1, 2. Uno mazu aYesu ahali Mateu 24:14 aneha vihula muka?

YESU ahanjikile chimweza ngwenyi mumakumbi akukuminyina mujimbu wamwaza waWangana navakawambulwila vatu vosena. (Mateu 24:14) Etu Vinjiho jaYehova vatutachikijila hamulimo wetu wakwambulula. Vatu vamwe vazanga mujimbu tweji kwambululanga, oloze veka kavauzangako. Numba tuhu vatu vamwe kavazanga mujimbu tweji kwambululangako, oloze veji kutuvumbikanga. Tweji kwambanga ngwetu yetu tweji kuzatanga mulimo uze ahanjikile Yesu. Uno tukwechi lisesa lyakuhanjika ngocho tahi? Uno twatachikiza ngachilihi ngwetu mulimo ahanjikile Yesu ukiko tweji kuzatanga?

² Mauka akwitava amavulu alivuluka ngwawo, eji kwambululanga mujimbu waYesu. Oloze kwambulula chavo chapwa chakuhanjika kaha vihande muchachi, chipwe havisaji vyamivwimbimbi, chipwe haInternet, chipwe kulweza kaha vatu omu valinangwile vyaYesu. Veka vafwelela ngwavo kukafwa vaka-kukalikiza chipwe kuzata milimo yakukafwa vatu yakufwana nge undotolo, naunase chipwe ulongeshi, hijila yimwe  yakwambulwilamo. Uno milimo kaneyi kumana yikiko yalumbununa kwambulula mujimbu avulukile Yesu tahi?

3. Vyuma muka viwana vatelele kulinga vaka-kukavangiza Yesu vize vavuluka hali Mateu 28:19, 20?

³ Uno Yesu alwezele tumbaji twenyi ngwenyi vavandaminenga vatu vezenga kuli vakiko tahi? Nduma. Omu alingile Yesu hanasanguka lyehi, alwezele vaka-kumukavangiza ngwenyi: “Yenunga mukanangule vatu vakumafuchi osena vakapwe tumbaji, mukavambapachise . . . . Mukavanangule kulamanga vyuma vyosena vize ngunamilweze.” (Mateu 28:19, 20) Etu hakupwa tuvaka-kukavangiza Yesu, twatela kulinga vyuma vino viwana. Twatela kuya kuvatu, nakuvakafwa vapwenga tumbaji, nakuvambapachisa, nakuvanangula. Mutu umwe alinangula chikuma vyaMbimbiliya ambile ngwenyi: “Lizu ‘kuya’ lyalumbununa nge vaka-kwitava vosena vatela kuya nakwambulula numba vazomboka mukwakwa chipwe kuzauka tulungalwiji.”—Mateu 10:7; Luka 10:3.

4. Vyuma muka vyasakiwa kuli “vaka-kuta vatu”?

⁴ Yesu asakile tumbaji twenyi valinge ika? Uno asakile tumbaji twenyi vambululenga uka wavo tahi, nyi asakile vazachile hamwe mwalizavu? Yesu asakile tumbaji twenyi vambululenga mwalizavu mwomwo mutu umwe keshi kuhasa kwambulila vatu ‘vakumafuchi osenako.’ Omu mukiko alumbunwine Yesu hakulweza tumbaji twenyi vapwenga “vaka-kuta vatu.” (Tangenu Mateu 4:18-22.) Yesu kapwile nakutalisa kuli muka-kuta vaishi umwe uze mwazachisa ulovo wenyi nandulo, nakuvandamina ishi akwate kuulovoko. Oloze Yesu apwile nakutalisa kukuta vaishi kuzachisa moji. Echi chasaka kuzata nangolo, nakulinunga hamwe navakwetu.—Luka 5:1-11.

5. Vihula muka viwana natukumbulula, kaha mwomwo ika?

⁵ Hakusaka tutachikize vatu vali nakwambulula mujimbu wamwaza makumbi ano, twatela kukumbulula vihula vino viwana:

• Mujimbu muka vatela kwambulula vaka-kukavangiza Yesu?

• Vyuma muka vyatela kuvalingisa numba vambulule?

• Jijila muka vatela kuzachisa?

• Mulimo wakwambulula watohwa ngachilihi, kaha nautwalaho palanga nakumwaka uka?

▪Kutachikiza muvakumbulwila vihula kanevi nachitukafwa tutachikize vatu vali nakuzata mulimo wakuyovola vatu, nakutujikijisa tutwaleho lika kwambulula.—WaChimoteu 1, 4:16.

6. Mwomwo ika mwatela kufwelela ngwenu Vinjiho jaYehova vali nakwambulula mujimbu wakwoloka?

⁶ Tangenu Luka 4:43. Yesu ambulwilenga “mujimbu wamwaza waWangana,” kaha asaka natumbaji twenyi valingenga ngocho. Vatu muka vali nakwambulula mujimbu kanou kuvatu vosena? Kakweshi vatu vekako, shina Vinjiho jaYehova kaha. Navatu vaze vatuhunga vetavila mazu kana. Chakutalilaho, talenu mazu ahanjikile kapilishitu uze nawa apwa kamishonali wamukwitava, uze atwaminenga  mumafuchi amavulu. Mumafuchi osena muze azachililenga, ahulishile Vinjiho jaYehova hamujimbu veji kwambululanga. Ou kapilishitu ambile ngwenyi, “Ava vileya vosena vangukumbulwile mwomumwe ngwavo: ‘Mujimbu wamwaza waWangana.’” Mazu ahanjikile ou kapilishitu asolola hatoma nge katwapwa tuvileyako, oloze twapwa tuvatu vaze valinunga hamwe hakupwa tuvaka-Kulishitu vamuchano. (Wavaka-Kolinde 1, 1:10) Kaha nawa mangazini yaKaposhi Kakutalila Ali Nakuvilika Wangana waYehova, yahanjika chikuma hamujimbu waWangana waKalunga. Eyi mangazini yili mumalimi akuheta ku 254, kaha kakweji hikakweji vali nakupulita jikope jakuheta ku 59,000,000, kulumbununa nge yinapu himangazini yize vali nakuhana chikuma kuvatu mukaye kosena.

7. Uno twatachikiza ngachilihi ngwetu vatwamina vamuKulishitendomu kavambulula mujimbu wakwolokako?

⁷ Vatwamina vamukwitava chaKulishitendomu kavambulula mujimbu waWangana waKalungako. Nge navasaka vambulule vyaWangana, vavavulu veji kwambanga ngwavo, Wangana wapwa vishinganyeka vyamumuchima wamutu. (Luka 17:21) Kavanangula vatu ngwavo wapwa hifulumende yamwilu yize vayula kuli Yesuko. Oloze vavula kaha kuhanjika vyaYesu haKulisimasi nahaIshita. Kavalumbununa ngwavo Wangana kana ukiko kaha naukakumisa ukalu wosena wavatu, chipwe kwamba ngwavo kalinwomu ukumise kuhuka chosena hano hamavuko. (Kusoloka 19:11-21) Chikupu vene, vatwamina vamuKulishitendomu kavatachikiza vyuma mwakalinga Yesu hakupwa Mwangana waWangana waKalungako. Hakuwana nge kavatachikiza mujimbu waYesuko, ngocho kavatachikiza ovyo vyatela kuvalingisa vawambululeko.

8. Vishinganyeka muka vyakuhenga vinalingisa vamwe kuzata mulimo wakwambulula?

⁸ Tumbaji twaYesu kavatela kwambulula mujimbu mangana vatambwileho jimbongo chipwe kutunga jizuvo jakukomwesako. Yesu ambile ngwenyi: “Mwatambwile chawana, hanenunga nawa chawana.” (Mateu 10:8) Ngocho mulimo wakwambulula kawatela kupwa nge hikusekasanako. (Wavaka-Kolinde 2, 2:17, kwinyikila chamwishi) Tumbaji twaYesu kavatela kufwetesa vatu hakwambululako. (Tangenu Vilinga 20:33-35.) Numba tuhu mazu ahanjikile Yesu alumbunuka hatoma, oloze vatwamina vamujichachi jajivulu vafwila kaha kutambula jimbongo javatu mangana vajizachise kukuwahisa jichachi javo, nakufweta vatwamina javo, navatu veka vaze veji kuzachisanga. Echi chinalingisa vatwamina vamuKulishitendomu kupwa naluheto.—Kusoloka 17:4, 5.

9. Uno Vinjiho jaYehova vasolola ngachilihi nge veji kwambululanga mujimbu wamwaza mwomwo yazangi?

⁹ Uno Vinjiho jaYehova veji kutambulanga jimbongo kuvatu haZuvo yaWangana chipwe hakukunguluka changalila tahi? Nduma. Mulimo wavo vaukundwiza namawana akulisakila. (Wavaka-Kolinde 2, 9:7) Mwakawali, Vinjiho jaYehova vazatanga jola jakuheta kafwe jimbiliyoni jivali mumulimo wakwambulula mujimbu wamwaza, nakutwaminyina vilongesa vyaMbimbiliya  vyakuhambakana jimiliyoni 9 kakweji hikakweji. Kavavafweta hakuzata mulimo kanou wakwambululako, oloze vapwa vakuwahilila hakuzachisa jimbongo javo. Muka-kuhehwojola umwe ahanjikile kutalisa kumulimo waVinjiho jaYehova ngwenyi: “Chuma chachinene vafwila shina kwambulila vatu nakuvanangula.” Ambile nawa ngwenyi, Vinjiho jaYehova kavatwama navatwamina vaze vatela kufwetako. Nge tweji kwambululanga chakuzeneka kutufweta, kaha vyuma muka vyatulingisa twambulule? Twalisuula kuzata mulimo kanou mwomwo twazanga Yehova navakwetu vatu. Kulisuula kanechi chatesamo mazu aupolofweto atwama hali Samu 110:3. (Tangenu.)

10. Jijila muka jize Yesu natumbaji twenyi vazachishilenga hakwambulula?

¹⁰ Jijila muka jize Yesu natumbaji twenyi vazachishilenga hakwambulula? Vayilenga kwosena kuze vawanyinenga vatu. Chakutalilaho, vambulwilenga mumikwakwa nahavisakano. Kaha nawa vakatukililenga vatu kujizuvo javo. (Mateu 10:11; Luka 8:1; Vilinga 5:42; 20:20) Kwambulula kuzuvo hizuvo hijila yimwe vazachishilenga chikuma hakwambulila vatu vakulisezaseza.

11, 12. Vaka-Kulishitendomu valihandununa ngachilihi navatu jaYehova hakuzata mulimo wakwambulula mujimbu wamwaza?

¹¹ Uno jichachi jaKulishitendomu jeji kwambululanga mujimbu wamwaza ngana muze alingilenga Yesu tahi? Kakavulu vatwamina vamukwitava vaze veji kutambulanga jimbongo, veji kuhanjikanga vihande kuvatu javo kaha. Ava vatwamina kavanangula vatu kupwa tumbajiko, oloze veji kufwilanga kaha kulama vatu vaze vali navo lyehi muchachi. Lwola lumwe vanesekanga kukolezeza vatu javo mangana vambululenga mujimbu. Chakutalilaho, mumwaka wa 2001,  Popu John Paul II asonekele mukanda wakulweza vatu jenyi ngwenyi, tuvosena muchachi twatela kwambulula mujimbu wamwaza natwima ngana mwakaposetolo Paulu uze ambile ngwenyi: “Nge kangweshi kuvilika mujimbu wamwazako, lamba kuli ami.” Ou popu ambile cheka ngwenyi, ou mulimo wakwambulula vatela kuuzata kuli vatu vosena muchachi, keshi kuvatu vavandende kahako. Oloze vatu vavandende kaha vakiko vanakavangizanga mazu ahanjikile popu.

¹² Nyi ngachilihi Vinjiho jaYehova? Vakiko kaha veji kwambululanga ngwavo, Yesu napunga nakuyula mwaMwangana putu vene mu 1914. Veji kukavangizanga lushimbi lwaYesu nakumona mulimo wakwambulula kupwa waulemu mukuyoya chavo. (Mako 13:10) Mukanda umwe wamba ngwawo, Vinjiho jaYehova vamona mulimo wakwambulula kupwa waulemu chikuma. Wamba nawa ngwawo, nge vanawane vatu vaze vali nazala, vali nakwivwa uli, namisongo, veji kuvakafwanga. Oloze vamona ngwavo mulimo waulemu shina wakwambulula vyakukuma chakaye kano nakunangula vatu vyaulwilo. (Pillars of Faith—American Congregations and Their Partners) Vinjiho jaYehova vanatwaleho lika kwambulula mujimbu kana nakukavangiza jijila jize azachishilenga Yesu natumbaji twenyi.

13. Mulimo wakwambulula watela kutohwa ngachilihi?

¹³ Yesu ambile ngwenyi, vaka-kumukavangiza navakambululanga mujimbu wamwaza nakunangula vatu “hamavu hosena.” Vavahanyine lushimbi lwakunangula “vaka-mafuchi osena” vapwenga tumbaji. (Mateu 24:14; 28:19, 20) Echi chalumbununa nge mujimbu wamwaza vatela kuwambulula mukaye kosena.

14, 15. Vyuma muka vyasolola nge Vinjiho jaYehova vanatesamo upolofweto waYesu kweseka nakutohwa chamulimo wakwambulula? (Talenu mivwimbimbi yakulivanga.)

¹⁴ Vinjiho jaYehova kaha vakiko vanatesamo upolofweto waYesu wakwamba ngwenyi, mujimbu wamwaza vatela kuwambulula mukaye kosena. Mwomwo ika tunambila ngocho? MuUnited States mwatwama vatwamina vamukwitava chaKulishitendomu kafwe 600,000, oloze mwatwama Vinjiho jaYehova vakuhambakana ha 1,200,000 vaze vali nakwambulula mujimbu wamwaza mulifuchi kana. Mukaye kosena, vapilishitu vamuKatolika vaheta kafwe 400,000, oloze Vinjiho jaYehova vanahambakana hajimiliyoni 8 mumafuchi akuheta 240. Chikupu vene, Vinjiho jaYehova vali nakwambulula mujimbu wamwaza mukaye kosena, kahechi cheji kwalisanga nakuvumbika lijina lyaYehova.—Samu 34:1; 51:15.

¹⁵ Hakupwa tuVinjiho jaYehova, twafwila kwambulila vatu vosena mujimbu wamwaza shimbu kanda kukuma chizenga. Hakusaka tutesemo mulimo kanou, tunalumuna mikanda yayivulu, najimangazini, najitalakiti, natumapapilo twakulanya vatu kukukunguluka changalila nakuchilika chaKwanuka Kufwa chaMwata mumalimi akuhambakana 700. Tweji kuhananga vatu mikanda yoseneyi hawana wakanyombo. Mwakawali, twapulitanga mikanda yahanjika haMbimbiliya yakuheta kafwe jimbiliyoni 4.5. Tunapulita nawa jikope jaMbimbiliya yaVisoneka vyaKaye Kakahya jakuhambakana hajimiliyoni 200 mumalimi akuhambakana 130. Kaha nawa keyala yetu yahaInternet yili mumalimi  akuhambakana 750. Vinjiho jaYehova kaha vakiko vali nakuzata mulimo kanou wakukomwesa.

16. Twatachikiza ngachilihi ngwetu Vinjiho jaYehova vakwechi shipilitu yaKalunga?

¹⁶ Uno mulimo wakwambulula nautwalaho palanga nakumwaka uka? Yesu ambile ngwenyi, mujimbu wamwaza navakawambulula palanga nomu kukuma nachikeza. Etu Vinjiho jaYehova tunatwaleho lika kwambulula mujimbu namumakumbi ano akukuminyina mwomwo tukwechi shipilitu yajila yaYehova. (Vilinga 1:8; WaPetulu 1, 4:14) Vatu vamwe vamukwitava vanahase kwamba ngwavo, “Nayetu tukwechi shipilitu yajila.” Kutala vali nakuhasa kwambulula mujimbu wamwaza ngana muze vali nakulinga Vinjiho jaYehova mumakumbi ano tahi? Mauka amwe anesekanga kwambulula, oloze vanahono. Veka veji kufwilanga kwambulula, oloze hatando yayindende kaha. Veka nawa veji kwambululanga kuzuvo hizuvo, oloze kavambulula mujimbu wamwaza waWanganako. Ngocho kavazata mulimo uze aputukile Yesuko.

17, 18. (a) Mwomwo ika twatela kufwelela ngwetu Vinjiho jaYehova vakiko kaha vali nakwambulula mujimbu wamwaza waWangana makumbi ano? (b) Uno tuli nakuhasa ngachilihi kutwalaho kuzata mulimo kanou?

¹⁷ Veya vali nakwambulula mujimbu wamwaza waWangana makumbi ano? Vinjiho jaYehova kaha. Twatachikiza ngachilihi ngocho? Mwomwo tweji kwambululanga mujimbu wakwoloka, ukiko mujimbu wamwaza waWangana. Hakuwana nge tweji kutondatondanga vatu mumulimo wetu, ngocho tweji kuzachisanga jijila jakwoloka. Kuzanga Yehova navakwetu chikiko cheji kutulingisanga twambulule mujimbu wamwaza. Mulimo wetu wakwambulula unatoho chikuma mwomwo tweji kwambulilanga vatu vakumafuchi osena namalimi osena. Kaha natutwalaho lika kwambulula mujimbu wamwaza waWangana palanga nomu kukuma nachikeza.

¹⁸ Tuli nakwivwa kuwaha chikuma hakumona mulimo wakwambulula mujimbu wamwaza vali nakuzata vatu jaYehova mumakumbi ano akukuminyina. Vyuma muka vili nakutukafwa kuzata mulimo kana? Kaposetolo Paulu ambile ngwenyi: “Kalunga ikiye eji kumijikijisanga, nakumihana muchima wakufwila kulinga vyuma nangolo jakulingamo nawa, nge omu evwila kuwaha.” (Wavaka-Fwilipi 2:13) Yehova atwaleho lika kutukafwa mangana twambululenga mujimbu wamwaza.—WaChimoteu 2, 4:5.