“Koutou Olo, Kotou Fai Ni Tisipulo i Te u Puleaga Fuli”
“Koutou olo, kotou fai ni tisipulo i te u puleaga fuli, pea kotou papitemai natou . . . , pea kotou ako natou ki te taupau o te u mea fuli nee au fakatotonu atu kia koutou.”—MATEO 28:19, 20.
KATIKO: 141, 97
1, 2. Kotea te ʼu fehuʼi ʼe feala ke tou fai moka tou lau ia Mateo 24:14?
NEʼE fakakikite e Sesu ʼe fakamafola anai te logo lelei ʼo te Puleʼaga ki te hahaʼi fuli, ʼi te ʼu ʼaho fakamuli. (Mateo 24:14) ʼI totatou ʼuhiga Fakamoʼoni ʼa Sehova, ʼe tou iloa ʼi te malamanei ʼuhi ko tatatou gaue faifakamafola. Ko ʼihi ʼe natou tali fiafia te logo ʼae ʼe tou fakamafola kaʼe ko ʼihi ʼe mole natou loto ki ai. Maʼia mo natou ʼae ʼe mole natou tali te logo, ʼe natou fakaʼapaʼapa ki tatatou gaue faifakamafola. ʼE tou fakaha ʼe tou fai te gaue ʼae neʼe fakakikite e Sesu. ʼE moʼoni koa tatatou ui te faʼahi ʼaia? ʼE tou tui papau feafeaʼi ko tatatou gaue faifakamafola ʼe ko te gaue neʼe fakakikite e Sesu?
2 Tokolahi te ʼu kutuga fakalotu ʼe natou ui ʼe natou fakamafola te logo ʼa Sesu. Kaʼe ʼi tona fakahagatonu, ʼe gata pe tanatou faifakamafola ʼi te ʼu akonaki ʼae ʼi te ʼekelesia, mo te televisio, peʼe ko te Neti. Peʼe lagi natou fakaha ki ʼihi pe neʼe natou ako feafeaʼi ʼo ʼuhiga mo Sesu. Ko ʼihi ʼe natou manatu ko te tokoni ki te hahaʼi ʼae ʼe faigataʼaia peʼe ko te gaue fakatoketa, peʼe fakaafilimie, peʼe ko te faiako, ʼe ko hanatou faʼahiga faifakamafola ʼaia. Kaʼe, ko te ʼu gaue koa ʼaia neʼe palalau ki ai Sesu?
3. ʼO mulimuli kia Mateo 28:19, kotea te ʼu gaue ʼe fa neʼe ui e Sesu ki ʼana tisipulo ke natou fai?
3 Neʼe loto koa e Sesu ke fakatalitali ʼana tisipulo ke ʼomai te hahaʼi kia natou? Kailoa. Hili tona fakatuʼuake, neʼe ui fenei e Sesu ki ʼana tisipulo ʼe lauʼi teau: “Koia, koutou olo, kotou fai ni tisipulo i te u puleaga fuli, pea kotou papitemai natou . . . , pea kotou ako natou ki te taupau o te u mea fuli nee au fakatotonu atu kia koutou.” (Mateo 28:19, 20) [1]—(Vakaʼi te nota ʼi te fakaʼosi ʼo te alatike.) Koia, ʼi totatou ʼuhiga tisipulo ʼa Sesu, ʼe ʼaoga ke tou fai ia aluʼaga ʼe fa. ʼE tonu ke tou fai he ʼu tisipulo, mo papitemaʼi natou pea mo akoʼi natou. Kaʼe ʼuluaki, ʼe tonu muʼa ke tou olo ki te hahaʼi. ʼE fakamahino fenei e te tagata sivi Tohi-Tapu: “Ko te ui ʼae ‘olo’ ʼe tonu ke fai e te ʼu tisipulo takitokotahi. Tatau aipe pe ʼe tonu ke olo ʼi te ala peʼe ke fakalaka ʼi te moana.”—Mateo 10:7; Luka 10:3.
4. Kotea te fakaʼuhiga ʼo he ʼu “tautai tagata”?
4 Kotea ʼae neʼe loto e Sesu ke fai e ʼana tisipulo? Neʼe loto koa ke natou tahi faifakamafola? Peʼe neʼe loto ia ke fakatuʼutuʼu lelei tanatou gaue? ʼE mole feala ki he foʼi tokotahi ke faifakamafola ʼi “te u puleaga fuli.” Koia, neʼe ʼaoga ai ki ʼana tisipulo ke natou fakatuʼutuʼu lelei tanatou gaue. ʼE ko te aluʼaga ʼaia, neʼe fia ui e Sesu ʼi tana fakaafe ʼana tisipulo ke natou liliu ko he ʼu “tautai tagata.” (Lau ia Mateo 4:18-22.) Neʼe mole fakaʼuhiga te ʼu palalau ʼaia ʼa Sesu ki he mataʼū. Ko te faʼahiga gelu ʼaia, ʼe fai pe ia e he toko tahi pea ʼe fakatalitali ke kaina tana mounu. Kaʼe, neʼe fakaʼuhiga te ʼu palalau ʼa Sesu ki te gelu ʼae ʼe fakaʼaogaʼi ai he kupega. ʼI te faʼahiga gelu ʼaia, ʼe ʼaoga ki ai he ʼu faiga, mo he fakatuʼutuʼu lelei pea ke hahaʼi natou ʼe gaue fakatahi.—Luka 5:1-11.
5. Kotea te ʼu fehuʼi ʼe fa ʼae ʼe tonu ke tou tali ki ai? Pea kotea tona tupuʼaga?
5 Ke tou iloʼi pe ʼe ko ai ʼae ʼe ina fakamafola te logo lelei ia ʼaho nei, ʼe tonu ke tou tali ki te ʼu fehuʼi ʼaeni ʼe fa:
-
Kotea te logo ʼae ʼe tonu ke fakamafola e te ʼu tisipulo ʼa Sesu?
-
Kotea te ʼu tupuʼaga ʼae ʼe ina ʼekenaki ai natou ke natou fai te gaue ʼaia?
-
Kotea te ʼu faʼahiga faifakamafola ʼe tonu ke natou fakaʼaogaʼi?
-
ʼE tonu ke kaku kifea te gaue ʼaia, pea ko temi ʼe fia ʼe tonu ke natou fakahoko ai?
ʼE tokoni mai anai te ʼu tali ki te ʼu fehuʼi ʼaia ke tou iloʼi pe ʼe ko ai ʼae ʼe ina fai te gaue maʼuhiga ʼaia. Pea ʼe toe tokoni mai anai ke tou fakamalohiʼi totatou loto ʼae ke tou faifakamafola tuʼumaʼu.—1 Timoteo 4:16.
KOTEA TE LOGO ʼAE ʼE TONU KE FAKAMAFOLA?
6. He koʼe ʼe kotou tui papau ko te kau Fakamoʼoni ʼa Sehova ʼe natou fakamafola te logo ʼae neʼe kole mai e Sesu ke tou fakamafola?
6 Lau ia Luka 4:43. Neʼe fakamafola e Sesu ia “te logo lelei o te puleaga o te Atua” pea ʼe ina loto ke toe fai feia mo ʼana tisipulo. Ko ai ʼae ʼe ina fakamafola te logo ʼaia ki te hahaʼi? ʼE ko te kau Fakamoʼoni pe ʼa Sehova. Maʼia mo natou ʼae ʼe fehihiʼa kia tatou ʼe natou fakamoʼoni ki te faʼahi ʼaia. Ohage la, kotou fakatokagaʼi pe ʼe kotea ʼae neʼe ui e te patele misionea neʼe maʼuli ʼi he ʼu fenua kehekehe ki he Fakamoʼoni ʼa Sehova. ʼI te ʼu fenua takitahi, neʼe fehuʼi e te patele ki te kau Fakamoʼoni ʼa Sehova pe ʼe kotea te logo ʼae neʼe natou fakamafola. Neʼe ui fenei e te patele: “ ʼE natou vavale heʼe tatau fuli ʼanatou tali. ʼE natou ui fenei: ‘Ko te logo lelei ʼo te Puleʼaga.’ ” ʼE ha mai ʼi te palalau ʼa te patele ʼe mole tou vavale kaʼe ʼe tou logo tahi ʼi totatou ʼuhiga Kilisitiano moʼoni. (1 Kolinito 1:10) Ko te Puleʼaga ʼo te ʼAtua, ʼe ko te logo tafitō ʼae ʼe tou maʼu ʼi te nusipepa Ko Te Tule Leʼo ʼe Ina Kalagaʼi Te Puleʼaga ʼo Sehova. Ko te nusipepa ʼaia ʼe maʼu ia lea ʼe 254 pea ko nusipepa ʼe 59 000 000 ʼe ta ʼi te mahina fuli. Pea ko te nusipepa ʼaia ʼe tahi ʼe lahi tokotahi tona ta ʼi te malamanei katoa.
Ko te kau Fakamoʼoni pe ʼa Sehova ʼae ʼe natou fakamafola te ʼu logo lelei ʼo te Puleʼaga ʼo te ʼAtua
7. ʼE tou iloʼi feafeaʼi ʼe mole fakamafola e te kau takitaki lotu te logo ʼae neʼe kole mai e Sesu ke tou fakamafola?
7 Ko te kau takitaki lotu ʼae ʼe natou ui ko natou ko he kau Kilisitiano, ʼe mole natou fakamafola te Puleʼaga ʼo te ʼAtua. Ka natou palalau ki te Puleʼaga, tokolahi ʼe natou ui ʼe ko he meʼa pe ia ʼe logoʼi ʼi te loto ʼo he tahi. (Luka 17:21) ʼE mole ako e te kau takitaki lotu ki te hahaʼi ko te Puleʼaga ʼe ko he puleʼaga ʼe tuʼu ʼi te lagi pea ʼe takitaki e Sesu. Kaʼe, ʼi te agamahani ʼe natou palalau ʼo ʼuhiga mo Sesu ʼi te Po Tapu peʼe ʼi te Pasikate. ʼE mole natou fakamahino ʼe ko te Puleʼaga ʼae ka ina fakatokatoka anai te ʼu fihifihia fuli ʼo te malamanei pea ʼe ina pulihi anai te agakovi ʼi te kele. (Apokalipisi 19:11-21) ʼE mahino ia, ko te kau takitaki lotu ʼe mole natou iloʼi pe ʼe kotea ʼae ka fai anai e Sesu ʼi tona ʼuhiga Hau ʼo te Puleʼaga ʼo te ʼAtua. Pea ʼe mole natou mahino pe ʼe koʼe ʼe tonu ke natou faifakamafola koteʼuhi ʼe mole natou mahino ki te logo ʼa Sesu.
KOTEA TE ʼU TUPUʼAGA ʼAE ʼE INA ʼEKENAKI AI TATOU KE TOU FAIFAKAMAFOLA AI?
8. Kotea te ʼu manatu ʼae ʼe mole lelei ki te fai ʼo te gaue faifakamafola?
8 ʼE mole tonu ki te ʼu tisipulo ʼa Sesu ke natou faifakamafola ke maʼu hanatou falā peʼe ke laga he ʼu fale lalahi. Neʼe ui fenei e Sesu: “Nee kotou mau hala totogi, pea kotou foaki hala totogi.” (Mateo 10:8) Koia, ʼe mole tonu ai ke tou fakatotogi ʼatatou tohi ʼi te gaue faifakamafola. (2 Kolinito 2:17) ʼE mole tonu ki te ʼu tisipulo ʼa Sesu ke natou kole ke totogi tanatou gaue faifakamafola. (Lau ia Gaue 20:33-35.) Tatau aipe pe ʼe mahino lelei te fakatotonu ʼa Sesu, kaʼe ʼe lahi te ʼu ʼekelesia ʼe natou fai he tae falā ki te taupau ʼo ʼonatou ʼekelesia, mo te totogi ʼo te kau takitaki lotu pea mo ʼihi atu kau gaue. Ki muli age, tokolahi te kau takitaki lotu ʼe natou liliu ʼo koloaʼia.—Apokalipisi 17:4, 5.
ʼE mole tonu ke tou fakatotogi ʼatatou tohi ʼi te gaue faifakamafola
9. ʼE fakaha feafeaʼi e te kau Fakamoʼoni ʼa Sehova ʼe natou fai te gaue faifakamafola ʼaki he ʼu tupuʼaga lelei?
9 ʼE fai koa e te kau Fakamoʼoni ʼa Sehova he ʼu tae falā ʼi ʼonatou Fale Fono peʼe ko ʼanatou fakatahi lalahi? Kailoa. ʼE fakapaʼaga katoa tanatou gaue ʼaki te ʼu meʼa ʼofa ʼe foaki ʼaki he lotolelei. (2 Kolinito 9:7) ʼI te taʼu ʼaeni kua ʼosi, neʼe fai e te kau Fakamoʼoni ʼa Sehova ia hola gaue ʼe teitei 2 miliale pea neʼe natou takitaki ia ako Tohi-Tapu ʼe 9 miliona tupu ʼi te mahina fuli. ʼE mole totogi tanatou gaue faifakamafola kaʼe ʼe natou fiafia ʼi te fakaʼaogaʼi ʼonatou koloa ki te fakahoko ʼanatou gaue. Neʼe ui fenei e he tagata fekumi ʼo ʼuhiga mo te gaue ʼa te kau Fakamoʼoni ʼa Sehova: “Ko tanatou fakatuʼutuʼu ʼe ko te faifakamafola pea mo faiakonaki.” Neʼe ina toe ui ʼe mole natou totogi ʼonatou takitaki lotu. Koia, kapau ʼe mole totogi tatatou faifakamafola, kotea te ʼu tupuʼaga ʼo tatatou fai te gaue ʼaia? ʼE tou lotolelei ʼo fai te gaue ʼaia koteʼuhi ʼe tou ʼoʼofa ia Sehova pea mo te hahaʼi. Ko te maʼu ʼo te faʼahiga manatu ʼaia, ʼe hoko ai te lea fakapolofeta ʼae ʼe tuʼu ia Pesalemo 110:3. (Lau.)
KOTEA TE ʼU FAʼAHIGA FAIFAKAMAFOLA ʼE TONU KE TOU FAKAʼAOGAʼI?
10. Kotea te ʼu faʼahiga faifakamafola neʼe fakaʼaogaʼi e Sesu mo ʼana tisipulo?
10 Kotea te ʼu faʼahiga faifakamafola neʼe fakaʼaogaʼi e Sesu mo ʼana tisipulo? Neʼe natou olo ki te ʼu koga meʼa ʼae ʼe feala ai ke natou maʼu ai te hahaʼi. Ohage la, neʼe natou faifakamafola ʼi te ʼu ala pea mo te ʼu fakatauʼaga meʼa kai. Neʼe natou toe kumi te hahaʼi ki ʼonatou ʼapi. (Mateo 10:11; Luka 8:1; Gaue 5:42; 20:20) Koia, ko te faifakamafola ʼi te ʼu ʼapi neʼe ko he fakatuʼutuʼu lelei moʼo kumi te hahaʼi.
11, 12. Ka fakamafola te ʼu logo lelei, kotea ʼae ʼe kehekehe ai te ʼu lotu ʼae ʼe natou ui ko natou ko he kau Kilisitiano mo te hahaʼi ʼa Sehova?
11 ʼE fakamafola koa te ʼu logo lelei e te ʼu lotu ʼae ʼe natou ui ko natou ko he kau Kilisitiano, ohage ko tona fai e Sesu? ʼI te agamahani, ʼe totogi te kau takitaki lotu ke natou fai he akonaki ki te hahaʼi ʼo tanatou lotu. ʼE mole fai e te kau takitaki lotu ʼaia he ʼu tisipulo foʼou kaʼe natou faiga pe ke natou taupau te hahaʼi ʼo tanatou lotu. ʼI ʼihi temi, ʼe natou faiga ke natou fakalotomalohiʼi te hahaʼi ke olo ʼo faifakamafola. Ohage la, ʼi te taʼu 2001, neʼe ui e te Tuʼi Tapu ko Soane Paulo 2 ʼi he tohi, ʼe tonu ki te hahaʼi ʼo tanatou lotu ke natou fakamafola te Evaselio pea mo faʼafai ohage ko te apositolo ko Paulo, ʼae neʼe ina ui fenei: “Malaia kia au mo kapau e mole au fakaha te Evaselio!” Pea neʼe ui e te tuʼi tapu ʼe mole tonu pe ke fai te gaue faifakamafola ʼaia ʼe natou ʼae neʼe ako, kaʼe ʼe tonu ke fai e te hahaʼi fuli. Kaʼe, tokolahi neʼe mole natou fakalogo ki te fakalotomalohi ʼaia.
12 ʼE feafeaʼi ʼo ʼuhiga mo te kau Fakamoʼoni ʼa Sehova? ʼE ko natou pe ʼae ʼe natou fakamafola ko Sesu ʼae neʼe fakanofo ko he Hau talu mai te taʼu 1914. Neʼe natou fakalogo kia Sesu pea mo fakamuʼamuʼa ʼi tonatou maʼuli te gaue faifakamafola. (Maleko 13:10) Neʼe ui ʼi te tohi (Pillars of Faith—American Congregations and Their Partners) ʼe maʼuhiga ʼaupito te gaue faifakamafola ki te kau Fakamoʼoni ʼa Sehova. Neʼe toe ui ai ka natou felaveʼi mo he hahaʼi ʼe faigataʼaia, mo logoʼi ʼe natou nonofo tokotahi pea mo mahahaki, ʼe natou tokoni kia natou ʼaia. Kaʼe, ʼe mole galo kia natou ko tanatou fakatuʼutuʼu ʼe ko te fakamafola ki te hahaʼi te fakaʼosi ʼo te malama ʼaeni pea mo akoʼi kia natou pe ʼe kotea ʼe tonu ke natou fai ke haofaki ai natou. ʼE haga fakamafola e te kau Fakamoʼoni ʼa Sehova te logo ʼaia pea ʼe natou faʼifaʼitakiʼi te ʼu faʼahiga faifakamafola ʼa Sesu mo ʼana tisipulo.
ʼE TONU KE KAKU KIFEA TE GAUE ʼAIA PEA KO TEMI ʼE FIA ʼE TONU KE FAKAHOKO AI?
13. ʼE tonu ke kaku kifea te fai ʼo te gaue faifakamafola?
13 Neʼe ui e Sesu ʼe fakamafola pea mo akoʼi anai e ʼana tisipulo te ʼu logo lelei “i te malamanei katoa.” Neʼe ina fakatotonu ke natou fai he ʼu tisipulo ʼi “te u puleaga fuli.” (Mateo 24:14; 28:19, 20) Ko tona fakaʼuhiga ʼe tonu ke fakamafola te ʼu logo lelei ʼi te malamanei katoa.
14, 15. Kotea ʼe ha mai ai ko te kau Fakamoʼoni ʼa Sehova ʼae ʼe natou fakahoko te lea fakapolofeta ʼa Sesu? (Vakaʼi te ʼuluaki pāki.)
14 Ko te kau Fakamoʼoni pe ʼa Sehova ʼe natou fakahoko te lea fakapolofeta ʼae ia Mateo 24:14. Kotea tona tupuʼaga? Koteʼuhi ʼi Amelika, ko te teitei toko 600 000 kau takitaki lotu ʼae ʼe natou ui ko natou ko he kau Kilisitiano kaʼe ko te teitei toko 1 200 000 kau Fakamoʼoni ʼa Sehova ʼe natou fakamafola te ʼu logo lelei ʼi te fenua ʼaia. Pea ʼi te malamanei katoa, ko te teitei toko 400 000 patele ʼo te lotu Katolika kaʼe ko Fakamoʼoni ʼa Sehova ʼe toko 8 miliona tupu ʼe natou fakamafola te ʼu logo lelei ia fenua ʼe 240. ʼE mahino ia, ʼe fakamafola e te kau Fakamoʼoni ʼa Sehova te ʼu logo lelei ʼi te malamanei. Ko te gaue ʼaia, ʼe ina fakamaʼuhigaʼi pea mo fakavikiviki ia Sehova.—Pesalemo 34:2; 51:17.
15 ʼI totatou ʼuhiga Fakamoʼoni ʼa Sehova, ko tatatou fakatuʼutuʼu ʼe ko te fakamafola te ʼu logo lelei ki te tokolahi ʼi muʼa ʼo te hoko mai ʼo te fakaʼosi. Ke tou fakahoko te gaue ʼaia, ʼe tou fakaliliu mo ta te ʼu tohi, mo te ʼu nusipepa, mo te ʼu pepa lotu pea mo te ʼu pepa fakaafe ki te fakatahi lahi mo te ʼAho Fakamanatu ʼe lauʼi miliona, ia lea ʼe 700 tupu. ʼE tou foaki noa te ʼu tohi ʼaia ki te hahaʼi. ʼI te taʼu pe ʼaeni kua ʼosi, neʼe tou ta ia tohi Fakatohi-tapu ʼe 4 miliale tupu. Neʼe tou toe ta ia te Tohi-Tapu Les Saintes Écritures. Traduction du monde nouveau ʼe 200 miliona tupu, ia teitei lea ʼe 130. Pea kua tou maʼu ʼi tatatou tuʼasila ʼi te Neti, ia lea ʼe 750 tupu. Koia, ʼe ko te kau Fakamoʼoni pe ʼa Sehova ʼae ʼe natou fai te gaue fakaofoofo ʼaia.
16. ʼE tou iloʼi feafeaʼi ʼe maʼu e te kau Fakamoʼoni ʼa Sehova te laumalie ʼo te ʼAtua?
16 Ko temi ʼe fia ʼe fakahoko ai te gaue faifakamafola? Neʼe ui e Sesu ko te ʼu logo lelei ʼe fakamafola anai ʼo kaku ki te hoko mai ʼo te fakaʼosi. ʼI totatou ʼuhiga Fakamoʼoni ʼa Sehova, ʼe feala ke tou faʼa kataki ʼi te gaue faifakamafola ʼi te ʼu ʼaho fakamuli. Koteʼuhi ʼe tou maʼu te laumalie maʼoniʼoni ʼo Sehova. (Gaue 1:8; 1 Petelo 4:14) Ko ʼihi hahaʼi lotu, ʼe feala ke natou ui fenei: “ ʼE matou maʼu te laumalie maʼoniʼoni.” Kaʼe, ʼe natou lava fai koa te gaue ʼae ʼe fai e te kau Fakamoʼoni ʼa Sehova ʼi te ʼu ʼaho fakamuli ʼaeni? Ko ʼihi lotu ʼe natou faiga ke natou faifakamafola ohage ko tatou. Kaʼe, ʼe mole hona fua. Ko ʼihi ʼe natou lotolelei ʼo olo ʼo faifakamafola kaʼe ʼe fakatemi pe. ʼE feala ki ʼihi hanatou faifakamafola ʼi te ʼu ʼapi, kaʼe mole natou fakamafola te ʼu logo lelei ʼo te Puleʼaga. Koia, ʼe mole feala ke natou fai te gaue ʼae neʼe kamata e Sesu.
KO AI ʼAE ʼE INA FAKAMAFOLA MOʼONI TE LOGO LELEI IA ʼAHO NEI?
17, 18. (1) He koʼe ʼe tou tui papau ʼe ko te kau Fakamoʼoni pe ʼa Sehova ʼae ʼe natou fakamafola te ʼu logo lelei ʼo te Puleʼaga ia ʼaho nei? (2) Kotea ʼae ʼe lava tokoni mai ke tou haga hoko atu te gaue ʼaia?
17 Ko ai ʼae ʼe ina fakamafola te ʼu logo lelei ʼo te Puleʼaga ia ʼaho nei? ʼE ko te kau Fakamoʼoni pe ʼa Sehova. He koʼe ʼe tou iloʼi te faʼahi ʼaia? Koteʼuhi ʼe natou fakamafola te logo ʼae neʼe kole mai e Sesu ke tou fakamafola, ia te ʼu logo lelei ʼo te Puleʼaga. Ka natou kumi te hahaʼi, ʼe natou fakaʼaogaʼi te ʼu faʼahiga faifakamafola ʼae ʼe lelei. ʼE natou faifakamafola ʼaki te ʼu tupuʼaga lelei, he ʼe natou ʼoʼofa ia Sehova pea mo te hahaʼi. ʼE lahi te tuputupu ʼo tanatou faifakamafola koteʼuhi ʼe natou faifakamafola ki te hahaʼi ʼo te ʼu puleʼaga mo te ʼu lea fuli. Pea ʼe natou haga fakamafola anai te ʼu logo lelei ʼo te Puleʼaga ʼo kaku ki te hoko mai ʼo te fakaʼosi.
18 ʼE ko he meʼa fakafiafia tatatou sisio ki te fakahoko e te kau Fakamoʼoni ʼa Sehova te gaue fakaofoofo ʼae ko te fakamafola ʼo te logo lelei ʼi te ʼu ʼaho fakamuli ʼaeni. Kaʼe, he koʼe ʼe tou lava fai ia te gaue ʼaia? ʼE fakamahino fenei e te apositolo ko Paulo: “Ko te Atua ae e ina fakatupu ia koutou te fiafai mo te faafai o tona finegalo lelei.” (Filipe 2:13) ʼOfa pe ke haga foaki mai e Sehova te malohi ʼae ʼe ʼaoga ke tou faiga fakamalotoloto ke tou fakamafola tuʼumaʼu te logo lelei.—2 Timoteo 4:5.
^ [1] (palakalafe 3) ʼI te vaega ʼaeni pea mo ʼihi atu, ko matou ʼae neʼe matou fakailoga keheʼi.