1, 2. Hadia wanofuda sanandrösa ba wehede Yesu nisura ba Matai’o 24:14?

NO IFA’ELE’Ö Yesu wa ba ginötö safuria andre, teturiaigö duria somusö dödö sanandrösa ba Mbanua Lowalangi ba niha fefu. (Matai’o 24:14) La’ila niha ba zi sagörö ulidanö wa ya’ita andre Samaduhu’ö Yehowa börö halöwö fanuriaigö nifaluada. So zomasi mamondrongo duria nifa’emada, so göi zi lö’ö. Hewa’ae so zi lö omasi manema, hiza’i la’osinangegö zui sa’atö halöwö nifaluada. Tola tawa’ö wa ha ya’ita zamalua halöwö nibe’e Yesu. Hadia sinangea tawa’ö zimane da’ö? Hewisa wa tola faduhu dödöda wa halöwö fanuriaigö nifaluada andre no halöwö nifa’ele’ö Yesu?

² Oya agama sanguma’ö wa no laturiaigö niwa’ö Yesu. Hiza’i, fanuriaigö nifaluara lafalua na lafa’ema huhuo ba gereja, ba TV mazui ba Internet ba latutunö ma’ifu hewisa wa tola lafaha’ö ira sanandrösa khö Yesu. So göi zanguma’ö, no lafalua halöwö fanuriaigö na latolo niha so’amböta mazui  tobali ira doto, matiri hegöi guru ba wanolo niha bö’ö. Hadia simane da’a halöwö fanuriaigö niwa’ö Yesu?

3. Hadia zi öfa ngawalö zinangea lafalua ira solo’ö khö Yesu molo’ö Matai’o 28:19?

³ Hadia da’ö zomasi Yesu khö ndra nifaha’önia ena’ö ladöna-döna wa la’ondrasi ira niha? Tenga! Me no aefa tesusugi Yesu, iwa’ö khö ndra solo’ö khönia si ngaotu wa’ato, ”Mi’ae’e, mibali’ö nifaha’ö fefu soi, wamayagö idanö ya’ira . . . , mifaha’ö ira ba wolo’ö fefu hadia ia niwa’ögu khömi.” (Matai’o 28:19, 20) Tobali, börö me solo’ö khö Yesu ita, so öfa ngawalö zinangea tafalua. Moguna tafaha’ö niha, tafabayagö’ö ira idanö ba tafaha’ö ira. Hiza’i, si oföna tafalua moguna möi ita khöra. Imane samösa niha satua-tua ba Zura Ni’amoni’ö, ”Ngawua wehede ’mi’ae’e’ no sambua noro dödö niha si faduhu tödö, la’ötö lala mazui asi sebolo.”​—Matai’o 10:7; Luka 10:3.

4. Hadia geluahania ”sama’u’u niha”?

⁴ Hadia ni’andrö Yesu khö ndra nifaha’önia? Hadia omasi ia na manuriaigö ira molo’ö somasi dödöra mazui hadia omasi ia na te’owuloi ira ba zi sambua gorahua? Börö me lö ikhamö ölö zi samösa niha na manuriaigö ia ba ”fefu soi”, andrö wa moguna te’owuloi ira ba zi sambua gorahua. Da’ö geluaha niwa’ö Yesu me ikaoni ndra nifaha’önia tobali ”sama’u’u niha”. (Baso Matai’o 4:18-22.) Lö mohalöwö samösa zama’u’u i’a. Lö i’oguna’ö gai hegöi lakhö. Lö göi ibalo-baloi hawa’ara idou lakhö andrö i’a. Simanö göi ba wama’u’u niha, moguna laforege wohalöwö, moguna te’osambua’ö ira ba moguna ato zohalöwö.​—Luka 5:1-11.

5. Hadia zi öfa ngawalö wanofu sinangea ta’ila wanema li, ba hadia mbörö?

⁵ Ena’ö ta’ila haniha zanuriaigö turia somuso dödö ba ginötö andre, moguna ta’ila wanema li moroi ba zi öfa ngawalö wanofu andre:

• Hadia duria sinangea la’ombakha’ö niha solo’ö khö Yesu?

• Hadia gohitö dödö wa mufalua ia?

• Hadia lala sinangea lafalua?

• Hezo manö ba hawa’ara tabato we’amöi manuriaigö?

Moroi ba wanema linia tola ta’ila haniha zamalua halöwö fangorifi andre. Da’a zi tola manga’aro’ö tödöda ba wanohugö halöwö fanuriaigö.​—I Timoteo 4:16.

6. Hana wa tola faduhu dödöu wa sindruhu duria nifa’ema ndra Samaduhu’ö Yehowa?

⁶ Baso Luka 4:43. Ituriaigö Yesu ”turia Mbanua Lowalangi” ba omasi ia göi na lafalua zimane da’ö ira nifaha’önia. Orahua haniha zanuriaigö duria andre ba niha misa? Ha ira Samaduhu’ö Yehowa! Niha si lö omasi khöda manö lafaduhu’ö  da’a. Duma-dumania, faigi hadia niwa’ö samösa wandrita si no mangai halöwö ba soi si fabö’ö-bö’ö. Ero sambu-sambua soi, isofu khö ndra Samaduhu’ö Yehowa hadia duria nifa’emara. Imane fandrita andrö, ”Bodo sibai ira andrö fefu, no fagölö-gölö wanema lira: ’Turia somuso dödö sanandrösa ba Mbanua Lowalangi.’” Fehede wandrita andrö zangoroma’ö wa sindruhunia ya’ita andre tenga niha si bodo. Tobali, niha Keriso sindruhu si no te’osambua’ö. (I Korindro 1:10) Tuho moroi ba majalah Manuriaigö Famatörö Yehowa, ya’ia da’ö Banua Lowalangi. No tehenaigö majalah da’a ba zi 254 ngawalö li ba arakhagö 59.000.000 ngawua nifazökhi ero waŵa. Da’a majalah sabölö oya tefazaewe ba zi sagörö ulidanö!

7. Hezo ta’ila wa lö laturiaigö duria sindruhu ira fandrita?

⁷ Lö laturiaigö Mbanua Lowalangi ira fandrita. Na fahuhuo ira sanandrösa ba Mbanua Lowalangi, ato zanguma’ö wa da’ö molo’ö dödöra zamösana. (Luka 17:21) Lö lafaha’ö niha wa sindruhu-ndruhu so wamatörö Mbanua Lowalangi si no mosindro ba zorugo barö wamatörö Yesu. Ha ba ginötö Wanunu Fandru mazui ba gowasa Fasa fahuhuo ira sanandrösa khö Yesu. Lö latutunö wa Banua Lowalangi zi tola mangeheta abula dödö niha ba sangohori si lö sökhi ba gulidanö. (Fama’ele’ö 19:11-21) Lö la’ila ira fandrita hadia nifalua Yesu na no tobali ia Razo ba Mbanua Lowalangi. Börö me lö la’ila duria nifa’ema Yesu, andrö wa lö aboto ba dödöra hana wa moguna sibai möi ira manuriaigö.

8. Hadia zi fasala ba wamalua halöwö fanuriaigö?

⁸ Tenga börö gefe mazui ba wamazökhi tomosa sebua wa manuriaigö ndra nifaha’ö Yesu. Imane Yesu, ”Lö nibe’emi böli, ba böi göi mihalö mböli.” (Matai’o 10:8) Börö da’ö, halöwö fanuriaigö tenga fangalui kefe. (II Korindro 2:17) Lö la’andrö gazira ira nifaha’ö Yesu na möi ira manuriaigö. (Baso Halöwö Zinenge 20:33-35.) Hewa’ae aboto ba dödöra hadia niwa’ö Yesu, oya gereja si lö molo’ö börö me la’owuloi gefe ba wangehaogö gerejara mazui ba wogazi ndra fandrita hegöi ira sohalöwö tanö bö’ö. Lua-luania, ato zi kayo ndra fandrita.​—Fama’ele’ö 17:4, 5.

9. Hewisa wangoroma’ö ndra Samaduhu’ö Yehowa wa lö fasala gohitö dödöra ba wamalua halöwö fanuriaigö?

⁹ Hadia la’andrö game’ela ira Samaduhu’ö Yehowa ba Balai Mbanua Lowalangi mazui ba kebaktian nifaluara? Lö’ö! Tetuhini halöwöra börö dolo-tolo si no aoha gölö fame’e. (II Korindro 9:7) Me ndröfia, arakhagö dua miliar za ginötö nibe’e ndra Samaduhu’ö Yehowa ba wanuriaigö turia somuso dödö, ba töra siwa zuta wamaha’ö ba Zura Ni’amoni’ö nifaluara ero waŵa. Lö lagazi ira ba wanuriaigö, hiza’i omuso dödöra ba wangoguna’ö gefera samösa  ba wamalua halöwö da’a. Imane samösa peneliti sanandrösa ba halöwö ndra Samaduhu’ö Yehowa, ”Tuho halöwöra ya’ia da’ö manuriaigö ba mamaha’ö.” Imane nasa wa lö fandrita nigazi khö ndra Samaduhu’ö Yehowa. Tobali, na tenga börö gefe manuriaigö ita, hadia mbörö wa tafalua ia? Aoha gölöda ba wamalua halöwö da’a börö me ta’omasi’ö Yehowa hegöi niha bö’ö. Tefaudu da’a ba zi no tefa’ele’ö ba zura Zinunö 110:3. (Baso.)

10. Hadia lala nifalua Yesu hegöi ndra nifaha’önia ba wanuriaigö?

¹⁰ Hadia lala nifalua Yesu hegöi ndra nifaha’önia ba wanuriaigö? Möi ira gofu hezo falukha ira niha. Duma-dumania, manuriaigö ira ba lala, ba fasa hegöi ba nomo-omo misa. (Matai’o 10:11; Luka 8:1; Halöwö Zinenge 5:42; 20:20) Fanuriaigö ba nomo-omo misa no sambua lala si sökhi ba wamalukhaisi fefu niha.

11, 12. Hadia gamaehuta gereja faoma ono mbanua Yehowa sanandrösa ba wanuriaigö turia somuso dödö?

¹¹ Hadia laturiaigö duria somuso dödö gereja-gereja simane nifalua Yesu? Si to’ölönia, lagazi ndra fandrita na lafa’ema huhuo ba nono mbanuara. Lö labali’ö nifaha’ö niha ira fandrita, hiza’i ni’odödögöra ya’ia da’ö ena’ö lö alö nösi gerejara. Itaria lafarou nono mbanuara we’amöi manuriaigö. Duma-dumania, me döfi 2001, ifa’ohe’ö zurania Paus John Paul II ba nösi gereja ena’ö laturiaigö Injil ba ena’ö terou dödöra simane  Faulo, me imane, ”Alai sa ndra’o, na lö u’ombakha’ö Injil andrö.” Imane nasa wa tenga ha niha si no tefaha’ö zi möi manuriaigö, hiza’i fefu nösi gereja. Hewa’ae simanö, lö ato zolo’ö niwa’önia.

¹² Hewisa göi ndra Samaduhu’ö Yehowa? Ha ya’ira zanuriaigö wa no mamatörö Yesu tobali Razo i’otarai döfi 1914. La’o’ö niwa’ö Yesu ba la’ofönai’ö wamalua halöwö fanuriaigö ba wa’aurira. (Mareko 13:10) Imane buku Pillars of Faith—American Congregations and Their Partners wa moguna sibai halöwö fanuriaigö khö ndra Samaduhu’ö Yehowa. Imane nasa wa latandraigö latolo niha solofo si falukha khöra, si lö hadöi awö, hegöi sofökhö. Hiza’i, lö irai olifu ira wa ohitö dödöra si oföna ya’ia da’ö wanuriaigö fa’atua danö hegöi ba wamaha’ö niha sanandrösa ba wangorifi. Lö labato wanuriaigö duria andrö ira Samaduhu’ö Yehowa ba la’o’ö lala nifalua Yesu hegöi ndra nifaha’önia ba wanuriaigö.

13. Hezo manö manuriaigö ita?

¹³ Imane Yesu wa manuriaigö ba mamaha’ö turia somuso dödö ndra nifaha’önia ”ba gulidanö misa”. Lafarou ira ba wombali’ö nifaha’ö ”fefu soi”. (Matai’o 24:14; 28:19, 20) Eluahania, moguna laturiaigö duria somuso dödö ba zi sagörö ulidanö.

14, 15. Hadia zangoroma’ö wa no lafalua ira Samaduhu’ö Yehowa halöwö sebua simane nifa’ele’ö Yesu? (Faigi gambara ba wamobörö wamaha’ö.)

¹⁴ Ha ira Samaduhu’ö Yehowa zamalua nifa’ele’ö Yesu sanandrösa ba wanuriaigö turia somuso dödö ba zi sagörö ulidanö. Hana wa tola tawa’ö da’ö? Ba Amerika Serikat, so 600.000 wandrita ba töra 1.200.000 ndra Samaduhu’ö Yehowa sanuriaigö turia somuso dödö ba soi andrö. So 400.000 zondrönia’ö agama Katolik ba zi sagörö ulidanö, hiza’i töra walu zuta ndra Samaduhu’ö Yehowa sanuriaigö turia somuso dödö ba zi 240 soi. Ba da’a oroma wa laturiaigö duria somuso dödö ira Samaduhu’ö Yehowa ba zi sagörö ulidanö irege tefolakhömi ba tesuno döi Yehowa!​—Zinunö 34:2; 51:17.

¹⁵ Börö me ya’ita Samaduhu’ö Yehowa, ohitö dödöda ya’ia da’ö manuriaigö turia somuso dödö ba niha fefu fatua lö atua danö. Ena’ö tola mufalua da’a, tafo’eluaha ba tafazökhi hauga zuta mbuku, majalah, risalah, undranga kebaktian hegöi Fanörö Tödö ba zi töra 700 ngawalö li. Lö ta’andrö mböli na tabe’e ba niha. Me ndröfia, no tafazökhi 4,5 miliar lektur Zura Ni’amoni’ö. No göi tafazökhi töra 200 zuta Kitab Suci Terjemahan Dunia Baru ba zi töra 130 ngawalö li. Situs Web khöda no tehenaigö ba zi töra 750 ngawalö li. Ha ira Samaduhu’ö Yehowa zamalua halöwö sebua simane da’a.

16. Hezo ta’ila wa fao geheha Lowalangi khö ndra Samaduhu’ö Yehowa?

¹⁶ Hawa’ara tabato we’amöi manuriaigö? Imane Yesu wa teturiaigö duria somuso dödö andre irugi wa’atua danö. Börö me ya’ita Samaduhu’ö Yehowa, tola anau gölöda wanuriaigö ba ginötö safuria andre ha börö wanolo moroi ba geheha Yehowa. (Halöwö Zinenge  1:8; I Fetero 4:14) So niha samati ba agama sanguma’ö, ”So khöma geheha ni’amoni’ö.” Tobali, hadia tola lafalua halöwö simane nifalua ndra Samaduhu’ö Yehowa ba ginötö safuria andre? So gorahua zi möi manuriaigö simane nifaluada, hiza’i lö mofozu. Tanö bö’ö, omasi ira manuriaigö hiza’i lö arara. Aefa da’ö, so göi zanuriaigö ba nomo-omo misa, hiza’i lö laturiaigö duria somuso dödö sanandrösa ba Mbanua Lowalangi. Tobali, lö la’ila lafalua halöwö si no ibörögö Yesu andre.

17, 18. (a) Hana wa tola faduhu dödöda wa ha ira Samaduhu’ö Yehowa zanuriaigö turia somuso dödö sanandrösa ba Mbanua Lowalangi ba ginötö andre? (b) Hewisa wa tola tatohugö wamalua halöwö da’a?

¹⁷ Haniha zanuriaigö turia somuso dödö sanandrösa ba Mbanua Lowalangi ba ginötö andre? Ha Samaduhu’ö Yehowa! Hana wa ta’ila da’ö? Börö me taturiaigö duria sindruhu, turia somuso dödö sanandrösa ba Mbanua Lowalangi. Ta’alui fefu niha ba wanuriaigö, tobali ta’oguna’ö lala si tefaudu. Atulö gohitö dödöda ba wanuriaigö, ya’ia da’ö börö me ta’omasi’ö Yehowa hegöi niha bö’ö. Oya mbanua nitöröida ba wanuriaigö ba ngawalö soi hegöi ba ngawalö li. Ba lö tabato wanuriaigö turia somuso dödö sanandrösa ba Mbanua Lowalangi irugi wa’atua danö!

¹⁸ Ahöli-höli dödöda wamaigi halöwö fanuriaigö turia somuso dödö nifalua nono mbanua Yehowa ba ginötö safuria andre. Hiza’i, hana wa tola lafalua ia? Imane Faulo, ”Faoma sa Lowalangi zanga’asogö ba dödömi, he fa’edöna, ba he famalua, börö wa’ebua dödönia andrö.” (Filifi 2:13) Ya’ibe’e khöda wa’abölö Yehowa ena’ö ta’odödögö ba wanuriaigö turia somuso dödö!​—II Timoteo 4:5.