1, 2. Mayi a Yesu e mu Mateo 24:14 aebwesha nkonko kinyi?

YESU baadi mutemukye’shi, mu mafuku a ku nfudiilo, mukandu wibuwa wa Bufumu aukalungulwa kwi bantu ba miilo yooso. (Mateo 24:14) Bu byatudi Tumonyi twa Yehowa, atuukibwa mu nsenga ishima bwa mudimo weetu wa kulungula mukandu wibuwa. Kwi bantu abakumiina mukandu weetu bangi namu abeupele. Kadi sunga baaba bantu abapele mukandu weetu abetunemekaa bwa mudimo weetu. Twi na kabingilo ka kwakula’shi atwe nyi bakwete kukita mudimo ubabatemukile kwi Yesu. Bwakinyi atwakula byabya? Bwakinyi twi balombeene kushinkamisha’shi mudimo weetu wa bulungudi ndjo mudimo ubaadi Yesu mwakule?

² Bipwilo bibungi abiyamba’shi bikwete kulungula mukandu wa Yesu. Kadi bulungudi bwabo mbufudiile penda mu bipwilo byabo, ku ma televizion, sunga ku Internete, sunga’shi mbalombeene kulungula bantu penda byabadi balongye pabitale Yesu. Bangi namu abamono’shi kukwasha bantu be mu dikyenga sunga kufuba midimo ya kalolo bu kufuba bu munganga, sunga bu balongyeshi nyi wabo mushindo wa kulungula mukandu wibuwa.  Kadi ino midimo ndjo inyi midimo ya bulungudi ibabatemukile kwi Yesu su?

3. Muyiile mayi e mu Mateo 28:19, mmyanda kinyi inanka ayitungu’shi balondji ba Yesu bakite?

³ Yesu baadi akyebe kwamba’shi balongi baaye batengyele bantu bafikye kwabadi su? Nya! Kunyima kwa’ye kusanguka, Yesu balungwile kisaka kya balondji baaye’shi: “Ndaayi: mu miilo yooso nwibeekashe bu balondji bande, nwibabatshishe . . . nwibalambukishe bya kulama byooso binaadi mwinufundjile.” (Mateo 28:19, 20) Bu byatudi balongi ba Yesu, abitungu tukite myanda inanka. Abitungu twikashe bantu bu balongi, twibabatshishe, na kwibalongyesha. Kadi kya kumpala, abitungu twende kwi bantu. Ungi muntu mulongye myanda ya mu Bible apatuula’shi: “Kwenda nyi bushito bupeebwe mwina Kidishitu ooso, kwenda mu miseese sunga kwi bantu bashaale mu bisangi.”—Mateo 10:7; Luka 10:3.

4. Nkinyi kibaadi akitungu bwa kwikala “bampiibwe ba bantu”?

⁴ Yesu baadi akumiina’shi balongi baaye bakite kinyi? Baadi akumiina’shi bekale abalungula muntu lwaye muntu lwaye, su baadi akumiina’shi bekale mu ndumbulwilo? Bu byabidi bukopo bwa’shi muntu umune akalungule “mu miilo yooso,” balongi baaye abaadi na kya kwikala mu ndumbulwilo a bantu bebungi. Nyi kibaadi Yesu mwakule pabalungwile balongi baaye bwabadya kwikala “bampiibwe (balobi) ba bantu.” (Badika Mateo 4:18-22.) Pano Yesu tabaadi akula bwa ndobeshi umune e na ndobo aaye na kinunwa atengyela bwa’shi mishipa ifikye idye nya. Anka, baadi akula bwa kuloba kubaabadi abafubu na makondja. Uno mushindo wa kuloba ubaadi autungu mudimo wibukopo, kwilumbuula, na bantu bebungi abafubu pamune.​—Luka 5:1-11.

5. Nkonko kinyi inanka ayitungu tupete ngaluulo, na bwakinyi?

⁵ Bwa kuuka bantu bakwete kulungula mukandu wibuwa lelo uno, abitungu tupete ngaluulo ku ino nkonko inanka ayilondo:

• Mmukandu kinyi autungu’shi balondji ba Yesu balungule?

• Nkinyi kilombeene kwibatakula bwa kufuba uno mudimo?

• Mmayele kinyi abadya kufubisha?

• Abitungu kulungula mbalo kinyi, na aukemana mafuku kinyi?

Ngaluulo ya ku ino nkonko ayiketukwasha bwa kutundula bantu bakwete kufuba uno mudimo aupaasha myuwa ya bantu na ayikanyingisha katshintshi keetu bwa kutungunuka na kulungula mukandu wibuwa.​—1 Timote 4:16.

6. Bwakinyi oshinkamisha’shi Batemwe ba Yehowa bakwete kulungula mukandu wibuwa?

⁶ Badika Luka 4:43. Yesu baadi alungula “mukandu wibuwa wa Bufumu bw’Efile Mukulu,” na akumiina’shi balongi baaye bekale abeulungula namu. Mbantu kinyi bakwete kulungula uno mukandu kwi bantu booso? Nka penda Batemwe ba Yehowa! Mpa nka na beshikwanyi neetu abakuminaa oo mwanda. Bu kileshesho, banda kupusha bibakwile ungi mukata a beena mishoonyi baadi mwende mu maumbo  ebungi alungula umune a ku Batemwe ba Yehowa. Mu eumbo dyooso dibaadi ende, uno mwina mishoonyi baadi ayipusha Batemwe ba Yehowa mukandu wabakwete kulungula. Yawa muntu amba bino: “Booso bwabo babaadi abampa nka luno lwaluulo: ‘Mmukandu wibuwa wa Bufumu.’” Ano mayi a mwina mishonyi aaleesha’shi twi mu buumune na twi beena Kidishitu ba binyibinyi. (1 Beena Kodinda 1:10) Bufumu bw’Efile Mukulu nyi mukandu wa kitako wi mu Kitenta kya Mulami akilungula Bufumu bwa Yehowa. Uno jurnale e mu ndimi 254 na kwete kutuuka bungi bufikye ku 59 000 000 ku nimero ooso ngi bwakinyi mmwikale jurnale a kumpala mupalakane ngofu mu nsenga ishima!

7. Atuuku naminyi’shi bakata ba bipwilo bya madimi tabakwete kulungula mukandu wibuwa?

⁷ Bakata ba bipwilo bya madimi tabakwete kulungula mukandu wa Bufumu bw’Efile Mukulu nya. Bu byabashi’abalungula mukandu wa Bufumu, nyi bwakinyi bantu ba mu bipwilo byabo abakula’shi Bufumu bw’Efile Mukulu bwi mwishimba dya muntu. (Luka 17:21) Tabakwete kulongyesha bantu’shi Bufumu bw’Efile Mukulu nyi mbulamatadi abakunkusha kwi Yesu nya. Anka, bakwete kulongyesha bantu bwa Yesu ku ma Nowele sunga ma Pasaka. Tabalongyesha bantu’shi Bufumu bw’Efile Mukulu abukapudisha myanda yooso ayikyengyesha bantu na’shi abufiki binobino bwa kukatusha buntomboshi booso pa nsenga nya. (Kibafumbwilwe 19:11-21) Abimweneka patooka’shi bakata ba bipwilo bya madimi tabauku akikyebe kukita Yesu Nfumu a Bufumu bw’Efile Mukulu. Na dingi, bu byabash’abauku mukandu wa Yesu, tabauku sunga bwakinyi abitungu balungule mukandu wibuwa nya.

8. Mbinangu bibubi kinyi bi na bantu pabitale mudimo wa bulungudi?

⁸ Balongi ba Yesu tababaadi balombeene kulungula mukandu wibuwa bwa kupeta makuta sunga mashibo akata nya. Yesu bambile’shi: “Nwi bapete buntu, byabya paanayi buntu.” (Mateo 10:8) Byabya mudimo wa kulungula mukandu wibuwa ta mbusunga nya. (2 Beena-Kodinda 2:17) Balongi ba Yesu ta be bya kuteka makuta bwa mudimo wabo wa bulungudi. (Badika Bikitshino 20:33-35.) Sunga ano mayi a kulonda a Yesu aapushika kalolo, bakata ba bipwilo mbepaane mu kuteka kwa makuta bwa midimo yabakwete kufuba mu bipwilo, bwa kufuta bafubi ba mu bipwilo na beena mudimo baabo. Nyi bwakinyi, bakata ba bipwilo bebungi tabadi ba mpeta.​—Kibafumbwilwe 17:4, 5.

9. Batemwe ba Yehowa mbaleeshe naminyi’shi mbepaane mu mudimo wa bulungudi na binangu bibuwa?

⁹ Batemwe ba Yehowa abapungishaa makuta ku Mashibo a Bufumu sunga ku bikongeeno byabo su? Nya! Midimo yaabo ayikitshika ku bukwashi bwa bya buntu. (2 Beena-Kodinda 9:7) Mu kipwa kishaale, Batemwe ba Yehowa mbakite nsaa midiyo ibidi mu mudimo wa kulungula mukandu wibuwa na mbalongye Bible na bantu bakile pa midiyo kitema ku mweshi ooso. Tabebafutaa bwa mudimo  wabo wa bulungudi nya, kadi be na muloo wa kufuba na makuta aabo bwa kukita uno mudimo. Ungi muntu akimbuulaa myanda bakwile bino bwa Batemwe ba Yehowa: “Kepatshila kaabo kakata nka kulungula mukandu wibuwa na kulambukisha bantu.” Bambile dingi’shi Batemwe ba Yehowa ta be na mukata a kipwilo abakwete kufuta makuta nya. Byabya, su tatulungulaa bwa kupeta makuta, nkinyi akitutakulaa bwa kwenda mu bulungudi? Twi na muloo wa kukita uno mudimo atwe banabeene mwanda twi bafule Yehowa na bantu booso. Bino abilombasha butemuki bwi mu mukanda wa Misambo 110:3. (Badika.)

10. Yesu na balongi baaye babaadi abafubu na mayele kinyi mu bulungudi?

¹⁰ Yesu na balongi baaye babaadi bafube na mayele kinyi bwa kulungula? Babaadi abende mbalo yooso i bantu. Bu kileshesho, babaadi abalungula mu miseese na mu bisalwe. Na dingi babaadi abakimbi bantu ku mashibo kwabo. (Mateo 10:11; Luka 8:1; Bikitshino 5:42; 20:20) Babaadi abalumbuula bulungudi bwa ku nshibo na nshibo mu mushindo wa kupeta bantu ba bipaso byooso.

11, 12. Pabitale kulungula mukandu wibuwa, beena bipwilo mbatompe kwambula mwilo wa Yehowa naminyi?

¹¹ Beena bipwilo bya madimi abalungula mukandu wibuwa bu bibadi abikitshi Yesu su? Mu binyibinyi, bakata ba bipwilo babakwete kufuta makuta abalambukishaa penda kumpala kwa beena bipwilo byaabo. Bano bakata ba bipwilo tabakwete kukita balongi bapya nya kadi abalama penda bantu bapwe kutwela mu kipwilo kyabo. Ingi nsaa, babatompele kutuma beena bipwilo byabo bwa kwenda mu bulungudi. Bu kileshesho, mu kipwa kya 2001, pape Jean-Paul II bakwile mu mukanda waye’shi abitungu beena  kipwilo bekale abende mu kulungula Mukandu wibuwa na kwikala na katshintshi bu kabaadi na Mpoolo mutumiibwa, bakwile’shi: “Malwa kwandji’mi su ntandungula mukandu wibuwa.” Kunyima pape bakwile’shi uno mudimo wa bulungudi tabitungu beukite penda kwi kasaka kapeela ka bantu balongye nya, kadi kwi beena kipwilo booso. Byabya, nka penda bantu bapeela nyi babaadi balonde dino eyi dyaaye.

¹² Twi kwakula naminyi bwa Batemwe ba Yehowa? Nka penda abo nyi bakwete kulungula mukandu wibuwa’shi Yesu taadi Nfumu kubanga mu 1914. Abakookyela Yesu na kutuula mudimo wa bulungudi pa mbalo ya kumpala mu muwa wabo. (Maako 13:10) Ungi mukanda (Pillars of Faith​—American Congregations and Their Partners) awamba’shi: Mudimo wa bulungudi wi na muulo ukata kwi Batemwe ba Yehowa. Awakula nyi’shi pabasangana bantu be na nsala, bakokye,na basha maladi, abebakwasha, anka tabayilwankana’shi kepatshila kaabo nkulungula mukandu wibuwa wa nfudilo ya uno ndumbulwilo itayidi peepi na kulongyesha bantu bwa kupeta kipandjilo nya. Batemwe ba Yehowa abatungunuka na kulungula uno mukandu wibuwa na kwambula mayele a Yesu na balondji baye.

13. Abitungu kulungula mukandu wibuwa mbalo kinyi?

¹³ Yesu balungwile balondji baye’shi abitungu kulongyesha na kulungula mukandu wibuwa “mu nsenga yoso yishaadibwe.” Na bebalungwile’shi nukafwishe bantu ba “miilo yoso” bu balongi. (Mateo 24:14; 28:19, 20) Bino abilesha’shi abitungu mukandu wibuwa ulungulwe mu nsenga ishima.

14, 15. Nkinyi akishinkamisha’shi Batemwe ba Yehowa bakwete kulombasha butemuki bwa Yesu mu nsenga yoso ishima? (Tala bifwatulo bi kumbangilo.)

¹⁴ Nka penda Batemwe ba Yehowa ngi bakwete kulombasha buno butemuki bwa Yesu bwa kulungula mukandu wibuwa mu nsenga yooso ishima. Bwakinyi atwakula byabya? Mu États-Unis, mwi bakata ba bipwilo abiyamba bu bya beena Kidishitu bafikye ku 600000. Aku namu nka penda Batemwe ba Yehowa 1 200 000 nyi bakwete kulungula mukandu wibuwa mu dyadya eumbo. Mu nsenga ishima mwi ba Mumpeele ba beena Katolike 400 000. Anka Batemwe ba Yehowa bakile pa midiyo 8 bakwete kulungula mukandu wibuwa mu maumbo 240. Abimweneka kalolo’shi Batemwe ba Yehowa nyi bakwete kulungula mukandu wibuwa aupa Yehowa ntumbo na kineemo mu nsenga ishima!​—Misambo 34:1; 51:15.

¹⁵ Atwe Batemwe ba Yehowa, kepatshila keetu nkulungula mukandu wibuwa kwi bantu bebungi muyiile ngobesha yeetu kumpala kwa’shi nfudiilo ifikye. Bwatudya kufuba uno mudimo, wi baluule na kutuusha midiyo na midiyo ya mikanda, ma jurnale, ma trakte, mapupwa a lwitanyino ku bikongeno, na ku Kitentekyesho kya lufu lwa Yesu mu ndimi ikile pa 700. Tukwete kwabila ino mikanda buntu. Mu kipwa kishaale, twibatuushe mikanda ayipatuula Bible ifikye ku midiyale 4 na kipindji. Twi batuushe dingi Bible a Les Saintes Écritures. Traduction du monde nouveau ikile pa midiyo 200 mu ndimi ikile pa 130. Mu site eetu mukata a Internete, myanda i mwanka i mu ndimi ikile pa 750. Nka penda Batemwe ba Yehowa nyi bakwete kukita uno mudimo wa kukaanya.

16. Atuuku naminyi’shi Batemwe ba Yehowa be na kikudi ky’Efile Mukulu?

 ¹⁶ Mudimo wa bulungudi aukemana mafuku kinyi? Yesu bakwile’shi abitungu uno mukandu wibuwa ululngulwe mpa na apakafiki nfudiilo. Atwe Batemwe ba Yehowa, twibanyiishe mashimba mu mudimo wa bulungudi bikishekishe ano mafuku a ku nfudilo mwanda Yehowa kwete kwitupa kikudi kyaye kiselele. (Bikitshino 1:8; 1 Mpyeele 4:14) Bangi beena bipwilo abeamba’shi: “Twi na kikudi ky’Efile mukulu.” Anka, mbakabilwe kukita mudimo ukwete kufuba Batemwe ba Yehowa mu ano mafuku a ku nfudiilo. Bingi bipwilo bibatompele kwitwambula, anka ta mboobeshe nya. Bangi be na lukalo lwa kulungula kadi ta be na nsaa. Bangi namu mbalombeene kulungula ku nshibo na nshibo, kadi tabalungula mukandu wa Bufumu nya. Bino abileesha’shi ta mbalombeene kufuba mudimo ubabangile Yesu nya.

17, 18. (a) Bwakinyi atushinkamisha’shi Batemwe ba Yehowa ndjo bakwete kulungula mukandu wibuwa wa Bufumu lelo uno? (b) Nkinyi akitupa ngobesha ya kutungunuka na kufuba uno mudimo?

¹⁷ Mba nanyi bakwete kulungula mukandu wibuwa wa Bufumu bw’Efile Mukulu lelo uno? Nka penda Batemwe ba Yehowa! Bwakinyi atwakula byabya? Mwanda tukwete kulungula mukandu wa binyibinyi, mukandu wibuwa wa Bufumu. Tukwete kwenda mu kukimba bantu mu bulungudi, na kufubisha mayele ebuwa. Twi na binangu bibuwa abitutakula bwa kwenda mu bulungudi, mwanda twi bafule Yehowa na bantu. Mudimo weetu wa bulungudi awata kipindji kikata mwanda tukwete kulungula bantu ba miilo na ndimi yooso. Na dingi atutungunuka na kulungula mukandu wibuwa wa Bufumu mpa na apakafiki nfudiilo!

¹⁸ Abikemesha bantu ngofu pa kumona bukata bwa mudimo ukwete kufuba Batemwe ba Yehowa bwa kulungula mukandu wibuwa mu ano mafuku a ku nfudiilo. Byabya nkinyi akitupa ngobesha ya kukita uno mudimo? Mpoolo mutumiibwa apatuula’shi: “Mwanda Efile Mukulu ngi afubu munda mwenu, bwa kwinwikasha na kwinukitshisha muyiile kwipangapanga kwaye kwa kalolo.” (Beena-Fidipe 2:13) Atutekye’shi Yehowa etupe bukome bwibungi bwa’shi tukite bukopo bwetu booso bwatudya kumona bya kutungunuka na kulungula mukandu wibuwa!—2 Timote 4:5.