu kutali anyika.—Amubale 2 Bakorinto 1:21, 22; 5:5.

7. Ncinzi ncayelede kucita Munakristo munanike umwi aumwi kutegwa akatambule bulumbu bwakwe kujulu?

⁷ Ciindi Munakristo naananikwa, sena caamba kuti kakunyina kudooneka uyootambula bulumbu bwakwe? Peepe. Ulisinizyide kuti wakatambwa kuunka kujulu. Pele uyoopegwa bulumbu lilikke kuti wazumanana kusyomeka kuli Jehova. Petro wakapandulula kuti: “Aboobo bakwesu, amusungwaale kapati ikutegwa mubusinizye bwiite alimwi akusalwa kwanu, nkaambo ikuti naa mwazumanana kuzicita zintu eezyi, kunyina nomuyakwaalilwa pe. Mubwini, munzila eeyi muyoopegwa coolwe cipati cakunjila mu Bwami butamani bwa Mwami a Mufwutuli wesu Jesu Kristo.” (2 Petro 1:10, 11) Aboobo Munakristo munanike umwi aumwi tayelede kulekela cintu cili coonse kumulesya kubelekela Jehova. Nokuba kuti wakatambwa, naa kwiitwa, kuti akaunke kujulu, ikuti taazumanana kusyomeka, taakatambuli bulumbu bwakwe.—Bahebrayo 3:1; Ciyubunuzyo 2:10.

8, 9. (a) Nkaambo nzi ncocibakatazya bantu banji kumvwisya icicitika ciindi muntu umwi naananikwa? (b) Ino muntu uzyiba buti kuti wakatambwa kuunka kujulu?

⁸ Babelesi ba Leza banji mazuba aano inga cabakatazya kumvwisya icicitika kumuntu ciindi Leza naamunanika. Eeci cilalimvwisya, nkaambo balo tabananikidwe. Leza wakalenga bantu kuti bapone anyika kukabe kutamani, ikutali kujulu. (Matalikilo 1:28; Intembauzyo 37:29) Pele Jehova wasala bamwi kuti bakabe bami abapaizi kujulu. Aboobo ciindi naabananika, bulangizi bwabo alimwi ambobayeeya zilacinca, calo cipa kuti kabalangila kupona buumi bwakujulu.—Amubale Baefeso 1:18.

⁹ Pele ino muntu uzyiba buti kuti wakatambwa kuunka kujulu? Amubone Paulo nzyaakaambila bakwesu bananike ku Roma, “ibakaitwa kuba basalali.” Wakabaambila kuti: “Tiimwakatambula muuya wabuzike uumupa kuyoowa alimwi pe, pele mwakatambula muuya uumupa kuba bana  ba Leza, muuya ooyo uutupa koompolola kuti: “Abba, Taata!” Muuya ooyo ulazuminana amuuya wesu kuti tuli bana ba Leza.” (Baroma 1:7; 8:15, 16) Kwiinda mumuuya wakwe uusalala, Leza ulamuzyibya muntu kakunyika akudooneka kuti wakatambwa kuyoolela kali mwami kujulu antoomwe a Jesu.—1 Batesalonika 2:12.

10. Ino lugwalo lwa 1 Johane 2:27 lupandulula nzi nolwaamba kuti Munakristo munanike tayandiki muntu uumbi kumuyiisya?

¹⁰ Aabo ibatambwa a Leza tabayandiki muntu uuli woonse kubaambila kuti bakananikwa. Jehova upa kuti basinizye kuti bakatambwa. Mwaapostolo Johane wakaambila Banakristo bananike kuti: “Nywebo mwakananikwa kuli yooyo uusalala alimwi nyoonse mulaaluzyibo.” Alimwi wakaamba kuti: “Lino nywebo, ikunanikwa nkomwakatambula kuzwa kulinguwe kulazumanana mulindinywe, alimwi tamuyandiki muntu uuli woonse wakumuyiisya; pele kunanikwa ooku ikuzwa kulinguwe nkokumuyiisya zintu zyoonse, alimwi nkwamasimpe, takuli kwakubeja pe. Mbubonya mbokwamuyiisya, amuzumanane kukamantana anguwe.” (1 Johane 2:20, 27) Banakristo bananike beelede kuyiisyigwa a Jehova mbubwenya mbuli muntu uuli woonse. Pele tabayandiki muntu uubaambila kuti bakananikwa. Jehova wakabelesya nguzu ziinda, nkokuti muuya wakwe uusalala, kutegwa cisalale kulimbabo kuti bakananikwa!

11, 12. Ncinzi ncakonzya kulibuzya Munakristo munanike, pele ncinzi ncatadooneki?

¹¹ Ciindi Banakristo nobananikwa amuuya uusalala, balacinca kapati. Jesu wakaamba kuti ‘balazyalwa alimwi,’ naa “kuzyalwa kuzwa kujulu.” (Johane 3:3, 5; bupanduluzi buyungizyidwe) Mpoonya wakapandulula kuti: “Utagambwi akaambo kakuti ndakwaambila kuti: Nywebo nobantu mweelede kuzyalwa alimwi. Muwo ulaunga kufwumbwa nkuuyanda, alimwi ulaumvwa kuuvwuuma, pele tokuzyi nkuuzwida ankuuya. Oobo mbwabede muntu uuli woonse wazyalwa kumuuya.” (Johane 3:7, 8) Cilisalede kuti tacikonzyeki kupandulwida muntu utanananikwa bwini mbwalimvwa muntu kuti wananikwa. ^[2]—Amubone bupanduluzi buyungizyidwe .

¹² Muntu iwakananikwa inga walibuzya kuti, ‘Nkaambo nzi Jehova ncaakandisalila mebo muciindi cakusala umbi?’ Inga watalika kulibuzya naa uleelela kutambula mukuli ooyu. Pele tadooneki pe kuti Jehova wakamusala. Muciindi caboobo, ulakkomana kapati alimwi ulalumba kapati akaambo kacipego eeci. Bananike balimvwa mbwaakalimvwa Petro ciindi naakati: “Aatembaulwe Leza alimwi Usyi wa Mwami wesu Jesu Kristo, nkaambo muluse lwakwe lupati wakatupa kuzyalwa kupya kuti tube abulangizi bupona kwiinda mububuke bwa Jesu Kristo kuzwa kubafwu, kuti mube alukono lutanyonyooki, lunyina kampenda alimwi lutajujuki. Mwakayobodwa lukono oolu kujulu.” (1 Petro 1:3, 4) Ciindi munanike nabala  majwi aaya, cakutadooneka ulizyi kuti Usyi ulaambaula kulinguwe kumugama.

13. Ino muntu ucinca buti mbwayeeya ciindi naananikwa amuuya uusalala, alimwi ncinzi cipa kucinca ooku?

¹³ Jehova katanabatamba Banakristo aaba kuti bakaunke kujulu, bakajisi bulangizi bwakupona anyika kukabe kutamani. Bakali kulangila ciindi Jehova nayoopanga nyika kuba paradaiso akugwisya bubi boonse. Ambweni bakali kweezyeezya kuti batambula muyandwa wabo iwakafwide. Alimwi bakali kulangila kuyooyaka ŋanda akukkala mulinjiyo naa kusyanga zisamu akulya micelo. (Isaya 65:21-23) Nkaambo nzi ncobakatalika kulanga zintu munzila iindene? Sena bakacinca akaambo kakuti bakali kulimvwa kutyompwa naa akaambo kakuti bakapenga kapati? Sena cakutayeeyela bakasala buyo kucinca kabayeeya kuti kupona kukabe kutamani anyika kunoolendelezya akuti buumi tabunookkomanisyi? Naa sena bakali kuyanda kumvwa mbociyooba kupona kujulu? Peepe. Muciindi caboobo, Leza nguwakabasalila. Ciindi naakabatamba, wakabelesya muuya wakwe uusalala kucinca mbobayeeya alimwi abulumbu mbobalangila kumbele.

14. Ino bananike balimvwa buti kujatikinzya buumi bwabo aano anyika?

¹⁴ Pele sena eeci caamba kuti bananike balayanda kufwa? Paulo wakapandulula mbobalimvwa bananike. Wakeezyanisya mubili wabo wanyama ‘kutente’ akwaamba kuti: “Mubwini, swebo notuli mutente eeli tulatongela, tulalibilika kapati, nkaambo tatuyandi kuti tulisamunune eeli pe, pele tuyanda kusama leelyo limbi ikutegwa eeli ilifwa limenwe abuumi.” (2 Bakorinto 5:4) Banakristo aaba tabayandi kufwa. Balabukkomanina buumi alimwi bayanda kubelesya buzuba bumwi abumwi kubelekela Jehova antoomwe amukwasyi wabo abalongwe. Pele muzintu zyoonse nzyobacita, balayeeya zintu zili kumbele nzyaakabasyomezya Jehova.—1 Bakorinto 15:53; 2 Petro 1:4; 1 Johane 3:2, 3; Ciyubunuzyo 20:6.

15. Ino nzintu nzi zitasinizyi kuti muntu wakananikwa amuuya uusalala?

¹⁵ Ambweni mulalibuzya naa Jehova wakamutamba kuunka kujulu. Kuti kamulimvwa kuti ambweni wakamutamba, amulibuzye mibuzyo eeyi: Sena mulimvwa kuti muli basungu kapati mumulimo wakukambauka? Sena ncobeni mulakukkomanina kubala Bbaibbele akwiiya “zintu zisidwe zya Leza”? (1 Bakorinto 2:10) Sena mulimvwa kuti wakamuleleka kapati mumulimo wakukambauka? Sena muyandisya kucita Jehova ncayanda kwiinda bamwi? Sena mulabayanda kapati bantu akulimvwa kuti mujisi mukuli wakubagwasya kubelekela Jehova? Sena kuli bumboni mbomwakabona ibutondezya kuti Jehova wakamugwasya cacigaminina munzila ziindene-indene? Kuti bwiinguzi bwanu kumibuzyo eeyi yoonse mbwakuti inzya, sena eeci caamba kuti mwakatambwa kuunka kujulu? Peepe, tacaambi boobo. Ino nkaambo nzi? Nkaambo babelesi ba Leza boonse balakonzya kulimvwa boobu, tacikwe makani naa mbananike naa pe. Alimwi kwiinda mumuuya wakwe uusalala, Jehova ulakonzya kupa muuya nguwenya kubabelesi bakwe boonse, tacikwe makani abulumbu mbobayootambula. Bwini mbwakuti, ikuti naa kamudooneka kuti muyakuunka kujulu, caamba kuti tamutambidwe pe. Aabo ibakasalwa a Jehova tabadooneki pe! Balizyi!

16. Ino tuzyi buti kuti tabali boonse aabo ibakatambula muuya uusalala wa Leza ibakatambwa kuunka kujulu?

 ¹⁶ Mu Bbaibbele, muli zikozyanyo zinji zyabantu bakali kusyomeka ibakatambula muuya uusalala wa Jehova pele ibatakaunka kujulu. Muntu umwi ngu Johane mubbapatizi. Jesu wakaamba kuti kwakanyina muntu mupati kwiinda Johane, mpoonya wakaamba kuti Johane taakwe nayoolela kali mwami kujulu. (Matayo 11:10, 11) Davida awalo wakali kusololelwa amuuya uusalala. (1 Samuele 16:13) Muuya uusalala wakamugwasya kumvwisya zintu zikatazya kujatikizya Jehova alimwi wakamusololela kulemba zibeela zimwi zyamu Bbaibbele. (Marko 12:36) Nokuba boobo, mwaapostolo Petro wakaamba kuti Davida “kunyina naakaunka kujulu.” (Milimo 2:34) Jehova wakabelesya muuya wakwe uusalala kupa bantu aaba nguzu zyakucita zintu zigambya, pele taakwe naakaubelesya kubatamba kuti bakaunke kujulu. Sena eeci caamba kuti tiibakali kusyomeka kapati naa tiibakali kweelela kuyoolela kujulu? Peepe. Caamba buyo kuti Jehova uyoobabusya alimwi mu Paradaiso anyika.—Johane 5:28, 29; Milimo 24:15.

17, 18. (a) Mbulumbu nzi mbobalangila babelesi ba Leza banji mazuba aano? (b) Mibuzyo nzi njotuyoolanga-langa mucibalo citobela?

¹⁷ Babelesi ba Leza banji mazuba aano tabakaunki kujulu. Mbubwenya mbuli Abrahamu, Davida, Johane Mubbapatizi, alimwi abaalumi abamakaintu banji bakali kupona kaindi, balangila kuyookkala anyika ciindi Bwami bwa Leza nobuyoobeendelezya. (Bahebrayo 11:10) Kuyooba bantu bali 144,000 ibayoolela a Jesu kujulu. Pele Bbaibbele lyaamba zyabananike “basyeede” ibacili anyika mumazuba aano aakumamanino. (Ciyubunuzyo 12:17) Aboobo, bunji bwaba 144,000 bakafwa kale alimwi bali kujulu.

¹⁸ Pele kuti umwi waamba kuti munanike, ino aabo ibajisi bulangizi bwakupona anyika beelede kucita buti? Kuti umwi mumbungano yanu watalika kulya cinkwa akunywa waini lya Ciibalusyo, ino mweelede kumubona buti? Alimwi ino mbuti kuti mweelwe wabaabo ibaamba kuti mbananike uyaabuyungizyika? Sena mweelede kulibilika akaambo kaceeci? Tuyakwiingula mibuzyo eeyi mucibalo citobela.