1. Numba tuhu Yehova apwa Wakulitulaho, oloze nalwezengako veka mangana valinge ika?

YEHOVA apwa Wakulitulaho. Ikiye atengele vyuma vyosena, kaha nawa atwama namangana nangolo chikuma. Omu Yehova akafwile Yopa evwishise chuma kana, Yopa jino ambile kuli Kalunga ngwenyi: “Ngunatachikiza jino ngwami nauhasa kulinga vyuma vyosena, kakweshi vyuma unajinyi kulinga navipwa vyavikalu kuli oveko.” (Yopa 42:2) Yehova nahase kulinga kala chuma najinyi chakuzeneka kusaka wakumukafwako. Oloze eji kusololanga zangi yenyi hakulwezako veka mangana vazate nenyi hamwe nakutesamo vyuma ajina.

2. Mulimo muka waulemu uze Yehova ahanyine Yesu kuzata?

² Kalunga atengele Mwanenyi Yesu shimbu kanda atenge vyuma vyeka vyosena. Kaha Yehova etavishile Mwanenyi amukafwe kutenga vyuma vikwavo vyosena. (Yowano 1:1-3, 18) Kaposetolo Paulu  asonekele kutalisa kuli Yesu ngwenyi: “Muli ikiye mukiko vatengelele vyuma vyeka vyosena vyamwilu navyahamavu, vyuma vamona navize vahona kumona, numba vipwa matanda chipwe mawata chipwe jifulumende chipwe viyulo. Kaha vyuma vyeka vyosena vavitenga kuhichila muli ikiye, kaha vyaikiye.” (Wavaka-Kolose 1:15-17) Shikaho, Yehova kahanyine kaha Mwanenyi mulimo waulemuko, oloze alwezeleko naveka mulimo kana. Chikupu vene, echi hikutokwa chachinene.

3. Mulimo muka Yehova ahanyine Alama kuzata, kaha mwomwo ika?

³ Yehova alwezele nawa vatu mangana vazachile nenyi hamwe. Chakutalilaho, ahanyine Alama mulimo wakuluka tunyama majina. (Kuputuka 2:19, 20) Achishinganyekenu kuwaha evwile Alama kuzata mulimo kanou. Akekeselenga omu tunyama vasolokelenga navilinga vyavo, kahechi chamukafwile asakule kanawa lijina lyakanyama hikanyama. Kachi nge Yehova asakile kuluka tunyama majina ivene, kachi kachamukaluhwilileko, mwomwo ikiye atengele tunyama vosena. Oloze asolwele nge azangile chikuma Alama hakumuhana mulimo kanou. Kalunga nawa ahanyine Alama mulimo wakulingisa mavu osena kupwa palachise. (Kuputuka 1:27, 28) Kutwala muze, Alama alitwaminyine kuzachila hamwe naKalunga, ngocho aputukile kuyanda hohamwe navana venyi vosena.—Kuputuka 3:17-19, 23.

4. Vatu vamwe vazachile ngachilihi naKalunga mangana vatesemo kujina chenyi?

⁴ Kufumaho, Kalunga alwezele vatu vamwe vazachile nenyi hamwe. Nowa vamuhanyine mulimo wakusonga wato uze wamulingishile ayovoke hohamwe natanga yenyi omu lyejile Livaji. Mose asokwele muyachi wavaIsalele kufuma muEjipitu. Yoshuwa atwaminyinyine vaIsalele nakuvengisa muLifuchi lyaLushiko. Solomone atungile tembele muYelusalema. Maliya asemene Yesu. Ava vatu vosena vakushishika navatu veka vavavulu, vazachilile hamwe naYehova mangana vatesemo kujina chenyi.

5. Mulimo muka tunahase kwazanamo, kaha kutala Yehova asaka tumukafwe kuzata mulimo kanou tahi? (Talenu muvwimbimbi wakulivanga.)

⁵ Makumbi ano, Yehova atulweza tuzate nangolo mumulimo wakukundwiza Wangana wenyi. Tunahase kuzachila Kalunga mujijila jajivulu. Numba tuhu tuvosena katweshi kuhasa kuzachila Yehova mujila yoyimweko, oloze tuvosena tunahase kuzata mulimo wakwambulula mujimbu wamwaza waWangana. Nge Yehova asakile, kachi azata mulimo kanou ukawenyi. Kachi nahanjikanga navatu hano hamavu oku ali mwilu. Yesu ambile ngwenyi, Yehova nahase kulingisa malolwa alweze vatu vyaMwangana waWangana Wenyi. (Luka 19:37-40) Oloze Yehova natwitavisa tupwenga “tuvaka-kuzachila hamwe” naikiye. (Wavaka-Kolinde 1, 3:9) Kaposetolo Paulu asonekele ngwenyi: “Etu mutwazachila hamwe nenyi, tuli nakumilembelela nawa ngwetu kanda kwitavila likoji lyalinene lyaKalunga, nakulilingisa liyenga mwanganaveneko.” (Wavaka-Kolinde 2, 6:1) Chikupu vene, chapwa hikutokwa chachinene kuzachila hamwe naKalunga. Tuchitalenu jino ovyo kuzachila hamwe naKalunga cheji kutulingisanga tuwahilile chikuma.

6. Uno MwanaKalunga watwatwa alumbunwine ngachilihi omu evwile hakuzachila hamwe naIse?

⁶ Kuzachila hamwe naKalunga chinalingisanga vangamba jaYehova vapwenga vakuwahilila. Shimbu kanda MwanaKalunga watwatwa ezenga hano hamavu, ambile ngwenyi: “Ami yami wakuputukilako kuvyuma atengele Yehova . . . Ngwapwilenga nenyi hamwe, ngukuluwa muka-kuzata, ami yami evwililenga kuwaha chikuma  hakumbi hakumbi. Ngwawahilililenga kumeso enyi lwola lwosena.” (Vishimo 8:22, 30) Omu Yesu azachilenga hamwe naIse, awahililile chikuma mwomwo ateselemo vyuma vyavivulu, kaha nawa atachikijile ngwenyi Yehova amuzangile chikuma. Nyi ngachilihi yetu?

7. Mwomwo ika mulimo wakwambulula weji kutulingisanga tupwenga vakuwahilila?

⁷ Yesu ambile ngwenyi kuhana nakutambula cheji kunehanga kuwahilila. (Vilinga 20:35) Twawahililile chikuma omu twalinangwile muchano, kaha mwomwo ika kwambulila vakwetu muchano cheji kutulingisanga tupwenga vakuwahilila? Mwomwo tweji kumonangomu vatu kana veji kuwahililanga chikuma hakwivwishisa vyuma yanangula Mbimbiliya, nomu nawa veji kuputukanga kupwa nausoko wamwaza naKalunga. Tweji kuwahililanga chikuma hakumonomu vatu kana veji kwalumunanga vishinganyeka vyavo nachiyoyelo chavo. Mulimo wakwambulula uze tweji kuzatanga wapwa himulimo waulemu chikuma, kaha nawa weji kutusuulwisanga. Mulimo kana naukalingisa vosena vaze navapwa masepa jaKalunga vakayoye haya myaka yosena.—Wavaka-Kolinde 2, 5:20.

8. Vyuma muka vanahanjikanga vamwe kutalisa kukuzachila hamwe naYehova?

⁸ Twatachikiza ngwetu tweji kwivwisanga Kalunga kuwaha omu tweji kukafwanga vatu valinangule vyaikiye, kaha eji kumonanga mulimo tweji kuzatanga kupwa waulemu chikuma. Echi cheji kutulingisanga tupwenga vakuwahilila. (Tangenu Wavaka-Kolinde 1, 15:58.) Marco uze atwama muItaly, ambile ngwenyi: “Ngwawahilila chikuma hakwijiva nge nguli nakuzachila chikuma Yehova, keshi kuzachila mutu uze mwavulyama mulimo nanguzatako.” Omu mukiko evwile naFranco uze azachila muItaly, ambile ngwenyi: “Hakumbi hakumbi, Yehova eji kuzachisanga Mazu enyi navyuma vyakushipilitu alongesa, hakutwanukisanga ngwenyi atuzanga, kaha nawa ngwenyi vyuma vyosena tweji kumulingilanga avimona kupwa vyavilemu chikuma, numba tuhu etu vavene natumona nge nevi tuli nakumulingila vene vyauchi. Echi chikiko cheji kungulingisanga nguwahilile chikuma, nakupwa wakusuuluka mukuyoya chami hakuzachila hamwe naKalunga.”

9. Usoko waYesu naYehova wapwile ngachilihi, kaha mwomwo ika?

⁹ Omu tweji kuzachilanga hamwe navatu twazanga, tweji kupandamanga chikuma kuli vakiko. Tweji kutachikizanga chikuma omu vapwa, nakutachikiza kanawa vilinga vyavo. Kaha nawa, tweji kutachikizanga vyuma vafwila kulinga, novyo veji kulinganga hakusaka vatesemo vyuma kana. Yesu azachile naYehova hamyaka yayivulu chikuma. Ngocho valizangile chikuma, kaha kakwapwile chuma numba chimwe chahashile kuhonesa usoko wavoko. Yesu asolwele nge apwile nausoko wamwaza naise hakwamba ngwenyi: “Ami naTata twapwa umwe.” (Yowano 10:30) Pundu vene, vapwile vakulinunga nakulivwasana chikuma omu vazachilenga hamwe.

10. Mwomwo ika mulimo wakwambulula weji kutulingisanga tupandame kuli Kalunga nakuli vakwetu?

¹⁰ Yesu alombele kuli Yehova mangana akinge tumbaji twenyi. Mwomwo ika? Ambile ngwenyi: “Mangana vapwenga umwe, nganomu etu twapwa umwe.” (Yowano 17:11) Nge natukavangiza jindongi jaKalunga mukuyoya chetu, nakwazana mumulimo wakwambulula, kaha natutachikiza kanawa vilinga vyenyi vyamwaza. Natulinangula ovyo chapwila chamangana kumufwelela nakukavangiza jijila jenyi. Kaha nawa, nge natupandama kuli Kalunga, kaha mwapandama kuli etu. (Tangenu WaYakova 4:8.) Tweji kupandamanga kuli vandumbwetu mwomwo tweji kumonanga ukalu woumwe, nakuwahilila havyuma vyovimwe, nakufwila kulinga vyuma vyovimwe. Ngocho tweji kuzachilanga hamwe, nakuwahilila hamwe, nakumika muvyuma vyovimwe. Octavia, uze atwama muBritain, ambile ngwenyi: “Kuzachile hamwe naYehova cheji kungulingisanga ngupandame kuli vakwetu.” Alumbunwine ngwenyi masepa jenyi vapwilenga jino vaze “vafwila kulinga vyuma vyovimwe” naikiye. Chikupu vene, nayetu tweji kwivwanga mwomumwe. Tweji kupandamanga kuli vandumbwetu nge tunavamono vali nakuzata nangolo mangana vevwise Yehova kuwaha.

11. Mwomwo ika natukapandamina chikuma kuli Yehova nakuli vandumbwetu mukaye kakahya?

¹¹ Makumbi ano, twazanga chikuma Kalunga navandumbwetu, oloze natukavazanga chikumanyi mukaye kakahya. Achishinganyekenu hamilimo yamwaza natukazata kulutwe. Natukatambwokesa vatu vaze navakasanguka nakuvanangula vyaYehova. Natukazata chikuma nakulingisa mavu kupwa palachise. Natukawahilila chikuma kuzachila hamwe nakukapwa vakukupuka mwosena muchiyulo chaKulishitu. Vatu vosena navakapandama kuli umwe namukwavo nakuli Yehova uze mwakekuchisa “vyuma vyakuyoya vyosena.”—Samu 145:16.

12. Uno mulimo wakwambulula weji kutukinganga ngachilihi?

¹² Twatela kukinga usoko wetu naYehova. Tuli nakuyoyela mukaye kano kaSatana, kaha nawa katwakupukako, shikaho chapwa chachashi kuli etu kuputuka kushinganyeka nakulinga vyuma vize veji kulinganga vatu mukaye. Chinafwane nge tuli nakuhala mukalwiji, kaha  muta nautukokela kuchihela kuze katweshi nakusaka kuyako. Shikaho twatela kuzata nangolo jetu josena mangana tuhase kuhala nakuya kuchihela kuze tuli nakusaka. Chochimwe nawa, twatela kuzata nangolo mangana kano kaye kaSatana kahone kutuhungumwisa. Uno kwambulula mujimbu wamwaza cheji kutukinganga ngachilihi? Omu tweji kuhanjikanga hali Yehova nahaMbimbiliya, tweji kuhakanga muchima kuvyuma vyamwaza kaha nawa vyavilemu, keshi kuvyuma vize navizeyesa lufwelelo lwetuko. (Wavaka-Fwilipi 4:8) Mulimo wakwambulula weji kuzamisanga lufwelelo lwetu, mwomwo weji kutwanukisanga jishiko jaKalunga najishimbi jenyi jamwaza. Weji kutukafwanga nawa tulame vilinga vize navitukafwa tulikinge kuli Satana nakukaye kenyi.—Tangenu Wavaka-Efwesu 6:14-17.

13. Mulimo wakwambulula wakafwile ngachilihi Chinjiho umwe muAustralia?

¹³ Nge natuzata chikuma mumulimo wakwambulula, nakulinangulanga, nakukafwanga vandumbwetu vyuma vimwe, kaha nachitukinga mwomwo katweshi kupwa nalwola lwakulizakamina chikuma haukalu wetuko. Joel uze atwama muAustralia, ambile ngwenyi: “Mulimo wakwambulula weji kungukafwanga ngumone kanawa omu chapwa kuyoya. Weji kungwanukisanga ukalu vali nakumona vatu navyuma ngunanganyala hakukavangiza jindongi jamuMbimbiliya mukuyoya chami. Mulimo wakwambulula unangukafwe ngupwenga lika wakulinyisa, kaha unangukafwe nawa ngupendamine hali Yehova nahali vandumbwami.”

14. Mwomwo ika natwambila ngwetu kutwalaho lika kwambulula mujimbu wamwaza chasolola nge tukwechi shipilitu yaKalunga?

¹⁴ Mulimo wakwambulula nawa watukafwa tufwelele chikupu ngwetu shipilitu yaKalunga yili nayetu. Achishinganyekenu vanamihane mulimo wakuhananga vatu vyakulya mungalila yenu. Kaveshi kumifweta hakuzata mulimo kanako, kaha nawa mweji kulitondelanga enu vavene jimbongo jakuzachisa. Cheka nawa, vatu vavavulu kavasaka vyakulya kanako, veka nawa vamihunga mwomwo yakuvanehelavyo. Kutala namutwalaho lika kuzata mulimo kana tahi? Nakushimbula chiku, namuzeya nakulitwamina. Etu vavavulu tweji kutwalaho lika kwambulula mujimbu wamwaza mwaka himwaka, numba tuhu tweji kuzachisanga lwola lwetu najimbongo jetu, kaha nawa vatu veji kutusehanga chipwe kupihilila nayetu. Echi chasolola nge shipilitu yaKalunga yeji kutukafwanga.

15. Mujila muka kwambulula mujimbu wamwaza chatambukila hamwe navyuma ajina Kalunga hali vatu?

¹⁵ Mujila muka kwambulula mujimbu wamwaza chatambukila hamwe navyuma ajina Yehova hali vatu? Kalunga ajinyine ngwenyi vatu vayoyenga haya myaka yosena, kaha kujina chenyi kachalumukako numba tuhu Alama alingile shili. (Isaya 55:11) Kalunga awahishile vyuma mangana atusokole kushili nakukufwa. Mujila muka? Hakutuma Yesu kwiza hano hamavu nakuhana kuyoya chenyi. Oloze vatu vatelelele kwononoka  Kalunga numba vanganyale kuwana kanou. Shikaho, Yesu anangwile vatu vyuma vize Kalunga asaka, kaha alwezele natumbaji twenyi valinge mwomumwe. Nge natwambulula nakukafwa vatu vapwenga masepa jaKalunga, kaha tuli nakuzachila hamwe naKalunga kweseka navyuma alongesa mangana tuyovole vatu kushili nakukufwa.

16. Mujila muka mulimo wetu wakwambulula walitombola najishimbi jaKalunga jajilemu chikuma?

¹⁶ Nge natukafwa vatu mangana vakayoye haya myaka yosena, kaha tuli nakusolola nge twazanga vatu naYehova, uze “ajina ngwenyi vatu vosena vavalwile, ngwenyi, vapwenga nachinyingi chakwoloka chakutachikiza muchano.” (WaChimoteu 1, 2:4) Omu kaFwaliseu umwe ahulishile Yesu amulweze lushimbi lwaKalunga lwalulemu, Yesu ambile ngwenyi: “‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete. Kaha lwamuchivali, lunalifwaneko, lukiko vene elu ngwavo: ‘Zangenunga vakwenu nganomu mwalizanga enu vavene.’” (Mateu 22:37-39) Tweji kukavangizanga jishimbi kaneji hakwambulula mujimbu wamwaza.—Tangenu Vilinga 10:42.

17. Uno mweji kwivwanga ngachilihi hakuzata mulimo wakwambulula mujimbu wamwaza?

¹⁷ Twapwa vakutokwa chikupu! Yehova natuhane mulimo uze weji kutunehelanga kuwahilila nakutupandamisa kuli ikiye nakuli vandumbwetu. Mulimo kana nawa weji kukinganga usoko wetu naikiye. Weji kutulingisanga nawa tusolole nge twazanga Kalunga navakwetu. Yehova atwama namayongomena avangamba jenyi mukaye kosena, kaha vosena veji kumonanga ukalu wakulisezaseza. Numba tupwa vanyike chipwe vakulwane, vaka-luheto chipwe vihutu, vakujikiza chipwe vakuhehela, tuvosena tweji kuzatanga nangolo mangana twambulile vakwetu vyuma twafwelela. Tweji kwivwanga nge muze eji kwivwanga Chantel wakuFrance, uze ambile ngwenyi: “Mutu wangolo chikuma, uze atengele vyuma vyosena, uze nawa apwa Kalunga wakuwahilila, nambe kuli ami ngwenyi: ‘Yako! Hanjika! Nguhanjikileko namuchima wove wosena. Ngunakuhane ngolo jami, naMazu ami Mbimbiliya, nakukutumina vangelo vakukafwe, namasepa vahamavu, nakukunangula, nakukuhana jindongi halwola lwakutamo.’ Chikupu vene, chapwa hikutokwa chachinene kulinga vyuma asaka Kalunga ketu Yehova nakuzachila hamwe naikiye.”