1. Dede nẹ Jihova yen Ohwo rọ ma rho kparobọ, die yen o durhie ihwo efa vwo ruẹ?

JIHOVA yen Ohwo rọ ma rho kparobọ. Ọyen ma erọnvwọn eje, ẹgba vẹ aghwanre rọyen ba asa-an. Ọke ro vwo dje ọnana kẹ Job nu, Job da ta: “Me riẹnre nẹ wo se ru emu ejobi, o vwo ohwo ro se miovwi obo ru wo ruẹ-ẹ.” (Job 42:2) Jihova guọnọ ukẹcha rẹ ohwo vuọvo tavwen o ki ru obo rọ guọnọre-e. Ẹkẹvuọvo, o dje ẹguọnọ phia ro vwo durhie ihwo efa nẹ i rhi nene ọyen wian kugbe vwọ kẹ orugba rẹ ọhọre rọyen.

2. Owian ọghanghanre vọ yen Jihova vwọ kẹ Jesu?

² Ọghẹnẹ ma Ọmọ rọyen, Jesu, tavwen ọ ke ma ihworakpọ vẹ erọnvwọn efa. Jihova da rha vwẹ uphẹn kẹ Ọmọ rọyen nẹ ọ chọn ọyen uko vwọ ma erọnvwọn ri chekọ eje. (Jọn 1:1-3, 18) Ọyinkọn Pọl de si kpahen Jesu: “Kidie oma rọye a wan ma kemu kemu ejobi,  re hẹ obo odjuvwu kugbe re hẹ otọ rẹ akpọ na, emu ra mrẹ kugbe ire-jẹmrẹ owenẹ o dia obenu rẹ ekete rẹ ivie eyẹ ubrakpo re suẹn, eyẹ ihwo ride eyẹ ogangan; obọ rọye a wa ma kemu kemu ejobi, ọye a je ma ayen kẹ.” (Kọlose 1:15-17) Ọtiọyena, Jihova kẹ Ọmọ rọyen owian ọghanghanre, ọ je vuẹ ihwo kpahọn. Ọnana emu rẹ ọghọ dẹn!

3. Owian vọ yen Jihova vwọ kẹ Adam, kẹ diesorọ?

³ Jihova ji durhie ihworakpọ nẹ ayen nene ọyen wian kugbe. Kerẹ udje, ọ vwẹ uphẹn kẹ Adam nẹ o mu odẹ kẹ eranvwe na. (Jẹnẹsis 2:19, 20) Vwẹ ẹro roro oborẹ oma cha vwerhen Adam te fikirẹ owian nana! Ọ nabọ fuẹrẹn eranvwe na, oborẹ ayen hepha vẹ uruemu rayen tavwen o ki mu odẹ kẹ ayen ọvuọvo. Jihova yen ma eranvwe na, ọtiọyena ọyen ọvo rhe se mu odẹ kẹ ayen. Ẹkẹvuọvo, ọ kẹ Adam uphẹn ro vwo mu odẹ kẹ ayen rọ diẹ odjephia rẹ obo ro vwo ẹguọnọ rẹ Adam te. Ọghẹnẹ je kẹ Adam owian ro vwo ru akpọ na phiyọ iparadaisi. (Jẹnẹsis 1:27, 28) Ẹkẹvuọvo, Adam da dobọ rẹ owian rẹ ọyen vẹ Ọghẹnẹ wian ji, rọ rhe so ojaẹriọ rode vwọ kẹ vẹ emọ rọyen eje.—Jẹnẹsis 3:17-19, 23.

4. Idjerhe vọ yen ihwo efa vwo nene Ọghẹnẹ wian vwọ kẹ orugba rẹ ọhọre rọyen?

⁴ Ọke vwọ yanran na, Ọghẹnẹ ji durhie ihwo efa nẹ i rhi nene ọyen wian kugbe. Noa bọn okọ ro sivwinro vẹ orua rọyen ọke rẹ Oghwe na. Mosis si emọ rẹ Izrẹl vwo nẹ otọ rẹ Ijipt. Joshua sun emọ rẹ Izrẹl ro Otọ rẹ Uve na. Solomọn bọn uwevwin rẹ ẹga na vwẹ Jerusalẹm. Meri vwiẹ Jesu. Ihwo nana vẹ efa buebun nene Jihova wian vwọ kẹ orugba rẹ ọhọre rọyen.

5. Iruo vọ yen avwanre vwobọ vwọ, rẹ Jihova ọvo rhe se ru jovwo? (Ni uhoho rẹsosuọ na.)

⁵ Nonẹna, Jihova durhie avwanre eje nẹ e ru oborẹ avwanre se ru eje vwo bicha owian rẹ Uvie na. Idjerhe sansan yen a sa vwọ ga Ọghẹnẹ. Dedevwo nẹ o vwo asan rẹ ẹgba avwanre ohwo ọvuọvo teri, jẹ avwanre eje se ghwoghwo iyẹnrẹn esiri rẹ Uvie na. Jihova ọvo rhe se ru ọnana. Ọ sa ta ota vwo rhe ihworakpọ na vwo nẹ odjuvwu rhe. Jesu tare nẹ Jihova se ru ibiekpẹn na re da vuẹ ihwo kpahen Ovie rẹ Uvie Rọyen na. (Luk 19:37-40) Ẹkẹvuọvo, Jihova kẹ avwanre uphẹn ra vwọ dia “otu rẹ iruiruo” rọyen. (1 Kọrẹnt 3:9) Pọl de si: “Rẹ ayen vẹ ọye vwo ru iruo kuẹgbe na, avwanre ke rẹ ovwan nẹ, ovwan rha reyọ ẹserọphẹ rẹ Ọghẹnẹ na ghevweghe-e.” (2 Kọrẹnt 6:1) Ọyen ọghọ rode re vwo nene Ọghẹnẹ wian kugbe. E jẹ a mrẹ erọnvwọn evo re nẹrhẹ ọnana kẹ avwanre aghọghọ rode.

6. Mavọ yen Ọmọkpako rẹ Ọghẹnẹ djisẹ rẹ oborẹ oma ruro ọke ro vwo nene Ọsẹ rọyen wian kuẹgbe?

⁶ Re vwo nene Ọghẹnẹ wian kugbe kẹ idibo rẹ Jihova omavwerhovwẹn ọkieje. Tavwen Ọmọkpako rẹ Ọghẹnẹ ke rhe akpọ na, ọ da ta: “Vwẹ ẹtuọhọ rẹ emama rẹ Ọrovwohwo na ọye ọ vwọ ma vwẹ . . . yi mi mudia kẹrẹ, kerẹ onotu rẹ ọwena; mẹvwẹ kọye omavwerhovwẹ rọye kẹdẹ kẹdẹ, rọ ghọghọ vwẹ obaro rọye kọke kọke.” (Isẹ 8:22, 30) Ọke rẹ Jesu vẹ Ọsẹ rọyen vwọ wian kuẹgbe, oma vwerhọn fikirẹ erọnvwọn buebun ro ruru, ọ je riẹn nẹ Jihova vwo ẹguọnọ rọyen. Kẹ avwanre vwo?

7. Diesorọ iruo aghwoghwo na vwọ kẹ avwanre omavwerhovwẹn?

⁷ Jesu tare nẹ omavwerhovwẹn herọ vwọ kẹ ọkokẹ kugbe ọ ra kẹre. (Iruo Rẹ Iyinkọn Na 20:35) Ọ kẹ avwanre omavwerhovwẹn ọke ra vwọ mrẹ uyota na vughe, jẹ diesorọ oma je vwọ vwerhen avwanre siẹrẹ a da vuẹ ihwo efa kpahen uyota na? Kidie a mrẹ aghọghọ ro rhe ayen ọke rẹ ayen de  vwo ẹruọ rẹ oborẹ Baibol na yonori, ji vwo oyerinkugbe vẹ Ọghẹnẹ. Oma vwerhen avwanre ọke rẹ ayen de ru ewene vwẹ iroro vẹ akpeyeren rayen. Iruo aghwoghwo na yen iruo rọ ma ghanre kparobọ rọ je kẹ avwanre omavwerhovwẹn. Ọ nẹrhẹ igbeyan rẹ Ọghẹnẹ se vwo arhọ ri bẹdẹ.—2 Kọrẹnt 5:20.

8. Die yen ihwo evo ta kpahen aghọghọ rọ herọ re vwo nene Jihova wian kugbe?

⁸ Avwanre riẹnre nẹ oma vwerhen Jihova siẹrẹ a da chọn ihwo uko vwo yono kpahọn, o ji ni ẹgbaẹdavwọn avwanre ghanghanre. Ọnana je kẹ avwanre aghọghọ. (Se 1 Kọrẹnt 15:58.) Marco, rọ dia Italy, da ta: “Mi vwo aghọghọ rode kidie me riẹnre nẹ me vwẹ ẹgba me eje vwọ ga Jihova, ọ dia ohwo ọfa rẹ iruo mẹ sa chọrọ ẹro-o.” Ọtiọyen Franco rọ je ga vwẹ Italy je ta, ọ nẹ, “Womarẹ Baibol na vẹ emu rẹ ẹwẹn, Jihova karophiyọ avwanre ọkieje nẹ o vwo ẹguọnọ rẹ avwanre, o ji nẹ iruo avwanre ghanghanre dede nẹ avwanre se roro nẹ ẹgbaẹdavwọn avwanre fiemu-u. Ọna yen sorọ re vwo nene Ọghẹnẹ wian kugbe vwọ kẹ vwẹ aghọghọ, ọ je nẹrhẹ mi yeren omamọ akpọ.”

9. Oka rẹ oyerinkugbe vọ yen herọ uvwre rẹ Jihova vẹ Jesu, kẹ diesorọ?

⁹ E de nene ihwo re vwo ẹguọnọ kpahen wiowian, ọ nẹrhẹ e siẹkẹrẹ ayen. Ka je riẹn oka rẹ ohwo rẹ ayen hepha. Avwanre je riẹn oborẹ ayen vwọ tua vẹ obo ro se vwo te ayen obọ. Jesu nene Jihova wian ikpe buebun. Ẹguọnọ rẹ ayen vwo kpahen ohwohwo da rhe gan mamọ te ẹdia rẹ o rhe vwo emuvuọvo ro se gbowọphiyọ oyerinkugbe raye-en. Jesu dje oborẹ oyerinkugbe rayen na kpẹkpẹ te, rọ vwọ ta: “Mẹvwẹ vẹ Ọsẹ mẹ ọvuọvo.” (Jọn 10:30) Ayen vwo omamọ oyerinkugbe dẹn, ayen je nabọ wian kuẹgbe.

10. Diesorọ iruo aghwoghwo na vwo si avwanre kẹrẹ Ọghẹnẹ vẹ ihwo efa?

¹⁰ Jesu rẹ Jihova nẹ ọ sẹro rẹ idibo rọyen. Diesorọ? Ọ da nẹrhovwo nẹ: “Rere ayen sa vwọ dia ọvo, mrẹmrẹ kirobo rẹ avwanre hẹ ọvo na.” (Jọn 17:11) Avwanre nabọ vwo ẹruọ rẹ iwan iyoyovwin rẹ Ọghẹnẹ, siẹrẹ e de vwobọ vwẹ iruo aghwoghwo na, je yan nene irhi rẹ Ọghẹnẹ. Ka sa mrẹ oboresorọ ro vwo fo ra vwọ vwẹrokere, ji nene odjekẹ rọyen. Vwọba, e de sikẹrẹ Ọghẹnẹ, ko ji sikẹrẹ avwanre. (Se Jems 4:8.) Avwanre ji siẹkẹrẹ iniọvo na kidie oka rẹ ebẹnbẹn rẹ avwanre hirharokuẹ, aghọghọ ra mrẹ vẹ oborẹ avwanre vwọ tua, ọvuọvo. A wian kuẹgbe, ghọghọ kuẹgbe, ji chirakon kuẹgbe. Octavia, rọ dia Britain, da ta: “Re vwo nene Jihova wian kuẹgbe nẹrhẹ ovwẹ siẹkẹrẹ iniọvo na.” Ọ da je ta oboresorọ, kidie ọ vẹ igbeyan rọyen vwọ tua “orọnvwọn vuọvo, ayen ji nene odjekẹ vuọvo.” Vwọrẹ uyota, ọtiọyen ọ je hepha kẹ avwanre. Avwanre da mrẹ ẹgbaẹdavwọn rẹ iniọvo na rẹ ayen vwo ru ọhọre rẹ Jihova, o si avwanre kẹrẹ ayen.

11. Diesorọ avwanre che vwo sikẹrẹ Jihova vẹ iniọvo avwanre vwẹ akpọ kpokpọ na?

 ¹¹ Ẹguọnọ re vwo kpahen Ọghẹnẹ vẹ iniọvo na pha gangan asaọkiephana, jẹ ọ cha ganphiyọ vwẹ akpọ kpokpọ na. Roro kpahen iruo rọ kẹ ohwo aghọghọ re che ru ọke yena! E che dede ihwo ra rhọvwọn nẹ ushi ji yono ayen kpahen Jihova. E ji che ru akpọ na phiyọ iparadaisi. Ọnana cha kẹ avwanre aghọghọ rode ra cha vwọ wian kugbe vwẹ otọ rẹ usuon rẹ Kristi, ro che vwo ru avwanre phiyọ ihwo re gbare. Ihworakpọ eje che sikẹrẹ ohwohwo ji sikẹrẹ Jihova kpẹkpẹkpẹ, ohwo rọ vwẹ “obo ri kohwo kohwo ọkpokpọ guọnọre kẹ.”—Une Rẹ Ejiro 145:16.

12. Mavọ yen iruo aghwoghwo na vwọ dia ochọnvwe kẹ avwanre?

¹² Ofori ra vwọ sẹro rẹ oyerinkugbe avwanre vẹ Jihova. Ọ pha lọlọhọ re vwo vwo uruemu vẹ iroro rẹ akpọ na kidie Eshu yen suẹn akpọ nana, avwanre je gba-a. Ọ pha kerẹ ohwo rọ rhẹrhẹ kpo ẹbẹre rẹ ọkẹre rẹ urhie djẹ nẹ cha. Ọkẹre na bi avwanre kpo ẹbẹre ra guọnọ ra-a. Ọtiọyena, ọ guọnọ ẹgbaẹdavwọn ọgangan a ke sa rhẹrhẹ kpo ẹbẹre yena. Idjerhe vuọvo na, ọ guọnọ ẹgbaẹdavwọn ọgangan a ke sa kẹnoma kẹ ọnyẹ akpọ rẹ Eshu nana. Eriyin na, mavọ yen iruo aghwoghwo na vwọ dia ochọnvwe kẹ avwanre? Avwanre da ta ota kpahen Jihova vẹ Baibol na, jẹ avwanre tẹnroviẹ erọnvwọn ri fori, ọ diẹ e re cha guọghọ esegbuyota avwanre-e. (Filipae 4:8) Iruo aghwoghwo na bọn esegbuyota rẹ avwanre gan kidie ọ nẹrhẹ a karophiyọ ive rẹ Ọghẹnẹ kugbe irhi iyoyovwin rọyen. Ọ nẹrhẹ avwanre vwo iruemu ra guọnọre re sa sẹro avwanre vwo nẹ abọ rẹ Eshu vẹ akpọ rọyen.—Se Ẹfesọs 6:14-17.

13. Ubiẹro vọ yen oniọvo ọvo vwẹ Australia vwo ni iruo aghwoghwo na?

¹³ Avwanre sa mrẹ ochọnvwe siẹrẹ a da ghwọrọ ọke vwẹ aghwoghwo na, uyono, vẹ re vwo ruẹ erọnvwọn kẹ ihwo efa vwẹ ukoko na, kidie a rha cha mrẹ ọke vwo roro kpahen ebẹnbẹn avwanre-e. Joel, rọ dia Australia, da ta: “Iruo aghwoghwo na chọn vwẹ uko vwo vwo oniso rẹ oborẹ akpeyeren hepha. Ọ nẹrhẹ ovwẹ karophiyọ ebẹnbẹn rẹ ihwo hirharokuẹ kugbe erere re me mrẹre ọke me vwọ vwẹ iji rẹ Baibol na vwo ruiruo. Iruo aghwoghwo na nẹrhẹ mi vwo omaevwokpotọ; ọ kẹ vwẹ uphẹn rẹ me vwọ vwẹroso Jihova vẹ iniọvo mẹ.”

14. Diesorọ erhiorin rẹ avwanre vwẹ iruo aghwoghwo na vwo djephia nẹ ẹwẹn ọfuanfon rẹ Ọghẹnẹ vẹ avwanre herọ?

¹⁴ Iruo aghwoghwo na je kẹ avwanre imuẹro nẹ ẹwẹn ọfuanfon rẹ Ọghẹnẹ vẹ avwanre herọ. Kerẹ udje, vwẹ ẹro roro nẹ ọyen owian wẹn, wọ vwọ ghare ibrẹdi kẹ ihwo vwẹ ekogho wẹn. A hwosa kẹ wẹ-ẹ, jẹ igho wẹn wọ vwọ wiowian nana. Vwọba, ihwo buebun guọnọ ibrẹdi na-a, evo tobọ vwo utuoma kpahen owẹ kidie wo mu ibrẹdi vwo rhe ayen. Ọke vọ wọ cha wiowian nana te? Vwọrẹ uyota, ofu cha fobọ dje we, ọkiọvo wo che ji owian na vwo. Ẹkẹvuọvo, buebun rẹ avwanre ruiruo rẹ aghwoghwo na kukpe kukpe dede nẹ igho vẹ ọke avwanre yen e vwo ruo, ihwo vwẹ avwanre vwọ jehwẹ, ivun avwanre ji miovwo evo. Ọnana djerephia nẹ ẹwẹn ọfuanfon rẹ Ọghẹnẹ yen chọn avwanre uko.

15. Idjerhe vọ yen iruo aghwoghwo na vwo churobọ si ọhọre rẹ Ọghẹnẹ vwọ kẹ ihworakpọ?

¹⁵ Idjerhe vọ yen iruo aghwoghwo na vwo churobọ si ọhọre rẹ Jihova vwọ kẹ ihworakpọ? Ọghẹnẹ guọnọre nẹ ihwo dia bẹdẹ,  ọhọre rọyen na weneri ọke rẹ Adam vwo ru umwemwu-u. (Aizaya 55:11) Ọghẹnẹ vwo ọrhuẹrẹphiyotọ ro vwo si avwanre vwo nẹ umwemwu vẹ ughwu. Vwẹ idjerhe vọ? Jesu rhe akpọ na rhe vwẹ arhọ rọyen vwo ze izobo. A ke sa mrẹ erere nẹ izobo nana rhe, ofori nẹ e nyupho rẹ Ọghẹnẹ. Ọtiọyena, Jesu yono ihwo oborẹ Ọghẹnẹ guọnọ mie ayen, ọ da je vuẹ idibo rọyen nẹ ayen vwẹrokere. Nonẹna, avwanre de ghwoghwo ji yono ihwo kpahen oborẹ ayen vwọ dia ugbeyan rẹ Ọghẹnẹ, jẹ avwanre nene Ọghẹnẹ wian kuẹgbe vwẹ ọrhuẹrẹphiyotọ ro vwo sivwin ihwo vwo nẹ umwemwu vẹ ughwu.

16. Idjerhe vọ yen iruo aghwoghwo na vwo churobọ si iji rẹ Ọghẹnẹ re ma rho na?

¹⁶ Avwanre da vwẹ ukẹcha kẹ ihwo vwọ mrẹ idjerhe rẹ arhọ na vughe, jẹ avwanre djephia nẹ e vwo ẹguọnọ rayen vẹ Jihova, ohwo “rọ guọnọre nẹ ihwo na ejobi rhọre rere ayen rhi vwo erianriẹn rẹ uyota na.” (1 Timoti 2:4) Ọke rẹ ohwo rẹ Farisi ọvo vwọ nọ Jesu kpahen urhi rẹ Ọghẹnẹ rọ ma rho, Jesu da ta: “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi. Ọnana hẹ urhi rẹsosuọ kugbe ọ rọ marho. Ọ ro chekọ je họhọ ọnana, Guọnọ ọrivẹ wẹn kirobo wọ guọnọ oma wẹn.” (Matiu 22:37-39) Avwanre yan nene iji nana womarẹ iruo aghwoghwo na.—Se Iruo Rẹ Iyinkọn Na 10:42.

17. Ubiẹro vọ wo vwo nẹ uphẹn re vwo ghwoghwo iyẹnrẹn esiri na?

¹⁷ A mrẹ vwo dje ebruphiyọ nana-a! Jihova kẹ avwanre owian rọ kẹ avwanre aghọghọ, ro si avwanre kẹrẹ vẹ iniọvo na, rọ je sẹro oyerinkugbe rẹ avwanre vẹ ọyen. Iruo nana je kẹ avwanre uphẹn re vwo dje ẹguọnọ phia vwọ kẹ Ọghẹnẹ vẹ ihwo efa. Jihova vwo idibo buebun vwẹ akpọ na, ẹdia rẹ akpeyeren rẹ avwanre fẹnẹ ohwohwo. Ẹkẹvuọvọ avwanre davwẹngba avwanre eje vwo ghwoghwo kẹ ihwo, owenẹ avwanre ighene, emare, edafe, ivwiogbere, e ganre, yẹrẹ e vwiẹre. Avwanre rhọnvwephiyọ ota rẹ Chantel rọ dia France, rọ vwọ ta: “Ohwo rọ ma rho vwẹ odjuvwu vẹ akpọ na, Ọmemama rẹ erọnvwọn eje, Ọghẹnẹ rẹ oma vwerhan na, yen vuẹ vwẹ nẹ: ‘Yanran! Ghwoghwo! Ghwoghwo ota mẹ vwo nẹ ubiudu wẹn rhe. Me cha kẹ wẹ ẹgba mẹ, Ota mẹ, ukẹcha rẹ emekashe vẹ iniọvo wẹn, uyono rẹ ọkieje, kugbe odjekẹ vwẹ ọke ro fori.’ Ọnana uphẹn rode re vwo ru oborẹ Jihova vuẹ avwanre, ji vwo nene Ọghẹnẹ avwanre wian kugbe!”