1. Ñanyi mizhilo imo iji mu Baibolo, kabiji tumwenamo byepi inge twiikookela?

MU BAIBOLO, Yehoba witupa mizhilo itubuula patoka bintu byo akeba’mba tubenga. Kya kumwenako, witubuula’mba kechi twafwainwa kupopwela bankishi, kwiba, kupendwapendwa, nangwa kuba bulalelale ne. (1 Kolinda 6:9, 10) Mwana wa kwa Yehoba, aye Yesu wakambizhe baana banji ba bwanga amba: “Yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha mu jizhina ja Tata ne ja Mwana ne ja mupashi wazhila, ne kwibafunjisha kulama bintu byonse byo nemukambizha. Kabiji yukai’mba nji nenu moba onse kukafikatu ne ku mpelo ya buno bwikalo.” (Mateo 28:19, 20) Tumwenamo bingi mu bintu byonse bitubuula Yehoba ne Yesu. Mizhilo ya Yehoba itufunjisha bya kwilama atwe bene ne bisemi byetu, kabiji itukwasha kwikala na bumi bwawama ne na lusekelo. Kyakilamo kunema, inge twakookela mikambizho ya Yehoba, kubikapotu ne mukambizho  wa kusapwila, tumutokesha bingi ku muchima kabiji witupesha.

2, 3. (a) Mambo ka Baibolo o abujila kutongwela mizhilo ya kulondela mu byonse byo tukeba kuba? (b) Ñanyi mepuzho o tusakwisambapo mu uno mutwe? (Monai kipikichala kitanshi.)

² Pano bino, Baibolo kechi witupa mizhilo pa bintutu byonse byo twafwainwa kuba mu bwikalo ne. Kya kumwenako, Baibolo kechi watongaula bivwalo byo twafwainwa kuvwala ne. Kino kimwesha maana a Yehoba. Bantu bavwala bivwalo byapusana pusana, kabiji mafwashonyi apimpulwa mu kuya kwa kimye, pano bino byamba Baibolo kechi bipimpulwa ne. Kabiji Baibolo kechi watongaula makito o twafwainwa kutwela, bya kisangajimbwe byo twafwainwa kusala, nangwa mashinda o twafwainwa kwikelamo na butuntulu bwa mubiji ne. Yehoba wapa muntu mwine ne mitwe ya bisemi luusa lwa kwifuukwila pa bino bintu.

³ Onkao mambo, inge ketukebe kufuukulapo bintu bimo byanema mu bwikalo bwetu, bino twataana amba kafwapo muzhilo waambapo mu Baibolo ne, twakonsha kwishikisha’mba: ‘Nanchi Yehoba ulangulukapo byepi pa bino bintu byo nkeba kufuukulapo? Nanchi byonse byo nkafuukapo kuba bikatokesha Lesa ku muchima umvwe kya kuba kafwako muzhilo wa mu Baibolo ye nalala nenyi? Nakonsha kuyuka byepi inge bintu byo nkafuukulapo bikatokesha Yehoba ku muchima?’

4, 5. Ñanyi bintu byakonsha kufumamo mu bintu byo tufuukulapo?

⁴ Bantu bamo balanguluka’mba baji na luusa lwa kuba byonse byo bakeba. Pano bino, tukeba kuba bintu byakonsha kusangajika Yehoba. Onkao mambo, saka tukyangye kufuukulapo bya kuba, twafwainwa kulanguluka pa byaamba Baibolo ne kwibikookela. Kya kumwenako, Baibolo witubuula Lesa byo amona mashi, onkao mambo twafwainwa kulondela byo aamba. (Ntendekelo 9:4; Byubilo 15:28, 29) Twafwainwa kulomba Yehoba amba etukwashe kufuukula bintu bikamutokesha ku muchima.

⁵ Mu bintu byo tufuukulapo mufuma byawama nangwa byatama. Inge twafuukula bulongo, tufwenya kwipi ne Yehoba. Inge twabula kufuukula bulongo, bulunda bwetu na Lesa bupwa. Kabiji byo tufuukulapo byakonsha kusangajika bakwetu nangwa kwibalefula. Kechi twafwainwa kuba kintu kyakonsha kuzhingijisha balongo betu nangwa kukookesha lwitabilo lwabo ne. Kabiji kechi twafwainwa kuba bintu bikalengela balongo mu kipwilo kupusenamo ne. Onkao mambo, kyanema kuba’mba tufuukulenga bintu bulongo.—Tangai Loma 14:19; Ngalatiya 6:7.

6. Ñanyi kintu kyafwainwa kwitukwasha kufuukula bintu bulongo?

⁶ Twakonsha kufuukula byepi bintu bulongo inge kya kuba Baibolo kechi wapanapo muzhilo pa byobyo bintu ne? Mu kifulo kya kubatu bintu bituwamina, twafwainwa kulangulukapo bulongo ne kufuukula bintu bikatokesha Yehoba ku muchima. Inge twauba bino, Yehoba ukapesha byo twafuukulapo.—Tangai Salamo 37:5.

7. Inge kya kuba Baibolo kechi wapanapo muzhilo pa bintu bimo ne, twakonsha kuyuka byepi Yehoba kyo akeba’mba tube?

⁷ Pano twakonsha kuyuka byepi bintu bitokesha Yehoba ku muchima? Efisesa 5:17  waamba’mba: “Yukainga kyaswa muchima wa Yehoba.” Inge kya kuba Baibolo kechi wapanapo muzhilo pa bintu bimo ne, twafwainwa kulangulukapo ne kuyuka Yehoba kyo akeba’mba tube pa byobyo bintu. Twakonsha kuyuka byepi? Twafwainwa kulomba kwi Lesa ne kuswisha mupashi wanji wazhila kwitutangijile.

8. Yesu wayukanga byepi bintu Yehoba byo akebanga amba obe? Ambai kya kumwenako.

⁸ Yesu wayukanga bintu Yehoba byo akebanga amba obe. Pa bimye bibiji, mabumba a bantu aumvwine nzala, kabiji Yesu walombele ne kwibapa kajo mu jishinda ja kukumya. (Mateo 14:17-20; 15:34-37) Pano kimye Yesu kyo afwile nzala, Diabola wamwesekele amba alule mabwe ekale shinkwa, bino Yesu wakaine. (Tangai Mateo 4:2-4.) Yesu wayukile Shanji byo aji, onkao mambo, wayukile amba Shanji kechi ukeba’mba Yesu engijishenga mupashi wazhila na kukebatu kwisangajika aye mwine ne. Wayukile’mba Yehoba wakonsha kumukwasha ne kumupa kajo.

9, 10. Ki ka kiketukwasha kufuukula bintu bulongo? Ambai kya kumwenako.

⁹ Ne atweba twakonsha kufuukula bintu bulongo inge twakookela lutangijilo lwa Yehoba, byonka byaubanga Yesu. Baibolo waamba: “Ketekela mwi Yehoba na muchima wobe yense, kabiji kange uketekele mu milangwe yobe ne. Saka umuvuluka mu bintu byonse byo uba, ne aye ukakolwela mashinda obe. Kange wimonenga’mba wi wa maana ne. Akamwa Yehoba ne kufuma ku bintu byatama.” (Byambo bya Maana 3:5-7) Inge ketufunde Baibolo ne kufunda pe Yehoba byo alangulukapo pa bintu, po po tukayuka byo akeba’mba tube mu bintu byabula mu mizhilo ya mu Baibolo. Kabiji inge twatwajijila kufunda bilanguluka Yehoba, kiketupelela kufuukula bintu bikamusangajikanga. Kino kiketukwasha kwikala ‘bantu bata muchima ku lutangijilo lwa Lesa.’—Ezikyo 11:19, tubyambo twa munshi.

¹⁰ Fwanyikizhai amba mwanamukazhi wasongolwa ubena kupota bintu mu shitolo, bino wamona nsapato yawama. Pano bino, iji bingi na mutengo. Nangwa kya kuba mwatawanji washala ku nzubo, bino uno mwanamukazhi wayuka’mba mwatawanji kechi usakutemwa inge apote ino nsapato ya mutengo ne. Wayuka byepi? Mambo waikala na mwatawanji mu masongola pa myaka yavula, onkao mambo wayuka byo akeba’mba bengijishenga mali. Kyo kimotu, inge twafunda pe Yehoba byo alanguluka ne bintu byo aubapo kala, tukayuka byo akeba’mba tubenga mu bintu byapusana pusana.

11. Ñanyi mepuzho o twakonsha kwishikisha kimye kyo tubena kutanga nangwa kufunda Baibolo? (Monai kakitenguluzha ka kuba’mba: “ Kimye kyo Mubena Kutanga Baibolo, Ishikishai’mba.”)

¹¹ Twakonsha kuyuka byepi bilanguluka Yehoba? Kintu kyanemesha kyo twafwainwa kuba ke kutanga ne kufunda Baibolo kimye  kyonse. Kimye kyo tubena kuba bino, twakonsha kwishikisha’mba: ‘Abino byo natanga bimfunjishapo ka pe Yehoba? Mambo ka o aubijile bino?’ Kabiji byonka byaubile Davida, ne atweba twafwainwa kulomba Yehoba amba etukwashe tumuyuke bulongo. Davida wanembele’mba: “Anweba Yehoba, mbuulai mashinda enu; mfunjishai kwenda mu mashinda enu. Ntangijilai kwenda mu bukine bwenu ne kumfunjisha, mambo anweba yenu Lesa wa lupulukilo wami. Mwi anweba mo mo naketekela kimye kyonse.” (Salamo 25:4, 5) Inge twafundapo bintu bimo pe Yehoba, twakonsha kulanguluka mashinda amo mo twakonsha kwingijisha byobyo bintu byo twafunda. Apo kampe twakosha kwibingijisha mu kisemi, ku nkito, ku sukulu, nangwa mu mwingilo wa kusapwila. Inge twalangulukapo mashinda mo twakonsha kwingijisha byo twafunda, kiketupelela kuyuka Yehoba byo akeba’mba tubenga.

12. Mabuku etu ne kupwila byakonsha kwitukwasha byepi kuyuka bilanguluka Yehoba pa bintu?

¹² Jishinda jikwabo mo twakonsha kuyukila bilanguluka Yehoba ke kuta maana ku bintu bitufunjisha jibumba janji kufuma mu Baibolo. Kya kumwenako, inge tukeba kuyuka  bilanguluka Yehoba pa bintu byo tukeba kufuukulapo, twakonsha kwingijisha Buku wa Kukwasha Bakamonyi ba kwa Yehoba Kukebakeba Bishinka ne buku wa Kizungu wa Watch Tower Publications Index. Twakonsha ne kufunjilako byavula inge saka tuteleka ne kukumbulapo pa kupwila kwetu ne kulanguluka langulukapo pa byo tubena kufunda. Kino kiketufunjisha kulanguluka bintu byonka bilanguluka Yehoba. Kuba bino kuketukwasha kufuukulanga bintu bimusangajika kabiji uketupesha.

13. Ambai kya kumwenako kimwesha byo twakonsha kufuukula bulongo bintu inge twayuka bilanguluka Yehoba.

¹³ Twayai twisambe pa kya kumwenako kimwesha byo twakonsha kufuukula bintu bulongo inge patanshi twalanguluka pa bikeba Yehoba. Fwanyikizhai’mba mukeba kwingilako bupainiya. Mwapimpulako bwikalo bwenu pa kuba’mba mwingilenga kimye kyabaya mu mwingilo. Pano bino mubena kuzhinauka inge kya kuba mukatwajijila kwikala ba lusekelo na mali acheche ne bintu bicheche mu bwikalo. Ibyo, Baibolo kechi waambapo’mba twakonsha kwingijilatu Yehoba inge twi bapainiya ne. Twakonsha kumwingijila mu bukishinka nangwatu inge twi basapwishitu. Pano bino, Yesu waambile’mba Yehoba upesha boba basankilapo bimo pa kuba’mba bengijile Bufumu. (Tangai Luka 18:29, 30.) Baibolo waamba ne kuba’mba Yehoba usangalala bingi inge twibikako kumwingijila, kabiji ukeba’mba tumwingijilenga na lusekelo. (Salamo 119:108; 2 Kolinda 9:7) Inge ketulombe ne kulanguluka langulukapo pa bino bintu, tukafuukula bintu byawama kabiji Yehoba uketupesha.

14. Mwakonsha kuyuka byepi mvwajilo itokesha Yehoba pa muchima?

¹⁴ Akimonai kino kya kumwenako kikwabo: Fwanyikizhai’mba paji bivwalo bimo byo mwatemwa bingi, bino mwayuka’mba bamo mu kipwilo bakonsha kulefulwa inge mwibivwala. Kabiji Baibolo kechi wapanapo muzhilo pa bino bivwalo ne. Mwakonsha kuyuka byepi bilangulukapo Yehoba? Baibolo witubuula’mba: ‘Banabakazhi nabo bafwainwa kuvwalanga bulongo, na kwipelula ne kwikala na milanguluko yawama, kechi na nsuki yo bakizhamo kwichika nangwa na ngolode nangwa na bamangalite nangwa na bivwalo bya mutengo mukatampe ne, bino bafwainwa kuvwala byafwainwa banabakazhi betela’mba banemeka Lesa, ko kuba’mba kupichila mu kwingila mingilo yawama.’ (1 Timoti 2:9, 10) Byonka byo twayuka, bakalume ba Yehoba bonse bakonsha kufunjilako ku bino byambo, kubikapotu ne banabalume. Inge twayuka pa kupelela mu bintu, tukalangulukanga pa bikalangulukapo bakwetu pa bivwalo byo twasala. Kabiji na mambo a kuba twatemwa balongo betu, kechi tukeba kwibazhingijisha nangwa kwibalefula ne. (1 Kolinda 10:23, 24; Filipai 3:17) Inge twalanguluka pa byamba Baibolo ne bilanguluka Yehoba, tukafuukulanga bintu bimutokesha ku muchima.

15, 16. (a) Yehoba umvwa byepi inge ke tulanguluke pa bulalelale? (b) Pa kusala bya kisangajimbwe twakonsha kuyuka byepi bisangajika Yehoba? (c) Twakonsha kuba byepi pa kufuukula bintu bikatampe?

¹⁵ Baibolo witufunjisha’mba Yehoba umvwa bingi bulanda inge bantu babena kuba byatama ne kulanguluka pa bintu byatama. (Tangai Ntendekelo 6:5, 6.) Twamonatu patoka’mba Yehoba kechi ukeba’mba tulangulukenga pa kwilaala ne. Kishinka ke kya kuba’mba inge twatwajijila  kulanguluka pa bino bintu, juba jimo tukebyuba. Pakuba, Yehoba ukeba’mba tulangulukenga pa bintu byawama. Mwana wa bwanga, aye Yakoba wanembele’mba maana a Yehoba “patanshi o awama, a mutende, abula kuminatu pa kintu kyo akeba, a lukookelo, avula lusa ne bipangwa byawama, abula misalululo, kabiji abula bukamfutumfutu.” (Yakoba 3:17) Onkao mambo, Baibolo witufunjisha’mba twafwainwa kuchinuzhuka bya kisangajimbwe byakonsha kwitulengela kutendeka kufwanyikizha’mba tubena kuba bintu byabula kufwainwa. Kabiji inge twayuka bulongo bintu byatemwa Yehoba ne byo ashikwa, kiketupelela kusala bulongo mabuku, mafilimu, nangwa makayo a kukaya. Kechi tukashikishanga bakwetu amba betubuleko bya kuba ne.

¹⁶ Javula pa kufuukula bintu, tulangulukapo mashinda avula a kufuukwilamo byobyo bintu kwa kubula kufichisha Yehoba ku muchima. Pano bino, kimye kyo tukeba kufuukula bintu byanema bingi, kyakonsha kuwama inge twaipuzhako mukulumpe mu kipwilo, nangwa mulongo nangwa nyenga wabanda mu bukine amba etubuuleko byo twakonsha kuba. (Titusa 2:3-5; Yakoba 5:13-15) Pano bino kechi twafwainwa kwambila uno muntu amba etufuukwile bya kuba ne. Pakuba, twafwainwa kulangulukapo bulongo pa bintu byo twafunda mu Baibolo ne kwifuukwila atweba bene. (Bahebelu 5:14) Mutumwa Paulo waambile’mba: “Muntu yense ukesendela mwine kisendwa kya mwingilo.”—Ngalatiya 6:5, tubyambo twa munshi.

17. Tumwenamo byepi mu kufuukula bintu bisangajika Yehoba?

¹⁷ Inge ketufuukule bintu bisangajika Yehoba, tufwenya kwipi ne aye kabiji witupesha bingi. (Yakoba 4:8) Kepo lwitabilo lwetu mwi Yehoba lukosa bingi. Onkao mambo, twayai tulanguluke langulukenga pa byo tutanga mu Baibolo pa kuba’mba tuyuke Yehoba byo alanguluka pa bintu. Ibyo, kechi twakonsha kuyuka bintu byonsetu pe Yehoba ne. (Yoba 26:14) Bino inge twibikishako kufunda pe aye lonka luno, tukekala na maana kabiji tukafuukulanga bintu bulongo. (Byambo bya Maana 2:1-5) Bintu bilanguluka bantu ne byo bakeba kuba byaluka, bino Yehoba kechi waluka ne. Nyimbi wa masalamo waambile’mba: “Bintu bifuukula Yehoba bikekala myaka ne myaka; milanguluko ya mu muchima wanji kechi yaluka ne.” (Salamo 33:11) Kine, twakosha kufuukula bintu bulongo inge twafunda kulanguluka byonka bilanguluka Yehoba ne kuba bintu bimusangajika.