1. 1) Jñá kʼanile kjoatéxoma xi faʼaitʼa ya Biblia. 2) Jósʼin basenkaoná nga nitjosoán kjoatéxomale Jeobá.

YA Biblia faʼaitʼa je kjoatéxoma xi kʼoatsokixiná jmeni xi mele Jeobá nga sʼiaan. Tobʼelañá, kʼoatso nga tsín koa̱n xkóson kʼoétsʼoalee, nga tsín koa̱n si̱ché, nga tsín koa̱n koa̱nchʼiaa kʼoa nga tsín kjoachajngi sʼiaan (1 Corintios 6:9, 10). Kʼoa je Jesús kʼoati tsjoále kjoatéxoma je chjotale. Tobʼelañá, kitso: “Kuinga tangínsíño, kʼoa chjotana tikao je chjota xi tjín ngakjijnda naxinandá, cha̱nisʼenngindáo kao jaʼaínle Nʼai kʼoa kao tsʼe ʼNdí kʼoa kao tsʼe nganʼiotsje, takoyalao nga katasítjoson ngayeje jme xi an tsakʼeneno. Kʼoa ¡koeni!, an tijnakaono ngantsjai nichxin saʼnda nga kuichokjetʼa xi chon sonʼnde” (Mateo 28:19, 20, TNM). Kjoanda tsaanñá jmeni xi tsoná je Jeobá kao Jesús. Je kjoatéxomale Jeobá basenkaoná ñá kʼoa kao familianá nga nda biyoaa. Kʼoati basenkaoná nga tsjoa sʼe tokoán. Tonga xi ngisa chjíle kuinga tsjoa sʼe̱le Jeobá kʼoa sichikontʼainná tsa si̱tjosoán je kjoatéxomale, jolani xi kʼoatso nga kʼuínyasoán.

2, 3. 1) Ánni nga tsín ñaki jngo kjoatéxoma tjínsínile ngayeje jmeni xi nʼia. 2) Jméni xi chótʼayá i̱ kjoaʼmiya jebi (chótsenlai sén xi fitsʼiani kjoaʼmiya jebi).

² Ya Biblia alikui kʼoatsokixiná nga jngó jngó koya jmeni xi  sʼiaan. Tobʼelañá, alikui kʼoatsoná jókjoan najño xi chʼa̱kjá kʼoa jókjoan xi mai. Jebi kui bakó nga nʼio chjine je Jeobá. Nga̱ tsín tongóson kjoan najño xi bʼakjá chjota ngakjijnda Sonʼnde. Kʼoa bʼantjaiyaje̱ jokjoan najño xi bʼakjá chjota nga fi nó. Tonga jmeni xi tso je Biblia tʼatsʼe josóyoaa alikʼia bʼantjaiya. Je Biblia kʼoati tsín kʼoatsoná jmé xá xi koa̱n sʼiaan, jósʼin si̱xkilee yaoná kʼoa jósʼin kʼoétsaojiaan. Xi tʼatsʼe jebi, je Jeobá tsjoáʼndele nga jngó jngó xi ngʼajko̱ tjíole yaniʼya kʼoa nga jngó jngó chjota nga je katakjoéjin jmeni xi sʼin.

³ Tsa nʼio tjínle kjoandosin jmeni xi mená sʼiaan kʼoa tsín kʼoatsokixi ya Biblia xi tʼatsʼe jebi, tsakui nichxin i̱ kuixoán: “A mandosinle Jeobá jmeni xi skoejian. A koaan tojmeni xi sʼian nga tonga tsínkjoanni kjoaʼatone kjoatéxomale Jeobá. Jósʼin skoeña tsa tsjoa sʼe̱le Jeobá jmeni xi sʼian”. Kui jebi chótʼayá i̱ kjoaʼmiya jebi.

4, 5. Jósʼin bʼétʼaná jmeni xi nʼia kʼoa jósʼin bʼétʼale xi kjaʼaí.

⁴ Tjínkʼa chjota xi kʼoasʼin síkjaʼaitsjen nga koa̱n kʼoasʼin tojmeni xi mele. Tonga ñá alikui kʼoasʼin nikjaʼaitsjeen, nga̱ kui xi mená nga tsjoa kʼoé kon je Jeobá. Kuinga títjon kjoanla nikjaʼaitsjensíñá jotso je Biblia tiʼani nga kjesa jme xi nʼiajian kʼoa nitjosonñá jmeni xi tso. Tobʼelañá, je Biblia kʼoatso josʼin síkjaʼaitsjen Jeobá xi tʼatsʼe njín kʼoa kui kjoafaʼaitsjen jebi mangíntjenngiaa (Génesis 9:4; Hechos 15:28, 29). Koaan si̱jélee nganʼio je Jeobá nga katabasenkaoná ánni nga kui kʼoasʼiansíñá jmeni xi sasénle.

⁵ Jmeni xi nʼia bʼetʼaná. Tsakui chjoéjiaan xi ndatjín, ngisaa koa̱nmiyosaa je Jeobá. Kʼoa tsakui chjoéjiaan xi chʼaotjín alikui timiyoná koa̱nni. Xi ijngosani, jmeni xi nʼia kʼoati bʼetʼale xi kjaʼaí. Tsakui xi chʼaotjín kʼoasʼiaan tochale koa̱njtile je ndsʼee kʼoa tsa maije̱ kjuinroajen kjoamakjainle. Alikui mená nga kʼoasʼiaan. Kʼoati tsín mená nga kjoa katasʼe ya jinjtín. Tojosʼin tiʼyaa nʼio machjén nga kui xi ndatjín chjoéjiaan (tʼexkiai Romanos 14:19; * Gálatas 6:7). *

6. Jméni xi sʼiaan nga jme xi chjoéjiaan.

⁶ Tsa tsín kʼoatsokixi ya Biblia jmeni xi tjínnele sʼiaan, jósʼin jchañá jmeni xi sʼiaan. ʼNdele nga tokui chjoéjiaan jmeni xi ndatjín maná, tosa títjon kjoanla nda si̱kjaʼaitsjeen jmeni xi sasénle Jeobá kʼoa xijekoa̱n kʼia chjoéjiaan jmeni xi sʼiaan. Tsa kʼoasʼiaan ʼyañá nga koasenkaoná je Jeobá nga nda kuichotsjoá jme xi kachjoejiaan (tʼexkiai Salmo 37:5). *

7. Kʼiatsa tsín jngo kjoatéxoma ya Biblia xi kʼoatsokixiná jmeni xi sʼiaan, jósʼin jchañá jmeni xi sasénle Jeobá.

⁷ Jósʼin jchañá jmeni xi sasénle Jeobá. Efesios 5:17 itso: “Katamachoyano josʼin nga mele Nainá”. Tsa tsín jngo kjoatéxoma ya Biblia xi kʼoatsokixiná jmeni xi sʼiaan, tjínnele koa̱nchoyaná jmeni xi mele Jeobá nga sʼiaan (chótsenlai je rekuadro “Jósʼin tsoyanile”). Kʼoa kʼianga koa̱nchoyaná tjínnele kuijnatsʼinyaa, kʼoétsʼoalee je Jeobá kʼoa kʼoaiʼndee nga nganʼiotsjele katabándiaaná.

8. Jósʼin tsabeni je Jesús jmeni xi mele je Jeobá.

⁸ Je Jesús koanchoyale ngantsjai jmeni xi mele Jeobá nga sʼin. Tobʼelañá, jao kʼa nga títjon kjoanla tsakʼétsʼoa kʼianga kisinkjínya tsojmi nga kisikjen je chjotankjín (Mateo 14:17-20; 15:34-37). Tonga kʼianga koanbaole  kʼoa kʼoakitsole je Na̱i nga nioxtila katasíkʼóya je la̱jao̱, je Jesús alikui kʼoakisʼin (tʼexkiai Mateo 4:2-4). * Kuinga tsín kʼoakisʼinni nga nʼio nda be je Jeobá kʼoa bení nga tsín sa̱sénle kʼiatsa kʼoasʼin sichjén je nganʼiotsje xi kitsjoale. Je Jesús bení nga je Nʼaile koandiaale kʼoa nga tsjoále xi ski̱ne kʼianga koa̱nchjénle.

9, 10. Jméni xi koasenkaoná nga kui xi ndatjín chjoéjiaan. Jngola choa̱ tʼejnai.

⁹ Tsa kʼoasʼiaan jokisʼin Jesús kʼoa si̱nʼiotʼaa je Jeobá kui xi ndatjín chjoéjiaan. Je Biblia itso: “Tin’iot’ai Jeobá kao ngayeje ni̱ma̱li, kʼoa ali tokuijin ’mini josʼin machoyali. Jé kuenta tʼiain tojmeni xi sʼiain, kʼoa jé sikixiya je ndiaali. Ali chjinejin sʼin ʼyatokuin yaoli. Tijkónchai je Jeobá kʼoa tisenxinlai xi chʼaotjín” (Proverbios 3:5-7). Kʼianga chotʼayá je Biblia kʼoa machoyaná josʼin síkjaʼaitsjen je Jeobá kʼoati ʼyaa jmeni xi mele nga sʼiaan. Kʼoa nga sa chótʼayá sa chótʼayá josʼin síkjaʼaitsjen, kui kʼoasʼiaan jmeni xi sasénle kʼoa ñaki kao ni̱ma̱ná kjuintjenngiaa josʼin koandiaaná (Ezequiel 11:19).

¹⁰ Tobʼelañá, kʼiatsa tsojmi tíbatse jngo chjoón kʼoa tsa naskánakjoan jté xi skoe̱ kʼoa mele koatse tonga tsa nʼio chjí, jósʼin. Ninga tsín ya tjenkao je xʼinle bení jokuitso kʼiatsa kʼoatjín chjíle jté xi koatse. Kuinga beni nga̱ jenkjín nó tjíokao xínkjín kʼoa bení josʼin síkjaʼaitsjen xʼinle xi tʼatsʼe tao̱n. Tikʼoasʼinni xi kao Jeobá. Kʼianga ʼyaa josʼin síkjaʼaitsjen kʼoa jmeni xi kisʼin nichxin kjoatse, ʼyañá jmeni xi mele nga sʼiaan.

11. Jméni xi chjónangilee yaoná kʼianga kʼoéxkiaa kʼoa nga chótʼayá je Biblia (chótsenlai rekuadro  “Kʼianga chótʼayai Biblia chjónangilai yaoli jebi”).

¹¹ Jósʼin jchañá josʼin síkjaʼaitsjen je Jeobá. Kʼiaa nga nyaon nyaon kʼoéxkiaa kʼoa chótʼayá je Biblia. Kʼianga tichotʼayá Biblia koaan chjónangilee yaoná jebi: “Jméni xi bakóyana jebi xi tʼatsʼe Jeobá. Ánni nga kʼoakisʼinsíni”. Kʼoati sʼiaan jokisʼin David. Si̱jélee je Jeobá nga katabasenkaoná nga ngisasa nda jchaa. Je David i kitso: “Takonái je ndiaali Jeobá; tʼinyanái je ndiaali. Tjandiaanái kao kjoakixili kʼoa tʼinyanái, nga̱ jiní Niná xi chʼasjentjainái. Ji sinʼiotʼale bʼajnda nichxin” (Salmo 25:4, 5). Si̱kjaʼaitsjeen josʼin si̱chjén jmeni xi majinná tʼatsʼe Jeobá. Koaan chjónangilee yaoná: “Jósʼin koa̱nchjénna jebi ya yaniʼya, ya tʼaxána, ya ndʼiaskuela kʼoa tsa kʼianga xinyasoan”. Tsa kʼoasʼiaan ngisaa ngotjo jchañá josʼiaan.

12. Jósʼin basenkaoná je xo̱n xi bʼasje naxinandále Niná kao kjoajtín xi satíoná.

¹² Jmésani xi koasenkaoná nga jchaa josʼin síkjaʼaitsjen je Jeobá. Kʼiaa nga kuenta sʼiaan jmeni xi bakóyaná je naxinandále Jeobá xi tʼatsʼe Biblia. Tobʼelañá, kʼiatsa jme xi sʼiaan koaan chótʼajiaan je Xo̱n xi síchjén je testigole Jeobá nga jme xi básjaiya kʼoa tsa jñasanile ánni nga jchasíñá josʼin síkjaʼaitsjen je Jeobá. Ijngosa koya xi koasenkaoná kui je kjoajtín xi satíoná. Kʼiatsa nda kuinóʼyá jmeni xi faʼa, tsa kʼoee énná kʼoa si̱kjaʼaitsjenjiaan jmeni xi ʼmiyaná, kui kʼoasʼiaan jme xi sasénle Jeobá kʼoa je sichikontʼainná.

13. Jngo choa̱ tʼejnai josʼin basenkaoná nga ʼyaa josʼin síkjaʼaitsjen je Jeobá.

¹³ Tsa si̱kjaʼaitsjenjiaan josʼin síkjaʼaitsjen je Jeobá jchañá jmeni xi sʼiaan. Tobʼelañá, tsa mená nga precursor koaan. Tsakui nichxin jengisa tse tiʼmiyasoán tonga tojo kje ñaki tjínjngojin tokoán tsa tojo nda kuiyoaa nga tochoasa tao̱n sʼe̱ná. Je Biblia alikui kʼoatsoná nga tjínnele precursor koaan kʼianga si̱xálee je Jeobá. Koaan tojo nda si̱xálee tsa publicador maa. Tonga je Jesús kʼoakitso nga síchikontʼain je Jeobá je xi tsín to yaole fini (tʼexkiai Lucas 18:29, 30). * Kʼoa je Biblia kʼoatso nga nʼio tsjoa male je Jeobá kʼianga bʼenelee yaoná nga kʼoakji nixálee jokji bichó nganʼioná. Kui xi mele nga tsjoa katasʼe tokoán kʼianga si̱xálee (Salmo 119:108; 2 Corintios 9:7). Tsa si̱kjaʼaitsjenjiaan xi tʼatsʼe jebi, kʼoajinkji si̱xálee jokji tjen kuicho nganʼioná kʼoa je Jeobá sichikontʼainná.

14. Jósʼin jchañá tsa sasénle je Jeobá josoyoaa.

¹⁴ Ijngolasa choa̱ kataʼyaa. Tobʼelañá, tsa nʼio tsjoachaa jokji jngo najño. Tonga tsa ʼyaa nga tsín sa̱sén kʼale je ndsʼee tsakui chʼa̱kjá, kʼoa tsa tsín jotso Biblia tʼatsʼe najño xi kʼoakjoan, jósʼin jchañá josʼin síkjaʼaitsjen je Jeobá. Je Biblia itso: “Je xi yánchjín katabʼakjá najño xi nda xi bakinle. Katasʼe i̱tséle kjoasoatakon nga nda katafikao yaole. Ali toséxkónjin bʼénʼio ntsja̱jko̱. Ali tao̱nsinejin, ali tofangichjíjin, ali chʼótjichjíjin síchjén. Tosa katasʼín xá xi nda, josʼin bakinle yánchjín xi tso nga bexkón Niná” (1 Timoteo 2:9, 10). Kjoafaʼaitsjen jebi kʼoati bakinle xi xʼin. Machjén nga kuenta sʼiaan josʼin síkjaʼaitsjen je ndsʼee tʼatsʼe jokjoan najño xi chʼakjá kʼoa josoyoaa. Kʼoa nga tsjoachaa je ndsʼee, bʼenelee yaoná nga tsínkui kʼoanʼia xi chʼao kʼoee kon (1 Corintios 10:23, 24; Filipenses 3:17). Tsa si̱kjaʼaitsjenjiaan jmeni xi tso Biblia kʼoa josʼin síkjaʼaitsjen je Jeobá kui kʼoasʼiaan xi sasénle.

15, 16. 1) Jósʼe kon je Jeobá tsa kjoachajngi si̱kjaʼaitsjeen. 2) Jósʼin jchañá tsa sasénle je Jeobá josʼin bʼetsaojiaan. 3) Jósʼiaan kʼianga kjesa chjoejinjián jmeni xi sʼiaan.

 ¹⁵ Je Biblia kʼoatso nga nʼio ba male kʼoa nʼio aon male je Jeobá kʼianga kui kʼoasʼín xi chʼaotjín je chjota kʼoa nga kui xi chʼaotjín síkjaʼaitsjen (tʼexkiai Génesis 6:5, 6). * Je Jeobá alikui mele nga kjoachajngi cha̱niyaa jkoaa. Tsakui si̱kjaʼaitsjeen tochale kʼoasʼiaan. Kuinga kui xi mesínile je Jeobá nga kui xi ndatjín kʼoa xi tsje tjín si̱kjaʼaitsjeen. Je chjotale Cristo xi Santiago tsakʼin i kitso: “Je kjoaʼisentakon xi ngʼá nroani, títjonkjoanla tsje, kʼia tojbi, indajin, ndʼé, tse kjoamatakon xi tjínle, nda xále, likui besin, likui ndiso” (Santiago 3:17). Kuinga tsín koa̱n kui kʼoétsaojinkaosíñá xi kui ska̱niya jkoaa xi chʼaotjín kʼoa xi jndí tjín. Kʼiatsa ʼyaa jmeni xi tsjoake je Jeobá kʼoa jmeni xi jtike, jchañá jmeni xi sʼiaan kʼoa alikui je ndsʼee chjónangilee jmé libroni xi koa̱n kʼoéxkiaa kʼoa jmé pelíkulani xi koa̱n chótsenlee.

¹⁶ Nkjín koya tjín xi sasénle Jeobá xi koa̱n chjoéjiaan kʼiatsa jme xi sʼiaan. Tonga tsa nʼio tjínle kjoandosin jmeni xi sʼiaan, koaan si̱jélee kjoafaʼaitsjen je xi chjotajchínga sʼin tjío kʼoa tsa jngoje̱ ndsʼee kʼoa tsa jngo tichjaa xi jetjínle kjoafaʼaitsjen (Tito 2:3-5; Santiago 5:13-15). Tonga alikui koa̱n kʼoakʼuínlee nga je kʼoakatatsoná jmeni xi sʼiaan. Je pastro Pablo i kitso: “Nga jngójngó katabʼami chʼá xi titsʼeni” (Gálatas 6:5). Je xi sʼiaan kuinga nda si̱kjaʼaitsjenjiaan jme xi tso je Biblia kʼoa xijekoa̱n kʼia chjoéjiaan jmeni xi sʼiaan (Hebreos 5:14).

17. Jósʼin basenkaoná nga kui chjoejiaan jmeni xi sasénle je Jeobá.

¹⁷ Kʼianga kui kʼoanʼia xi sasénle Jeobá ngisaa mamiyosaa, nda sʼe kon je Jeobá kʼoa síchikontʼainná (Santiago 4:8). Kʼoa ngisaa nʼio sʼejna kjoamakjainná. Kuinga machjénsíni nga si̱kjaʼaitsjenjiaan jmeni xi tsoya Biblia ánni nga jchasíñá josʼin síkjaʼaitsjen je Jeobá. Kʼiatsa kʼoasʼiaan nkjín koya xi jchasaa tʼatsʼe Jeobá (Job 26:14). Kʼiatsa kʼoénelee yaoná nga nda jchaxkoaan, chjinee koaan kʼoa kui xi ndatjín chjoéjiaan (Proverbios 2:1-5). Kjitʼaa bʼantjaiya jmeni xi sʼín chjota kʼoa josʼin síkjaʼaitsjen, tonga je Jeobá alikʼia síkʼantjaiya kjoafaʼaitsjenle. Je salmista i kitso: “Jmeni xi tongini bʼéndajin je Jeobá sʼe̱jna ngantsjai nichxin, jotjín ya jinni̱ma̱le tokʼoasʼe̱ntsjai tojo kji tse koatio chjota” (Salmo 33:11). Kʼianga kʼoasʼin nikjaʼaitsjeen josʼin síkjaʼaitsjen je Jeobá kʼoa kui kʼoanʼia jme xi sasénle, kui xi ndatjín chjoejiaan.