1, 2. A mauzyo ci yano antu yanguzya pa mulandu wa mazwi yano Yesu walanzile aaya pali Mateo 24:14?

YESU wasoowile ukuti umu manda akusyalikizya, ilandwe lisuma ilya Wene lilakosoolwa uku yantu yonsi. (Mateo 24:14) Swe ya Nte Yakwe Yeova, twamanyikilwa uku mulimo wa kusimikila umu nsi yonsi. Yamwi yatemwa ilandwe lino tukasimikila, yamwi nayo yalipata. Nomba na yaayo kwene apata vino tukasimikila yatucindika pa mulandu nu mulimo kwene uu. Tukati sweswe tukaomba sile umulimo uno Yesu walandangapo. Uzye twakwata insambu zya kulanda vivyo? Twasininkizya uli ukuti umulimo wa kusimikila uli mulimo uno Yesu walandangapo?

² Antu amu mipepele iingi yakati yakasimikila ilandwe lyakwe Yesu. Nomba imisimikilile yao yaya sile iya mu macalici, pa ma TV, pa Intaneti nanti sile ukunena antu vino cali pakuti yasambilile pali Yesu. Yauze nayo yakalola ukuti ukuomba imilimo ya kwazwilizya antu yauze wakwe ukuya dokota, nasi nanti mwalimu ale yakusimikila. Nomba uzye ukucita vivyo ali mulimo wa kusimikila uno Yesu walandangapo?

3. Kulingana na mazwi aya pali Mateo 28:19, 20, ivyani vino alondezi yakwe Yesu yalinzile ukucita?

 ³ Uzye Yesu walondanga asambi yakwe yaloleela antu ukuya kuli aliyo? Awe! Pa cisila ca kututuluka, Yesu wanenyile alondezi yakwe aingi ukuti: “Yangini, . . . mucite antu amu nko zyonsi kuya alondezi yane. Mwayawatizya . . . , nu kuyasambilizya kucita vyonsi vino namunenanga.” (Mateo 28:19, 20) Fwandi vino sweswe yasambi yakwe Yesu tulinzile ukucita ivintu 4. Tulinzile ukulenga antu kuya alondezi, kuyawatizya nu kuyasambilizya. Nomba inkoleelo tulinzile ukuya uku yantu. Umwi uwasambilila sana pali vyakwe Baibo watiile: “Izwi lya kuti ‘ukuya,’ i ncito ikapeelwa uku muntu wensi uwazumila, kungaya ukupita umu miseo nanti kulamba yemba.”​—Mateo 10:7; Luka 10:3.

4. I vyani vikalondekwa pakuti umuntu aye ‘umulondo wa yantu’?

⁴ I vyani vino Yesu wenekelanga alondezi yakwe ukucita? Uzye walondanga ukuti yasimikila wenga wenga, nanti walondanga ukuti yaombela pamwi? Kwene umuntu wenga atange asimikile “umu nko zyonsi,” fwandi asambi yakwe yalinzile ukuombela pamwi. Ali vino Yesu walozyangako lino wamile asambi yakwe ukuya “alondo ya antu.” (Welengini Mateo 4:​18-​22.) Yesu atalozyanga ku mulondo akaomvya indowani na lyambi alino aalolela kuti inswi ilemye. Wene ulondo uno walandanga uwa kuomvya isumbo lya kuvuwilako. Ukuomvya inzila iyo kwalondekwanga ukuombesya, ukulemenkana, alino na antu aingi ukuombela pamwi.​—Luka 5:​1-​11.

5. A mauzyo ci 4 yano tulinzile ukwasuka, nupya u mulandu ci?

⁵ Pakuti tumanye aakasimikila ilandwe lisuma ndakai, tulinzile ukwasuka amauzyo yaa 4:

• I landwe ci lino alondezi yakwe Yesu yalinzile ukusimikila?

• I cani cilinzile ukuyalenga kuti yasimikila?

• Iinzila ci zino yalinzile ukuomvya pa kusimikila?

• Yalinzile ukuomba uli umulimo uu wa kusimikila umu nsi yonsi, nupya yalinzile ukuomba ukufika lilaci?

masuko uku mauzyo yaa yamatwazwa ukumanya aakaomba umulimo uu uwa kupususya, nupya yamalenga twalondesya ukutwalilila ukusimikila.​—1 Timoti 4:​16.

6. U mulandu ci uno mungasininkizizya ukuti ya Nte Yakwe Yeova ali yano yakasimikila ilandwe lino Yesu wasimikilanga?

⁶ Welengini Luka 4:​43. Yesu wasimikilanga “ilandwe lisuma lya Wene,” avino akalonda na alondezi yakwe yacita. Antu ci aakasimikila ilandwe lilyo uku antu yonsi? A Nte Yakwe Yeova sile! Na antu sile aatupata nayo kwene yamanya vivyo. Uvwini vino simapepo umwi misyonali uwaombela umu mpanga izipusane pusane wanenyile Nte Wakwe Yeova umwi. Umu mpanga zyonsi zino wikalamo  uzyanga ya Nte Yakwe Yeova ilandwe lino yakasimikila. Simapepo watiile, “Ya Nte yonsi atumpe, pano umu mpanga zyonsi yasukanga ivili vimwi, yatangi: ‘I landwe lisuma ilya Wene.’ ” Vino simapepo walanzile vikasininkizya ukuti tutatumpa lelo twalemenkana ukulangilila ukuti sweswe Ina Klistu ya cumi. (1 Kolinto 1:​10) Uwene wakwe Leza ali landwe ilikazanwa sana umu Lupungu Lwa Mulinzi Ulukamanyisya Antu pa Wene Wakwe Leza. Ulupungu luu lwaya umu ndimi 254, nupya lukapulintwa umupipi na makopi 59,000,000 cila mwezi, i calenga ukuti luye ali lupapulo luno antu yakapokelela sana umu nsi yonsi.

7. Uzye twamanya uli ukuti ya simapepo yasisimikila ilandwe lino Yesu watunenyile ukuti twasimikila?

⁷ Ya simapepo ya mu macalici yasisimikila pa Wene Wakwe Leza. Ndi cakuti yakulanda pa Wene, aingi yakati acimwi sile icaya umu mwenzo wa muntu. (Luka 17:21) Yasisambilizya antu ukuti Uwene uteeko uwa mwi yulu ukateekwa na Yesu. Lelo yakalanda sile pali Yesu ndi cakuti kuli Klisimasi nanti Isita. Yasilondolola ukuti Uwene uulafumyapo intanzi izikacitikila antu, nu kuti likwene sile wasya ufumyepo iviipe vyonsi ivikacitika pano nsi. (Umbwilo 19:11-​21) Ya simapepo ya macalici yaa, yatamanya vino Yesu, Umwene uwa Wene Wakwe Leza alacita. Nupya pa mulandu wakuti yatamanya ilandwe lyakwe Yesu, yatamanya umulandu uno yalinzile ukusimikilila.

8. I cintu ci citalinzile ukutulenga ukuti twasimikila?

⁸ Asambi yakwe Yesu yatalinzile ukusimikila pakuti yapanga impiya nanti pakuti yakuula ivikulwa vya lulumbi. Yesu watile: “Mwapelwa amaka yakucita vii uwila, caleka namwe kwene kacitilini antu uwila.” (Mateo 10:8) Fwandi umulimo wa kusimikila utalinzile ukuya umulimo wa uculuzi. (2 Kolinto 2:​17) Asambi yakwe Yesu yatalinzile ukunena antu ukuti yayalipila pa mulimo wa kusimikila uno yakaomba. (Welengini Milimo 20:33-​35.) Nanti icakuti vino Yesu walanzile vyuvwikike, umu macalici aingi yakapoka impiya uku yantu pakuti sile macalici yao yatwalilile ukuyako na pakuti yalipile ya simapepo nayauze sile yano yakalemba ukuti yayaombela. Na cii calenga ukuti ya simapepo yaa yaye sana akama.​—Umbwilo 17:​4, 5.

9. Uzye ya Nte Yakwe Yeova yakalanga uli ukuti asi impiya izyalenga yasimikila?

⁹ Uzye ya Nte Yakwe Yeova yakapisyamo imbale zya mituulo lino yali apa Ng’anda ya Wene nanti pa maukongano yakalamba? Awe! Umulimo wao ukatungililwa nu musangulo wa kuitemelwa. (2 Kolinto 9:7) Nanti ciye vivyo, umwaka wasizile ya Nte Yakwe Yeova yaomvile umu mulimo uu uwa kusimikila amaawala 2 bilyoni ukusimikila ilandwe lisuma nupya yatungululanga amasambililo ya Baibo ukucila pali 9 milyoni cila mwezi. Yasilipilwa pa mulimo uu lelo yaya ni nsansa nanti icakuti yakaomvya impiya zyao  pa kuomba umulimo uu. Aakalondelezya umwi walanzile pa mulimo uno ya Nte Yakwe Yeova yakaomba, ukuti: “Cino yakalondesya u kusimikila nu kusambilizya.” Nupya walanzile ukuti ya Nte Yakwe Yeova yatakwata ya simapepo akulipila. Fwandi ndi cakuti tusisimikila pa mulandu ni mpiya, i cani cikalenga twasimikila? Tukaitemelwa ukuomba umulimo uu pa mulandu wakuti twatemwa Yeova na antu. Na pa mulandu wakuti tukacita vii, tukafikilizya usesemo uwaya pali Masamu 110:3. (Welengini.)

10. Iinzila ci zino Yesu na asambi yakwe yaomvyanga pa kusimikila?

¹⁰ I nzila ci zino Yesu na asambi yakwe yaomvyanga pa kusimikila? Yayanga uku ncende konsi kuno yangazana antu. Yasimikilanga umu miseo na pa ma maliketi. Nupya yakonkanga na antu mu mang’anda yao. (Mateo 10:11; Luka 8:1; Milimo 5:​42; 20:20) Ukusimikila uku ng’anda ni ng’anda yali ali nzila isuma iyakusimikila uku antu yonsi.

11, 12. Uzye imiombele ya antu yakwe Yeova iya kusimikila ilandwe lisuma yapusana uli ni ya mu macalici yauze?

¹¹ Uzye amu mipepele iingi yakasimikila ilandwe lisuma wakwe vino Yesu wacitanga? Ilingi ya simapepo yano yakalipila yakasimikila sile uku yantu amu macalici yao. Ya simapepo yasipanga asambi apya, lelo yakalonda sile ukusungilila antu yaya kwene yano yakwata mpiti. Insita zimwi yakaezya ukukomelezya antu yao ukusimikila. Umu 2001, Papa John Paul II walemvile  kalata ukuti amu calici cakwe yalinzile ukusimikila Ilandwe nu kuya acincile wakwe vino umutumwa Paulo wali, uwalanzile ukuti: “Kalanda kunondi ndi nsyakukosola Ilandwe.” Papa walanzile ukuti umulimo uu uwa kusimikila utalinzile ukusimikilwa sile na antu anono asambiliziwa, lelo ulinzile ukusimikilwa na antu yonsi aya umu calici. Nomba aanono sile akalondela amazwi yayo.

¹² Nga ya Nte Yakwe Yeova yene? Aliyo sile aakasimikila ukuti Yesu ali Kateeka nupya watandike ukuteeka umu 1914. Yakauvwila Yesu nupya yakakolezya umulimo wa kusimikila lyonsi umu umi wao. (Mako 13:10) Ibuku limwi (Pillars of Faith​—American Congregations and Their Partners) likati ya Nte Yakwe Yeova yacindikisya sana umulimo wa kusimikila. Nupya likati ndi cakuti yazana antu ali ni nzala, iyazukilwa, alwale, yakaezya na maka ukuyazwa lelo yasiilila umulimo wao uwa kusimikila ukuti impelelekezyo ya nsi ili mupipi nu kusambilizya antu pa kupusuka. Ya Nte Yakwe Yeova yakatwalilila ukusimikila ilandwe lilyo nu kukolanya inzila zino Yesu na asambi yakwe yaomvyanga pa kusimikila.

13. Uzye umulimo uu uwa kusimikila ulinzile ukuombwa uli?

¹³ Yesu walanzile ukuti alondezi yakwe yalaasimikila nu kusambilizya antu ilandwe lisuma “mu nsi yonsi.” Wayanenyile ukupanga antu “amu nko zyonsi,” ukuya alondezi. (Mateo 24:14; 28:19, 20) Ci cikupiliula ukuti ilandwe lisuma lyalinzile ukukosolwa umu nsi yonsi.

14, 15. I cani cikasininkizya ukuti ya Nte Yakwe Yeova aakafikilizya usesemo uno Yesu wasoowile pali vino umulimo uu wali nu kuombwa? (Lolini ivikope vyakutandikilako.)

¹⁴ Ya Nte Yakwe Yeova sile, aakafikilizya usesemo wakwe Yesu uwakuti ilandwe lisuma lilinzile ukusimikilwa umu nsi yonsi. U mulandu ci uno twalandila vivyo? Umu United States mwaya yasimapepo umupipi na 600,000, lyene mwaya ya Nte Yakwe Yeova 1,200,000 aakasimikila ilandwe lisuma umu mpanga iya. Umu mpanga yonsi mwaya ya simapepo ya ku Katolika umupipi na 400,000, lelo ya Nte Yakwe Yeova aakasimikila ilandwe lisuma umu mpanga 240 yaya antu ukucila pali 8 milyoni. Cii cikulangilila paswe ukuti ya Nte Yakwe Yeova yakasimikila ilandwe lisuma umu nsi yonsi, na ci cikalenga umucinzi nu lulumbi viye kuli Yeova!​—Masamu 34:1; 51:15.

¹⁵ Swe ya Nte Yakwe Yeova cino tukalondesya ukucita u kusimikila ilandwe lisuma uku antu aingi lino impela itatala iiza. Pakuti tuombe umulimo uu, twasenula nu kusalanganya mabuuku, ya magazini, tupepala twi landwe, nu twakulalikilapo antu uku ukongano nu ku Ciusyo umu ndimi ukucila pali 700. Tukasila antu impapulo zii ukwaula ukulipilisya. Umwaka wasizile twasalanginye impapulo izikalanda pali Baibo umupipi na 4.5 bilyoni. Nupya twasalanganya amakope 200 milyoni yakwe Baibo wa Amalembo ya Calo Cipya umu ndimi ukucila pali 130. Pali webusaiti witu musuma cuze, paya vyeo nyanya umu ndimi mupipi na 750. Ya Nte Yakwe Yeova sile aakaomba umulimo uu uwakuzungusya.

16. Twamanya uli ukuti ya Nte Yakwe Yeova yakwata umupasi wakwe Leza?

 ¹⁶ Uzye umulimo wa kusimikila ulinzile ukuombwa ukufika lilaci? Yesu watiile ilandwe lisuma lilakosoolwa ukufika lino impela iliza. Swe ya Nte Yakwe Yeova tukazizimizya kuomba umulimo uu uwa kusimikila umu manda yaa akusyalikizya pa mulandu wakuti twakwata umupasi wa muzilo ukufuma kuli Yeova. (Milimo 1:8; 1 Petulo 4:​14) Antu yamwi a vyamapepo limwi yangati “Twakwata umupasi wa muzilo.” Nomba uzye yangaomba milimo uno ya Nte Yakwe Yeova yakaomba umu manda yaa akusyalikizya? Yamwi yezya ukusimikila wakwe vino tukacita, lelo yavilwa. Yauze nayo yaipeelesya ukusimikila, lelo apa nsita sile inono. Yauze nayo yangasimikila uku ng’anda ni ng’anda lelo yasisimikila ilandwe lisuma ilya Wene. Fwandi yasiomba umulimo uno Yesu watandike.

17, 18. I cani calenga tusininkizye ukuti ya Nte Yakwe Yeova aliyo yakasimikila ilandwe lisuma ilya Wene ndakai? (b) U mulandu ci uno caticicindamila ukutwalilila ukuomba umulimo uu?

¹⁷ Nga lyene aaweni aakasimikila ilandwe lisuma ilya Wene ndakai? A Nte Yakwe Yeova sile! Twamanya uli? Pano tukasimikila ilandwe lino Yesu walandangapo, ilandwe lisuma ilya Wene. Tukaya tukulonda antu umu mulimo wa kusimikila, fwandi tukaomvya inzila zino Yesu waomvyanga pa kusimikila. Twakwata umulandu usuma uno tukasimikilila, nu mulandu uwo uwakuti twatemwa Yeova na antu. Umulimo witu uu uwa kusimikila ukaombwa ningo pano tukasimikila uku antu amu nko zyonsi nu mu ndimi. Nupya tulatwalilila ukusimikila ilandwe lisuma ilya Wene ukufika na lino impela iliza!

¹⁸ I cakuzungusya ukulola vino antu yakwe Yeova yakaomba umulimo uu usuma cuze wa kukoosola ilandwe lisuma umu manda yaa akusyalikisya. Nomba tukakwanisya uli kuomba mulimo onsi uu umu nsi yonsi? Umutumwa Paulo walondolwile ati: “Leza akaomba muno muli kuti mwalonda kuomba vivyo vingamuzanzya.” (Filipi 2:​13) Si Yeova atwalilile ukutupeela amaka aakulondekwa pa kuti tungaaomba papezile maka itu pa kuti tungatwalilila ukusimikila ilandwe lisuma!​—2 Timoti 4:5.