1. Noveta musinke dimwe domoBibeli, ntani ngapi atu gwanene mo uwa pokudilimburukwa?

MOBIBELI, Jehova kwa tura mo noveta edi adi tu tantere eyi ga hara tu rugane. Pasihonena, age kututantera asi twa ha karera mafano ndi tu vake ndi tu kare nonkorwe ndi tu hondere. (1 Vakolinte 6:9, 10) Jesus, kwa pangerere vasikuli vendi asi: “Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. Ka di rongeni, di ka limburukwire nayinye eyi na mu rekera. Tareni, ame neni ngani kara dogoro nokouhura wouzuni.” (Mateusa 28:19, 20) Nayinye eyi a tu tantere Jehova naJesus kugwanena mo uwa wanyamwetu. Noveta daJehova kuturonga omu natu lipakera mbili nepata lyetu nokutuvatera tu kare noukanguki wouwa ntani noruhafo. Unene po, apa atu limburukwa nompango daJehova  ngwendi kuzuvhisa, ayo kumuhafesa ntani kututungika.

2, 3. (a) Morwasinke Bibeli za dilira kugava noveta dankenye ukaro ou atu ligwanekere nawo meparu? (b) Mapuro musinke natu ka zogera mosirongwa esi? (Tara efano pepenuno 15.)

² Bibeli kapi za gava noveta kuhamena nkenye ukaro ou atu ligwanekere nawo meparu. Pasihonena, kapi za vyukilira kututantera omu twa hepa kudwara. Eyi kulikida omu Jehova ga kara nounongo. Nampili ngomu ndwareso azi runduruka-runduruka nkenye siruwo, Bibeli kapi azi runduruka. Amo kapi mwa kara noveta dononzi kuhamena yirugana ndi yilihafeso eyi twa hepa kuhorowora ndi eyi natu rugana tu kare vakanguki. Jehova kupulisira nkenye ogu ntani vanturagumbo va ture po matokoro moyininke yangoso.

³ Yipo nye, apa atu tura po matokoro gomulyo aga ngaga kundama eparu lyetu makura tu dire kugwana moBibeli veta ezi za tumbura yuma oyo, kuvhura tu lipure asi: ‘Jehova ana hafere sili etokoro lyange ndi? Age nga hafera nkenye eyi ngani rugana nsene tupu asi kapi nina kuteza po veta zomoBibeli ndi? Ngapi nani yi diva asi ana hafere matokoro aga nina tura po?’

4, 5. Ngapi omu matokoro getu naga tu kundama ntani nava wopeke?

⁴ Vamwe kulizuvha asi kuvhura va rugane nkenye eyi vana hara. Nye tuna hara kurugana eyi ayi hafesa Jehova. Nsene tuna hara kutura po etokoro, twa hepa kugazadara ko eyi azi uyunga Bibeli ntani nokuyilimburukwa. Pasihonena, Bibeli kututantera omu a lizuvhu Karunga kuhamena kuruganesa honde, eyi yiyo atu kwamene eyi azi uyunga. (Genesis 9:4; Yirugana 15:28, 29) Kuvhura tu hundire Jehova a tu vatere tu ture po matokoro aga naga mu hafesa.

⁵ Matokoro getu kutukundama. Etokoro lyewa kutuvatera tu kare pepi naJehova. Ano lyedona kuzonagura po elikwatakano lyetu nendi. Matokoro getu kukundama hena wopeke. Kapi tuna hara matokoro getu ga korese vanavazinyetu ndi ga va pundukise. Kapi tuna hara kugaununa vanavanzinyetu mombungakriste. Eyi yiyo ya wapera tu ture po matokoro gomawa.—Resa Varoma 14:19; Vagarata 6:7.

6. Ngapi natu tura po matokoro gomawa?

⁶ Mokumona asi Bibeli kapi za tu tantera nawa-nawa eyi twa hepa kurugana, ngapi natu tura po matokoro gomawa? Mevango lyokurugana eyi twa hara, twa hepa kugazadara ko ukaro wetu ntani nokutura po etokoro eli nali hafesa Jehova. Makura age nga tu vatera tu gwanene mo uwa metokoro lyetu.—Resa Episarome 37:5.

7. Nsene moBibeli mwato veta zokuvyukilira kuhamena ukaro owo, ngapi natu diva eyi ana tu harere Jehova?

⁷ Ngapi natu yi diva asi kuna kuhafesa Jehova? Vaefeso 5:17 kutanta asi: “Omu  kondjere kudiva eyi ana mu harere Hompa, asi mu yi rugane.” Nsene moBibeli mwato veta zokuvyukilira kuhamena ukaro owo, twa hepa kukondjera ndi kukwata egano eyi ana tu harere Jehova tu rugane. Ngapi natu yi rugana? Twa hepa kukanderera kwendi nokupulisira mpepo zendi zi tu gendese.

8. Ngapi omu Jesus nga kondjere kusikisa mo eyi ga mu harerere Jehova? Gava sihonena.

⁸ Jesus nga kondjere kusikisa mo eyi ga mu harerere Jehova a rugane. Pasihonena, apa mbunga za zuvhire nzara, Jesus kwa kanderere nokuzikutika pokurugana sitetu. (Mateusa 14:17-20; 15:34-37) Nye apa nzara za kwete Jesus age momburundu makura Muzonaguli ta mu tantere asi a situnukise mamanya ga kare nomboroto, age ga nyokere kuyirugana. (Resa Mateusa 4:2-4.) Jesus kwa divire nawa oGuhwe Jehova ntani asi kapi nava yi hafera nsene a ruganesa mpepo zokupongoka morwa uwa wamwene. Age ga divire asi oGuhwe nava mu pa nondya.

9, 10. Yisinke ngayi tu vatera tu ture po matokoro gomawa? Gava sihonena.

⁹ Ngwendi Jesus, nose kuvhura tu ture po matokoro gomawa nsene tu huguvara Jehova a tu pitisire. Bibeli kutanta asi: “Huguvara HOMPA nomutjima goge nagunye. Wa ha hama konondunge danyamoge. O diworoke HOMPA mwanayinye eyi ono kurugana, makura age ta ku likida nzira zouhunga. Nokanunu si o ligazare asi ove o munongo nye unene; siwa po limburukwa kwaHOMPA o nyoke kurugana udona.” (Yisewe 3:5-7) Nsene tu lironga Bibeli ntani nomu a gazara Jehova, ose ngatu kwata egano eyi ana tu harere tu rugane moukaro wongandi. Moomu tuna kulironga omu a gazara Jehova, yimo ngayi tu rerupira kutura po matokoro aga aga mu hafesa. Monkedi zangoso, ose ngatu kara ‘nomutjima gokulimburukwa.’—Hesekiyeli 11:19.

¹⁰ Tu tante asi mukadikwara kuna kurandanga makura ta mono nonkaku donongwa. Ado ndiro unene. Nampili ngomu ana dili kugenda namugara gwendi, ana diva eyi na ka uyunga ko mugara ngwendi nsene na randa nonkaku odo. Ngapi ana yi diva? Awo kwa likwara nomvhura dononzi, makura ga diva omu mugara gwendi ga mu harera na ruganesa yimaliwa yawo. Mokulifana, apa atu lirongo omu a gazara Jehova neyi ga tu ruganena, ose ngatu diva eyi ana tu harere tu rugane momaukaro gokulisiga-siga.

11. Mapuro musinke natu lipura pokuresa Bibeli ndi pokuzilironga? (Tara kakende “ Pokulironga Bibeli lipura nyamoge asi:”)

¹¹ Ngapi no diva omu a gazara Jehova?  Pokuresa Bibeli nokuzilironga nkenye ezuva. Pokuresa, kuvhura tu lipure asi: ‘Yisinke yina ku ronga nge eyi kuhamena Jehova? Morwasinke ga yi ruganene monkedi zangesi?’ Ngwendi Ndafita, nose twa hepa kuhundira Jehova a tu vatere tu mu dive nawa. Ndafita kwa tjenge asi: “Ronga nge nonzira doge, HOMPA, ninka nge ni di dive. Ronga nge ni kare mokuliza nounasili woge, yeeyi nyove eparu lyange. Mazuva nagenye ame moge na huguvara.” (Episarome 25:4, 5) Nsene tu lironga egano lyepe kuhamena Jehova, kuvhura tu gazare maukaro aga natu vhura kuruganesa egano olyo. Kuvhura tu li ruganese mepata ndi koyirugana ndi kosure ndi mokuzuvhisa ndi? Apa ngatu gazara ukaro wongandi, ngayi tu rerupira kudiva omu Jehova ana tu harere tu ruganese egano olyo.

12. Ngapi yimbapiratjangwa nomapongo ayi tu vatere tu dive omu a gazara Jehova komaukaro gokulisiga-siga?

¹² Nkedi zimwe natu diva omu a gazara Jehova kuna kara pokupurakena kweyi azi tu rongo mbunga zendi kutundilira  moBibeli. Pasihonena, nsene tuna hara kutura po etokoro, Buke zepaparo zoNombangi daJehova kuvhura kutuvatera tu dive omu a gazara Jehova. Ntani kuvhura tu gwanene mo uwa momapongo getu nsene tu purakena nawa nokulimburura ntani nokuteda ko kweyi tuna ka lironga mo. Eyi ngayi tu vatera tu lironge omu a gazara Jehova. Ngoyitundwamo, ngatu tura po matokoro aga ngaga mu hafesa ntani ngatu tungika.

13. Ngapi kudiva omu a gazara Jehova nayi tu vatera tu ture po matokoro gomawa? Gava sihonena.

¹³ Ngesi tatu ka konakona sihonena omu natu tura po etokoro lyewa nsene tu teda ko omu a gazara Jehova. Tu tante asi ono hara kurugana uzuvhisi wokukarerera. Nampo wa tura po marunduruko meparu lyoge yipo o liture mo unene mokuzuvhisa. Nye simpe kapi ono diva nawa-nawa nsene nga yi kugwanena po kukara noyininke ndi noyimaliwa yoyisesu. Yimo, Bibeli kapi za tanta asi mokukarera Jehova ntudi twa hepa kurugana uzuvhisi wokukarerera. Ose kuvhura tu mu karere ngovazuvhisi tupu. Nye, Jesus kwa tente asi Jehova kutungika ava ava tura po malizambero morwa Uhompa. (Resa Rukasa 18:29, 30.) Bibeli kutanta asi Jehova kuhafa apa atu kondjo mokumuhamberera, ntani ana tu harere tu hafe pokumukarera. (Episarome 119:108; 2 Vakolinte 9:7) Pokukanderera nokuteda ko koyininke yangoso, ose ngatu tu tura po etokoro eli ngali liza noukaro wetu ntani eli nga tungika Jehova.

14. Ngapi omu natu diva nsene asi ndwareso zetu kuhafesa Jehova?

¹⁴ Pasihonena, tu tante asi ove wa hara yikoverero yongandi, nye ono diva asi vamwe womombungakriste kuvhura yi va pundukise nsene o yi dwara. Bibeli kapi za uyunga asi yikoverero musinke natu dwara. Ngapi no diva omu a gazara ko Jehova koyuma oyo? Bibeli kutanta asi: “Ame kuna hara asi, vakadi nawo ava dware yidwara yoyiwa yokuliza nonkareso zongwa, walye ava litakere yikoka ndi asi va litjapere ngorodo noyiranda ndi va dware yikoverero yondiro. Yirugana yoyiwa yiyo ayi wapeke vakadi ava ava gava undipo asi kwa tjira Karunga.” (1 Timoteusa 2:9, 10) Nonkango edi kwa tamba kovakareli navenye vaJehova, kukwatera mo vagara. Nsene twa kara nonkareso zongwa, ose ngatu gazara omu ndwareso zetu nazi kundama wopeke. Ntani morwa twa hara vanavazinyetu, ngatu nyokera po kuvakoresa ndi kuvapundukisa. (1 Vakolinte 10:23, 24; Vafilipi 3:17) Nsene tu teda eyi azi uyunga ko Bibeli ntani nomu a gazara Jehova, ngatu tura po matokoro aga ngaga mu hafesa.

15, 16. (a) Ngapi Jehova a lizuvhu nsene tu twikira kugazara yininke yoruhonda? (b) Ngapi natu diva eyi ayi hafesa Jehova nsene kuna kuhorowora yilihafeso? (c) Ngapi natu tura po matokoro gomulyo?

¹⁵ MoBibeli, ose kulironga omu ayi koresa nokuguvisa Jehova apa vantu ava rugana nokugazara yininke yoyidona. (Resa Genesis 6:5, 6.) Eyi kulikida asi Jehova kapi ana hara tu gazare yininke  yoruhonda. Nsene tu twikira kugazara yininke yangoso, kuvhura tu yi rugane. Nye, Jehova kuna tu harere tu gazare yininke yoyiwa neyi yokukuhuka. Jakopo kwa tjenge asi unongo waJehova “kwa kuhuka, ntani kwa hara mpora, kwa kara nombili, kwa lizuvha novakwawo. Kwa zura nkenda noyiyimwa yoyirugana yoyiwa, kapi wa paka mpongo ndi uyilipaki.” (Jakopo 3:17) Yiyo nye Bibeli azi tu tanterere tu nyokere po yilihafeso eyi nayi tu ninkisa tu gazare yininke yoyidona. Ntani nsene tu kwata egano eyi ga hara Jehova neyi ga nyenga, ngayi tu rerupira kuhorowora nobuke nonomuvi ndi maudano. Ose kapi ngatu pura wopeke eyi natu vhura kuhorowora.

¹⁶ Pwa kara matokoro gomanzi, nye twa hepa kuhorowora aga aga hafesa Jehova. Nye nsene tuna hara kutura po etokoro lyomulyo, ya wapa kupura ko mukuronambunga ndi munazinyetu gomugara ndi gomukadi mokutupa ko mavyukiso gamwe. (Titusa 2:3-5; Jakopo 5:13-15) Kapisi tu pure muntu ogo a tu tokwere po. Nye twa hepa kugazara nawa eyi twa diva moBibeli ntani natu tokora. (Vahebeli 5:14) Mupositoli Paurusa kwa tente asi: “Nkenye ogu kusimba mudigo gwamwene.”—Vagarata 6:5.

17. Ngapi natu gwanena mo uwa nsene tu tura po matokoro aga aga hafesa Jehova?

¹⁷ Nsene tu tura po matokoro aga aga hafesa Jehova, ose ngatu mu hedera pepi ntani age nga tu hafera nokututungika. (Jakopo 4:8) Makura ngatu pameka epuro lyetu mwendi. Tu tedeni ko kweyi atu resa moBibeli yipo tu kwate egano omu a gazara Jehova. Makura ose ngatu lironga yoyipe kumuhamena. (Joba 26:14) Nye nsene tu kondja kumudiva ngesi, ose ngatu kara nounongo ntani ngatu tura po matokoro gomawa. (Yisewe 2:1-5) Magano govantu kurunduruka, nye Jehova kapi a runduruka. Muepisarome kwa tente asi: “Yigazo yaHOMPA yanarunye, sitambo sendi ngasi kererera po.” (Episarome 33:11) Yosili, ose kuvhura kutura po matokoro gomawa nsene tu lironga kugazara moomu a gazara Jehova nokurugana eyi ayi mu hafesa.