1, 2. Te u luku san Yesesi taki a Mateyesi 24:14, da san u mu akisi useefi?

YESESI be taki, aini den lasiti dei, a bun nyunsu fu a Kownukondee be o peleiki gi ala sama (Mateyesi 24:14). Na a hii goontapu sama sabi taki a den Yehofa Kotoigi e du a wooko ya. Son sama lobi a bosikopu di wi e paati, taawan á lobi en. Son wan fu den sama di á lobi a bosikopu e lesipeki u, te den si den sani di wi e du. Ma fa u du sabi taki na a wooko di Yesesi be taki wi e du? U taki a wi e du a wooko ya, ma a gafa wi e gafa?

² A omen keliki e taki den e paati a bosikopu fu Yesesi. Ma a tv, internet, efuso te den de a keliki wawan den e peleiki. Son wan fu den, a ondoofenitoli den e kon gi aini a keliki. Taawan e si enke a peleiki den e peleiki te den e yeepi sama di de a nowtu, te den e du dataa wooko efuso leli pikin a sikoo. Ma a den sani ya Yesesi be abi a pakisei di a taki fu a peleikiwooko?

3. Te u luku san sikiifi a Mateyesi 28:19, 20, da san a den fo sani di den bakaman fu Yesesi mu du?

 ³ Yesesi be wani den bakaman fi en wakiti fu sama kon a den? Nono. Di Yesesi weki baka, a be taigi ondoo ondoo bakaman fi en taki: „Go a sama fu ala kondee, da i meke den toon mi bakaman. U mu dopu den . . . . Leli den fa den mu du ala den sani fiya di mi taigi u” (Mateyesi 28:19, 20). Neen meke, enke bakaman fu Yesesi a fo sani u mu du. U mu meke sama toon en bakaman, u mu dopu den, boiti dati u mu leli den. Ma san na a fosi sani di u mu du? U mu go a den sama. Wan ondoosukuman taki: „Ala den sama di e biibi aini Yesesi mu ’go’, a den sama winsi pe den de. Winsi den mu abaa a se efuso sitaati.”​—Mateyesi 10:7; Lukasi 10:3.

4. San a wani taki fu de wan fisiman di e kisi libisama?

⁴ San Yesesi wani den bakaman fu en du? A wani den wawan peleiki, efuso a wani den peleiki aini kulu? Wan kodo sama á poi peleiki gi „ala sama” neen meke Yesesi wani den bakaman fi en peleiki a kulu. Na a sani de Yesesi be wani taki di a taigi den disipel fi en fu den toon „fisiman di e kisi libisama”. (Leisi Mateyesi 4:18-22.) A fisiman di Yesesi be taki den bakaman fi en be o toon, a ná den fisiman di e sidon anga wan uku fu e kisi fisi. Ma a gaan seepi a be e koboloiki. A sani ya e soi taki a wan taanga wooko. A abi taa sama fanowdu fu yeepi en. Boiti dati, den be mu wooko bun anga denseefi.​—Lukasi 5:1-11.

5. San a den fo akisi di u mu piki? Saide u mu piki den akisi ya?

⁵ Efu u wani sabi sama e paati a bun nyunsu aini a ten ya da u mu piki den fo akisi ya:

• San na bosikopu di den bakaman fu Yesesi mu paati?

• Saide den mu paati a bosikopu ya?

• Fa a bosikopu mu paati?

• Pe den mu paati a bosikopu ya doo? On langa a wooko mu du?

Den piki fu den akisi ya o yeepi u fu sabi sama e du a wooko di o yeepi sama fu tan a libi. Den akisi ya o gi u taanga-sikin fu peleiki anga u hii ati.​—1 Timotiyesi 4:16.

6. Fa u du sabi taki na a bosikopu di den bakaman fu Yesesi mu paati, Yehofa Kotoigi e paati?

⁶ Leisi Lukasi 4:43. Yesesi be e paati a „bun nyunsu fu a Kownukondee”. Na a nyunsu ya a wani den bakaman fi en paati tu. Sowtu kulu sama e paati a bosikopu ya? A Yehofa Kotoigi wanwan too! Te doo den sama di á lobi u e taki a sani ya. Wan pastoo di wooko a omen kondee akisi den Kotoigi aini ala den kondee di a go san na a bosikopu di den e paati. A pastoo taki: „Den don te, bika na aseefi sani ala den taki. Den taki ’na a bun nyunsu fu a Kownukondee.’” A sani di a pastoo taki e soi taki ná don u don. Ma ai soi taki wi a tuu Kelesten bika na aseefi bosikopu wi e paati (1 Korentesama 1:10). A Wakititolen di wi e paati e bali basiya gi Gadu Kownukondee. A buku ya de aini 254 tongo. Den e doloki wan sani fu  59 miliyun Wakititolen. A sani ya e soi taki A Wakititolen e paati moo ala taa buku a goontapu.

7. Fa u du sabi taki den fesiman fu den keliki nai paati a bosikopu di Yesesi taigi Kelesten fu paati?

⁷ Den sama di e kai denseefi Kelesten, nai peleiki fu Gadu Kownukondee. Gaanse fu den e taki a Kownukondee a wan sani di de aini wan sama ati (Lukasi 17:21). Den nai leli sama taki a Kownukondee, a wan tii di Gadu sete a hemel. Den nai leli den tu taki a Yesesi na a kownu fu a Kownukondee. Pe fu den leli sama den sani ya, a te bedaki doo anga a ten di Yesesi dede wawan, den e taki fu Yesesi. Den nai leli sama taki na a Kownukondee o puu ala den fuka fu libisama. Den nai leli den tu taki neen o puu ala ogii a goontapu (Openbaring 19:11-21). A sani ya e soi taki den fesiman fu den keliki á sabi san Yesesi enke a kownu fu Gadu Kownukondee o du. Den á fusutan a bosikopu fu Yesesi, neen meke den á sabi saide den mu peleiki.

8. San wi á mu du te wi e peleiki?

⁸ Den bakaman fu Yesesi á mu peleiki fu meke moni efuso fu meke gaan moin osu. Yesesi taki: „A fu soso u fende den sani ya, da u mu gi fu soso tu” (Mateyesi 10:8). Neen meke wi á mu peleiki fu meke moni (2 Korentesama 2:17). Den bakaman fu Yesesi á mu meke sama pai den fu di den e peleiki. (Leisi Toli 20:33-35.) Winsi fa Yesesi taki a sani ya, toku den fesiman fu den keliki e piki moni fu solugu denseefi, den keliki osu fu den, anga fu pai den sama di e wooko gi den. A omen keliki fesiman kon gudu fu di den e piki moni a sama.​—Openbaring 17:4, 5.

9. Fa Yehofa Kotoigi e soi taki den e du a peleikiwooko anga den hii ati?

⁹ Yehofa Kotoigi e piki moni a den Kownukondee zaal anga den gaan komakandaa? Nono! A sama e poti moni fu holibaka gi a wooko fu den (2 Korentesama 9:7). Anga ala fa den nai piki moni fu a wooko ya, tokuso a yali di pasa a beina tu dunsu miliyun yuu den  peleiki. Den e sutudeli anga moo enke neigin miliyun sama ala mun. Winsi den nai teke moni fu a peleikiwooko, toku anga den hii ati den e koboloiki den moni fu du a wooko ya. Wan ondoosukuman taki: „A moo pelensipali wooko di Yehofa Kotoigi e du na a peleikiwooko, anga fu yeepi sama fusutan a Beibel.” A taki den Kotoigi nai ná abi fu pai pastoo, pilisite efuso taa heiheiman aini a kemeente. Efu a ná fu moni wi e peleiki, da saide wi e peleiki? Wi e du a wooko ya anga u hii ati fu di u lobi Yehofa anga taa sama. Fu di wi e du a wooko ya anga u hii ati meke a polofeititoli di sikiifi a Psalm 110:3 kon tuu. (Leisi.)

10. Fa Yesesi anga den disipel fi en be e peleiki?

¹⁰ Fa Yesesi anga den disipel fu en be e peleiki? Den be e go a den peesi pe den be sa miti sama. Wantu fu den peesi ya a sitaati anga wowoyo. Den be e go a den sama osu tu (Mateyesi 10:11; Lukasi 8:1; Toli 5:42; 20:20). Osu fu osu, a wan fu den moo bun fasi fa den be e miti ala sowtu sama.

11, 12. Te u luku den taa keliki, anga te u luku a foluku fu Yehofa san wi e si?

¹¹ Den keliki di e taki den e biibi aini Yesesi e paati a bun nyunsu enke fa Yesesi be e paati en? Moo gaanse, a den fesiman di den e pai e peleiki gi den sama fu a keliki. Den fesiman ya nai meke sama toon bakaman fu Yesesi. A meke den e meke moiti fu den sama fu a keliki, á fika a keliki. Son leisi, den e gi den sama fu a keliki taanga-sikin fu den peleiki. Aini a yali 2001, a edeman fu Lomusu keliki di den e kai John Paul II sikiifi aini wan biifi taki den kelikiman mu peleiki. A taki den mu si a peleikiwooko enke fa Pawlesi be e si en. Pawlesi be taki: „Heelu fu mi efu mi á peleiki.” A edeman taki a ná den fesiman wawan mu peleiki, ma na ala den sama fu a keliki mu du a wooko ya. A wantu sama fu a keliki namo du a sani ya.

¹² Ma fa a de anga Yehofa Kotoigi? A den wawan e peleiki taki Yesesi bigin tii enke Kownu fanafu 1914. Den e aliki Yesesi neen meke den e si a peleikiwooko enke a moo pelensipali sani (Malikisi 13:10). Wan buku e taki Yehofa Kotoigi e si a peleikiwooko enke wan pelensipali sani. A taki te den Kotoigi miti sama di angii e kii, sama di booko-saka anga siki sama, den e meke moiti fu yeepi den. Ma den nai feegete taki a moo pelensipali wooko fu den a fu wasikoi sama taki a kaba e kon anga fu soi den fa den sa tan a libi (Pillars of Faith American Congregations and Their Partners). Yehofa Kotoigi e paati a bosikopu de ete. Den e waka a Yesesi anga den disipel fi en baka tu.

13. Pe a bosikopu ya mu paati doo?

¹³ Yesesi taki den bakaman fi en be o peleiki a bun nyunsu „na a hii goontapu”. A taigi den fu den meke sama fu „ala kondee” toon en bakaman (Mateyesi 24:14; 28:19, 20). A sani ya e soi taki na a hii goontapu a bun nyunsu mu paati.

14, 15. San e soi taki a den Kotoigi e du san Yesesi be taki? (Luku a fowtow na a bigin.)

 ¹⁴ A Yehofa Kotoigi wawan e du a sani di Yesesi be taki. Di a be taki a bun nyunsu o paati na a hii goontapu. Saide u sa taki a sani ya? Aini Ameekan a wan sani fu 600.000 keliki fesiman namo de. Ma aini a kondee ya a wan sani fu 1.200.000 Yehofa Kotoigi de di e peleiki a bun nyunsu. A hii goontapu a wan sani fu 400.000 pastoo fu a Lomusu biibi de, ma a moo enke 8 miliyun Yehofa Kotoigi de di e paati a bun nyunsu aini 240 kondee. Den sani ya e soi taki Yehofa Kotoigi e paati a bun nyunsu a hii goontapu. A sani ya e gi Yehofa gaandi!​—Psalm 34:1; 51:15.

¹⁵ Wi enke Yehofa Kotoigi wani paati a bun nyunsu gi ala sama fosi a kaba doo. U doloki omen buku anga taa sani fu du a wooko ya. U meke pampila tu fu kai sama fu kon membee a dede fu Yesesi anga u. U doloki pampila fu kai sama kon a den konkelesi fu u tu. Aini moo enke 700 tongo wi e meke den sani. A yali di pasa a wan sani fu 4500 miliyun buku anga taa sani u meke di e taki fu Beibel. U doloki moo enke 200 miliyun fu a Nyun-Grontapuvertaling aini moo enke 130 tongo. A website fu u de aini moo enke 750 tongo. A Yehofa Kotoigi wawan e du den sani ya.

16. Fa u du sabi taki a Yehofa Kotoigi abi a yeye fu Gadu?

¹⁶ On langa a wooko mu du? Yesesi taki a bun nyunsu o peleiki te enke a kaba doo. A di wi enke Yehofa Kotoigi abi a santa yeye fu Yehofa meke u man du a wooko aini den lasiti dei ya (Toli 1:8; 1 Peitilisi 4:14). Son keliki e taki den abi a santa yeye, ma den man du a wooko di Yehofa Kotoigi e du aini den lasiti dei ya? Son wan fu den puubei fu peleiki enke fa Yehofa Kotoigi e peleiki, ma den á poi. Taawan wani peleiki, ma a wan pisi ten namo. Kande son wan e peleiki osu fu osu, ma a ná a bun nyunsu fu a Kownukondee den e peleiki. Den sani de e soi taki den nai du a wooko di Yesesi be du.

17, 18. (a) Fa u du sabi taki a Yehofa Kotoigi e paati a bun nyunsu fu a Kownukondee? (b) San e yeepi u fu du a wooko ya?

¹⁷ Sama e peleiki a bun nyunsu tuutuu? A Yehofa Kotoigi wawan! Fa u du sabi? Bika wi e paati a bosikopu di Yesesi be taki, dati na a bun nyunsu fu a Kownukondee. Wi e go suku sama fu peleiki gi den, bika a dati Yesesi be e du. Wi e peleiki fu di u lobi Yehofa anga taa sama. Wi e paati a bun nyunsu a hii goontapu gi ala sama aini omen tongo. Wi o peleiki a bun nyunsu fu a Kownukondee te enke a kaba doo!

¹⁸ Ai bigi gi u fu si a gaan wooko di a foluku fu Gadu e du aini den lasiti dei ya. Ma san e yeepi u fu peleiki a hii goontapu? A apostel Pawlesi be taki: „A Gadu na a sama di e gi u kaakiti. Ai meke u angii fu du sani di e gi en piisii” (Filipisama 2:13). Meke u begi Yehofa fu a tan gi wi a kaakiti di wi abi fanowdu fu du ala san u man fu paati a bun nyunsu!​—2 Timotiyesi 4:5.