1. Vulukenuko jishimbi jimwe jamuMbimbiliya, kaha natunganyala ngachilihi nge natujikavangiza?

YEHOVA atuhana jishimbi muMbimbiliya jize jasolola hatoma vyuma asaka etu tulinge. Chakutalilaho, atulweza ngwenyi katwatela kulemesa makombelo, chipwe kwiva, chipwe kupenda, chipwe kulinga vyuma vyauvumbiko. (Wavaka-Kolinde 1, 6:9, 10) MwanaYehova, Yesu Kulishitu ahanyine jishimbi kaneji kuli vaka-kumukavangiza, ambile ngwenyi: “Mukanangule vatu vakumafuchi osena vakapwe tumbaji, mukavambapachise mulijina lyaTata, neli lyaMwana, neli lyashipilitu yajila. Mukavanangule kulamanga vyuma vyosena vize ngunamilweze. Kaha ami nangupwanga nayenu makumbi osena palanga nakuchikukulwishi chakatwamino kamyaka yino.” (Mateu 28:19, 20) Vyuma vyosena vize Yehova naYesu veji kutulwezanga tulinge vyapwa vyakutunganyalisa. Jishimbi jaYehova jatunangula omu twatela kulilama etu vavene nakulama nawa jitanga jetu mangana tupwenga vakulikangula kumijimba nakupwa vakuwahilila. Chuma chachilemu shina kukavangizanga jishimbi jaYehova kuhakilako vene nalushimbi lwakwambulula mujimbu. Nge natulinga ngocho, kaha Yehova mwawahilila nakutukisula.

2, 3. (a) Mwomwo ika Mbimbiliya kayahanjika havyuma vyosena natusaka kulingako? (b) Vihula muka natushimutwila muchihande chino? (Talenu muvwimbimbi wakulivanga.)

 ² Tuyokutuyoku nawa, Mbimbiliya kayatuhana jishimbi twatela kukavangiza hakala vyuma navisoloka mukuyoya chetuko. Chakutalilaho, muMbimbiliya kamwatwama jishimbi jize javuluka hatoma mwakusakwila vyakuvwalako. Echi chasolola nge Yehova apwa wakunangakana. Numba tuhu vatu mukaye veji kuvwalanga uvwalo wakulisezaseza, nakusungumuka jijila jakuvwalilamo, oloze Mbimbiliya kayasekako. Cheka nawa, Mbimbiliya kayatwama najishimbi jajivulu jize twatela kukavangiza hakusakula milimo chipwe kulihizumuna, chipwe kusakula vyuma vize navitukafwa mangana tulikangule mukuyoya chetuko. Yehova etavisa mutu himutu chipwe mitwe yajitanga kulisakwila vyakulinga hachihande kana.

³ Ngocho nge tunakusaka kulinga chuma chachilemu mukuyoya chetu, kaha nawa nge Mbimbiliya kayahanjika hachuma kanako, tunahase kulihulisa ngwetu: ‘Kutala Yehova mwawahilila nachuma nguli nakusaka kulinga tahi? Uno mwevwila kuwaha vyuma nangusakula kulinga chikalu kangwahokwele jishimbi jamuMbimbiliyako tahi? Nangutachikiza ngachilihi ngwami vyuma ngunakusakula kulinga navimwivwisa kuwaha?’

4, 5. Vyuma natusakula kulinga vinahase kukwata ngachilihi hakuyoya chetu nachavakwetu?

⁴ Vatu vamwe vashinganyeka ngwavo vanahase kulinga vyeshovyo vanasake vavene. Oloze etu twasaka kwivwisa Yehova kuwaha. Shimbu kanda tusakule vyakulinga, twatela kushinganyeka havyuma yahanjika Mbimbiliya nakuvikavangiza. Chakutalilaho, Mbimbiliya yatulweza omwo Kalunga amona manyinga najila yakuwazachishilamo, ngocho twatela kukavangiza vyuma yahanjika. (Kuputuka 9:4; Vilinga 15:28, 29) Twatela kulomba Yehova atukafwe tusakule kulinga vyuma vize navimwivwisa kuwaha.

⁵ Vyuma natusakula kulinga vinahase kukwata hakuyoya chetu. Vyuma vyamwaza natusakula kulinga vinahase kutukafwa tupandame chikuma kuli Yehova. Oloze vyuma vyavipi vinahase kwenyeka usoko wetu naikiye. Vyuma natusakula kulinga vinahase kukwata nawa hakuyoya chavakwetu. Katwatela kulinga vyuma vize navivwisa vandumbwetu kupihya chipwe kuzeyesa lufwelelo lwavoko. Katwatela nawa kulingisa vandumbwetu valikokojwese muchikungulwiloko. Ngocho, chapwa chachilemu kusakula kanawa vyakulinga mukuyoya chetu.—Tangenu Wavaka-Loma 14:19; Wavaka-Ngalesha 6:7.

6. Vyuma muka navitukafwa tusakule kanawa vyakulinga?

⁶ Uno natuhasa ngachilihi kusakula kanawa vyakulinga mukuyoya chetu, numba tuhu Mbimbiliya kayahanjika havyuma tuli nakusaka kulingako? Muchishishisa chakulinga kaha vyuma tuli nakusaka etu vavene, twatela nawa kuhunanana havyuma tunakusaka kulinga mangana tusakule vyuma vize navivwisa Yehova kuwaha. Nge natulinga ngocho, kaha natufwelela ngwetu Yehova mwatukafwa tusakule kanawa vyakulinga.—Tangenu Samu 37:5.

7. Nge muMbimbiliya kamweshi lushimbi lwahanjika havyuma tunakusaka kulingako, natwijiva ngachilihi vyuma asaka Yehova?

⁷ Uno natutachikiza ngachilihi vyuma vize navivwisa Yehova kuwaha? Mukanda  Wavaka-Efwesu 5:17 watulweza ngwawo: “Tachikizenunga mwaya muchima waYehova.” Nge muMbimbiliya kamweshi lushimbi lwahanjika havyuma tuli nakusaka kulingako, kaha twatela kutachikiza kanawa vyuma ali nakusaka Yehova tulinge halwola kana. Tunahase kulinga ngachilihi ngocho? Twatela kumulomba nakwitavila shipilitu yenyi yitutwaminyine.

8. Uno Yesu atachikijile ngachilihi vyuma asakile Yehova kuli ikiye? Hanenu chakutalilaho.

⁸ Yesu atachikijilenga vyuma apwile nakusaka Yehova kuli ikiye. Chakutalilaho, mapapa kavali mayongomena evwile zala, kaha Yesu alombele kuli Kalunga nakuwalisa mujila yakukomwesa. (Mateu 14:17-20; 15:34-37) Omu Yesu evwile zala mupambo, Liyavolo asakile Yesu alumune malolwa kupwa mbolo, oloze ikiye akanyine. (Tangenu Mateu 4:2-4.) Yesu atachikijile kanawa Ise Yehova, kaha ejivile ngwenyi keshi kumwitavisa azachise shipilitu yajila mangana alisuulwise iveneko. Ngocho atachikijile ngwenyi Ise mwamukafwa nakumuhana vyakulya halwola lwakutamo.

9, 10. Vyuma muka navitukafwa tusakule kanawa vyakulinga? Lumbununenu.

⁹ Ngana mwaYesu, nayetu tunahase kusakula kanawa vyakulinga nge natupendamina hali Yehova atutwaminyine. Mbimbiliya yamba ngwayo: “Mufwelelenga Yehova namuchima wove wosena, kanda naupendamina hakunangakana choveko. Mwanukenga muvyuma vyosena naulinganga, kaha mwasungamisanga jijila jove. Kanda naulimona kupwa umuka-manganako. Mwivwenga Yehova woma, sosoloka kuupi.” (Vishimo 3:5-7) Nge natulinangula Mbimbiliya nakutachikiza omu Yehova eji kumwenangamo vyuma, kaha natutachikiza kanawa vyuma ali nakusaka tulinge halwola tunakusaka atutwaminyine. Nge natutwalaho lika kulinangula omu Yehova eji kumwenangamo vyuma, kaha nachipwa chachashi kusakula kulinga vyuma vize navimusuulwisa. Ngocho, natupwa ‘namuchima wakusaka Kalunga atutwaminyine.’—Ezekele 11:19, kwinyikila chamwishi.

¹⁰ Chakutalilaho, twambenga ngwetu pwevo umwe wakusomboka ali kuchitanda kaha mwamona sapato yamwaza, oloze yandando chikuma. Numba tuhu keshi hamwe nalunga lyenyiko, oloze natachikiza vishinganyeka vyalunga lyenyi nge mwalanda sapato kana. Uno natachikiza ngachilihi ngocho? Hakuwana nge vanalimbate hamyaka yayivulu, ngocho natachikiza kanawa omu lunga lyenyi asaka kuzachisa jimbongo javo. Chochimwe nawa, nge natulinangula omu Yehova eji kumwenangamo vyuma nakwanuka vyuma natulingila, kaha natutachikiza vyuma ali nakusaka tulingenga halwola tuli nakuhita muvyuma vyakulisezaseza.

11. Vihula muka tunahase kulihulisa hakutanga Mbimbiliya chipwe hachilongesa chahauka? (Talenu lipwata lyakwamba ngwavo, “ Nge Muli haChilongesa Chahauka, Lihulisenu Ngwenu.”)

¹¹ Natutachikiza ngachilihi omu Yehova amwenamo vyuma? Chuma chachilemu twatela kulinga shina kutanganga Mbimbiliya nakulinangulangayo shimbu yosena. Halwola tuli nakulinga vyuma kanevi, tunahase  kulihulisa ngwetu: ‘Uno mujimbu nguli nakutanga uli nakungunangula ika hali Yehova? Mwomwo ika alingilile chuma kanechi?’ Ngana mwaNdavichi, nayetu tunahase kulomba Yehova atukafwe tumutachikize kanawa. Ndavichi asonekele ngwenyi: “Ove Yehova, ngulweze jijila jove, ngunangule jijila jove. Ngutambukise mumuchano wove, ngunangule, mwomwo ove yove Kalunga muka-kungulwila. Ngweji kutalililanga kuli ove makumbi osena.” (Samu 25:4, 5) Nge tunalinangula vyuma vimwe hali Yehova, kaha twatela kushinganyeka omu tunahase kuvizachishilamo. Kutala tunahase kuvizachisa mutanga, kumilimo, kushikola, namumulimo wakwambulula tahi? Nge natushinganyeka kanawa omu tunahase kuzachishilamo vyuma tunalinangula, kaha nachipwa chachashi kutachikiza omu Yehova ali nakusaka tuzachishilemo mujimbu kana.

12. Mikanda yetu nakukunguluka vyeji kutukafwanga ngachilihi tutachikize omu Yehova amwenamo vyuma?

¹² Jila yikwavo yakutachikijilamo omu Yehova eji kumwenangamo vyuma shina kuhaka mangana kuvyuma vyamuMbimbiliya vize veji kutunangulanga muliuka lyenyi. Chakutalilaho, nge tuli nakusaka kusakula vyakulinga, kaha mukanda waWatch Tower Publications Index naChinoma Chakukafwa Vinjiho  jaYehova Kuhehwojola navitukafwa kutachikiza omu Yehova amwenamo vyuma. Tunahase nawa kunganyala hakupwanga kukukunguluka nge natwivwililanga kanawa nakuhanjikangaho nakushinganyekanga havyuma vali nakutunangula. Echi nachitukafwa tumone vyuma nganomu avimona Yehova. Ngocho nachitukafwa tusakule kulinga vyuma vize navivwisa Kalunga kuwaha, kaha mwatukisula.

13. Hanenu chakutalilaho chize nachisolola omu tunahase kusakula kanawa vyakulinga mwomwo yakutachikiza mwaya vishinganyeka vyaYehova.

¹³ Tuchitalenu hachakutalilaho chimwe chize nachitukafwa kusakula kanawa vyakulinga hakushinganyeka omu Yehova amwenamo vyuma. Achishinganyekenu muli nakusaka kuzata upayiniya. Kaha munalumunako vyuma vimwe mukuyoya chenu mangana muzate jola jajivulu mumulimo wakwambulula. Oloze muli nakuhuhwasana numba nge chikupu vene namupwa vakuwahilila najimbongo jajindende chipwe navyuma vyavindende. Numba tuhu Mbimbiliya kayahanjika ngwayo kuvanga tuzate upayiniya numba tuhase kuzachila kanawa Yehovako, oloze tunahase kutwalaho lika kuzachila Yehova nakashishi chipwe katwapwa tuvapayiniyako. Tuyokutuyoku nawa, Yesu ambile ngwenyi Yehova eji kukisulanga vaze veji kulisuulanga mangana vazate milimo yaWangana. (Tangenu Luka 18:29, 30.) Mbimbiliya yahanjika nawa ngwayo Yehova eji kwivwanga kuwaha nge natuzata nangolo mangana tumwalise, kaha asaka tumuzachile nakuwahilila. (Samu 119:108; Wavaka-Kolinde 2, 9:7) Nge natulombanga nakushinganyeka havyuma kanevi, kaha natusakula kanawa vyakulinga vize mwevwila Yehova kawaha.

14. Munahase kutachikiza ngachilihi ngwenu uvwalo munasakula nauneha kavumbi kuli Yehova?

¹⁴ Chakutalilaho chikwavo shina echi: Twambenga ngwetu munazange chikuma uvwalo umwe, oloze munatachikiza ngwenu vandumbwenu vamwe muchikungulwilo navahukana nge namuuvwala. Mbimbiliya nawa kayavuluka uvwalo twatela kuvwalako. Uno namutachikiza ngachilihi munayi vishinganyeka vyaYehova hachuma kana? Mbimbiliya yatulweza ngwayo: “Mapwevo valiwahisenga vavene nauvwalo wakutamo, mukavumbi nakushinganyeka mwamangana, keshi namiyachi yeka nayeka yakuvinda jikambuko, chipwe nauluko, chipwe najipelako, chipwe nauvwalo wandando yayinene chikumako, oloze shina mujila yize yatela mapwevo vaze valivuluka ngwavo vevwa Kalunga woma, chikiko kwamba nge, kuhichila mumilimo yamwaza.” (WaChimoteu 1, 2:9, 10) Mazu awa akuhuhumuna vatela kuwakavangiza kuvangamba jaYehova vosena, keshi mapwevo kahako. Nge natupwa vakulinyisa, kaha natushinganyeka omu vakwetu vanahase kwivwa hauvwalo natusakula kuvwala. Hakuwana nge twazanga vandumbwetu, ngocho katwatela kulinga vyuma vize navivafutwisa kumuchimako. (Wavaka-Kolinde 1, 10:23, 24; Wavaka-Fwilipi 3:17) Nge natushinganyeka vyuma yahanjika Mbimbiliya nomu mwaya vishinganyeka vyaYehova, kaha natusakula kulinga vyuma vize navivwisa Kalunga kuwaha.

15, 16. (a) Yehova eji kwivwanga ngachilihi nge natushinganyekanga vyauvumbi? (b) Natutachikiza ngachilihi ngwetu Yehova mwevwila kuwaha kulihizumuna tunakusaka kusakula? (c) Twatela kulinga ngachilihi hakusakula vyuma vyavilemu chikuma mukuyoya?

¹⁵ Mbimbiliya yatunangula nge Yehova eji kwivwanga kukola kumuchima nge vatu navalinga vyuma vyavipi chipwe kushinganyeka havyuma kana. (Tangenu Kuputuka 6:5, 6.) Echi chasolola hatoma nge Yehova kasaka etu tushinganyekenga havyuma vyauvumbiko.  Nge natutwalaho lika kushinganyeka havyuma kanevi, kaha tunahase kuvilinga. Oloze Yehova asaka tushinganyekenga havyuma vyamwenemwene. Kambaji Yakova asonekele ngwenyi mangana aYehova “chatete apwa atoma, kaha akuunda, akwashiwisa muchima, akulyononona washi, akuzala nakutetela namihako yamwaza, kaweshi kuhandulako, kaweshi kulyongako.” (WaYakova 3:17) Ngocho Mbimbiliya yatulweza ngwavyo twatela kulihenda kuvyuma vize navitulingisa tuputuke kushinganyeka havyuma vyavipi. Nge natutachikiza kanawa vyuma azanga Yehova navize ahunga, kaha nachipwa chachashi kusakula kanawa mikanda twatela kutanga, najivindiyo twatela kutala, navyakuhemahema vyamwaza. Ngocho katweshi kuhulisa vakwetu vatulweze vyakulingako.

¹⁶ Kakavulu nge tunakusaka kusakula vyakulinga, kunahase kupwa jijila jajivulu jakulingilamo vyuma, jize najivwisa Yehova kuwaha. Oloze nge tuli nakusaka kusakula kulinga vyuma vyavilemu chikuma mukuyoya chetu, kaha nachipwa chamwaza kuhulisa kalama chipwe ndumbwetu wakuhya kushipilitu atukafwe. (WaChituse 2:3-5; WaYakova 5:13-15) Chipwe ngocho, katwatela kuhulisa ou ndumbwetu mangana atulweze vyakulingako. Oloze twatela kushinganyeka kanawa havyuma twalinangula muMbimbiliya nakulisakwila etu vavene vyakulinga. (WavaHepeleu 5:14) Kaposetolo Paulu ambile ngwenyi: “Mutu himutu mwalimbachila vyuma vyenyi ivene.”—Wavaka-Ngalesha 6:5, kwinyikila chamwishi.

17. Vyuma muka natunganyala nge natusakula vyakulinga vize navivwisa Yehova kuwaha?

¹⁷ Nge natusakula kulinga vyuma vize navivwisa Yehova kuwaha, kaha mwatwivwila uselewa, nakutukisula nakutulingisa tupandame kuli ikiye. (WaYakova 4:8) Kaha lufwelelo lwetu muli Yehova naluzama chikuma. Tushinganyekenunga havyuma natulinangula muMbimbiliya mangana tutachikize mwaya vishinganyeka vyaKalunga. Chipwe ngocho, natutwalaho lika kulinangula vyuma vyavihya hali Yehova. (Yopa 26:14) Nge natuzata nangolo mangana tulinangule vyaikiye, kaha natupwa namangana nakusakula kanawa vyakulinga. (Vishimo 2:1-5) Vyuma veji kushinganyekanga vatu navize veji kufwilanga kulinga vyeji kwalumukanga, oloze Yehova kalumukako. Muka-kwimba jisamu ambile ngwenyi: “Vyuma najinyi Yehova navizamanga haya myaka yosena. Kaha vyuma nashinganyeka mumuchima wenyi navizamanga hachisemunwino hichisemunwino.” (Samu 33:11) Chamuchano vene, nge natumona vyuma ngana muze avimona Yehova, kaha natusakulanga kulinga vyuma vyamwaza vize navimwivwisa kuwaha.