1, 2. ¿Kasa wasakirüinjatka anain sutuma tü sümakat Mateo 24:14?

NÜKÜJATÜJÜLIA Jesuu sünain süküjünüinjatüin tü pütchi anasükat süchiki Nuluwataaya Maleiwa sainküin mmakat süpüshuaʼa maaʼutpünaa yaa (Mat. 24:14). Eʼnnaajünüshii waya sainküin mmakat sünain waküjüliin pütchi. Watta naalii wayuu kamalainkana amüin tü pütchi waküjakat otta eeshii na ayouktakana shia. Kojutüpejeʼe waya sümüin wayuu sutuma tia pütchi waküjakat. Wayaʼala neʼe wayakana aaʼinrakana tü nuluwataakalü anain Jesuu. ¿Jamüsü watüjaaka saaʼu shiimain tia?

² Watta naalii wayuu suluʼukana waneeirua iküleesia aaʼinrakana tü nuluwataakalü anain Jesuu naküjainruʼu. Nekirajüle suluʼu tü iküleesiakat, suluʼupünaa telewisoot jee Internet shiale, aküjüshii naya pütchi naküjainruʼu. Eeshii na aküjakana pütchi naashin süka nakuentajüin jamüin nakuwaʼipa süpüla neʼraajüin Jesuu. Eeshii joo na aküjakana pütchi nüchiki Maleiwa naashin nakaaliinjale na müliakana, eeshii na tottootkana otta perümeera akaaliinjaka na ayuuikana, akaʼaya neʼe na profesootkana. ¿Shiachejeʼe sukuwaʼipainjatka tia naashin Jesuu?

3. ¿Jarat tü pienchisükat kasa naaʼinrüinjatka na nikirajüinkana Jesuu saashin Mateo 28:19, 20?

 ³ Nuluwataain Jesuu na nikirajüinkana süpüla noʼunüinjanain sünain nekirajüin wayuu, müshijeseʼe nümüin: «Juʼuna jumaala sainküin mmakat süpüshua [...]. Jikirajeena naya süpüla nayainjanain na tekirajüinkana maa aka jiakana. Je juwoutisaajeena naya [...]. Jikirajeena naya sünain tü taluwataapüʼükat anain jia» (Mat. 28:19, 20). Na nikirajüinkana Jesuu, nekirajüinjana na wayuukana jee nawoutisaajüinjana naya. Süpülapünaa tia, acheküshii noʼunüinjanain eere na wayuukana. Jaʼitasü pejechoin jee wattain wayuu noulia, oʼunajanaʼaya neʼe naya waneepia naashin wanee wayuu ekirajaai sünain tü Wiwüliakat (Mat. 10:7; Luc. 10:3).

4. ¿Kasa choʼujaaka süpüla wokotchojüinjatüin wayuu?

⁴ Waneeshire wayuu sünain aküjaa pütchi, nnojoleerü nuuntüin nüküjüin pütchi sümüin wayuu süpüshuaʼa sainküin mmakat. Nuluwataainjeseʼe Jesuu na nikirajüinkana sünain naküjüinjanain pütchi sümaa kottüinjanain naya. Nüküjüin tia namüin wanaa sümaa nümüin: «Okotchajüinjana jia wayuu tamüin» (paashajeʼera Mateo 4:18-22). Naashin Jesuu, kottüinjana na nikirajüinkana sünain aaʼinraa tia maʼaka naaʼin na wayuu kojuyakana sünain ejimejaa, paaʼinwainjana naya (Luc. 5:1-11).

5. ¿Jarat tü pienchisükat pütchi wasouktüinjatka eʼipajee? ¿Jamüshii wasouktüinjanaka shiʼipajee?

⁵ Watüjaweere saaʼu jaraliin na aküjakana pütchi süchiki Nuluwataaya Maleiwa, acheküshii wasouktüin shiʼipajee asakiraakat tüü:

• ¿Kasa naküjüinjatka achiki na nikirajüinkana Jesuu?

• ¿Kasa naküjaka aaʼujee pütchi?

• ¿Jamüinjatü sukuwaʼipa natuma?

• ¿Jalamüinjana aküjüin pütchi? ¿Joujeena nojoʼlooka suulia?

Wasouktapa shiʼipajee tia, watüjaajeena aaʼu jaraliin na aküjakana pütchi, atütülaa meerüjaʼa waaʼin sünain aküjaa pütchi sutuma tia (1 Tim. 4:16).

6. ¿Jamüsü watüjaaka saaʼu sünain nayain na aküjüliikana pütchi aaʼinraka tü nuluwataakalü anain Jesuu?

⁶ (Paashajeʼera Lucas 4:43). Nüküjüin Jesuu tü pütchi anasükat süchiki Nuluwataaya Maleiwa, ayatüinjatia naaʼinrüin tia na nikirajüinkana. ¿Jaralii aaʼinraka tia maaʼulu yaa? Naya na aküjüliikana pütchi nüchiki Jeʼwaa. Natüjaa aaʼu tia na wayuu mamalainkana amüin tü pütchi wekirajakat. Anuu nünüiki wanee wawala nüchiki wanee sacerdoote: «Eejachi wanee sacerdoote kepiapuʼukai suluʼu wainma mma, ‹¿kasa wayuu jüküjaka achiki?› nümawai amüinchii na aküjüliikana pütchi. ‹Shia tü pütchi anasükat süchiki Nuluwataaya Maleiwa, maʼwaishii naya malajüshiikana› nümaka chi sacerdootekai. Nnojotsü nütüjaain aaʼu chia sacerdootekai paaʼinwain waya süka wayain na anoujashii shiimainkana», nümaka chi wawalakai (1 Cor. 1:10). Rewiisütakat tüü, shia saashajaaka achiki Nuluwataaya Maleiwa. Tü sünüliakat müsü mayaa: Aapiria Wayuu. Aküjüsü süchiki Nuluwataaya Jeʼwaa. Eesü shia suluʼu 254 anüikii, eʼinprimiijünüsü 59 miyoone rewiisüta kashiwai. Tü rewiisütakat Aapiria Wayuu, shia wainmaleeka suluʼu mmakat süpüshuaʼa.

7. ¿Jamüsü watüjaaka saaʼu nnojoluin nekirajüin süchiki Nuluwataaya Maleiwa na nekiipüʼükana na anoujakana nünain Jesuu naashin?

⁷ Na nekiipüʼükana na anoujakana nünain Jesuu naashin, nnojoishii naya aküjüin pütchi süchiki Nuluwataaya Maleiwa (paashajeʼera «Pütchi pütüjaainjatka aaʼu»). Shiasejeʼe naashajaale süchiki tia, «yaasüsaʼa suluʼu waaʼin tü Nuluwataayakat Maleiwa», müshii neʼe (Luc. 17:20, 21). Nnojotsü nekirajüin wayuu sünain chain iipünaa tü Nuluwataayakat Maleiwa jee niain Jesuu chi Aluwataakai saaʼu. Aashajaashii  neʼe nüchiki Jesuu sükalioʼu tü miʼiraa aainjünakat tisienpüroʼu otta Semana Santa. Nnojoishii naya ekirajüin sünain shiainjatüin Nuluwataaya Maleiwa ajaʼlajeʼerüinjatka tü kasa mojusü eekat Mmapaʼa (Alat. Map. 19:11-21). Nnojotsü natüjaain aaʼu tü naaʼinrajatkat Jesuu sükajee Nuluwataaya Maleiwa. Nnojotsü natüjaain aaʼu kasain wayuu tü nikirajakalü anain Jesuu, müshiijeseʼe nnojoliin nayaawatüin aaʼu jamüin naküjüinjatka tia pütchikat.

8. ¿Kasa nnojoluinjatka kachiiruain waaʼin saaʼu waküjüin pütchi?

⁸ Na nikirajüinkana Jesuu, nnojoishii aküjüinjanain pütchi süpüla nakanajüinjanain nneerü jee süpüla nakumajirüinjanain piichi miyoʼuyuu. Anuu nünüiki Jesuu namüin na nikirajüinkana: «Saaʼu nnojolüin juwalaajüshin tamüin süpüla juuntüin jaaʼinrüinjatüin tü anasükat, anakaja müleka nnojorule jüchuntüin awalaajünaa saaʼu tü kasa anasü jaaʼinrakat sümüin wayuu» (Mat. 10:8). Nnojoishii waya aküjüinjanain pütchi saaʼu nneerü (2 Cor. 2:17). Na nikirajüinkana Jesuu, nnojoishii achuntüinjanain awalaajünaa saaʼu naküjüin pütchi (paashajeʼera Aluwataaushikana 20:33-35). Mayaapejeʼe lotuin nünüiki Jesuu sünain nnojoluinjatüin suchuntünüin nneerü, ayatsia achuntünüin nneerü suluʼu tü iküleesia nnojotkat shiimain süpüla anainjatüin tü iküleesiakat, süpüla nawalaajüin na nekiipüʼükana jee na aʼyataakana namüin. Sutuma naaʼinrüin tia, washinnuushii na shikiipüʼükana tü iküleesia nnojotkat shiimain (Alat. Map. 17:4, 5).

9. ¿Jamüsü watüjaaka saaʼu sünain nnojoluin shiain kachiiruain naaʼin tü nneetkat na aküjüliikana pütchi?

⁹ Na aküjüliikana pütchi nüchiki Jeʼwaa, nnojoishii achuntüin nneerü suluʼu tü Piichi Outkajaaleekat jee sünain tü outkajawaakalüirua miyoʼu. Tü nneerü choʼujaakat süpüla nekeraajüin tü naʼyataainkat nümüin Jeʼwaa shia tü nasülajakat na wayuukana süka naaʼin namüiwaʼa (2 Cor. 9:7). Juyakat tiainka, watta saalii oora nalatiraka sünain aküjaa pütchi, eesü maʼaka 2.000 miyoone. Kashiwai, alatüsü suulia 9 miyoone wayuu nekirajaka sünain tü Wiwüliakat. Naaʼinrüin tia, eerejeʼe nnojoluin nawalaajünüin saaʼu nekirajüin wayuu, naaʼinrüin tia süka tü nanneetsekat. «Tü naʼyataainkat na aküjüliikana pütchi shia aküjaa pütchi jee ekirajaa wayuu», müshi wanee ekirajüi. Naashin chia wayuukai, nnojoishii akataajüin nneerü sünain awalaajaa wayuu, mekiipüʼüin naya. Süka nnojoliin wawalaajünüin, ¿kasakaʼa waküjüin aaʼujee pütchi? Aküjüshii waya pütchi süka alin  wapüla Jeʼwaa jee na wayuukana. Ekeraajüsü tü sümakat Salmo 110:3 (paashajeʼera).

10. ¿Jamüsü sukuwaʼipa nüküjia pütchi Jesuu namaa na nikirajüinkana?

¹⁰ ¿Jamüsü sukuwaʼipa nüküjia pütchi Jesuu namaa na nikirajüinkana? Oʼunüshii naya eere tü wayuukalüirua, maʼaka saaʼin kaayeruʼupünaa, metkaaraluʼupünaa jee sainküinpünaa piichi (Mat. 10:11, TNM; Luc. 8:1; Aluw. 5:42; 20:20). Aküjüshii naya pütchi sümüin wayuu maʼleekalia süka paaʼinwain naya sünain aküjaa pütchi sainküin piichi.

11, 12. ¿Jamüsü naatajatka sukuwaʼipa naküjia pütchi na aküjüliikana pütchi noulia na anoujakana nünain Jesuu naashin?

¹¹ Na wayuu anoujakana nünain Jesuu naashin, nnojoishii naya aküjüin pütchi süchiki Nuluwataaya Maleiwa. Aapüshii neʼe nneerü namüin na nekiipüʼükana süpüla naashajaainjanain suluʼu tü iküleesiakat. Nnojoliipejeʼe nekirajüin na wayuukana süpüla naküjüinjanain pütchi maʼaka saaʼin nutuma Jesuu. Shiajaʼa neʼe keeʼireeka naaʼin nnojoluin sükatalaain wayuu noulia. «Acheküshii jüküjüinjanain pütchi», eeshii namawaire soʼu wanee kaʼi na shikiipüʼükana iküleesia. Anuu nünüiki chi papa Juan Pablo II münakai soʼu juyakat 2001: «Aküjüinjana jia pütchi maʼaka naaʼin Pablo wanaa sümaa nümüin: ‹Aishaʼajaa, ¿jamataaleerüje takuaippa müleka nnojoire taküjüin nüchiki Kürisüto›». Naashin chi Papakai, nnojoishii neʼe aküjüinjanain pütchi na shikiipüʼükana tü iküleesiakat, aküjüinjana pütchi napüshuaʼa na oʼunakana suluʼu. Eeyaai neʼe jeʼrashiin na aaʼinrakana tia.

¹² Naya neʼe namüiwaʼa na aküjüliikana pütchi nüchiki Jeʼwaa, aküjakana sünain nuʼttüin Jesuu sünain aluwatawaa soʼujee 1914. Tü naʼyataakat maʼin anain shia aküjaa pütchi maʼaka naaʼin Jesuu (Mar. 13:10). Shia naaʼinmaaka maʼin aküjaa pütchi na aküjüliikana pütchi saashin wanee karaloukta aashajaaka süchiki tü anoujasükalüirua. Mayaapejeʼe nakaaliinjain na wayuu jamüsitkana jee na ayuuikana, shia naaʼinmaaka maʼin tü aküjaakat pütchi süchiki sajaʼttinnüinjatüin süpüshuaʼa tü kasa mojusü eekat mmapaʼa jee tü waaʼinrajatkat süpüla woʼttaainjanain süchikumüin tia. Wayakana aküjüliikana pütchi, ayatüshii waya aküjüin pütchi maʼaka saaʼin nutuma Jesuu namaa na nikirajüinkana.

13. ¿Jalamüinjana aküjüin pütchi na aküjüliikana pütchi?

¹³ Naashin Jesuu, aküjüinjana pütchi otta ekirajüinjana süchiki Nuluwataaya Maleiwa na nikirajüinkana, naaʼinrüinjatü tia sainküin mmakat süpüshuaʼa. Nuluwataain naya süpüla nekirajüinjatüin wayuu süpüshuaʼa (Mat. 24:14; 28:19, 20). Na aküjüliikana pütchi, wattakualiinjana naya sünain aküjaa pütchi sainküin mmakat süpüshuaʼa (paashajeʼera «Pütchi pütüjaainjatka aaʼu»).

14, 15. ¿Jamüsü watüjaaka saaʼu sünain shikeraajüin nanain na aküjüliikana pütchi tü nümakat Jesuu? (Piirakaa sümüin tü ayaakuaa suluʼukat süpana 13).

¹⁴ Naashin Jesuu, aküjünüinjatü süchiki Nuluwataaya Maleiwa sainküin mmakat süpüshuaʼa. ¿Jamüsü watüjaaka saaʼu shikeraajüin nanain na aküjüliikana pütchi tü nümakat Jesuu? Chaa Estados Unidos, watta naalii nekiipüʼü na anoujakana nünain Jesuu naashin, eeshii maʼaka 600.000. Wattaleepajaʼa naalii na aküjüliikana pütchi chakana chayaa, eeshii maʼaka 1.200.000 aküjakana süchiki Nuluwataaya Maleiwa. Sainküin mmakat süpüshuaʼa eeshii maʼaka 400.000 sacerdoote katoolika, wainmaleepajaʼa na aküjüliikana pütchi, alatüshii suulia 8 miyoone naya, aküjüshii naya pütchi suluʼu 240 mma. Aküjüshii pütchi sainküin Mmakat süpüshuaʼa na aküjüliikana pütchi. Kojutüshi jee aʼwaajünüshi Jeʼwaa sutuma tia (Sal. 34:1; 51:15).

 ¹⁵ Tü wasaʼwateekat amüin wayakana aküjüliikana pütchi nüchiki Jeʼwaa, shia waküjüin pütchi sümüin wayuu süpüshuaʼa süpülapünaa sajaʼttüin kasakat süpüshuaʼa. Süpüla wountüin tia, watta saalii tü karaloukta wakumajakat suluʼu wainma anüikii, waainjain tü rewiisütakat, tü karalouktachenkat jee tü ounejaayakat. Walatirüin tia suluʼu 700 anüikii jee nnojoishii waya achekajüin saaʼu tia. Juyakat tiainka, eʼinpürimiijünüsü 4.500 miyoone karalouktairua. Weʼinpürimiijüirü Traducción del Nuevo Mundo de las Santas Escrituras, alatüsü suulia 200 miyoone jee alatinnüsü shia suluʼu 130 anüikii. Suluʼu tü paajinakat jw.org, alatüsü suulia 750 anüikii süshajünaka aluʼu pütchi. Wayakana aküjüliikana pütchi, wayaʼala neʼe aaʼinraka tia kasa anashaatakat.

16. ¿Jamüsü watüjaaka saaʼu eein chi naaʼinkai Maleiwa naaʼu na aküjüliikana pütchi?

¹⁶ ¿Joujeena wojoʼlooka suulia aküjaa pütchi? Ojoʼloojeena waya süntapa tü kaʼi sajaʼttüinjatkalü oʼu kasakat süpüshuaʼa (Mat. 24:14). Ayatüshii waya aküjüin pütchi maaʼulu yaa sajaʼttiamüin kasakat süpüshuaʼa süka eein waaʼu chi naaʼinkai Maleiwa (Aluw. 1:8; 1 Ped. 4:14). Eeshii na suluʼujeejanakana waneeirua iküleesia «eeshi chi naaʼinkai Maleiwa waaʼu» makana. Nooʼulaküirü naküjüin pütchi, nnojoliipejeʼe naya kakaliain sünain tia. Nnojotsü nountüin tia maʼaka naaʼin na aküjüliikana pütchi. Eeshii na aküjakana pütchi soʼu jeʼra kaʼi neʼe. Eeshii na aküjakana pütchi sainküin piichi, nnojotpejeʼe nekirajüin süchiki tü Nuluwataayakat Maleiwa. Watüjaaitpa aaʼu nnojoluin naaʼinrüin naya wayuukana tü nuluwataakalü anain Jesuu.

17, 18. (1) ¿Jamüsü watüjaaka saaʼu nayain na aküjüliikana pütchi aküjüin süchiki Nuluwataaya Maleiwa? (2) ¿Kasa wountaka atuma tia aʼyatawaakat?

¹⁷ ¿Jaralii na aküjakana süchiki Nuluwataaya Maleiwa maaʼulu yaa? Naya na aküjüliikana pütchi nüchiki Jeʼwaa. Makaʼa watüjaain saaʼu tia shia süka waküjüin tü pütchi shiimainsükat süchiki Nuluwataaya Maleiwa. Tü wanee shia süka waaʼinrüin tü nümakat Jesuu, woʼunüin eere na wayuukana. Tü wanee shia süka alin wapüla Jeʼwaa jee na wayuukana. Tü wanee shia süka wattakualüin tü pütchi waküjakat, waküjüin sümüin wayuu süpüshuaʼa. Otta tü wanee shia süka ayateenain waküjüin pütchi süntaleepa tü kaʼi sajaʼttajatkalü oʼu kasakat süpüshuaʼa.

¹⁸ Anashaatasü maʼin süka watüjaain saaʼu süpüshuaʼa tü kasa saaʼinrakat tü nupueulosekat Jeʼwaa maaʼulu yaa süpüla naküjüin pütchi süchiki nuluwataaya Maleiwa. Nükaaliinjain waya chi naaʼinkai Maleiwa süpüla keeʼireeinjatüin waaʼin waaʼinrüin tia otta süpüla wountüinjatüin shia (Filip. 2:13). Wachuntüin nümüin Jeʼwaa naapüinjachin wamüin chi nütchinkai süpüla ayatüinjanain waküjüin maʼin pütchi (2 Tim. 4:5, TNM).