1. Nokuba kuti Jehova ngo Mupatikampatila, ino bamwi wabatamba kuti bacite nzi?

JEHOVA ngo Mupatikampatila. Ngowakalenga zintu zyoonse, alimwi ulijisi busongo anguzu ziteeli. Naakamana kugwasya Jobu kukamvwisya kaambo aaka, Jobu wakamwaambila kuti: “Ndazyiba kuti yebo ulakonzya kucita zintu zyoonse akuti kunyina cintu ncokanza kucita icikonzya kukwaalila.” (Jobu 42:2) Jehova ulakonzya kucita kufwumbwa ncaasala kucita kakunyina kugwasyigwa amuntu uuli woonse. Pele ulatondezya luyando kwiinda mukutamba bamwi kuti babelekele antoomwe anguwe kutegwa makanze aakwe azuzikizyigwe.

2. Ino Jehova wakatamba Jesu kuti abeleke mulimo nzi uuyandika kapati?

² Leza wakalenga Mwanaakwe, Jesu, katanalenga bantu boonse alimwi azintu zimbi zyoonse. Mpoonya, Jehova wakazumizya Mwanaakwe kuti amugwasye kulenga zintu zimbi  zyoonse. (Jo hane 1:1-3, 18) Mwaapostolo Paulo wakalemba boobu kujatikizya Jesu: “Kwiinda mulinguwe zintu zimbi zyoonse zyakalengwa kujulu alimwi aanyika, izintu zilibonya azitalibonyi, kufwumbwa naa nzyuuno zyabwami, bulelo, mfwulumende naa bweendelezi. Izintu zimbi zyoonse zyakalengwa kwiinda mulinguwe alimwi zyakalengelwa nguwe.” (Bakolose 1:15-17) Aboobo Jehova tanaakapa buyo Mwanaakwe mulimo uuyandika kapati pele wakaambila abambi kujatikizya mulimo ooyu. Eelo kaka ncoolwe cilibedelede!

3. Ino Jehova wakaambila Adamu kuti abeleke mulimo nzi alimwi nkaambo nzi?

³ Jehova alimwi wakatamba bantu kuti babelekele antoomwe anguwe. Mucikozyanyo, wakazumizya Adamu kuti aulike banyama. (Matalikilo 2:19, 20) Amuyeeye buyo lukkomano ndwaakajisi Adamu mukubeleka mulimo ooyu! Wakalangisisya banyama mbobakali kuboneka, alimwi anzyobakali kucita, mpoonya wakali kusala zina lyamunyama umwi aumwi. Jehova ngowakalenga banyama boonse, aboobo wakali kukonzya kubaulika mazina mukamwini. Nokuba boobo, wakatondezya Adamu mbwaakali kumuyanda kwiinda mukumuzumizya kuti aulike banyama. Leza alimwi wakapa Adamu mulimo wakupanga nyika eeyi kuti ibe paradaiso. (Matalikilo 1:27, 28) Pele mukuya kwaciindi Adamu wakasala kuleka kubelekela antoomwe a Leza, aboobo wakaliletela mapenzi lwakwe mwini alimwi abana bakwe boonse.—Matalikilo 3:17-19, 23.

4. Ino bantu bamwi bakabeleka buti a Leza kutegwa bazuzikizye makanze aakwe?

⁴ Mukuya kwaciindi, Leza wakatamba bantu abambi kuti babeleke anguwe. Nowa wakayaka bwato ibwakamufwutula walo abamukwasyi wakwe lya Zambangulwe. Musa wakabaangununa bana Israyeli kuzwa mucisi ca Egepita. Joshua wakasololela bana Israyeli ku Nyika Yakasyomezyedwe. Solomoni wakayaka tempele mu Jerusalemu. Mariya wakaba banyina Jesu. Boonse aaba bantu basyomeka alimwi abambi banji bakabelekela antoomwe a Jehova kuzuzikizya makanze aakwe.

5. Ino muumulimo nzi motunga twatola lubazu, alimwi sena Jehova wakali kuyandika kutubikkilizya mumulimo ooyu? (Amubone cifwanikiso icili kumatalikilo aacibalo)

⁵ Mazuba aano, Jehova watutamba kuti tucite nzyotukonzya kucita kutegwa tugwasyilizye Bwami bwakwe. Kuli nzila zinji motukonzya kubelekela Leza. Alimwi nokuba kuti tatuli toonse tukonzya kumubelekela munzila yomwe, toonse tulakonzya kukambauka makani mabotu aa Bwami. Jehova naakaubeleka mulimo ooyu alikke. Naakali kuyanda, naakabandika abantu aano anyika cacigaminina kuzwa kujulu. Jesu wakaamba kuti Jehova wakali kukonzya kupa kuti mabwe aambile bantu kujatikizya Mwami wa Bwami bwakwe. (Luka 19:37-40) Pele Jehova watuzumizya kuti tube “basimilimonyina.” (1 Bakolinto 3:9) Mwaapostolo Paulo wakalemba kuti: “Mbotubelekela antoomwe anguwe, aswebo tumukulwaizya kuti mutatambuli luzyalo lwa Leza akwaalilwa kubona kaambo ncoluliko.” (2 Bakolinto 6:1) Ncoolwe cipati kutambwa kuti tubelekele antoomwe a Leza. Atulange-lange twaambo tumwi eeci ncocituletela lukkomano kapati.

6. Ino mwana wa Leza mutaanzi kuzyalwa wakapandulula buti kujatikizya mbwaakali kulimvwa kubeleka kumbali lya Bausyi?

⁶ Kubelekela antoomwe a Leza lyoonse kwali kubakkomanisya babelesi ba Jehova. Katanaboola  aanyika, Mwana wa Leza mutaanzi kuzyalwa wakaamba kuti: “Jehova wakandilenga kandili matalikilo aamilimo yakwe . . . Ndakali kumbali lyakwe kandili mubelesi uucibwene. Ndime ngwaakali kuyanda kapati buzuba abuzuba; Ndakali kukkomana kapati kumbele lyakwe ciindi coonse.” (Tusimpi 8:22, 30) Ciindi Jesu naakali kubeleka a Bausyi, wakali kkomene akaambo kakuti wakazuzikizya zintu zinji alimwi wakalizyi kuti Jehova wakali kumuyanda. Ino mbuti swebo?

7. Nkaambo nzi mulimo wakukambauka ncoutuletela lukkomano?

⁷ Jesu wakaamba kuti tulakkomana ciindi notupa anotutambula. (Milimo 20:35) Cakatukkomanisya ciindi notwakatambula kasimpe, pele sena tacitukkomanisyi andiswe kwaambila bamwi kasimpe? Akaambo kakuti tulababona mbobakkomana kapati ciindi nobamvwisya ncoliisya Bbaibbele akutalika kuba acilongwe a Leza. Tulakkomana kubabona kabacinca mbobayeeya alimwi akucinca bukkale bwabo. Mulimo wakukambauka ngomulimo uuyandika kapati alimwi ngomulimo uupa kukkutila ngotukonzya kubeleka. Cipa kuti cikonzyeke kuli baabo ibaba balongwe ba Leza kuti bakabe abuumi butamani.—2 Bakorinto 5:20.

8. Ino bamwi bakaamba nzi kujatikizya lukkomano luboola akaambo kakubelekela antoomwe a Jehova?

⁸ Ciindi notugwasya bamwi kwiiya kujatikizya Leza, tulizyi kuti cilamukkomanisya Jehova akuti ulalumba kusolekesya kwesu kumubelekela. Eeci acalo cituletela lukkomano. (Amubale 1 Bakorinto 15:58.) Ba Marco, ibakkala ku Italy, bakaamba kuti: “Ndilikkomene kapati kuzyiba kuti ndilamubelekela Jehova camoyo woonse alimwi akuti tandibelekeli muntu uukonzya kufwambaana kuluba ncondamucitila.” Mbubwenya buyo abalo ba Franco, ibakala ku Italy, bakaamba kuti: “Kwiinda mu Jwi lyakwe alimwi azintu zyakumuuya nzyatupa, Jehova ulatuyeezya buzuba abuzuba kuti ulatuyanda akuti zyoonse nzyotumucitila zilayandika kapati, nokuba kuti kulindiswe nzyotucita zilakonzya kuboneka kuti zinyina mpindu. Eeci ncecipa kuti kacindikkomanisya kubelekela antoomwe a Leza  alimwi cipa kuti buumi bwangu bube ampindu.”

9. Ino ncilongwe nzi cakaliko akati ka Jehova a Jesu alimwi nkaambo nzi?

⁹ Ciindi notubeleka abaabo mbotuyanda, tulaswena afwaafwi ambabo. Tulabuzyiba kabotu bube bwabo. Tulazizyiba mbaakani zyabo alimwi ambobasoleka kuzizuzikizya. Jesu wakabeleka a Jehova ambweni kwamabbiliyoni manji aamyaka. Luyando lwabo lwakayuma kapati cakuti kunyina cintu cakali kukonzya kunyonganya cilongwe cabo. Jesu wakapandulula cilongwe cabo mbocakali ciyumu ciindi naakaamba kuti: “Mebo a Taata tuli bamwi.” (Johane 10:30) Bakali kamantene ncobeni, alimwi bakali kweendelana ciindi nobakali kubelekela antoomwe.

10. Ino nkaambo nzi mulimo wakukambauka ncoutupa kuswena afwaafwi a Leza alimwi abantu bambi?

¹⁰ Jesu wakalomba Jehova kuti abakwabilile basikwiiya bakwe. Ino nkaambo nzi? Mumupailo wakati: “Ikutegwa babe bamwi mbubonya mbotubede andiswe.” (Johane 17:11) Ciindi notutobela zyeelelo zya Leza mubuumi bwesu alimwi akutola lubazu mumulimo wakukambauka, tulabumvwisya kabotu bube bwakwe bubotu. Tulaiya ncocili camaano kumusyoma alimwi akutobela busolozi bwakwe. Alimwi notuswena kuli Leza, awalo ulaswena kulindiswe. (Amubale Jakobo 4:8.) Alimwi tulaswena afwaafwi abakwesu abacizyi akaambo kakuti tulapenga mbubwenya mbobapenga akukkomana mbubwenya mbobakkomana alimwi tujisi mbaakani zikozyenye. Tubelekela antoomwe alimwi tulaliyumya mumapenzi antoomwe. Ba Octavia, ibakkala ku Britain, bakaamba kuti: “Kubeleka a Jehova kundipa kuswena afwaafwi abantu bambi.” Bakaamba kuti zilongwe zyabo ziyeeme “akuba ambaakani zikozyenye alimwi abusolozi bukozyenye.” Masimpe, andiswe mbotulimvwa mbubwenya oobu. Ciindi notubona bakwesu mbobamukkomanisya Jehova, citupa kuswena afwaafwi ambabo.

11. Ino ncinzi ciyootupa kuswena afwaafwi a Jehova alimwi akubakwesu munyika mpya?

¹¹ Luyando lwesu kuli Leza alimwi akubakwesu nduyumu lino, pele luyooba luyumu kwiinda munyika mpya. Amuyeeye buyo milimo yoonse iikkomanisya njotuyoocita kumbele! Tuyootambula bantu ibayoobusyigwa akubayiisya kujatikizya Jehova. Alimwi tuyoobeleka mulimo wakupanga nyika eeyi kuba paradaiso. Cinookkamanisya kubelekela antoomwe alimwi buce-buce akuba bantu balondokede mubweendelezi bwa Kristo. Bantu boonse bayooswena afwaafwi kuli umwi aumwi alimwi akuli Jehova, walo ‘uuyookkutya cilenge coonse cipona kwiinda mukucipa ncociyanda.’—Intembauzyo 145:16.

12. Ino mulimo wakukambauka utukwabilila buti?

¹² Tweelede kukwabilila cilongwe cesu a Jehova. Tupona munyika ya Saatani alimwi tatulondokede,  aboobo ncuubauba kutalika kuyeeya akucita zintu zyamunyika. Cili mbuli kudwaya mumulonga uujisi mayuwe aatutontela kulubazu nkotutayandi kuunka. Aboobo tweelede kubelesya nguzu zyesu zyoonse kutegwa tuunke kulubazu nkotuyanda. Mbubwenya buyo, tweelede kubeleka canguzu kutegwa tutayungwi anyika ya Saatani. Pele ino kukambauka kutukwabilila buti? Ciindi notwaambaula zya Jehova a Bbaibbele, tubikkila maano kuzintu ziyandika kapati alimwi zibotu, ikutali kuzintu zikonzya kupa kuti lusyomo lwesu luceye. (Bafilipi 4:8) Kukambauka kuyumya lusyomo lwesu akaambo kakuti kutuyeezya zisyomezyo zya Leza azyeelelo zyaluyando. Alimwi kutugwasya kuzumanana kuba abube mbotuyandika kutegwa tulikwabilile kuli Saatani anyika yakwe.—Amubale Baefeso 6:14-17.

13. Ino Kamboni umwi ku Australia ulimvwa buti kujatikizya mulimo wakukambauka, alimwi ino nywebo mulimvwa buti kujatikizya mulimo ooyu?

¹³ Ciindi notujisi bubi mumulimo wakukambauka, kubala alimwi akucitila bamwi zintu mumbungano, tulakwabililwa akaambo kakuti tatujisi ciindi cakulibilika kapati kujatikizya mapenzi eesu. Ba Joel, ibakkala ku Australia, bakaamba kuti: “Mulimo wakukambauka undigwasya kuzyiba bwini mbozibede zintu. Cindiyeezya mapenzi ngobajisi bantu alimwi abubotu mbondajana kwiinda mukubelesya njiisyo zyamu Bbaibbele mubuumi bwangu. Mulimo wakukambauka undigwasya kusoleka kulicesya; undipa coolwe cakusyoma muli Jehova alimwi akusyoma bakwesu abacizyi.”

14. Ino kuzumanana kwesu kukambauka kutondezya buti kuti muuya wa Leza ulaalindiswe?

¹⁴ Mulimo wakukambauka alimwi utupa kusyoma kuti muuya wa Leza ulaandiswe. Mucikozyanyo: Amweezyeezye kuti mujisi mulimo wakwaabila bantu cinkwa mucilawo momukkala. Tamubbadelwi buya kucita mulimo ooyu, alimwi mweelede kubelesya mali aanu kuubeleka. Kuyungizya waawo, bantu banji tabaciyandi cinkwa, alimwi bambi tabamuyandi nywebo akaambo kakubaletela cinkwa eeci. Ino mulimo ooyu inga mwaubeleka kwaciindi cilamfwu buti? Mukaindi buyo kasyoonto inga mwatyompwa, alimwi ambweni inga mwaleka kuubeleka. Pele bunji bwesu tulakambauka mwaka amwaka, nokuba kuti tubelesya ciindi amali eesu alimwi bantu balatufwubaazya naa kutunyemena. Eeci citondezya kuti muuya wa Leza ulatugwasya.

15. Ino kukambauka makani mabotu kweendelana buti amakanze aa Leza kubantu?

¹⁵ Ino mulimo wakukambauka weendelana buti amakanze aa Jehova kubantu? Makanze aa Leza akali aakuti bantu kabapona kukabe kutamani, alimwi makanze aakwe tanaakacinca ciindi Adamu naakabisya. (Isaya 55:11) Leza wakabikka bubambe bwakuti twaangununwe kucibi alufwu. Munzila nzi? Jesu wakaboola anyika akwaaba buumi bwakwe. Pele kutegwa bagwasyigwe kucituuzyo cakwe,  bantu bakeelede kumvwida Leza. Aboobo Jesu wakayiisya bantu Leza ncayanda kuli mbabo, alimwi wakaambila basikwiiya bakwe kucita mbubwenya. Ciindi notukambauka akugwasya bantu kuba balongwe ba Leza mazuba aano, tubelekela antoomwe a Leza mububambe bwakwe bwaluyando bwakufwutula bantu kucibi alufwu.

16. Ino kukambauka kwesu kweendelana buti amilawo ya Leza mipati?

¹⁶ Ciindi notugwasya bantu kujana nzila iitola kubuumi butamani, tutondezya kuti tulabayanda alimwi akuti tulamuyanda Jehova. Kuyanda kwakwe nkwakuti ‘bantu boonse bafwutulwe akuba aluzyibo lwini-lwini lwakasimpe.’ (1 Timoteyo 2:4) Ciindi mu Farisi naakabuzya Jesu kujatikizya mulawo iwakali mupati kwiinda, Jesu wakaamba kuti: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ Ooyu ngomulawo mupati alimwi ngonguwe wakusaanguna. Alimwi ngooyu wabili uuli mbuli yooyu: Weelede kuyanda simukobonyoko mbubonya mbuli mboliyanda omwini.’” (Matayo 22:37-39) Kwiinda mukukambauka makani mabotu, tutobela milawo eeyi.—Amubale Milimo 10:42.

17. Ino mulimvwa buti kujatikizya coolwe citaliboteli cakukambauka makani mabotu?

¹⁷ Eelo kaka tulilongezyedwe! Jehova watupa mulimo uuletela lukkomano, uutupa kuswena afwaafwi anguwe akuswena kubakwesu, alimwi eeci citupa kukwabilila cilongwe cesu anguwe. Alimwi citupa coolwe cakutondezya luyando lwesu kuli Leza akubantu bambi. Jehova ulijisi mamiliyoni aababelesi nyika yoonse, alimwi boonse aaba bajisi bukkale bwiindene-indene. Pele tacikwe makani naa tuli bana naa bapati, tulivwubide naa tulibacete, tulijisi nguzu naa tatujisi nguzu, tulacita zyoonse nzyotukonzya kwaambila bamwi zyalusyomo lwesu. Tulimvwa mbuli ba Chantel baku France, ibakaamba kuti: “Muntu uulaanguzu kwiinda mububumbo boonse, Mulengi wazintu zyoonse, Leza uukkomene, wandaambila kuti: ‘Koya! Kambauka! Kambauka kujatikizya ndime kuzwa ansi aamoyo. Ndakupa nguzu zyangu, Jwi lyangu Bbaibbele, lugwasyo kuzwa kujulu, ndakupa bakubeleka limwi, lwiiyo alimwi amalailile aagaminide aapegwa aciindi ceelede.’ Eelo kaka eeci ncoolwe cilibedelede kucita Jehova nzyatwaambila kucita alimwi akubelekela antoomwe a Leza wesu!”