1. Maski Jehová lu tliwakga, ¿tuku kawani amakgapitsin pi katlawakgolh?

JEHOVÁ tlawalh putum tuku anan. Wa tiku tlakg skgalala chu tliwakga nixawa atanu. Akgtum kilhtamaku, Job wa pi xla xkatsininit pi Dios tlan tlawa putum tuku tlawaputun. Xla nitu tuku nila natlawa (Job 42:2). Nachuna, ni talakaskin pi wi tiku namakgtaya. Maski chuna, kawani amakgapitsin pi akxtum kataskujkgolh. Chuna kalimasiyani pi lu kapaxki.

2. ¿Tuku lu xlakaskinka taskujut maxkika Jesús?

² Tuku pulana malakatsukilh Dios wa xKgawasa, Jesús. Alistalh maxkilh xKgawasa akgtum lu xlakaskinka taskujut. Maxkilh talakaskin namakgtaya natatlawa putum tuku anan (Juan 1:1-3, 18). Apóstol Pablo wa pi xpalakata Jesús, «litamalakatsukulh xlipaks ntu anan nkakgapun chu ntu anan nkatiyatna; wa ntu ntasiyukgoy, chu ntu ni tasiyukgoy». Na wa pi putum amakgapitsi tuku anan wa xpalakata malakatsukika chu wa lakgchan  (Col. 1:15-17). Wa xlakata Jehová limasiyanilh kakni Jesús akxni maxkilh lu xlakaskinka taskujut chu kamakatsinilh amakgapitsin.

3. 1) ¿Tuku wanilh Jehová pi xtlawalh Adán? 2) ¿Tuku xlakata Jehová mastalh talakaskin pi Adán xmakgtayalh?

³ Jehová na mastanit talakaskin pi akinin nataskujaw. Akgtum liʼakxilhtit, mastalh talakaskin pi Adán xmakgtayalh nawili xtukuwani animales (Gén. 2:19, 20). Xlikana pi Adán lu lipaxuwalh uma taskujut. Xlakata tlan xlaksakli akgatunu tukuwani, akxilhli la xlikatsi chu tuku xtlawa tantunu animales. Jehová tlan xtlawalh uma taskujut, xlakata wa kamalakatsukilh putum animales. Pero komo lu xpaxki Adán, maxkilh talakaskin pi xmakgtayalh. Nachuna wanilh pi akgtum paraíso xtlawalh putum Katiyatni (Gén. 1:27, 28). Pero chuna la titaxtulh kilhtamaku, Adán laksakli nialh nataskuja Jehová. Chu uma tlawalh pi Adán chu putum xkamanan lu napatinanaw (Gén. 3:17-19, 23).

4. ¿Tiku taskujkgonit Dios xlakata nakgantaxtu tuku xla lakpuwanit?

⁴ Titaxtulh kilhtamaku, Dios mastalh talakaskin pi amakgapitsin latamanin xtaskujkgolh. Akgtum liʼakxilhtit, Noé tlawalh akgtum arca xlakata xla chu xfamilia xlakgtaxtukgolh kMunkaklat. Moisés katamakxtulh kachikin Israel kʼEgipto. Josué kalilh israelitas ktiyat nema xkawanikanit nakamaxkikan. Salomón tlawalh templo xalak Jerusalén. Chu María xtse Jesús litaxtulh. Umakgolh kskujnin Jehová tiku ni makgatsankgananikgolh chu lhuwa amakgapitsin taskujkgonit xlakata nakgantaxtu tuku xla lakpuwanit.

5. 1) ¿Tuku taskujut tlan natlawayaw kimputunkan? 2) ¿Maklakaskin Jehová pi namakgtayayaw kʼuma taskujut? (Kaʼakxilhti xapulana dibujo).

⁵ La uku, Jehová kinkawaniyan pi katlawaw putum tuku tlan tlawayaw xlakata natatayayaw xtamapakgsin. Pulaklhuwa la tlan natlawayaw. Chu maski nila lakxtum tuku natlawayaw kimputunkan, putum tlan nalichuwinanaw tamakatsin xla Tamapakgsin. ¿Maklakaskin Jehová pi katlawaw uma taskujut? Ni. Komo chuna xlakaskilh, xla tlan xchuwinancha kʼakgapun xlakata xkatachuwinalh latamanin. Chu Jesús wa pi asta tlan xtlawalh pi chiwix xkalitachuwinankgolh latamanin xlakata Mapakgsina xla Tamapakgsin (Luc. 19:37-40). Pero Dios masta talakaskin pi «xtaskujnin» nawanaw (1 Cor. 3:9). Apóstol Pablo tsokgli: «Nkin, xtachuna makxtum xtaskujnin Dios, na kkaskiniyan litlan mpi ni kaj paxkat titlawayatit ntu nkaj litlan xlipaxkatsinit Dios makgamakglhinantit» (2 Cor. 6:1). Akgtum lanka talakgalhaman taskujkan Jehová. Kaʼakxilhwi makgapitsi tuku xlakata lu kinkamakgapaxuwayan uma.

6. ¿La xmakgkatsi xKgawasa Dios akxni taskujli xTlat?

⁶ Kskujnin Dios putum kilhtamaku lipaxuwanitaw xlakata taskujaw Jehová. Akxni nina xmin unu kKatiyatni, Jesús taskujli Jehová la chatum «skujni xapuxku», uma wamputun, pi lu xkatsini xtaskujut. Xla xkatsi pi Dios lu xpaxki chu wa: «Putum kilhtamaku xatapaxuwan ktawi kxlakatin» (Prov. 8:22, 30). Lu tlan limakgkatsilh pi taskujli xTlat, xlakata lhuwa tuku tlawalh chu xlakata xkatsi pi Dios xpaxki. ¿Chu akinin? ¿Na tlan chuna namakgkatsiyaw?

7. ¿Tuku xlakata makgapaxuwanan chu tlan limakgkatsikan akxni lichuwinankan Dios?

⁷ Jesús wa pi paxuwayaw akxni wi tuku mastayaw chu nachuna akxni wi tuku makglhtinanaw (Hech. 20:35). Akxni kinkamasiyanikan  xaxlikana, lu paxuwaw. Pero akxni kamasiyaniyaw amakgapitsin, na paxuwayaw chu tlan makgkatsiyaw. ¿Tuku xlakata? Xlakata akxilhaw pi latamanin lu paxuwakgo akxni katsinikgo tuku masiya Biblia chu tsukukgo lakgapaskgo Dios. Lu lipaxuwayaw akxni akxilhaw pi lakgpalikgo la likatsikgo chu xlatamatkan. Katsiyaw pi akxni xʼamigo Dios wankgo kamaxki talakaskin pi tlan nalatamakgo putum kilhtamaku (2 Cor. 5:20). Xlikana, nalichuwinankan Dios wa tuku tlakg xlakaskinka taskujut nema anan chu wa tuku tlakg kinkamakgapaxuwayan.

8. ¿La makgkatsikgo makgapitsi xtatayananin Jehová xlakata akxtum taskujkgo?

⁸ Akxni kamakgtayayaw amakgapitsin nalakgapaskgo Dios, katsiyaw pi Jehová lipaxuwa tuku tlawamaw chu xlakaskinka akxilha kintaskujutkan. Uma na kinkamakgapaxuwayan chu tlan kinkamamakgkatsiniyan (kalikgalhtawakga 1 Corintios 15:58). Chatum xtatayana Jehová xalak Italia tiku wanikan Marco wan: «Ni anan tachuwin xlakata tlan naklichuwinan tapaxuwan nema kmakgkatsi xlakata kmaxkima Jehová tuku tlakg tlan kkgalhi chu ni kaj chatum tiku ni katilakapastakli kintaskujut». Atanu xtatayana Jehová xalak Italia tiku wanikan Franco wan: «Chali chali, Jehová maklakaskin Biblia, likgalhtawakga chu tamakxtumit xlakata nakinkamalakapastakayan pi lu kinkapaxkiyan. Maski akinin lakpuwanaw pi ni lhuwa tuku tlawayaw, xla lu xlakaskinka akxilha kintaskujutkan. Wa xlakata lu klipaxuwa ktaskuja Dios chu tlawa pi naklipaxuwa kilatamat».

9. 1) ¿La xlatalalin Jehová chu Jesús? 2) ¿Tuku xlakata lu xlatalalin Jehová chu Jesús?

⁹ Akxni taskujaw tiku lu paxkiyaw, tlakg lakatsu tawilaw makgkatsiyaw. Tlakg liwana lakgapasaw la likatsi chu tukuya tayat kgalhi. Katsiyaw tuku tlawaputun chu tuku tlawama xlakata namakgantaxti tuku  lakpuwanit. Jesús taskujli Jehová max akglhuwa mil millones kata akxni nina xmin kKatiyatni. Xlakan lu xlapaxki chu ni anan tuku xkamapitsilh. Wa xlakata Jesús wa: «Wa xaTlat, chu nkit, mana watiya nkin ntipatu» (Juan 10:30). Xlikana, xchatiykan lu tlan xlatalalin xlakata xlipaxuwakgo akxtum kskujkgo chu xlamakgtaya.

10. ¿Tuku xlakata akxni lichuwinanaw Dios tlawa pi natalakatsuwiniyaw Jehová chu kinatalankan?

¹⁰ Jesús skinilh Jehová pi xkakuentajtlawalh kstalaninanin. ¿Tuku xlakata? Jesús wanilh: «Lakimpi mana watiya ntipatu nawankgoy, lantla chu nkin» (Juan 17:11). Akxni kgalhakgaxmataw tuku Dios wan kBiblia chu lichuwinanaw, tlakg akgatekgsaw xtayat Jehová. Akxilhaw pi tuku tlakg tlan natlawayaw wa pi nalipawanaw chu putum kilhtamaku natlawayaw tuku kinkawaniyan. Chu komo naliskujaw xlakata xʼamigos nawanaw, xla kiʼamigokan nawan (kalikgalhtawakga Santiago 4:8). Akxni lichuwinanaw Dios na tlawa pi nakatalakatsuwiniyaw kinatalankan, xlakata akxilhaw la liskujkgo namakgapaxuwakgo Jehová. Nachuna, akxilhaw pi watiya taʼakglhuwit kgalhiyaw, watiya tapaxuwan chu watiya tuku lakkaxwilinitaw natlawayaw. Wa xlakata akxtum skujaw, akxtum paxuwayaw chu akxtum tayaniyaw. Chatum xtatayana Jehová xalak Gran Bretaña tiku wanikan Octavia wan: «Akxtum naktaskuja Jehová tlawa pi tlakg naktalakatsuwini chu nakkatalakatsuwini kinatalan». ¿Tuku xlakata? Octavia wan pi xlakata xʼamigos na watiya tlawaputunkgo tuku tlawaputun. ¿Ni xlikana pi nachuna makgkatsiyaw?

11. ¿Tuku xlakata kxasasti kakilhtamaku tlakg nakatalalinaw kinatalankan chu Jehová?

¹¹ Xlikana, la uku lu paxkiyaw Jehová chu kinatalankan. Pero kParaíso tlakg nakapaxkiyaw. Kalilakpuwanti lu xastlan taskujut nema natlawayaw kilhtamaku nema aku mima. Nakamakgamakglhtinanaw tiku nalakastakwanankgo chu nakamasiyaniyaw xlakata Jehová. Akgtum paraíso natlawayaw putum Katiyatni. Lu tlan nawan pi akxtum naskujaw chu tsinu tsinu nialh nakgalhiyaw talakgalhin akxni namapakgsinan Cristo. Chali chali tlakg nakatalalinaw Jehová chu kinatalankan. Xlikana xla nakinkamaxkiyan putum tuku lakaskinaw (Sal. 145:16).

12. ¿Tuku xlakata kinkakuentajtlawayan akxni lichuwinanaw Dios?

¹² Lamaw kxkakilhtamaku Satanás chu makglakgalhinanin akinin. Komo ni kuenta natlawayaw, natsukuyaw lakpuwanaw chu nachuna nalikatsiyaw la latamanin xalak kakilhtamaku. Wa xlakata kilikuentajtlawatkan la talalinaw Jehová. Chu talakaskin lu naliskujaw. Xtachuna la komo lakaʼakxtu xʼaw akxni chuchut lakgakgalhu mima. Komo ni lakaskinaw pi nakikaxwatalinan kgalhtuchokgo talakaskin pi xliputum kilitliwakgakan napaxtajunanaw. Akxni lichuwinanaw Dios kinkamakgtayayan la talalinaw Jehová. ¿Tuku xlakata? Xlakata akxni  lichuwinanaw Dios chu Biblia, wa lilakpuwanaw tuku xlakaskinka chu tuku tlan. Ni wa lilakpuwanaw tuku namaxlajwani kintakanajlakan (Filip. 4:8). Akxni lichuwinanaw Dios matliwakglha kintakanajlakan xlakata kinkamalakapastakayan tuku Dios malaknu chu xlimapakgsin. Nachuna, kinkamakgtayayan chuntiya nakgalhiyaw lakwan tayat nema nakinkamakgtayayan nitu nakinkatlawaniyan Satanás chu xkakilhtamaku (kalikgalhtawakga Efesios 6:14-17).

13. ¿Tuku xlakata lu xlakaskinka akxilha chatum tala xalak Australia nalichuwinan Dios?

¹³ Lichuwinankan Dios, kgalhtawakgakan chu kamakgtayakan natalan na kinkamakgtayayan xlakata ni kinkamaxkiyan kilhtamaku lu nalilakgaputsayaw kintaʼakglhuwitkan. Chatum xtatayana Jehová xalak Australia tiku wanikan Joel lichuwinan tuku xlakata lu xlakaskinka akxilha nalichuwinan Dios. Wan pi makgtaya ankgalhin nalakapastaka pi latamanin xalak kakilhtamaku kgalhikgo lu laktuwa taʼakglhuwit. Nachuna, malakapastaka la xlilhuwa makgtaya tastakyaw xalak Biblia. Chu wan: «Naklichuwinan Dios kimakgtaya ni lanka nakimakgkatsikan chu naklipawan Jehová chu kinatalan».

14. ¿Tuku xlakata katsiyaw pi Dios kinkalimakgtayayan xʼespíritu santo?

¹⁴ Nalichuwinanaw Dios na kinkalimasiyaniyan pi Jehová kinkalimakgtayayan xʼespíritu. Xlakata naʼakgatekgsaw, kawiliw akgtum liʼakxilhtit. Kalilakpuwanti pi wi tiku nalakgayawayan pi kakamaʼakgpitsini liwat latamanin niku wix wila. Pero tiku chuna waniyan ni katixokgonin, wata wix naxokgoya putum tuku natalakaskin. Nachuna, katsiya pi latamanin ni lakaskinkgo nakalipiniya uma liwat chu makgapitsi asta nalisitsinikgoyan. ¿La xlilhuwa kilhtamaku natayaniya? Xlikana pi lakapala xtaxlajwani chu nialh xtlawa. Xtachuna, akinin kaliniyaw latamanin xtamakatsinin Dios. Limakgasputaw kilhtamaku chu tumin, chu latamanin kinkalikgalhkgamanankgoyan o asta kinkalisitsinikgoyan xlakata chuna tlawayaw. Pero kata kata chuntiya lichuwinanaw Dios. ¿Ni xlikana pi uma limasiya pi Jehová kinkalimakgtayaman xʼespíritu santo?

15. ¿Tuku xlakata lu xlakaskinka nalichuwinanaw Dios?

¹⁵ Lu xlakaskinka nalichuwinankan Dios xlakata makgtayanan nakgantaxtu tuku Dios lakaskin xlakata latamanin. Jehová xlakaskin pi latamanin xlatamakgolh putum kilhtamaku, chu uma ni talakgpalilh akxni Adán lakgalhinalh (Is. 55:11). Xlakata nakinkalakgmaxtuyan ktalakgalhin chu kkalinin Jehová malakgachalh Jesús kKatiyatni xlakata xmastalh xlatamat kimpalakatakan. Pero komo litamakgtayaputunaw xtamakamastan chu latamaputunaw putum kilhtamaku, kilikgalhakgaxmatatkan Dios. Jesús kamasiyanilh latamanin tuku Dios lakaskin natlawakgo, chu  kalimapakgsilh kstalaninanin pi na wa tuku xmasiyakgolh. Wa xlakata lichuwinanaw Dios chu kamakgtayayaw amakgapitsin xʼamigo Dios nawankgo. Akxni chuna tlawayaw, taskujaw Jehová chu makgtayananaw nalakgtaxtukgo latamanin ktalakgalhin chu kkalinin.

16. ¿Tuku limasiyayaw akxni lichuwinanaw Dios?

¹⁶ Akxni chatum xpulalina takanajla kgalhskilh Jesús tuku xlimapakgsin Dios tlakg xlakaskinka xwanit, Jesús kgalhtilh: «“Milipaxkit Jehová miDios xliputum minaku chu xliputum milatamat chu xliputum mintalakapastakni”. Wa uma tlakg xalanka chu xapulana limapakgsin. Xliʼakgtiy, nema xtachuna, wa uma: “Milipaxkit mintalataman chuna la miʼakstu paxkikana”» (Mat. 22:37-39, TNM). Akxni lichuwinanaw Dios chu kamasiyaniyaw latamanin la tlan nakgalhikgo latamat putum kilhtamaku, limasiyayaw pi kgalhakgaxmataw limapakgsin pi nakapaxkiyaw kintalatamankan chu Jehová (kalikgalhtawakga Hechos 10:42). Katsiyaw pi xla «lakaskin mpi paks naʼakgaputaxtukgoy, chu nalakgapaskgoy wa ntalulokgtat» (1 Tim. 2:4).

17. ¿La akxilha xlakata kgalhiya talakgalhaman akxtum nataskuja Jehová?

¹⁷ Lu kilipaxtikatsinitkan pi kgalhiyaw talakgalhaman nataskujaw Jehová. Akxni taskujaw kinkamakgapaxuwayan chu tlan limakgkatsiyaw, tlawa pi natalakatsuwiniyaw Jehová chu kinatalankan, chu kinkakuentajtlawayan. Nachuna, kinkamaxkiyan talakaskin nalimasiyayaw pi paxkiyaw Jehová chu natalan. Xlikalanka kakilhtamaku anan lhuwa millón kskujnin Dios, chu kimputumkan tanu tanu tuku titaxtuyaw. Pero kimputumkan tlawayaw tuku makakchanaw xlakata nalichuwinanaw Dios, maski lakgkgawasanku o laklankata akinin, maski kgalhiyaw o ni kgalhiyaw tumin, lakgtliwakgan o ni lakgtliwakgan akinin. Makgkatsiyaw chuna la chatum tala puskat xalak Francia, tiku wa: «Tiku tlakg xlakaskinka xlikalanka kakilhtamaku, Tiku tlawalh putum tuku anan, xapaxuwana Dios, kiwani: “Kapit chu kachuwinanti. Kakilichuwinanti. Xliputum minaku kakilichuwinanti. Akit nakmaxkiyan litliwakga, kinTachuwin, xtamakgtay ángeles chu tiku nataʼankgoyan talichuwinankgoyan Dios. Nakmasiyaniyan la natlawaya chu nakwaniyan la natlawaya akxni natalakaskin”. Jehová kinkamaxkiyan talakaskin namakgantaxtiyaw xtalakaskin chu akxtum nataskujaw. ¡Lu lanka talakgalhaman!».