«ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ»
«ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ ហើយជ្រមុជទឹកឲ្យពួកគេ . . . ហើយបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា»។—ម៉ាថាយ ២៨:១៩, ២០
ចម្រៀងលេខ: ១៤១, ១៧
១, ២. តើពាក្យរបស់លោកយេស៊ូនៅម៉ាថាយ ២៤:១៤ នាំឲ្យមានសំណួរអ្វីខ្លះ?
លោកយេស៊ូបានប្រកាសទុកជាមុនថានៅគ្រាចុងក្រោយបង្អស់ ដំណឹងល្អអំពីរាជាណាចក្រព្រះនឹងត្រូវផ្សព្វផ្សាយដល់មនុស្សទាំងអស់។ (ម៉ាថាយ ២៤:១៤) ក្នុងនាមជាសាក្សីព្រះយេហូវ៉ា យើងបានត្រូវគេស្គាល់នៅទូទាំងពិភពលោកដោយកិច្ចការផ្សព្វផ្សាយរបស់យើង។ អ្នកខ្លះចូលចិត្ដដំណឹងដែលយើងផ្សាយ តែអ្នកខ្លះទៀតមិនចូលចិត្ដទេ។ ប៉ុន្ដែ សូម្បីតែអ្នកខ្លះដែលមិនចូលចិត្ដដំណឹងរបស់យើង នៅតែគោរពយើងចំពោះកិច្ចការរបស់យើង។ យើងអះអាងថាយើងគឺជាអ្នកដែលកំពុងធ្វើកិច្ចការដែលលោកយេស៊ូបានប្រកាសទុកជាមុន។ តើយើងមានសិទ្ធិនិយាយដូច្នេះឬទេ? តើយើងអាចប្រាកដយ៉ាងណាថាកិច្ចការផ្សព្វផ្សាយរបស់យើងគឺជាកិច្ចការដែលលោកយេស៊ូបានប្រកាសទុកជាមុន?
២ សាសនាជាច្រើនអះអាងថាពួកគេកំពុងផ្សព្វផ្សាយដំណឹងដែលលោកយេស៊ូបានផ្សាយ។ ប៉ុន្ដែ កិច្ចការផ្សព្វផ្សាយរបស់ពួកគេគឺគ្រាន់តែថ្លែងសុន្ទរកថានៅឯវិហារ តាមទូរទស្សន៍ ឬតាមអ៊ីនធឺណិត ឬក៏ពួកគេប្រហែលជាគ្រាន់តែប្រាប់អ្នកឯទៀតអំពីរបៀបដែលពួកគេបានរៀនអំពីលោកយេស៊ូ។ អ្នកខ្លះទៀតយល់ថាការជួយមនុស្សដែលមានសេចក្ដីត្រូវការ ឬការធ្វើការងារសប្បុរសធម៌ជាគ្រូពេទ្យ គិលានុបដ្ឋាក ឬគ្រូបង្រៀនគឺជារបៀបផ្សព្វផ្សាយរបស់ពួកគេ។ ប៉ុន្ដែ តើលោកយេស៊ូចង់សំដៅលើសកម្មភាពទាំងនេះពេលដែលលោកមានប្រសាសន៍អំពីកិច្ចការផ្សព្វផ្សាយឬទេ?
៣. យោងទៅតាមម៉ាថាយ ២៨:១៩,២០ តើអ្វីបួនយ៉ាងដែលអ្នកកាន់តាមលោកយេស៊ូត្រូវធ្វើ គឺជាអ្វី?
៣ តើលោកយេស៊ូចង់ឲ្យអ្នកកាន់តាមលោករង់ចាំមនុស្សមកជួបពួកគេឬ? មិនមែនទេ! ក្រោយពីលោកយេស៊ូបានត្រូវប្រោសឲ្យរស់ឡើងវិញ លោកបានប្រាប់អ្នកកាន់តាមលោករាប់រយនាក់ថា៖«ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ ហើយជ្រមុជទឹកឲ្យពួកគេ . . . ហើយបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា»។ (ម៉ាថាយ ២៨:១៩, ២០) ដូច្នេះ ក្នុងនាមជាអ្នកកាន់តាមលោកយេស៊ូ យើងត្រូវធ្វើអ្វីបួនយ៉ាង។ យើងត្រូវជួយមនុស្សឲ្យក្លាយទៅជាអ្នកកាន់តាមលោក ជ្រមុជទឹកឲ្យពួកគេ និងបង្រៀនពួកគេ។ ប៉ុន្ដែ មុនដំបូងយើងត្រូវទៅជួបមនុស្ស។ បណ្ឌិតខាងគម្ពីរម្នាក់បានពន្យល់ថា៖ «ការ‹ទៅ›គឺជាភារកិច្ចរបស់អ្នកជឿម្នាក់ៗ ទោះជាគាត់ត្រូវឆ្លងកាត់ផ្លូវ ឬឆ្លងកាត់សមុទ្រក៏ដោយ»។—ម៉ាថាយ ១០:៧; លូកា ១០:៣
៤. តើការក្លាយទៅជា«អ្នកនេសាទមនុស្ស»ជាប់ទាក់ទងនឹងអ្វី?
៤ តើលោកយេស៊ូតម្រូវអ្វីពីពួកអ្នកកាន់តាមលោក? តើលោកចង់ឲ្យពួកគេផ្សព្វផ្សាយដោយខ្លួនឯង ឬតើលោកចង់ឲ្យពួកគេមានរបៀបរៀបចំជាក្រុមមួយ? ដោយសារបុគ្គលម្នាក់មិនអាចផ្សព្វផ្សាយដល់«គ្រប់ជាតិសាសន៍»បាន នោះអ្នកកាន់តាមលោកនឹងត្រូវមានការរៀបចំជាក្រុមមួយ។ លោកយេស៊ូចង់បញ្ជាក់អំពីការរៀបចំជាក្រុមនេះ ពេលដែលលោកអញ្ជើញអ្នកកាន់តាមលោកឲ្យក្លាយទៅជា«អ្នកនេសាទមនុស្ស»។ (សូមអាន ម៉ាថាយ ៤:១៨-២២) លោកយេស៊ូមិនបានសំដៅទៅលើអ្នកនេសាទម្នាក់ដែលប្រើខ្សែសន្ទូចនិងនុយផ្ទាល់ខ្លួន ហើយរង់ចាំត្រីមកស៊ីនុយឡើយ។ ផ្ទុយទៅវិញ ការនេសាទដែលលោកយេស៊ូបានលើកឡើងនោះគឺជាប់ទាក់ទងនឹងការប្រើសំណាញ់។ ការនេសាទប្រភេទនេះតម្រូវឲ្យខំប្រឹង រៀបចំ និងមនុស្សជាច្រើននាក់សហការគ្នា។—លូកា ៥:១-១១
៥. តើសំណួរបួនយ៉ាងអ្វីត្រូវឆ្លើយជាចាំបាច់ ហើយហេតុអ្វី?
៥ ដើម្បីដឹងថាអ្នកណាកំពុងផ្សព្វផ្សាយដំណឹងល្អនៅសព្វថ្ងៃនេះ យើងត្រូវឆ្លើយសំណួរទាំងបួននេះ៖
-
តើអ្នកកាន់តាមលោកយេស៊ូគួរផ្សព្វផ្សាយដំណឹងអ្វី?
-
តើពួកគេគួរមានបំណងចិត្ដបែបណា?
-
តើពួកគេគួរប្រើវិធីសាស្ដ្រអ្វីខ្លះ?
-
តើកិច្ចការនេះគួរមានទំហំប៉ុណ្ណា ហើយតើកិច្ចការនេះគួរបន្ដសម្រាប់រយៈពេលប៉ុន្មាន?
ចម្លើយចំពោះសំណួរទាំងនេះនឹងជួយយើងឲ្យស្គាល់ថាអ្នកណាកំពុងធ្វើកិច្ចការនេះដែលសង្គ្រោះជីវិត ហើយក៏នឹងធ្វើឲ្យយើងមានបំណងចិត្ដកាន់តែខ្លាំងថែមទៀតដើម្បីបន្ដផ្សព្វផ្សាយ។—ធីម៉ូថេទី១ ៤:១៦
តើគួរផ្សព្វផ្សាយដំណឹងអ្វី?
៦. ហេតុអ្វីអ្នកអាចមានទំនុកចិត្ដថាសាក្សីព្រះយេហូវ៉ាកំពុងផ្សព្វផ្សាយដំណឹងដែលត្រឹមត្រូវ?
៦ សូមអាន លូកា ៤:៤៣។ លោកយេស៊ូបានផ្សព្វផ្សាយ«ដំណឹងល្អអំពីរាជាណាចក្ររបស់ព្រះ» ហើយលោកចង់ឲ្យអ្នកកាន់តាមលោកធ្វើដូច្នេះដែរ។ តើក្រុមមនុស្សមួយណាកំពុងផ្សព្វផ្សាយដំណឹងនេះដល់មនុស្សទាំងអស់? គឺមានតែសាក្សីព្រះយេហូវ៉ាប៉ុណ្ណោះ! សូម្បីតែមនុស្សខ្លះដែលមិនចូលចិត្ដយើងបានទទួលស្គាល់ដូច្នេះដែរ។ ជាឧទាហរណ៍ សូមកត់សម្គាល់អ្វីដែលបូជាចារ្យម្នាក់ដែលជាសាសនទូតដែលធ្លាប់រស់នៅប្រទេសជាច្រើនបានប្រាប់សាក្សីព្រះយេហូវ៉ាម្នាក់។ នៅប្រទេសនីមួយៗ បូជាចារ្យនោះបានសួរសាក្សីព្រះយេហូវ៉ាអំពីដំណឹងដែលពួកគាត់កំពុងផ្សព្វផ្សាយ។ បូជាចារ្យនោះបាននិយាយថា៖«សាក្សីព្រះយេហូវ៉ាទាំងអស់នេះសុទ្ធតែជាមនុស្សល្ងង់ខ្លៅខ្លាំងដល់ម៉្លេះបានជាពួកគេឆ្លើយដូចគ្នាថា៖ ‹ដំណឹងល្អអំពីរាជាណាចក្រព្រះ›»។ ពាក្យសម្ដីរបស់បូជាចារ្យនោះបង្ហាញថាយើងមិនមែនជាមនុស្សល្ងង់ខ្លៅទេ តែថាយើងមានសាមគ្គីភាពជាគ្រិស្ដសាសនិកពិត។ (កូរិនថូសទី១ ១:១០) រាជាណាចក្ររបស់ព្រះក៏ជាប្រធានបទដ៏សំខាន់នៃទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា។ ទស្សនាវដ្ដីនេះមានជាង២៥៤ភាសា ហើយលេខនីមួយៗនៃទស្សនាវដ្ដីនេះបានត្រូវបោះពុម្ពជាមធ្យមជិត៥៩លានក្បាល ដែលធ្វើឲ្យទស្សនាវដ្ដីនេះបានត្រូវចែកចាយច្រើនជាងគេបំផុតលើពិភពលោក!
មានតែសាក្សីព្រះយេហូវ៉ាប៉ុណ្ណោះដែលកំពុងផ្សព្វផ្សាយដំណឹងល្អអំពីរាជាណាចក្ររបស់ព្រះ
៧. តើយើងដឹងយ៉ាងដូចម្ដេចថាបព្វជិតនៃពិភពគ្រិស្ដសាសនាមិនផ្សព្វផ្សាយដំណឹងដែលត្រឹមត្រូវ?
៧ បព្វជិតនៃពិភពគ្រិស្ដសាសនាមិនផ្សព្វផ្សាយអំពីរាជាណាចក្ររបស់ព្រះឡើយ។ បើពួកគេនិយាយអំពីរាជាណាចក្រព្រះ ពួកគេជាច្រើននាក់និយាយថារាជាណាចក្រនោះគឺជាអារម្មណ៍មួយដែលនៅក្នុងចិត្ដរបស់បុគ្គលម្នាក់។ (លូកា ១៧:២១) ពួកគេមិនបង្រៀនមនុស្សថារាជាណាចក្រព្រះគឺជារដ្ឋាភិបាលនៅស្ថានសួគ៌ដែលគ្រប់គ្រងដោយលោកយេស៊ូឡើយ។ ផ្ទុយទៅវិញ តាមធម្មតាពួកគេនិយាយអំពីលោកយេស៊ូនៅពិធីបុណ្យណូអែល ឬបុណ្យអ៊ីស្ទើរ៍។ ពួកគេមិនពន្យល់ថារាជាណាចក្រព្រះនឹងដោះស្រាយបញ្ហាទាំងអស់របស់មនុស្សជាតិទេ ហើយក៏មិនពន្យល់ថាមិនយូរទៀតរាជាណាចក្រនោះនឹងបំបាត់អំពើអាក្រក់ទាំងអស់ចេញពីផែនដីដែរ។ (ការបើកបង្ហាញ ១៩:១១-២១) យើងឃើញច្បាស់ថា អ្នកដឹកនាំពិភពគ្រិស្ដសាសនា មិនដឹងថាលោកយេស៊ូនឹងធ្វើអ្វីខ្លះក្នុងនាមជាស្ដេចនៃរាជាណាចក្ររបស់ព្រះឡើយ។ ម្យ៉ាងទៀត ដោយសារពួកគេមិនយល់ដំណឹងដែលលោកយេស៊ូបានផ្សាយ នោះពួកគេមិនយល់អំពីមូលហេតុដែលពួកគេគួរផ្សព្វផ្សាយឡើយ។
តើយើងគួរមានបំណងចិត្ដបែបណាចំពោះការធ្វើកិច្ចការនេះ?
៨. តើអ្វីជាបំណងចិត្ដមិនត្រឹមត្រូវចំពោះកិច្ចការផ្សព្វផ្សាយ?
៨ អ្នកកាន់តាមលោកយេស៊ូមិនគួរផ្សព្វផ្សាយដើម្បីរកលុយ ឬសង់អគារស្អាតៗឡើយ។ លោកយេស៊ូបានមានប្រសាសន៍ថា៖ «អ្នករាល់គ្នាបានទទួលដោយឥតបង់ថ្លៃ ចូរឲ្យដោយឥតគិតថ្លៃដែរ»។ (ម៉ាថាយ ១០:៨) ដូច្នេះ កិច្ចការផ្សព្វផ្សាយមិនគួរជាមុខជំនួញមួយទេ។ (កូរិនថូសទី២ ២:១៧) អ្នកកាន់តាមលោកយេស៊ូមិនគួរសុំទទួលលុយសម្រាប់កិច្ចការផ្សព្វផ្សាយរបស់ពួកគេឡើយ។ (សូមអាន សកម្មភាព ២០:៣៣-៣៥) ទោះជាការណែនាំរបស់លោកយេស៊ូគឺច្បាស់លាស់ក៏ដោយ វិហារភាគច្រើនបានផ្ដោតអារម្មណ៍ទៅលើការប្រមូលលុយដើម្បីឲ្យវិហាររបស់ពួកគេនៅតែដំណើរការ ហើយឲ្យប្រាក់ខែដល់ពួកបព្វជិតនិងនិយោជិតឯទៀត។ ជាលទ្ធផល អ្នកដឹកនាំនៃពិភពគ្រិស្ដសាសនាជាច្រើននាក់បានទៅជាអ្នកមានស្ដុកស្ដម្ភ។—ការបើកបង្ហាញ ១៧:៤, ៥
កិច្ចការផ្សព្វផ្សាយមិនគួរជាមុខជំនួញមួយទេ
៩. តើសាក្សីព្រះយេហូវ៉ាបានបង្ហាញយ៉ាងណាថាពួកគេចូលរួមកិច្ចការផ្សព្វផ្សាយដោយមានបំណងចិត្ដត្រឹមត្រូវ?
៩ តើសាក្សីព្រះយេហូវ៉ារៃអង្គាសលុយនៅឯសាលប្រជុំ ឬមហាសន្និបាតរបស់ពួកគេឬទេ? មិនមែនទេ! កិច្ចការរបស់ពួកគេគឺបានត្រូវគាំទ្រដោយវិភាគទានស្ម័គ្រចិត្ដ។ (កូរិនថូសទី២ ៩:៧) ក៏ប៉ុន្ដែ នៅឆ្នាំមុនសាក្សីព្រះយេហូវ៉ាបានចំណាយពេលជិត២ពាន់លានម៉ោងក្នុងកិច្ចការផ្សព្វផ្សាយដំណឹងល្អ ហើយបានបង្រៀនគម្ពីរដល់មនុស្សជាង៩លាននាក់ជារៀងរាល់ខែ។ ពួកគេមិនទទួលប្រាក់ខែសម្រាប់កិច្ចការផ្សព្វផ្សាយរបស់ពួកគេទេ តែពួកគេសប្បាយចិត្ដប្រើលុយផ្ទាល់ខ្លួនដើម្បីធ្វើកិច្ចការនេះ។ អ្នកស្រាវជ្រាវម្នាក់បាននិយាយអំពីកិច្ចការរបស់សាក្សីព្រះយេហូវ៉ាថា៖ «គោលដៅសំខាន់ចម្បងរបស់ពួកគេគឺការផ្សព្វផ្សាយនិងការបង្រៀន»។ គាត់ក៏បាននិយាយដែរថាសាក្សីព្រះយេហូវ៉ាមិនមានពួកបព្វជិតដែលទទួលប្រាក់ខែឡើយ។ ដូច្នេះ បើយើងផ្សព្វផ្សាយមិនមែនដើម្បីបានលុយ តើយើងមានបំណងចិត្ដអ្វី? យើងស្ម័គ្រចិត្ដធ្វើកិច្ចការនេះ ដោយសារយើងស្រឡាញ់ព្រះយេហូវ៉ានិងស្រឡាញ់មនុស្ស។ ចិត្ដគំនិតនេះសម្រេចទំនាយនៅទំនុកតម្កើង ១១០:៣ (សូមអាន)។
តើគួរប្រើវិធីសាស្ដ្រអ្វីខ្លះ?
យើងផ្សព្វផ្សាយនៅកន្លែងណាក៏ដោយដែលយើងជួបមនុស្ស (សូមមើលវគ្គ១០)
១០. តើលោកយេស៊ូនិងពួកអ្នកកាន់តាមលោកបានប្រើវិធីសាស្ដ្រអ្វីខ្លះដើម្បីផ្សព្វផ្សាយ?
១០ តើលោកយេស៊ូនិងពួកអ្នកកាន់តាមលោកបានប្រើវិធីសាស្ដ្រអ្វីខ្លះដើម្បីផ្សព្វផ្សាយ? ពួកគាត់បានទៅកន្លែងណាក៏ដោយដែលពួកគាត់អាចជួបមនុស្ស។ ជាឧទាហរណ៍ ពួកគាត់បានផ្សព្វផ្សាយនៅតាមដងផ្លូវនិងនៅផ្សារ។ ពួកគាត់ក៏បានស្វែងរកមនុស្សនៅឯផ្ទះដែរ។ (ម៉ាថាយ ១០:១១; លូកា ៨:១; សកម្មភាព ៥:៤២; ២០:២០) ការផ្សព្វផ្សាយពីផ្ទះមួយទៅផ្ទះមួយគឺជាវិធីមួយដែលមានរបៀបរៀបរយដើម្បីជួបមនុស្សគ្រប់ប្រភេទ។
១១, ១២. ស្ដីអំពីការផ្សព្វផ្សាយដំណឹងល្អ តើការព្យាយាមរបស់ពិភពគ្រិស្ដសាសនាគឺយ៉ាងណាបើប្រៀបធៀបនឹងរាស្ដ្ររបស់ព្រះយេហូវ៉ា?
១១ តើវិហារនៃពិភពគ្រិស្ដសាសនាផ្សព្វផ្សាយដំណឹងល្អដូចលោកយេស៊ូបានធ្វើឬទេ? តាមធម្មតា ពួកបព្វជិតដែលបានទទួលប្រាក់ខែថ្លែងសុន្ទរកថាសម្រាប់សមាជិកវិហាររបស់ពួកគេ។ ពួកអ្នកដឹកនាំទាំងនេះមិនធ្វើឲ្យមានអ្នកកាន់តាមថ្មីទេ ប៉ុន្ដែពួកគេគ្រាន់តែព្យាយាមរក្សាទុកសមាជិកវិហារដែលពួកគេមានរួចហើយ។ នៅពេលខ្លះ ពួកគេបានព្យាយាមលើកទឹកចិត្ដសមាជិកវិហាររបស់ពួកគេឲ្យផ្សព្វផ្សាយ។ ជាឧទាហរណ៍ នៅឆ្នាំ២០០១ សម្ដេចប៉ាបចន ផលទី២បាននិយាយក្នុងសំបុត្រមួយថាសមាជិកវិហារគួរផ្សព្វផ្សាយដំណឹងល្អ ហើយគួរមានចិត្ដខ្នះខ្នែងដូចសាវ័កប៉ូលដែលបាននិយាយថា៖ «ប្រសិនបើខ្ញុំមិនប្រកាសដំណឹងល្អ ខ្ញុំត្រូវវេទនាណាស់»។ ក្រោយមកសម្ដេចប៉ាបបាននិយាយថាកិច្ចការផ្សព្វផ្សាយនេះគួរតែធ្វើឡើង មិនគ្រាន់តែដោយមនុស្សប៉ុន្មាននាក់ដែលបានទទួលការបង្ហាត់បង្រៀនប៉ុណ្ណោះទេ តែដោយសមាជិកទាំងអស់នៃវិហារ។ ក៏ប៉ុន្ដែ មិនសូវមានអ្នកដែលបានធ្វើតាមការលើកទឹកចិត្ដនេះឡើយ។
១២ ចុះយ៉ាងណាសាក្សីព្រះយេហូវ៉ាវិញ? មានតែពួកគេប៉ុណ្ណោះដែលជាអ្នកផ្សព្វផ្សាយថាលោកយេស៊ូបានគ្រប់គ្រងជាស្ដេចតាំងពីឆ្នាំ១៩១៤។ ពួកគេស្តាប់បង្គាប់លោកយេស៊ូ ហើយចាត់ទុកកិច្ចការផ្សព្វផ្សាយជាអ្វីដែលសំខាន់បំផុតក្នុងជីវិតរបស់ពួកគេ។ (ម៉ាកុស ១៣:១០) សៀវភៅមួយបានចែងថា ចំពោះសាក្សីព្រះយេហូវ៉ា កិច្ចការផ្សព្វផ្សាយគឺសំខាន់ណាស់។ (Pillars of Faith—American Congregations and Their Partners) សៀវភៅនេះក៏បានចែងដែរថាពេលពួកគេស្វែងរកមនុស្សដែលឈឺ ស្រេកឃ្លាន និងកណ្ដោចកណ្ដែង ពួកគេព្យាយាមជួយ ប៉ុន្ដែពួកគេមិនដែលភ្លេចថាគោលដៅសំខាន់ចម្បងរបស់ពួកគេគឺដើម្បីផ្សព្វផ្សាយអំពីទីបញ្ចប់នៃពិភពលោកនេះ ហើយបង្រៀនមនុស្សអំពីសេចក្ដីសង្គ្រោះ។ សាក្សីព្រះយេហូវ៉ាបន្ដផ្សព្វផ្សាយដំណឹងនេះ ហើយធ្វើតាមវិធីផ្សព្វផ្សាយរបស់លោកយេស៊ូនិងអ្នកកាន់តាមលោក។
តើកិច្ចការនេះគួរមានទំហំប៉ុណ្ណា ហើយតើកិច្ចការនេះគួរបន្ដសម្រាប់រយៈពេលប៉ុន្មាន?
១៣. តើកិច្ចការផ្សព្វផ្សាយដំណឹងល្អគួរមានទំហំប៉ុណ្ណា?
១៣ លោកយេស៊ូបានមានប្រសាសន៍ថាអ្នកកាន់តាមលោកនឹងផ្សព្វផ្សាយនិងបង្រៀនដំណឹងល្អ«នៅគ្រប់ទីអាស្រ័យនៅផែនដី»។ ពួកគេបានត្រូវបង្គាប់ឲ្យទៅជួយមនុស្ស«គ្រប់ជាតិសាសន៍»ឲ្យក្លាយទៅជាអ្នកកាន់តាមលោក។ (ម៉ាថាយ ២៤:១៤; ២៨:១៩, ២០) នេះមានន័យថាដំណឹងល្អនឹងត្រូវផ្សព្វផ្សាយនៅទូទាំងពិភពលោក។
១៤, ១៥. តើអ្វីបង្ហាញថាសាក្សីព្រះយេហូវ៉ាបានធ្វើឲ្យទំនាយរបស់លោកយេស៊ូសម្រេចស្ដីអំពីទំហំនៃកិច្ចការផ្សព្វផ្សាយ? (សូមមើលរូបភាពនៅដើមអត្ថបទ)
១៤ មានតែសាក្សីព្រះយេហូវ៉ាប៉ុណ្ណោះដែលធ្វើឲ្យទំនាយរបស់លោកយេស៊ូបានសម្រេចដែលថាដំណឹងល្អនឹងត្រូវផ្សព្វផ្សាយនៅទូទាំងពិភពលោក។ ហេតុអ្វីយើងនិយាយដូច្នេះ? នៅសហរដ្ឋអាម៉េរិក មានពួកបព្វជិតក្នុងពិភពគ្រិស្ដសាសនាប្រហែលជា៦០០.០០០នាក់ រីឯសាក្សីព្រះយេហូវ៉ាមានប្រហែលជា១.២០០.០០០នាក់ដែលកំពុងផ្សព្វផ្សាយដំណឹងល្អនៅប្រទេសនោះ។ នៅទូទាំងពិភពលោកមានបូជាចារ្យសាសនាកាតូលិកប្រហែលជា៤០០.០០០នាក់ ប៉ុន្ដែមានសាក្សីព្រះយេហូវ៉ាជាង៨លាននាក់ដែលកំពុងផ្សព្វផ្សាយដំណឹងល្អនៅ២៤០ប្រទេស។ យើងអាចឃើញច្បាស់ថា សាក្សីព្រះយេហូវ៉ាកំពុងផ្សព្វផ្សាយដំណឹងល្អនៅទូទាំងពិភពលោក នេះនាំឲ្យព្រះយេហូវ៉ាទទួលសេចក្ដីសរសើរនិងកិត្ដិយស!—ទំនុកតម្កើង ៣៤:១; ៥១:១៥
១៥ ក្នុងនាមជាសាក្សីព្រះយេហូវ៉ា គោលដៅរបស់យើងគឺផ្សព្វផ្សាយដំណឹងល្អដល់មនុស្សច្រើនបំផុត មុនទីបញ្ចប់មកដល់។ ដើម្បីធ្វើកិច្ចការនេះ យើងបានបកប្រែនិងបោះពុម្ពទស្សនាវដ្ដី ខិត្ដប័ណ្ណ សៀវភៅ និងលិខិតអញ្ជើញសម្រាប់មហាសន្និបាតនិងពិធីរំលឹករាប់លានច្បាប់ ដែលមានជាង៧០០ភាសា។ យើងស្នើផ្ដល់អ្វីទាំងអស់នេះដល់មនុស្សដោយឥតគិតថ្លៃ។ បើគិតតែឆ្នាំមុនប៉ុណ្ណោះ យើងបានបោះពុម្ពសៀវភៅផ្សេងៗដែលមានមូលដ្ឋានលើគម្ពីរប្រហែលជា៤,៥០០លានច្បាប់។ យើងក៏បានបោះពុម្ពសេចក្ដីបកប្រែពិភពលោកថ្មីពីបទគម្ពីរបរិសុទ្ធជាង២០០លានច្បាប់ក្នុងជាង១៣០ភាសា។ ម្យ៉ាងទៀត នៅគេហទំព័រផ្លូវការរបស់យើង មានព័ត៌មានជាង៧៥០ភាសា។ មានតែសាក្សីព្រះយេហូវ៉ាប៉ុណ្ណោះដែលកំពុងធ្វើកិច្ចការដ៏អស្ចារ្យនេះ។
១៦. តើយើងដឹងយ៉ាងដូចម្ដេចថាសាក្សីព្រះយេហូវ៉ាមានសកម្មពលរបស់ព្រះ?
១៦ តើកិច្ចការផ្សព្វផ្សាយនេះនឹងបន្ដសម្រាប់រយៈពេលប៉ុន្មាន? លោកយេស៊ូបានមានប្រសាសន៍ថាដំណឹងល្អនឹងត្រូវផ្សព្វផ្សាយរហូតដល់ទីបញ្ចប់មកដល់។ ក្នុងនាមជាសាក្សីព្រះយេហូវ៉ា យើងអាចស៊ូទ្រាំក្នុងកិច្ចការផ្សព្វផ្សាយនៅក្នុងអំឡុងគ្រាចុងក្រោយបង្អស់ ដោយសារតែយើងមានសកម្មពលបរិសុទ្ធរបស់ព្រះយេហូវ៉ា។ (សកម្មភាព ១:៨; ពេត្រុសទី១ ៤:១៤) មនុស្សខ្លះដែលកាន់សាសនាប្រហែលជានិយាយថា៖ «យើងមានសកម្មពលបរិសុទ្ធ»។ ប៉ុន្ដែ តើពួកគេអាចធ្វើកិច្ចការដែលសាក្សីព្រះយេហូវ៉ាកំពុងធ្វើក្នុងអំឡុងគ្រាចុងក្រោយបង្អស់នេះឬទេ? សាសនាខ្លះបានព្យាយាមផ្សព្វផ្សាយតាមវិធីដែលយើងផ្សព្វផ្សាយ តែពួកគេបានបរាជ័យ។ អ្នកខ្លះទៀតសុខចិត្ដផ្សព្វផ្សាយ ប៉ុន្ដែសម្រាប់តែរយៈពេលដែលមានកំណត់។ អ្នកខ្លះទៀតប្រហែលជាផ្សព្វផ្សាយពីផ្ទះមួយទៅផ្ទះមួយ តែពួកគេមិនផ្សព្វផ្សាយដំណឹងល្អអំពីរាជាណាចក្រព្រះទេ។ ដូច្នេះ ពួកគេមិនមែនជាអ្នកដែលធ្វើកិច្ចការដែលលោកយេស៊ូបានចាប់ផ្ដើមធ្វើឡើយ។
នៅសព្វថ្ងៃនេះ តើអ្នកណាពិតជាពួកអ្នកដែលកំពុងផ្សព្វផ្សាយដំណឹងល្អ?
១៧, ១៨. (ក) ហេតុអ្វីយើងអាចជឿជាក់ថាសាក្សីព្រះយេហូវ៉ាគឺជាអ្នកដែលកំពុងផ្សព្វផ្សាយដំណឹងល្អអំពីរាជាណាចក្រព្រះនៅសព្វថ្ងៃនេះ? (ខ) តើយើងអាចបន្ដធ្វើកិច្ចការនេះបានយ៉ាងដូចម្ដេច?
១៧ ដូច្នេះ នៅសព្វថ្ងៃនេះ តើអ្នកណាកំពុងផ្សព្វផ្សាយដំណឹងល្អអំពីរាជាណាចក្រព្រះ? មានតែសាក្សីព្រះយេហូវ៉ាប៉ុណ្ណោះ! ហេតុអ្វីយើងដឹងដូច្នេះ? ពីព្រោះយើងកំពុងផ្សព្វផ្សាយដំណឹងដែលត្រឹមត្រូវ ពោលគឺដំណឹងល្អអំពីរាជាណាចក្រព្រះ។ យើងកំពុងស្វែងរកមនុស្សក្នុងកិច្ចបម្រើផ្សាយរបស់យើង ដូច្នេះយើងកំពុងប្រើវិធីសាស្ដ្រដែលត្រឹមត្រូវ។ យើងមានបំណងចិត្ដត្រឹមត្រូវចំពោះកិច្ចការផ្សព្វផ្សាយនេះ ពោលគឺយើងស្រឡាញ់ព្រះយេហូវ៉ានិងស្រឡាញ់មនុស្ស។ កិច្ចការផ្សព្វផ្សាយរបស់យើងមានទំហំធំបំផុត ពីព្រោះយើងផ្សព្វផ្សាយដល់មនុស្សគ្រប់ប្រជាជាតិនិងភាសា។ ម្យ៉ាងទៀត យើងនឹងបន្ដផ្សព្វផ្សាយដំណឹងល្អអំពីរាជាណាចក្រព្រះរហូតដល់ទីបញ្ចប់មកដល់!
១៨ ពេលឃើញកិច្ចការដ៏អស្ចារ្យដែលរាស្ដ្ររបស់ព្រះយេហូវ៉ាកំពុងធ្វើដើម្បីផ្សព្វផ្សាយដំណឹងល្អក្នុងអំឡុងគ្រាចុងក្រោយបង្អស់នេះ នេះពិតជាគួរឲ្យកោតស្ងើចមែន! ប៉ុន្ដែ តើយើងអាចធ្វើកិច្ចការទាំងអស់នេះយ៉ាងដូចម្ដេច? សាវ័កប៉ូលពន្យល់ថា៖ «ព្រះគឺជាអ្នកដែលកំពុងមានសកម្មភាពក្នុងអ្នករាល់គ្នាតាមដែលលោកពេញចិត្ដ ដើម្បីឲ្យអ្នករាល់គ្នាមានបំណងប្រាថ្នានិងមានការប្រព្រឹត្ដ»។ (ភីលីព ២:១៣) សូមឲ្យព្រះយេហូវ៉ាបន្ដផ្ដល់កម្លាំងដែលយើងត្រូវការដើម្បីយើងអាចខំអស់ពីសមត្ថភាពបន្ដផ្សព្វផ្សាយដំណឹងល្អ!—ធីម៉ូថេទី២ ៤:៥
