1. Hadia manö duma-duma goroisa Zura Ni’amoni’ö, ba hadia gunania na ta’o’ö ia?

NO IBE’E khöda goroisa Yehowa ba Zura Ni’amoni’ö ena’ö ta’ila hadia zomasi ia tafalua. Duma-dumania, i’andrö khöda ena’ö ta’aröu’ö ita moroi ba wanömba adu, fanagö, femabu, mazui amuata wohorö. (I Korindro 6:9, 10) Ba no izara-zara Ono Yehowa, Yesu, wame’e oroisa khö ndra solo’ö khönia, ”Mibali’ö nifaha’ö fefu soi, wamayagö idanö ya’ira ba döi Nama ba ba döi Nono ba ba döi geheha ni’amoni’ö; mifaha’ö ira ba wolo’ö fefu hadia ia niwa’ögu khömi. Ba hiza, fao khömi ndra’o, ero ma’ökhö, irugi gamozua götö danö andrö.” (Matai’o 28:19, 20) Fefu ni’andrö Yehowa hegöi Yesu oi si sökhi khöda. Oroisa Yehowa zamaha’ö ya’ita hewisa wondrorogö botoda hegöi ösi nomoda, ba sanolo ya’ita ena’ö lö göna fökhö ba tasöndra wa’omuso dödö. Sabölö moguna, omuso dödö Yehowa ba ifahowu’ö ita ba ginötö ta’o’ö fefu goroisania, simane fe’amöi manuriaigö.

2, 3. (a) Hadia mbörö wa lö ibe’e khöda gamakhoita Sura Ni’amoni’ö sanandrösa ba ngawalö hadia ia zalua ba wa’aurida? (b) Hadia wanofu-nofu nifatunöda ba duho da’a? (Faigi gambara ba wamobörö wamaha’ö.)

 ² Lö nibe’e Zura Ni’amoni’ö khöda amakhoita sanandrösa ba ngawalö hadia ia zalua ba wa’aurida. Duma-dumania, lö nizara-zara Zura Ni’amoni’ö hadia nukha sinangea tafake. Da’a zangoroma’ö wa atua-tua Yehowa. Hewa’ae fabö’ö-bö’ö lagu wonukha niha ba zi fasui ya’ita, ba fabö’ö-bö’ö mode nukha ero inötö, hiza’i moguna wanuturu lala nibe’e Zura Ni’amoni’ö irugi mane ma’ökhö. Lö göi nibe’enia amakhoita sanandrösa ba halöwö mazui hiburan sinangea tafili, ba hewisa ena’ö lö göna ita fökhö. No itehegö Yehowa khöda zamösana hegöi khö zondrönia’ö ösi nomo ba wangai angetula sanandrösa ba da’ö.

³ Ba ginötö tahalö gangetula si tola molua-lua ba wa’aurida ba lö tasöndra goi-goinia ba Zura Ni’amoni’ö, tola manofu ita, ’Hadia omasi Yehowa ba gangetula nihalögu andre? Hadia omuso dödönia ba ngawalö nifaluagu asala lö usawö goroisania ba Zura Ni’amoni’ö? Hewisa wa tola faduhu dödögu wa omuso dödönia ba nifiligu?’

4, 5. Hadia lua-luania khöda gangetula nihalöda hegöi ba niha bö’ö?

⁴ So zanguma’ö wa tola manö lafalua gofu hadia ia zomasi dödöra. Hiza’i, omasi ita tafalua zi möi fangomusoi’ö dödö Yehowa. Börö da’ö, fatua lö tahalö gangetula moguna ta’angeraigö ba ta’o’ö hadia niwa’ö Zura Ni’amoni’ö. Duma-dumania, ifatunö khöda Sura Ni’amoni’ö hewisa dödö Lowalangi sanandrösa ba wangoguna’ö do. Börö da’ö, ta’o’ö niwa’önia. (I Moze 9:4; Halöwö Zinenge 15:28, 29) Ta’andrö wanolo khö Yehowa ena’ö tola tahalö gangetula si tola mangomusoi’ö tödönia.

⁵ So lua-luania khöda gangetula nihalöda. Na sökhi gangetula nihalöda, tola itugu ahatö ita khö Yehowa. Angetula si lö sökhi tola ifakiko wahuwusada khönia. So göi lua-luania ba niha bö’ö. Lö omasi ita ta’andrö wönu ndra talifusöda mazui tafalua hadia ia zi möi fangawuwu wamatira. Lö omasi ita ta’asogö gabula dödö ba gotalua ndra talifusöda ba mbanua niha Keriso. Börö da’ö, moguna sibai wangai angetula si sökhi.​—Baso Roma 14:19; Galatia 6:7.

6. Hadia zi tobali fanuturu lalada ba wangai angetula?

⁶ Hewisa ena’ö tola tahalö gangetula si sökhi hewa’ae lö izara-zara Sura Ni’amoni’ö wanutunö hadia manö zinangea tafalua? Moroi na tafalua hadia zomasi dödöda, moguna tahaogö wo’angeraigö hadia nifaluada, ba tahalö gangetula si tola mangomusoi’ö dödö Yehowa. Aefa da’ö, faduhu dödöda wa hasambalö itolo ita ba wanöndra mbua si sökhi.​—Baso Zinunö 37:5.

7. Na lö hadöi oroisa ba Zura Ni’amoni’ö, hewisa ena’ö ta’ila hadia zomasi Yehowa tafalua?

⁷ Hewisa ena’ö ta’ila hadia zi tola mangomusoi’ö tödö Yehowa? Imane Efeso  5:17 (NW), ”Ya’aboto ba dödömi hadia zomasi Yehowa.” Na lö hadöi oroisa si no lazara-zara ba Zura Ni’amoni’ö, moguna ta’angeraigö mazui tabotokhi ba dödöda hadia zomasi Yehowa tafalua. Hewisa ena’ö tola tafalua ia? Moguna mangandrö ita ba tatehegö gehehania wame’e fanuturu lala khöda.

8. Hewisa wa aboto ba dödö Yesu hadia zomasi Yehowa khönia? Be’e duma-duma.

⁸ Aboto ba dödö Yesu hadia zomasi Yehowa ifalua. Duma-dumania, dua kali me olofo niha sato, mangandrö Yesu ba ifalua dandra sahöli-höli dödö ba wame’e göra. (Matai’o 14:17-20; 15:34-37) Hiza’i, itimbagö Yesu wanandraigö nibe’e Gafökha ba wombali’ö kara tobali roti me olofo sibai ia ba danö si mate. (Baso Matai’o 4:2-4.) Aboto sibai ba dödönia Namania, ba i’ila wa lö omasi Yehowa na i’oguna’ö geheha ni’amoni’ö ha ba zoguna khönia samösa. Faduhu dödönia wa ibe’e Amania wanuturu lala khönia ba ibe’e göi gö ba ginötö i’oguna’ö.

9, 10. Hadia zanolo ya’ita ena’ö tola tahalö gangetula si sökhi? Be’e duma-duma.

⁹ Simane Yesu, tola göi tahalö gangetula si sökhi na ta’odaligö Yehowa ba wame’e fanuturu lala khöda. Imane Sura Ni’amoni’ö, ”Döna-döna khö Yehowa, moroi si’aikö ba dödöu, ba böi abe’e dödöu ba wa’onekheu. Böi aefa dödöu khönia, gofu hadia ia lala khöu, ba ya’ia zangadölö töröwau. Böi bali’ö satua-tua ndra’ugö: ata’ufi Yehowa ba aröu’ögö ba zi lö sökhi.” (Gamaedola 3:5-7) Na tafaha’ö ita ba Zura Ni’amoni’ö ba ta’ila hewisa lala wangera-ngera Yehowa, aboto ba dödöda hadia zomasi ia tafalua ba wa’aurida. Itugu tafaha’ö ita ba lala wangera-ngera Yehowa, itugu aoha khöda wangai angetula si tola mangomusoi’ö tödönia. Börö da’ö, tola i’anemai’ö tatema wanuturu lala moroi khö Lowalangi.​—Hezekieli 11:19.

¹⁰ Khalaigö atö me möi mowöli samösa ndra alawe si no mangowalu ba i’ila sifatu si baga-baga sibai. Hiza’i, ebua mbölinia. Hewa’ae lö si fao khönia wo’omonia, aboto ba dödönia hewisa dödö wo’omonia na ihorigö gefe ba zimane da’ö. Hana wa i’ila? No hauga fakhe mangowalu ira. Tobali, i’ila hewisa dödö wo’omonia sanandrösa ba wangoguna’ö kefe. Simanö göi, na tafaha’ö ita ba wangera-ngera Yehowa hegöi ba zi no ifalua meföna, tola ta’ila hadia zomasi ia tafalua ba ngawalö zalua ba wa’aurida.

11. Hadia wonofu si tola tasofu khöda samösa ba ginötö tabaso ma tafaha’ö ita ba Zura Ni’amoni’ö? (Faigi kotak ” Na Öfaha’ö Ndra’ugö ba Zura Ni’amoni’ö, Sofu Khöu Samösa”.)

¹¹ Hewisa ena’ö ö’ila wangera-ngera Yehowa? Sabölö moguna ya’ia da’ö böi  tabato wombaso hegöi ba wamaha’ö ya’ita ba Zura Ni’amoni’ö. Na tafalua da’a, tola tasofu khöda samösa, ’Hadia wamaha’önia khögu sanandrösa khö Yehowa? Hadia mbörö wa ifalua zimane da’ö?’ Simane Dawido, tola ta’andrö wanolo khö Yehowa ena’ö so khöda wa’aboto ba dödö sanandrösa khönia. Imane Dawido, ”He Yehowa, tuturu khögu lala andrö khömö, faha’ö ndra’o ba zinörö andrö khöu. Tolodo, ena’ö utörö zi duhu andrö khöu, ba faha’ö ndra’o; ya’ugö sa Lowalangi andrö, sangorifi ya’odo; khöu udöna-döna, lö mamalö-malö.” (Zinunö 25:4, 5) Na tafaha’ö ita sanandrösa khö Yehowa, tola ta’angeraigö hezo ginötö si tefaudu ta’oguna’ö ia. Hadia tola ta’oguna’ö ia ba nösi nomoda, ba wohalöwö, ba zekola, mazui ba wanuriaigö? Na ta’angeraigö da’a, aoha khöda wangila hadia zomasi Yehowa tafalua.

12. Hewisa publikasi hegöi fe’amöi ba gangowuloa tola möi fanoloda ena’ö aboto ba dödöda wangera-ngera Yehowa?

¹² Lala tanö bö’ö ena’ö ta’ila hewisa wangera-ngera Yehowa, ta’ame’egö tödö hadia nifaha’ö ba gorahuania  si te’odane-dane ba Zura Ni’amoni’ö. Duma-dumania, ba ginötö tahalö gangetula, tola ta’ila hewisa wangera-ngera Yehowa ba Indeks Publikasi Menara Pengawal hegöi Panduan Riset untuk Saksi-Saksi Yehuwa. So gunania göi na tahaogö tafondro-ndrongo gangowuloa niha Keriso, ba tabe’e mbua gera-erada ba ta’angerönusi zi no tafaha’ö ya’ita. Da’a zanolo ya’ita ena’ö ta’ila hewisa wangera-ngera Yehowa. Buania, tola tahalö gangetula si tola mangomusoi’ö dödönia ba ifahowu’ö göi ita.

13. Na ta’ila wangera-ngera Yehowa, tola tahalö gangetula si sökhi. Be’e duma-duma.

¹³ Datafaigi sambua duma-duma hewisa wa tola tahalö gangetula si sökhi na tafatimbaisi tödöda wangera-ngera Yehowa. Te omasi’ö tobali perintis. No oya nibulö’öu ba wa’auriu irege tola oya ginötöu we’amöi manuriaigö. Hiza’i, lö khöu nasa fa’afaduhu dödö wa hasambalö ö’okhögö wa’omuso dödö hewa’ae ha ma’ifu gefeu ba tanö bö’önia. Tatu manö, lö niwa’ö Zura Ni’amoni’ö wa moguna tobali perintis ita na tafosumange Yehowa. Hewa’ae ha sanuriaigö ita, tola tafosumange ia. Hiza’i, imane Yesu wa ifahowu’ö Yehowa niha solulu fa’aurinia ba wotuhini Mbanua Lowalangi. (Baso Luka 18:29, 30.) Imane nasa Sura Ni’amoni’ö wa omuso dödö Yehowa na tafalua hadia zi tola ita ba wamosumange ya’ia, ba omasi ia na tasöndra wa’omuso dödö. (Zinunö 119:108; II Korindro 9:7) Na ta’ohe da’a ba wangandrö ba ta’angerönusi, tola tahalö gangetula si tefaudu molo’ö zi tola ita, ba töra-töra nasa ifahowu’ö ita Yehowa.

14. Hewisa ena’ö tola ötatugöi hadia tefaudu ba dödö Yehowa nukha ni’oguna’öu?

¹⁴ So duma-duma tanö bö’ö. So mode nukha zomasi’ö sibai, hiza’i ö’ila wa tola manö so ndra talifusöda si tetutu tödö na öfake nukha da’ö. Lö nizara-zara Zura Ni’amoni’ö hewisa zinangeania lagu wonukhada. Tobali, hewisa ena’ö tola ö’ila wangera-ngera Yehowa? Imane Sura Ni’amoni’ö, ”Simanö göi ndra alawe, ndramangehao baru soadu, ba yafao wa’aila ba fa’amoadu; böi fondrandra bu ba mani-mani ba nukha sebua böli, hadia zinangea ba ndra alawe sanguma’ö sangata’ufi Lowalangi ira; bua-bua si sökhi wangehaora.” (I Timoteo 2:9, 10) Tatu manö, moguna mene-mene da’a ba nono mbanua Yehowa, simanö göi ba ndra matua. Na ta’angeraigö hewisa dödö ndra talifusöda, tola ta’angenanöi hadia nukha ni’oguna’öda. Ba börö me ta’omasi’ö ndra talifusöda, lö omasi ita na tetutu dödöra. (I Korindro 10:23, 24; Filifi 3:17) Na ta’angeraigö hadia niwa’ö Zura Ni’amoni’ö ba hewisa wangera-ngera Yehowa, tola tahalö gangetula si tola mangomusoi’ö tödönia.

15, 16. (a) Hewisa dödö Yehowa na lö aetu takhalaigö gamuata wohorö? (b) Ba ginötö tafili hiburan, hewisa wa tola ta’ila zomasi Yehowa? (c) Ba ginötö tahalö gangetula sabölö moguna, hadia zinangea tafalua?

¹⁵ Moroi ba Zura Ni’amoni’ö, ta’ila wa afökhö ba abu dödö Yehowa me lafalua ba me la’angeraigö zi lö sökhi niha. (Baso I Moze 6:5, 6.) Aboto ba dödöda  wa lö omasi Yehowa na takhalaigö gamuata wohorö. Na lö aetu takhalaigö zimane da’ö, tola manö tafalua ia. Sindruhunia, omasi Yehowa na ta’angeraigö zohau-hau hegöi si sökhi. Imane Yakobo wa fa’atua-tua Yehowa andrö ”si oföna khönia, ba no ohau-hau, ba fanete da’ö, ba lö fasosota, ebolo dödö, i’o’ö li, no fahöna khönia wa’ahakhö dödö ba bua-bua si sökhi, lö i’ebua’ö dödö zambuana, lö mamini tödö”. (Yakobo 3:17) Börö da’ö, tatimbagö fefu hiburan si tola mondrönisi tödöda ba wokhalaigö mazui ba wo’isö ngawalö zi ra’iö ba si lö sökhi. Na aboto ba dödöda hadia zomasi Yehowa hegöi si fatuwu khönia, tola aoha khöda wangila hezo mbuku, film, mazui games si tola tafili. Lö moguna sa’ae tasofu ia ba niha bö’ö.

¹⁶ Ba ginötö tahalö gangetula, oya zinangea tafili si tola mangomusoi’ö tödö Yehowa. Hiza’i, na tahalö gangetula sabölö moguna, sökhi na ta’andrö wanuturu lala moroi khö zatua sokubaloi mazui khö ndra talifusöda saro ba wamati. (Tito 2:3-5; Yakobo 5:13-15) Tatu manö, lö ta’andrö ena’ö ya’ira zangai angetula khöda. Hiza’i, moguna ta’angeraigö sibai hadia zi no ta’ila moroi ba Zura Ni’amoni’ö ba awena tahalö gangetulada samösa. (Heberai’o 5:14) Imane Faulo, ”Ilu’i-lu’i sa noronia zamösana.”​—Galatia 6:5.

17. Hadia gunania na tahalö gangetula si tola mangomusoi’ö dödö Yehowa?

¹⁷ Ba ginötö tahalö gangetula si tola mangomusoi’ö dödö Yehowa, itugu ahatö ita khönia, ba tatema wa’omasi hegöi howu-howunia. (Yakobo 4:8) Itugu aro göi wamatida khö Yehowa. Börö da’ö, data’angerönusi nibasoda ba Zura Ni’amoni’ö ena’ö aboto ba dödöda hewisa wangera-ngerania. Tatu manö, so zi bohou nifaha’öda ya’ita sanandrösa khö Yehowa. (Yobi 26:14) Na ta’odödögö wamaha’ö ya’ita sanandrösa khönia iada’a, tola atua-tua ita ba tahalö gangetula si sökhi. (Gamaedola 2:1-5) Tola manö tebulö gera-era niha gulidanö hegöi ohitö dödöra, hiza’i lö irai tebulö Yehowa. Imane sinunö Dawido, ”Tödö Yehowa andrö, ba lö tebulö, irugi zi lö aetu, ba era-era dödönia andrö, ba lö mamalö-malö.” (Zinunö 33:11) Tola tahalö gangetula si sökhi na tafaha’ö ita ba wangera-ngera Yehowa ba tafalua hadia zi tola mangomusoi’ö tödönia.