1. Nansha Yehova byadi Mwine Mukatakata Mwine, le unenene bantu kulonga bika?

YEHOVA i Mwine Mukatakata Mwine. Wāpangile bintu byonso, kadi udi na tunangu ne bukomo kebudi mpwilo. Aye’tu pa kupwa kukwasha Yoba emvwanije kino, Yoba wānene Leza amba: “Ngyukile abe ukōkeja kulonga bintu byonso, kadi amba kiswamutyima kyobe kekikōkejapo kukoma kodi.” (Yoba 42:2) Yehova ukokeja kulonga byonso byasaka pampikwa muntu wa kumwela’ko kuboko. Inoko i mulombole buswe pa kwingila pamo na bantu mwanda wa kufikidija mpango yandi.

2. Lelo Yehova wāpele Yesu mwingilo’ka wa mvubu?

² Leza wāpangile Yesu, wandi Mwana kumeso kwa kupanga muntu ye-yense nansha kintu kyo-kyonso. Kadi Yehova wāsoñenye wandi Mwana amukwashe pa kupanga bintu bikwabo byonso. (Yoano 1:1-3, 18) Mutumibwa Polo wāsonekele padi Yesu amba: “Kupityila kudi aye bintu bikwabo byonso byāpangilwe mūlu ne pano pa ntanda pene, bintu bimweka ne bintu byampikwa kumweka,  shi mpona, shi bufumu, shi imbikalo nansha lupusa. Bintu bikwabo byonso byāpangilwe kupityila padi aye ne mwanda wa aye. Ne kadi, udi kumeso kwa bintu bikwabo byonso kadi kupityila kudi aye bintu bikwabo byonso byāpangilwe.” (Kolose 1:15-17) Kadi Yehova kāpelepo enka wandi Mwana mwingilo wa mvubu ino wāsapwidile’mo ne bantu. Bine ino i ntumbo!

3. Lelo Yehova wāpele Adama mwingilo’ka ne mwanda waka?

³ Kadi Yehova wāsakile bantu bengile nandi pamo. Kimfwa, wānene Adama kupa banyema majina. (Ngalwilo 2:19, 20) Fwatakanya’po nsangaji yēmwenine Adama mu uno mwingilo! Wēfundile na katentekeji ne kujingulula mutadilo wa banyema ne byobalonga, kupwa webenika majina. Yehova wāpangile banyema bonsololo, nanshi wādi ubwanya kwibenika aye mwine. Inoko, wālombwele’mba uswele Adama bininge pa kumuleka enike banyema majina. Kadi Leza wāpele Adama mwingilo wa kwalamuna ntanda yonso ke paladisa. (Ngalwilo 1:27, 28) Inoko yō Adama wālekele kwingila na Leza, mfulo mfulō byāmuletela masusu makatampe aye ne lutundu lwandi lonso.—Ngalwilo 3:17-19, 23.

4. Lelo bantu bakwabo bāingile muswelo’ka na Leza mwanda wa kufikidija kiswa-mutyima kyandi?

⁴ Mwenda mafuku, Leza wānene bantu bakwabo bengile nandi. Noa wāubakile safina mwanda wa kwipandija aye ne kyandi kisaka ku Dilobe. Mosesa wānyongolwele muzo wa Isalela mu Edipito. Yoshua wātwejeje bene Isalela mu Ntanda ya Mulao. Solomone wāubakile tempelo mu Yelusalema. Madia wābutula Yesu. Bano bantu bonso ba kikōkeji ne bakwabo bavule bene bāingile na Yehova mwanda wa kufikidija kiswa-mutyima kyandi.

5. Lelo i mwingilo’ka otukokeja kwingila, ne mwanda waka Yehova usaka twingile uno mwingilo? (Tala kifwatulo ku ngalwilo.)

⁵ Dyalelo Yehova witusakilanga tulonge bukomo bwetu bonso mwanda wa kukwatakanya Bulopwe bwandi. Kudi miswelo mivule yotubwanya kwingidila Leza. Nansha batwe bonso byoketubwanyapo kumwingidila muswelo umo, inoko batwe bonso tukokeja kusapula myanda miyampe ya Bulopwe. Yehova ubwanya kwingila uno mwingilo aye mwine. Ubwanya kunena tamba mūlu, bantu baivwana pano panshi. Yesu wānene amba Yehova ubwanya kwalamuna mabwe keasapwila bantu myanda ya Mulopwe wa Bulopwe Bwandi. (Luka 19:37-40) Inoko Yehova imwituleke twikale “bengidi bengila pamo na Leza.” (1 Kodinda 3:9) Mutumibwa Polo wālembele amba: “Byotwingila nandi pamo, tubemwisāshila kadi amba kemwakitabijai kanye kakatampe ka Leza bituputupu.” (2 Kodinda 6:1) Kwingila pamo na Leza, i kintu kya mvubu mikatampe. Nanshi tumonei’ko bubinga bumo bwine bwituletelanga nsangaji keidi mpwilo.

6. Lelo Mwana mubutulwe bunka wa Leza wēivwene namani paādi wingila pamo na Shandi?

⁶ Kwingila na Yehova Leza kuletelanga nyeke bengidi bandi nsangaji. Kumeso kwa Mwana mubutulwe bunka wa Leza kwiya pano panshi wānene amba: “Yehova wampeteje mu ngalwilo ya dishinda dyandi . . . Ne papo pene nadi nandi pabwipi bwa sendwe mwine mukata; ino nadi mafuku onso nsangaji yandi mo bukila mo bukila, kusepelela nyeke ku meso andi.” (Nkindi 8:22, 30) Yesu paādi wingila na Shandi wādi na nsangaji mwanda wāvuije bintu bivule, kadi wādi uyukile’mba Yehova umuswele. Penepa, batwe netu?

7. Mwanda waka mwingilo wa busapudi wituletelanga nsangaji?

⁷ Yesu wānene amba twikalanga na nsangaji ya kupāna ne ya kupebwa. (Bilongwa 20:35) Kyetupele nsangaji potwatambwile bubine, ino mwanda waka kadi kitupanga nsangaji potusapwila bakwetu bubine?  Mwanda twibasakilanga bekale na nsangaji ya binebine pobemvwanija bine bifundija Bible ne kusamba bulunda na Leza. Tusangalanga potwibamona bashinta milangwe yabo ne mwiendelejo wabo wa mu būmi. Busapudi i mwingilo wa mvubu mikatampe kadi usangaja otufwaninwe kwingila. Upanga balunda na Leza muswelo wa kumona būmi bwa nyeke.—2 Kodinda 5:20.

8. Lelo bantu banenanga bika pa nsangaji ya kwingila na Yehova?

⁸ Kitatyi kyotukwasha bakwetu kuyuka Leza, tuyukile’mba tusangajanga Yehova ne amba umonanga na mvubu bukomo botulonga mwanda wa kumwingidila. Kino nakyo kitupanga nsangaji. (Tanga 1 Kodinda 15:58.) Marco, ushikatanga mu Itadi, unena amba: “Ngidi na nsangaji keineneka pa kuyuka’mba mpānanga byabulēme byami kudi Yehova ke ku muntupo ubwanya kuvulaminwa’byo bukidibukidi bonka.” Muswelo umo onka, Franco wingidilanga mu Itadi nandi unena amba: “Yehova wituvulujanga difuku ne difuku kupityila ku Kinenwa kyandi ne ku mpangiko ya ku mushipiditu amba wituswele ne amba umwene na mvubu kintu kyonso kyotumulongela nansha shi batwe bene twikimona bu kekidipo na mvubu. O mwanda nanshi kwingila pamo na Leza kumpanga nsangaji ne kunengeja ngikale na kitungo mu būmi.”

9. Lelo ba Yehova ne Yesu badi na kipwano kya muswelo’ka ne mwanda waka?

⁹ Tutyityijanga kipwano kyetu, potwingidila pamo na bantu botuswele. Tukayukila’ko bumuntu ne ngikadila yabo. Tukayuka bitungo byabo ne bukomo bobalonga bwa kufikila’po. Yesu wāingile na Yehova padi mu bula bwa myaka midiyala ne midiyala. Buswe ne kisanso kyabo byatyityile mu muswelo keukokejapo kutyiba kipwano kyabo. Yesu wāshintulwile mwadi mutyityile kino kipwano paānene amba: “Amiwa ne Tata twi umo.” (Yoano 10:30) Bādi na bubine mu bumo, kadi bādi beimvwana pobādi bengidila pamo.

10. Mwanda waka busapudi bwitufwenyanga kudi Yehova ne kudi bakwetu?

¹⁰ Yesu wālombele Yehova alame bandi bana ba bwanga. Mwanda waka? Wālombele amba: “Bekale umo monka motwikadile.” (Yoano 17:11) Shi twiendeja mungya misoñanya ya Leza ne kusapula, nabya tukevwanija biyampe ngikadila yandi ya kutendelwa. Twifundanga kine kyokikadile kya tunangu kukulupila mudi Leza ne kulonda buludiki bwandi. Kadi shi tufwena kudi Leza nandi uketufwena. (Tanga Yakoba 4:8.) Ne kadi tufwenanga batutu ne bakaka mwanda batanwanga na makambakano ne na nsangaji pamo bwa batwe, kadi tudi na bitungo bimo. Twingilanga pamo, tusangelanga pamo, ne kūminina pamo. Octavia, ushikatanga mu Beletanye, unene amba: “Kwingila na Yehova kwaumfwenyenye na bakwetu.” Ushintulula’mba mwanda kipwano kyetu kimanine pa “kitungo kimo ne pa buludiki bumo.” Bine, twivwananga uno muswelo. Potumona banabetu balonga bukomo bwa kusangaja Yehova, kino kitufwenyanga bininge kobadi.

11. Mwanda waka tukapwana bininge na Yehova ne na banabetu mu ntanda mipya?

 ¹¹ Buswe botuswele Leza ne banabetu butyitanga tamba pano, ino bukatyityila’ko bininge mu ntanda mipya. Langulukila’po bidi pa mingilo yonso ya nsangaji yotukengila mu mafuku a kumeso! Tukatundaila boba bakasangulwa ne kwibafundija myanda ya Yehova. Kadi tukengilanga mwingilo wa kwalamuna ntanda ke paladisa. Bine, ikekala nsangaji mikatampe ya kwingidila pamo ne kujokela bityebitye ku bubwaninine mu buludiki bwa Kidishitu. Bantu bonso bakapwana abo bene ne kupwana na Yehova mwine ukekutyija “mityima ya bintu byonso byumi.”—Ñimbo 145:16.

12. Lelo mwingilo wa busapudi i bulami muswelo’ka?

¹² Tufwaninwe kulama kipwano kyetu na Yehova. Byotudi mu ntanda ya Satana kadi twi bampikwa kubwaninina o mwanda i kipēla kotudi kwikala na milangwe ne bilongwa na bya ino ntanda. Bidi pamo bwa batwe basumba mu munonga ukuka mulungu witukokela kuntu ko ketusakepo kwenda. O mwanda pakwiukandija tufwaninwe kulonga bukomo bwetu bonso bwa kusumbila mwiya mema. Muswelo umo onka, tufwaninwe kulonga buninge pa kwepuka lupusa lwa ntanda ya Satana. Penepa, le busapudi bwitulamanga muswelo’ka? Potwisambila padi Yehova ne pa Bible, tutanga mutyima pa bintu biyampe kadi bya mvubu, ino ke pa bintupo bizozeja lwitabijo lwetu. (Fidipai 4:8) Busapudi bukomejanga lwitabijo lwetu mwanda bwituvulujanga milao ya Leza ne misoñanya yandi ya buswe. Kadi bwitukwashanga tukomeje ngikadila iketukinga kudi Satana ne ntanda yandi.—Tanga Efisesa 6:14-17.

13. Lelo Kamoni umo wa mu Ostrali weivwene namani pa busapudi?

¹³ Kusapula bininge, kwifunda, ne kulongela bakwetu bintu mu kipwilo, kwitulamanga mwanda ketukakambakanyapo mutyima bininge pa makambakano etu. Joel ushikatanga mu Ostrali, unena amba: “Mwingilo wa busapudi unkwashanga ino ntanwanga ne na bikoleja. Umvulujanga makambakano ekonda na bantu bakwabo ne byabuyabuya byonemwenine mu kwingidija misoñanya ya mu Bible mu būmi bwami. Mwingilo wa busapudi unkwashanga ngikale nyeke mwityepeje; umpanga mukenga wa kukulupila Yehova ne batutu ne bakaka.”

14. Mwanda waka kūminina kwetu mu busapudi kulombola amba tudi na mushipiditu wa Leza?

¹⁴ Kadi busapudi bwitupanga kikulupiji kya bine amba mushipiditu wa Leza udi netu. Tulete kimfwa: Langa’po bidi abakupe mwingilo wa kupa bantu bidibwa mu kyenu kibundi. Kufutyilwepo pa kwiwingila, kadi bikulomba kwisasaketa abe mwine. Kupwa bantu bavule abapele’byo, ne bakwabo abakushikwe pa mwanda wa kwibaletela’byo. Lelo ukendelela kwingila uno mwingilo? Bukidibukidi bonka ukatyumukwa mutyima pakwabo ne kwiuleka. Ino, bavule motudi bendelelanga nyeke kusapula mwaka ne mwaka, nansha byobitulomba kujimija kitatyi ne lupeto kadi nansha shi bantu betusepa ne kwitukalabela. Kino kilombola amba mushipiditu wa Leza witukwashanga.

15. Lelo kusapula myanda miyampe i kukwatañane namani na mpango ya Leza itala bantu?

¹⁵ Lelo mwingilo wa busapudi i mukwatañane namani na mpango ya Yehova itala bantu? Mpango ya Leza i ya amba bantu bekale’ko nyeke, kadi ino mpango keyāshintyilepo pālongele Adama bubi. (Isaya 55:11) Leza wākwete’ko mpangiko ya kwitunyongolola ku bubi ne ku lufu. Muswelo’ka? Yesu wāile pano panshi ne kwela būmi bwandi bu kitapwa. Inoko pa kumwena mu kino  kitapwa, bantu badi bafwaninwe kukōkela Leza. O mwanda Yesu wāfundije bantu byobya bisaka Leza kobadi, ne kusoñanya bana bandi ba bwanga balonge uno muswelo. Dyalelo potusapula ne kukwasha bantu bekale balunda na Leza, twingilanga kakasakakasa na Leza mu mpango yandi ya buswe ya kunyongolola bantu ku bubi ne ku lufu.

16. Lelo busapudi i bukwatañane namani na mbila mikatampe ya Leza?

¹⁶ Potukwasha bantu basokole dishinda dya būmi bwa nyeke, tulombolanga amba twibaswele ne tuswele Yehova “mwine usaka’mba bantu ba miswelo yonso bapande ne kwikala na buyuki bwinebwine bwa bubine.” (1 Temote 2:4) Mufadiseo paāipangwile Yesu mbila mikatampe ya Leza, Yesu wāmulondolwele amba: “‘Sanswa Yehova Leza obe na mutyima obe onso ne na muya obe onso ne na ñeni yobe yonso.’ Ino’i yo mbila itabukile bukatampe kadi yo imbajinji. Ya bubidi, iifwene nayo, i ino: ‘Sanswa mukwenu mowisanshilwe abe mwine.’” (Mateo 22:37-39) Tukōkelanga ku ino mbila na kusapula myanda miyampe.—Tanga Bilongwa 10:42.

17. Lelo wiivwananga namani pa dyese dya kusapula myanda miyampe?

¹⁷ Bine tudi na dyese’po kashā! Mwanda Yehova i mwitupe mwingilo witupa nsangaji, witufwenya kwadi ne kudi banabetu, kadi ulamanga kipwano kyotupwene nandi. Kadi witupanga mukenga wa kuswa Leza ne bakwetu. Yehova udi na midiyo ne midiyo ya bengidi bandi pano pa ntanda ponso, kadi bonso badi mu ngikadilo mishileshile. Inoko nansha twikale bankasampe, banunu, bampeta, nansha balanda, bakomo nansha bazoze, tuloñanga bukomo bwetu bonso bwa kwikankamika tulame lwitabijo. Twiivwanga pamo bwa Chantele wa mu Franse, wanene amba: “Muntu wa bukomo kupita bonso mūlu ne pano pa ntanda, Umpangi wa bintu byonso, Leza wa nsangaji unsapwilanga amba: ‘Enda! Nena! Nena myanda yami, nena myanda itamba ku obe mutyima. Nakupe bukomo bwami, Kinenwa kyami Bible, bukomo bwa kokwa kūlu, bengidi-nobe ba pano panshi, bufundiji bwa kyaba ne kyaba, ne bufundiji bwa pa kitatyi kifwaninwe.’ Bine dino i dyese dikatampe’po kashā dya kulonga byobya bitulomba Yehova ne kwingila nandi pamo!”