1. Nameme Yehova wapwa wa Hakamwa, nalanya vanu valinge vika?

YEHOVA Wapwa wa Hakamwa. Ikeye watangele vyuma vyoshe, cho lalo wakala na mana na ndthzili ya kulitila. Hanima ya kukwatha Yombi athzivithithe vyose evi, Yombi wendekele kuli Njambi ngwendi: “Njithzivuka, Shukulu Kalunga ngechi yove umuka ndthzili yoshe, cho watha kulinga vyoshe viushaka.” (Yombi 42:2) Yehova atha kulinga vyoshe vyashaka kwa kujeneka kulomba vukwathi kuli munu. Oloni akamwetha chithzemo mu kulanya vanu kupanga hamo nendi mangana ashulithilile viyongola vyendi.

2. Chipangi muka cha kulema chije Yehova wanene Yesu?

² Njambi wavangele kutanga Munendi Yesu, thimbu kanda atange vyuma vyoshe. Kutundaho, Yehova watavethele Munendi amukwathe kutanga vyuma vyoshe. (Yowano 1:1-3, 18) Kapositolo Paulu wathonekele hali Yesu ngwendi: “Omwo muli ikeye Njambi watangele vyuma vyoshe vya mwilu nevi vya hathi, vyuma vije twatha kumona, [nameme apwe matanda nambe  vashukulu nambe vifulumende nambe vaka-ndthzili ya kuyula NW]. Njambi watangele vyuma vyoshe muli ikeye, na omwo ikeye.” (Kolose 1:15-17) Yehova kanene lika Munendi chipangi cha kulema, oloni walekeleko veka vya chipangi echi vene. Njambi wavathingimikile.

3. Yehova wanene Andama chipangi muka, mwafwa vika?

³ Yehova walanyele lalo vanu vapange hamo nendi. Chakumwenako, wanene Andama chipangi cha kuluka tuthitu mathzina. (Kushangumuka 2:19, 20) Achthinganyekeni kuvwaha kwathzile Andama kupanga echi chipangi. Walilongethele chifwa cha kathitu na kathitu na vilinga vyendi, cho athinoni amuluke lithzina. Yehova ikeye watangele tuthitu voshe, ngechi ngwe wavalukile mathzina ikeye vavenya. Oloni wamwethele chithzemo kuli Andama ha kumwana chipangi cha kuluka tuthitu mathzina. Njambi wanene lalo Andama chipangi cha kupwitha hathi hoshe kupwa palandaisi. (Kushangumuka 1:27, 28) Oloni mu kwita kwa thimbu, Andama walikelele kupangela hamo na Njambi, ngechi wayandele, na kuyandetha vana vendi voshe.—Kushangumuka 3:17-19, 23.

4. Vanu vamo vapangele vati hamo na Njambi mu kushulithilila viyongola vyendi?

⁴ Kutundaho, Njambi walanyele vanu vakwavo vapange nendi. Nowa washongele vwato vuje vwamwovwele ku Livathzi na nanga yendi yoshe. Mosesa wapatwile vaIsalele mu Ingito. Yoshwa watwamenenene vaIsalele mu Lifuti lya Lishiko. Solomoni watungile tembele mu Yelusalema. Maliya wathemene Yesu. Vanu voshe ava va kulongwa na vakwavo veka vapangele na Yehova mu kushulithilila viyongola vyendi.

5. Chipangi muka chitwatha kupanga tuvavoshe? Kuma Yehova katha kupanga echi chipangi ndi? (Kengeni chikupulo ha liputa 28)

⁵ Matangwa ano, Yehova ali na kutulanya mangana tukundwiye Vumwene vwendi. Kuli vingila vyavingi vitwatha kupangela Njambi. Nameme kutwatha kwangula ngila imo lika, oloni tuvavoshe twatha kwambulula muthzimbu wauvwa wa Vumwene. Yehova natha kulinga echi chipangi ikeye vavenya. Atha kwendeka ku vanu oku ali mwilu. Yesu wendekele ngwendi Yehova atha kulingitha mamanya ambulule ku vanu vya Mwene wa Vumwene vwa Njambi. (Luka 19:37-40). Oloni Yehova natutavetha ‘tupangele hamo’ nendi. (1 Kolinte 3:9) Kapositolo Paulu wathonekele ngwendi: “Ngechi vene, njimilomba ngwange mu vipangi vyetu vya kupanga hamo na Njambi, yeni munatambula mema ku mbunge a Njambi, cho kethi muvyechelele ngwe vyangocho.” (2 Kolinte 6:1) Kunapu kuvethzika kwakama kupangela hamo na Njambi. Tumoneni omwo kupangela hamo na Njambi kukatulingitha tujolele.

6. Muna Njambi wa ntwatwa walithzivila vati ha kupangela hamo na Ishe?

⁶ Kupangela hamo na Njambi kunathzivitha vangamba va Yehova kuvwaha. Thimbu kanda Muna Njambi wantwatwa aije hano hathi, wendekele ngwendi: “Ha kulivanga [Yehova] watangele yange, . . . Njakele kuyehi [nendi], ngwe munendi wa mundondo, njamuvwahelelethele ha litangwa na litangwa, cho nange lalo njavwahelelele ku mesho endi.” (Vithimo 8:22, 30) Yesu wathzivile manene kuvwaha ha kupanga na Ishe, mwafwa walingile vyuma vyavingi, cho lalo wathzivukile ngwendi Yehova wamuthzema. Vaticho yetu?

7. Mwafwa vika chipangi cha kwambulula chikatulingitha tuvwahelele?

⁷ Yesu wendekele ngwendi tukathzivi kuvwaha nga twana vyuma nambe kutambula. (Vilinga 20:35) Twathzivile kuvwaha omwo twatambwile vuthunga. Oloni mwafwa vika tukathzivi kuvwaha nga tulekako  vakwetu ovu vuthunga? Mwafwa tukavamono vanavwahelela omwo vathzivithitha vyuma viyalongetha Mbimbiliya na kushangumuka kulikuta vuthamba na Njambi. Tukathzivi kuvwaha ha kuvamona vatengulula vithinganyeka vyavo na yoyethi yavo. Chipangi cha kwambulula chapwa chipangi cha kulema, chije chituthuvulwitha nga tuchipanga. Chikwatha vanu valikute vuthamba na Njambi na kuwana mwonyo wa myaka yoshe.—2 Kolinte 5:20.

8. Vanu vamo vendeka vika ha kuvwahelela kuvanawana mu kupangela hamo na Yehova?

⁸ Nga tukwatha vakwetu kulilongetha vya Njambi, cho tulithziva ngwetu tuli na kuthzivitha Yehova kuvwaha, cho lalo akakandelela kufwitangana kwetu. Oku lalo kukatuthzivitha kuvwaha. (Tandeni 1 Kolinte 15:58.) Marco wa ku Italy wendekele ngwendi: “Njavwahelela manene ha kuthzivuka ngwange njili na kupangela Yehova, kethi munu uje atha kwivala vwathi vipangi vyange.” Franco uje wapangela ku Italy nendi wendekele ngwendi: “Kwitila mu Lijwi lyendi na mu vyuma vya ku sipilitu vyakatwana, Yehova akatwanukitha ha litangwa na litangwa ngwendi watuthzema, cho vyuma vyoshe vitukamulingila vikapu vya kulema, nameme tukavimona kupwa ngwe vyangocho. Mukemwo kupangela hamo na Njambi kukanjithzivitha kuvwaha na kuthzivuka vinjili na kuyoyela.”

9. Vuthamba vwa Yehova na Yesu vwakanyamene vati, cho mwafwa vika?

⁹ Nga tupangela hamo na vaje vatwathzema, cho vuthamba vwetu vukanyama. Tuthzivuka mwamuvwa vunu vwavo na vifwa vyavo. Tuthzivuka vyuma vivashaka kupanga, novyo vali na kulinga mangana vavishulithilile. Yesu wapangele hamo na Yehova ha myaka yaingi manene. Valithzemene manene, ngechi nachimo chai chathele kuthsiya vuthamba vwavo. Yesu wendekele muvwakanyamenene vuthamba vwavo ngwendi: “Tate nange twapwa umo lika.” (Yowano 10:30) Valikwatathanene manene na kupangela hamo lika.

10. Mwafwa vika chipangi cha kwambulula chikatushwenyetha kuli Njambi na ku vandolome vetu?

¹⁰ Yesu walombele Yehova anyungilile vandongethi vendi. Mwafwa vika? Walombele ngwendi: “Ngechi vapwe umo ngwe yove nange twapwa umo.” (Yowano 17:11) Nga tukavangeya mashiko a Njambi na kupanga chipangi cha kwambulula, cho tuthzivithitha vifwa vyendi vyavivwa. Tuthzivuka vikwapwila kwakuvwa kumukulahela na kukavangeya vingila vyendi. Omwo tushwenya kuyehi na Njambi, cho nendi lalo ashwenya kuyehi netu (Tandeni Yakomba 4:8.) Cho lalo tulikuta vuthamba na vandolome na vandokathzi vetu, mwafwa twita mu vukalu vumo, tulinga vyuma vimo, tuthzivila hamo kuvwaha. Tupangela hamo, tujolelela hamo, cho tulipikila hamo mu vukalu. Octavia wa ku Britain wendekele ngwendi: “Kupangela hamo na Yehova kukanjilingitha njilikute vuthamba na vakwetu.” Wendekele ngwendi vuthamba vwendi na vakwavo vwatunda “ha  kulinga vyuma vya kulifwa.” Omu mukemwo mutukalithzivi netu. Tukathzeme vandolome vetu omwo tumona kufwitangana kwavo mu kushaka kuthzivitha Yehova kuvwaha ku mbunge.

11. Vika vikatushwenyetha manene kuli Yehova na kuli vandolome vetu mu kaye kakaha?

¹¹ Nameme tunathzeme Njambi na vandolome vetu mu thimbu ino, oloni mu lifuti lyaliha tukavathzema manene. Achithinganyekeni vipangi vyavivwa vitukapanga. Tukatambula vaje vakathanguka na kuvalongetha vya Yehova. Tukatengulula lalo hano hathi kupwa palandaisi. Tukavwahelela manene omwo tukapangela hamo na kushangumuka kupwa va kuthungama lalo mu chiyulo cha Kilisitu. Vanu voshe vakashwenya manene kuli umo na mukwavo na kuli Yehova uje “akakutitha vyuma vyoshe vya kuyoya.”—Myatho 145:16, NW.

12. Chipangi cha kwambulula chikatunyungilila vati?

¹² Tunapande kunyungilila vuthamba vwetu na Yehova. Tuli na kuyoyela mu kaye ka Satana, cho lalo kutwapwile va kuthungama, ngechi kupwa kwakwathi kuthinganyeka ngwe vaka-kaye. Kunapu ngwe munu uje ahala mu ndonga ya muta, Napande kulifwita kutewa muta umungumwina kuje kashakele kuya. Mu ngila imo lika lalo, tunapande kulifwita mangana twonwethe kaye ka Satana kutungumuna. Ngechi kwambulula kukatunyungilila vati? Omwo twendeka vya Yehova na Mbimbiliya, tuthinganyeka lika ha vyuma vyavivwa, kethi ha vije vyatha kuthzeyetha likulahelo lyetu. (Filipu 4:8) Kwambulula kukakanyametha likulahelo lyetu mwafwa kukatwanukitha mashiko a Njambi na vikulahetho vyendi. Kukatukwatha lalo kukala na vifwa vyavivwa vije vitunyungilila ku kaye kano ka Satana.—Tandeni Efeso 6:14-17.

13. Mukaleho umo wa ku Australia akalithzivi vati ha chipangi cha kwambulula, indi yeni mukalithzivi vati?

¹³ Kuthzethzama mu kwambulula na kulilongetha na kulingila vakwetu va mu chikungulukilo vyuma vyavivwa, kutunyungilila ku kulishoshomwena ha vukalu vwetu. Joel, wa ku Australia, wendekele ngwendi: “Kwambulula kukanjikwatha kukala na vithinganyeka vyavivwa. Kukanjanukitha tuyando tuvali na kumona vanu na vuvwa vunjinawana mu kupangetha mashiko a mu Mbimbiliya mu kuyoya kwange. Chipangi cha kwambulula chikanjikwatha kupwa wa kulikehetha na kukulahela Yehova na vandolome na vandokathzi vange.”

14. Mwafwa vika kukakateya kwetu mu kwambulula kumwetha ngwavo sipilitu ya Njambi ili netu?

¹⁴ Chipangi cha kwambulula chikatutakametha na kumona ngwetu sipilitu ya Njambi ili netu. Chakumwenako: Achithinganyekeni ngweni muli na chipangi cha kwana vanu va mu chitingitingi cheni vyakulya. Kumwethi na kutambula fweto ha chipangi echi, oloni muli na kupangetha vimbongo vyeni kulanda vyakulya. Vanu vavangi vamushaka kukwatha shavo kutambula vyakulya vyeni, cho vamo vamithzinda ha kuvatwalela evi vyakulya. Mwatha kutwalelela kupanga chipangi cheni ndi? Mwatha kuthzeya na kulikela. Omu mukemwo mutuli na kulinga, tukambulula thimbu yoshe kupangetha vimbongo vyetu na thimbu yetu nameme vanu vavangi vakatujolo na kutuluvalela. Oku kumwetha ngwavo sipilitu ya Njambi ili na kutukwatha.

15. Kwambulula kulikwatathana vati na vyuma vyayongola Yehova kukalingila vanu?

¹⁵ Chipangi cha kwambulula chilikwatathana vati na vyuma vyayongola Yehova kukalingila vanu? Njambi wayongwele ngwendi vanu vayoye myaka yoshe, cho viyongola  vyendi kuvyatengulukile nameme Andama wavulumwine. (Isaya 55:11) Njambi wavwahethele ngila ya kutupatula ku vuvi na ku kuthsa. Ngila muka? Yesu wethzile hano hathi na kututhsila. Vanu vanapande kwononoka Njambi athina vanganyale ku ñombelo yendi. Yesu walongethele vanu vyuma vyashaka Njambi, cho washikile vandongethi vendi valongethe vanu. Nga twambulula na kukwatha vakwetu kupwa vathamba va Njambi, cho tuli na kupanga hamo na Njambi mu kwovola vanu kutunda ku vuvi na ku kuthsa.

16. Kwambulula muthzimbu kunalikwatathana vati nawa mashiko akama a Njambi?

¹⁶ Omwo tukwatha vakwetu vawane ngila iya ku kuyoya kwa myaka yoshe, tumwetha ngwetu twavathzema na kuthzema Yehova. Njambi “ashaka ngechi vanu voshe vovoke na kweta kukuthzivuka vuthunga.” (1 Timateo 2:4) Omwo kaFaliseo umo wehwile Yesu ngwendi amuleke lishiko lyakama lya Njambi, cho Yesu wamukumbulwile ngwendi: “‘Thzema [Yehova] Njambi yove na mbunge yove yoshe, na mwonyo wove woshe, na mana ove oshe. Eli likelyo lishiko lyakama lya kulivanga, cho lishiko lya mu chivali lya kufwa ngwe eli ngwalyo, ‘Unapande kuthzema mukweni ngwe muwalithzema yove vavenya.’” (Mateo 22:37-39) Twononoka awa mashiko nga twambulula muthzimbu wauvwa.—Tandeni Vilinga 10:42.

17. Mukalithzivi vati ha chipangi cha kwambulula muthzimbu wauvwa?

¹⁷ Twavethzika manene. Yehova natwana chipangi chije chitulingitha tuvwahelele na kutushwenyetha kuyehi nendi na kuli vandolome vetu na kunyungilila vuthamba vwetu nendi. Chitulingitha lalo tuthzeme Njambi na vakwetu. Yehova ali na vangamba vavangi mu kaye, cho voshe vali na yoyethi ya kulithethzathethza. Nameme tu vanike, tu vakulunu, tu vampiti, tu vihutu, tu va kutakama, tu va kunyomwa, tuvavoshe tulifwiteni mu kulekako vakwetu vyuma vitwakulahela. Tulithziva ngwe Chantel wa ku France uje wendeka ngwendi: “Munu wa ndthzili manene mwilu na hathi, Ishamatanga wa vyuma vyoshe, Njambi wa kuvwahelela, nendeka kuli yange ngwendi ‘Ya wendeke! Ya unjendekeleko, wendeke na mbunge yove yoshe. Njikwana ndthzili na Lijwi lyange Mbimbiliya na vukwathi vwa kutunda mwilu na vavuthamba na vilongetha vyavivwa na vindongi ha thimbu ije inapande.’ Kunapu kuvethzika kwakama kulinga vyatuleka Yehova na kupangela hamo nendi.”