1. Ndaño okuti Yehova Ukuonene Wosi, eye wa siata oku nõla omanu vakuavo oku linga nye?

YEHOVA Ukuonene Wosi. Eye wa lulika ovina viosi, kuenda olondunge viaye lunene waye ka vi kuete esulilo. Eci Yehova a kuatisa Yovi oku kuata elomboloko liolondaka evi, Yovi wa vangula laye hati: “Ndi ci okuti o tẽla cosi kuenje lacimue ocipango cove ci tatekiwa.” (Yovi 42:2) Yehova o pondola oku linga cosi a yongola okuti, ka kuatisiwa lomunu laumue. Pole, eye o lekisa ocisola poku nõla omanu vakuavo oco va talavayele kumosi laye koku tẽlisa ocipango caye.

2. Upange upi u kuete esilivilo Yehova a eca ku Yesu oco a u linge?

² Suku wa lulika Omõlaye Yesu, osimbu handi ka lulikile omunu laumue kuenda ovina vikuavo. Noke Yehova wa ecelela okuti Omõlaye u kuatisa koku lulika ovina vikuavo. (Yoano 1:1-3, 18) Upostolo Paulu wa soneha eci catiamẽla ku Yesu hati: “Ovina viosi via lulikiwa mekonda liaye, ci kale vio kilu, ci kale  vio posi, ovina vi muiwa levi ka vi muiwa, ci kale ovialo, ci kale ovonene, pamue olombiali. Ovina viosi via lulikiwa mekonda liaye kuenda viatiamẽla kokuaye.” (Va Kolosai 1:15-17) Yehova ka ecele lika Komõlaye upange u kuete esilivilo, pole, wa sapuilavo omanu vakuavo catiamẽla kupange waco. Ocili okuti esumũlũho linene!

3. Upange upi Yehova a ecele ku Adama, kuenda momo lie?

³ Yehova wa nõlavo omanu oco va talavaye kumosi laye. Eye wa ecelela okuti Adama eca olonduko kovinyama. (Efetikilo 2:19, 20) Sokolola esanju Adama a kuata poku linga upange waco! Eye wa kũlĩhĩsa lutate ekalo liocinyama locinyama, ovituwa vialio kuenje wa nõla onduko yi li kuata locinyama caco. Yehova eye wa lulika ovinyama viosi, kuenje nda ca tava okuti eye muẽle eca olonduko kovinyama viaco. Pole, wa lekisa ocisola ku Adama poku ecelela okuti eye eca olonduko kovinyama. Suku wa ecavo ku Adama ocikele coku posuisa osi oco yi kale ocitumãlo cimue ca posoka. (Efetikilo 1:27, 28) Pole, Adama wa nõlapo oku liwekapo oku talavaya la Suku, kuenje ca nena ohali kokuaye kuenda kovitumbulukila viaye viosi.—Efetikilo 3:17-19, 23.

4. Omanu vamue va talavaya ndati la Suku oco va tẽlise ocipango caye?

⁴ Noke, Yehova wa nõla omanu vakuavo oco va talavaye laye. Noha wa tunga ocimbaluku, muna eye a popeliwa kumue lepata liaye vokuenda Kuetande. Mose wa yovola epata lia va Isareli oku tunda Kegito. Yehosua wa songuila va Isareli oku iñila Vofeka Yohuminyo. Salomone wa tunga onembele ko Yerusalãi. Maria weya oku kala ina ya Yesu. Omanu va tukuiwa ndeti kuenda vakuavo vakuekolelo, va talavaya kumue la Yehova koku tẽlisa ocipango caye.

5. Upange upi tu pondola oku linga, kuenda Yehova o sukila hẽ ekuatiso lietu kupange waco? (Tala elitalatu kefetikilo liocipama cilo.)

⁵ Koloneke vilo, Yehova wa siata oku tu nõla oco tu kuatise kupange waye Wusoma. Kuli olonjila vialua tu pondola oku talavayela Yehova. Ndaño okuti vosi yetu ka tu pondola oku kuama olonjila vimuamue vioku talavayela Yehova pole, vosi yetu tu pondola oku kunda olondaka viwa Viusoma. Yehova nda wa linga upange waco lika liaye. Eye oku upisa kilu, nda wa vangula lomanu palo posi. Yesu wa popia hati, Yehova nda ca tava okuti o tuma ovawe oco va sapuile omanu catiamẽla ko Soma Yusoma Waye. (Luka 19:37-40) Pole, Yehova wa ecelela okuti tu kala ‘olondingupange’ viaye. (1 Va Korindo 3:9) Upostolo Paulu wa soneha hati: “Poku talavaya kumosi laye, tu u lunguli okuti ko ka tavi ohenda ya piãla ya Suku elivova.” (2 Va Korindo 6:1) Esumulũho linene oku nõliwa oco tu talavaye kumue la Suku. Tu konomuisi esunga lieci upange waco u tu nenela esanju.

6. Nye Omõla uveli wa Suku a lombolola poku talavaya kumue la Isiaye?

⁶ Oku talavaya la Suku ca siata oku nena esanju kafendeli vaye. Osimbu Omõla uveli wa Suku keyile palo posi, wa popia hati: “Yehova wa ndulika kefetikilo liupange waye . . . Oco ame nda kala laye ndomesele. Oloneke viosi eye wa sanjukila. Lame nda sanjuka kovaso aye otembo yosi.” (Olosapo 8:22, 30) Eci Yesu a talavaya la Isiaye, wa kuata esanju omo wa linga ovopange alua  kuenda wa kũlĩhile okuti Yehova u kuetele ocisola. Oco hẽ, nye ci popiwa catiamẽla kokuetu?

7. Momo lie upange woku kunda u tu nenela esanju?

⁷ Yesu wa popia hati, tu kuata esanju koku eca kuenda koku tambula. (Ovilinga 20:35) Ndaño okuti eci tua kũlĩha ocili Cembimbiliya tua kuata esanju, momo lie ci tu nenela esanju oku sapula ocili caco komanu? Momo tu limbuka esanju liavo eci va kuata elomboloko lieci Embimbiliya lilongisa loku fetika oku kuata ukamba la Suku. Tu kuatavo esanju poku mõla okuti omanu vaco va kasi oku linga apongoloko kovisimĩlo kuenda kekalo liomuenyo wavo. Upange woku kunda u kuete esilivilo lialua, kuenda upange umue u tu nenela vali esanju. Owo weca kafendeli va Suku, epuluvi lioku kuata omuenyo ko pui.—2 Va Korindo 5:20.

8. Nye vamanji vamue va popia catiamẽla kesanju li tunda koku talavaya kumue la Yehova?

⁸ Eci tu kuatisa omanu oku lilongisa ovina viatiamẽla ku Yehova, tua kũlĩha okuti tu kasi oku u sanjuisa kuenda tu kũlĩhavo okuti eye wa kapako alikolisilo etu oku u vumba. Ovina viaco vi tu nenela esanju. (Tanga 1 Va Korindo 15:58.) Manji umue o tukuiwa hati Marco, kofeka yo Italia wa popia hati: “Ndi kuete esanju ka li sokisiwa poku kũlĩha okuti ndi kasi oku likolisilako oku linga upange wa Yehova, kuenda si kasi oku ci lingila omunu umue okuti noke ivalako upange ndi kasi oku linga.” Manji Franco, o kasivo kofeka yaco wa popia hati: “Lekuatiso Liondaka ya Yehova okuti Embimbiliya kuenda aliangiliyo akuavo a tu kuatisa oku kuata ukamba laye, ci tu ivaluisa ocisola a tu kuetele eteke leteke. Tua kũlĩha okuti ovina tu u lingila vi kuete esilivilo, ndaño okuti olonjanja vimue ka tu limbuka esilivilo lialikolisilo etu. Eli olio esunga lieci okuti oku talavaya kumue la Suku ci nyiha esanju kuenda ndi kuata ocimãho komuenyo.”

9. Ukamba upi wa kala pokati ka Yehova la Yesu, kuenda momo lie?

⁹ Eci tu talavaya kumosi la vana tu kuetele ocisola, tu kuata ukamba lavo. Tu kũlĩha ciwa ekalo liavo kuenda ovituwa viavo. Tu kũlĩhavo ovimãho viavo kuenda ndomo va tẽla oku vi tẽlisa. Yesu poku talavaya la Yehova citava okuti wa ci linga vokuenda kuanyamo alua. Ocisola cavo kuenda ukamba va likuatela weya oku livokiya okuti lacimue ca ponduile oku tepa ukamba waco. Yesu wa lombolola ndomo ukamba waco wa kala poku popia hati: “Ame la Isia tuamuamue.” (Yoano 10:30) Ovo va likuatele omunga kuenda oku li tava tava pokati poku talavayela kumosi.

10. Momo lie upange woku kunda u tu kuatisila oku kuata ukamba la Suku kuenda la vakuetu?

¹⁰ Yesu wa pinga ku Yehova oco a teyuile olondonge viaye. Momo lie? Eye wa likutilila ndoco: “Okuti va linga vamuamue ndeci etu tuamuamue.” (Yoano 17:11) Eci tu kapako olonumbi via Suku kuenda tu linga upange woku kunda, tu kuata elomboloko liasuapo liovituwa viaye vi komõhisa. Tu kũlĩha esilivilo lioku u kolela kuenda oku kuama olonumbi viaye. Kuenje, eci tu kuata ukamba laye, eye o kalavo ekamba lietu. (Tanga Tiago 4:8.) Tu kuatavo ukamba la vamanji momo tua siata oku liyaka lovitangi vimuamue kuenda tu sanjuka momo tu kuete ovimãho vimuamue. Tu talavayela kumosi, tu sanjukila kumosi kuenda tu pandikisila kumosi. Manji umue ukãi o tukuiwa hati Octavia o kasi kofeka yo Grã-Bretanya wa popia hati: “Oku talavaya kumue la Yehova ci ndi kuatisa oku kuata ukamba la vakuetu.” Eye wa lombolola okuti akamba a kuete cilo va kuete “ovimãho vimuamue.” Ocili okuti, tu kuetevo ovisimĩlo vimuamue. Eci tu limbuka alikolisilo vamanji va siata oku linga oco va sanjuise Yehova, ci tu kuatisa oku kuata ukamba lavo.

11. Momo lie voluali luokaliye tu ka kuatela ukamba uwa la Yehova kuenda la vamanji?

¹¹ Ocisola tu kuetele Yehova kuenda vamanji, cilo lia livokiya pole voluali luo kaliye ci ka livokiya vali calua. Sokolola upange u nena esanju tu ka linga kovaso yoloneke! Tu ka yolela omanu vana va ka pinduiwa loku va longisa catiamẽla ku Yehova. Tu ka talavayavo koku pongolola ongongo, oco yi linge oluali luokaliye. Tu ka kuata esanju lialua koku talavayela kumosi vemehi liuviali wa Kristu toke eci tu ka li pua. Omanu vosi va ka likuatela ukamba kuenda va ka kuata ukamba la Yehova una ‘o ka tẽlisa onjongole yovina viosi vi kasi lomuenyo.’—Osamo 145:16.

12. Upange woku kunda u tu teyuila ndati?

¹² Tu sukila oku teyuila ukamba wetu la Yehova. Omo okuti tu kasi voluali lua Satana kuenda ka tua lipuile, ca leluka oku kuata  ovisimĩlo kuenda ovituwa violuali. Ci sokisiwa loku liteva volui lumue okuti ovava aco a kasi oku pita longusu yalua kuenda a tu sindila kuna ka tu yongola oku enda. Kuenje, tu likolisilako oku liteva konele yikuavo. Cimuamue haico okuti, tu sukila oku likolisilako oku yuvula oku yapuisiwa loluali lua Satana. Oco hẽ, upange woku kunda u tu teyuila ndati? Eci tu vangula catiamẽla ku Yehova kuenda Kembimbiliya, ci tu kuatisa oku tiamisila utima kovina viwa, havio vi kuete esilivilo. Ci tu kuatisavo oku yuvula oku tiamisila utima kovina ka vi pamisa ekolelo lietu. (Va Filipoi 4:8) Upange woku kunda u pamisa ekolelo lietu momo u tu ivaluisa olohuminyo via Suku kuenda olonumbi viaye viocisola. U tu kuatisavo oku amamako lovituwa tu sukila oku kuata, oco tu li teyuile ku Satana kumue loluali luaye.—Tanga Va Efeso 6:14-17.

13. Nye manji umue kofeka yo Australia a yeva vutima poku linga upange woku kunda?

¹³ Eci tu pesila otembo kupange woku kunda, oku lilongisa, kuenda oku linga upange u kuatisa vamanji vekongelo ci tu teyuila, momo ka tu kuata otembo yoku sokolola kovitangi vietu. Manji Joel o kasi kofeka yo Australia wa popia hati: “Upange woku kunda, u ndi kuatisa oku kũlĩha ovina vi kasi oku pita. U ndi kuatisavo oku sokolola ovitangi omanu va kasi oku liyaka lavio kuenda oku limbuka asumũlũho ndi kuete omo lioku kapako olonumbi Viembimbiliya komuenyo wange. Upange woku kunda u ndi kuatisa oku kala embombe, kuenda u nyiha epuluvi lioku kolela Yehova la vamanji.”

14. Momo lie epandi lietu kupange woku kunda li lekisa okuti espiritu lia Suku li kasi oku tu kuatisa?

¹⁴ Oku kunda ku tu kuatisavo oku kolela okuti espiritu lia Suku li kasi letu. Kũlĩhĩsa ocindekaise eci: Sokolola okuti upange wove oku eca olombolo vosanjala yove. Ove ku fetiwa omo lioku linga upange waco, kuenda handi o pesela olombongo viove muẽle. Handi vali, omanu valua ka va yongola ombolo yaco, kuenje va ku suvuka omo lioku va yi nenela. Anga hẽ, nda wa amamako oku linga upange waco? Citava okuti nda ca ku sumuisa calua kuenda nda wa liwekapo oku linga upange waco. Valua pokati ketu tu kasi oku amamako kupange woku kunda vokuenda kuanyamo alua, pole tu pesela otembo lolombongo vietu, ndaño okuti omanu ka va tu tava kuenda va tu temẽla. Eci ci lekisa okuti espiritu lia Suku olio li kasi oku tu kuatisa.

15. Upange woku kunda olondaka viwa u likuete ndati locipango ca Suku catiamẽla komanu?

¹⁵ Upange woku kunda u li kuete ndati locipango ca Suku catiamẽla komanu? Ocipango ca Suku ca kala okuti, omanu va kala komuenyo otembo ka yi pui, kuenda ocipango caco ka ca pongolokele ndaño noke lia Adama oku linga ekandu. (Isaya 55:11) Suku wa linga eliangiliyo limue lioku tu  yovola kekandu kuenda kolofa. Wa ci linga ndati? Ceci Yesu eya palo posi kuenda wa eca omuenyo waye ndocilumba. Pole, oco omanu va kuatisiwe locilumba caco, va sukilile oku pokola ku Suku. Omo liaco, Yesu wa longisa omanu ovina Suku a va yonguila, kuenda wa handeleka olondonge viaye oku ci lingavo. Koloneke vilo, eci tu kunda kuenda tu kuatisa vakuetu oku kuata ukamba la Suku, tu kasi oku talavaya laye keliangiliyo liocisola caye, coku yovola omanu kekandu kuenda kolofa.

16. Upange woku kunda u likuete ndati lovihandeleko via velapo via Suku?

¹⁶ Eci tu kuatisa omanu oku sanga onjila yi tuala komuenyo ko pui, tu lekisa okuti tu va kuetele ocisola kuenda tu solevo Yehova. Eye “o yongola okuti omanu vosi va kuata ukũlĩhĩso wa suapo wocili oco va popeliwe.” (1 Timoteo 2:4) Eci umue u Fariseo a pula ku Yesu, cipi ca kala ocihandeleko ca velapo ca Suku, Yesu wo kumbulula hati: “‘Sola Yehova Suku yove lutima wove wosi, lomuenyo wove wosi kuenda lolondunge viove viosi.’ Eci oco ocihandeleko catete haico ca velapo. Cavali ca lisoka leci, citi: ‘Sola ukuẽle ndeci o lisole ove muẽle.’” (Mateo 22:37-39) Poku kunda olondaka viwa, tu kasi oku pokola kovihandeleko viaco.—Tanga Ovilinga 10:42.

17. Nye o yeva vutima omo liesumũlũho o kuete lioku kunda olondaka viwa?

¹⁷ Tu kuete esumũlũho lialua! Yehova wa tu ĩha upange umue u tu nenela esanju, u tu kuatisa oku kuata ukamba laye kumue la vamanji kuenda u teyuila ukamba wetu laye. Upange waco u tu ĩhavo epuluvi lioku lekisa ocisola cetu ku Suku kuenda ku vakuetu. Yehova o kuete afendeli valua voluali luosi, kuenda vosi yavo va kuete ekalo lia litepa. Ci kale okuti tu amalẽhe ale tu akulu, tu lohuasi ale tu lohukũi, tua pama ale tua hongua, vosi yetu tu pondola oku li vetiya pokati lekolelo. Citava okuti tu liyeva nda manji Chantel wo kofeka yo Fransa wa popia hati: “Omunu Ukuonene Wosi voluali, haiye ululiki wovina viosi, okuti Suku yesanju, wa ndi sapuila hati: ‘Kuende! Sapula! Sapula ovina viatiamẽla kokuange vi kasi vutima wove. Ngeca kokuove ongusu yange, Ondaka yange Embimbiliya, ekuatiso liokilu, akamba va talavaya love palo posi, epindiso, kuenda olonumbi vi sukiliwa votembo ya sokiyiwa.’ Esumũlũho linene oku linga ovina Yehova a pinga kokuetu, kuenda oku talavayela kumue laye!”