1. Ngisho nobe Jehova anguLongetulu Kwako Konkhe, yini lasicele kutsi siyente?

JEHOVA unguLongetulu Kwako Konkhe. Wadala tonkhe tintfo, uhlakaniphe kakhulu futsi unemandla. Ngemuva kwekusita Jobe kutsi akucondze loko, Jobe watsi: “Ngiyati kutsi wena unemandla ekwenta konkhe, kute muntfu longaphatamisa loko lese uhlose kukwenta.” (Jobe 42:2) Jehova angenta nobe yini lancume kuyenta angasitwa ngumuntfu. Kodvwa ukhombisa kutsi unelutsandvo ngekutsi acele labanye basebente naye kute afeze injongo yakhe.

2. Ngumuphi umsebenti lobalulekile Jehova lacela Jesu kutsi awente?

² Ngaphambi kwekutsi adale tonkhe letinye tintfo, Nkulunkulu wadala iNdvodzana yakhe lenguJesu. Ngemuva kwaloko Jehova wasebenta neNdvodzana yakhe kute adale letinye tintfo. (Johane 1:1-3, 18) Naku umphostoli Pawula lakubhala  ngaJesu: “Tonkhe letinye tintfo tadalwa ngayo ezulwini nasemhlabeni, tintfo letibonakalako naletingabonakali, kungaba tihlalo tebukhosi, emandla ekubusa, bohulumende nome tiphatsimandla. Tonkhe letinye tintfo tadalwa ngayo futsi tadalelwa yona.” (Kholose 1:15-17) Jehova akayinikanga nje iNdvodzana yakhe umsebenti lobalulekile kuphela, kodvwa waphindze watjela labanye ngawo. Lelo lilungelo lelikhulu!

3. Yini Jehova lacela Adamu kutsi ayente, futsi kungani?

³ Jehova waphindze wacela bantfu kutsi basebente naye. Sibonelo saloko kutsi waniketa Adamu umsebenti wekwetsa tilwane. (Genesisi 2:19, 20) Cabanga ngendlela Adamu lajabula ngayo ngalomsebenti laniketwa wona. Wayibukisisa indlela letilwane lebetibukeka ngayo nalebetenta ngayo, wabese wetsa ngasinye ligama. NguJehova lobekadale tonkhe letilwane, ngako abengakhona kutetsa. Kodvwa wakhombisa Adamu kutsi uyamtsandza ngekumvumela etse letilwane emagama. Nkulunkulu waphindze wanika Adamu umsebenti wekwenta umhlaba ube lipharadisi. (Genesisi 1:27, 28) Kodvwa ngekuhamba kwesikhatsi Adamu wayekela kusebenta naNkulunkulu. Umphumela waloko waba kutsi ahlupheke kakhulu yena nesitukulwane sakhe.​—Genesisi 3:17-19, 23.

4. Labanye bantfu basebenta njani naNkulunkulu kuze bafeze injongo yakhe?

⁴ Ngekuhamba kwesikhatsi, Nkulunkulu wacela labanye bantfu kutsi basebente naye. Nowa wakha umkhumbi lowagcina yena nemndeni wakhe baphila ngesikhatsi saZamcolo. Mosi wakhulula sive sema-Israyeli eGibhithe. Joshuwa waholela ema-Israyeli eVeni Lesetsembiso. Solomoni wakha lithempeli eJerusalema. Mariya waba ngunina waJesu. Bonkhe labantfu labetsembekile nalabanye bebasebenta naJehova kute bafeze injongo yakhe.

5. Ngumuphi umsebenti lesihlanganyela kuwo, futsi Jehova uyakudzinga yini kusebenta kanye natsi? (Buka sitfombe lesisekucaleni kwalesihloko.)

⁵ Lamuhla, Jehova usicela kutsi sente konkhe lesingakwenta kute sisekele uMbuso wakhe. Tinyenti tindlela lesingakhonta ngato Nkulunkulu. Ngisho nobe kungasitsi sonkhe lesingamkhonta ngendlela lefanako, kodvwa sonkhe singatishumayela tindzaba letimnandzi teMbuso. Jehova angatentela lomsebenti. Angakhuluma nebantfu asezulwini. Jesu watsi Jehova angakhona nekwenta ematje atjele labanye ngeNkhosi yeMbuso waKhe. (Lukha 19:37-40) Kodvwa Jehova uyasivumela kutsi sibe ‘tisebenti letikanye’ naye. (1 Khorinte 3:9) Umphostoli Pawula wabhala watsi: “Njengobe sisebenta kanye naye, natsi siyanikhutsata kutsi ningawemukeli umusa waNkulunkulu bese nilahlekelwa yinjongo yawo.” (2 Khorinte 6:1) Kulilungelo lelikhulu kucelwa nguNkulunkulu kutsi sisebente naye. Ase sibone letinye tetizatfu tekutsi kungani loku kusijabulisa kakhulu.

6. INdvodzana yaNkulunkulu lelitibulo iyichaza njani indlela lebeyitiva ngayo nayisebenta neYise?

⁶ Kusebenta naNkulunkulu kuhlale kutijabulisa tinceku takhe. Ngaphambi kwekutsi ite emhlabeni, iNdvodzana yaNkulunkulu lelitibulo yatsi: Jehova “wangidala, ngaba wekucala emisebentini yakhe  . . . ngangiseceleni kwakhe, njengengcweti yekwakha. Nganginentfokoto lenkhulu onkhe emalanga, ngijabula embikwakhe njalonjalo.” (Taga 8:22, 30) Ngesikhatsi Jesu asebenta kanye neYise, abejabula ngobe tinyenti tintfo latifeza futsi bekati kutsi Jehova uyamtsandza. Kodvwa kutsiwani ngatsi?

7. Kungani umsebenti wekushumayela usijabulisa?

⁷ Jesu watsi kuyasijabulisa kupha nekwemukela loko lesiphiwa kona. (Imisebenti 20:35) Sajabula kakhulu nasifundza liciniso. Kodvwa kungani kusijabulisa kufundzisa labanye liciniso? Kungobe siyababona bajabula nabakucondza loko lokufundziswa liBhayibheli futsi bacala kuba nebuhlobo naNkulunkulu. Kuyasijabulisa kubabona bashintja indlela labacabanga ngayo nendlela yabo yekuphila. Umsebenti wekushumayela ngumsebenti lobaluleke kakhulu nalowenetisako lokufanele siwente. Usita labo lababa bangani baNkulunkulu kutsi babe nelitsemba lekuphila lokuphakadze.​—2 Khorinte 5:20.

8. Yini labanye labayishito ngenjabulo labayitfolako nabasebenta naJehova?

⁸ Nasisita labanye kutsi bafundze ngaNkulunkulu, siyati kutsi loko kuyamjabulisa nekutsi uyitsatsa njengalebalulekile imetamo yetfu yekumkhonta. Naloko kuyasijabulisa. (Fundza 1 Khorinte 15:58.) Marco lohlala eTaliyane utsi: “Kungijabulisa kakhulu kwati kutsi ngimniketa lokuncono kakhulu Jehova nekutsi angikuniki nobe ngubani, lotakukhohlwa ngekushesha loko lengimentele kona.” NaFranco loseTaliyane utsi: “NgeliVi lakhe nangetintfo letisisita kutsi sibe nebuhlobo lobuhle naye, Jehova usikhumbuta onkhe malanga kutsi uyasitsandza nekutsi konkhe lesimentela kona kubalulekile, ngisho nobe singase sikutsatsele phansi. Nguloko lokungenta ngijabule ngekusebenta naNkulunkulu futsi ngikutsatse njengalokubalulekile kuphila.”

9. Bebunjani budlelwane emkhatsini waJehova naJesu, futsi kungani?

⁹ Nasisebenta ndzawonye nalabo lesibatsandzako, siyasondzelana nabo. Sibati kahle kutsi babantfu labanjani. Siyati kutsi iyini imigomo yabo nendlela labetama ngayo kuyifinyelela. Jesu wasebenta naJehova tigidzigidzi teminyaka. Bebangematse nelulwimi kangangekutsi kute lobekungacedza budlelwane babo. Jesu wachaza indlela lebebasondzelene ngayo ngesikhatsi atsi: “Mine naBabe simunye.” (Johane 10:30) Bebamunye, futsi babambisana nabasebenta.

10. Umsebenti wekushumayela usisondzeta njani kuNkulunkulu nakulabanye?

¹⁰ Jesu wacela Jehova kutsi avikele bafundzi bakhe. Kungani? Wathantaza watsi: “Kute batewuba munye njengobe natsi simunye.” (Johane 17:11) Nasiphila ngetimiso taNkulunkulu futsi sihlanganyela emsebentini wekushumayela, loko kusenta simati kancono. Sifundza kutsi kungani kukuhlakanipha kumetsemba nekulandzela ticondziso takhe. Nasisondzela kuNkulunkulu, naye uyasondzela kitsi. (Fundza Jakobe 4:8.) Siphindze sisondzelane nebazalwane nabodzadzewetfu ngobe sibhekana netinkinga letifanako, sijajuliswe tintfo letifanako siphindze sibe nemigomo lefanako. Sisebenta ndzawonye, sijabule kanye kanye futsi sibeketelele timo lesibhekana nato kanye kanye. Octavia lohlala eBritain utsi: “Kusebenta naJehova kungente ngasondzelana nalabanye.” Uyachaza kutsi loko kubangelwa kutsi yena nebangani lanabo nyalo “banemgomo munye.” Natsi sitiva ngendlela lefanako. Nasibona imetamo bazalwane labayentako kute bajabulise Jehova, loko kusenta sisondzelane nabo.

11. Emhlabeni lomusha, yini letasenta sisondzelane kakhulu naJehova kanye nebazalwane betfu?

¹¹ Simtsandza kakhulu Nkulunkulu nebazalwane betfu, kodvwa emhlabeni lomusha itawukhula kakhulu indlela lesibatsandza ngayo. Cabanga ngawo wonkhe umsebenti lojabulisako lesitawenta esikhatsini lesitako! Sitawemukela labo labavusiwe futsi sibafundzise ngaJehova. Sitawuphindze sente lomhlaba ube lipharadisi. Kutawujabulisa kakhulu kusebenta ndzawonye futsi kancane kancane sibe bete sono ngesikhatsi sekubusa kwaKhristu. Bonkhe bantfu batawusondzelana futsi basondzele kuJehova ‘lotawesutsisa tonkhe tifiso talokuphilako.’​—Tihlabelelo 145:16.

12. Usivikela njani umsebenti wekushumayela?

¹² Kufanele sibuvikele buhlobo betfu naJehova. Siphila eveni laSathane futsi sinesono, ngako kumelula ngatsi kucala  kucabanga nekwenta ngendlela lelive lelenta ngayo. Loku kufana nekubhukusha emfuleni nangabe kunemoya lomkhulu losiyisa lapho singafuni kuya khona. Esimeni lesinjalo, kungadzingeka sisebentise onkhe emandla etfu kute sibhukushe siye lapho sifuna kuya khona. Ngendlela lefanako, kudzingeka sisebente kamatima kute silwisane nekungenwa ngumoya walelive. Ngako kushumayela kusivikela njani? Nasikhuluma ngaJehova nangeliBhayibheli, sinaka tintfo letibalulekile naletinhle, hhayi tintfo letitawenta kukholwa kwetfu kube butsakatsaka. (Filiphi 4:8) Kushumayela kucinisa kukholwa kwetfu ngobe kusikhumbuta ngetetsembiso taNkulunkulu netimiso takhe telutsandvo. Kuphindze kusisite sibe nebuntfu lobutasisita sitivikele kuSathane nakulelive lakhe.​—Fundza Efesu 6:14-17.

13. Lomunye Fakazi wase-Australia utiva njani ngemsebenti wekushumayela?

¹³ Nangabe simatasatasa emsebentini wekushumayela, ekudadisheni, nasekusiteni labanye ebandleni, loko kuyasivikela ngobe siba bete sikhatsi sekukhatsateka kakhulu ngetinkinga tetfu. Joel lohlala e-Australia utsi: “Kushumayela kungisita kutsi nginake tintfo letibalulekile. Kungikhumbuta ngetinsayeya bantfu lababhekana nato, nangetinzuzo lengititfole ngekusebentisa timiso teliBhayibheli ekuphileni kwami. Lomsebenti ungisita kutsi ngihlale ngitfobekile, uphindze unginike nelitfuba lekwetsembela kuJehova nakubazalwane nabodzadzewetfu.”

14. Kubeketela kwetfu emsebentini wekushumayela, kukhombisa njani kutsi umoya waNkulunkulu unatsi?

¹⁴ Kushumayela kuphindze kusente siciniseke kutsi umoya waNkulunkulu unatsi. Nasi sibonelo: Asesitsi unemsebenti wekwemukelisa bantfu tinkhwa emmangweni wakini. Awuholi ngekwenta lomsebenti futsi kufanele ubhadale tonkhe tindleko tawo. Bantfu labanyenti abatifuni letinkhwa futsi labanye bayakwenyanya ngobe ubaniketa tona. Ungachubeka sikhatsi lesingakanani wenta lomsebenti? Ngekushesha ungaphelelwa ngemandla futsi uyekele. Nobe kunjalo, labanyenti betfu bayachubeka nekushumayela umnyaka nemnyaka, nanobe loko kudzinga sikhatsi setfu nemali futsi nanobe bantfu bahlekisa ngatsi nobe basitfukutselela. Loku kubufakazi bekutsi umoya waNkulunkulu uyasisita.

15. Kushumayela tindzaba letimnandzi kuhlangana njani nenjongo yaNkulunkulu ngebantfu?

¹⁵ Kushumayela kuhlangana njani nenjongo yaJehova ngebantfu? Injongo yaNkulunkulu beyikutsi bantfu baphile phakadze futsi ayizange ishintje ngesikhatsi Adamu ona. (Isaya 55:11) Nkulunkulu wasentela lilungiselelo lekukhululwa esonweni nasekufeni. Kanjani? Jesu weta emhlabeni  futsi wanikela ngekuphila kwakhe. Kodvwa kuze sizuze kulomhlatjelo, kufanele silalele Nkulunkulu. Ngako Jesu wafundzisa bantfu loko Nkulunkulu lakulindzele kubo, futsi wayala bafundzi bakhe kutsi bente lokufanako. Nangabe sishumayela futsi sisita labanye kutsi babe bangani baNkulunkulu lamuhla, sisebenta naNkulunkulu ngekuvumelana nalilungiselelo lakhe lelutsandvo lekukhulula bantfu esonweni nasekufeni.

16. Kushumayela kwetfu kuhlangana njani nemiyalo yaNkulunkulu lemikhulu kunayo yonkhe?

¹⁶ Nasisita labanye kute batfole indlela leya ekuphileni lokuphakadze, sikhombisa kutsi siyabatsandza nekutsi sitsandza Jehova. ‘Intsandvo yakhe ikutsi tonkhe tinhlobo tebantfu tisindziswe, titfole nelwati lolungulonalona lweliciniso.’ (1 Thimothi 2:4) Ngesikhatsi lomunye umFarisi abuta Jesu kutsi ngumuphi umyalo lomkhulu kunayo yonkhe, Jesu watsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo lomkhulu newekucala. Wesibili lofana nawo utsi: ‘Kufanele utsandze makhelwane wakho njengobe utitsandza wena.’” (Matewu 22:37-39) Nasishumayela tindzaba letimnandzi, sisuke silalela lemiyalo.​—Fundza Imisebenti 10:42.

17. Utiva njani ngelilungelo lekushumayela tindzaba letimnandzi?

¹⁷ Sibusiseke kakhulu! Jehova usinikete umsebenti losijabulisako, losenta sisondzelane naye kanye nebazalwane betfu futsi uvikele buhlobo betfu naye. Lomsebenti usiniketa nelitfuba lekukhombisa kutsi siyamtsandza Nkulunkulu nalabanye bantfu. Jehova unetigidzi tetinceku takhe emhlabeni futsi tonkhe tibhekene netimo letehlukahlukene. Kodvwa ngisho sibasha nobe sikhulile, sinjingile nobe siphuyile, sinemandla nobe sibutsatsakatsaka, senta konkhe lesingakwenta kute sishumayele kulabanye. Sitiva njengaChantel waseFrance lowatsi: “UMuntfu lomkhulu kanabo bonkhe emhlabeni, uMdali wato tonkhe tintfo, Nkulunkulu lojabulako utsi kimi: ‘Hamba! Khuluma! Ngikhulumele, ukhulume ngalokusuka enhlitiyweni yakho. Ngikuniketa emandla ami, liVi lami liBhayibheli, kusekelwa lokuvela ezulwini, bangani labasemhlabeni, kuceceshwa lokuphumelelako kanye neticondziso leticacile ngesikhatsi lesifanele.’ Kulilungelo lelikhulu kwenta loko Jehova lasicela kutsi sikwente, nekutsi sisebente kanye naye!”