1. Shimunenu yakutalilahu yanshimbi jamuBayibolu, nawa neyi tujilondela tukuhetelamu ñahi?

YEHOVA watwinka nshimbi jekala muBayibolu jatulejaña yuma yakeñañayi nindi twileña. Chakutalilahu, watuleja nindi twatela wanyi kudifukula kudi ankishi, kwiya, kusheta, hela kwila wuvumbi. (1 Akorinda 6:9, 10) Nawa Mwana kaYehova, Yesu, walejeli atumbanji twindi nindi: ‘Mwakelishi atumbanji munyuza yejima, mwakayipapatishi mwijina daTata, nidaMwana, nidaspiritu yajila. Mwakayileji kuhemba yuma yejima yinayilejenu; tiyenu, ami nidi nenu mafuku ejima nikwakakumina nyaka.’ (Matewu 28:19, 20) Yuma yejima yatulejañawu kudi Yehova naYesu yatukwashaña. Nshimbi jaYehova jatulejaña chakudihemba nikuhemba chisaka chetu nawa yatukwashaña kwiluka chakwikala akola kumujimba nikwikala namuzañalu. Ilaña chuma chalema, neyi tukwovwahila nshimbi jaYehova, kushilahu  tuhu nilushimbi lwakushimwina, watiyaña kuwaha nawa wukutukiswila.

2, 3. (a) Muloñadi Bayibolu chiyabulila kushimuna nshimbi muyuma yejima? (b) Malwihwinyi itukuhanjeka muchinu chibaaba? (Talenu mwevulu wakutachikilahu.)

² Hampinji yoyimu, Bayibolu yatwinka wanyi nshimbi muyuma yejima. Chakutalilahu, muBayibolu mwekala wanyi nshimbi yahosha hachitwatela kuvwala. Chumichi chinakumwekesha nawu Yehova wukweti maana. Hela chakwila antu mukaayi kejima anakuvwala yakuvwala yashiyashana nawa yakuvwala yinakuhimpa mpinji yejima, ilaña mazu amuBayibolu ahimpaña wanyi. Cheñi, yekala wanyi nanshimbi yayivulu yahosha hamudimu wutwatela kwiñila, hayisela yitwatela kutonda hela yuma yitwatela kwila kulonda twikali akola kumujimba. Yehova weteja muntu wejima kushilahu ninyitu yayisaka kudifuukwila haniyi yuma.

³ Neyi tunakufuukula hayuma yalema yinakundami kuchihandilu chetu nawa muBayibolu mwosi lushimbi lwahosha hayuma yitunakufuukula, twatela kudihula netu: ‘Yehova wukutiya ñahi nayuma yinnakufuukula? Wukutiya kuwaha nayuma yinukwila chakala nafumpi wanyi lushimbi lwamuBayibolu? Nukwiluka ñahi nami wukutiya kuwaha chinukufuukula?’

4, 5. Kufuukula kwetu kunateli kutukwasha ñahi nikukwasha amakwawu?

⁴ Antu amakwawu atoñojokaña nawu anateli kwila yuma yejima yinakeñi kwilawu. Ilaña etu tunakukeña kwila yuma yikumuzañalesha Yehova. Henohu kanda tufuukuli, twatela kutoñojoka chahosha Bayibolu nikuyovwahila. Chakutalilahu, Bayibolu yatuleja chamonañayi Nzambi kuzatisha mashi munjila yatama, nawa twatela kulondela chiyahosha. (Kutachika 9:4; Yililu 15:28, 29) Twatela kulomba kudi Yehova kulonda yatukwashi kufuukula munjila yikumutiyisha kuwaha.

⁵ Kufuukula kwetu kunateli kutukwasha hela nehi. Neyi tufuukula chiwahi tukukundama kudi Yehova. Neyi tufuukula chatama wubwambu wetu nayena wukumana. Kufuukula kwetu kunateli cheñi kukwasha amakwawu hela nehi. Twatela wanyi kwila yuma yinateli kuhilisha amanakwetu hela yikuzeyesha chikuhwelelu chawu. Hitwatela cheñi kuleta kukala kudi amanakwetu muchipompeluku. Dichi twatela kufuukulaña chiwahi.—Tañenu Aroma 14:19; Aŋalija 6:7.

6. Tunateli kufuukula ñahi chiwahi?

⁶ Neyi Bayibolu yahosha wanyi chitwatela kwila, tunateli kufuukula ñahi chiwahi? Chatela twili mutunakukeña, twatela kutoñojoka chiwahi nikufuukula njila yinateli kumutiyisha Yehova kuwaha. Tukukuhwelela chikupu netu Nzambi wukutukwasha.—Tañenu Masamu 37:5.

7. Tunateli kwiluka ñahi yuma yikumutiyisha Yehova kuwaha neyi muBayibolu ashimunamu wanyi nshimbi?

⁷ Hanu dinu tunateli kwiluka ñahi yuma yikumutiyisha Yehova kuwaha? Aefwesesa 5:17 yatulejaña nawu: ‘Shinshikenu  mwaya muchima waYehova.’ Neyi kwosi nshimbi yashimunawu muBayibolu, twatela kushinshika, nikwiluka chakeñañayi Yehova hanoyu nsañu. Tunateli kwila ñahi mwenimu? Twatela kulomba kudi Nzambi nikwiteja spiritu yindi kutulombola.

8. Yesu welukili ñahi yuma yakeñeleñayi Yehova nindi yeleña? Hanenu chakutalilahu.

⁸ Yesu welukileña yuma yakeñeleñayi Yehova nindi yeleña. Chakutalilahu, Yesu walombeli nawa wadishili mazaza muchihayamisha kapampa kayedi chatiyiliwu nzala. (Matewu 14:17-20; 15:34-37) Ilaña chatiyiliyi nzala muchinkalampata, Diyabolu wamwilili nindi yabalumuni malola kwikala mankendi, ilaña Yesu wakaanini. (Tañenu Matewu 4:2-4.) Wamwilukili chikupu Tata yindi, dichi welukili nindi Yehova wukumwiteja wanyi kuzatisha spiritu yajila kwila yuma yakuditiyisha yomweni kuwaha. Welukili chikupu nindi Tata yindi wukumukiña nikumwinka yakuda neyi natiyi nzala.

9, 10. Chumanyi chikutukwasha kufuukula chiwahi? Lumbululenu.

⁹ Kufwana Yesu, tukufuukulaña chiwahi neyi tukushindamena hadi Yehova netu wukutukwasha. Bayibolu yahosha nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi. Bayi wakadimonaña neyi nikweti maanaku, akamaku Yehova, wufumi kuyuma yatama.” (Yishimu 3:5-7) Neyi tudiza Bayibolu nawa twiluka chatoñojokañayi Yehova, tukwiluka yuma yinakukeñayi nindi twileña. Nawa neyi tukwiluka chatoñojokañayi Yehova, chikwikala chaswayi kwila yuma yikumutiyisha kuwaha. Tukwilaña ‘yuma yakeñañayi Nzambi.’—Ezekeli 11:19.

¹⁰ Fwikijenu mumbanda wasumbuka nakulanda yuma, dichi yamona nsapatu yayiwahi. Ilaña yawuseya nankashi. Hela chakwila hadi nanfumwindiku, ilaña neluki chakutiyayi nfumwindi neyi yalanda iyi nsapatu yawuseya. Wukwiluka ñahi? Anashakami mumaluwi hadi mpinji yayilehi, dichi welukaña chakeñañayi nfumwindi nindi yazatisheña mali awu. Munjila yoyimu, neyi twiluka chatoñojokañayi Yehova niyuma yakoñeliyi kunyima, tukwiluka chikukeñayi nindi twili neyi tunakufuukula.

11. Malwihwinyi itwatela kudihula neyi tunakutaña hela kudiza Bayibolu? (Talenu chikasha chinakwila nawu “ Neyi Munakudiza Bayibolu, Dihulenu Nenu.”)

¹¹ Tunateli kwiluka ñahi chatoñojokañayi Yehova? Chuma chalema chitwatela kwila hikutaña nikudiza Bayibolu mpinji  yejima. Hampinji yitunakudiza twatela kudihula netu: ‘Iyi nsañu yinakundizishadi hadi Yehova? Muloñadi chelililiyi mwenimu?’ Twatela kumulomba Yehova kulonda yatukwashi kumwiluka chiwahi neyi cheliliyi Davidi. Davidi wasonekeli nindi: “Ñilukishi muwendelaña, eyi Yehova; nleji njila jeyi. Nlomboli mwaya nsañu yeyi yalala, nleji; muloña eyi yeyi Nzambi yawamwinu wami; yeyi nachiñejaña mwaana wonsu.” (Masamu 25:4, 5) Neyi tudiza yuma yimu hadi Yehova, twatela kutoñojoka kutwatela kuyizatisha. Tunateli kuyizatisha muchisaka, kumudimu, hashikola tahindi mwiha? Neyi twiluka kutwatela kuyizatisha, tukwiluka chinakukeñayi Yehova nindi tuyizatishi.

12. Kupompa ninyikanda yetu kwatukwashaña ñahi kwiluka chamonañayi Yehova yuma?

¹² Njila yikwawu yikutukwasha kwiluka chatoñojokañayi Yehova hikusha maana kuyuma yinakutudizisha kuloñesha kwindi kufuma muBayibolu. Chakutalilahu, neyi tunakukeña kufuukula, nyikanda yaWatch Tower Publications Index niChitwa Chakukwasha aYinsahu jaYehova  Hakusandujola Nsañu yikutukwasha kwiluka chatoñojokañayi Yehova. Tunateli cheñi kuhetela mukupompa kwawakwaKristu neyi tutiyilila nakanañachima nikwakulahu nawa neyi tutoñojoka hayuma yitunadizi. Chumichi chikutukwasha kutoñojoka neyi chatoñojokañayi Yehova. Chikufumamu, tukwila yuma yikumutiyisha kuwaha nawa wukutukiswila.

13. Tunateli kufuukula ñahi chiwahi neyi twiluka chatoñojokañayi Yehova? Hanenu chakutalilahu.

¹³ Tushinshikenu chakutalilahu chikutukwasha kufuukula chiwahi neyi twiluka chatoñojokañayi Yehova. Hadaha munakukeña kuzata wupayiniya. Munahimpi chihandilu chenu kulonda muzateña nankashi mumudimu wamwiha. Ilaña muchidi kujinoka neyi mukuzañalalaña namali antesha. Hela chochu, Bayibolu yahosha wanyi nawu twatela kuzata wupayiniya hakwila tumukalakeli Yehova. Tunateli kumukalakela Yehova nakashinshi hela chakwila tudi akwakushimwina hohu. Ilaña munjila yikwawu, Yesu wahosheli nindi Yehova wakiswilaña antu adihanaña kukalakela Wanta. (Tañenu Luka 18:29, 30.) Bayibolu yahoshaña cheñi nawu Yehova watiyaña kuwaha neyi tuzata nañovu kulonda tumuhamekeña nawa wakeñaña nindi tumukalakelaña namuzañalu. (Masamu 119:108; 2 Akorinda 9:7) Neyi tukulombaña hayumiyi nikutoñojokahu, tukwila yuma yikutukwasha nawa Yehova wukutukiswila.

14. Munateli kwiluka ñahi neyi nvwalilu yenu yinakumuzañalesha Yehova?

¹⁴ Talenu chakutalilahu chikwawu: Twili netu kudi yakuvwala yimwakeña, ilaña muneluki nenu neyi muyivwala mukutuntwisha akwenu muchipompelu. Bayibolu yahoshahu wanyi hanoyu yakuvwala yimunakukeña kuvwala. Hanu dinu mukwiluka ñahi chatoñojokañayi Yehova? Bayibolu yatulejaña nawu: “Ambanda adiwahishi nakuvwala mahina chalumbuluka, nansonyi nikuwundisha mumesu; bayi nakuyindayinda nsuki, hela nawuru hela namperola, hela mahina asweja kulema wuseyaku; ilaña adiwahishi nanyidimu yayiwahi yatelela ambanda adishimunaña nawu twaakamaña Nzambi.” (1 Timotewu 2:9, 10) Ilaña, ambuña aYehova ejima, kushilahu tuhu niamayala anateli kudizila kunawa mazu. Neyi tukudizoza, tukutoñojoka chakutiyawu antu amakwawu nayakuvwala yitukuvwala. Nawa chineli twayikeña amanakwetu, tukukeña wanyi kuyihilisha hela kuyituntwisha. (1 Akorinda 10:23, 24; Afwilipi 3:17) Neyi tukwiluka chahosha Bayibolu nichatoñojokañayi Yehova, tukwila yuma yikumutiyisha kuwaha.

15, 16. (a) Yehova watiyaña ñahi neyi tutwalekahu kutoñojoka hayuma yatama (b) Neyi tunakutonda yisela yakuhema, tunateli kwiluka ñahi yuma yamuzañaleshaña Yehova? (c) Tunateli kufuukula ñahi yuma yalema?

¹⁵ MuBayibolu, twadizaña nawu Yehova watiyaña kutama neyi antu anakwila nikutoñojoka yuma yatama. (Tañenu Kutachika 6:5, 6.) Chinakumwekana hatooka nawu Yehova wakeñaña wanyi  nindi tutoñojokeña hawuvumbi. Neyi tukutwalekahu kutoñojoka, tunateli kwilamu. Ilaña, Yehova wakeñaña nindi tutoñojokeña hayuma yayiwahi. Kambanji Yakoba wasonekeli nindi maana aYehova ‘hakusambila amawahi, nkumininaku awunda, ovwaha, anyakala kutiya, enzala luwi nanyikabu yayiwahi, hiyaheta ntadi hela wufwikijuku.’ (Yakoba 3:17) Dichi Bayibolu yatulejaña nawu twatela kutondolwela yisela yikutukojeja kutachika kufwikija hela kufwila kwila yuma yatama. Nawa neyi twiluka yuma yakeñañayi niyahelayi Yehova, chikutukwasha kwiluka chakutonda nyikanda, mafwilimu hela yisela. Twatela wanyi kwila antu kulonda atuleji yuma yakwila.

¹⁶ Neyi tunakufuukula, kudi njila jajivulu jinateli kumutiyisha Yehova kuwaha. Ilaña neyi tunakukeña kufuukula yuma yalema, chikuwaha neyi tukwihula aeluda hela manakwetu hela muhela weluka kulonda yatukwashiku. (Titusa 2:3-5; Yakoba 5:13-15) Hela chochu, bayi tumwila netu yatufuukwiliku. Ilaña, twatela kutoñojoka chikupu yuma yitweluka muBayibolu kulonda tufuukuli etu aweni. (Aheberu 5:14) Kapostolu Pawulu wahosheli nindi: “Antu ejima akadisendela yiteli yawu.”—Aŋalija 6:5.

17. Twahetelañamu ñahi neyi tufuukula yuma yikumutiyisha Yehova kuwaha?

¹⁷ Neyi tufuukula yuma yikumutiyisha Yehova kuwaha, tukukundama kudi yena nikwikala amabwambu jindi nawa wukutukiswila. (Yakoba 4:8) Tukumukuhwelela chikupu Yehova. Dichi tutoñojokenuña hansañu yitunakutaña muBayibolu kulonda twiluki chatoñojokañayi. Tukudizaña yuma yayiha hadi Yehova. (Yoba 26:14) Ilaña neyi tukuzata nañovu kulonda tumwiluki, tukwikala namaana nawa tukufuukulaña chiwahi. (Yishimu 2:1-5) Maana nikufuukula kwawantu kwahimpaña, ilaña Yehova wahimpaña wanyi. Ñimbi yamasamu wahosheli nindi: “Mwafuukulañayi Yehova mwemanaña haya nyaka, niyitoñojoka yamumuchima windi yakolaña kumakiñu ejima mwamba kavwalikilañawu antu.” (Masamu 33:11 NWT ) Mwamweni, tukufuukula chiwahi neyi tukutoñojokaña neyi chatoñojokañayi Yehova nikwila yuma yikumutiyisha kuwaha.