1. Kai saja contoh hukum i bas Pustaka, janah kai gunana adi kita patuh?

I BAS Pustaka si Badia, Jahwe mereken melala hukum. Alu bage, banci sieteh kai si ngena ateNa guna silakoken. Contohna, ilarangNa kita nembah berhala, nangko, mabuk, ntah pe erlagu langkah si la mehuli. (1 Korinti 6:9, 10) Janah Jesus Kristus mereken perentah khusus man pengikutna, ”Laweslah ku kerina bangsa manusia, bahanlah ia jadi ajar-ajarku: Peridiken ia ibas gelar Bapa, gelar Anak, ras gelar kesah si badia, janah ajari ia ngikutken kerina si enggo kupedahken man bandu. Janah ingetlah! Aku tetap kap ras kam seh ku kedungen jaman.” (Matius 28:19, 20) Kerina perentah Jahwe ras Jesus erguna man banta. Misalna, kita iajari uga carana ngurus keluarga ras dirinta sendiri. Selain si e, kita banci erlajar uga carana gelah lebih sehat ras ermeriah ukur. Si lebih penting, adi sipatuhi perentah Jahwe, termasuk perentah guna erberita, meriah sibahan ukurNa janah ipasu-pasuNa kita.

2, 3. (a) Engkai maka Pustaka si Badia la mereken peraturen i bas kerina situasi kegeluhenta? (b) Penungkunen kai si man bahasenta? (Nehen gambar pemena artikel.)

² Tapi, Pustaka si Badia la mereken peraturen i bas kerina  situasi kegeluhenta. Contohna, la lit petunjuk si khusus kerna peruis kalak Kristen. Enda ncidahken maka Jahwe e pentar. Engkai? Erkiteken mode peruis terus erganti-ganti janah erbage-bage cara peruis kalak i belang-belang doni. Tapi, petunjuk Pustaka si Badia kerna cara peruis la pernah ketadingen jaman. Pustaka si Badia pe la risiken melala peraturen kerna uga cara milih pendahin, hiburen, ntah pe perawaten kesehaten. Jahwe mereken kebebasen man tep-tep kalak bage pe man kepala keluarga guna erbahan keputusen sendiri.

³ Maun-maun, kita arus erbahan keputusen penting si banci mpengaruhi kegeluhenta. Uga adi la lit hukum kerna si e i bas Pustaka si Badia? Banci kita tersungkun-sungkun, ’Iperdiateken Jahwe nge keputusenku? Meriah nge ukurNa nandangi keputusen kai pe si kubahan adi si e la ertentangen ras hukum i bas Pustaka si Badia? Uga banci aku tek maka meriah ukurNa nandangi keputusenku?’

4, 5. Kai pengaruh keputusenta man banta ras kalak si deban?

⁴ Lit si erpengakap maka ia bebas ngelakoken kai pe. Tapi ateta ngelakoken kai si erbahan meriah ukur Jahwe. Emaka sope lenga erbahan keputusen, perlu siukuri petunjuk i bas Pustaka si Badia janah ndalankenca. Contohna, Pustaka si Badia mpebetehken uga pandangen Dibata kerna dareh, emaka sipatuhi kai si ikatakenna. (Kejadin 9:4; Perbahanen 15:28, 29) Kita banci ertoto mindo penampat Jahwe gelah keputusenta erbahan meriah ukurNa.

⁵ Keputusenta mpengaruhi kegeluhenta. Keputusen si mehuli banci nampati kita reh rembakna ras Jahwe. Keputusen si la mehuli banci ncedai hubungenta ras Ia. Keputusenta pe lit pengaruhna man kalak si deban. La ateta ngelakoken kai pe si banci ngerugiken turang seninanta ntah pe erbahan kote kinitekenna. Janah la ateta erbahan masalah i bas runggun. Emaka, kita arus erbahan keputusen si mehuli.​—Oge Roma 14:19; Galati 6:7.

6. Uga kita banci erbahan keputusen si mehuli?

⁶ Adi la lit petunjuk si jelas i bas Pustaka si Badia, kai si arus silakoken? Perlu siukuri masalahna alu manjar-anjar janah ula silakoken kai si ngena ateta saja. Kenca si e, bahanlah keputusen si ngena ate Jahwe. Alu bage, banci kita tek maka isampatiNa kita gelah berhasil.​—Oge Masmur 37:5.

7. Paksa la lit hukum i bas Pustaka si Badia kerna masalahta, uga banci sieteh kai si ngena ate Jahwe?

⁷ Uga banci sieteh kai si ngena ate Jahwe? Nina Epesus 5:17, ”Pergermetkenlah kai si ngena ate [Jahwe].” Adi la lit hukum si jelas kerna masalahta, uga banci sieteh kai si ate Jahwe silakoken? Perlu kita ertoto man Jahwe janah nggit ibimbing kesahNa si badia.

8. Contoh kai si ncidahken maka ieteh Jesus kai peraten Jahwe?

⁸ Rusur ipegermetken Jesus kai si ngena ate Jahwe paksa ia arus erbahan keputusen. Contohna, paksa nterem kalak kelihen, ertoto Jesus, kenca si e iberena kalak e man alu mukjizat. Enda terjadi dua kali. (Matius 14:17-20; 15:34-37) Tapi paksa ia kelihen janah isuruh Iblis ngubah batu jadi roti, Jesus la nggit. (Oge Matius 4:2-4.) Erkiteken itandaina kal Bapana, ietehna maka la ate Jahwe ia nggunaken kesah si badia guna kepentingenna sendiri. Tek ia maka Jahwe pasti mbimbing ia janah mereken pangan paksa iperlukenna.

9, 10. Uga carana erbahan keputusen si mehuli? Bereken contoh.

 ⁹ Bali bagi Jesus, banci sibahan keputusen si mehuli adi rusur sipindo bimbingen Jahwe. Nina Pustaka si Badia, ”Ernalemlah man Dibata alu bulat ukurndu. Ndigan pe ola ernalem man pemetehndu jine. Ingetlah Dibata i bas kerina si idahikenndu e maka Ia si nuduhken dalan si payo man bandu. Ola iakapndu pentar kam lebih asa patutna; erkemalangenlah man Dibata janah ola kam nggit ngelakoken si jahat.” (Kuan-kuanen 3:5-7) Adi sipelajari Pustaka si Badia ras sieteh perukuren Jahwe, banci siangkai kai si ngena ateNa guna silakoken i bas keadan tertentu. Adi reh bagesna siangkai perukuren Jahwe, reh nukahna siakap erbahan keputusen si ngena ateNa. Alu bage, kita banci reh patuhna man Jahwe.​—Masmur 119:11, 12.

¹⁰ Bayangken sekalak ndehara sangana belanja janah idahna sepatu si mejile. Tapi seh kal mergana. Amin gia la i je perbulangenna, ietehna maka perbulangenna pasti la setuju adi mbue kal sen ibelanjakenna guna nukur sepatu e. Uga maka banci ietehna? Kalak e nggo erjabu piga-piga tahun dekahna. Emaka ietehna uga perukuren perbulangenna i bas nggunaken sen. Bage ka pe, adi sieteh perukuren Jahwe ras kai si nggo ilakokenNa, banci sieteh kai si ngena ateNa guna silakoken i bas erbage-bage situasi.

11. Kai si banci siukuri paksa ngoge ntah pe mpelajari Pustaka si Badia? (Nehen kotak ” Paksa Erlajar Pustaka si Badia, Ukurilah.”)

¹¹ Guna meteh perukuren Jahwe, arus sioge ras sipelajari Pustaka si Badia alu  ratur. Paksa ngelakokenca, banci siukuri, ’Kai si banci kupelajari kerna Jahwe? Engkai maka bage perbahanenNa?’ Janah bagi Daud, perlu ka sipindo penampat Jahwe gelah banci lebih sitandai Ia. Isuratken Daud, ”Ajari aku o [JAHWE] kerna peratenNdu, petangkas kai si arus kulakoken. Ajari aku o [JAHWE] erdalan arah kebenarenNdu, sabap Kam kap Dibatangku. Kam kap si ngkelini aku, man baNdu aku lalap ernalem.” (Masmur 25:4, 5) Paksa sipelajari sada ayat, ukuri uga banci sigunaken keterangen e. Banci nge sigunaken i bas keluarga, pendahin, sekolah, ntah pe i bas pelayanen? Alu ngukuri si e, banci lebih siangkai uga ate Jahwe kita nggunaken keterangen e.

12. Publikasi ras perpulungenta banci nampati kita lebih ngangkai perukuren Jahwe. Emaka kai si arus silakoken?

¹² Cara si debanna eme alu tuhu-tuhu mperdiateken kai si niajarken organisasi Jahwe si kerinana erpalasken Pustaka si Badia. Contohna, paksa arus erbahan keputusen, banci sieteh perukuren Jahwe alu nggunaken Indeks Publikasi Menara Pengawal ras Panduan Riset untuk Saksi-Saksi Yehuwa. Banci ka sidatken manfaat i bas perpulungen adi sibegiken alu tutus, sibereken komentar ras siukuri kai si paksana iajarken. Enda banci nampati kita gelah caranta rukur bali bagi Jahwe. Hasilna, banci sibahan keputusen si ngena ateNa janah sidatken pasu-pasuNa.

13. Adi siukuri perukuren Jahwe, banci sibahan keputusen si mehuli. Bereken contoh.

¹³ Mari siperdiateken sada contoh uga kita banci erbahan keputusen si mehuli erkiteken nggo siukuri perukuren Jahwe. Misalna, jadi perintis atendu. Enggo isederhanakenndu kegeluhenndu gelah banci lebih mbue waktundu i bas pelayanen. Tapi sangsi denga kam banci ntah lang ermeriah ukur alu sen ras barang-barang si sitik. Tentu saja, la lit ikataken i bas Pustaka si Badia maka kita arus jadi perintis. Kita banci terus ngelayani Jahwe alu setia selaku perberita. Tapi, ikataken Jesus maka Jahwe masu-masu kalak si erbahan pengorbanen guna Kinirajan Dibata. (Oge Lukas 18:29, 30.) Pustaka si Badia pe ngataken maka meriah ukur Jahwe adi sipuji Ia asa ngasupta, janah ateNa gelah kita ermeriah ukur i bas ngelayani Ia. (Masmur 119:108; 2 Korinti 9:7) Alu notoken ras ngukuri si e, banci sibahan keputusen si mehuli janah sidatken pasu-pasu Jahwe.

14. Uga banci ietehndu cara peruis si ngena ate Jahwe?

¹⁴ Perdiateken contoh si deban: Ngena kal atendu sada mode peruis, tapi ietehndu maka piga-piga kalak i bas runggun banci terganggu pusuhna adi bage peruisndu. La lit petunjuk i bas Pustaka si Badia kerna mode peruis e. Emaka, uga banci ietehndu kai si ngena ate Jahwe? Nina Pustaka si Badia, ”Si diberu, mehamat dingen mehuli min peruisna. Potongen bukna sederhana saja; ola make perhiasen emas ntah mutiara ntah paken-paken si meherga. Tapi cidahkenlah perbahanen si mehuli, si sentudu ras sekalak diberu si ngaku maka ia nembah man Dibata.” (1 Timotius 2:9, 10) Tentu, nasehat enda berlaku man kerina umat Jahwe, termasuk si dilaki. Adi nggit kita ndalanken nasehat enda, siukuri uga perasan kalak si deban nandangi peruista. Janah erkiteken keleng ateta turang seninanta, la kita nggit erbahan pusuh kalak e terganggu. (1 Korinti 10:23, 24;  Pilipi 3:17) Adi siperdiateken kai si ikataken Pustaka si Badia ras uga perukuren Jahwe, banci sibahan keputusen si ngena ateNa.

15, 16. (a) Uga perasan Jahwe adi terus siukuri hal-hal si amoral? (b) Paksa milih hiburen, uga banci sieteh hiburen kai si ngena ate Jahwe? (c) Uga arusna kita erbahan keputusen si penting?

¹⁵ I bas Pustaka si Badia, sipelajari maka mesui dingen ceda kal pusuh Jahwe paksa manusia ngelakoken kejahaten ras ngukuri kai si la mehuli. (Oge Kejadin 6:5, 6.) Jelas me Jahwe la senang adi sibayangken perbahanen seksual si salah. Situhuna, adi terus siukuri kerna si e, dungna tuhu-tuhu silakoken. Ate Jahwe gelah siukuri kai si bersih ras si mehuli. Isuratken Jakup maka kepentaren Jahwe e ”si pemena e me bersih pusuh peraten, nggit erdame, lemah lembut, la megogo. Dem perkuah ate i bas ia dingen erbuahken perbahanen si mehuli. La rayo-ayo, ras tangkas ukur tangkas kata”. (Jakup 3:17) Emaka Pustaka si Badia ngajarken maka arus sipedauh dirinta i bas hiburen kai pe si banci erbahan kita mbayangken ntah pe ersura-sura ngelakoken kai si la mehuli. Janah adi siangkai alu jelas kai si ngena ate Jahwe ras kai si segat ateNa, reh nukahna siakap milih buku, film, ntah pe games si cocok man kalak Kristen. La perlu sisungkuni kalak si deban.

¹⁶ Lit piga-piga pilihen si banci iputusken alu erbage cara janah kerinana e erbahan meriah ukur Jahwe. Tapi paksa arus erbahan keputusen si seh kal pentingna, banci sipindo nasehat pertua ntah pe turang senina si nggo erpengalamen. (Titus 2:3-5; Jakup 5:13-15) Tentu saja, labo sipindo ia si erbahan keputusen man banta. Tapi, perlu siukuri alu megermet prinsip Pustaka si Badia janah sibahan keputusenta sendiri. (Heber 5:14) Nina rasul Paulus, ”Sekalak-sekalak simaba babanna nge.”​—Galati 6:5.

17. Kai gunana adi sibahan keputusen si ngena ate Jahwe?

¹⁷ Adi sibahan keputusen si ngena ate Jahwe, reh rembakna kita ras Ia janah sidatken pasu-pasuNa. (Jakup 4:8) Kinitekenta man Jahwe pe reh paguhna. Emaka, mari siukuri alu mbages isi Pustaka si Badia gelah banci siangkai perukurenNa. Tentu saja, erlajar kerna Jahwe la erkeri-kerin. (Jop 26:14) Tapi adi rusur kita erlajar kerna Ia, banci kita jadi pentar janah ngasup erbahan keputusen si mehuli. (Kuan-kuanen 2:1-5) Perukuren ras rencana manusia rusur mobah-obah, tapi Jahwe la pernah mobah. Nina si nuratken buku Masmur, ”Rencana [JAHWE] tetap rasa lalap, sura-suraNa la masap rasa lalap seh rasa lalap.” (Masmur 33:11) Jelas me, banci sibahan keputusen si mehulina adi siikuti perukuren Jahwe janah silakoken kai si ngena ateNa.