1. a) Bibliapica ¿ima leycunallata tian? b) Bibliapi mandashcacunata cazunaca ¿imashinata ñucanchipallata ali can?

JEHOVÁ DIOSCA ñucanchicuna imata ruranata yachachunmi Bibliapica huaquin leycunata churashca. Huaquin leycunata ricushun. Jehová Diosca maquihuan rurashca yanga dioscunata na adoranachu canguichi nishpa, na shuhuanachu canguichi nishpa, na machanachu canguichi nishpa, na shuj jarihuan shuj huarmihuan puñushpa juchapi urmanachu canguichi nishpami mandarca (1 Corintios 6:9, 10). Jesuspash paipa catijcunataca cashna nishpami mandarca: ‘Ñucapa yachajujcuna tucuchunmi cai pachapi gentecunapaman rishpa villana canguichi. Paicunataca Taitapa, Churipa, Diospa jucha illaj espiritupa shutipimi bautizana canguichi. Paicunapash tucuillata pactachishpa causanajuchunmi yachachina canguichi. Ricuichi, ñucami cai pacha tucuri punllacaman tucui punllacuna cangunahuan cani’ nishpa (Mateo 28:19, 20). Jehovatapash Jesustapash cazunaca ñucanchipallatami ali can. ¿Imamandata shina ninchi? Pundapica leycunami ñucanchitapash, ñucanchi familiatapash cuerpopi, yuyaicunapi imashina cuidarina cashcata yachachun, cushilla causachunbash ayudan. Ashtahuangarin, Jehová Dios mandashcashna villachijpica cushijushpami paica ñucanchita ricunga, bendiciangapash.

2, 3. a) ¿Imamandata Bibliapica na tucuipa shuj ley tian? b) ¿Ima quimsa tapuicunatata cai temapica yachajupashun? (Callari fotota ricupangui).

² Bibliapica na tucuipachu leycuna tian. Shuj ejemplota ricupashun. Ima  ropata churajunata o na churajunata yachachunga Jehová Diosca na shuj leyta churashcachu. ¿Imamandata na shuj leyta churashca? Mundo entero llactacunapica shuj shuj laya ropata churajuj gentecunami tian. Shinallata ropamanda parlashpaca cada ratomi shuj shuj modacuna llujshin. Shinapash, imashina vistirinamanda parlashpaca Bibliapi yuyaicunaca nunca na cambianllu. Shinallata, ima trabajota agllanamanda, ungushca cashpa ima tratamientocunata agllanamanda o diversiongunamanda parlashpaca Bibliapica na ashtaca leycuna tianllu. Ashtahuangarin, cada uno aliguta ricushpa o familiacunapica taitacuna aliguta ricushpa decisiongunata agllachunmi Jehová Diosca saquishca.

³ Huaquinbica Bibliapi leycuna na tiajpipashmi jatun decisiongunata agllana canchi. Chaimandami huaquinbica tapurinchi: “Jehová Diosca ¿ima decisionda ñuca agllajujtaca ricujunllu? Bibliapi leyta na huashaman saquijushpaca ¿ñuca munashca decisionda agllanallachu cani? Ñuca agllashca decisiongunata Jehová Dios alicachishpa ricujujtaca ¿imashinata seguro caita ushani?” nishpa. Chai quimsa tapuicunataca cai temapimi yachajushun.

4, 5. Ñucanchi agllashca decisiongunaca ¿imashinata ñucanchitapash shujcunatapash cushichita o llaquichita ushan?

⁴ Huaquin gentecunaca yuyanmi, ñuca munashcata ruranallami cani nishpa. Shinapash ñucanchicunaca Jehovata cushichingapaj munashpami ali decisiongunata agllangapaj munanchi. Chaimandami imatapash nara decidishpallata Biblia imata nijujta pensarishpa jipaca cazuna canchi. Shuj ejemplota ricupashun. Bibliapica yahuarmanda Jehová Dios imata pensajtami nijun. Chaimandami ñucanchica Bibliapi imata nijujta ñucanchipash catinchi (Génesis 9:4; Hechos 15:28, 29). Jehovataca mañanallami canchi, quiquin alicachishca decisiongunata agllangapaj ayudahuangui nishpa.

⁵ Ñucanchi agllashca decisiongunaca ñucanchipallatami ali caita ushan o nali caita ushanbash. Ali decisiongunata agllashpaca ashtahuanmi Jehovapaman quimirishun. Cutin nali decisiongunata agllashpaca Jehovamanda caruyai callarishunmi. Ashtahuangarin, ñucanchi agllashca decisiongunaca shujcunatapashmi cushichita ushan o llaquichita ushan. Nali decisiongunata agllashpaca shuj huauquipanicunatami culirachita o nitijachita ushanchiman. Shina llaquichingapaca nimamanda na munanachu canchi. Shinallata ñucanchi agllashca decisiongunamanda congregacionbi problemacuna tiachunbash na munanachu canchi. Imashinami ricupanchi, ali decisiongunata agllanaca minishtirishcapachami can (Romanos 14:19; Gálatas 6:7, liingui).

6. Shuj decisionda agllagrijushpaca ¿imatata rurana capanchi?

⁶ Shuj decisionda agllangapaj munajujpi, Biblia na imatapash nijpica ¿imatata rurana canchi? Ñucanchi munashcata ruranapa randica, aliguta pensarishpa, Jehová Dios imata alicachishcata yarishpami decisiondaca agllana canchi. Shinami, ñucanchi agllashca decisionda Jehová Dios alicachishpa bendicianataca seguro caita ushashun (Salmo 37:5, liingui).

7. Bibliapi na tucuipa shuj ley tiajpipash ¿imashinata Jehovapa munai maijan cashcataca yachai ushapanchi?

⁷ Jehová Dios imata alicachijtaca ¿imashinata yachaita ushanchi? Efesios 5:17​pica ninmi: “[“Jehová”, NM] munashcata rurangapajmi, ali yuyaita japina canguichi” nishpa (“¿Imatata nisha nin?” nishca recuadrota ricupangui). Imashinami ricupanchi, Bibliapi na tucuipa shuj ley tiajpipash, Jehovapa munai maijan cajta yachangapami esforzarina canchi. Chaipaca ¿imatata rurana canchi? Chaipaca Jehová Diostami mañana canchi, shinallata paipa espíritu santo ñaupaman pushachunmi saquina canchi.

8. Jesusca ¿imashinata yacharca Jehová Diospa munai maijan cashcata? Shuj ejemplota churapai.

⁸ Jesusca siempremi pensarin carca, Jehová Diosca ñuca imata rurachunda munan nishpa. Shuj ejemplota ricupashun. Ishcai viajetami Jesusca milagrota rurashpa yarjachijuj gentecunaman micunaguta cararca. Shinapash, chai ishcai milagrocunata nara rurashpallatami Jesusca Jehovata mañarca (Mateo 14:17-20; 15:34-37). Cutin shuj punllaca, Jesusmi ashtacata yarjachijurca. Chaimandami Diabloca cai rumicunata tandaman tigrachi nirca. Shinapash  Je susca chai milagrota rurangapaca na munarcachu (Mateo 4:2-4, liingui). ¿Imamandata na munarca? Jesusca alimi paipa Taitataca rijsirca. Chaimandami ali yacharca, paipa beneficiopalla espíritu santota utilizashpa milagrota rurachunga Jehová Dios na munajta. Ashtahuangarin Jehová Dios ayudanata, ciertopacha minishtijuj horaspi micunaguta caranataca Jesusca seguromi carca.

9, 10. Ali decisiongunata agllangapaca ¿imata ayudanga? Shuj ejemplota nipai.

⁹ Jesuspa ejemplota catishpa, Jehová ayudanata confiashpaca ali decisiongunatami agllai ushashun. Bibliapica ninmi: “Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu. Imata rurangapajpash, Diostara yaringui. Paimi, can purina ñangunapipash aliguta pushanga. Ama canllata alipacha yachajushcami cani yanguichu. Ashtahuangarin Mandaj Diosta manllashpa, tucui nalimandapash anchuringui” nishpa (Proverbios 3:5-7). Bibliata estudiashpa Jehová Dios imata pensajta yachajushpami, Jehová Dios munashcata ruranata yachashun. Jehová Dios imashina pensajta ashtahuan ashtahuan yachajushpami pai alicachishca decisiongunataca ashtahuan jahualla agllaita ushashun. Ashtahuangarin, Jehová Dios munashcataca tucui shunguhuanmi rurangapaj munashun (Ezequiel 11:19).

¹⁰ Shuj ejemplota churapashun. Shuj huarmiguca zapatosta randigrijushcanman. Zapatosca aligucuna cashpapash yapa valishcami can. Paipa cusa na chaipi cajpipash, paipa cusa na ashtaca culquita gashtachun munashcataca alimi yachan. ¿Imamandata ali yachan? Ña unaillaguta cazarashca caimandami culquita imashina utilizachun cusa munashcataca ali yachan. Shinallata, ñucanchicunapash Jehová Dios imata pensajta yachajushpa, punda tiempocunapi Jehová imata rurashcata yachashpami ima decisiongunata agllagrijushpapash Jehová Dios imata rurachun munashcata yachashun.

11. Bibliata liijushpa, Bibliata estudiajushpaca ¿imacunapita pensari ushapanchi? (“Bibliata estudiajushpaca cashna nishpa pensaripai” nishca recuadrotapash ricupangui).

¹¹ Jehová Dios imata pensajta yachangapaca Bibliata liinata, Bibliata estudiashpa catinataca nimamanda na cunganachu canchi. Bibliata liijushpa, yachajujushpaca cashna nishpami pensarina canchi: “Cai liishcapica ¿imatata Jehovamandaca yachajuni? ¿Imamandata Jehová Diosca shina rurarca?” nishpa. Ñucanchipash rey Davidshnami Jehovataca cashna nishpa mañana canchi: ‘Mandaj Dioslla, canba ñangunata ricuchihuai. Canba chaqui ñangunapi purinata yachachihuai. Na llullaj canba ñanbi purinata yachachihuai. Canmi, ñucata quishpichij Taita Dios cangui. Candami tucui punllacunapi shuyajuni’ nishpa (Salmo 25:4, 5). Jehovamanda imatapash yachajushpaca pensaripashunchi: “Familiapi, trabajopi, escuelapi, colegiopi o villachinapica ¿imashinata yachajushcataca pactachi ushani?” nishpa. Shina ña pensarishcalla cashpami, Jehová Dios munashcataca ashtahuan jahualla ruraita ushashun.

12. Ñucanchi publicacionguna, tandanajuicunaca ¿imashinata ñucanchitaca ayudan?

¹² Jehová Dios imata pensajta yachangapaca, Jehovapa organización Bibliamanda imata yachachijtapashmi ali uyana canchi. Huaquin ejemplocunata ricupashun. Imapash decisionda agllagrijushpaca Índice de las publicaciones Watch Tower nishcata, Guía de estudio para los testigos de Jehová nishcatapashmi charinchi. Chai publicaciongunami Jehová imata pensajta yachachun ayudanga. Tandanajuicunapash Jehová imata pensajta yachachunmi ayudan. Chaimandami tandanajuicunapi ali uyashpa, comentashpa, imatata yachajuni nishpa pensarishpaca, Jehová Dios alicachishca decisiongunata rurai ushashun. Shina rurajpimi Jehová Diospash bendicianga.

13. Jehová Dios imata pensajta yachanaca ¿imashina ali decisiongunata agllachun ayudanga? Shuj ejemplomanda parlapai.

¹³ Jehová imata pensajta yachashpa, Jehová imata pensashcacunapi ñucanchipash pensarishpaca ali decisiongunatami agllai ushashun. Shuj ejemplota ricupashun. Precursor cangapaj munashcanchiman. Villachingapaj tiempota charingapapash huaquin cambiocunata ña rurashca cashcanchiman. Shinapash tal vez pensarinajushcanchiman ¿ashalla culquihuan, ashalla cosascunahuan causashpaca cushilla causashacha? nishpa. Bibliapica na nijunllu, Jehovata sirvingapaca precursorcunami cana canguichi nishpa. Publicadorcuna cashpapash Jehovataca alimi sirvin. Shinapash Jesusca yachachircami, cangunapa munaicunata huashaman saquishpa Diospa Reinota pundapi churajpica Jehová Diosca bendiciangami nishpa (Lucas 18:29, 30, liingui). Ashtahuangarin Bibliapi yachachishca shinaca, paita alabangapaj esforzarijcunataca alicachishpami Jehová Diosca ricun. Jehová Diosca paita sirvishpa cushilla cachunmi munan (Salmo 119:108; 2 Corintios 9:7). Shinaca chai cosascunamanda Jehovata mañashpa, chai cosascunapi pensarishpaca ñucanchipallata ali cana decisiongunatami agllai ushashun. Chaimi Jehová Diospash bendicianga.

14. Ñucanchi churajushca ropata, arreglarishcata Jehová Dios alicachishpa o nalicachishpa ricujujta yachangapaca ¿imatata rurana capanchi?

¹⁴ Shuj ejemplopipash pensaripashun. Ñucanchi alicachishca ropatalla churajunata gushtashcanchiman. Shinapash chai ropata churajujpi congregacionbi huaquin huauquipanicuna nali sintirijta yachashcanchiman. Ropamanda parlashpaca Bibliapica na shuj ley tianllu. Shinaca ¿imashinata Jehová Dios imata pensajtaca yachashun? Bibliapica cai yuyaimi tian: ‘Huarmicunapash ama munanaita, ama pinganayaita churajuchun. Umatapash na yapata alichirinachu. Orota rurashca imatapash, perlascunatapash, ninan valishca churajunacunatapash, na churajunachu. Ashtahuangarin, Diosta yarishpa causaj huarmicunashnallata causachun ninimi’ nishpa (1 Timoteo 2:9, 10). Cai textopi yuyaicunaca huarmicunapapash jaricunapapash alimi can. Na munanaita churajunachu cangui nishca shimicunata yarishpaca ñucanchi churajushca ropahuan, arreglarishcacunahuanga na pitapash nitijachinachu canchi. Ñucanchi huauquipanicunata juyaimandaca paicunata ama culirachingapaj ama llaquichingapami esforzarina canchi (1 Corintios 10:23, 24; Filipenses 3:17).  Bibliapi imata nijujta, Jehová Dios imata pensajta yarishpaca Jehová alicachishca decisiongunatami agllai ushashun.

15, 16. a) Shuj huarmihuan, shuj jarihuan puñushpa imashina canata pensarijujpica ¿imashinata Jehová Diosca sintirin? b) ¿Imashinata yachai ushanchi ñucanchi agllashca diversiongunata Jehová Dios alicachijta? c) Jatun decisiongunata nara agllashpallata ¿imatata rurana capanchi?

¹⁵ Bibliapi nishca shinaca, ñucanchicuna nalita rurajujpi, nalita pensajujpica Jehová Diosca llaquirinmi (Génesis 6:5, 6, liingui). Huaquingunaca shuj huarmihuan, shuj jarihuan puñushpa imashina canatami alicachishpa pensarinajun. Shinapash Jehová Diosca chai mapa munaicunapi pensarijuchunga na munanllu. Chai mapa yuyaicunapi pensarijushpaca chai juchapillatami urmashun. Chaimandami Jehová Diosca limpio, ali cosascunapi pensarichun munan. Discípulo Santiagoca ninmi, Taita Diospa ‘ali yachaica pundaca ima mapapash illaj canatami yarichimun. Chai jipaca, casilla ali causaita, ali shunguta, juyaita, llaquinata, imatapash aliguta ruranatami yarichimun. Na llulla cashpami, na nij tucushpalla causanata yarichimun’ nishpa (Santiago 3:17). Bibliapi yachachishca shinaca, imapash mapa, nali cosascunataca na alicachishpa pensarijunachu canchi. Jehovapa ñaupajpi ima ali cajta, ima nali cajta ali yachashpaca na maijanbash huauquita tapunajushunllu ¿maijan librocunata, peliculacunata, pugllaicunatata agllana cani? nishpa. Ñucanchillatami ima decisionda agllanataca ali yachashun.

¹⁶ Ashtaca decisiongunataca ñucanchillata ali ricushpa agllajpimi Jehová Diosca ashtacata cushijun. Shinapash, jatun decisiongunata agllana cashpaca shuj ancianota o ashtaca experienciata charij huauquita o panitami consejocunata cushpa ayudahuai nita ushanchi (Tito 2:3-5; Santiago 5:13-15). Consejota cushpapash na ñucanchipa randi decisionda agllanachu can. Bibliapica ninmi: “Tucuicunami, paicuna imata rurashcashnallata japinajunga” nishpa (Gálatas 6:5). Chaimandami Biblia ima nijta aliguta pensarishca jipaca cada uno ricuna canchi, imata ruranata imata na ruranatapash (Hebreos 5:14).

17. Jehová Dios alichishca decisiongunata agllanaca ¿imashinata ñucanchita ayudan?

¹⁷ Bibliapi nishcacunata catishpa ali decisiongunata agllajpimi Jehová Diosca ñucanchiman ashtahuan quimirishpa, ñucanchitaca alicachishpa chasquinga, bendiciangapash (Santiago 4:8). Shinami ñucanchi fepash ashtahuan shinlliyanga. Chaimandami, Jehová Dios imata pensajta yachangapaca Bibliapi imata yachachijtami pensarina canchi. Cutin cutin yachajujushpapash Jehovamanda yachajunaca nunca na tucuringachu (Job 26:14). Shinapash, Jehovata ashtahuan rijsingapaj esforzarishpaca ashtahuan ali yachaita chasquishpami ali decisiongunata agllai ushashun (Proverbios 2:1-5). Gentecunaca siempremi paicunapa ruraicunata, yuyaicunata cambian. Shinapash Jehová Diosca nunca na cambianllu. Bibliapica ninmi, Taita Diosca ‘paipa shungupi yarishcacunataca’ jipacunamanbash rurajungallami nishpa (Salmo 33:11). Imashinami yachajupashcanchi, Jehová Dios imata pensajujta ñucanchipash pensashpa, shinallata pai imata alicachishcata rurashpaca ali decisiongunatami agllashun.