1, 2. Nyunala kuɛɛ fula yɛ o nyɛ Chiisu dimi o Maatiu 24:​14 niŋndo?

MI CHIISU dimi maa o palɛi mɛɛlɛi niŋ, yooŋgu kɛndɛ leMasaa cho dimiŋ o waŋnda lo kpou. (Maatiu 24:​14) Naa Seiyaa Chɛhowaa, waŋnda sina naa chieeŋndo balɔɔ silɔ le yooŋgu kɛndɔɔ dimioo. Waŋnda apum hɛnaŋ a yooŋgu kɛndɛ naŋ dimi wo, kɛ apum hɛnaŋ a ndu le. Mi che bɛɛ apum hɛnaŋ a yooŋgu kɛndɛ naŋ dimi wo le, kɛ ma ke naa bɛɛleŋ le wali naa. Ŋ nɔla miŋ lɔɔnuŋ ibuŋ maa naŋ cho wali Chiisu dimi wo tosaa ni. Baa ŋ nɔ pa dioo le dimioo lende? Vɛɛ naŋ looku yɛ sina maa a wali dimiaa yooŋgu kɛndɔɔ okɔɔ Chiisu wa suɛi ni?

² Kaaŋii bɔɔbɔɔ dimi maa a cho yooŋgu kɛndɔɔ dimioo a Chiisu okɔɔ. Kɛ o kaaŋndeŋ, o tɛlivisiɔŋndo choo, ɔɔ o Intanɛtiiyo choo kinɛi nda dimi yooŋgu kɛndɔɔ ni. Ɔɔ ma dimul waŋnda mɛɛ nda looku pɛɛku a Chiisu okɔɔ yɛ. Apum yiyaŋ maa te a mala pɛ wanaa cho o bahawɛiyo niŋnda, ɔɔ ma tosa wallo le tooloo mɛɛ wali chiɔuwaa cho naa yɛ, ɔɔ waŋnda pɛɛkoo, mɛɛ yooŋgu kɛndɔɔ nda cho koŋ dimioo ni. Kɛ baa waltaŋ ndaŋ la cho yooŋgu kɛndɛ Chiisu soo a ndu okɔɔ wo ni?

3. A mɛɛ Maatiu 28:​19, 20 dimi yɛ, sɔɔŋ sala hiɔɔlu kuɛɛ buɛiyaa Chiisuaa nɔ yɛ le tosaa?

³ Chiisu ndoo yeema pa mi buɛiyaa nduaa chum mi waŋnda  ndaa hiŋ o ndalo? Ɛ ɛ! Mɛɛ Chiisu sɔla fulasɛiniŋndo, mbo dimul buɛiyaa nduaa o kɛmɛlaŋ niŋ aa, “La kɔ o ŋwaŋnda chiee lo ba o ba fee mi la siiŋguu nda buɛiyaa ni mi la yiŋ nda . . . la pɛɛku nda ma tosa nyɛ o nyɛ ya dimul nya le tosaa. (Maatiu 28:​19, 20) Lelaŋ, maa buɛiyaa Chiisuaa, ŋ nɔ miŋ tosa sɔɔŋ sala hiɔɔlu. Ŋ nɔ miŋ siiŋguu waŋnda buɛiyaa Chiisuaa, miŋ yiŋ nda, nduyɛ miŋ pɛɛku nda. Kɛ ŋ nɔ fɛŋ miŋ kuɛ o waŋnda lo. Mi wana sinaa dɛnɛ Baabui pilɛ dimi aa, “Le ‘kɔlaŋ,’ kalaŋndo o cho le wana laalaŋ kɛ kɛ ni, o wa o nɛilaŋ daŋgala ɔɔ o peela bɛndaŋ kɔŋgɔ.”—Maatiu 10:​7; Luku 10:​3.

4. Yɛɛ yeemaŋ yɛ le simnɔŋndo wanaa “yɔɔyaa cheleŋ”?

⁴ Yɛɛ Chiisu ndoo yeema yɛ mi buɛiyaa nduaa tosa? Ndoo yeema pa ma dimi yooŋgu kɛndɔɔ a ba nda, ɔɔ ndoo yeema nda ma wa a kɔɔnaa? Le mɛɛ wana pilɛ ndoo nɔla mbo dimi yooŋgu kɛndɔɔ “ba o ba fee” yɛ le, lelaŋ buɛiyaa nduaa ndaa nɔ ni ma wa a kɔɔnaa. Keŋ Chiisu ndoo yiyaŋ ni mɛɛ o veelu buɛiyaa nduaa le ma simnuŋ wanaa “yɔɔyaa cheleŋ.” (Nuawɔ Maatiu 4:​18-22.) O cho a wana wuu doŋnde wo okɔɔ le Chiisu wa suɛi le, o wul malaleŋ o doliŋii nduɛi mbo chal chumndo le mi suuwo huŋ kundu wo le. Kɛ, a yɔɔya nda soliŋ yalala yɔɔyaalaŋ kpeku wo okɔɔ o wa suɛi ni. Wallo pila yeemaŋ le yɔɔya waa lende ni. O nɔ mbo wa o kɔɔnaa, nduyɛ mi waŋnda tau sɔɔŋguu balaŋ le ndu tosaa.—Luku 5:​1-11.

5. Nyunala hiɔɔlu kuɛɛ naŋ nɔ yɛ miŋ muli, nduyɛ le yɛɛ?

⁵ Le sinaa wanaa cho hau yooŋgu kɛndɔɔ dimioo wa, ŋ nɔ miŋ muli nyunala hiɔɔlulaŋ ndaŋ:

• Yooŋgu kuɛɛ buɛiyaa Chiisuaa nɔ yɛ ma dimi?

• Le sabu yɛɛ nda dimi yɛ ndu?

• Nɛila kuɛɛ nda nɔ yɛ ma soliŋ kpeku?

• Vɛɛ kpɛ wallo hoo nɔ yɛ mbo tosaŋ, nduyɛ vɛɛ kpɛ o nɔ yɛ mbo viou?

Mulila naŋ cho sɔla le nyunalaŋ ndaŋ ndo cho naa mala miŋ sina wanaa cho yooŋgu piŋi hoo yoomulaŋ ndo dimioo wa, nduyɛ mbo kindi yeemɛi nɛi le hiouwɔɔ lachi a yooŋgu kɛndɔɔ hoo dimioo.—Timoti Tasoo 4:​16.

6. Le yɛɛ ŋ laalaŋ yɛ maa Seiyaa Chɛhowaa cho yooŋgu kpeekpeiyo dimioo ni?

⁶ Nuawɔ Luku 4:​43. Mi Chiisu dimi “yooŋgu kɛndɔɔ a Masale Mɛlɛkaleŋ okɔɔ,” nduyɛ o yeema mi buɛiyaa nduaa tosa nyɛ pilɛ koŋ kpe. Wanaa suu kuɛɛ cho yɛ yooŋgu koŋ dimioo o waŋnda lo kpou? Seiyaa Chɛhowaa kinɛi! Wanaa hɛnaŋ a naa le wa bɛɛ timbi seileŋ a keŋ okɔɔ. Le tamaseliiyo, tofawɔ nyɛ wana bɛndu lekaaŋ pilɛ balu niŋ o lɛŋii bɔɔbɔɔ niŋndo dimul Chɛhowɛinɔ pilɛ wo. O lelɛŋ o lelɛŋ niŋ wana bɛndoo hoo ndoo kuɛ pɛ, o nyuna Chɛhowɛiya a yooŋgu nda wa dimioo wo okɔɔ. Mi wana bɛndoo hoo dimi aa, “Naa nda hiu ba a diɔmnde wa, mi nda kpou yɔŋgu muli pilɔɔ kpe aa, ‘Yooŋgu kɛndɔɔ a Masale Mɛlɛkaleŋ okɔɔ’” Nyɛ wana bɛndoo hoo dimi wo chɔm kɛsɛ maa ŋ nɔ i diɔm te, kɛ ŋ cho diompilɛ maa Kilisiɔŋaa tonya. (Kɔliŋtiaŋ Tasoo 1:​10) Masale Mɛlɛkaleŋ le cho vɛlɛ suɛi kulle le Bandu Mɛŋgɛlaa le Masale Chɛhowaleŋ Yondaa. Yauwo hoo cho o sɔɔŋ maŋgalaŋ niŋ 254. Nduyɛ a toosiaa o kɛ kɛ fee le 59,000,000. Hoo tosa ni mbo tiu ba o ba fee o chieeŋndo choo mbo hiau yau o yau cheleŋ!

7. Vɛɛ naŋ looku yɛ sina maa simlachiaa o kaaŋnde niŋ cho yooŋgu kpeekpeiyo dimi le?

⁷ Simlachiaa o kaaŋii cheleŋnde niŋ cho yooŋgu kɛndɔɔ dimi a Masale Mɛlɛkaleŋ okɔɔ le. Apum ma soo kɛsɛ a Masale Mɛlɛkaleŋ okɔɔ, kɛ o yiyaŋ ndaa niŋ, maa mɛɛ waŋndo yiyaŋ o kɔl ndɔɔ niŋ yɛ cho Masale Mɛlɛkaleŋ ni. (Luku 17:​21) Simlachiaa haa  pɛɛku waŋnda maa Masale Mɛlɛkaleŋ le cho o choo choo niŋ, nduyɛ maa Chiisu le cho masaa le masale leŋ te. Kɛ, o dunyɛi paale vialaŋ Chiisu leŋ choo ɔɔ fulasɛiniŋ ndɔɔ nda suaa a ndu okɔɔ ni. A tɛɛsiaa maa Masale Mɛlɛkaleŋ te le cho hunɔɔ bahawɛila waŋchieeya chii le. Nduyɛ maa le cho suŋ faŋa dɛnɛ wɔɔŋndo o chieeŋndo choo le. (Sɔɔŋ Chɔɔmaŋndoŋ 19:​11-21) I cho kpendekele maa simlachiaa lepiɛiya o kaaŋii cheleŋnde niŋ sina nyɛ Chiisu cho tosa maa Masaa le Masale Mɛlɛkaleŋ ndo le. Nduyɛ le mɛɛ nda bii yooŋgu Chiisoo bila le yɛ, lelaŋ a sina le sabu nda nɔ ma dimi yooŋgu kɛndɔɔ wo le.

8. Yɛɛ wɔu yɛ o yooŋgu kɛndɔɔ dimioo niŋ?

⁸ Buɛiyaa Chiisuaa nɔ ma dimi yooŋgu kɛndɔɔ le kanioŋ sɔlaa ɔɔ le ma taŋgul chiɛila bɛndaŋ te. Mi Chiisu dimi aa, “Fondo Mɛlɛka ke nya kpaayaa hoo ni. Lelaŋ, te la tosal waŋnda sɔɔŋ muŋ pɛ, la bii nda nyɛ o nyɛ o ba sɔŋgɔ koŋ te.” (Maatiu 10:​8) Lelaŋ, yooŋgu kɛndɔɔ dimioo nɔ mbo wa nyɛ leyula le. (Kɔliŋtiaŋ Diiŋ Ndɔɔ 2:​17) Buɛiyaa Chiisuaa nɔ ma nyuna waŋnda le nda paawaa le yooŋgu kɛndɛ nda cho dimioo wo le. (Nuawɔ Walta Wanaa Chiisuaa 20:​33-35.) Mi che bɛɛ naa sila Chiisu yɔŋgu wo cho walaŋ, kaaŋii bɔɔbɔɔ cho waŋnda kanioŋ biyɔɔ o ba le kaaŋii ndɛi hivioo lachi, nduyɛ le simlachiaa lekaaŋnda a wanaa nda chua le baalaa wa paawaa. Hei tosa mi simlachiaa lekaaŋnda simnuŋ wanaa nyɛsɔlaa bɛndu.—Sɔɔŋ Chɔɔmaŋndoŋ 17:​4, 5.

9. Vɛɛ Seiyaa Chɛhowaa chɔm yɛ maa o cho le ikani le nda cho yooŋgu kɛndɔɔ dimioo le?

⁹ Baa mi Seiyaa Chɛhowaa bii waŋnda kanioŋ o ba o Toŋgola leMasala ndalaŋ niŋ ɔɔ o bɔŋaŋnda ndala bɛndaŋ? Sako bɛɛ! A kɔllo wulee nda toolu wali nda dimiaa yooŋgu kɛndɔɔ ni. (Kɔliŋtiaŋ Diiŋ Ndɔɔ 9:​7) Lapɔm, hawɛilaŋ le biiliɔŋndaŋ la tiɔɔŋ Seiyaa Chɛhowaa tosa o yooŋgu kɛndɔɔ dimioo niŋ ni. Nduyɛ o ipaŋgu o ipaŋgu niŋ, mi ndaa tosa pɛɛkula Baabuilaŋ hiouwɔɔ miiliɔŋndaŋ la ŋɔmahiɔɔlu. A paawa nda le wali nda dimiaa yooŋgu kɛndɔɔ le, kɛ kaniŋ ndaŋ nda soliŋ kpeku ni le wallo hoo tosaa. Mi wana yaasiaa ŋsɔɔ pilɛ dimi a wali Seiyaa Chɛhowaa okɔɔ aa, “Suɛi kpeekpei nda tosa ve cho yooŋgu kɛndɔɔ dimioo a waŋnda pɛɛkoo ni.” Mbo dimi vɛlɛ maa Seiyaa Chɛhowaa nɔ simlachiaa lekaaŋ nda paawa wo le. Lelaŋ, te ŋ ve yooŋgu kɛndɔɔ hoo dimi le ikani le, mɛɛ le sabu yɛɛ naŋ cho yɛ ndu niŋ tosaa? Ŋ cho wallo hoo tosaa a kɔllo wulee kanifuule, ŋ kaala Chɛhowa a waŋchieeya. Nduyɛ hei peeloo nyɛ dimiŋ o Sam 110:​3 niŋndo. (Nuawɔ.)

10. Nɛila kuɛɛ Chiisu nda buɛiyaa nduaa ndaa soliŋ yɛ kpeku le yooŋgu kɛndɔɔ dimioo?

¹⁰ Nɛila kuɛɛ Chiisu nda buɛiyaa nduaa ndaa soliŋ yɛ kpeku le yooŋgu kɛndɔɔ dimioo? Mi ndaa kuɛ ba o ba fee nda nɔla ma saaluŋ waŋnda. Le tamaseliiyo, mi ndaa dimi yooŋgu kɛndɔɔ o nɛilaŋ a o lɔɔlaŋ niŋ. Mi ndaa kɔ nuuviaa vɛlɛ waŋnda o chiɛila ndalaŋ. (Maatiu 10:​11; Luku 8:​1; Walta Wanaa Chiisuaa 5:​42; 20:​20) Yooŋgu kɛndɔɔ dimioo o chiɛila waŋnda wa bɔɔ suɛi kɛndɛ bɛndu le mi waŋnda suu o suu ndaa tuei.

11, 12. Te o hiŋ pɛ a yooŋgu kɛndɔɔ dimioo okɔɔ, vɛɛ naŋ tuu yɛ kindiŋ wanaa lekaaŋnda cho wo vɛlɛ a o Seiyaa Chɛhowaa cho wo?

¹¹ Baa kaaŋnde cho pa yooŋgu kɛndɔɔ dimioo maa Chiisu? O kpeekpei niŋ, o wanaa ndaa lekaaŋnda lo simlachiaa lekaaŋnda haa suaa ni. Simlachiaa haa nuuviaa lɛ wanaa cheleŋ le nda siiŋgoo buɛiyaa Chiisuaa le, kɛ wanaa lekaaŋ nda nɔ wa koni nda kindiŋ le pɛɛkoo ni. Teleŋndaŋ lapum, ma kindiŋ le wanaa ndaa lekaaŋnda dɛɛniaa le yooŋgu kɛndɔɔ dimioo. Le tamaseliiyo, o wɔsi 2001 niŋ, mi Chɔŋ Pɔɔl II, wana bɛndoo le Katolikiiya kpou dimi o yau o poonyiaa wo niŋ maa wanaa lekaaŋnda nɔ ma dimi yooŋgu kɛndɔɔ. Nduyɛ a nɔ ma dimi ndu a dialuŋ fuulaa maa kiilanɔɔ Pɔɔl, o dimi aa, “Te o lo o koŋ pɛ mi I dimul waŋnda Yooŋgu Kɛndɛ Mɛlɛkaa hoo le, o wa suɛi nyɛ nɛiyaa le ya.” Mi Chɔŋ Pɔɔl II dimi maa o cho ko wanaa nda pɛɛku wa le nɔ ma dimi yooŋgu kɛndɔɔ hoo le, kɛ wanaa lekaaŋnda kpou nɔ ma tosa ndu. Kɛ waŋnda nyɛɛmbɔ koni cho hei tosaa ni.

¹² Kɛ Seiyaa Chɛhowaa yɛ? Nda kinɛi cho yooŋgu kɛndɔɔ dimioo ni maa Chiisu cho niŋ o Masaleŋ choo kanduŋ a wɔsi 1914 ve. A cho Chiisu diikɔŋndo nduyɛ ma kɛsi wali dimiaa yooŋgu kɛndɔɔ nyɛ tase peŋ o yoomu ndaa niŋ. (Maki 13:​10) Mi yauwo hoo diolaŋ “Pillars of Faith—American Congregations and Their Partners” dimi maa nyɛ sɔvɛ bɛndoo pila yooŋgu kɛndɔɔ dimioo cho le Seiyaa Chɛhowaa ni. Mi yau koŋ dimi vɛlɛ maa, te Seiyaa Chɛhowaa komal pɛ wanaa cho a yiaŋ nda, a nɔ wana le wa, a wanaa lanaa, ma kindiŋ le nda malaa. Kɛ kposoŋ bɛɛ a puɛɛnuŋ sabu nda kpeekpeiyo le. Ndu cho yɛ yooŋgu kɛndɔɔ dimioo le mɛɛlula chieeŋndo hoo, a waŋnda pɛɛkoo le pioŋɔɔ sɔlaa ni. Seiyaa Chɛhowaa cho hiouwɔɔ lachi a yooŋgu koŋ dimioo nduyɛ a tamasi Chiisu nda buɛiyaa nduaa tolɔɔ kɔɔli o ndu dimioo niŋ.

13. Vɛɛ kpɛ wali dimiaa yooŋgu kɛndɔɔ nɔ yɛ mbo tosaŋ?

¹³ Mi Chiisu dimi maa buɛiyaa nduaa nɔ ma dimi yooŋgu kɛndɔɔ nduyɛ ma pɛɛku waŋnda “ba o ba fee o chieeŋndo choo.” Nduyɛ, mbo dimul nda maa a nɔ ma siiŋguu waŋchieeya buɛiyaa ndɔ “ba o ba fee” o chieeŋndo choo. (Maatiu 24:​14; 28:​19, 20) Hei chɔm ni maa yooŋgu kɛndɔɔ nɔ mbo dimiŋ chieeŋndo balɔɔ silɔ.

14, 15. Yɛɛ chɔm yɛ maa Seiyaa Chɛhowaa cho wali dimiaa yooŋgu kɛndɛ Chiisu dimi wo tosaa ni? (Tofa fotueiyo o peele naŋ kandu leŋ choo.)

¹⁴ Seiyaa Chɛhowaa kinɛi cho nyɛ Chiisu dimi wo tosaa ni, le yooŋgu kɛndɔɔ dimioo chieeŋndo balɔɔ silɔ. Le yɛɛ naŋ dimi yɛ lende? O Amɛlika niŋ, a nɔ simlachiaa lekaaŋnda le 600,000. Kɛ Seiyaa Chɛhowaa le 1,200,000 cho yooŋgu kɛndɔɔ dimioo o lɛŋnde leŋ niŋ ni. Chieeŋndo balɔɔ silɔ, simlachiaa Katolikiiya cho le 400,000. Kɛ Seiyaa Chɛhowaa hiouwɔɔ miiliɔŋndaŋ la ŋɔmaa cho yooŋgu kɛndɔɔ dimioo o lɛŋnde 240 niŋ ni. A tonya, Seiyaa Chɛhowaa cho yooŋgu kɛndɔɔ dimioo chieeŋndo balɔɔ silɔ. Nduyɛ hei cho Chɛhowa bɛɛleŋ kioo a saŋgalaa!—Sam 34:​1; 51:​15.

¹⁵ Naa Seiyaa Chɛhowaa nɔ kpeleŋndo le waŋnda tau yooŋgu kɛndɔɔ dimullo tuupa mi mɛɛlulaŋ la fuuluu. Le wallo hoo tosaa,  ŋ tosiaa niŋ yaula teŋgeŋ teŋgeŋndaŋ o miiliɔŋndaŋ niŋ nduyɛ miŋ hivi laŋ o sɔɔŋ maŋgalaŋ niŋ hiouwɔɔ 700. Fondo naŋ piɔu waŋnda yaulaŋ ndaŋ ni. Lapɔm, miŋ toosiaa yaula soo a Baabuiyo okɔɔ laŋ le biiliɔŋndaŋ la hiɔɔlu a tɛndaa tɛɛŋ. Ŋ toosiaa niŋ vɛlɛ “New World Translation of the Holy Scriptures” hiouwɔɔ miiliɔŋndaŋ 200, o sɔɔŋ maŋgalaŋ niŋ hiouwɔɔ 130. Tɛɛŋgii nɛi cho o sɔɔŋ maŋgalaŋ niŋ hiouwɔɔ 750. Seiyaa Chɛhowaa kinɛi cho wali kɔndɔfili waa naa tosaa ni.

16. Vɛɛ naŋ looku yɛ sina maa Seiyaa Chɛhowaa nɔ nyina Mɛlɛkaa?

¹⁶ Vɛɛ kpɛ wali dimiaa yooŋgu kɛndɔɔ nɔ yɛ mbo viou? Mi Chiisu dimi maa yooŋgu kɛndɔɔ nɔ mbo dimiŋ haaa mi mɛɛlulaŋ la fuuluu. Naa Seiyaa Chɛhowaa biunuŋ niŋ yooŋgu kɛndɔɔ hoo dimioo o palɛi mɛɛlɛi hei niŋ le mɛɛ naŋ nɔ nyina diandaa Chɛhowaa yɛ. (Walta Wanaa Chiisuaa 1:​8; Pitɛ Tasoo 4:​14) Mi wanaa lekaaŋnda apum dimi aa, “Ŋ nɔ nyina diandaa.” Kɛ a nɔla pa ma tosa wali dimiaa yooŋgu kɛndɛ Seiyaa Chɛhowaa cho hau tosaa o palɛi mɛɛlɛi hei niŋndo? Kaaŋnde ipum kindiŋ niŋ le yooŋgu kɛndɔɔ dimioo mɛɛ naŋ tosa yɛ, kɛ ma bumba. Waŋnda apum nɔ yeemɛi le yooŋgu kɛndɔɔ dimioo, kɛ a chue teleŋ bɔɔ le. Mi waŋnda apum dimi yooŋgu kɛndɔɔ o chiɛila waŋnda, kɛ o cho a Masale Mɛlɛkaleŋ okɔɔ le. Lelaŋ, o cho wali Chiisu ndoo kandu wo le nda cho tosaa le.

17, 18. (a) Le yɛɛ naŋ nɔ yɛ miŋ laalaŋ maa Seiyaa Chɛhowaa cho yooŋgu kɛndɛ leMasa Mɛlɛkaa dimioo hau ni? (b) Vɛɛ naŋ looku yɛ batiuwaa sɔla le hiouwɔɔ lachi a yooŋgu kɛndɔɔ hoo dimioo?

¹⁷ Nɛɛ yaa cho yɛ yooŋgu kɛndɔɔ dimioo hau? Seiyaa Chɛhowaa kinɛi! Vɛɛ naŋ looku yɛ keŋ sina? Kanifondole, yooŋgu kpeekpeiyo naŋ cho dimioo ni, yooŋgu kɛndɛ leMasa Mɛlɛkaa. Ŋ cho waŋnda nuuviaa o wali dimiaa yooŋgu kɛndɔɔ niŋ, lelaŋ naŋ cho nɛila bɛnda laŋ soliŋndo kpeku ni. Ŋ nɔ sabu sɔviɔɔ le yooŋgu kɛndɔɔ dimioo, ndu cho ni, ŋ kaala Chɛhowa a waŋchieeya. Wali naa dimiaa yooŋgu kɛndɔɔ cho bɔɔ tosaŋndo kanifuule, ŋ cho waŋnda o kaalaŋ niŋ kpou a o sɔɔŋ ndaŋ maŋgalaŋ niŋ yooŋgoo hoo dimullo. Nduyɛ ŋ cho hiouwɔɔ lachi a yooŋgu kɛndɛ leMasa Mɛlɛkaa dimioo haaa mi mɛɛlulaŋ la fuuluu!

¹⁸ I cho bɔɔ suɛi kɛndɛ bɛndu le chɔɔ wali kɔndɔfili bɛndu wanaa Chɛhowaa cho tosaa le yooŋgu kɛndɔɔ dimioo o palɛi mɛɛlɛi hei niŋndo. Kɛ vɛɛ naŋ looku yɛ batiuwaa sɔla le wallo hoo kpou tosaa? Mi kiilanɔɔ Pɔɔl tɛɛsiaa aa, “Kani fuule, Mɛlɛka pila ndu cho wallo o nya niŋ ni mi la nɔ yeemɛi le nyɛ o hɛnaŋ ndo tosaa. Nduyɛ, ndu tosa ni mi la nɔla nyɛ o hɛnaŋ koŋ ndo tosa.” (Filipiaŋnda 2:​13) Maa Chɛhowa hiou lachi a naa yoomuaŋ kioo le miŋ tosa o naŋ tiuba le tosaa wo le yooŋgu kɛndɔɔ loo dimioo fɔ!—Timoti Diiŋ Ndɔɔ 4:​5.