1-3. 1) ¿Tuku xlakata lu xlakaskinka litaxtulh Pentecostés kata 33? 2) ¿Tuku xwankanit nema kgantaxtulh ama kilhtamaku? (Kaʼakxilhti xapulana dibujo).

DOMINGO lakatsisa xwanit kata 33 kJerusalén. Lu xlakaskinka xwanit ama kilhtamaku chu lu xlipaxuwakan, xlakata xtlawakan paskua xla Pentecostés. Wa uma paskua nema xtatlawa kata kata akxni xtsukukan makgalakan trigo. Ama tsisa ktemplo, xapuxku sacerdote pulana mastalh tamakamastan nema xtalismaninit. Alistalh, max makgnajatsa tsisa xwanit, makamastalh maktiy kaxtalanchu nema xlitatlawanit trigo tuku xapulana xtamakgalanit ama kata. Akxni sacerdote xlin kaxtalanchu kxlakatin Jehová anu anu xlimakan (Lev. 23:15-20).

² Akglhuwata ciento kata chuna xtalismaninit xtamakamasta maktiy kaxtalanchu kata kata kxlakatin Jehová. Uma tamakamastan xtatalakxtumi tuku xʼama la kilhtamaku nema aku xmima. Wa uma tuku lalh kPentecostés kata 33 kxpulakni chiki kJerusalén niku xtlawamakgolh oración 120 kstalaninanin  Jesús (Hech. 1:13-15). Tuku anta lalh kgantaxtulh tuku palakachuwina Joel 800 kata xlichuwinanita (Joel 2:28-32; Hech. 2:16-21). ¿Tuku lalh?

³ (Kalikgalhtawakga Hechos 2:2-4). Anta kPentecostés kata 33, Dios maklakaskilh xʼespíritu santo xlakata kalaksakli 120 kstalaninanin Jesús (Hech. 1:8) (kaʼakxilhti recuadro: «¿Tuku kilhchanima?»). Watiya ama kilhtamaku tsukukgolh chinkgo lhuwa latamanin niku xwilakgolh kstalaninanin Jesús, chu xlakan tsukukgolh kalitachuwinankgo tuku lu nitu xtachuna nema xʼakxilhkgonit chu xkgaxmatkgonit. Apóstol Pedro kawanilh putum latamanin tuku xlanit chu tuku xlakata lu xlakaskinka xwanit. Alistalh kawanilh: «Katalakgaspittayatit, na katamunutit wixin ncha tunu kxtukuwini Jesucristo, lakimpi nalikgalhiyatit xmatsankgananika mintalakgalhinkan; chu na namakgamakglhtinanatit spiritu santo». Ama kilhtamaku, max 3,000 latamanin tamunukgolh chu na kamaxkika espíritu santo (Hech. 2:37, 38, 41).

4. 1) ¿Tuku xlakata kilikatsitkan tuku lalh kPentecostés kata 33? 2) ¿Tuku max atanu lalh watiya kilhtamaku pero makgasata? (Kaʼakxilhti nota niku kgalhsputa artículo).

⁴ ¿Tiku kilhchanima xapuxku sacerdote chu kaxtalanchu nema xtamasta kPentecostés? Xapuxku sacerdote kilhchanima Jesús. Chu maktiy kaxtalanchu kilhchanima kstalaninanin Cristo tiku naʼankgo kʼakgapun. Xlakan kalaksakka kxlakgstipan latamanin maski makglakgalhinanin. Biblia lichuwinan pi litaxtukgo la xapulana tamakgalan, uma wamputun tuku pulana makgalakan akxni makika tachanan (Sant. 1:18). Dios kamakgamakglhtinanit la xkamanan chu kalaksaknit xlakata natamapakgsinankgo Jesús kxTamapakgsin kʼakgapun (1 Ped. 2:9). Jehová namaklakaskin uma Tamapakgsin xlakata nakamaxki tuku tlan putum latamanin tiku nakgalhakgaxmatkgo. Wa xlakata, komo nalatamayaw kParaíso unu kKatiyatni o kʼakgapun, kimputumkan xlakaskinka nakatsiputunaw tuku lalh kPentecostés kata 33 [1] (kaʼakxilhti nota niku kgalhsputa artículo).

5. ¿La likatsiyaw pi ni putum kilhtamaku la tuku kaks malakawaninan akxni Dios lilaksaknan xʼespíritu santo?

⁵ Tiku xwilakgolh 120 discípulos kJerusalén ama kilhtamaku, liwana xkatsikgo pi Dios xkalilaksaknit espíritu santo nema putum kilhtamaku xlakapastakkgolh. Xputumkan xkgalhikgo kxakgxakgakan la lhkuyat. Nachuna, tlan xchuwinankgo tanu tanu tachuwin (Hech. 2:6-12). Pero ni putum kilhtamaku chuna la, akxni Dios wi tiku lilaksaka espíritu santo. ¿La likatsiyaw? Akgtum liʼakxilhtit, watiya ama kilhtamaku Dios laksakli lhuwa miles latamanin, pero Biblia ni wan pi na xkgalhikgolh kxakgxakgakan la lhkuyat. Dios kalaksakli ama latamanin akxni tamunukgolh (Hech. 2:38). Pero xla ni putum kalaksaka kstalaninanin Cristo akxni tamunukgo. Kstalaninanin Cristo xalak Samaria alistalh kalaksakli akxni xtamunukgonita (Hech. 8:14-17). Cornelio chu tiku xwilakgolh kxchik kalaksakli akxni nina xtamunukgo (Hech. 10:44-48).

6. 1) ¿Tuku makglhtinankgo tiku kalaksakkanit? 2) ¿Tuku katlawani espíritu santo tiku kalaksakkanit?

⁶ Makgapitsi kstalaninanin Cristo lakapala katsikgo pi Dios kalaksaknit. Makgapitsi  tsinu tsinu katsitilhakgo. Pero maski ni tunkun katsikgo pi kalaksakkanit, wi tuku xputumkan makglhtinankgo. Apóstol Pablo lichuwinalh: «Akxni ntikanajlanitit, na tilitalhkatit spiritu santo ntu xmalaknunit. Wa [«tamalaknun, TNM»] wa ntu nakinkalakgchanan nkakgapun» (Efes. 1:13, 14). Wa xlakata Jehová kamaxki xʼespíritu santo putum tiku kalaksaknit. ¿Tuku katlawani espíritu santo? Tlawa pi liwana nakatsikgo pi kalaksakkanit xlakata naʼankgo kʼakgapun. Wa xlakata Pablo lichuwinalh pi espíritu santo xtachuna la «tamalaknun» nema nalikatsikgo pi kʼakgapun nalatamakgo, ni kKatiyatni (kalikgalhtawakga 2 Corintios 1:21, 22; 5:5).

7. ¿Tuku xlitlawatkan xchatunukan tiku kalaksakkanit naʼankgo kʼakgapun?

⁷ Akxni Dios laksaka chatum kstalanina Cristo, ¿wamputun pi xlikana naʼan kʼakgapun? Ni. Dios laksakli xlakata naʼan kʼakgapun. Pero Pedro wa: «Pus ankgalhin kalitsakgsatit namalalukgatiti milatamatkan pi xlikana, sampi lapi chuna natlawayatit [...] niukxiniku katilaklatayatit. Chu kʼakgapun lu kana lipaxuw nakalimanukanatit, antani xaliankgalhin mapakgsinama nawan kimpuchinakan Jesucristo» (2 Ped. 1:10, 11,TXS, 1999). Wa xlakata, tiku laksakkanit kuenta xlitlawat ni namakgatsankganani Dios. Xla laksakkanit naʼan kʼakgapun, tlan naʼan komo ni namakgatsankganani Jehová (Heb. 3:1; Apocalipsis [Revelación] 2:10).

8, 9. 1) ¿Tuku xlakata lhuwa kskujnin Dios ni akgatekgskgo tuku makgkatsikgo tiku kalaksaknit Jehová? 2) ¿La likatsi kstalanina Cristo pi Dios laksaknit naʼan kʼakgapun?

⁸ La uku, lhuwa kskujnin Dios tuwa makgkatsikgo naʼakgatekgskgo tuku lani chatum kstalanina Cristo akxni Jehová lilaksaka xʼespíritu santo. Nila akgatekgskgo xlakata Dios ni kalaksakkanit naʼankgo kʼakgapun. Nachuna, Dios katlawalh latamanin nalatamakgo kKatiyatni, ni kʼakgapun (Gén. 1:28; Sal. 37:29). Pero Jehová kalaksaknit makgapitsin xlakata naʼankgo kʼakgapun chu mapakgsinanin nalitaxtukgo chu sacerdotes. Akxni Dios kalilaksaka espíritu santo, talakgpali la lakpuwankgo. Ama kilhtamaku, umakgolh kstalaninanin Cristo kgalhkgalhikgo nalatamakgo kʼakgapun (kalikgalhtawakga Efesios 1:18).

⁹ Pero ¿la katsi kstalanina Cristo pi Dios laksaknit? Kaʼakxilhti tuku Pablo kawanilh kstalaninanin Cristo xatalaksakni xalak Roma, tiku santos xlitaxtukgo. Kawanilh: «Ni wa wixin makgamakglhtinantit xtapuwan nti xtachuna xatastan lilamakgo, nalipikuanatit amakgtum, wampi wa makgamakglhtinantit wa lantla xlakgskgatan Dios nawanatit; wa cha likilhaniyaw Dios “Abba” su wamputun, “Tlati.” Sampi watiya spiritu santo nti nkinkamalakatanksayan kkintapuwankan mpi lu[...] xlakgskgatan Dios nkin» (Rom. 1:7; 8:15, 16). Chuna la akxilhwi, Dios maklakaskin xʼespíritu santo xlakata liwana nakatsi kstalanina Cristo pi laksakkanit  naʼan kʼakgapun tamapakgsinan Jesús (1 Tes. 2:12).

10. ¿Tuku kilhchani 1 Juan 2:27 akxni kawanilh ni talakaskin wi tiku nakamasiyaniyan?

¹⁰ Kstalaninanin Cristo tiku kalaksakkanit naʼankgo kʼakgapun, ni talakaskin wi tiku nakawani pi Dios kalaksaknit. Jehová tlawa pi liwana nakatsikgo. Apóstol Juan kawani tiku kalaksakkanit: «Wixin, makgamakglhtinantit xlitliwakga wa nti xasantujlani, chuna lakgapasatit xlipaks nkatuwaj». Chu na kawani: «Wampi wa litliwakga ntu wixin makgamakglhtinitantit, katapalhininitan, na ni xlakaskinka mpala ti nakamasiyuniyan» (1 Juan 2:20, 27). Xlikana, kimputumkan tiku kskujnin Jehová lakaskinaw pi nakinkamasiyaniyan, asta tiku kalaksakkanit. Pero tiku kalaksakkanit ni talakaskin wi tiku nakawani pi Dios kalaksaknit. Xlakata liwana nakatsikgo, Jehová maklakaskin xʼespíritu santo, litliwakga nema nitu xtachuna.

11, 12. 1) ¿Tuku max akstu kgalhskinkan tiku xatalaksakni? 2) ¿Tuku liwana katsi kstalanina Cristo tiku laksakkanit?

¹¹ Akxni kstalaninanin Cristo katsikgo pi kʼakgapun nalatamakgo, lu talakgpalikgo. Wa xlakata Jesús wan pi lakachimparakgo «amakgtum» (Juan 3:3, 5). Alistalh wa: «Milisastitachixkuwit amakgtum. Wa un, kaniwa snokgan, nakgaxpata xmakasanat; wampi ni katsiya ntani min, chu ntani an; chuna wa yuma xlipaks nti litachixkuwinit spiritu» (Juan 3:7, 8). Chuna la akxilhaw, nila katsiyaw tuku makgkatsi tiku laksakkanit [2] (kaʼakxilhti nota niku kgalhsputa artículo).

¹² Max tiku laksakkanit akstu nakgalhskinkan, ¿tuku xlakata Jehová kilaksakli chu ni atanu kstalanina Cristo? Max nalilakgaputsa komo tlan namakgantaxti ama tuku lakgayawakanit. Pero tuku liwana katsi wa pi Jehová laksaknit nalatama kʼakgapun. Wa xlakata lu paxuwa chu paxtikakasini. Tiku kalaksakkanit chuna makgkatsikgo la Pedro akxni wa: «Katamaxkilh mpaxkatsinit Dios, [...] xTlat nkimPuchinakan Jesucristo. Wa xpalakata ntlanka xtalakgalhaman, kinkalimasastinitan xasasti latamat lakimpi nalikgalhkgalhitiyaw ntamalaknun, xpalakata xtalakastakwan Jesucristo klinin, chu mpi nalikgalhiyaw wa ntu nkinkalakgchanan ntu ni kgalhiy xlisputni, chu na ni lay mpasa ntu ni tlan, [...] anta lu[...] tlan kinkatamakininitan nkakgapun» (1 Ped. 1:3, 4). Akxni tiku kalaksakkanit likgalhtawakgakgo umakgolh tachuwin, liwana katsikgo pi wa Jehová tiku chuna kawanima.

13. 1) Akxni Dios lilaksaka xʼespíritu santo kstalanina Cristo, ¿la talakgpali xtapuwan? 2) ¿Tuku xlakata talakgpali xtapuwan chatum kstalanina Cristo akxni laksakkan?

¹³ Chuna la akxilhwi, akxni Dios lilaksaka espíritu santo kstalanina Cristo, talakgpali xtapuwan. Akxni nina xkatsi pi naʼan kʼakgapun, xla xlakpuwan pi kKatiyatni xʼama latama putum kilhtamaku.  Max na xakxilhputun kilhtamaku akxni Jehová Paraíso xtlawalh Katiyatni chu xmasputulh putum tuku nitlan. Max xlakpuwan pi xʼama makgamakglhtinan xpariente o chatum xʼamigo tiku ninit. Max asta xlakpuwan natlawa xchik chu xʼama way xtawakat kiwi nema xʼama chan (Is. 65:21-23). Pero akxni Jehová malakpuwanilh pi kʼakgapun xʼama latama, talakgpalilh xtapuwan. ¿Tuku xlakata? ¿Max xlakata xkgalhi talipuwan o lhuwa patinalh? ¿Max kaj xalan lakpuwa pi latamakan kKatiyatni xliputum kilhtamaku lilakgachanit chu ni xʼama lipaxuwa? ¿O max kaj xalan lakpuwa pi xkatsiputun la tamakgkatsi latamakan kʼakgapun? Ni. Lakgpalilh xtapuwan xlakata Jehová chuna tlawalh. Akxni Dios malakpuwani chatum kstalanina Cristo pi kʼakgapun naʼan, maklakaskin xʼespíritu santo xlakata nalakgpali xtapuwan chu tuku kgalhkgalhi namaxkikan.

14. Tiku kalaksakkanit, ¿tuku lakpuwankgo xlakata xlatamatkan unu kKatiyatni?

¹⁴ ¿Wamputun uma pi tiku kalaksakkanit niputunkgoya xlakata nalatamakgo kʼakgapun? Ni. Pablo lichuwinalh tuku makgkatsikgo. Tiku wilaw kʼuma chiki nema xuwa litatlawanit «tasayaw, na kiklh likatsanaw; ni wa mpala kaj makgamputunaw yuma nkimaknikan, wampi wa xpalakata nkgalhiputunaw wa xasasti, lakimpi wa ntu nchu mpulamaw nkaj xalinit, nalitalakgpali ntu xala kakgapun latamat» (2 Cor. 5:4). Unu Pablo tamalakxtumilh xmaknikan tiku kalaksakkanit la akgtum chiki nema xuwa xlitatlawanit. Akxni wa pi ni makgamputunkgo xkilhchanima pi ni niputunkgo. Lipaxuwakgo xlatamatkan chu liwana limaklakaskimputunkgo xlakata xfamiliajkan chu xʼamigoskan akxtum naskujnanikgo Jehová. Maski pulaklhuwa tuku tlawamakgolh, lakapastakkgo tuku Jehová kawaninit pi nakamaxki (1 Cor. 15:53; 2 Ped. 1:4; 1 Juan 3:2, 3; Apoc. 20:6).

15. ¿Tuku takgalhskinin ni limasiya pi chatum kstalanina Cristo xatalaksakni?

¹⁵ Max akstu kgalhskinkana komo na napina kʼakgapun. Komo chuna kgalhskinkana kalakpuwanti umakgolh takgalhskinin: ¿Makgkatsiya pi lu xlakaskinka akxilha akxni lichuwinana Dios? ¿Lu lakgatiya lichuwinana Biblia chu lakgatiya katsiniya «asta maski wantu puwankan pi ni lay akgatekgskan»? (1 Cor. 2:10). ¿Makgkatsiya pi lu makgtayanitan Jehová akxni lichuwinanita xtachuwin? ¿Tlawaputuna tuku Dios lakaskin xliputum militliwakga? ¿Lu kapaxkiya minatalan chu makgkatsiya pi milimakgtayat xlakata naskujnikgo Jehová? ¿Akxilhnita pi lhuwa la makgtayanitan Jehová kmilatamat? Komo wix putum tlan kgalhti uma takgalhskinin, ¿limasiya uma pi wix xatalaksakni? Ni, xlakata putum kskujnin Dios chuna makgkatsikgo, maski ni kalaksakkanit. Jehová tlan limaklakaskin xʼespíritu santo xlakata nakamaxki xlitliwakga putum kskujnin, maski kʼakgapun nalatamakgo o kKatiyatni. Komo wix akstu kgalhskimpaka komo xatalaksakni wix, uma wamputun pi ni kʼakgapun katilatapa. Tiku kalaksakkanit ni akstu kakgalhskinkan komo xatalaksakni o ni. Liwana katsikgo pi kalaksakkanit.

16. ¿La likatsiyaw pi ni putum tiku kamaxkikan espíritu santo naʼankgo kʼakgapun?

¹⁶ Biblia lichuwinan lhuwa kskujnin Dios tiku nikxni makgxtakgkgolh chu  makglhtinankgolh espíritu santo, pero ni ankgolh kʼakgapun. Juan tiku xMununan maxkika espíritu santo. Jesús lichuwinalh pi Juan lu xlakaskinka xwanit, pero na lichuwinalh pi ni xʼama kʼakgapun mapakgsinan la mapakgsina (Mat. 11:10, 11). Atanu liʼakxilhtit, wa David. Xla na pulalilh espíritu santo (1 Sam. 16:13). Xlakata makgtayalh espíritu santo akgatekgsli tuku tuwa akgatekgskan xlakata Jehová chu tsokgli makgapitsi tuku wi kBiblia (Mar. 12:36). Pero apóstol Pedro wa, pi David ni alh «nkakgapun» (Hech. 2:34). Jehová limaklakaskilh xʼespíritu xlakata uma lakchixkuwin xtlawakgolh nema tuwa kanajlakan, pero ni limaklakaskilh xlakata nakawani pi kʼakgapun xʼamakgolh latamakgo. ¿Xwamputun uma pi ni akgstitum xlamakgolh o ni xmininikgo naʼankgo kʼakgapun? Ni. Uma wamputun pi Jehová nakamaxkipara xlatamatkan xlakata nalatamaparakgo kParaíso unu kKatiyatni (Juan 5:28, 29; Hech. 24:15).

17, 18. 1) ¿Niku lakpuwankgo nalatamakgo lhuwa kskujnin Dios la uku? 2) ¿Tuku takgalhskinin nakgalhtiyaw kʼatanu artículo?

¹⁷ Lhuwa tiku skujnanikgo Jehová la uku ni katiʼankgolh kʼakgapun. Lakpuwankgonit nalatamakgo kKatiyatni kxTamapakgsin Dios, chuna la Abrahán, David, Juan tiku xMununan chu atanu lakchixkuwin chu lakpuskatin xala makgasa (Heb. 11:10). Kʼakgapun nalatamakgo 144,000 tiku natamapakgsinankgo Jesucristo. Pero Biblia wan pi kxaʼawatiya kilhtamaku nialh lhuwa xʼamakgolh latamakgo kKatiyatni tiku kalaksakkanit (Apoc. 12:17). Wa xlakata tiku makgtapakgsikgo 144,000 lhuwata nikgonit chu antiya wilakgocha kʼakgapun.

¹⁸ Pero komo wi tiku nawan pi na xatalaksakni, ¿tuku natlawakgo kstalaninanin Cristo tiku nalatamakgo kKatiyatni? Komo wi tiku xalak kincongregacionkan natsuku wa kaxtalanchu chu na wa vino akxni natalakapastaka akxni tinilh Cristo, ¿la nalikatsiniyaw? Komo chuntiya lhuwama tiku kalaksakkanit, ¿kililakgaputsatkan? Kʼatanu artículo nakgalhtiyaw umakgolh takgalhskinin.