1. Jehovah cu Cungnung Bik Pathian a si ko nain midang kha zei tuah awkah dah a sawm hna?

JEHOVAH cu Cungnung Bik Pathian a si. Amah nih zeizong vialte hi a ser i a fimnak le a ṭhawnnak cu ri a ngei lo. Mah kong kha Job nih a hngalhthiam hnuah hitin a ti: “Nangmah nih zeizong vialte na tuah khawh i Naa tinhmi cu donh khawh a si lo ti kha ka hngalh.” (Job 42:2) Jehovah nih tuah aa tinhmi zei thil paoh kha aho bawmhnak hmanh tel loin a tuah khawh. Asinain aa tinhnak tlinter awkah midang kha amah he rianṭuanṭi dingin a sawm hnanak thawngin dawtnak a langhter.

2. Jehovah nih Jesuh kha a biapimi zei rian ṭuan awkah dah a sawm?

² Pathian nih zei thil hmanh a ser hlanah a Fapa, Jesuh kha a ser hmasa bik. Mah hnu i thil dang vialte sernak ah a Fapa kha a telter. (Johan 1:1-3, 18) Lamkaltu Paul nih Jesuh kong kha hitin a ṭial: “Pathian nih Khrih thawng cun van le vawlei i a ummi  thil vialte kha a ser hna, hmuh khawhmi thil si hna seh, hmuh khawh lomi thil si hna seh, amah thawng cun a ser hna; cun nawlngeitu thlarau hna le uknak thlarau hna le ṭhawnnak thlarau hna zong kha amah thawng cun a ser hna. Pathian nih van le vawlei hi a dihlak in Khrih thawng cun a ser hna i Khrih caah cun a ser hna.” (Kol. 1:15-17) Sernak rian ah Jehovah nih Jesuh a telter lengah Jesuh i a dirhmun kong midang a chimh hnanak thawngin Jesuh kha a thangṭhat.

3. Jehovah nih Adam kha zei tuah awkah dah a sawm, zeicah?

³ Jehovah nih amah he rianṭuanṭi awkah minung zong a sawm hna. Tahchunhnak ah, Adam kha saram pawl min pek awkah rian a pek. (Gen. 2:19, 20) Mah rian ah Adam aa nuamh laining khi na mitthlam ah cuanter hmanh. Saram pakhat cio i an muisam le an umtuning kha ṭha tein a hlathlai hnuah anmah he aa tlakmi min a pek hna. Jehovah nih amah sermi saram vialte kha amah nih min a pek khawh ko hna. Asinain mah rian kha Adam a peknak thawngin a dawtnak a langhter. Cun vawleicung pumpi paradis i canter awk zongah rian a pek. (Gen. 1:27, 28) Asinain a hnuah Adam nih Pathian he rianṭuanṭi ti lo awkah bia a khiah, mah ruangah amah le a tefa vialte nih sifah harnak nganpi an ton.—Gen. 3:17-19, 23.

4. Midang nih Pathian he zeitindah rian an ṭuanṭi?

⁴ A hnuah Pathian nih midang kha amah he rianṭuanṭi awkah a sawm hna. Noah nih Buanchukcho ah amah le a chungkhar an luat nakhnga lawng a rak sak. Moses nih Israel mi kha Izipt ram in a chuah hna. Joshua nih Israel mi kha Biakammi Ram i luh awkah a hruai hna. Solomon nih Jerusalem ah biakinn a rak sak. Mary cu Jesuh nu a hung si. Mah zumhfekmi hna le midang tampi nih Jehovah duhnak tlinter awkah Jehovah he rian an ṭuanṭi.

5. Zei rian ah dah kan i tel khawh, mah rian ah Jehovah nih kanmah telter a hau maw? (A hramthawknak hmanthlak zoh.)

⁵ Tuchan zongah Jehovah nih a Pennak kha kan si khawh chungin bawmh awkah a kan sawm. Pathian rian ṭuan khawhnak lam tampi a um. Kan dihlak in kan ṭuanmi rian cu aa khat kho dih lai lo nain Pennak kong thawngṭha chimnak rian ah kan dihlak in kan i tel kho. Mah rian cu amah Jehovah theng nih a ṭuan khawh ko. Vawleicung mi hna kha vancung in dairek in a chawnh khawh ko hna. Jehovah nih a Pennak i Siangpahrang kong thanh awkah lung hmanh a hman khawh tiah Jesuh nih a chim. (Luka 19:37-40) Asinain Jehovah nih “a rian ṭuanṭi hawi” sinak nawl a kan pek. (1 Kor. 3:9, NW) Lamkaltu Paul nih hitin a ṭial: “Hi rian ah hin Pathian he a ṭuanṭimi kan si caah hiti hin kan in nawl hna: Pathian vel cu nan hmuh cang i cu vel cu pakpalawng ah canter hram hlah u.” (2 Kor. 6:1) Pathian he rian ṭuanṭi awkah sawm kan simi cu a sunglawi tukmi tinvo a si. Mah nih lawmhnak nganpi a chuahternak a ruang cheukhat kha i ruah hna u sih.

6. A Pa he rian an ṭuanṭimi he aa tlaiin Pathian Fater nih a intuarnak kha zeitindah a langhter?

⁶ Pathian he rian ṭuanṭinak nih a salle kha lawmhnak a hmuhter zungzal hna. Pathian Fater a simi Jesuh nih vawleicung a rat hlanah hitin a chim: “Bawipa nih a rian hramthawknak ah a ka ser, . . . A pawngah khan rian thiam ngaimi bantukin ka rak um; keimah cu nifate in aa lawmhnak ka rak si i amah hmaiah khan kaa lawm zungzal.”  (Ptb. 8:22, 30) Jesuh cu a Pa he nuam tein rian an ṭuanṭi. Thil tampi a liim lengah Jehovah nih a ka dawt ti a hngalh caah aa lawm tuk. Kannih tah zeitin?

7. Phungchim rian nih zeicah lawmhnak a kan hmuhter?

⁷ Peknak ah siseh, hmuhnak ah siseh lunglawmhnak a um tiah Jesuh nih a chim. (Lam. 20:35) Biatak kan hmuh tikah kan i lawmh bantukin midang biatak kan chimh hna tik zongah kan i lawm. Baibal cawnpiakmi an hngalhthiam i Pathian he pehtlaihnak ṭha an ngeih tikah an i lawmhmi kha kan hmuh. An ruahning le an nunning aa thlenmi kan hmuh tikah kan i lawm tuk. Phungchim rian cu a biapi bikmi le lungsinak a pe bikmi rian a si. Pathian hawi a hung simi hna kha zungzal nunnak hmuh awkah lam a awnpiak hna.—2 Kor. 5:20.

8. Jehovah he rian ṭuanṭinak in hmuhmi lawmhnak he aa tlaiin mi cheukhat nih zeidah an chim?

⁸ Biatak hngalh awk midang kan bawmh hna tikah Jehovah lung kan tong i kan i zuamnak kha Jehovah nih a sunsak ti kan hngalh. Mah nih lawmhnak a kan pek. (1 Korin 15:58 rel.) Italy ah a ummi Marco nih hitin a chim: “Ka tuahmi thil a philh hngami sinah si loin Jehovah sinah a ṭha bik ka pek ti ka hngalhmi nih a ka lawmhter tuk hringhran.” Italy ah Pathian rian a ṭuanmi Franco zong nih hitin a chim: “Jehovah nih a kan dawt i thil hmete kan tuah hmanhah a sunsak ti kha Baibal le thlarau rawl hmangin Jehovah nih nifate a kan hngalhter. Cucaah Pathian he rian ṭuanṭinak nih lawmhnak a ka hmuhter i ka nunnak kha sullam a ngeihter.”

9. Jehovah le Jesuh karah zei bantuk pehtlaihnak phun dah a um, zeicah?

⁹ Kan dawtmi hna he rian kan ṭuanṭi tikah anmah he kan hun i naih deuh. An sining le an ziaza kan hun hngalh deuh. Zei bantuk hmuitinh dah an ngeih i mah kha phanh  awkah zeitindah an i zuam ti zong kan hun hngalh. Jesuh cu Jehovah he kum thong tampi chung rian an ṭuanṭi. Cucaah an i dawtnak le an i tlaihchannak cu zei thil hmanh nih hrawk kho lo tiangin a hung fek. An i pehtlaihnak a feh tuk caah Jesuh nih “ka Pa le keimah cu pakhat kan si” ti hmanhin a chim khawh. (Johan 10:30) Hmunkhat te ah rian an ṭuanṭi peng caah an lung aa rual tuk.

10. Phungchim rian nih Pathian le midang he zeicah a kan naihter deuh?

¹⁰ Jesuh nih a zultu pawl huhphenh awkah Jehovah sinah thla a cam. Zeicah? “Nangmah le keimah cu pakhat kan si bantuk hin pakhat an si khawh ve nakhnga” tiah Jesuh nih a rak ti. (Johan 17:11) Pathian phunglam ningin kan nun tik le phungchim rian i kan i tel tikah Pathian kong kan hun hngalh deuh. Pakhat le pakhat zong kan lung aa rual deuh. Pathian i bochan le a lamhruainak zulh cu zeicah fim a si ti kha kan hun hngalh. Pathian he i naih awk kan i zuam tikah amah zong nih a kan naih ve. (Jeim 4:8 rel.) Unau pawl he zong kan i naih, zeicahtiah kan tonmi buaibainak le lawmhnak aa khat i kan hmuitinh zong aa khat. Hmunkhat ah rian kan ṭuanṭi, kan i lawmṭi i kan inṭi. England ah a ummi Octavia nih hitin a chim: “Jehovah he rian ṭuanṭinak nih midang he a ka naihter deuh. Zeicahtiah kan i hawikomhnak cu aa khatmi hmuitinh le lamhruainak cungah hram aa bunh caah a si.” Kannih zong nih cutin kan ruah ve. Unau pawl nih Jehovah lungton awk an i zuammi kan hmuh tikah anmah he kan i naih deuh.

11. Vawlei thar ah Jehovah le unau pawl he zeicah kan i naih chinchin hna lai?

¹¹ Pathian le unau kan dawt hnanak cu atu ah a fek tuk, asinain vawlei thar ah mah nakin a fek deuh chinchin lai. Hmailei ah kan ṭuan hngami lungthawh awk ngai a simi rian kong kha ruat. A thoṭhanmi hna kha kan don hna lai i Jehovah kong kan cawnpiak hna lai. Cun vawlei hi paradis ah kan ser hna lai. Hmunkhat ah rian kan ṭuanṭi hna lai i Khrih uknak tangah duhsah duhsah in mitling kan hung si tikah kan i nuam tuk hna lai. Mi vialte cu pakhat le pakhat kan i naih hna lengah ‘kan dihlak in kan herhmi tling tein a kan petu’ ding Jehovah he zong kan i naih chinchin lai.—Salm 145:16.

12. Phungchim rian nih zeitindah a kan huhphenh?

¹² Jehovah he kan i pehtlaihnak kha kilven a hau. Kannih cu Satan vawlei ah kan um lengah mitlinglo kan si caah vawlei mi hna ruahnak le tuahsernak kha fawi tein kan i cawn khawh. Mah cu kan kal duh lonak leiah a luangmi tiva i tilio bantuk a si. Cucaah kal kan duhnak leiah kan i lio khawh nakhnga thazaang dihlak hman  a hau. Cu bantukin Satan vawlei nih a kan iap nakhnga lo fakpi in kan i zuam a hau. Phungchim rian nih zeitindah a kan huhphenh? Midang sin phung kan chim tikah kan zumhnak a derter hngami thil cungah si loin thlaraulei thil cungah kan lungthin kan chiah. (Fil. 4:8) Phungchim rian nih Pathian biakam le a phunglam hna kha a kan hngalhter caah kan zumhnak a fehter. Pathian timhpiakmi thlaraulei thilthuam zong tling tein i hruk awkah a kan bawmh.—Efesa 6:14-17 rel.

13. Australia ah a ummi unaupa pakhat nih phungchim rian kha zeitindah a hmuh?

¹³ Phungchim rian le biaknak ca tuah tawnmi rian hna ah kan rian kan i tamter ahcun kan tonmi buaibainak kong i lungretheih tuk awkah a caan kan ngei ti lai lo. Mah nih huhphenhnak a kan pek. Australia ah a ummi Joel nih hitin a chim: “Phungchim rian nih nifa ka tonmi thil kha hngalhthiam awkah a ka bawmh. Mi nih an tonmi zuamcawhnak hna le Baibal phunglam zulhnak thawngin ka hmuhmi ṭhatnak hna kha a ka hngalhter. Phungchim rian nih toidor tein um awkah a ka bawmh i Jehovah le unau pawl i bochan awkah caanṭha a ka pek.”

14. Phungchim rian ah kan i tel zungzalmi nih zeidah a langhter?

¹⁴ Phungchim rian nih kan sinah Pathian thiang thlarau a um ti kha a kan zumhter chinchin. Mah tahchunhnak hi ruathmanh: Na rian cu nan sang i a ummi hna kha changreu phawt a si tiah ruathmanh. Cutin tuahnak ah rianṭuan man na hmu lo i a dihmi vialte caah nangmah tein tangka na liam. Asinain mi tampi nih na phawtmi hna changreu kha an duh lo. Mah rian na ṭuan ruangah mi cheukhat nih a huat hmanh an in huat. Cu bantuk rian cu zei can tiang dah na ṭuan khawh lai? Chikkhat ah na lung a dong colh lai i na rian in na chuak men ko lai. Asinain kan lak i tam deuh cu kan caan le kan tangka a dih ko buin le mi nih nihsawh serhsat kan ton ko buin phungchim rian ah kumkhat hnu kumkhat kan i tel peng. Mah nih Pathian thiang thlarau nih a kan umpi ti kha a langhter.

15. Phungchim rian cu minung ca i Pathian tinhnak he zeitindah aa pehtlaih?

¹⁵ Phungchim rian cu minung ca i Jehovah tinhnak he zeitindah aa pehtlaih? Pathian tinhnak cu vawleicung ah minung hi zungzal in nun ding a si. Adam nih sualnak a tuah ko nain Pathian tinhnak cu aa thleng lo. (Isa. 55:11) Sualnak le thihnak in kan luat khawh nakhnga Pathian nih a timhtuah. Zeitin in dah? Jesuh kha vawlei ah a rak thlah i tlanhnak man caah a nunnak a pekternak thawngin a si. Asinain tlanhnak man in ṭhatnak  hmuh khawh awkah minung nih Pathian bia ngaih a hau. Cucaah Jesuh nih mi pawl kha Pathian duhnak kong a cawnpiak hna. A zultu pawl zong cutin tuah awkah nawl a pek hna. Tuchan ah midang kha Pathian hawi si awk kan bawmh hna tikah sualnak le thihnak in an luat nakhnga Pathian timhtuahpiakmi rian ah Pathian he rian kan ṭuanṭimi a si.

16. Phungchim rian cu Pathian pekmi a ngan bikmi nawlbia he zeitindah aa pehtlaih?

¹⁶ Zungzal nunnak lam hmuh awk midang kan bawmh hna tikah anmah le Jehovah kan dawt hna ti kan langhter a si. “Mi vialte nih khamhnak hmu hna seh ti le biatak kha hngal hna seh ti a duhmi Pathian kan Khamhtu nih hi thil hi thilṭha a si caah a duhmi a si.” (1 Tim. 2:4) Farasi mipa pakhat nih nawlbia lakah zeidah a ngan bik tiah a hal tikah Jesuh nih hitin a leh: “‘Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ ti hi a ngan bik le a biapi bik nawlbia cu a si. A hun changtu biapi bik nawlbia cu, cu bantuk ṭhiamṭhiam cu a si i, ‘Na innpa cu nangmah naa dawt bantukin na dawt lai,’ ti a si.” (Matt. 22:37-39) Thawngṭha kan chimnak thawngin mah nawlbia kha kan zulh.—Lamkaltu 10:42 rel.

17. Thawngṭha chimnak tinvo sung kha zeitindah na hmuh?

¹⁷ Phungchim rian pek kan simi cu thluachuah taktak a si! Mah nih lawmhnak a kan hmuhter i Pathian le unau pawl he a kan naihter. Pathian he kan i pehtlaihnak zong a kilven. Mah lengah Pathian le midang kan dawt hna ti langhternak caanṭha zong a kan hmuhter. Vawleicung pumpi ah a ummi Jehovah salle i an sining cu aa dang cio. Asinain mino asiloah upa kan si ah siseh, mirum asiloah misifak kan si ah siseh, a dammi asiloah a damlomi kan si ah siseh, kan dihlak in phungchimnak ah kan si khawh thawkin kan i tel kho. France ram ah a ummi Chantel nih hitin a chim: “Van le vawlei ah a ṭhawng bikmi, zeizong vialte a Sertu, aa nuammi Pathian nih hitin a ka ti: ‘Va kal law ka kong va chim. Thazaang kaan pek lai. Aa tlakmi caan ah Baibal, vancungmi hna, unau pawl, a dotdot in cawnpiaknak le lamhruainak hna kaan pek lai.’ Jehovah duhnak tuah le amah he rian ṭuanṭi khawh cu tinvo sung taktak a si.”