1, 2. Apulilo api a siata oku lingiwa omo liolondaka Yesu a popia kelivulu lia Mateo 24:14?

YESU wa popele hati, koloneke via sulako olondaka viwa Viusoma, via laikele oku kundiwa komanu vosi. (Mateo 24:14) Etu Tulombangi Via Yehova, tua kũlĩhĩwa lomanu vosi voluali omo liupange wetu woku kunda. Omanu vamue va sole esapulo tua siata oku va kundila. Pole, vakuavo ka va sole esapulo liaco. Ndaño okuti omanu vamue ka va sole esapulo tua siata oku va kundila, pole, va sumbila upange wetu. Omo liaco, tua siata oku popia okuti, etu lika tu kasi oku linga upange Yesu a tuma. Anga hẽ tu kuete omoko yoku popia olondaka evi? Tua kũlĩha ndati okuti, tu kasi oku linga upange una Yesu a tukuile?

² Atavo alua a siata oku popia hati, a kasi oku kunda esapulo lina Yesu a tuma. Pole, oku kunda kuaco va ku tiamisila lika koku linga evanjeliu volonembele, poku lekisa ovipama vimue vietavo vo televisãu, ale vo Internet. Olonjanja vimue atavo aco a siata lika oku sapuila komanu ndomo va pondola oku lilongisa ovina viatiamẽla ku Yesu. Atavo akuavo a siata oku sima okuti, a kasi oku kunda poku eca ekuatiso komanu vamue, ale oku linga ovopange akuavo ndeci: Oku kala ondotolo, ocifumelu, ale oku kala ulongisi.  Anga hẽ ovopange aco ovo Yesu a tukula?

3. Ndomo ca lomboluiwa kelivulu lia Mateo 28:19, 20, ovina vipi vikuãla olondonge via Yesu via sukilile oku linga?

³ Anga hẽ Yesu wa yonguile okuti olondonge viaye vi kevelela omanu toke eci veya kokuavo? Sio! Eci Yesu a pinduiwa wa sapuila kolondonge viaye hati: “Kuendi, ka longisi omanu vo kolofeka viosi oco va linge olondonge, va [papatisi kuenda] . . . va longisi oku linga ovina viosi ndo kundiki.” (Mateo 28:19, 20) Omo okuti tulondonge via Yesu tu kuete ocikele coku linga ovina vikuãla ndeci: Oku longisa omanu oco va linge olondonge, oku va papatisa, kuenda oku va longisa ovina vikuavo Yesu a tuma. Pole, tete tu sukila oku sandiliya omanu vaco. Onoño yimue ya siata oku konomuisa ovina vi sangiwa Vembimbiliya ya popia hati: “Omunu wosi ukuetavo o kuete ocikele coku ‘enda,’ cikale okuti, o linga ungende vetapalo, ale vokalunga.”—Mateo 10:7; Luka 10:3.

4. Nye ca kongela voku kala “anyanga vomanu”?

⁴ Nye Yesu a kala oku lavoka okuti oco olondonge viaye via sukilile oku linga? Anga hẽ wa yonguile okuti omunu lomunu pokati kavo o kuama onjila yaye poku kunda, ale o yongola okuti ovo va likuata omunga poku linga upange waco? Omo okuti omunu umosi ka tẽla oku ‘longisa omanu vo kolofeka viosi,’ olondonge viaye via sukilile oku likuata omunga oco vi tẽlise upange waco. Yesu wa popia olondaka viaco eci a laleka olondonge viaye oco vi linge “anyanga vomanu.” (Tanga Mateo 4:18-22.) Olondaka Yesu a popia, ka vi tiamisilile komunu ukuakutamba ombisi okuti, o kapa onjolo yaye vovava, kuenje o kevelela toke eci ku fa ombisi. Pole, wa vi tiamisila koku tamba ombisi lowanda. Oco ombisi yaco yi tambiwe, ca sukilile omanu valua va linga upange waco okuti, va likuete omunga poku talavayela kumosi.—Luka 5:1-11.

5. Apulilo api akuãla tu sukila oku tambulula, kuenda momo lie?

⁵ Oco tu kũlĩhe omanu va kasi oku kunda olondaka viwa Viusoma koloneke vilo, tu sukila oku sanga atambululo kapulilo akuãla ndeci:

• Esapulo lipi olondonge via Yesu vi sukila oku kunda?

• Nye ci vetiya olondonge oku linga upange waco?

• Olonjila vipi olondonge vi sukila oku kuama?

• Upange woku kunda wa li vokiya ndati, kuenda u lingiwa toke otembo yipi?

Atambululo kapulilo a lingiwa ndeti, a pondola oku tu kuatisa oku limbuka omanu va kasi oku linga upange woku yovola omanu. Kuenje, ci tu vetiya oku kuata onjongole yoku amamako oku kunda olondaka viwa.—1 Timoteo 4:16.

6. Momo lie o tavela okuti Olombangi Via Yehova vi kasi oku kunda esapulo liocili?

⁶ Tanga elivulu lia Luka 4:43. Yesu wa kunda “olondaka viwa Viusoma,” kuenda wa yonguile okuti, olondonge viaye vi lingavo upange waco. Velie va kasi oku kundila esapulo liaco komanu vosi? Olombangi Via Yehova ovio lika vi kasi oku linga upange waco! Ndaño kuli omanu vamue va siata oku tu suvuka, pole, va tavavo kondaka yaco.  Kũlĩhĩsa olondaka viopatele yimue ya kala omisionaliu kolofeka vialua okuti, ya pula Ombangi yimue ya Yehova. Kolofeka viosi patele yaco a kala, wa pula Olombangi Via Yehova catiamẽla kesapulo va kala oku kunda. Eye wa popia hati: “Vosi yavo aveke, momo va eca lika etambululo limuamue liokuti: ‘Olondaka viwa Viusoma.’” Olondaka patele a popia, vi eca uvangi wokuti, etu katuavekeko. Pole, Tuakristão vocili okuti, tu likuete omunga. (1 Va Korindo 1:10) Usoma wa Yehova Suku, owo esapulo lia velapo li sangiwa Vutala Wondavululi Wusapula Usoma wa Yehova. Owo u kasi oku pongoluiwa kueci ci soka 254 kalimi okuti, olosãi viosi ku pangiwa eci ci panda 59.000.000 kolorevista. Momo, Utala Wondavululi owo lika wa siata oku eciwa calua voluali luosi!

7. Momo lie o tavela okuti Olombangi Via Yehova vi kasi oku kunda esapulo liocili?

⁷ Asongui vatavo esanda ka va kasi oku kunda esapulo Liusoma wa Suku. Momo, nda va kasi oku sapela ovina viatiamẽla Kusoma wa Suku, valua pokati kavo va siata oku popia vati, usoma waco u kasi vutima womunu lomunu. (Luka 17:21) Ovo ka va siatele oku longisa omanu okuti, Usoma wa Suku wocili, kuenda u kasi oku vialiwa la Yesu kilu. Pole, va siata lika oku vangula ovina vialua viatiamẽla ku Yesu pocipito Conatale, ale Copaskoa. Asongui vatavo esanda ka va siatele oku lombolola okuti, Usoma wa Suku owo lika u ka tetulula ovitangi viosi viomanu, kuenda ndopo u ka malako evĩho liosi mulo voluali. (Esituluilo 19:11-21) Ovo, ka va kũlĩhĩle ovina Yesu Ombiali Yusoma wa Suku a ka linga. Omo okuti ka va kuete elomboloko liesapulo lia Yesu, ka va kuetevo elomboloko lieci va sukilila oku kunda esapulo liaco.

8. Ovina vipi ka via sungulukile tu sukila oku yuvula kupange woku kunda?

⁸ Olondonge via Yesu ka vi sukila oku kunda olondaka viwa, oco vi nganyale olombongo, ale oku tunga olonjo vi komõhisa omanu. Momo, Yesu wa popia hati: “Omo wa tambuli ocali, ecivo ocali.” (Mateo 10:8) Omo liaco, upange woku kunda ka citava okuti u kala ndomĩlu. (2 Va Korindo 2:17) Olondonge via Yesu ka vi sukila oku pinga olombongo omo liupange woku kunda vi kasi oku linga. (Tanga Ovilinga 20:33-35.) Ndaño okuti olonumbi via Yesu via sunguluka, pole, asongui valua vatavo va tiamisila lika utima kolombongo via siata oku eciwa oco va semũlule olonembele viavo, oku feta asongui vaco, kuenda olonalavayi vikuavo. Omo liaco, asongui valua Vatavo Esanda va linga olohuasi.—Esituluilo 17:4, 5.

9. Olombangi Via Yehova via siata oku lekisa ndati okuti vi kasi oku linga upange woku kunda lutima wa sunguluka?

⁹ Anga hẽ Olombangi Via Yehova via siata oku pinga ovilumba violombongo Volonjango viavo Viusoma ale Kolohongele Viofeka? Sio! Momo, upange wavo wa siata oku lingiwa lekuatiso liolombanjaile vieciwa lutima wosi. (2 Va Korindo 9:7) Omo liaco, unyamo wa pita Olombangi Via Yehova via tẽlisa olohuluwa vivali kolohuluwa kupange woku  kunda olondaka viwa, kuenda via longisa Embimbiliya kueci ci pitahãla olohuluwa ecea komanu olosãi viosi. Olombangi Via Yehova ka vi fetiwa omo liupange via siata oku linga. Pole, vi kuete esanju omo lioku linga upange waco lolombongo viavo. Onoño yimue ya popia eci catiamẽla kupange Wolombangi Via Yehova hati: “Ocimãho cavo, oku kunda olondaka viwa, kuenda oku longisa omanu.” Eye wa popiavo hati: Olombangi Via Yehova ka vi kuete asongui vamue okuti, va sukila oku fetiwa. Omo okuti ka tu pingi olombongo kupange woku kunda, nye ca siata oku tu vetiya oku linga upange waco? Tua siata oku lieca olumue kupange waco, omo liocisola tu kuetele Yehova, kuenda omanu. Ocituwa caco coku lieca olumue, ci kasi oku tẽlisa ocitumasuku ci sangiwa Vosamo 110:3. (Tanga.)

10. Olonjila vipi Yesu kumue lolondonge viaye va kuama kupange woku kunda?

¹⁰ Olonjila vipi Yesu kumue lolondonge viaye va kuama kupange woku kunda? Ovo va enda oku kundila kovitumãlo viosi ku sangiwa omanu. Olonjanja vimue va enda oku kundila vatapalo, povitanda, kuenda oku sandiliya omanu kolonjo viavo. (Mateo 10:11; Luka 8:1; Ovilinga 5:42; 20:20) Upange woku kundila konjo lanjo, u kuatisa oku sanga omanu vosi.

11, 12. Alikolisilo Vakuatavo Esanda a sokisiwa ndati lalikolisilo afendeli va Yehova, catiamẽla koku kunda olondaka viwa?

¹¹ Anga hẽ asongui Vatavo Esanda va siata oku kunda olondaka viwa ndeci Yesu a linga? Kuli asongui vamue vetavo okuti, va siata oku pinga olombongo komanu vatiamẽla ketavo liavo, oco va linge ohundo. Asongui vaco vatavo ka va siatele oku kundila omanu oco va linge olondonge viokaliye. Pole, va kuete lika etendelo liomanu vana vatiamẽla katavo avo. Olonjanja vimue, va siata oku vetiya omanu vavo oco va kunde  Ulandu umue u lekisa okuti, kunyamo wo 2.001, Papa João Paulu II vukanda umue a soneha wa lombolola okuti, omanu vosi va panga onepa ketavo, va sukila oku kunda Evanjeliu, kuenda va sukilavo oku kuata ombili kupange waco, ndomo upostolo Paulu a ci popia hati: ‘Ngongo yange nda si kundi Evanjeliu.’ Noke, papa wa popia hati, upange woku kunda ka cita okuti u lingiwa lika lomanu kavaluile va pindisiwa. Omo liaco, omanu vosi va panga onepa ketavo, va sukila oku linga upange waco. Pole, omanu valua vakuetavo, ka va kapeleko evetiyo liaco.

¹² Nye ci popiwa catiamẽla Kolombangi Via Yehova? Ovio lika vi kasi oku kundila omanu hati, Yesu wa vialekiwa komangu Yusoma kunyamo wo 1914. Olombangi Via Yehova vi kasi oku pokola ku Yesu, kuenda via velisapo upange woku kunda. (Marko 13:10) Elivulu limue li lombolola hati, upange woku kunda, owo u kuete esilivilo lia velapo Kolombangi Via Yehova. Olio li lombololavo okuti, nda Olombangi Via Yehova via sanga omunu umue o kuete onjala, o kasi ulika, kuenda o vela, va eca ekuatiso kokuaye. Pole, ka va ivalako okuti, ocimãho cavo ca velapo oku kundila omanu catiamẽla kesulilo lioluali lulo, kuenda oku va longisa ovina vi tuala kepopelo. Omo liaco, Olombangi Via Yehova vi kasi oku amamako oku kunda esapulo liaco, kuenda vi kuãi olonjila Yesu a kuama kumue lolondonge viaye kupange woku kunda.

13. Upange woku kunda wa livokiya ndati, kuenda u lingiwa toke otembo yipi?

¹³ Yesu wa popele hati, olondonge viaye via laikele oku kundila olondaka viwa ‘voluali luosi.’ Ovio, via kuata ocikele coku longisa omanu vo “kolofeka viosi,” oco va linge olondonge. (Mateo 24:14; 28:19, 20) Ulandu owu u lekisa okuti, olondaka viwa Viusoma vi sukila oku kundiwila kolofeka viosi.

14, 15. Uvangi upi u lekisa okuti, Olombangi Via Yehova vi kasi oku tẽlisa ocitumasuku Yesu a tukula catiamẽla kevokiyo liupange waco? (Tala elitalatu kefetikilo liocipama cilo.)

¹⁴ Olombangi Via Yehova ovio lika vi kasi oku tẽlisa ocitumasuku cokuti, olondaka viwa vi sukila oku kundiwila voluali luosi. Momo lie tu popela ndoco? Momo, kofeka yo Estados Unidos, kuli eci ci soka 600.000 komanu va kasi vetavo Liakristão Vesanda. Pole, kuli eci ci soka 1.200.000 Kolombangi Via Yehova okuti, vi kasi oku kundila olondaka viwa vofeka yaco. Voluali luosi, vetavo Liokatolika muli eci ci soka 400.000 kolopatele. Pole, muli eci ci pitahãla 8 kolohuluwa Violombangi Via Yehova okuti, vi kasi oku kundila olondaka viwa kueci ci soka 240 kolofeka. Omo liaco, Olombangi Via Yehova vi kasi oku kundila olondaka viwa voluali luosi. Kuenje, upange waco weca ekemãlo kuenda esivayo ku Yehova.—Osamo 34:1; 51:15.

¹⁵ Etu Tulombangi Via Yehova, tu kuete ocimãho coku kundila olondaka viwa komanu valua, osimbu esulilo lioluali lulo ka lieyile. Oco upange waco u lingiwe, tua siata oku pongolola loku sandeka alivulu alua, olorevista, otuikanda, ovipama viohongele yofeka, kuenda otuikanda tuelaleko Liocipito Conjivaluko yolofa via Yesu. Ovina viaco via siata oku sandekiwa kueci ci pitahãla 700 kalimi. Alivulu aco a pongoluiwa tua siata oku a eca komanu okuti, ka tu pingi olombongo. Unyamo wa pita tua panga eci ci soka 4.5 kolohuluwa vialivulu a lombolola ovina vi sangiwa Vembimbiliya. Kua pangiwavo ci pitahãla 200 kolohuluwa vio Tradução do Novo Mundo da Bíblia Sagrada, kueci ci pitahãla 130 kalimi. Handi vali, onumbi yetu yo Internet ya pongoluiwa kueci ci pitahãla 750 kalimi. Olombangi Via Yehova ovio lika vi kasi oku linga upange waco u komõhisa.

16. Tua kũlĩha ndati okuti Olombangi Via Yehova vi kuete espiritu sandu?

 ¹⁶ Upange woku kunda u ka amamako toke otembo yipi? Yesu wa popele hati, olondaka viwa via laikele oku kundiwa toke eci esulilo lioluali lulo liya. Etu Tulombangi Via Yehova tua siata oku pandikisa kupange woku kunda vokuenda kuoloneke via sulako, omo liespiritu sandu lia Yehova tu kuete. (Ovilinga 1:8; 1 Petulu 4:14) Omanu vamue vakuatavo esanda va siata oku popia vati: “Va kuete espiritu sandu.” Anga hẽ va pondola oku linga upange Olombangi Via Yehova vi kasi oku linga vokuenda kuoloneke vilo via sulako? Kuli atavo amue a kasi oku setukula oku kunda, ndeci tua siata oku linga. Pole, ka va tẽla oku amamako lupange waco tẽla.

17, 18. (a) Momo lie tu tavela okuti Olombangi Via Yehova ovio lika vi kasi oku kunda olondaka viwa Viusoma koloneke vilo? (b) Tu pondola ndati oku amamako loku kunda olondaka viwa Viusoma wa Suku?

¹⁷ Velie va kasi oku kunda olondaka viwa Viusoma koloneke vilo? Olombangi Via Yehova! Tua ci kũlĩha ndati? Tua ci kũlĩha momo, tua siata oku kunda esapulo liocili liolondaka viwa Viusoma. Tua siata oku kuama olonjila viwa, poku sandiliya omanu vocikanjo cetu. Ocisola tu kuetele Yehova kuenda omanu, oco ca siata oku tu vetiya oku kunda. Upange waco wa livokiya calua, momo tu kasi oku kundila omanu vo kolofeka viosi okuti, va vangula alimi a litepa. Omo liaco, tu sukila oku amamako oku kunda olondaka viwa Viusoma, toke eci esulilo liya!

¹⁸ Tu kuete esanju lialua poku limbuka ndomo afendeli va Yehova va kasi oku kunda olondaka viwa vokuenda kuoloneke vilo via sulako. Pole, tu pondola oku linga ndati upange waco? Upostolo Paulu wa popia hati: “Suku eye u wĩhi onjongole kuenda ongusu yoku linga ovina viosi ... a sole.” (Va Filipoi 2:13) Omo liaco, tu yongola okuti, Yehova o tu ĩha ongusu tu sukila oco tuamameko oku kunda olondaka viwa!—2 Timoteo 4:5.