1-3. Die yen phiare vwẹ Pẹntikọst rọ nẹrhẹ ọ dia ẹdẹ rẹ oghẹresan, kẹ idjerhe vọ yen ọnana vwọ dia orugba rẹ aroẹmrẹ rẹ Baibol na? (Ni uhoho rẹsosuọ na.)

ỌNANA urhiọke rẹ Sunday vwẹ Jerusalẹm. Ẹdẹ rẹ oghẹresan rọ je vọn vẹ omavwerhovwẹn. Ihwo ruẹ orẹ rẹ Pẹntikọst rọ dia orẹ ọghanghanre re ruẹ vwẹ ọtonphiyọ rẹ orhọ rẹ eka. Urhiọke yena, orherẹn rode na ze izobo na vwẹ uwevwin ẹga na. Omarẹ ughọjọ irhirin, ko rhe ze izobo rẹ ikara ivẹ ra vwẹ ọka rẹsosuọ vwo ru yẹrẹ emamọ rẹsosuọ rẹ orhọ na. Orherẹn rode na mi kpogho kẹ Jihova. Ọnana Pẹntikọst rẹ ukpe rẹ 33.—Livitikọs 23:15-20.

² Kukpe kukpe, yen orherẹn rode na vwo ze izobo rẹ ekpogho. Izobo yena churobọ si orọnvwọn ọghanghanre ọvo rọ phiare vwẹ Pẹntikọst rẹ ukpe rẹ 33. Ọ phia kẹ idibo rẹ Jesu 120, ọke rẹ ayen vwọ nẹrhovwo vwẹ ubruwevwin rẹ obenu na. (Iruo Rẹ Iyinkọn Na 1:13-15) Ọmraro Joẹl mraro rọyen phiyotọ omarẹ ẹgbukpe ujorin ẹrenren re wan re. (Joẹl 2:28-32; Iruo Rẹ Iyinkọn Na 2:16-21) Orọnvwọn oghẹresan vọ yen phiare?

³ Se Iruo Rẹ Iyinkọn Na 2:2-4. Vwẹ Pẹntikọst rẹ ukpe rẹ 33,  Ọghẹnẹ ku ẹwẹn ọfuanfon rọyen ku Inenikristi yena, ayen da dia ihwo ra jẹreyọ. (Iruo Rẹ Iyinkọn Na 1:8) Ọke yena, ihwo buebun de bi koko riariẹ ayen phiyọ, idibo na da vuẹ ihwo na kpahen emu rẹ igbunu rẹ ayen mrẹre ji nyo na. Ọyinkọn Pita de dje obo re phiare na fiotọ vwọ kẹ ayen vẹ ọghanrovwẹ rọyen. Ọ da je vuẹ otu na: “Kurhẹriẹ rere ovwan [‘bromaphiyame,’ NW] vwẹ odẹ ri Jesu Kristi fiki rẹ evwoghovwo rẹ imwemwu rẹ ovwan; ovwan ke cha mrẹ okẹ rẹ [‘ẹwẹn ọfuanfon,’ NW] na reyọ.” Ẹdẹ yena, omarẹ ihwo 3,000 yen bromaphiyame, ayen da je mrẹ okẹ rẹ ẹwẹn ọfuanfon na.—Iruo Rẹ Iyinkọn Na 2:37, 38, 41.

4. (a) Diesorọ o vwo fo nẹ a riẹn kpahen obo re phiare vwẹ Pẹntikọst? (b) Ọ sa dianẹ orọnvwọn ọghanghanre ọfa je phia vwẹ ẹdẹ re vwo ruẹ orẹ rẹ Pẹntikọst na a ke rhe mrẹ ukpe rẹ 33, ọyen die? (Ni eta rẹ odjefiotọ.)

⁴ Die yen orherẹn rode na vẹ izobo ro ze vwẹ ẹdẹ rẹ Pẹntikọst na mudiaphiyọ? Orherẹn rode na yen Jesu. Ikara na ke rha hẹ idibo rẹ Jesu ra jẹreyọ. Idibo yena ra jẹreyọ vwo nẹ ihworakpọ ri jẹgba na, e se ayen “emamọ rẹsosuọ.” (Jems 1:18) Ọghẹnẹ rhiabọreyọ ihwo nana kerẹ emọ rọyen, ayen je dia ẹbẹre ọvo rẹ Uvie rẹ Ọghẹnẹ, ji nene Jesu sun kerẹ ivie vwẹ odjuvwu. (1 Pita 2:9) Jihova che ku ebruphiyọ ku ihwo eje ri nyupho rọyen womarẹ Uvie na. Ọtiọyena, owenẹ odjuvwu yẹrẹ akpọ na yen a cha dia, Pẹntikọst rẹ ukpe rẹ 33 na pha ghanghanre kẹ avwanre eje. ^[1]—Ni eta rẹ odjefiotọ.

5. Mavọ yen e ru riẹn nẹ ọ dia idjerhe vuọvo yen a vwọ jẹ ihwo reyọ-ọ?

⁵ Ẹdẹ nana cha sa chọrọ idibo rehẹ ubruwevwin obenu na ẹro-o. A da mrẹ orọnvwọn rọ pha kerẹ erhanre vwẹ uyovwin rẹ ayen ọvuọvo. Jihova da kẹ ayen ẹgba vwọ jẹ ejajẹ efa. Ayen vwo imuẹro nẹ a vwẹ ẹwẹn ọfuanfon na vwọ jẹ ayen reyọ. (Iruo Rẹ Iyinkọn Na 2:6-12) Ẹkẹvuọvo, ọ dia Inenikristi eje ra jẹreyọ yen ọnana phia kẹ-ẹ. Kerẹ udje, Baibol na tare nẹ a mrẹ orọnvwọn kerẹ erhanre vwẹ uyovwin rẹ ihwo buebun ra je jẹreyọ vwẹ Jerusalẹm vwẹ ẹdẹ vuọvo yena-a. A jẹ ayen reyọ ọke re vwo bru ayen phiyame. (Iruo Rẹ Iyinkọn Na 2:38) Vwọba, ọ dia Inenikristi eje yen a jẹreyọ vwẹ ọke re vwo bru ayen phiyame-e. Re vwo bru ihwo rẹ Sameria phiyame nu, ọmọke je wanvre tavwen a ke jẹ ayen reyọ. (Iruo Rẹ Iyinkọn Na 8:14-17) Vwẹ ẹdia ra fobọ mrẹ-ẹ, a jẹ Kọniliọs vẹ evwruwevwin rọyen reyọ tavwen a ke tobọ bru ayen phiyame.—Iruo Rẹ Iyinkọn Na 10:44-48.

6. Die yen a vwọ kẹ ihwo ra jẹreyọ na eje, mavọ yen ọnana djobọte ayen wan?

⁶ Ọtiọyena, Inenikristi vwẹ idjerhe sansan vwọ riẹn nẹ a jẹ ayen reyọ. Evo riẹn ugege yena. Efa riẹn siẹrẹ uvwre rẹ ọke evo da wan nu. Ẹkẹvuọvo, ọyinkọn Pọl djere fiotọ obo re phia kẹ ayen ohwo ọvuọvo. Ọ da ta: “Ri de se gbuyota, ka ka oka rẹ ive rẹ [‘ẹwẹn ọfuanfon,’ NW] na phihọ ayen, kọye hẹ iviẹnwa rẹ ukuẹriọ rẹ avwanre.” (Ẹfesọs 1:13, 14) Kọyen Jihova reyọ ẹwẹn ọfuanfon rọyen vwo dje kẹ ihwo nana phephẹn nẹ a jẹ ayen reyọ rẹ ayen vwo kpo odjuvwu. Idjerhe nana, ẹwẹn ọfuanfon na kọ pha kerẹ “iviẹnwa,” yẹrẹ imuẹro nẹ ayen cha dia odjuvwu bẹdẹ vwẹ ọke rọ cha obaro na, ọ dia otọrakpọ na-a.—Se 2 Kọrẹnt 1:21, 22; 5:5.

7. Onenikristi ki se vwo uphẹn ro vwo kpo odjuvwu, die yen a guọnọ mie?

⁷ Siẹrẹ a da jẹ ohwo reyọ, ko ghwe mudiaphiyọ nẹ uphẹn nana rha cha sa va  ohwo na abọ-ọ? Ẹjo. O vwo imuẹro nẹ e durhie ọyen kpo odjuvwu. Jẹ uphẹn nana che te obọ siẹrẹ ọ da fuevun ga Jihova te oba. Pita da nabọ djefiotọ: “Fiki rẹ ọtiọye na, imoni, gbe jẹ oruru rẹ use vẹ ẹjẹreyọ na gan vwẹ oma rẹ ovwan, kidie ovwan de ru ọnana ovwan gbi she bẹdẹ-ẹ; vwẹ ọtiọye na ka rhuẹrẹ idjerhe kẹ ovwan rẹ ovwan cha wan kpo uvie ri bẹdẹ na rẹ Ọrovwavwanre kugbe Osivwi rẹ avwanre Jesu Kristi.” (2 Pita 1:10, 11) Ọtiọyena, Onenikristi ra jẹreyọ kọ davwẹngba vwọ kẹnoma kẹ obo re sa dobọ rẹ ẹga rọyen ji. Dedevwo nẹ a jẹrẹ reyọ nure, ọ rha fuevun ga Jihova te oba-a, uphẹn nana cha va abọ.—Hibru 3:1; Ẹvwọphia 2:10.

8, 9. (a) Diesorọ ọ vwọ bẹn vwọ kẹ ihwo buebun ri vwo vwo ẹruọ rẹ obo re phia siẹrẹ Ọghẹnẹ da jẹ ohwo reyọ? (b) Mavọ yen ohwo vwọ riẹn nẹ e durhie ọyen kpo odjuvwu?

⁸ Idibo rẹ Ọghẹnẹ buebun sa mrẹ bẹnbẹn rẹ ayen vwo vwo ẹruọ rẹ obo re phia siẹrẹ Ọghẹnẹ da jẹ ohwo reyọ. Ọ sa dia ọtiọyen kidie ayen dia ihwo ra jẹreyọ-ọ. Ọghẹnẹ ma ohworakpọ rọ vwọ dia otọrakpọ na, ọ dia odjuvwu-u. (Jẹnẹsis 1:28; Une Rẹ Ejiro 37:29) Ẹkẹvuọvo, Jihova jẹ ihwo evo reyọ re vwọ dia ivie vẹ irherẹn vwẹ odjuvwu. Ọtiọyena, ọke rọ da jẹ ayen reyọ, iphiẹrophiyọ vẹ iroro rayen ki wene, kẹ ayen rhẹro rẹ akpeyeren vwẹ odjuvwu.—Se Ẹfesọs 1:18.

⁹ Ẹkẹvuọvo, mavọ yen ohwo vwọ riẹn nẹ e durhie ọyen kpo odjuvwu? Jokaphiyọ oborẹ Pọl vuẹ iniọvo ra jẹreyọ rehẹ Rom, “re seri ne rhe dia irherẹn.” Ọ da vuẹ ayen: “Ọ gbe dia [‘ẹwẹn,’ NW] rẹ ọviẹn rọ djẹ oshọ mu ohwo na a vwọ kẹ ovwa-an, ẹkẹvuọvo kẹ [‘ẹwẹn,’ NW] rẹ ọmọ a vwọ kẹ ovwan. Kọye ovwan vwo kperẹ nẹ, Baba! Ọsẹ! [‘Ẹwẹn,’ NW] na ọvo ri se oseri kẹ [‘ẹwẹn,’ NW] rẹ avwanre nẹ avwanre emọ rẹ Ọghẹnẹ.” (Rom 1:7; 8:15, 16) Ẹwẹn ọfuanfon na yen Ọghẹnẹ vwo dje phephẹn kẹ ohwo na nẹ a jẹrẹ reyọ ro vwo nene Jesu sun vwẹ odjuvwu.—1 Tẹsalonaika 2:12.

10. Die yen 1 Jọn 2:27 mudiaphiyọ rọ vwọ tanẹ, o rhe fo nẹ ohwo ọfa yono ohwo ra jẹreyọ na-a?

¹⁰ Ọ dia ohwo ọfa yen cha vuẹ ayen nẹ Ọghẹnẹ jẹ ayen reyọ-ọ. Jihova kẹ ayen imuẹro na dẹn. Ọyinkọn Jọn da vuẹ Inenikristi nẹ: “Ẹkẹvuọvo Ọfuanfon Ọvuọvo na vwẹ evwri ghworo ovwan nure, yẹ ovwan ejobi riẹnrẹ. Ẹkẹvuọvo evwoghworo na rẹ ovwan reyọ mie na ọ vẹ ovwan herọ, o rhe fo rere ohwo rhe yono ovwa-an; kirobo rẹ evwoghworo rọye yono ovwan emu kemu na, ọye na hẹ uyota, ọ dia efia-an, otiobo ro yono ovwan na, ovwan dia evun rọye ọtiọye.” (1 Jọn 2:20, 27) Ofori nẹ e ra jẹreyọ na rhiabọreyọ uyono rẹ Jihova kerẹ ihwo efa. Jẹ ọ dia ohwo ọfa yen cha vuẹ ayen nẹ a jẹ ayen reyọ-ọ. Jihova kẹ ayen imuẹro womarẹ ẹwẹn ọfuanfon rọyen, rọ dia ẹgba rọ ma rho na!

11, 12. Die yen ohwo ra jẹreyọ sa nọ oma rọyen, jẹ die yen o vwo imuẹro rọyen?

¹¹ Siẹrẹ a da jẹ Onenikristi reyọ nu, ayen wene mamọ. Jesu tobọ tanẹ e “rhivwi vwiẹ” ayen. (Jọn 3:3, 5) Ọ da nabọ djefiotọ nẹ: “Wo jẹ obo me ta kẹ owẹ na gbe we unu-u, e rhivwi vwiẹ wẹ ọkpokpọ. Aphopho djuẹ kpọ asan ro jere, wo nyo umri rọye, ẹkẹvuọvo wọ riẹn asan ro nẹ cha-a eyẹ asan rọ ra-a; ọtiọye ọ epha kẹ ohwo kohwo rẹ [‘ẹwẹn,’ NW] vwiẹri.” (Jọn 3:7, 8) Vwọrẹ uyota, ọ cha bẹn rẹ ohwo ra jẹreyọ vwo djisẹ rẹ obo rọ dia  siẹrẹ a da jẹ ohwo reyọ. ^[2]—Ni eta rẹ odjefiotọ.

¹² Ohwo ra jẹreyọ sa nọ oma rọyen, ‘Diesorọ Jihova vwọ jẹ vwẹ, jẹ ihwo efa hẹ etiyin?’ Ọ sa tobọ roro nẹ ọyen muwan vwọ kẹ uphẹn nana-a. Dedena o vwo imuẹro nẹ Jihova jẹrẹ reyọ. Oma je vwerhọn mamọ fikirẹ uphẹn nana. Oka rẹ ẹwẹn ro rhe ihwo ra jẹreyọ na ghwa họhọ ọ rẹ Pita rọ vwọ tanẹ: “Ebruba kẹ Ọghẹnẹ kugbe Ọsẹ rẹ Ọrovwavwanre Jesu Kristi! Ra vwẹ arodọvwẹ rọye rode na rhoma vwiẹ avwanre ọkpokpọ kẹ iphiẹrohọ ro jeghwo vwẹ oma re vrẹnushi rẹ Jesu Kristi nẹ ughwu rhe, vwọ kẹ ukuẹriọ ro jẹghwọrọ, ro jẹ ẹgua evwo, rọ tẹ-ẹn, ra sẹro rọye vwẹ obo odjuvwu kẹ ovwan.” (1 Pita 1:3, 4) Ihwo ra jẹreyọ de se eta nana, kẹ ayen ghwe vwo imuẹro nẹ Ọsẹ rayen yen ta ota kẹ ayen komobọ.

13. Idjerhe vọ yen iroro rẹ ohwo ra jẹreyọ vwo wene, kẹ die yen so ewene nana?

¹³ Ihwo ra jẹreyọ vwo iphiẹrophiyọ rẹ ayen vwọ dia otọrakpọ na bẹdẹ tavwen Jihova ki durhie ayen kpo odjuvwu. Ayen rhẹro rẹ ọke rẹ Jihova che vwo ru akpọ na phiyọ iparadaisi, ji si umwemwu eje no. Ọkiọvo, ayen rhẹro rẹ ọke rẹ ayen che vwo dede ihwo rẹ orua yẹrẹ igbeyan rayen ra rhọvwọn nẹ ushi. Ayen je rhẹro rẹ ọke rẹ ayen che vwo uwevwin rayen, je re ekankọn rẹ ayen kọnre. (Aizaya 65:21-23) Diesorọ iroro rayen vwo wene asaọkiephana? Ayen wene iroro fikirẹ omaemuophiyọ yẹrẹ ojaẹriọ? Ayen roro nẹ akpeyeren rẹ iparadaisi na vwẹ otọrakpọ na che nu ohwo ọhọ, omavwerhovwẹn je cha kanrọ? Gbanẹ ayen de guọnọ mrẹ oborẹ akpeyeren rẹ odjuvwu cha dia? Ẹjo. Ọghẹnẹ yen brorhiẹn nana vwọ kẹ ayen. Ọke ro vwo durhie ayen, ọ da vwẹ ẹwẹn ọfuanfon rọyen vwo wene iroro vẹ iphiẹrophiyọ rayen.

14. Mavọ yen akpeyeren vwẹ otọrakpọ na hepha kẹ e ra jẹreyọ na?

¹⁴ Ọnana ko mudiaphiyọ nẹ e ra jẹreyọ guọnọ ghwu? Pọl djisẹ rẹ oborọhepha kẹ ihwo ra jẹreyọ na. Ọ vwẹ ugboma rayen vwo dje “utughẹ,” ọ da ta: “Kidie re avwanre je vwọ hẹ utughẹ nana, yẹ avwanre fiọn unu ro ẹnwan; ọ dianẹ kẹ avwanre ban phihọ-ọ, ẹkẹvuọvo ke rhuo avwanre phihọ, ọtiọye na arhọ ko mu obo re dia ọ rẹ ugboma ro ghwẹ rọ.” (2 Kọrẹnt 5:4) Inenikristi nana guọnọ ghwu-u. Ayen riavwerhen rẹ akpeyeren, ayen je guọnọ nene ihwo rẹ orua vẹ igbeyan rayen ga Jihova kẹdẹ kẹdẹ. Ẹkẹvuọvo, kemu kemu rẹ ayen ruẹ ejobi, ayen karophiyọ oborẹ Ọghẹnẹ ve kẹ ayen vwẹ ọke rọ cha obaro na.—1 Kọrẹnt 15:53; 2 Pita 1:4; 1 Jọn 3:2, 3; Ẹvwọphia 20:6.

15. Ohwo se roro nẹ a jẹ ọyen reyọ fikirẹ erọnvwọn evo, eyen die?

¹⁵ Ọkiọvo wo se roro nẹ Jihova durhie uwe kpo odjuvwu. Ọ da dia ọtiọyen, gbe roro kpahen enọ eghanghanre nana: Wo vwo oruru ọgangan kpahen iruo aghwoghwo na? Wo vwo omavwerhovwẹn kpahen uyono rẹ Baibol vẹ “emu okokodo rẹ Ọghẹnẹ”? (1 Kọrẹnt 2:10) Ubiudu wẹn vuẹ wẹn nẹ Jihova ku ebruphiyọ kuẹ iruo aghwoghwo wẹn? Wọ guọnọ ru ọhọre rẹ Jihova vwọ vrẹ emu ọfa? Wo vwo ẹguọnọ okokodo kpahen ihwo efa, wo ji vwo owenvwe ọgangan wọ vwọ chọn ayen uko vwọ ga Jihova? Wọ mrẹ ukẹcha rẹ Jihova vwẹ ẹdia sansan rẹ akpeyeren wẹn? Ẹkpahọnphiyọ wẹn vwọ kẹ enọ nana da dia e, ko mudiaphiyọ nẹ wọwẹ ọvo usun rẹ ihwo ra jẹreyọ na? Ẹjo, kakaka. Diesorọ? Kidie  ẹkpahọnphiyọ rẹ idibo rẹ Ọghẹnẹ eje vwọ kẹ enọ nana sa dia e, owenẹ ayen ihwo ra jẹreyọ yẹrẹ a jẹ ayen reyọ-ọ. Womarẹ ẹwẹn ọfuanfon na, Jihova sa vwẹ ẹgba vwọ kẹ idibo rọyen eje, otoro iphiẹrophiyọ ro rhe aye-en. Vwọrẹ uyota, wo de vwo ẹwẹn ivivẹ sẹ wo che kpo odjuvwu, kọyen e durhie uwe kakaka-a. Ihwo ra jẹreyọ vwo ẹwẹn ivivẹ kpahen ọnana-a! Ayen riẹnre dẹn!

16. Mavọ yen e ru riẹn nẹ ọ dia ihwo rẹ Ọghẹnẹ ku ẹwẹn ọfuanfon rọyen ku eje yen kpo odjuvwu-u?

¹⁶ Vwevunrẹ Baibol na, a mrẹ idibo rẹ Jihova buebun ro ku ẹwẹn ọfuanfon rọyen ku jẹ ayen kpo odjuvwu-u. Ọvo usun rayen yen Jọn ro bru ihwo phiyame. Jesu tare nẹ ohwo rọ rho nọ Jọn herọ-ọ, ẹkẹvuọvo ọ da je tanẹ Jọn che sun vwẹ odjuvwu-u. (Matiu 11:10, 11) Devid jẹ ohwo ọfa. (1 Samuẹl 16:13) Ẹwẹn ọfuanfon chọn rọ uko vwo vwo ẹruọ rẹ erọnvwọn ri kokodo kpahen Jihova, o ji muo vwo si ẹbe evo vwẹ Baibol na. (Mak 12:36) Ọyinkọn Pita je tanẹ Devid “kpo idjuvwu-u.” (Iruo Rẹ Iyinkọn Na 2:34) Jihova vwẹ ẹwẹn ọfuanfon vwọ chọn ihwo nana uko vwo ru erọnvwọn sansan, jẹ e durhie ayen kpo odjuvwu-u. Ọnana ko mudiaphiyọ nẹ ayen fuevun te-e, yẹrẹ ayen muwan rẹ ayen vwo sun vwẹ odjuvwu-u? Ẹjo. O mudiaphiyọ nẹ Jihova cha rhọvwọn ayen rhe otọrakpọ na vwẹ Iparadaisi.—Jọn 5:28, 29; Iruo Rẹ Iyinkọn Na 24:15.

17, 18. (a) Iphierophiyọ vọ yen rhe idibo rẹ Ọghẹnẹ buebun? (b) Enọ vọ yen a cha kpahen phiyọ vwẹ uyono rọ vwọ kpahen ọnana?

¹⁷ Idibo rẹ Ọghẹnẹ buebun nonẹna che kpo odjuvwu-u. Kerẹ Ebraham, Devid, Jọn ro bru ihwo phiyame, kugbe eshare vẹ eya efa rẹ ọke awanre, idibo rẹ Ọghẹnẹ nonẹna rhẹro rẹ ọke ro che vwo sun ayen vwẹ otọrakpọ na. (Hibru 11:10) Ihwo 144,000 yen che nene Jesu sun vwẹ odjuvwu. Ẹkẹvuọvo, Baibol na ta ota kpahen ihwo “ri chekọ” rẹ e ra jẹreyọ na re jehẹ otọrakpọ na vwẹ ọke rẹ oba na. (Ẹvwọphia 12:17) Ọtiọyena, buebun rẹ 144,000 na ghwure, ayen jehẹ odjuvwu re.

¹⁸ Ẹkẹvuọvo, ohwo da tanẹ a jẹ ọyen reyọ, ẹro vọ yen ihwo ri vwo iphiẹrophiyọ rẹ otọrakpọ na vwo no? Ohwo ọvo vwẹ ukoko wẹn da re emu ovwọnvwọn na, ubiẹro vọ wo vwo no? Ọ da rha dianẹ ihwo ra jẹreyọ na buẹnphiyọ vwo? Ofori nẹ ọnana kpokpo ẹwẹn wẹn? A cha mrẹ ẹkpahọnphiyọ rẹ enọ nana vwẹ uyono rọ vwọ kpahen ọnana.