1, 2. Malwihwinyi itukwihula muloña wamazu aYesu ekala haMatewu 24:14?

YESU washimwini nindi mumafuku akukuminina, nsañu yayiwahi yaWanta akayishimwañena kudi antu ejima. (Matewu 24:14) Antu mukaayi kejima atwiluka etu aYinsahu jaYehova muloña wamudimu wetu wakushimwina. Antu amakwawu atambwilaña nsañu yitwashimwinaña, amakwawu nehi. Ilaña niantu abulaña kutambwila nsañu yitwashimwinaña atulemesha muloña wamudimu wetu. Twahoshaña netu yetu twazataña mudimu washimwiniyi Yesu. Komana tukweti wuswa wakuhosha mwenimu? Tukwiluka ñahi netu mudimu wetu wakushimwina diwu mudimu washimwiniyi Yesu?

² Akwansakililu amavulu ahoshaña nawu ashimwinaña nsañu yahosheliyi Yesu. Ilaña ashimwinaña hohu kumachechi, haTV, haIntaneti, hela kulejaku antu chamwilukiliwu Yesu. Amakwawu atoñojokaña nawu kukwasha antu anakankili hela kuzataku nyidimu yidi neyi wundotolu,  wunasi, wuntañishi diyi njila yakushimwinamu. Hanu dinu iyi nyidimu diwu mudimu washimwiniyi Yesu?

3. Yumanyi yiwana yatela kwilawu atumbanji twaYesu kwesekeja naMatewu 28:19?

³ Komana Yesu wakeñeleña nindi antu ayeña kudi atumbanji twindi? Inehi. Hanyima yakusañuka kwindi, Yesu walejeli atumbanji twindi amavulu nindi: “Dichi yenu mwakelishi atumbanji munyuza yejima, mwakayipapatishi . . , mwakayileji kuhemba yuma yejima yinayilejenu.” (Matewu 28:19, 20) Dichi, chineli tudi atumbanji twaYesu, twatela kwila yuma yiwana. Twatela kwilisha atumbanji, kuyipapatisha nikuyidizisha. Ilaña chatachi, twatela kuya kudi antu. Muntu wumu wadiza Bayibolu wahosheli nindi: “Izu dakwila nawu ‘kuya’ datalisha mukwila nawu mukwaKristu wejima watela kuya nakushimwina kwejima.”—Matewu 10:7; Luka 10:3.

4. Twatela kwiladi hakwikala ‘ayibinda awantu’?

⁴ Yesu wakeñeleña atumbanji twindi azateña ñahi? Komana wakeñeleña nindi azateña wumu wumu tahindi azatileña hamu? Chineli muntu wumu wadi kutwesha wanyi kushimwina “munyuza yejima,” atumbanji twindi ateleleli kuzatila hamu. Dimwatalishili Yesu hayitambikiliyi atumbanji twindi nindi ekali ‘ayibinda awantu.’ (Tañenu Matewu 4:18-22.) Yesu wateneneña wanyi chibinda wumu wanshi wunakulowa. Ilaña, Yesu wateneneña kukwata inshi kuzatisha kaleñi. Kukwata inshi nakaleñi kwakeñekeleña kuzata nañovu, kuzatila hamu nawa kwakeñekeleña antu amavulu.—Luka 5:1-11.

5. Malwihwinyi awana itwatela kwakula, nawa muloñadi?

⁵ Hakwila twiluki anakushimwina nsañu yayiwahi makonu, twatela kwakula awa malwihu awana:

• Atumbanji twaYesu atela kushimwina nsañwinyi?

• Muloñadi chatelelawu kushimwina iyi nsañu?

• Njilanyi yatela kuzatishawu hakushimwina?

• Twatela kushimwina kushika kudihi nawa tukaleka mpinjinyi?

Ñakwilu yanawa malwihu yikutukwasha kwiluka anakuzata iwu mudimu wakupulwisha antu nawa yikutukwasha kutwalekahu kushimwina.—1 Timotewu 4:16.

6. Muloñadi wumukwitejela nenu aYinsahu jaYehova ashimwinaña nsañu yalala?

⁶ Tañenu Luka 4:43. Yesu washimwinini ‘nsañu yaWanta yayiwahi,’ nawa nakukeña atumbanji twindi niwena ashimwineña. Anyi anakushimwina iyi nsañu kudi antu ejima? A Yinsahu jaYehova hohu. Niantu atuhela amakwawu etejaña  nawu yetu hohu tunakushimwina. Chakutalilahu, tiyenu chamulejeliwu Chinsahu chaYehova wumu kudi kamishonali kapristu wunashakami mumatuña amavulu. Mumatuña ejima ashakaminiyi, wehwileña aYinsahu jaYehova nsañu yashimwinañawu. Kapristu wahosheli nindi, “Wejima wawu asupa muloña akwileña chochimu nawu: ‘Nsañu yayiwahi yaWanta.’” Mazu ahosheliyi kapristu amwekesheli nawu twasupa wanyi, ilaña twanuñañana chineli tudi akwaKristu alala. (1 Akorinda 1:10) Kaposhi Kakutalila Kanakubidika Wanta waYehova nikena kahoshaña haWanta waNzambi. Aka kaposhi kadi mumadimi 254 nawa apulintaña naambala yakushika kwakwihi na 59,000,000, diyi magazini yinakuhanawu nankashi kudi antu mukaayi kejima.

7. Tuneluki ñahi netu akulumpi jaKristendomu anakushimwina wanyi nsañu yalala?

⁷ Akulumpi jamuKristendomu ashimwinaña wanyi nsañu yahosha haWanta waNzambi. Neyi anakuhosha haWanta, ahoshaña nawu wekala mumuchima wamuntu. (Luka 17:21) Alejaña wanyi antu nawu Wanta waNzambi hinfulumendi yamwiwulu yinakuyulewa naYesu. Ilaña avula kuhosha hadi Yesu haKrisimansi niha Isita. Ahoshaña wanyi nawu Wanta wukafumishahu kukala kwejima kunakumonawu antu makonu nikufumishahu kutama kwejima heseki. (Chimwekeshu 19:11-21) Mwalala, anlomboli jaKristendomu eluka wanyi yuma yakelayi Yesu, Mwanta waWanta waNzambi. Nawa chineli eluka wanyi mwatalisha mazu aYesu, eluka wanyi muloña waweni wuyatelela kuya nakushimwina.

8. Njilanyi yabula kutelela yakuzatilamu mudimu wakushimwina?

⁸ Atumbanji twaYesu hiyatela kushimwina kulonda awani mali hela kutuña matala amaneniku. Yesu wahosheli nindi: “Kutambula, munatambuli chamukunkulu; kuhana, kahanenu nawa chamukunkulu.” (Matewu 10:8) Dichi mudimu wakushimwina watela kwikala bizinisi wanyi. (2 Akorinda 2:17) Atumbanji twaYesu atela wanyi kwila antu nawu ayifweti nachinakushimwinawu. (Tañenu Yililu 20:33-35.) Hela chakwila kuleja kwaYesu kwatiyakana, ilaña machechi amavulu atambulaña mali kulonda machechi atwalekihu kuzatika nikufweta akulumpi jawu niamakwawu azataña nyidimu. Chinaleteshi anlomboli amavulu amuKristendomu kuheta.—Chimwekeshu 17:4, 5.

9. A Yinsahu jaYehova anamwekeshi ñahi nawu azataña mudimu wakushimwina nankeñelu yayeni?

⁹ Komana aYinsahu jaYehova atambulaña yawana muMatala aWanta hela hakupompa kweneni? Inehi! Mudimu wawu wakwashewaña nayawaana yakudikeñela.  (2 Akorinda 9:7) Chaaka chinamani, aYinsahu jaYehova azatili maora kwakwihi na 2 biliyoni mumudimu wakushimwina nawa alombweli atudizi aBayibolu kubadika 9 miliyoni kakweji nikakweji. Ayifwetaña wanyi namudimu wakushimwina, ilaña azatishaña mali awu kuzata iwu mudimu. Mukwakusandujola wumu wahosheli hamudimu wazatañawu aYinsahu jaYehova nindi: “Asha maana hakushimwina nikudizisha.” Wahosheli cheñi nindi aYinsahu jaYehova ekala wanyi namukulumpi wakufweta mali. Neyi hitwashimwinaña kulonda tuwani maliku, muloñadi wutwashimwinaña? Twadihanaña kuzata iwu mudimu muloña twamukeña Yehova niantu. Ichi chilwilu chashikijaña wuprofwetu wekala haMasamu 110:3. (Tañenu.)

10. Njilanyi yashimwinineñamu Yesu niatumbanji?

¹⁰ Yesu niatumbanji azatishili njilanyi yakushimwina? Ayileña kwejima kwadiña antu. Chakutalilahu, ashimwinineña munyikwakwa nikuyisankanu. Ayileña cheñi nakuwana antu kumatalawu. (Matewu 10:11; Luka 8:1; Yililu 5:42; 20:20) Kushimwina kwitala nikwitala diyadiña njila yayiwahi yakushimwina antu ejima.

11, 12. Kwambukaku nawaKristendomu, antu jaYehova azataña ñahi mudimu wakushimwina nsañu yayiwahi?

¹¹ Komana machechi amuKristendomu ashimwinaña nsañu yayiwahi neyi cheliliyi Yesu? Kakavulu, akulumpi jamachechi afwetañawu atañishaña antu jawu. Ayaña nakwilisha atumbanji wanyi, ekalaña nawantu wowamu. Mpinji yikwawu, alejaña antu jawu nawu ashimwineña. Chakutalilahu,  mu 2001, Popu John Paul II wahosheli mumukanda wasonekeliyi nindi, amamembala amuchechi atela kushimwina Nsañu Yayiwahi nikushimwina neyena neyi kapostolu Pawulu wahosheli nindi: “O yihuñu yinukumonami neyi nukubula kushimuna nsañu yayiwahi.” Kuhiñahu popu wahosheli nindi antu ejima amuchechi atela kuzata mudimu wakushimwina bayi neyi antu adizishawu hohuku. Ilaña, antu antesha hohu diwu anakwila mwahosheliyi.

¹² Indi aYinsahu jaYehova? Diwu hohu ashimwinaña nawu Yesu watachikili kuyuula neyi Mwanta kufuma tuhu mu 1914. Amwovwahilaña Yesu nikulemesha mudimu wakushimwina muchihandilu chawu. (Maku 13:10) Mukanda waPillars of Faith—American Congregations and Their Partners wahosha nawu aYinsahu jaYehova alemesha mudimu wakushimwina. Wahosha cheñi nawu neyi awana antu adi nanzala, ananeñi niakata, ayikwashaña ilaña avulamenaña wanyi nawu atela kushimwina hakukuma kwakanu kaayi nikuleja antu nsañu yawamwinu. A Yinsahu jaYehova atwalekañahu kushimwina nsañu yayiwahi nikulondela chadiña nakushimwinayi Yesu niatumbanji twindi.

13. Mudimu wakushimwina watela kushika kudihi?

¹³ Yesu wahosheli nindi atumbanji twindi akadizisha nikushimwina nsañu yayiwahi “mwahita matuña ejima.” Ayilejeli kwilisha atumbanji “munyuza yejima.” (Matewu 24:14; 28:19, 20) Dikwila nawu nsañu yayiwahi atela kuyishimwina mukaayi kejima.

14, 15. Yumanyi yinakumwekesha nawu aYinsahu jaYehova anashikiji wuprofwetu waYesu kutalisha kumudimu wakushimwina? (Talenu mwevulu wakutachikilahu.)

¹⁴ A Yinsahu jaYehova hohu diwu anashikiji wuprofwetu waYesu wakwila nawu nsañu yayiwahi akayishimwina mukaayi kejima. Muloñadi wutunahosheli mwenimu? MuUnited States, mwekala akulumpi jaKristendomu kwakwihi na 600,000, ilaña mudi aYinsahu jaYehova akubadika 1,200,000 anakushimwina nsañu yayiwahi. Mukaayi kejima, mwekala atupristu awaKatolika kwakwihi na 400,000, ilaña mudi aYinsahu jaYehova kubadika ha 8 miliyoni anakushimwina nsañu yayiwahi mumatuña 240. Mwamweni, aYinsahu jaYehova anakushimwina mukaayi kejima nsañu yayiwahi nawa chumichi chinakuleta mpuhu nikalemesha kudi Yehova.—Masamu 34:1; 51:15.

¹⁵ Etu aYinsahu jaYehova, tunakufwila kushimwina nsañu yayiwahi kudi antu amavulu henohu kukuma kanda. Hakwila tuzati iwu mudimu, tunabalumuni nikupulinta nyikanda, magazini, matilakiti, niyipapilu yakutambika nachu antu kukupompa kweneni nikuChanukishu mumadimi kubadika ha 700. Twayihanaña kudi antu chawaana. Chaaka chinamani, twapulintili nyikanda yashindamena haBayibolu kwakwihi na 4.5 biliyoni. Tunapulinti cheñi maBayibolu aNew World Translation of the Holy Scriptures akubadika ha 200 miliyoni mumadimi kubadika ha 130. Nawa webu sayiti yetu yidi  mumadimi kubadika 750. A Yinsahu jaYehova diwu hohu anakuzata iwu mudimu.

16. Tuneluki ñahi netu tukweti spiritu yaNzambi?

¹⁶ Mudimu wakushimwina wukamana mpinjinyi? Yesu wahosheli nindi nsañu yayiwahi akayishimwina nichakenza kukuma. Etu aYinsahu jaYehova, tunomiki mumudimu wakushimwina mumafuku akukuminina muloña tukweti spiritu yajila yaYehova. (Yililu 1:8; 1 Petulu 4:14) Antu amakwawu ayaña kumachechi ahoshaña nawu: “Akweti spiritu yajila.” Mwalala anateli kuzata mudimu wunakuzatawu aYinsahu jaYehova munanu mafuku akukuminina? Antu amakwawu esekaña kushimwina neyi chitwelaña, ilaña akañanyaña. Amakwawu anakushimwina, ilaña hakapinji kantesha hohu. Amakwawu anakushimwina kwitala nikwitala ilaña anakushimwina wanyi nsañu yayiwahi yaWanta. Kwila azata mudimu wazatiliyi Yesu nehi.

17, 18. (a) Tukuhosheladi netu aYinsahu diwu anakushimwina nsañu yayiwahi? (b) Tunakutwesha ñahi kutwalekahu kuzata iwu mudimu?

¹⁷ Anyi anakushimwina nsañu yayiwahi yaWanta makonu? A Yinsahu jaYehova hohu. Tuneluki ñahi? Muloña tunakushimwina nsañu yalala, nsañu yayiwahi yaWanta. Tunakuzatisha njila yayiwahi yakushimwina muloña twakeñakeñaña antu. Twashimwinaña muloña twamukeña Yehova niantu. Mudimu wetu wakushimwina wunashiki kwejima muloña twashimwinaña kudi antu akunyunza yejima nimumadimi ejima. Nawa tukutwalekahu kushimwina nsañu yayiwahi yaWanta nichakenza kukuma.

¹⁸ Mudimu wakushimwina nsañu yayiwahi wunakuzatawu antu jaYehova munanu mafuku akukuminina wakuhayamisha. Hanu dinu tunakutwesha ñahi kuzata iwu mudi? Kapostolu Pawulu wahosheli nindi: “Nzambi diyi wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” (Afwilipi 2:13) Yehova atwalekuhu kutukolesha kulonda tuzateña hakumina ñovu jetu mumudimu wakushimwina nsañu yayiwahi!—2 Timotewu 4:5.