1, 2. Kʼianga bʼexkiaa jotso Mateo 24:14, jméni xi chjonangilee yaoná.

JE Jesús kʼoakitso nga kʼuínyason jngo tjíjtsa Sonʼnde je énnda chjotse xi tʼatsʼe Chjotaxále Niná kʼianga toje tífikjetʼa nichxin (Mateo 24:14). Nichxin xi tiyoaa ndʼaibi, ñá xi testigole Jeobá maa kʼoasʼin ʼyaná jngo tjíjtsa Sonʼnde nga Énle Niná ʼmiyasoán. Tjínkʼa chjota xi sasénle je én xi ʼmiyasoán kʼoa tjínkʼa xi tsín sasénle. Ninga kʼoalani, tokʼoamale nga kʼoasʼin ʼmiyasoán. Ánni nga tsín jao tjínniná nga toñá xi testigole Jeobá maa xi kʼoatinʼia jmeni xi kitso je Jesús.

² Nʼio nkjín relijión xi kʼoatso nga kui tjíotsoyason jmeni xi kitso je Jesús. Kʼianga tsoyason tsole yaole, kʼiaa nga tsoya ya yo̱ngo̱, tsa ya telebisión kʼoa tsa ya Internet. Tjínkʼa chjota xi kʼoatso nga tsoyason kʼianga bʼéyanajmíle xi kjaʼaí josʼin tsabeni xi tʼatsʼe Jesús. Kʼoa tjínkʼa xi kʼoatso nga kʼoasʼin tjíosítjoson jokitso je Jesús kʼianga binyakao xi nganʼio machjénle. Tobʼelañá, tsa tokjoatjao síxki je xi chjinexki ma kʼoa tsa tokjoatjao tsoya je xi maestro ma. Tonga a kui xi kitsole Jesús je chjotale nga kʼoasʼin.

3. Tojo tso Mateo 28:19, 20, jmé xi ño koya tjínnele sʼin je chjotale Cristo.

 ³ A kui xi kitsole Jesús je chjotale nga tobe kuichonrʼoe je chjota. Mai, nga̱ kʼianga jejaʼáyanile i kitsole je chjotale xi siento mani: “Kuinga tangínsíño, kʼoa chjotana tikao je chjota xi tjín ngakjijnda naxinandá, cha̱nisʼenngindáo [...], takoyalao nga katasítjoson ngayeje jme xi an tsakʼeneno” (Mateo 28:19, 20). Tojo tso én jebi, je xi chjotale Cristo ma tjínnele chjotale Cristo sikao je chjota, ska̱nisʼenngindá kʼoa kuitsoyale. Tonga títjon kjoanla koaikásjai je chjota. Jngo chjota xi tʼatsʼe Biblia kotʼayason kʼoatso nga jngo xi chjotale Cristo ma tjínnele koai tojñani tjío je chjota, ninga chrian kʼoa ninga nʼio kjin tjío (Mateo 10:7; Lucas 10:3).

4. Jmé xi machjén kʼianga kʼoéxkoá chjota.

⁴ A kʼoakitsole Jesús je chjotale nga tojngó jngó kuitsoyason. Axo kʼoakitso nga ñaki jtín sʼin koatio kʼoa nga ñaki nda kʼoendajin nga kuitsoyason. Tsa tojngo chjotale Cristo alikui kʼoakoa̱nle kuitsoyasonle “je chjota xi tjín ngakjijnda naxinandá”. Kuinga je xi chjotale Cristo ma tjínnele nga ñaki nda kʼoendajin josʼin kuitsoyason. Kui xi kitso je Jesús kʼianga kʼoakitsole chjotale nga katabʼéxkó chjota (tʼexkiai Mateo 4:18-22). * Alikui kui xi kitsonile nga tojngó jngó sixá je chjotale josʼín jngo chjota xi yá ndsitin síchjén nga bʼasjengindá jti̱, nga tokoyala saʼnda nga bichókjine je jti̱ jmeni xi bʼéjkole yá. Kui xi kitsole je Jesús josʼín je chjota xi naʼya síchjén nga bʼasjengindá jti̱, nga nkjín mani nga síxá, nga nʼio síxá kʼoa nga síxájtín (Lucas 5:1-11).

5. Jñánile xi ño koya tjínnele jchaa kʼoa ánni.

⁵ Kʼianga jchaa ʼyani xi tjíotsoyason je énnda chjotse xi tʼatsʼe Chjotaxále Niná, ñola koya tjínni xi kataʼyaa.

• Jmé énni xi tjínnele kuitsoyason je chjotale Cristo.

• Jméni xosikao nga kuitsoyasonni.

• Jósʼin tjínnele kuitsoyason.

• Jókji ʼnde tjínnele kuitsoyason kʼoa jokji tse kʼoasʼin.

Nga jchaa xi tʼatsʼe jebi, kui xi koasenkaoná nga jchaa ʼyáni xi kʼoatjíosʼín xále Niná xi koa̱n kʼoasjentjai je chjota. Kʼoa kui xi koasenkaoná nga tosi tonda kʼuínyasoán (1 Timoteo 4:16).

6. Ánni nga tsín jao tjínniná xi testigole Jeobá maa nga kui tiʼmiyasoán je én xi kitso je Jesús.

⁶ (Tʼexkiai Lucas 4:43). * Je Jesús kui kitsoya je “énnda xi tʼatsʼe kjoatéxomale Niná”. Kʼoa kui xi mele nga kʼoati sʼin je chjotatjenngile. Tojé testigole Jeobá xi kui én tjíotsoyasonle je chjota. Saʼnda je chjota xi tsín sasénle tʼatsaan be nga kʼoanʼia. Tobʼelañá, kataʼyala jokitsole jngo testigole Jeobá je xi misionero koan kʼoa xi naʼmi koan. Kʼoakitso nga nkjín naxinandá tsakʼejna kʼoa nga jngó jngó naxinandá jñani tsakʼejna kiskonangile je testigole Jeobá jmé énni xi tsoyason. Kʼoa i kitso: “To chjotachini nga̱ to itso ngatsʼi: Kui ʼmiyaijin je énnda chjotse xi tʼatsʼe Chjotaxále Niná”. Jmeni xi kitso chjota jebi kui xi bakó nga jtín sʼin tiyoaa nga̱ ñaki chjotale Cristo maa kʼoa tsín tsa to chjotachinijián (1 Corintios 1:10). Je xi ngisa nʼio nchja̱ni rebista jebi kui tʼatsʼe Chjotaxále Niná kʼoa ngakjijngo jaʼaínle i ʼmi: Xo̱n xi Bájinkonná tʼatsʼe Chjotaxále Jeobá. Rebista  jebi 254 én tíbitjo kʼoa me 59 miyón bitjo nga xki̱ sá. Kui xi ngisa tíbʼabíson ngakjijnda Sonʼnde.

7. Ánni kʼoabixónñá nga tsínkui tsoyason je én xi kitso je Jesús je xi nyatítjonle relijión xi chjotale Cristo tsole yaole.

⁷ Je xi nyatítjonle relijión xi chjotale Cristo tsole yaole alikui kui énnda chjotse xi tʼatsʼe Chjotaxále Niná tsoyason. Kʼoa tsakui kuinchja̱ni kʼoatso nga ya tíjnajin ni̱ma̱ná (Lucas 17:21). Alikui kui tsoya nga ya ngʼajmi tíjna je Chjotaxále Niná kʼoa nikuijinla tsoya nga je Jesús xi Rey sʼin tíjna. Tokʼiaa nchja̱ni tʼatsʼe Jesús kʼianga Navidad kʼoa tsa kʼianga Nichxin Xkón. Tsínkui tsoya nga je Chjotaxále Niná kʼoendajin je kjoa xi tjínle ngatsʼi chjota kʼoa nga jeme kjoaʼaxin je kjoatsʼen (Apocalipsis 19:11-21). Likui be jmeni xi sʼin je Jesús kʼianga Rey sʼin tíjnale je Chjotaxále Niná. Kʼoa nga tsín be jme én xi kitsoya je Jesús, kʼoati tsín be ánni nga tjínnenile kuitsoyason.

8. Jméni xi tsín kʼoasʼín je chjotale Cristo nga tsoyason.

⁸ Je chjotale Cristo alikui kui xá tsoyasonni nga tao̱n kuinje̱le kʼoa tsa síxkónkjoan ndʼia xi kʼoenda. Je Jesús i kitsole je chjotale: “Tokjoatjao kitsʼaino, tokjoatjao tʼainio” (Mateo 10:8). Alikui koa̱n nga negosio si̱koaa je Énle Niná (2 Corintios 2:17). Je chjotale Cristo alikui machjíle nga tsoyason (tʼexkiai Hechos 20:33-35). * Ningalani kʼoakitso je Jesús, nʼio nkjín relijión xi tao̱n síjé nga masinle yo̱ngo̱le kʼoa xi bʼéchjínile je xi nyatítjonle kʼoa kao xi ya síxá. Kʼoa kuinga nʼio nyiná kjimani je xi nyatítjonle relijión (Apocalipsis 17:4, 5).

9. Jósʼin bakó je testigole Jeobá nga tsín tao̱n xi tjíosʼínnile kʼianga tjíotsoyason.

⁹ Jósʼín je testigole Jeobá. A tao̱n síjé nga satíole kjoajtín kao kjoajtíntse. Mai. Yaa ni̱ma̱ná nroajinni jotjín tao̱n nikʼéjnaa, kʼoa kui xi machjén nga tíbitjoson je xá xi kitso Jesús (2 Corintios 9:7). Ningalani tsín machjíná nga Biblia ʼmiyaa, je nó xi jaʼato me 2,000 miyón ora tsakʼinyasoán kʼoa tsʼato ñajan miyón estudio tsakʼé nga xki̱ sá. Tsaan tao̱n nichjén kʼianga kʼoanʼia xá jebi. Jngo chjota xi tʼatsʼe relijión kotʼayason kʼoakitso nga je xá xi ngisa sʼín je testigole Jeobá kuinga tsoyason kʼoa nga Biblia tsoyale je chjota. Kʼoa kʼoakitso nga tsín machjíle je xi  nyatítjonle. Tonga tsa tsín tao̱n njená, ánni nga ʼmiyasonñá. Kui kʼoanʼiañá nga tsjoachaa je Jeobá kao chjota. Nga kʼoanʼia kui tíbitjoson jmeni xi tso ya Salmo 110:3 * (tʼexkiai).

10. Jósʼin kitsoyason je Jesús kao chjotale.

¹⁰ Jósʼin kitsoyason je Jesús kao chjotale. Yaa ki tojñani nga tjío je chjota. Tobʼelañá, kitsoyason ya yandiaa kao ya jinndi̱tsi̱n. Kʼoati kitsoyason nga xki̱ niʼya (Mateo 10:11; Lucas 8:1; Hechos 5:42; 20:20). Kʼianga xki̱ niʼya kitsoyason kisixá chʼin chʼin kʼoa kʼoasʼin tsakjákaonajmíni toʼya chjotani.

11, 12. Jósʼin tsín mangóson josʼin tsoyason je testigole Jeobá kao je relijión xi chjotale Cristo tsole yaole.

¹¹ Jósʼín je relijión xi chjotale Cristo tsole yaole. A kʼoasʼin tsoyason je énnda chjotse xi tʼatsʼe Chjotaxále Niná jokisʼin je Jesús. Mai. Me tongatsʼi nga bʼéchjíle je xi nyatítjonle nga katatsoyale. Tonga alikui fikásjai je chjota tojo kisʼin je Jesús, tokui xi mele nga tojo ya katabatio je chjota xi jeya tjíojinle. Sakʼoaa kʼoatsole je chjotale nga katatsoyason. Tobʼelañá, kʼianga nó 2001, je papa Juan Pablo II jngo karta kiski jñani kʼoatso nga je xi katóliko ma tjínnele kʼoasʼin kuitsoyason jokisʼin je pastro Pablo, nga i̱ kitso: “Ma̱xónia tsa tsín kuinchjaya je énnda xi tʼatsʼe Cristo”. Je Papa kʼoati kitso nga tsín tsa tojé xi kuitsoyason je xi xá kʼuínyanile, nga tjínnele kuitsoyason ngatsʼi xi ya fi yo̱ngo̱. Tonga nʼio tochoa xi tsakʼaʼénle.

¹² Toñá ñá xi testigole Jeobá maa xi ʼmiyasoán nga jetíbatéxoma je Jesús ya ngʼajmi tjen nó 1914. Nʼio bʼailee kjoandosin nga ʼmiyasoán je Énle Niná, tojo kisʼin je Jesús (Marcos 13:10). Jngo libro xi tʼatsʼe relijión nchja̱ni, kʼoakitso nga je xi ngisa nʼio tsjoále kjoandosin je testigole Jeobá kuinga tsoyason. Kʼoakitso nga binyakao je chjota xi tsínle xi kjine, xi tojé tjío kʼoa tsa xi tjíomʼe, tonga xi ngisa kʼoasʼín kuinga tsoyason nga jeme kjoetʼa xi chon sonʼnde kʼoa jmeni xi tjínnele sʼiaan nga kuitjo̱ntjailee yaoná. Kʼianga tiʼmiyasoán kʼoasʼin tiʼmiyaa jokisʼin je Jesús kao chjotale.

13. Jñáni tjen kʼuínyasoán je énnda chjotse.

¹³ Je Jesús kʼoakitso jñani tjen kuitsoyason je chjotale (chótsenlai je rekuadro “Jósʼin tsoyanile”). Kʼoakitso nga kuitsoyasonle “ngatsʼi naxinandá” je énnda chjotse xi tʼatsʼe Chjotaxále Niná. Kʼoakitso nga chjotatjenngile Jesús sikao je chjota “ngakjijnda naxinandá” (Mateo 24:14; 28:19, 20, TNM). Kuinga je xi chjotale Cristo ma tjínnele kuitsoyason je énnda chjotse ngakjijnda Sonʼnde.

14, 15. Ánni kʼoabixónsíñá nga tjíosítjoson je testigole Jeobá jmeni xi tongini kitso je Jesús (chótsenlai sén xi fitsʼiani kjoaʼmiya jebi).

¹⁴ Toñá ñá xi testigole Jeobá maa xi kʼoasʼin tinitjosoán jmeni xi tongini kitso je Jesús, nga sa̱kóyason je énnda chjotse jngo tjíjtsa Sonʼnde. Ánni kʼoabixónsíñá. Tobʼelañá, ya Estados Unidos, 600 jmi mani xi nyatítjonle relijión xi chjotale Cristo tsole yaole. Tonga jngo miyón kao jao sientola jmi mani je testigole Jeobá xi tjíotsoyason ya naxinandá jebi. Kʼoa jngo tjíjtsa Sonʼnde, ñola siento jmi mani je naʼmi xi katóliko, tonga je testigole Jeobá tsʼato jin miyón mani kʼoa 240 naxinandáyʼai tjíotsoyason. Jebi kui xi bakóná nga ñá xi testigole Jeobá maa tiʼmiyasonñá jngo tjíjtsa Sonʼnde. Nga kʼoatinʼia jé Jeobá tíbitjongʼa (Salmo 34:1; 51:15).

¹⁵ Je xi mená xi testigole Jeobá maa kuinga nʼio nkjín chjota kʼuínyalee nga kjesa  faʼaijin kjoafetʼa. Nga tíbitjosonná jebi, tsʼato 700 én tichʼasjee kʼoa tinikʼatoyaa je libro, rebista, tratado kao xi kjaʼaísanile. Kʼoa alikui batenaa je xo̱n xi bʼailee chjota. Je nó xi jaʼato 4,500 miyón xo̱n xi Énle Niná yʼangini kichʼasjee. Kʼoati jetsʼato 200 miyón Biblia tichʼasjee xi tsʼe Traducción del Nuevo Mundo de las Santas Escrituras kʼoa tsʼato 130 én jetíbitjo. Kʼoa je pájina xi tíjnaná ya Internet tsʼato 750 én faʼaitʼa. Toñá ñá xi testigole Jeobá maa xi kʼoatinʼia.

16. Ánni kʼoabixónñá nga je testigole Jeobá xi tjínle nganʼiotsjele Niná.

¹⁶ Jókji tse kʼuínyason jmeni xi kitso je Jesús. Kʼoakitso nga sa̱kóyason saʼnda nga kjoaʼaí kjoafetʼa (Mateo 24:14). Ñá xi testigole Jeobá maa tiʼmiyasonñá nichxin fetʼa xi tiyoaa ndʼaibi nga̱ kui tíbasenkaoná je nganʼiotsjele Niná (Hechos 1:8; 1 Pedro 4:14). Tjínkʼa chjota xi kjaʼaí relijión tjíojin xi kʼoati tso nga tjínle nganʼiotsjele Niná. Tonga a kʼoatjíosʼín jotinʼia ñá xi testigole Jeobá maa nichxin fetʼa xi tiyoaa ndʼaibi. Tjínkʼa xi mele kʼoasʼin kuitsoyason jotinʼia, tonga alikui kjimale kʼoatjíosʼín. Tjínkʼa xi mele kuitsoyason, tonga tochoatse mele kʼoasʼin. Kʼoa tjínkʼa xi xki̱ niʼya tsoyason, tonga tsínkui tsoyason je énnda chjotse xi tʼatsʼe Chjotaxále Niná. Alikui kʼoatjíosʼín jokitso je Jesús.

17, 18. 1) Ánni nga tsín jao tjínniná nga toñá xi testigole Jeobá maa xi tiʼmiyasoán je énnda chjotse. 2) Ánni nga kjima tiʼmiyasonñá.

¹⁷ Tojosʼin jekaʼyaa, ʼyáni xi tjíotsoyason je énnda chjotse nichxin xi tiyoaa ndʼaibi. Toñá ñá xi testigole Jeobá maa. Ánni kʼoabixónñá. Xi títjon, kuinga kui tiʼmiyasoán je én xi kitso je Jesús, xi tsonile, je énnda chjotse xi tʼatsʼe Chjotaxále Niná. Xi majaoni, kʼoatinʼia jokitso je Jesús, nga timangínkjasjee je chjota. Xi majanni, kuinga ʼmiyasonñá nga tsjoachaa je Jeobá kao chjota. Xi mañoni, nʼio nkjín chjota tiʼmiyalee, tiʼmiyalee ngakjijnda naxinandá kʼoa tojme én xi nchja̱. Xi maʼaonni, kuinga tosi tonda kʼuínyasoán saʼnda nga kjoaʼaí kjoafetʼa.

¹⁸ Tokʼoamaná ngayeje jmeni xi tísʼín je naxinandále Jeobá nichxin xi tiyoaa ndʼaibi. Ánni nga kjima tiʼmiyasonñá jngo tjíjtsa Sonʼnde je énnda chjotse. Je pastro Pablo i kitso: “Je Niná nda tísíxájin ni̱ma̱no, josʼin nga mele kjoandale, jméni nga kʼoakuitsosínitakon nga jon, kʼoa jméni nga kʼoasʼiansínio” (Filipenses 2:13). Kuinga tosi tonda si̱jésínilee je Jeobá nga katatsjoáná nganʼio nga kʼuínyasoán (2 Timoteo 4:5).