1-3. Ndi zwiitea zwifhio zwe zwa ita uri Pentekoste i vhe ḓuvha ḽo khetheaho, nahone zwenezwi zwiitea zwo ḓadzisa hani zwe Maṅwalo a dzula o zwi amba? (Sedzani tshifanyiso tsha u thoma.)

HO VHA hu matsheloni a Swondaha ngei Yerusalema. Ḽo vha ḽi ḓuvha ḽo khetheaho na ḽi takadzaho. Vhathu vho vha vha tshi khou pembelela Pentekoste ye ya vha i vhuṱambo ho khetheaho mathomoni a khaṋo ya goroi. Nga eneo matsheloni, tshifhe muhulu o ṋekedza zwiṱhavhelo zwa nga misi thembeleni. Nga zwenezwo, hu ṱoḓaho u vha awara ya vhuṱahe, o ṋekedza zwinkwa zwivhili zwi re na dini zwo itwaho nga goroi ya u thoma kana zwiranzhe zwa khaṋo. Tshifhe muhulu o isa zwinkwa ngeno na ngei, a tshi zwi ṋekedzela Yehova. Ho vha hu Pentekoste ya ṅwaha wa 33 C.E.—Levitiko 23:15-20.

² Lwa miṅwaha minzhi, tshifhe muhulu o kumedza tshenetsho tshifhiwa ṅwaha muṅwe na muṅwe. Tshifhiwa tsho vha tshi tshi tshimbidzana na tshiṅwe tshithu tsha ndeme vhukuma, tshe tsha itea nga Pentekoste ya ṅwaha wa 33 C.E. Nahone zwo itea kha vhafunziwa vha Yesu vha 120, vhe vha vha vha tshi khou rabela vhoṱhe kamarani ya nṱha ngei Yerusalema.  (Mishumo 1:13-15) Miṅwaha ya 800 musi zwenezwo zwi sa athu u itea, muporofita Yoele o vha o no ṅwala nga ha tshenetshi tshiitea. (Yoele 2:28-32; Mishumo 2:16-21) Ndi mini zwa ndeme vhukuma zwe zwa itea?

³ Vhalani Mishumo 2:2-4. Nga ṅwaha wa Pentekoste ya 33, Mudzimu o ṋea vhenevho Vhakriste muya wawe mukhethwa nahone vha vha vhaḓodzwa. (Mishumo 1:8) Nga zwenezwo, gogo ḽa thoma u vha kuvhanganela nahone vhafunziwa vha thoma u amba nga ha zwithu zwavhuḓi, zwe vha vha vha tshi kha ḓi tou bva u zwi vhona na u zwi pfa. Muapostola Petro o ṱalutshedza zwe zwa vha zwi tshi kha ḓi tou bva u itea na uri ndi ngani zwi zwa ndeme vhukuma. Nga zwenezwo, o vhudza gogo uri: “Rembuluwani, nahone muṅwe na muṅwe waṋu a lovhedzwe dzinani ḽa Yesu Kristo uri ni hangwelwe zwivhi zwaṋu, nahone ni ḓo wana tshifhiwa tsha fhedzi tsha muya mukhethwa.” Nga ḽeneḽo ḓuvha, ho lovhedzwa vhathu vha ṱoḓaho u vha 3 000 na vhone vha ṱanganedza muya mukhethwa.—Mishumo 2:37, 38, 41.

4. (a) Ndi ngani ri tshi fanela u vha na dzangalelo kha zwe zwa itea nga Pentekoste? (b) Ndi tshifhio tshiṅwe tshiitea tsha ndeme tshine tsha nga vha tsho itea nga ḽeneḽo ḓuvha miṅwahani minzhi ya nga phanḓa? (Sedzani notsi dza u fhedzisela.)

⁴ Tshifhe muhulu na tshifhiwa tshe a vha a tshi tshi ṋekedza nga Pentekoste iṅwe na iṅwe zwi imela mini? Tshifhe muhulu o vha a tshi imela Yesu. Zwinkwa zwo vha zwi tshi imela vhafunziwa vha Yesu vho ḓodzwaho. Vhenevho vhafunziwa vho nangwa vhukati ha vhathu vha re na tshivhi nahone vha vhidzwa “zwiranzhe.” (Yakobo 1:18) Mudzimu o ṱanganedza vhenevha sa vhana vhawe nahone o vha khetha uri vha vhuse sa mahosi na Yesu ṱaḓulu sa tshipiḓa tsha Muvhuso wa Mudzimu. (1 Petro 2:9) Yehova u ḓo fhaṱutshedza vhathu vhoṱhe vhane vha thetshelesa a tshi shumisa Muvhuso wawe. Nga zwenezwo, hu sa londwi uri haya hashu hu ḓo vha ṱaḓulu na Yesu kana kha ḽifhasi ḽa paradiso, Pentekoste ya ṅwaha wa 33 C.E. ndi ya ndeme vhukuma kha riṋe. ^[1]—Sedzani notsi dza u fhedzisela.

5. Ri zwi ḓivha hani uri a si vhaḓodzwa vhoṱhe vhane vha ḓodzwa nga nḓila i fanaho?

⁵ Vhafunziwa vhe vha vha vhe kamarani ya nṱha vha nga si vhuye vha hangwa ḽeneḽo ḓuvha. Muṅwe na muṅwe wavho o vha e na tshithu tshi ngaho khavhu kha ṱhoho. Yehova o vha ṋea vhukoni ha u amba luambo lusili. Vho vha vha sa timatimi uri vho ḓodzwa nga muya mukhethwa. (Mishumo 2:6-12) Fhedzi zwenezwi zwithu zwi swayeaho a zwi itei kha Vhakriste vhoṱhe musi vha tshi ḓodzwa. Sa tsumbo, Bivhili a i ambi uri tshithu tshi ngaho khavhu tsho vha tshi kha ṱhoho dza vhathu vhanzhi vhe vha vha vhe Yerusalema vho ḓodzwaho nga ḽeneḽo ḓuvha. Vho ḓodzwa musi vha tshi lovhedzwa. (Mishumo 2:38) Zwiṅwe hafhu, a si Vhakriste vhoṱhe vhane vha ḓodzwa musi vha tshi lovhedzwa. Vhasamaria vho ḓodzwa musi ho no fhela tshifhinga vho lovhedzwa. (Mishumo 8:14-17) Nahone kha tshiitea tshi songo ḓoweleaho, Koronelio na vha nnḓu yawe vho ḓodzwa vha sa athu u lovhedzwa.—Mishumo 10:44-48.

6. Ndi mini zwine vhaḓodzwa vhoṱhe vha zwi wana, nahone zwenezwi zwi vha kwama hani?

⁶ Vhukuma, Vhakriste vha ṱhogomela nga nḓila dzi sa fani uri vho ḓodzwa.  Vhaṅwe vha nga vha vho ṱhogomela uri Yehova o vha ḓodza nga tshenetsho tshifhinga. Vhaṅwe vha zwi ṱhogomela nga murahu ha tshifhinga. Fhedzi muapostola Paulo o ṱalutshedza zwine zwa itea kha muṅwe na muṅwe wavho. O ri: “Musi no no tenda, no dovha na swaiwa nga muya mukhethwa we Mudzimu a u fulufhedzisa, zwine zwa vha u khwaṱhisedzwa hu tshee nga phanḓa nga ha ifa ḽashu.” (Vhaefesa 1:13, 14) Nga zwenezwo, Yehova u shumisa muya wawe mukhethwa u itela uri zwi vhe khagala kha vhenevho Vhakriste uri o vha khetha u ya ṱaḓulu. Nga yeneyi nḓila, muya mukhethwa ndi “u khwaṱhisedzwa hu tshee nga phanḓa” kana vhuṱanzi ha uri tshifhingani tshi ḓaho vha ḓo tshila ṱaḓulu lwa tshoṱhe, hu si kha ḽifhasi.—Vhalani 2 Vhakorinta 1:21, 22; 5:5.

7. Mukriste muṅwe na muṅwe o ḓodzwaho u fanela u ita mini uri a wane malamba awe ngei ṱaḓulu?

⁷ Musi Mukriste a tshi ḓodzwa, naa zwi amba uri u ḓo wana malamba awe? Hai. U na vhungoho ha uri o rambiwa ṱaḓulu. Fhedzi u ḓo lambedzwa arali a dzula a tshi fulufhedzea kha Yehova. Petro o zwi ṱalutshedza nga heyi nḓila: “Vhahashu, nga nṱhani ha zwenezwi, itani zwoṱhe zwine na nga kona uri u vhidzwa haṋu na u nangwa zwi vhe zwa ngoho kha inwi; ngauri arali ni tshi bvela phanḓa ni tshi ita zwenezwi zwithu a ni nga ḓo vhuya na khukhulwa na wa. Zwi re zwone ndi uri nga yeneyi nḓila ni ḓo fhaṱutshedzwa zwihulu uri ni dzhene muvhusoni wa lini na lini wa Murena washu na Mutshidzi Yesu Kristo.” (2 Petro 1:10, 11) Nga zwenezwo, Mukriste muṅwe na muṅwe o ḓodzwaho, ho ngo fanela u tendela naho tshi tshini tshi tshi mu thivhela u shumela Yehova. Naho o rambiwa kana o vhidzwa ṱaḓulu, arali a sa dzuli a tshi fulufhedzea, ha nga wani malamba awe.—Vhaheberu 3:1; Nzumbululo 2:10.

8, 9. (a) Ndi ngani zwi tshi konḓela vhathu vhanzhi u pfesesa zwine zwa itea musi muthu a tshi ḓodzwa? (b) Muthu u zwi ḓivha hani uri o rambiwa ṱaḓulu?

⁸ Vhunzhi ha vhashumeli vha Mudzimu ṋamusi vha nga wana zwi tshi vha konḓela u pfesesa zwine zwa itea kha muṅwe muthu musi Mudzimu a tshi mu ḓodza. Zwenezwi zwi a pfesesea ngauri a vho ngo ḓodzwa. Mudzimu o sika vhathu uri vha tshile tshoṱhe kha ḽifhasi, hu si ṱaḓulu. (Genesi 1:28; Psalme ya 37:29) Fhedzi Yehova o khetha vhaṅwe uri vha vhe mahosi na vhotshifhe ngei ṱaḓulu. Nga zwenezwo, musi a tshi vha ḓodza, fulufhelo ḽavho na nḓila ine vha humbula ngayo zwi a shanduka u itela uri vha lavhelele vhutshilo ha ṱaḓulu.—Vhalani Vhaefesa 1:18.

⁹ Fhedzi muthu u zwi ḓivha hani uri o rambiwa ṱaḓulu? Ṱhogomelani zwe Paulo a zwi vhudza vhahawe vho ḓodzwaho vha ngei Roma, vhe vha ‘vhidzwa uri vha vhe vhakhethwa.’ O vha vhudza uri: “A no ngo ṱanganedza muya wa uri ni vhe vhalanda  u itaho uri ni dovhe ni ofhe, fhedzi no ṱanganedza muya wa uri ni vhe vhana vhawe nahone wonoyo muya u ita uri ri vhidzelele ri ri: ‘Aba, Khotsi!’ Muya wone uṋe u a ṱanziela u tshi ima na muya washu uri ri vhana vha Mudzimu.” (Vharoma 1:7; 8:15, 16) Mudzimu o shumisa muya wawe mukhethwa uri zwi vhe khagala kha muthu uri o rambiwa u vhusa sa khosi na Yesu ngei ṱaḓulu.—1 Vhathesalonika 2:12.

10. Ndi mini zwine 1 Yohane 2:27 ya zwi amba musi i tshi ri Mukriste o ḓodzwaho ha ṱoḓi muṅwe muthu uri a mu gudise?

¹⁰ A zwi ṱoḓei uri vho rambiwaho nga Mudzimu vha vhudzwe nga muṅwe muthu uri vho ḓodzwa. Yehova u a vha khwaṱhisedza. Muapostola Yohane u vhudza Vhakriste vho ḓodzwaho uri: “No ḓodzwa nga mukhethwa nahone noṱhe ni na nḓivho.” O dovha a ri: “A nga vha inwi, u ḓodzwa he na hu ṱanganedza hu tshi bva khae hu dzula hu kha inwi, a ni ṱoḓi muthu uri a ni funze; u ḓodzwa hune ha bva khae hu ni gudisa zwithu zwoṱhe, ndi ha ngoho nahone a si ha mazwifhi. Samusi ho ni gudisa, dzulani ni na vhuthihi nae.” (1 Yohane 2:20, 27) Vhakriste vho ḓodzwaho vha fanela u gudiswa nga Yehova u fana na muṅwe na muṅwe. Fhedzi a zwi ṱoḓei uri muṅwe muthu a vha khwaṱhisedze uri vho ḓodzwa. Yehova o shumisa maanḓa mahulu ane a vha muya wawe mukhethwa, u itela uri zwi vhe khagala khavho uri vho ḓodzwa!

11, 12. Ndi mini zwine Mukriste o ḓodzwaho a nga ḓivhudzisa zwone, fhedzi ndi mini zwine a si zwi timatime?

¹¹ Musi Vhakriste vha tshi ḓodzwa nga muya mukhethwa, vha a shanduka vhukuma. Zwi re zwone ndi uri Yesu o ri vho “bebwa hafhu.” (Yohane 3:3, 5) Nga zwenezwo, o ṱalutshedza uri: “U songo mangadzwa nga zwe nda u vhudza zwone ndi tshi ri, u fanela u bebwa hafhu. Muya u vhudzula hune wa funa, nahone na pfa muungo wawo, fhedzi a ni ḓivhi hune wa bva hone na hune wa ya hone. Zwo tou ralo nga vhoṱhe vhane vha bebwa nga muya.” (Yohane 3:7, 8) Vhukuma, a zwi konadzei u ṱalutshedza zwavhuḓi muṅwe muthu a songo ḓodzwaho nḓila ine zwa vha ngayo u vha muḓodzwa. ^[2]—Sedzani notsi dza u fhedzisela.

¹² Muthu o ḓodzwaho a nga ḓivhudzisa uri, ‘Ndi ngani Yehova o nanga nṋe nṱhani ha muṅwe muthu?’ A nga dovha a ḓivhudzisa arali o fanelwa nga honoho vhuḓifhinduleli. Fhedzi ha timatimi uri Yehova o mu khetha. Nṱhani hazwo, u ḓipfa o takala vhukuma nahone u livhuha tshenetsho tshifhiwa. Vhaḓodzwa vha ḓipfa nga nḓila i fanaho na ya Petro musi a tshi ri: “Nga hu rendwe Mudzimu na Khotsi a Murena washu Yesu Kristo, ngauri nga u khathutshela hawe huhulu o ita uri ri bebwe nga huswa kha fulufhelo ḽi tshilaho nga u vuswa ha Yesu Kristo vhafuni, uri ri wane ifa ḽi sa tshinyali, ḽi si na tshika na ḽi sa puti. No vhetshelwa ḽone ṱaḓulu.” (1 Petro 1:3, 4) Musi vhaḓodzwa vha tshi vhala eneo maipfi, a vha timatimi uri Khotsi avho u khou amba navho.

13. Nḓila ine muthu a humbula ngayo i shanduka hani musi a tshi ḓodzwa nga muya mukhethwa, nahone ndi mini tshine tsha ita uri hu vhe na yeneyi tshanduko?

 ¹³ Musi Yehova a sa athu u ramba vhenevho Vhakriste ṱaḓulu, vho vha vhe na fulufhelo ḽa u tshila tshoṱhe kha ḽifhasi. Vho lavhelela tshifhinga tshine Yehova a ḓo ita uri ḽifhasi ḽi vhe paradiso na u fhelisa vhuvhi hoṱhe. Khamusi vho ḓivhona nga maṱo a muhumbulo vha tshi khou ṱanganedza muraḓo wa muṱa kana khonani yo faho. Nahone vha lavhelela u fhaṱa haya hune vha ḓo dzula khaho kana u ṱavha miri na u ḽa mitshelo. (Yesaya 65:21-23) Ndi ngani vho thoma u humbula nga nḓila yo fhambanaho? Naa vho shandula muhumbulo ngauri vho tsikeledzea kana u pfesa vhuṱungu? Naa vho sokou dzhia phetho ya uri zwi nga si takadze u tshila lwa tshoṱhe kha ḽifhasi? Kana naa vho vha vha tshi ṱoḓa u tshenzhela uri zwi ḓo vha hani u tshila ṱaḓulu? Hai. Nṱhani hazwo, Mudzimu ndi ene we a vha khethela. Musi a tshi vha ramba, o shumisa muya wawe mukhethwa u shandula nḓila ine vha humbula ngayo na malamba e vha a lavhelela.

14. Vhaḓodzwa vha ḓipfa hani nga vhutshilo havho ha fhano kha ḽifhasi?

¹⁴ Naa zwenezwi zwi amba uri vhaḓodzwa vha ṱoḓa u fa? Paulo o ṱalusa nḓila ine vhaḓodzwa vha ḓipfa ngayo. O vhambedza muvhili wa muthu na “dennde” nahone a ri: “Zwi re zwone ndi uri riṋe vhane ra vha kha ḽeneḽi dennde ri a gomela, ro tsikeledzea; ngauri a ri ṱoḓi u ḽi bvula, fhedzi ri ṱoḓa u ambara ḽiṅwe, uri zwi faho zwi dzhielwe vhudzulo nga vhutshilo.” (2 Vhakorinta 5:4) Vhenevha Vhakriste a vha ṱoḓi u fa. Vha a ḓiphina nga vhutshilo nahone vha ṱoḓa u shumela Yehova ḓuvha ḽiṅwe na ḽiṅwe vhe na miṱa na khonani dzavho. Hu sa londwi zwine vha khou zwi ita, vha humbula zwe Mudzimu a vha fulufhedzisa zwone tshifhingani tshi ḓaho.—1 Vhakorinta 15:53; 2 Petro 1:4; 1 Yohane 3:2, 3; Nzumbululo 20:6.

15. Muthu u zwi ḓivha hani uri ho ngo ḓodzwa nga muya mukhethwa?

¹⁵ Khamusi ni khou ḓivhudzisa arali Yehova o ni ramba ṱaḓulu. Arali ni tshi humbula uri a nga vha o ni ramba, humbulani nga ha hedzi mbudziso dza ndeme: Naa ni vhona u nga ni a fhisetshela vhukuma mushumo wa u huwelela? Naa ni a ḓiphina zwa vhukuma nga u guda Bivhili na “zwiphiri zwo dzikaho zwa Mudzimu”? (1 Vhakorinta 2:10) Naa ni vhona u nga Yehova o ita uri mushumo waṋu wa u huwelela u vhe u bvelelaho? Naa ni ṱoḓa u ita zwine Yehova a zwi ṱoḓa u fhira naho tshi tshini? Naa ni funa vhaṅwe zwi tshi bva mbiluni na u vhona ni na vhuḓifhinduleli vhuhulwane ha u vha thusa u shumela Yehova? Naa no no vhona vhuṱanzi ha uri Yehova o ni thusa nga nḓila nnzhi dzo livhaho vhutshiloni haṋu? Arali phindulo yaṋu i ee kha dzenedzo mbudziso dzoṱhe, naa zwenezwo zwi amba uri no rambiwa ṱaḓulu? Hai, a zwo ngo ralo. Ndi ngani? Ngauri vhashumeli vhoṱhe vha Mudzimu vha nga ḓipfa nga yeneyi nḓila, hu sa londwi uri vho ḓodzwa kana hai. Nahone Yehova a nga ṋea muṅwe na muṅwe wa vhashumeli vhawe maanḓa a fanaho a tshi shumisa muya wawe mukhethwa, hu sa londwi uri malamba avho a ḓo vha afhio. Zwi re zwone ndi uri arali ni tshi khou ḓivhudzisa arali ni tshi ḓo ya ṱaḓulu, zwi amba uri a no ngo rambiwa. Vho khethwaho nga Yehova a vha ḓivhudzisi nga ha zwenezwi! Vha a zwi ḓivha!

16. Ri zwi ḓivha hani uri a si vhoṱhe vhe vha wana muya wa Mudzimu vho rambiwaho ṱaḓulu?

 ¹⁶ Bivhilini, hu na tsumbo nnzhi dza vhathu vha fulufhedzeaho vhe vha wana muya mukhethwa wa Yehova, fhedzi vha si ye ṱaḓulu. Muṅwe wavho ndi Yohane Mulovhedzi. Yesu o amba uri ho vha hu si na muthu ane a fhira Yohane, fhedzi o dovha a amba uri Yohane a nga si vhuse sa khosi ṱaḓulu. (Mateo 11:10, 11) Na Davida o livhiswa nga muya mukhethwa. (1 Samuele 16:13) Muya mukhethwa wo mu thusa u pfesesa zwithu zwo dzikaho nga ha Yehova na u mu livhisa u ṅwala zwiṅwe zwipiḓa zwa Bivhili. (Marko 12:36) Naho zwo ralo, muapostola Petro o amba uri Davida “ho ngo gonya a ya ṱaḓulu.” (Mishumo 2:34) Yehova o shumisa muya wawe mukhethwa u ṋea vhenevha vhathu maanḓa a u ita zwithu zwi mangadzaho, fhedzi ho ngo vha ramba u tshila ṱaḓulu. Naa zwenezwo zwi amba uri a vho ngo fulufhedzea nga vhuḓalo kana a vha fanelei u vhusa ṱaḓulu? Hai. Zwi amba uri Yehova u ḓo vha vusela Paradisoni kha ḽifhasi.—Yohane 5:28, 29; Mishumo 24:15.

17, 18. (a) Ṋamusi, vhashumeli vha Mudzimu vho lavhelela malamba afhio? (b) Ndi mbudziso dzifhio dzine ra ḓo dzi ṱolisisa theroni i tevhelaho?

¹⁷ Vhunzhi ha vhashumeli vha Mudzimu ṋamusi a vha nga yi ṱaḓulu. U fana na Abrahamu, Davida, Yohane Mulovhedzi na vhaṅwe vhanna na vhafumakadzi vhanzhi vha misini ya Bivhili, vha lavhelela u tshila kha ḽifhasi musi vhe nga fhasi ha muvhuso wa Mudzimu. (Vhaheberu 11:10) Ndi vha 144 000 vhane vha ḓo vhusa na Yesu ngei ṱaḓulu. Fhedzi Bivhili i amba nga ha “vho salaho” kha vho ḓodzwaho vhane vha kha ḓi vha kha ḽifhasi kha tshino tshifhinga tsha vhufhelo. (Nzumbululo 12:17) Nga zwenezwo, vhunzhi ha vha 144 000 vho no fa nahone vha ṱaḓulu.

¹⁸ Fhedzi arali muṅwe muthu a amba uri o ḓodzwa, vhane vha vha na fulufhelo ḽa u tshila kha ḽifhasi vha fanela u aravha hani? Arali muṅwe tshivhidzoni a thoma u ḽa tshinkwa na u nwa waini Tshihumbudzoni, ni fanela u mu fara hani? Nahone hu pfi mini arali tshivhalo tsha vhane vha ri vho ḓodzwa tsha bvela phanḓa tshi tshi engedzea? Naa zwi fanela u ni vhilaedzisa? Ri ḓo fhindula dzenedzi mbudziso theroni i tevhelaho.