1. Sunga Yehowa ekala kunundu kwa byooso, mmwitanyine bangi bwa kukita kinyi?

YEHOWA nyi Efile Mukulu e kunundu kwa byooso. Bapangile bintu byooso, akupu binangu byaaye na bukome bwaye ta bi na nfudiilo nya. Kunyima kwa’ye kukwasha Yoobo bwa kushinguula bino, bamulungwile’shi: “Nauku’shi we mulombeene kukita byooso, na’shi takwi mwanda woshyookwobesha.” (Yoobo 42:2) Yehowa mmulombeene kukita kyooso kyakumiina kushii kuteka bukwashi kwi muntu. Kadi aleesha’shi e na kifulo p’aye kwitanyina bangi bwabadya kufuba naaye pamune bwa kulombasha mpàngo yaaye.

2. Yehowa baadi mwitanyine Yesu bwa kukita mudimo kinyi wi na muulo?

² Efile Mukulu bapangile Mwana aaye Yesu kumpala kwa kupanga bangi bantu na bingi bintu byooso. Kunyima, Yehowa bayitanyiine Mwana aaye bwa’shi amukwashe bwa kupanga bingi bintu. (Yowano 1:1-3, 18) Mpoolo mutumiibwa bafundjile bino pabitale Yesu: “Mwanda mwadiye ngi mubapaangilwe byooso, bii mwiyilu na pa nsenga, abimweka na bishyaabimweka, Mpuna na Malopwe, makata na matalwa  byooso mbipangibwe kwadi, na pa mwanda waye.” (Beena-Kolose 1:15-17) Kunyima kwa Yehowa kupa Mwana aaye mudimo wi na muulo mmukimbe dingi bwa kwibyuukisha bangi bantu. Mmumupe kineemo kikata!

3. Yehowa baadi mulungule Adame bwa kukita mufubo kinyi, na bwakinyi?

³ Yehowa mmwitanyine dingi bantu bwabadya kufuba naaye. Bu kileshesho, bapeele Adame mudimo wa kuudika nyema mashina. (Kibangilo 2:19, 20) Banda kunangusheena muloo ubaadi na Adame nsaa ibaadi akitshi uno mudimo! Baadi mubekyeele nyema kalolo mushindo wayidi na wayikitshi myanda, aye nkusangula eshina dipwandikile nyema ooso. Yehowa bapangile nyema yooso, byabya baadi mulombeene kuudika nyema mashina aye nabeene. Anka, baadi muleeshe Adame byaadi mumufule p’aye kumupa matalwa a kuudika nyema mashina. Efile Mukulu bapeele dingi Adame mudimo wa kufwisha nsenga yooso mpaladiiso. (Kibangilo 1:27, 28) Anka kunyima Adame batshile kitshibilo kya kwimika kufuba n’Efile Mukulu, nyi bwakinyi nkutuukye makyenga ebungi bwaye’ye nabeene na bana baaye booso.​—Kibangilo 3:17-19, 23.

4. Bangi abaadi bafube n’Efile Mukulu bwa kulombasha mpàngo yaaye naminyi?

⁴ Kunyima, Efile Mukulu baadi mwitanyine bangi bantu bwa kufuba naaye. Nowa baadi mwibake bwato bwadya kupanda na kifuko kyaye ku mpeshi a kabutu. Moyiise baadi mutuushe mwilo wa Isaleele mu Ejipitu. Yooshwa baadi mutweshe beena Isaleele mu Nsenga ya Mulayilo. Salomone bayibakile ntempelo a mu Yeelusaleme. Madiya nkufika nyinaye na Yesu. Bano bantu ba sha lulamato na bangi bebungi abaafubile na Yehowa bwa kulombasha mpàngo yaaye.

5. Mmu mudimo kinyi watudi balombeene kwipaana, na bwakinyi Yehowa mwitwitamine bwa kufuba pamune naaye? (Tala kifwatulo ki kumbangilo.)

⁵ Lelo uno Yehowa etutekye bwatudya kukita bukopo bwetu booso bwa kukwatshisheena Bufumu bwaye. Kwi mishindo ibungi yatudi balombeene kufubila Efile Mukulu. Na dingi sunga booso bwetu tatwi balombeene kumufubila mu kipaso kimune, twi balombeene kulungula mukandu wa Bufumu. Yehowa badya kukita uno mudimo aye nabeene. Badya kwakula aye nabeene mwiyilu bwa kulungula bantu be pa nsenga. Yesu bambile’shi Yehowa mmulombeene mpa na kufuba na mabwe bwa kulungula bangi pabitale Nfumu a Bufumu bwaye. (Luuka 19:37-40) Anka Yehowa etwitanyina bwatudya ‘kufuba pamune’ naaye. (1 Beena-Kodinto 3:9) Mpoolo mutumiibwa bafundjile’shi: “Patudi ku mufubo pamune naaye, atwinutekye bwanudya kuleka kupeesha buntu bwanudi batambule kwi Efile Mukulu.” (2 Beena-Kodinto 6:1) Nyi nkineemo kikata kwikala betaminyibwe bwa kufuba pamune n’Efile Mukulu. Tutaluuleyi binobino tungi tubingilo atwitwikasha na muloo wibungi.

6. Mwana mbedi a Efile Mukulu aleesha bibaadi na muloo pabitale pabaadi afubu mbwipi mwa Nshaye naminyi?

⁶ Kufuba n’Efile Mukulu akupa bafubi ba Yehowa muloo nsaa yooso. Kumpala kwa’shi afikye pa nsenga, Mwana mbedi a Efile Mukulu bambile’shi: “Yehowa mmumpangye bu mbedi a bintu byooso . . . naadi peepi naaye bu mukwashi, bwa kumusangasha efuku dyooso, pa [kusangala] ku meeso aaye ngub’ooso.” (Myeele 8:22, 30) Nsaa ibaadi Yesu afubu na Nshaye, baadi na muloo mwanda bakitshiine bintu bibungi na baadi auku’shi Yehowa mmumufule. Kadi’twe namu?

7. Bwakinyi mudimo wa bulungudi awitupa muloo?

⁷ Yesu bambile’shi atwikalaa na muloo nsaa yatupa bangi na yabetupa namu. (Bikitshino 20:35) Tubaadi bapushe muloo wibungi nsaa ibatupetele bya binyibinyi, kadi bwakinyi kulungula bangi bya binyibinyi akwitupa muloo? Mwanda atwibamono kwabapusha muloo  wibungi nsaa yabauku bya binyibinyi bya mu Bible na kutwela mu kipwano na Yehowa. Twi na muloo wa kwibamona kwabashintuula binangu na nshaleelo aabo. Mudimo wa bulungudi nyi mudimo wi na muulo ulombeene kwitupa muloo. Aupa bantu abafiki bakuuku b’Efile Mukulu mushindo wa kupeta muwa wa ikalaika.​—2 Beena-Kodinto 5:20.

8. Bangi mbaakule naminyi pabitale muloo wa kufuba na Yehowa?

⁸ Nsaa yatukwasha bangi bwa kulonga pabitale Efile Mukulu, atuuku’shi atusankisha Yehowa na’shi asankila mushindo watwitatshisha bwa kumufubila. Bino abitupa n’atwe namu muloo. (Badika 1 Beena-Kodinto 15:58.) Marco, mushaale mu Italie, akula’shi: “Nee na muloo ushii bya kupwandikisha wa kuuka’shi nkwete kupa Yehowa bintu byande bya muulo kushii kupa ungi muntu ayilwankana bukidi bintu binamukitshina.” Mu mushindo umune, Franco kwete kufubila Yehowa mu Italie akula’shi: “Ku bukwashi bwa Eyi dyaaye na bidiibwa bya mu kikudi, Yehowa kwete kuntentekyesha efuku dyooso’shi mmwitufule na’shi kyooso kyatukitshi ki na muulo kwadi, sunga atwe banabeene twakutwa kwibimona bu bi na muulo. Nyi bwakinyi kufuba n’Efile Mukulu akungikasha na muloo na kupusha’shi muwa wande wi na kepatshila.”

9. Nkipwano kinyi kibaadi pankatshi pa Yehowa na Yesu, na bwakinyi?

⁹ Nsaa yatufubu pamune na bantu batudi bafule, atwifubwila peepi nabo. Atushinguula bumuntu na ngikashi yaabo. Atuuku biipatshila byabo na byabakyebe kwibilombasha. Yesu bafubile na Yehowa pangi munda mwa bipwa midiyo. Kifulo kyaabo nkinyingye ngofu munkatshi mwabo mu mushindo ushii ulombeene kintu su nkimune kutshiba bukuuku bwabo. Yesu baadi muleeshe mushindo ubaadi kipwano kyaabo nsaa ibambile’shi: “Ami na Yaaya twi kintu kimune.” (Yowano 10:30) Babaadi mu buumune bwa binyibinyi, na babaadi abepusheena kalolo nsaa ibaabadi abafubu pamune.

10. Bwakinyi kulungula mukandu wibuwa akwitwikasha peepi n’Efile Mukulu na bangi bantu?

¹⁰ Yesu batekyele Yehowa bwa kukalwila balongi baaye. Bwakinyi? Batekyele’shi: “Beekale kintu kimune, bu byatudi kintu kimune.” (Yowano 17:11) Nsaa yatutumikila miiya ya Yehowa na kulungula mukandu wibuwa, atukapusha kalolo ngikashi yaaye ibuwa. Atukauku bwakinyi kukulupila mwadi na kulonda buludiki bwaye mmwanda wa kinangu. Na patwifubwila peepi n’Efile Mukulu, aye namu efubwila peepi neetu. (Badika Jaake 4:8.) Atwifubwila dingi peepi na bakwetu mwanda atufumankana na myanda i mumune na muloo, akupu twi na katupwito ke mumune. Atufubu pamune, atusangala pamune, na atunyingiila pamune mu bitompwa. Octavia, mushaale mu Grande-Bretagne akula’shi: “Kufuba pamune na Yehowa nkunkwashe bwa kwifubwila peepi na bangi.” Akula’shi pa mwanda wa ba kuuku baye binobino e na “bukunkushi na bipatshila bibuwa.” Binyibinyi, atupushaa namu bi mumune. Nsaa yatumono abiitatshisha bakwetu bwa kusankisha Yehowa, abitukwasha bwa kwifubwila peepi nabo.

11. Bwakinyi atukanyiisha kwifubwila peepi na Yehowa na bakwetu mu nsenga ipya?

 ¹¹ Binobino twi na kifulo ki bukopo bw’Efile Mukulu na bwa bakwetu, anka akikanyingi bibukopo mu nsenga ipya. Banda kunangusheena midimo yooso ibuwa yatukakitshi mu mafuku e kumpala! Atukapokyeela baaba abakasanguka na kwibalongyesha bwa kuuka Yehowa. Atukafubu dingi bwa kukita nsenga mpaladiiso. Atukekala mu muloo ukata wa kufuba pamune na kwikala bapwidikye mu Bufumu bwa Kidishitu. Bantu booso abakanyiisha kwifubwila peepi na bakwabo na kwi Yehowa, aye ‘akekutshisha bi na muuwa byooso.’​—Misambo 145:16.

12. Kulungula mukandu wibuwa akwitukalwila naminyi?

¹² Abitungu tulame kalolo kipwano kyetu na Yehowa. Twi bashaale mu ndumbulwilo a Satana, akupu twi bakutwe kupwidika, byabya mbibofule bwashi tubangye kwambula bikitshino na binangu bya uno ndumbulwilo. Bi’nka bu’twe abayoo mu meema e na mpumo aetukaka kwatushatukyebe kwenda. Byabya abitungu tukite mwetu mooso bwa kuywaa ku lupese lwatukumiina. Mu kipaso kimune abitungu kukita mwetu mooso bwa kupela kwambula binangu bya ndumbulwilo a Satana. Byabya kulungula kwa mukandu wibuwa akwitukalwila naminyi? Nsaa yatwakula pabitale Yehowa na Bible, atutuulu binangu byetu ku myanda ibuwa na ina muulo, tatutuulu binangu ku myanda ayikabofusha lukumiino lwetu nya. (Beena-Fidipe 4:8) Kulungula mukandu wibuwa akunyingisha lukumiino lwetu mwanda akwitutentekyesha milayilo y’Efile Mukulu na miiya yaaye ya kifulo. Akwitukwasha dingi bwa kwikala na ngikashi ibuwa bwatudya kwikalwiila kwi Satana na ku uno ndumbulwiilo e bubi.​—Badika Beena-Efeeze 6:14-17.

13. Ungi Temwe a Yehowa a mu Australie apushaa naminyi pabitale bulungudi?

¹³ Patudi bepaane mu mudimo wa bulungudi, kwilongyela na kukwasha bangi mu kakongye, twi mu bulami mwanda tatwi na nsaa ya kukamba kwikalakasha ku myanda yeetu. Joel, e mu Australie, akula’shi: “Mudimo wa kulungula mukandu wibuwa aunkwasha bwa kushinguula myanda ikwete kukitshika kushii kwilwankana. Auntentekyesha nkalakashi ikwete kufumankana nayo bantu na miloo yandi mupete pa kutumikila mayi a kulonda a mu Bible mu muwa wande. Mudimo wa bulungudi aunkwasha bwa kwikala na kwiyisha; aumpa mushindo wa kukulupila kwi Yehowa na kwi bakwetu balume na bakashi.”

14. Bwakinyi kunyingiila kwetu mu mudimo wa bulungudi akuleesha’shi twi na kikudi ky’Efile Mukulu?

¹⁴ Mudimo wa bulungudi awitushinkamiisha dingi’shi twi na kikudi ky’Efile Mukulu. Twate kilesheesho: Banda kupwandikisha’shi abakupa mudimo wa kwabila bantu ba mu kibundji kyeenu byakudya. Tabakupa efuto bwa uno mudimo nya, na abitungu otuushe makuta oobe a ku mpaaya. Na dingi, bantu bebungi tabakumiina byakudya, na bangi abakushikwa mwanda webatwadila byanka. We mulombeene kufuba uno mudimo munda mwa mafuku bungi kinyi? Mu mafuku apeela, obofula na pangi oyimikye kwiufuba. Byabya, bebungi ba kwatudi bakwete kulungula mukandu wibuwa munda mwa bipwa bibungi, sunga uno mudimo awitwata nsaa na makuta na sunga bantu abakwata nsungu nsaa yabetumono. Bino abileesha’shi twi na kikudi ky’Efile Mukulu.

15. Kulungula mukandu wibuwa nkwipusheene na mpàngo y’Efile Mukulu bwa bantu naminyi?

¹⁵ Mudimo wa kulungula mukandu wibuwa ngwipusheene na mpàngo ya Yehowa bwa bantu naminyi? Efile Mukulu baadi na mpàngo ya’shi bantu bekale na muwa wa ikalaika, na tamushintuule ino mpàngo yaaye nsaa ibakitshine Adame mulwisho nya. (Yeeshaya 55:11) Efile  Mukulu mmwate mpàngo ya kwitupaasha ku milwisho na ku lufu. Bwakinyi? Yesu bafikile pa nsenga bwa kutuusha muwa waye bu mulambu. Bwa kupashiibwa ku uno mulambu, abitungu bantu bakookyele Efile Mukulu. Nyi bwakinyi Yesu balongyeeshe bantu myanda ayibatekye Efile Mukulu, na kulungula balondji baaye bwa kwibikita. Nsaa yatulungula na kukwasha bangi bwabadya kufika ba kuuku b’Efile Mukulu, atutumika n’Efile Mukulu nabeene bwa kulombasha mpàngo yaaye ya kupaasha bantu ku mulwisho na ku lufu.

16. Mudimo wetu wa bulungudi ngwipusheene na miiya ikile yooso naminyi?

¹⁶ Nsaa yatukwasha bangi bwa kupeta eshinda dya muwa wa ikalaika, atuleesha’shi twi bebafule na twibafule Yehowa. “Aye akyebe’shi bantu booso bapande na bafikye ku kyuukilo kya binyibinyi.” (1 Timotee 2:4) Pabaadi Mufadisee mwipushe Yesu eyi dikile mayi ooso mu mukanda wa miiya, Yesu bambile’shi: “Ofule Yehowa Efile Mukulu oobe n’eshimba dyoobe dyooso, na kikudi kyoobe kyooso, mpaa na kinangu kyoobe kyooso. Dyaadya ngi dikata na dya-kumpala. Eyi dyaakabidi dii na muulo umune nadyo dii bino: ‘Ofule muntu-noobe buu’be nabeene.’” (Mateo 22:37-39) Patulungula mukandu wibuwa, atukookyela ku ano mayi.​—Badika Bikitshino 10:42.

17. Opushaa naminyi pabitale kineemo kyatudi nakyo kya kulungula mukandu wibuwa?

¹⁷ Twi na mwabi ukata! Mwanda Yehowa mmwitupe mudimo awitupa muloo, awitwikasha peepi naaye na peepi na bakwetu na kukalwila kipwano kyeetu naaye. Awitupa dingi mushindo wa kuleesha kifulo kyeetu bw’Efile Mukulu na bwa bangi bantu. Yehowa e na bafubi midiyo mu nsenga ishima, na booso bwabo be mu nshaleelo ilekeene. Kadi, byatwikala bakinga sunga bakulu, ba mpeta sunga balanda, be na bukome sunga bashii bukome, atukitaa mwetu mooso bwa kuleesha bangi bi lukumiino lwetu. Atupusha nka bu Chantel a mu France, bambile’shi: “Efile sha bukome booso, Mupangi a byooso, Efile Mukulu sha muloo, mundungule’shi: ‘Nda! Kalungule! Kalungule mukandu wande, autuukila mwishimba dyoobe. Nakupa bukome bwande, Bible Eyi dyande, bukwashi abutuukila mwiyilu, beena mufubo noobe be pa nsenga, nakulongyesha ku kapeela kapeela, na nkulongyesha myanda ikata mu kipungo kilombane.’ Twi na kineemo kikata kya kukita mudimo witupe Yehowa na kutumika pamune n’Efile Mukulu eetu!”