1. ?Nating se Jehova i hae we i hae, hem i letem ol narafala oli mekem wanem?

JEHOVA i hae we i hae, mo hem i wokem evri samting. Waes mo paoa blong hem i bigwan we i bigwan. Afta we hem i givhan long Job blong i kasem save samting ya, Job i talem long hem se: “Mi save we yu yu gat olgeta paoa, mo yu save mekem olgeta samting we yu wantem.” (Job 42:2) Jehova i save mekem eni samting we hem i wantem mekem. Mo hem i no nidim narafala man blong givhan long hem. Be hem i soemaot se hem i gat lav, taem i letem ol narafala oli wok wetem hem blong mekem stamba tingting blong hem i kamtru.

2. ?Jehova i letem Jisas i mekem wanem impoten wok?

² Bifo we God i wokem ol man mo ol narafala samting, hem i wokem Pikinini blong hem Jisas, fastaem. Biaen, Jehova i letem Jisas i givhan long hem blong wokem ol narafala samting.  (Jon 1:1, 2, 18) Aposol Pol i tokbaot Jisas se: “tru long hem, God i wokem olgeta narafala samting long heven mo long wol, olgeta samting we yumi save luk mo olgeta samting we yumi no save luk, olgeta we oli sidaon long jea blong king, ol masta, ol gavman, mo ol haeman. Olgeta narafala samting, God i wokem olgeta tru long hem, mo oli blong hem.” (Kolosi 1:15-17, NW) Jehova i no givim wan impoten wok nomo long Pikinini blong hem, be hem i tokbaot samting ya tu long ol narafala. Hemia i wan bigfala blesing.

3. ?Jehova i letem Adam i mekem wanem, mo from wanem?

³ Jehova i letem ol man tu, oli wok wetem hem. Eksampol, hem i letem Adam blong i jusum nem blong ol anamol. (Jenesis 2:19, 20) Yu traem tingbaot glad we Adam i kasem taem i mekem wok ya. Hem i stadi gud long wanwan anamol mo fasin blong olgeta blong mekem samting, nao hem i jusum nem blong olgeta wanwan. Jehova i wokem evri anamol, taswe hem i save putum nem blong olgeta wanwan. Nating se i olsem, hem i soemaot se i lavem Adam taem i letem hem i jusum nem blong ol anamol. Mo tu, God i givim wok long Adam blong i mekem ful wol i kam wan paradaes. (Jenesis 1:27, 28) Be biaen, Adam i jusum blong i no moa wok wetem God. Samting we i kamaot, hemia se hem mo evri man we oli kamaot biaen long hem oli safa bigwan.—Jenesis 3:17-19, 23.

4. ?Olsem wanem ol narafala oli wok wetem God blong mekem samting we hem i wantem?

⁴ Biaen, God i letem ol narafala man blong oli wok wetem hem. Noa i bildim wan sip we hem mo famle blong hem i sef long hem, long taem blong bigfala wota. Moses i mekem ol man Isrel oli fri long Ijip. Josua i lidim ol man Isrel i go long Promes Lan. Solomon i bildim tempol blong Jerusalem. Meri i kam mama blong Jisas. Evriwan ya, mo plante narafala moa, oli wok wetem Jehova blong mekem samting we hem i wantem.

5. ?Jehova i letem yumi evriwan i mekem wanem wok? ?I nidim we Jehova i letem yumi blong mekem wok ya? (Yu luk pija long stat blong stadi.)

⁵ Tede, Jehova i letem yumi mekem evri samting we yumi naf blong mekem, blong sapotem Kingdom blong hem. I gat plante rod blong mekem wok blong God. Yumi evriwan i save talemaot gud nius blong Kingdom, nating se yumi mekem wok ya long defdefren fasin. Jehova i save mekem wok ya hem wan. Hem i save toktok stret long ol man long wol. Jisas i talem tu se, Jehova i save mekem ol ston oli talemaot gud nius blong Kingdom long ol narafala. (Luk 19:37-40) Be Jehova i letem we yumi “mekem wok blong hem.” (1 Korin 3:9) Aposol Pol i raetem se: “Mifala i stap joen blong wok wetem God, mifala i talem long yufala bakegen, se God i givhan long yufala finis, long gladhat blong hem. Plis yufala i no letem gudfala wok ya blong hem i go blong nating nomo.” (2 Korin 6:1) I wan bigfala blesing we God i letem yumi wok wetem hem. I gud yumi luk from wanem wok ya i mekem yumi glad bigwan.

6. ?Fasbon Pikinini blong God i harem olsem wanem taem hem i wok wetem Papa blong hem?

⁶ Ol man blong Jehova oli glad oltaem from we oli wok wetem God. Bifo we fasbon Pikinini blong God i kam long wol, hem i talem se: “Bifo we bifo olgeta, taem we Hae God i no mekem wol ya yet, long taem we hem i statem wok blong hem, fas wok we hem i mekem, hem i mekem mi. Mi stap stanap long saed blong hem, mi olsem man we i mekem ol plan we hem i stap folem. Evri dei, mi stap mekem hem i glad, mo oltaem nomo, mi harem  gud blong stap wetem hem.” (Ol Proveb 8:22, 30) Jisas i glad taem hem i wok wetem Papa blong hem, from we hem i mekem plante samting mo hem i save se Jehova i lavem hem. ?Be olsem wanem long yumi?

7. ?From wanem wok blong prij i mekem yumi glad?

⁷ Jisas i talem se yumi glad taem yumi givim presen, mo taem yumi kasem presen. (Ol Wok 20:35) Yumi glad taem yumi kasem trutok, be yumi glad tumas, taem yumi talemaot trutok long ol narafala. Taem yumi luk se oli glad bigwan, from oli kasem save long samting we Baebol i tijim mo oli stat blong fren wetem God, mo oli jenisim tingting blong olgeta mo fasin blong laef blong olgeta, yumi tu yumi glad. Yes, wok blong prij i wan wok we i impoten tumas, mo taem yumi mekem wok ya, yumi glad bigwan. Wok ya i mekem tu se, ol man we oli fren wetem God oli save kasem laef ya we i no save finis.—2 Korin 5:20.

8. ?Samfala oli harem olsem wanem taem oli wok wetem Jehova?

⁸ Taem yumi givhan long ol narafala blong oli save Jehova, yumi save se yumi stap mekem Jehova i glad. Mo hem i tinghae long ol traehad we yumi mekem long ol wok blong hem. Samting ya i mekem yumi tu yumi glad. (Ridim 1 Korin 15:58.) Marco, we i stap long Itali, i talem se: “Mi mi glad tumas taem mi save se mi traehad blong mekem wok blong Jehova, be mi no wok blong wan man we hem i save fogetem samting we mi mekem.” Franco, we i stap tu long Itali, i talem se: “Tok blong God mo ol narafala samting we God i givim long yumi, i mekem yumi tingbaot evridei se hem i lavem yumi. Mo hem i luk evri samting we yumi mekem se oli impoten, nating se samtaem yumi luk se ol traehad blong yumi i blong nating nomo. Hemia nao from wanem mi mi glad taem mi wok wetem God. Mo wok ya i mekem se laef blong mi i gat mining.”

9. ?Jehova mo Jisas tufala i gat wanem fasin fren, mo from wanem?

⁹ Taem yumi wok wetem olgeta we yumi  lavem olgeta, yumi kam klosap long olgeta. Yumi save gud olgeta moa, mo ol fasin blong olgeta. Yumi save ol mak we oli wantem kasem, mo olsem wanem oli traehad blong kasem ol mak ya. Jisas i wok wetem Jehova samwe long plante bilian yia. Tufala i laekem tufala moa, mo lav we tufala i gat long tufala i kam strong, mo i no gat wan samting i save seraotem fasin fren blong tufala. Jisas i tokbaot olsem wanem tufala i fren gud taem hem i talem se: “Mi wetem Papa blong mi, mitufala i wan nomo.” (Jon 10:30) I tru nomo se tufala i joen gud, mo tufala i wok gud tugeta.

10. ?From wanem wok blong prij i mekem yumi kam klosap long God mo ol narafala?

¹⁰ Jisas i askem long Jehova blong i lukaotgud long ol disaepol blong hem. ?From wanem? Hem i prea se: “Blong olgeta oli save stap wan nomo, olsem we yumitufala i wan nomo.” (Jon 17:11) Taem yumi mekem laef blong yumi i laenap wetem tingting blong God mo yumi joen long wok blong prij, yumi kasem save ol gudfala fasin blong God. Yumi lanem tu from wanem i waes blong trastem hem mo folem ol advaes blong hem. Mo taem yumi kam klosap long God, hem i kam klosap long yumi. (Ridim Jemes 4:8.) Yumi kam klosap tu long ol brata mo sista, from we yumi kasem ol semfala problem mo glad we yumi kasem i sem mak. Mo tu, from we yumi gat ol semfala mak we yumi wantem kasem. Yumi wok tugeta, yumi evriwan i glad, mo yumi evriwan i stanap strong long taem blong trabol. Octavia, we i stap long Briten, i talem se: “Taem mi wok wetem Jehova, mi kam klosap long ol narafala.” Hem i eksplenem se, from we fasin fren blong hem i stanap long “semfala rod mo semfala mak” we ol narafala brata mo sista oli folem. Yumi tu yumi harem olsem. Taem yumi luk we ol brata mo sista oli traehad blong mekem Jehova i glad, yumi kam klosap long olgeta.

11. ?From wanem bambae yumi kam klosap moa long Jehova, mo ol brata mo sista long niufala wol?

¹¹ Lav we yumi gat long God mo ol brata mo sista i strong naoia, be long niufala wol lav ya bambae i strong moa. Yu traem tingbaot ol wok we bambae i mekem yumi glad bigwan long fiuja. Bambae yumi welkamem olgeta we oli laef bakegen mo yumi tokbaot Jehova long olgeta. Bambae yumi mekem se wol ya i kam paradaes. Bambae yumi glad bigwan taem yumi wok tugeta. Mo taem Jisas i rul, sloslo bambae yumi kam stret gud olgeta. Evri man bambae oli kam klosap long olgeta, mo long Jehova. Hem bambae i mekem evri samting “oli harem gud.”—Ol Sam 145:16.

12. ?Wok blong prij i protektem yumi olsem wanem?

¹² Yumi mas lukaot gud long fasin fren blong yumi wetem Jehova. Yumi laef long wol blong Setan mo yumi no stret gud olgeta, taswe, i isi blong yumi stat gat tingting blong wol, mo mekem ol samting we ol man blong wol oli mekem. I olsem se yumi stap swim long wan reva we i stap pulum yumi i go long ples we yumi  no wantem go long hem. Taswe, yumi mas yusum olgeta paoa blong yumi blong swim i go long defren ples. Long sem fasin, yumi mas wok had blong blokem ol samting long wol blong Setan. Be, ?olsem wanem wok blong prij i save protektem yumi? Taem yumi tokbaot Jehova mo ol tok we i stap long Baebol, yumi putum tingting blong yumi long ol samting we oli impoten mo oli gud, be i no long ol samting we i save mekem bilif blong yumi i slak. (Filipae 4:8) Wok blong prij i mekem bilif blong yumi i strong, from we i mekem yumi tingbaot bakegen ol promes blong God, mo ol gudfala advaes blong hem we oli soemaot se hem i lavem yumi. Wok ya i givhan long yumi tu blong holemtaet ol gudfala fasin we yumi nidim, blong yumi save stanap strong agensem wol blong Setan.—Ridim Efesas 6:14-17.

13. ?Wok blong prij i givhan olsem wanem long wan Witnes long Ostrelia?

¹³ Taem yumi bisi oltaem long wok blong prij, stadi long Baebol, mo givhan long ol narafala long kongregesen, yumi stap protektem yumi, from we yumi no gat taem blong wari tumas long ol problem blong yumi. Joel, we i stap long Ostrelia, i talem se: “Wok blong prij i givhan long mi blong mi no lego ol samting we oli tru. Wok ya i mekem mi tingbaot ol hadtaem we ol man oli kasem, mo ol gudfala samting we mi kasem taem mi folem ol advaes blong Baebol long laef blong mi. Wok blong prij i givhan long mi blong mi gat tingting daon, mo i givim janis long mi blong mi dipen long Jehova mo ol brata mo sista.”

14. ?Olsem wanem wok blong prij i soemaot se tabu spirit blong God i stap wetem yumi?

¹⁴ Wok blong prij i mekem yumi sua se tabu spirit blong God i stap wetem yumi. Yu traem tingbaot se, yu mekem wok blong givim bred long ol man long ples blong yu. Oli no pem yu blong mekem wok ya, be yu mas pem ol samting we i save givhan long yu blong mekem wok ya. Mo tu, plante man oli no wantem bred ya, mo samfala oli no laekem yu from we yu stap karem bred i go long olgeta. ?Bambae yu yu gohed blong mekem wan wok olsem? Kwiktaem nomo, tingting blong yu bambae i foldaon, mo bambae yu lego wok ya. Longtaem finis i kam, plante long yumi oli gohed blong mekem wok blong prij blong plante yia, nating se yumi spenem taem mo mane blong yumi long wok ya. Mo tu, wok ya i mekem se ol man oli no laekem yumi. Samting ya i soemaot se tabu spirit blong God i stap givhan long yumi.

15. ?Olsem wanem wok blong prij i joen wetem stamba tingting blong God long ol man?

¹⁵ ?Olsem wanem wok blong prij i joen wetem stamba tingting blong Jehova long ol man? Stamba tingting blong God, hemia se, hem i wantem we ol man oli laef olwe. Stamba tingting blong hem i no jenis taem Adam i mekem sin. (Aesea 55:11) God i mekem wan rod blong yumi save fri long sin mo ded. ?Olsem wanem hem i mekem samting ya? Hem i sanem Jisas i kam long wol blong i ded olsem wan sakrefaes. Be blong ol man oli kasem gudfala samting we sakrefaes blong Jisas i mekem, oli mas obei long God. Jisas i tijim ol  man long ol samting we God i wantem, mo hem i talem tu long ol disaepol blong hem blong oli mekem sem mak. Taem yumi prij mo givhan long ol man blong oli fren wetem God, yumi stap wok wetem God blong givhan long olgeta blong oli fri long sin mo ded.

16. ?Olsem wanem wok blong prij i joen wetem loa blong God we i hae moa?

¹⁶ Taem yumi givhan long ol narafala blong oli save olsem wanem blong kasem laef we i no save finis, yumi soemaot se yumi lavem olgeta mo yumi lavem Jehova. Jehova i “wantem sevem olgeta man, mo i wantem we olgeta man bambae oli save trutok blong hem.” (1 Timoti 2:4) Taem wan Farisi i askem long Jisas se, wanem loa blong God we i hae moa, Jisas i talem se: “‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’” (Matiu 22:37-39) Taem yumi prij, yumi stap obei long loa ya.—Ridim Ol Wok 10:42.

17. ?Yu harem olsem wanem long blesing ya blong talemaot gud nius?

¹⁷ Yumi gat wan nambawan blesing. Jehova i givim wan wok long yumi, we i mekem se yumi glad, yumi kam klosap long hem mo ol brata mo sista. Mo wok ya i protektem fasin fren we yumi gat wetem Jehova. Mo tu, wok ya i givim janis long yumi blong soemaot se yumi lavem God mo ol narafala. Jehova i gat plante milian man blong hem long fulwol, mo laef blong olgeta evriwan i no sem mak. Be yumi evriwan i mekem samting we yumi naf blong mekem blong talemaot bilif blong yumi long ol narafala, nating se yumi olfala no yumi yangfala, yumi rij no yumi pua, yumi strong no yumi no strong. Yumi evriwan i harem olsem Chantal wan sista blong Franis, we i talem se: “God ya we i gat olgeta paoa, i wokem evri samting, mo hem i glad oltaem, i talem long mi se: ‘!Yu go! Yu toktok long saed blong mi, yu talemaot wanem we i stap long hat blong yu. Mi mi givim paoa mo tok blong mi Baebol, mi givim ol enjel mo ol brata mo sista, mi trenem yu oltaem, mo mi givim ol stret advaes we i kamaot long stret taem.’ I wan bigfala blesing blong mekem samting we Jehova i askem long yumi, mo blong wok wetem God ya blong yumi.”