1. Ashtaca poderta charishpapash ¿imatata Jehová Diosca rurashca?

JEHOVÁ DIOSMI jahua pachapipash, cai Alpapipash tucui ima tiashcata rurashca. Paica tucuicunata yali ali yuyaita, ashtaca poderta charij Diosmi can. Chaimandami Job runaguca nirca, Taita Diosca imatapash ruraita ushanllami. Paica tucuitami pactachi ushan nishpa (Job 42:2). Ashtahuanbash, Jehová Diosca pipash paita ayudachunga na minishtinllu. Shinapash, shujcunata juyaimandami paita ayudachun saquishca.

2. Jehová Diosca ¿ima importante trabajotata Jesusmanga mingarca?

² Jahua cielotapash, cai Alpatapash nara rurashpallatami Jehová Diosca paipa Churi Jesusta rurarca. Chai jipaca, paipa Churimanga shuj importante trabajotami mingarca. Jehová Diosca jahua cielopipash, cai Alpapipash tucui ima tiashcata rurajushpaca, paipa Churi Jesús ayudachunmi saquirca (Juan 1:1-3, NM, 18). Chaimandami apóstol Pabloca nirca: ‘Jahua pachapi, cai pachapi ricunallacuna, na ricunallacunatapash Diosca paipa Churihuanllatami tucuita rurashca’ nishpa. Ashtahuanbash nircami. “Paipaj Churipaj ali cachunmi,  paihuanllata Diosca tucuita rurashca” nishpa (Colosenses 1:15-17). Imashinami ricunchi, Jehová Diosca shuj importante trabajota mingashpami paipa Churita ninanda juyashcata tucuicunaman ricuchirca.

3. a) Jehová Diosca ¿imatata Adanmanga mingarca? b) ¿Imamandata Adán ayudachun Jehová Diosca saquirca?

³ Jehová Diosca gentecunatapashmi paihuan trabajachun saquishca. Adandaca tucui animalcunaman shutita churachunmi mingarca (Génesis 2:19, 20). Chaita mingajpica Adanga ninandami cushijushcanga. Animalcunaman shutita churangapaca, cada animal imashi cajta, imata rurajtami Adanga ricujushcanga. Animalcunata ruraimandaca Jehovallatami shuticunata churanmanlla carca. Shinapash, Adanda juyaimandami paita ayudachun saquirca. Ashtahuanbash, tucui cai Alpata shuj juyailla paraisota rurachunmi Adandaca mingarca (Génesis 1:27, 28). Shinapash, Adanga Jehovahuan trabajanataca jipamanga saquircami. Tucui ñucanchicunaca Adanba huahuacuna caimandami ninanda sufrinchi (Génesis 3:17-19, 23).

4. Jehovapa munai pactarichunga ¿picunata paihuan trabajashca?

⁴ Tiempo yalishca jipaca, Jehová Diosca shuj gentecunapash paihuan trabajachunmi saquirca. Por ejemplo, Noé runaguca paipash, paipa familiapash Jatun Manllanai Tamiamanda salvaringapami shuj arcata rurarca. Cutin, Moisesca israelitacunatami Egipto llactamanda llujchirca. Josué runagupash Jehová carasha nishca Alpacunamanmi israelitacunata pusharca. Rey Salomonbash Taita Diospa templotami Jerusalén llactapi rurarca. Cutin, María huarmiguca Jesuspa mamami tucurca. Paicunapash, shuj sirvijcunapash Jehovapa munai pactarichunmi paihuan trabajashca.

5. a) ¿Imatata tucuicuna rurai ushapanchi? b) ¿Villachita na ushashpachu Taita Diosca ñucanchiman mingashca? (Callari dibujota ricupangui).

⁵ Cunan punllacunapipash, Jehová Diosca paipa Reinota apoyachunmi ñucanchicunatapash invitajun. Chaipaca shuj shuj cosascunatami rurai ushanchi. Tucuipi na apoyai ushashpapash, tucuicunami Diospa Reinomanda villachita ushanchi. ¿Villachita na ushashpachu Taita Diosca ñucanchiman mingashca? Na. Taita Dios munashpaca jahuan cielomanda parlashpa gentecunamanga villachinmanllami. Chaimandami Jesusca nirca, Diospa Reinomandaca cai rumicunapash villachita ushanmanllami nishpa (Lucas 19:37-40). Shinapash, Jehová Diosca ñucanchicuna paipa ‘ayudajcuna’ cachunmi saquishca (1 Corintios 3:9). Apóstol Pabloca nircami: ‘Ñucanchipash Diospajta paihuanllata rurajcuna cashpami cangunataca: Taita Diospa ninan juyaitaca, pactara yanga chasquinguichiman nishpa aligutapacha yarichinchi’ nishpa (2 Corintios 6:1). Jehovahuan trabajanaca shuj jatun bendicionmi can. Shinaca, imamandata shuj jatun bendición cashcata ricupashun.

6. Paipa Taitahuan trabajashpaca ¿imashinata Jesusca sintirirca?

⁶ Jehovahuan trabajashpaca ñucanchicunaca ninandami cushijunchi. Cai Alpaman Jesús nara shamushpaca tucuita rurashpami Jehovata ayudajurca. Jesusca paipa Taita paita ninanda juyajta yachashpami nirca: ‘Punllandimi paipa ñaupajpica cushijushca causajurcani’ nishpa (Proverbios 8:22, 30). Jesusca paipa Taitahuan ashtaca cosascunata rurashpa, paipa Taita paita juyajta ricushpami ninanda cushijurca. ¿Ñucanchicunapash Jesús cuenda sintirita ushanchichu?

7. ¿Imamandata villachishpaca ninanda cushijushpa ali sintirinchi?

⁷ Jesusca nircami, pipash ñucanchiman imatapash carajpi o pimanbash ñucanchi imata carashpaca cushillami sintirinchi nishpa (Hechos 20:35). Chaimandami, Bibliata ñucanchiman yachachijpica ninanda cushijurcanchi. Shujcunaman Bibliata yachachishpapash shinallatami  ninanda cushijushpa ali sintirinchi. ¿Imamandata shina sintirinchi? Gentecuna Bibliata yachajushpa, Jehovata rijsi callarishpa cushilla cajta ricushpami ñucanchipash cushijunchi. Imata yachajushcata paicunapa causaipi pactachijta ricushpacarin ashtahuanmi cushijunchi. Ashtahuanbash, Jehovapa amigo cashpalla para siempre causai ushanatami ali intindinchi (2 Corintios 5:20). Chaimandami, villachina shuj jatun bendición cashcata yachashpa ninanda cushijunchi.

8. Jehovahuan trabajashpaca ¿imashinata huaquin huauquicunaca sintirin?

⁸ Jehová Diosca gentecuna paita rijsichun ñucanchicuna ayudajpica ninandami cushijun. Shinallata, Jehová Diosca ñucanchi ruraicunataca na cunganllu. Chaita yachashpami ninanda cushijushpa ali sintirinchi (1 Corintios 15:58, liingui). Italia llactamanda Marco shuti huauquica ninmi: “Jehovata sirvishpa ninanda cushijushcata, ñuca rurashcacunata pai na cungana cashcata yachashpa imashina sintirishcataca, na parlai atinanichu” nishpa. Italiamandallata Franco shuti huauquipash ninmi: “Jehová Diosca cada punllami Bibliata, publicaciongunata, tandanajuicunata utilizashpa ñucanchita ninanda juyashcata ricuchin. Ashagutallami rurai ushani nishpa pensarijpipash, ñucanchi ruraicunaca Jehovapaca ninan valishcami can. Jehovahuan trabajashpaca ninandami cushijuni. Imapa causashpa catinatapash intindinimi” nishpa.

9. a) ¿Imashinata Jesusca paipa Taitahuan tratarin carca? b) ¿Imamandata Jehovapash, Jesuspash ninanda cushijun carca?

⁹ Rijsishca gentehuan trabajashpaca cushillami sintirinchi. ¿Imamandata shina sintirinchi? Rijsihuan trabajashpaca, pai imashina cajta ashtahuan ali yachashpami ima metacunata charishcata, chai metacunata pactachingapaj imata rurajushcata yachanchi. Cai Alpaman nara shamushpaca, Jesusca ashtaca millón huatacunatami paipa Taita Jehovahuan trabajashcanga. Chai tiempopica, Taitandi Churindi ali tratarishpa, ali llevarishpami cushijushpa causarca. Chaimandami Jesusca nirca: “Ñucahuan, ñuca Taitahuanga shujllami canchi” nishpa (Juan 10:30). Imashinami ricunchi, Jehová Diosca paipa Churihuan trabajashpa, paicunapura ayudarishpaca ninandami cushijun carca.

10. Villachinaca ¿imamandata Jehovaman, huauquipanicunaman ashtahuan quimirichun ayudan?

¹⁰ Jesusca paipa catijcunata cuidachunmi Jehová Diostaca mañarca. ¿Imamandata shina mañarca? Jesusca nircami: “Paicunapash ñucanchishnalla shujlla cachun, cambaj ushaihuan aliguta charipangui” nishpa (Juan 17:11). Bibliapi mandashcata cazushpa, villachishpaca Jehovatami ashtahuan rijsinchi. Shinallata, Jehovapi ashtahuan confiashpami pai mandashcata siempre cazungapaj munanchi. Ashtahuanbash, paipa amigo cangapaj esforzarijpica, Jehová Diosca ñucanchi ali amigomi canga (Santiago 4:8, liingui). Villachingapaj llujshishpaca, Jehovata sirvishpa catingapaj ñucanchi huauquipanicuna imashina esforzarijushcata ricushpami paicunahuan ali llevarinchi. Shinallata, tucuicuna llaquicunata aguantajushcatami cuenta japinchi. Ashtahuanbash, tucuicunallata espiritual metacuna charishpami cushijunchi. Shinami llaquicunata charishpapash, tucuicunallata shujllashna sirvingapaj munashpa cushijushpa aguantashpa catinchi.  Gran Bretaña llactamanda Octavia shuti paniguca ninmi: “Jehovahuan trabajashpaca paiman ashtahuan quimirishpami turiñañacunahuan ali llevarini” nishpa. ¿Imamandata chai paniguca shina nin? Chai paniguca paipa amigocunapash chai metacunatallata charijpimi shina nin. ¿Nachu ñucanchicunapash chai panigushna sintirinchi?

11. ¿Imamandata shamuj punllacunapica Jehovatapash, huauquipanicunatapash ashtahuan juyashun?

¹¹ Ñucanchicunaca Jehovatapash, huauquipanicunatapash ninandami juyanchi. Paraisopicarin ashtahuanmi juyashun. Chai punllacunapi tucuicuna imata ruranapi pensaripai. Huañushca gentecuna causarijpica, tucuicunami paicunata chasquishpa Jehovamanda yachachishun. Cai Alpa shuj juyailla paraíso tucuchunbashmi ayudashun. Tucuicunapura trabajanaca ninan cushijuimi canga. Shinallata, Jesús mandajujpica asha ashami jucha illaj tucushun. Ashtahuanbash, cada punllami ñucanchi huauquipanicunaman ashtahuan quimirishpa Jehovata juyashun. Jehová Diosca tucui ñucanchi minishtishca cosascunatami caranga (Salmo 145:16).

12. ¿Imamandata villachinaca minishtirin?

¹² Cunanbica juchayucunami canchi, Diablopa mundopimi causanajunchi. Na cuidarishpaca cai mundopi gentecunashnami causai callarishun. Chaimandami, Jehová Diospa amigo cashpa catingapaj ninanda esforzarina canchi. Pensaripashun: Shuj jatun huaicupi cashpa ama yacu apachunga, tucui ñucanchi fuerzahuanmi nadana canchi. Jehovata sirvinapash shinallatami can. Jehovahuan amigo cashpa catingapaca villachinami canchi. ¿Imamandata villachinaca minishtirin? Jehovamanda, Bibliamanda villachishpaca ima ashtahuan importante cashcatami cuenta japinchi. Shinami ñucanchi feta chiriyachij cosascunapica na pensarinajunchi (Filipenses 4:8). Shinallata, shujcunaman villachishpami Jehovapa mandashcacunata yarishpa, shamuj punllacunapi imashina bendicianata yarishpa ñucanchi feta shinlliyachinchi. Ashtahuanbash, villachinaca Diablopa ruraicunamanda, cai mundopa ruraicunamanda jarcaringapaj ali cualidadcunata charichunmi ayudan (Efesios 6:14-17, liingui).

13. Australia llactamanda huauquica ¿imamandata villachinataca ninanda alicachin?

¹³ Villachina, yachachina, huauquipanicunata ayudanaca ñucanchi problemacunapi ama yapata preocuparichunmi ayudan. Australia llactamanda Joel huauquica, villachinataca ninandami alicachin. Paica ninmi, villachishpaca cai mundopi gentecuna llaquinaita sufrinajujpipash, Bibliapa consejocunaca ñucataca ninandami ayudahuashca nishpa. Ashtahuanbash ninmi: “Shujcunaman villachinaca humilde cachun, Jehovapi, huauquicunapi confiachunmi ayudan” nishpa.

14. ¿Imamandata ninchi, Jehová Diosca paipa espirituhuanmi ñucanchita ayudan nishpa?

¹⁴ Villachishpaca Jehová paipa espíritu santohuan ayudajushcatapashmi cuenta japinchi. ¿Imamandata shina ninchi? Pensaripashun: Quiquin causajuj llactapi tucui gentecunaman micunata carachun, pipash quiquinda mandashcanman. Shinapash, chaita rurashcamandaca na pagashachu, quiquinllatami culquita gashtana cangui nishcanman. Ashtahuanbash quiquinga alimi yachangui, micunata saquigrijpipash huaquingunaca na chasquina cashcata, shujcunacarin na ricunayachina cashcata. Shina trabajopica ¿mashna tiempotashi paranguiman? ¿Nacha desanimarishpa ñana chaipi trabajanguiman? Reinomanda villachinaca chai trabajo cuendami can. Villachingapaca tiempopash, culquipashmi minishtirin. Shinapash, gentecunaca ñucanchimanda burlarin, huaquingunacarin na ricunayachinllu. Shina tratajpipash huatan huatanmi villachishpa catinchi. Shinami, Jehovapa espíritu santo ayudajushcata ricunchi.

15. ¿Imamandata villachinaca importante can?

¹⁵ Villachishpaca Taita Diospa munai pactarichunmi ayudanchi. Taita Diosca gentecuna para siempre causachunmi munan. Chai munaitaca Adán juchata rurajpipash Jehová Diosca na  cungarcachu (Isaías 55:11). Ñucanchita juchamanda, huañuimanda salvangapaca, paipa Churi ñucanchimanda huañuchunmi cai Alpaman cachamurca. Shinapash, Jesús ñucanchimanda huañushcata agradicingapaj, para siempre causangapaca Jehovatami cazuna canchi. Jesús cai Alpapi cashpaca, Jehová imata munashcatami gentecunamanga yachachirca. Paipa catijcunatapash chaitalla yachachichunmi mandarca Chaimandami ñucanchicunapash villachinchi, shujcunapash Jehovapa amigo tucuchun ayudanchi. Shina rurashpaca, Jehovahuan trabajashpami shuj gentecunapash juchamanda, huañuimanda salvarichun ayudanchi.

16. Villachishpaca ¿imatata ricuchinchi?

¹⁶ Shuj ali yachajushca runaca Jesustaca nircami, Mandashca shimicunamandaca ¿maijanda ashtahuan yali ali can? nishpa. Jesusca nircami: “Mandashcapica cashnami nijun: ‘Cambaj Taita Diostaca, tucui shunguhuan, tucui almahuan, tucui yuyaihuan juyangui’ nijunmi. Cai mandashca shimimi, tucuimanda punda ashtahuan yali ali. Chaipaj cati mandashca shimipash, chashnallatami nijun: ‘Cambaj cumba runagutaca, imashna can juyarinshnallata juyangui’ nijunmi” nishpa (Mateo 22:37-39). Villachishpa, para siempre causangapaj imata rurana cashcata gentecunaman yachachishpaca, Jehovatapash, gentecunatapash juyashcatami ricuchinchi (Hechos 10:42, liingui) [1] (cai tema tucuripi notata ricupangui). Jehová Diosca “tucuicuna quishpirichunmi munan. Paimanda na llullashpa villajuj Shimitapash yachachunmi munan” (1 Timoteo 2:4).

17. Jehovahuan trabajana bendicionda charishcamandaca ¿imashinata sintiripangui?

¹⁷ Jehovahuan trabajana bendicionmandaca ninandami agradicinchi. Paihuan trabajashpaca ninanda cushijushpami ali sintirinchi. Shinallata Jehovaman, huauquipanicunamanmi ashtahuan quimirinchi. Ñucanchillatami ali sintirinchi. Ashtahuanbash Jehovata, huauquicunatapash juyashcatami ricuchinchi. Tucui ñucanchicunapa causai na igual cajpipash, mundo enteropica ashtaca ashtacacunami Jehovata sirvinajunchi. Shinallata charij cashpa, pobre cashpa, sano cashpa, ungushca cashpa, joven o mayorlla cashpapash, tucuicunami villachingapaj ninanda esforzarinchi. Francia llactamanda shuj panigu cuendami sintirinchi. Paica nircami: Tucuita Ruraj, cushichij Taita Diosca cashnami ñucataca nin: ‘Shamui, ñucamanda parlapai. Tucui shunguhuan ñucamanda parlapai. Ñucami candaca shinlliyachisha. Villachichunga angelcunahuan, Bibliahuan, cumbacunahuami candaca ayudasha. Imashina villachinatapashmi yachachisha. Ayudachun minishtijujpipash, ñucallatami imata ruranatapash yachachisha’ nishpa. Jehová Diosca paipa munaita pactachina, Paihuan trabajana oportunidadtami cushca. Chaica shuj jatun bendicionmi can nishpa.