1. Nemene la hnei Iehova hna aijijëne la itre atr troa kuca?

IEHOVA la Kapucatinasë. Hnei Nyidrëti hna xupe la nöjei ewekë, nge ka pëkö ifegone la inamacane me mene i Nyidrë. Hnei Nyidrëti hna xatua Iobu troa trotrohnine lai, matre öni Iobu koi Nyidrë ka hape, ‘Atre hë ni laka, ka pucatinasë kö enëtilai, nge pëkö mekuna i enëtilai hna thatreine eatrën.’ (Iobu 42:2) Ijije hi tro Iehova a ketre sipu eatrëne casine la nöjei mekuna i Nyidrë. Ngo, Nyidrëti a aijijëne la itre atr troa ce huliwa me Nyidrë matre troa eatrëne la aja i Nyidrë; hatrene hi la ihnimi Nyidrëti lai koi angatr.

2. Nemene la huliwa ka tru hnei Iehova hna aijijë Iesu troa kuca?

² Hnei Akötresieti hna pane xupi Iesu, Hupuna i Nyidrë, me aijijë Iesu troa xatua Nyidrëti troa xupe la nöjei ewekë asë pë hë. (Ioane 1:1, 2, 18) Öni Paulo aposetolo e qeje Iesu ka hape: “Jëne nyidrë matre xupe jë la nöjei ewekë asëjëihë, nöjei ewekë  e hnengödrai, me e celë fen, nöjei ewekë ka mama me ka tha mama kö, nge nöjei theron, me nöjei joxu, me itretre mus, me nöjei men; hna xupe la nöjei ewekë asëjëihë jëne nyidrë nge thatraqai nyidrë.” (Kolose 1:15-17, MN) Haawe, tha hnei Iehova hmekuje kö hna hamëne la ketre huliwa ka tru kowe la Nekö i Nyidrë, ngo hnei Nyidrëti fe hna hane amamane la huliwa i Iesu kowe la itre atr. Drei la ketre manathith ka tru!

3. Nemene la hnei Iehova hna upi Adamu troa kuca, nge pine nemen?

³ Hnei Iehova fe hna aijijëne la itre atr troa ce huliwa me Nyidrë. Hnei Nyidrëti hna upi Adamu troa ati ëjene la itre öni. (Genese 2:19, 20) Pane mekune jë la madrine ka ej thei Adamu la troa kuca la huliwa celë! Hnei angeice hna goeëne hnyawa la pengöne me aqane ujëne la itre öni, nge thupene lai, angeice ha isa ati ëjene itre ej. Hnei Iehova hna xupe la nöjei öni, matre maine ju, tro hi Nyidrëti a ketre sipu ati ëjene itre ej. Ngo hnei Nyidrëti hna amamane la etrune la ihnimi Nyidrëti koi Adamu, la kola aijijë angeice troa ati ëjene la itre öni. Hnei Akötresieti fe hna ahnithe koi Adamu la ketre hnëqa, ene la troa aparadraisone la ihnadro asë. (Genese 1:27, 28) Ngo e thupene hë, xele ju hi Adamu ma ce huliwa me Akötresie, ame hna traqa la akötre ka tru koi angeic, me kowe la nöjei matra i angeice fe.—Genese 3:17-19, 23.

4. Nemene la aqane ce huliwa me Akötresie hnene la itre xa atr matre troa eatrëne la aja i Nyidrë?

⁴ Ame hë e thupen, hnei Akötresieti hna aijijëne la itre xa atr troa ce huliwa me Nyidrë. Hnei Noa hna cane la aka ka amele angeic me hnepe lapa i angeic ngöne lo kola traqa la Iwë Atraqatr. Hnei Mose hna thapa la nöje Isaraela qaa Aigupito. Hnei Iosua hna xome trongëne la angetre Isaraela kowe la Nöje Hna Thingehnaean. Hnei Solomona hna xupe la ēnē e Ierusalema. Hnei Maria hna hnaho Iesu. Haawe, ame asë hi la itre atre i Akötresieti celë me itre xane ju kö, tre hnei angatre hna ce huliwa me Iehova matre troa eatrëne la aja i Nyidrë.

5. Nemene la huliwa hne së asë hna atreine kuca? Ka nyipi ewekë kö koi Iehova la ixatua së ngöne la huliwa cili? (Wange ju la pane iatr.)

⁵ Ame enehila, Iehova a aijijë së tro sa catre sajuëne la Baselaia i Nyidrë. Nyimu aqane tro sa huliwa koi Nyidrë. Nge maine nyipici laka, tha ceitu kö la isa hne së hna atreine kuca koi Akötresie, ngo ijiji së asë hi troa cainöjëne la maca ka loi ne la Baselaia. Maine ju, tro hi Iehova a ketre sipu eatrëne la huliwa cili. Tro hi Nyidrëti a ithanata meköti qaa hnengödrai kowe la itre atr e celë fen. Öni Iesu fe, ijiji Iehova hi troa upe la itre etë troa atrune la Joxu ne la Baselaia i Nyidrë. (Luka 19:37-40) Ngo, Iehova kö a aijijë së troa ‘ce huliwa me Nyidrë.’ (1 Korinito 3:9) Öni Paulo aposetolo: “Eëhuni angete ce huliwa me nyidë a iele nyipunie wanga kapa gufane hnei nyipunie la ihnimi gufa i Akötesie.” (2 Korinito 6:1) Ketre manathithi ka tru la kola aijijë së troa ce huliwa me Nyidrë. Tro sa ce wange la itre eloine qa ngöne la hna ce huliwa me Akötresie.

6. Nemene la aqane qaja la Hupuna la pengöi nyidrë lo kola ce huliwa me Keme i nyidrë?

⁶ Ka madrine pala hi la itre hlue i Iehova qa ngöne la hna ce huliwa me Akötresie. Qëmekene troa uti kowe la fen hnene la Hupuna, öni nyidrë: “Hna hetrenyi ni hnei Iehova ngöne la qaane la itre jë i Anganyidrë . . . ce ini hi me Anganyidrë nge ka atreine huliwa,  nge hanyi Anganyidrëti ni o drai, kola madi xajawa i Anganyidrë o ijin’ asë.” (Ite Edomë 8:22, 30, MN) Ame ngöne lo Iesu a ce huliwa me Keme i nyidrë, tre ka madrine pala hi nyidrë, ke tru catre la itre ewekë hnei nyidrëti hna kuca, nge atre hi nyidrë ka hape, tru la ihnimi Iehova koi nyidrë. Ngo tune kaa fe së?

7. Pine nemene matre ka ithue madrine la huliwa ne cainöj?

⁷ Öni Iesu, tru la madrine së ngöne la easa ham, me ngöne la easa kapa. (Ite Huliwa 20:35) Nyipici laka, hetre madrine së la easa kapa la nyipici. Ngo, pine nemene matre hetre madrine së fe la easa ce thawa eje kowe la itre xa atr? Pine laka, easa öhne la madrine ka eje thei angatr la angatr a trotrohnine la itre ini qa hnine la Tusi Hmitrötr, me nyiqaane easenyi koi Akötresie. Easa haine la easa öhne la aqane ujë la mekuna i angatr me aqane mele i angatr. Eje hi laka, pëkö ketre huliwa ka sisitria hune la huliwa ne cainöj, nge ka hamë madrine koi së. Eje a aijijëne la itre hlue i Akötresie troa hetrenyi la mele ka tha ase palua kö.—2 Korinito 5:20.

8. Nemene la hna qaja hnei itre xa trejin göi troa ce huliwa me Iehova?

⁸ Ame la easa xatuane la itre atr troa atrepengöi Akötresie, tha luelue kö së laka, easa amadrinë Iehova, nge ka tru koi Nyidrë la itre trenge catr hne së hna kuca koi Nyidrë. Hane fe hi lai ka thue madrine së. (E jë la 1 Korinito 15:58.) Öni Marco, ka mele e Italie ka hape: “Tru la madrinenge troa atre laka, eni a nue asë la hnenge hna atreine koi Iehova, ngo tha koi ketre atr kö ka troa canga thëthëhmine la hnenge hna kuca.” Öni Franco, ketre trejine fe ka mel e Italie: “Jëne la Wesi Ula i Iehova, me itre hna hnëkëne hnei Nyidrë thatraqai së, kola amexeje o drai la ihnimi Nyidrëti koi së. Ngacama ame koi së, tha tru kö la itre ewekë hne së hna kuca koi Nyidrë, ngo ame pe, ka tru lai koi Nyidrë. Celë hi kepine matre, ka ithue madrin, nge ka hetre aliene la meleng, ke eni a ce huliwa me Akötresie.”

9. Nemene la pengöne la aqane imelekeu i Iehova me Iesu, nge pine nemen?

⁹ Ame la easa ce huliwa memine la itre hne së hna hnim, kola acatrene la aqane imelekeu së me angatr. Easë fe hë a atrepengöi angatr hnyawa me itre thiina i angatr. Atre fe hë së la itre aja i angatr, me aqane thele angatre troa eatrën itre ej. Hnei Iesu hna ce huliwa me Iehova, traqa jë koi itre miliare lao macatre. Catrecatre la ihnimi ketre koi ketre, matre pëkö ketre ewekë ka atreine troa thë la aqane imelekeu i nyidro. Hnei Iesu hna qaja la pengöne la imelekeu cili la nyidrëti a qaja ka hape: “Ame ini me Tetetro, te, casi hi nyihoti.” (Ioane 10:30) Nyipici laka, casi hnyawa hi nyidro, nge ka ce huliwa pala hi.

10. Pine nemene matre huliwa ne cainöj a aeasenyi së koi Akötresie me kowe la itre trejin?

¹⁰ Hnei Iesu hna sipo Iehova troa thupëne la itretre drei nyidrë. Pine nemen? Öni nyidrëti e thith: “Mate casi angat, tui nyisho.” (Ioane 17:11) Ame la easa mele thenge la itre trepene meköti Akötresie me cainöje trootro, ketre easë fe lai a atrepengöne hnyawa la itre thiina i Nyidrë. Nge trotrohnine hnyawa fe hë së la kepine matre nyipi ewekë tro sa mejiune koi Nyidrë, me trongëne la hnei Nyidrëti hna amekötin. E tro sa easenyi koi Akötresie, ketre tro fe Nyidrëti lai a easenyi koi së. (E jë la Iakobo 4:8.) Ketre, hnene laka casi hi la itre aja së memine la itre trejin, ene pe casi hi la itre jole me madrine ka eje the së. Matre, easë fe a hane easenyi kowe la itre trejin. Easa ce huliwa, me ce madrin, me ce cile catr. Öni Octavia, ketre trejine föe ka mel e Grande-Bretagne, ka hape: “Hnene la hnenge hna ce huliwa me Iehova hna aeasenyi ni kowe la itre trejin. Hna traqa tun, ke casi hi la aja hun, me trepene mele hun.” Eje hi laka, casi hi la mekuna së me Octavia. Ame la easa goeëne la itre trenge catre ne la itre trejin troa amadrinë Iehova, kolo hi lai a aeasenyi së catre koi angatr.

11. Pine nemene matre catrecatre hë elanyi la aqane imelekeu së me Iehova, memine la itre trejin?

¹¹ Nyipici laka, catre la ihnimi së koi Akötresie enehila me kowe la itre trejin, ngo tro hmaca kö eje elanyi a catrecatre ngöne la fene ka hnyipixe. Pane mekune ju la nöjei huliwa ka ithue madrine hne së hna troa ce kuca e cili! Tro sa kapa la itre hna troa amelene hmaca, me qejepengöi Iehova koi angatr. Tro fe së a aparadraisone la ihnadro. Ketre madrine ka tru fene la musi Keriso la troa ce huliwa uti hë la tro sa pexej. Ame hë e cili, catrecatre hë la aqane imelekeu ne la itre atr, me aqane imelekeu i angatr me Iehova, Atre “amejine la ite ewekë ka mele asëjëihë.”—Salamo 145:16.

12. Tro la huliwa ne cainöje a thupë së tune kaa?

¹² Nyipi ewekë tro sa thupëne hnyawa la aqane imelekeu së me Iehova. Easa mele ngöne la fene i Satana, nge itre ka tha pexeje kö së, matre tro hi a canga löthi së hnene  la aqane mekun, me thiina ne la fen. Ceitune hi lai memine la easa aj, nge kola huli së hnene la thelec. Tro së lai a catre aj me isi me thelec. Ketre tune mina fe, loi e tro sa kuca asë la hne së hna atreine matre tha tro kö a huli së hnene la fene i Satana. Matre, tro la huliwa ne cainöje a thupë së tune kaa? Ame la easa qeje Iehova me Tusi Hmitrötr, kola mama cile hnyawa koi së la itre mekune ka lolo nge ka sisitria; nge co pë hë la itre ewekë ka troa athixötrëne la lapaune së. (Filipi 4:8) Kola acatrene la lapaune së hnene la huliwa ne cainöj, ke, ej a amexeje lapane koi së la itre hna thingehnaeane hnei Akötresie me itre trepene meköti Nyidrë. Eje fe a aijijë së troa melëne la itre thiina ka sisitria matre thupë së qaathei Satana me fene i angeic.—E jë la Efeso 6:14-17.

13. Nemene la mekuna ne la ketre trejine qaa Australie göne la huliwa ne cainöj?

¹³ Ame la easa catre cainöj, me ini Tusi, me huliwa catr thatraqane la ekalesia, kolo hi lai a thupë së matre tha tro kö sa hnehengazo menu la kola traqa koi së la itre jol. Öni Joel, ketre trejine qaa Australie: “Huliwa ne cainöj la ka xatua ni matre tha tro kö a amenu ni. Eje fe a amamane koi ni la itre jole hna melën hnene la itre atr. Ketre, mama cile fe koi ni la itre manathithi hnenge hna kapa qa ngöne la hnenge hna trongëne la itre trepene meköti Iehova. Ketre mina, hnene la huliwa ne cainöj hna xatua ni troa hane ipië, me mejiune koi Iehova me kowe la itre trejin.”

14. Nemene la ka anyipicine ngöne la hna cainöje trootro ka hape, the së la uati Akötresie?

¹⁴ Kolo fe a anyipicin hnene la huliwa ne cainöj laka, the së la uati Iehova. Pane mekune jë laka, huliwa i epuni la troa tro fë falawa trootro kowe la itre atr ne drehu, nge pëkö thupe i epun. Ketre, qanyi epuni kö nyithupene la nöjei ewekë hna ajan matre tro loi la huliwa cili. Ketre mina, ala nyimu la itre atr ka xelene la falawa, nge goi xele fe angatr ma wai epun, pine epuni tro fë a i angatr. Matre hapeu, tro kö epuni lai a kuca paluane la huliwa cili? Tro epuni lai a canga kucakuca me thele ketre huliwa. Nga easë fe hi lai a hane nue la manie së, me traeme së ngöne la huliwa ne cainöj, nge kolo fe a hnyimasai së me xele ma wai së hnene la itre atr. Ngo ala nyimu the së la itre ka cainöj, a ije macatre hë enehila! Celë hi lai ka anyipicine hnyawa laka, the së la uati Akötresie.

15. Nemene la aqane ce tro la huliwa ne cainöj memine la aja i Akötresie kowe la fen?

¹⁵ Ame la huliwa ne cainöj, tre, ka ce tro hnyawa memine la aja i Akötresie kowe la fen. Hnei Iehova lo hna mekun tro la atr a mele epine palua. Nge ngacama hnei Adamu hna tha idrei, ngo eje pala hi la aja i Akötresie kowe la fen. (Isaia 55:11) Hnei Akötresieti hna hnëkëne la ketre ewekë matre troa thepe së qa ngöne la ngazo me mec. Kolo Iesu a uti kowe la fen matre troa huujëne la mele i nyidrë. Ngo nyipi ewekë tro la itre atr a drengethenge Akötresie e ajane angatre troa  hane kepe thangane la huuje i Iesu. Celë hi matre hnei Iesu hna thuemacane la itre atr la itre hna amekötine hnei Akötresie, me upe la itretre drei nyidrë troa ujë tune lai. Hetre ewekë lo hnei Nyidrëti hna hnëkëne matre troa amelene la itre atr qa ngöne la ngazo me mec. Matre ame la easa cainöj me xatuane la itre atr troa nyi sinee i Akötresie enehila, easë hi lai a ce huliwa me Nyidrë.

16. Nemene la aqane ce tro la huliwa ne cainöj memine la lue wathebo ka sisitria i Akötresie?

¹⁶ Nyipici laka, easa amamane kowe la itre atr la gojenyi ne tro kowe la mele ka tha ase palua kö. Celë hi hatrene la ihnimi së lai koi angatr me koi Iehova, “lo ate ajane la nöjei ate asëjëihë troa mele me wangate hmekune la nyipici.” (1 Timoteo 2:4) Hnene la ketre Faresaio hna hnyingë Iesu la wathebo ka sisitria, ame hnei Iesu hna sa me hape: “ ‘Tro eö a aja Joxu Akötesi ’ö hnene la hni’ö ka pexej, me u i ’ö ka pexej, me mekune i ’ö ka pexej.’ Celë hi wathebo ka tru nge hnapan. Nge ame la hnaaluen, te, tune mina hi, ka hape, ‘Tro eö a hnime la ate lapa eashenyi ’ö tui eö hi.’ ” (Mataio 22:37-39) Ame la easa cainöjëne la maca ka loi, easë hi lai a trongëne la lue wathebo cili.—E jë la Ite Huliwa 10:42.

17. Nemene la ka ej e kuhu hni eö göne la huliwa ne cainöj?

¹⁷ Drei la ketre manathith ka tru! Hne së hna kapa qaathei Iehova la ketre huliwa ka ithue madrin, nge ka aeasenyi së catre koi Nyidrë me kowe la itre trejin. Ketre, ej a thupëne hnyawa la aqane imelekeu së me Nyidrë. Eje fe a aijijë së troa amamane la ihnimi së koi Iehova me kowe la itre atr. Itre milio la etrune la hlue i Iehova e cailo fen, nge isapengöne kö la aqane mele së. Ngo ame easë asë, easa ce thawa la mejiune së kowe la itre atr, ngacama qatre ju hë së maine thöth, me ka trenamo maine ka puafala, me ka egöcatr maine ka kucakuca. Casi hi la mekuna së me Chantal qaa France, kola hape: “Önine la Kapucatinasë koi ni, lo Atre xupe la nöjei ewekë, Akötresieti ka madrin, ka hape: ‘Tro jë! Ithanata jë me nyi trenge ewekëng. Eni a nue koi eö la trenge catreng, me Tusi Hmitrötr lo Trenge Ewekëng, me ixatua qaa hnengödrai, me itre sine huliwa i eö e celë fen, me ini eö trootro, me hamë eö la itre ithuemacanyi ngöne la ijine ka ijij.’ Drei la ketre manathithi ka tru la troa kuca la hnei Iehova hna upi së, me ce huliwa me Nyidrë!”