1, 2. Matthaia 24:14-a Isua thusawite avângin eng zawhnate nge lo chhuak?

ISUA’N ni hnuhnûngah chuan mi zawng zawngte hnênah Lalram chanchin ṭha hrilh a ni ang tih a sawi lâwk a. (Matthaia 24:14) Jehova Thuhretute kan nih angin, kan thu hrilh rawngbâwlna avângin khawvêl puma hriat kan hlawh a ni. Mi ṭhenkhatin kan thuchah hrilh an duh laiin, mi dangte chuan an duh lo va. Mahse, kan thuchah ken duh lo ṭhenkhat pawhin kan rawngbâwlna avângin min zah a ni. Isua sawi lâwk rawngbâwlna thawktu niin kan inchhâl a. Chutianga sawi theihna kan nei em? Kan thu hrilh rawngbâwlna hi Isua sawi lâwk hna a ni tih engtin nge kan chian theih?

² Sakhaw pâwl tam tak chu Isua thuchah hril niin an insawi a. Mahse, an thu hrilhna chuan biak in te, TV te, leh Internet te a pêl lo va; chu bâkah, Isua chungchâng an zir dân an sawi satliah mai bawk a ni. Mi dangte chuan mite mamawh ṭanpuina, a nih loh leh doctor-te, nurse-te, leh zirtîrtute nia tlâwmngaia hna thawhna chu an thu hrilh ve dân niin an ngai bawk a ni. Mahse, chûng thiltihte chu Isua sawi thu hrilh rawngbâwlna a ni em?

3. Matthaia 28:19, 20-a chhinchhiah angin, Isua hnungzuitute chuan eng thil palite nge an tih ngai?

 ³ Isua chuan a zirtîrte chu mite’n an rawn pan nghâk tûrin a duh em? Duh lo! A thawhleh hnuah a hnungzuitu za têlte hnênah chuan: “Chutichuan kal ula, hnam tina mi zirtîrahte siam ula, . . .  baptis ula, thu ka pêk zawng zawng che u pawm tûrin zirtîr rawh u,” tiin a hrilh a ni. (Matthaia 28:19, 20) Chuvângin, Isua hnungzuite kan nih angin, thil pali kan tih a ngai a. Anni chu zirtîrahte siamin, baptisma chantîrin, leh kan zirtîr tûr a ni. Mahse, a hmasa berin, mite hnênah kan kal tûr a ni a. Bible lama mi thiam pakhat chuan: “Heta ‘kal’ tih hi, kalkawng kân ngai emaw, tuipui râla kal ngai emaw pawh ni se, ringtu zawng zawngte tih tûr chu a ni,” tiin a sawi.—Matthaia 10:7; Luka 10:3.

4. ‘Mihring mantu’ ni tûr chuan eng nge ngai?

⁴ Isua’n a zirtîrte lakah eng nge a beisei? Anmahni maia thu hril tûrin nge a duh a, a pâwl anga inruahmana thu hril tûrin a duh zâwk? Mi pakhat tân ‘hnam tina mite’ hnêna thu hrilh theih a nih loh avângin, a zirtîrte chu a pâwl anga an inruahman a ngai ang. Chu chu Isua’n ‘mihring mantu’ ni tûra a zirtîrte a sâwm laia a tum chu a ni. (Matthaia 4:18-22 chhiar rawh.) Isua sawi chu nghakuai chiah a, sanghain a rawn ei nghâk ṭhîn sangha mantu ang chi a ni lo. Chu ai chuan, lênkhang hmanga sangha manna chungchâng a sawina a ni a. Chutiang sangha mannaah chuan thawhrimna, inruahmanna, leh mi tam tak nêna thawhhona neih a ngai a ni.—Luka 5:1-11.

5. Eng zawhna palite nge chhân ngai a, engvângin nge?

⁵ Tûn laia chanchin ṭha hriltute hre tûr chuan, a hnuaia zawhna palite chhânna kan hriat a ngai a ni:

• Eng thuchah nge Isua hnungzuitute chuan an hrilh ang?

• Thu an hrilh chhan tûr chu eng nge ni?

• Eng tih dânte nge an hman ang?

• Thu hrilhna chu eng anga darh zau tûr nge ni a, engtia rei nge chhunzawm ni ang?

Hêng zawhnate chhânna hian he nun chhanhimna hna thawktute hre hrang tûrin min ṭanpui ang a, thu hrilh zawm zêl kan duhna chu a tinghet bawk ang.—1 Timothea 4:16.

6. Engvângin nge Jehova Thuhretute chuan thuchah dik an puang tih i rin tlat theih?

⁶ Luka 4:43 chhiar rawh. Isua chuan, “Pathian Ram chanchin ṭha” a hril a, a zirtîrte pawh hril ve tûrin a duh a ni. Tute’n nge chu thuchah chu mi zawng zawng hnêna hril? Jehova Thuhretute chauhvin an hril! Chu chu min duh lotute pawhin an pawm a. Entîr nân, ram hrang tam taka awm tawh missionary thawk puithiam pakhatin Jehova Thuhretu pakhat hnêna a sawi hi chhinchhiah ang che. A awmna ram apiangah Jehova Thuhretute chu eng thuchah nge an hrilh tih a zâwt ṭhîn a. “An â tak tak, ‘Ram chanchin ṭha’ tih hlîrin min rawn chhâng tlat,” tiin a sawi. A thusawi chuan kan â lo va, Kristian dik niin kan inpumkhat tih a târ lang zâwk a ni. (1 Korinth 1:10) Pathian Ram chu Vênnainsâng Jehova Lalram Puanchhuahna ken thuchah pawimawh ber a ni a. He magazine hi thla tin ṭawng 254-in bu 59,000,000 vêl tihchhuah a ni a, khawvêla magazine sem chhuah tam ber a ni tlat!

7. Engtin nge Kristianna rama sakhaw hruaitute chuan thuchah dik an hril lo tih kan hriat?

⁷ Kristianna rama sakhaw hruaitute chuan Pathian Ram chungchâng an sawi lo va. An sawi pawhin, an zînga tam tak chuan Pathian Ram chu thinlunga awm niin an sawi a ni. (Luka 17:21) Anni chuan Pathian Ram chu Isua rorêlna hnuaia awm vân sawrkârna a ni  tih mite chu an zirtîr lo. Isua chungchâng chu Kristmas nîah leh Easter nîah chuan an sawi tlângpui zâwk a. Pathian Ram chuan mihringte buaina zawng zawng a chingfel ang tih leh leia suahsualna zawng zawng a nuaibo thuai ang tih an hrilhfiah hek lo. (Thu Puan 19:11-21) Kristianna ram sakhaw hruaitute chuan, Isua’n Pathian Rama Lal a nih anga a tih tûrte chu an hre lo tih a chiang hle. Isua thuchah ken an hriatthiam loh avângin, thu an hrilh chhan tûr an hre lo a ni.

8. Thu hrilh chhan dik lo chu eng nge ni?

⁸ Isua zirtîrte thu hrilh chhan chu sum an hmuh nân, a nih loh leh in ropui takte sak nân a ni tûr a ni lo. Isua chuan: “A thlâwnin in hmu a, a thlâwnin pe ang che u,” tiin a sawi. (Matthaia 10:8) Chuvângin, thu hrilh rawngbâwlna chu sumdâwnna ang a ni tûr a ni lo. (2 Korinth 2:17) Isua zirtîrte chuan an thu hrilh rawngbâwlna atân hlawh pêk an beisei tûr a ni lo bawk. (Tirhkohte 20:33-35 chhiar rawh.) Isua kaihhruaina pêk chu a fiah hle chung pawhin, kohhran tam zâwkte chuan an kohhran enkawl nân, a nih loh leh an sakhaw hruaitute leh hnathawktu dangte tân pawisa khawnin an buai hle a. Chuvângin, Kristianna ram sakhaw hruaitu tam takte chu an hausa hle a ni.—Thu Puan 17:4, 5.

9. Engtin nge Jehova Thuhretute chuan chhan dik tak neiin thu an hril tih an târ lan?

⁹ Jehova Thuhretute chuan an Kingdom Hall-ah emaw, an inkhâwmpuinaah emaw pawisa an khawn em? Khawn lo ve! An rawngbâwlna chu mahni duh thua thawhlâwm thawhna hmanga chhawmdâwl a ni. (2 Korinth 9:7) Mahse, nikum khân Jehova Thuhretute chuan chanchin ṭha hrilh nân dârkâr tlûklehdingâwn hnih vêl an hmang a, thla tin Bible zirna maktaduai kua aia tam an kaihruai a ni. An thu hrilh nân hlawh pêk an ni lo va, he hna thawk tûr hian mahni pawisa phâl takin an hmang zâwk a ni. Zir chîk mi pakhat chuan Jehova Thuhretute rawngbâwlna chungchângah: “An thiltum ber chu thu hrilh leh zirtîr hi a ni,” tiin a sawi a. Jehova Thuhretute chuan suma rawih ngai sakhaw hruaitu an neih loh thu a sawi bawk. Pawisa hmuh tuma thu hril kan nih si loh chuan, kan hrilh chhan chu eng nge ni? Jehova leh mite kan hmangaihna avângin he hna hi inhuam takin kan thawk a ni. Chu rilru put hmang chuan Sâm 110:3-a hrilh lâwkna hi a tifamkim a ni. (Chhiar rawh.)

10. Isua leh a zirtîrte chuan thu hrilhnaah eng tih dân nge an hman?

¹⁰ Isua leh a zirtîrte chuan thu hrilh nân eng tih dân nge an lo hman? Mite an hmuh theihna tûr hmun apiangah an kal a ni. Entîr nân, kawtthlêrah leh dâwr hmunahte thu an hril a. An inahte pawh kalin thu an hrilh bawk ṭhîn. (Matthaia 10:11; Luka 8:1; Tirhkohte 5:42; 20:20) In tina thu hrilhna hi mi chi tinrêngte hnêna thu hrilh theih dân ṭha tak a ni.

11, 12. Chanchin ṭha hrilhna chungchângah engtin nge Kristianna rama mite thawh dân leh Jehova mite thawh dân chu khaikhin theih a nih?

¹¹ Kristianna ram sakhuate chuan Isua tih dân angin chanchin ṭha an hril em? Dân narânin, suma rawih sakhaw hruaitute chuan an mi leh sate tân thu an sawi ṭhîn a. Chûng hruaitute chuan zirtîr thar an siam lo va, an kohhran mi ni sate enkawl an tum satliah mai a ni. A châng chuan an mi leh sate chu thu hril tûrin an fuih a. Entîr nân, kum 2001 khân, Pope John Paul II-na chuan a kohhrana mite chu lehkha thawnin, “Chanchin ṭha hril suh ila, ka chung a pik dâwn si a,” tia sawitu tirhkoh Paula neih ang ṭhahnemngaihna nêna Chanchin Ṭha hril tûr an nihzia a hrilh a ni. Chutah, pope chuan thu hrilhna hi zirtîrna dawng mi tlêm tête chauh tih tûr a ni lo va, kohhran mi leh sa zawng zawngte tih tûr a ni tih a sawi. Mahse, chu fuihna zâwmtu an awm mang meuh lo.

¹² Eng nge Jehova Thuhretute chungchâng hi le? Anni chu kum 1914 aṭangin Isua’n Lal niin ro a rêl tawh tia sawitu awmchhun an ni a. Isua thu zâwmin, thu hrilh rawngbâwlna chu an nunah an dah pawimawh ber a ni. (Marka 13:10) Pillars of Faith—American Congregations and Their Partners tih lehkhabu chuan Jehova Thuhretute tân thu hrilh rawngbâwlna hi thil pawimawh tak a ni tih a sawi a. Rilṭâm te, mal nia inhria te, leh dam lote an hmuh hian ṭanpui an tum a; mahse, he khawvêl tâwpna chungchâng hrilh leh chhandamna chungchâng mite zirtîr chu an thiltum ber a ni tih an theihnghilh ngai lo tih a sawi bawk. Jehova Thuhretute chuan Isua leh a zirtîrte thu hrilh dân chu entawnin chu thuchah chu an hril zawm zêl a ni.

13. Thu hrilh rawngbâwlna chu eng anga darh zau tûr nge a nih?

¹³ Isua chuan a hnungzuitute’n “khawvêl zawng zawngah” chanchin ṭha hrilhin an zirtîr ang tih a sawi a. “Hnam tina” mite zirtîrah siam tûra thu pêk an ni. (Matthaia 24:14; 28:19, 20) Chu chu khawvêl pumah chanchin ṭha kan hrilh a ngai tihna a ni.

14, 15. Rawngbâwlna darh zau dân tûr chungchânga Isua hrilh lâwkna chu Jehova Thuhretute’n an hlen chhuak tih engin nge târ lang? (A thupui chunga milem en rawh.)

¹⁴ Khawvêl pumah chanchin ṭha chu hrilh a ni ang tih Isua hrilh lâwkna chu Jehova Thuhretute chauhvin an hlen chhuak a. Engvângin nge chu chu kan sawi theih? United State-ah Kristianna ram sakhaw hruaitu mi 600,000 vêl an awm a, chutih lai chuan Jehova Thuhretu mi 1,200,000 aia tamin chanchin ṭha an hril a ni. Khawvêl pumah Catholic puithiam 400,000 vêl an awm a; mahse, Jehova Thuhretu mi maktaduai 8 aia tam chuan ram 240-ah chanchin ṭha an hril a ni. Jehova Thuhretute’n Jehova chawimawina leh fakna thlentu chanchin ṭha chu khawvêl pumah an puang a ni tih a chiang hle!—Sâm 34:1; 51:15.

¹⁵ Jehova Thuhretute kan nih angin, kan tum ber chu khawvêl tâwp hmaa mi a tam thei ang berte hnêna chanchin ṭha hrilh a ni a. He hna thawk tûr hian, magazine te, tract te, inkhâwmpui sâwmna te, leh Hriatrengna sâwmnate  chu ṭawng 700 aia tama letlingin bu maktaduai tam tak kan chhuah a ni. Chûng thu leh hlate chu mite hnênah a thlâwnin kan sem a. Ni kum khân, Bible thu leh hla chhuah tlûklehdingâwn 4.5 vêl kan chhuah a ni. New World Translation of the Holy Scriptures tih Bible chu ṭawng 130 aia tamin bu maktaduai 200 aia tam kan chhuah bawk. Tin, kan official website-ah ṭawng 750 aia tamin thu leh hlate hmuh theih a ni. Jehova Thuhretute chauhvin chutiang hna ropui tak chu an thawk thei a ni.

16. Engtin nge Jehova Thuhretute chuan Pathian thlarau thianghlim an nei tih kan hriat?

¹⁶ Thu hrilh rawngbâwlna chu engtia rei nge chhunzawm a nih dâwn? Isua chuan chanchin ṭha chu tâwpna a thlen hma loh zawnga hrilh a ni dâwn tih a sawi a. Jehova Thuhretute kan nih angin, Jehova thlarau thianghlim kan dawn avâng chauhvin ni hnuhnûng chhûnga thu hrilh rawngbâwlnaah kan chhel thei a ni. (Tirhkohte 1:8; 1 Petera 4:14) Sakhaw mi ṭhenkhat chuan, “Thlarau thianghlim kan nei,” tiin an sawi mai thei a. Mahse, anni chuan hêng ni hnuhnûng chhûnga Jehova Thuhretute hnathawh ang chu an thawk thei em? Pâwl ṭhenkhat chuan kan tih dân anga thu hrilh chu an tum a; mahse, an hlawhchham a ni. Mi dangte chuan thu hrilh duh mah se, hun rei lo te chhûng chauh atân an duh a. Mi dang lehte chuan in tinah thu hril mah se, Lalram chanchin ṭha an hril lo. Chuvângin, Isua bul lo ṭan thu hrilh rawngbâwlna chu an thawk thei lo a ni.

17, 18. (a) Engvângin nge Jehova Thuhretute chu tûn laia Lalram chanchin ṭha puang chhuaktu awmchhun an ni tih kan hriat chian theih? (b) Engtin nge he hna hi kan thawh chhunzawm zêl theih?

¹⁷ Tute nge tûn laia Lalram chanchin ṭha hriltute chu? Jehova Thuhretute chauh an ni! Engtin nge kan hriat? Thuchah dik tak, Lalram chanchin ṭha kan hrilh vâng a ni. Kan rawngbâwlnaah mite kan zawng a, chuvângin tih dân dik tak kan hmang a. Thu hrilh chhan dik tak, Jehova leh mite hmangaihna kan nei a ni. Hnam tina mite leh ṭawng tina mite hnêna thu kan hrilh avângin kan thu hrilh rawngbâwlna chu a darh zau ber a. Tâwpna a lo thlen hma loh zawng Lalram chanchin ṭha chu kan hril chhunzawm zêl ang!

¹⁸ Hêng ni hnuhnûng chhûnga chanchan ṭha hrilhna kawnga Jehova mite hna thawh ropui tak hmuh chu a mak hle a. Mahse, engtin nge he hna hi kan thawh theih? Tirhkoh Paula chuan: “Ama lâwmzâwng atâna tih tum tûr leh bei tûra nangmahnia thawktu chu Pathian a ni si a,” tiin a sawi a. (Philippi 2:13) Theih tâwp chhuaha chanchin ṭha hril zawm zêl theih nân, Jehova chuan kan mamawh chakna chu min pe zêl rawh se!—2 Timothea 4:5. (ws16.05-E)