1. Naa bɛnyɛlɔ dimɔtshi diendana la ɛlɛmbɛ wa lo Bible ndo ngande wele mbakitanyiya ekɔ la wahɔ le so?

LO BIBLE, Jehowa akatosha ɛlɛmbɛ wokɛma hwe watotɛ kɛnɛ kalangande dia sho nsala. Ɛnyɛlɔ, nde totɛka dia hatohombe ntɛmɔla dikishi, mbiva, mbidjɔ wanu, kana nsala awui wa mindo wa dieyanelo. (1 Kɔrɛtɔ 6:9, 10) Ndo Yeso, Ɔnaki Jehowa akasha ambeki ande didjango di’ohomba diata ɔnɛ: “Nyotshu ndo nyetɛ anto wa lo wedja tshɛ ambeki, nyaabatize lo lokombo la Papa ndo la Ɔna ndo la nyuma k’ekila, nyowaetshake dia nkitanyiya akambo tshɛ wamomonyodjangɛ. Nyolonge, dimi lekɔ la nyu nshi tshɛ polo l’etena k’ekomelo ka dikongɛ di’akambo.” (Mateo 28:19, 20) Dui tshɛ diatotɛ Jehowa nde la Yeso dia nsala ekɔ lo dikambo dia ɔlɔlɔ aso hita. Ɛlɛmbɛ wa Jehowa tetshaka woho wakokaso ndjakokɛ shoamɛ ndonkumbo yaso ndo tokimanyiyaka dia monga la yoonge ya demba ya dimɛna ndo l’ɔngɛnɔngɛnɔ. Kɛnɛ koleki ohomba ele, etena kakitanyiyaso wadjango waki Jehowa mbidja ndo didjango dia  nsambisha, nde tɔngɛnangɛnaka ndo nde tɔtshɔkɔlaka.

2, 3. a) Lande na kele Bible hatodjɛ ɛlɛmbɛ l’oseka dikambo tshɛ dia lo lɔsɛnɔ? b) Ambola akɔna wayotɔsɛdingola lo sawo nɛ? (Enda osato wele lo mbɔtwɛlɔ.)

² Lo etena kakɔ kaamɛ, Bible hatosha ɛlɛmbɛ lo kɛnɛ kendana la dikambo tshɛ dia lo lɔsɛnɔ. Ɛnyɛlɔ, sho hatotane atɔndɔ wa shikaa wa lo Bible wendana la kɛnɛ kahombaso ndɔta. Dui sɔ kɛnɛmɔlaka woho wele lomba la Jehowa. Kaanga mbele tosambu tendana la ɛlɔtɔ tatetemalaka ntshikitana ndo anto wotodingi l’andja ɔnɛ ndɔtaka toho t’ahɔndɔ totshikitanyi, Bible hetaka loowe pondjo. Ndo nto, tɔ bu l’ɛlɛmbɛ efula wendana l’elimu kana tɔkɛnyɔ tahombaso nsɔna kana kɛnɛ kahombaso nsala shikaa dia ntshikala la yoonge ya dimɛna. Jehowa mbetawɔka di’onto l’onto ndo ɛtɛ wa nkumbo mbɔsa tɛdikɔ lo kɛnɛ kendana l’awui asɔ.

³ Koko etena kalangaso mbɔsa yɛdikɔ y’ohomba yayonga la shɛngiya lo lɔsɛnɔ laso ndo etena kɛnaso dia ndooko ɔlɛmbɛ wa lo Bible wendana la dui sɔ, sho koka ndjambola ɔnɛ: ‘Onde Jehowa mbetawɔka yɛdikɔ yamomɔsa nyɛ? Onde nde ayɔngɛnangɛna la kɛnɛ tshɛ kayomɔsɔna dia nsala edja tshɛ kemi latasekola ɔlɛmbɛ ɔmɔtshi wa lo Bible? Ngande wakokami ndjashikikɛ dia nde ayɔngɛnangɛna ɛsɔnwɛlɔ ami?’

4, 5. Ngande wakoka tɛdikɔ taso monga la shɛngiya le so ndo le anto akina?

⁴ Anto amɔtshi fɔnyaka dia vɔ koka nsala kɛnɛ tshɛ kalangawɔ. Koko sho nangaka nsala kɛnɛ kangɛnyangɛnya Jehowa. Ɔnkɔnɛ la ntondo ka sho mbɔsa yɛdikɔ mɔtshi, sho pombaka kana yimba la kɛnɛ kata Bible, ko oma laasɔ sho nkitanyiya kɛnɛ katatɔ. Ɛnyɛlɔ, Bible totɛka kanyi yaki Nzambi lo kɛnɛ kendana la okambelo wa la dikila, diakɔ diele sho ndjelaka kɛnɛ katatɔ. (Etatelu 9:4; Etsha 15:28, 29) Sho koka nɔmba Jehowa dia nde tokimanyiya dia sho mbɔsaka tɛdikɔ tayowɔngɛnyangɛnya.

⁵ Tɛdikɔ taso mongaka la shɛngiya le so. Yɛdikɔ ya dimɛna koka tokimanyiya dia sho ndeka ndjasukanya la Jehowa. Yɛdikɔ ya kɔlɔ koka ndanya lɔngɛnyi lasaso la nde. Tɛdikɔ taso koka nto monga la shɛngiya le anto akina. Sho hatolange nsala ndooko dui diakoka momadja anangɛso kana nkɔmɔla mbetawɔ kawɔ. Sho hatolange nto ntondja ekakatanu lam’asa anangɛso wa l’etshumanelo. Diakɔ diele ekɔ ohomba sho mbɔsaka tɛdikɔ t’amɛna.​—Adia Rɔmɔ 14:19; Ngalatiya 6:7.

6. Kakɔna kahomba nɔmbɔlaka tɛdikɔ taso?

⁶ Etena kele Bible hatotɛ l’eshikikelo tshɛ kɛnɛ kahombaso nsala, ngande wakokaso mbɔsa tɛdikɔ t’amɛna? Lo dihole dia sho salaka paka kɛnɛ kalangaso, sho pombaka nkana yimba la yambalo tshɛ lo dikambo diaso ndo mbɔsa yɛdikɔ yayɔngɛnyangɛnya Jehowa. Oma laasɔ, sho koka monga l’eshikikelo ɔnɛ nde ayotokimanyiya dia sho nkondja etombelo w’amɛna.​—Adia Osambu 37:5.

7. Etena kele ndooko ɔlɛmbɛ wa lo Bible, ngande wakokaso mbeya kɛnɛ kalanga Jehowa dia sho nsala lo dikambo dimɔtshi?

⁷ Ko ngande wahombaso mbeya kɛnɛ kayɔngɛnyangɛnya Jehowa? Ɛfɛsɔ 5:17 totɛka ɔnɛ: “Nyotetemale nyanga dia nshihodia kɛnɛ kele lolango la Jehowa.” Etena kele ndooko ɔlɛmbɛ shikaa lo Bible, sho pombaka mbeya kana nshihodia kɛnɛ kalanga Jehowa  dia sho nsala lo dikambo diambotokomɛ. Ngande wakokaso nsala dui sɔ? Sho pombaka mbɔɔlɔmba ndo ntshika dia nyuma kande k’ekila tɔlɔmbɔla.

8. Ngande wakashihodiaka Yeso kɛnɛ kakalangaka Jehowa dia nde nsala? Sha ɛnyɛlɔ kɛmɔtshi.

⁸ Yeso akashihodiaka ntena tshɛ kɛnɛ kakalangaka Jehowa dia nde nsala. Ɛnyɛlɔ, mbala hiende yaki olui w’anto la ndjala, Yeso akalɔmbɛ ndo oma laasɔ nde akaalesha lo nsala dihindo dimɔtshi. (Mateo 14:17-20; 15:34-37) Koko etena kakinde la ndjala l’oswe wa shɛnga ndo kakalange Diabolo dia nde nkadimola ave mapa, Yeso kombetawɔ. (Adia Mateo 4:2-4.) Yeso akeyaka She dimɛna efula, ɔnkɔnɛ nde akeyaka dia Jehowa konanga dia nde nkamba la nyuma kande k’ekila dikambo di’ehomba ande hita. Nde aki l’eshikikelo ɔnɛ She ayowɔlɔmbɔla ndo ayowosha diangɔ dia ndɛ etena kayondonga la diɔ ohomba.

9, 10. Kakɔna kayotokimanyiya dia sho mbɔsa tɛdikɔ ta lomba? Sha ɛnyɛlɔ.

⁹ L’ɛnyɛlɔ ka Yeso, sho koka mbɔsa tɛdikɔ t’amɛna naka sho ndjaɛkɛ le Jehowa dia nde tɔlɔmbɔla. Bible mbutaka ɔnɛ: ‘Yaɛkɛ le Jehowa la otema ayɛ tshɛ, tɛkamake yimba yayɛ hita. Lo mboka yayɛ tshɛ kowodjake yimba, ko nde ayokosembolɛ ɛsɛsɛ ayɛ. Toyalake kanga lomba lo washo ayɛ hita. Oka Jehowa wɔma ndo kadimɔ oma lo kɔlɔ.’ (Tukedi 3:5-7) Naka sho mbeka Bibe ndo awui wendana la woho wankanyiya Jehowa, kete tayoshihodia kɛnɛ kalangande dia sho nsala lo dikambo dimɔtshi shikaa. Ndo lo yɛdikɔ yatataleke mbeka akambo wendana la woho wakanyiya Jehowa, mbayondoleka monga wɔdu le so dia sho mbɔsa tɛdikɔ tayowɔngɛnyangɛnya. Lo nsala ngasɔ, tayonyomoleka monga ‘l’otema wakɛta dia ndjela ɛlɔmbwɛlɔ ka Nzambi.’​—Ezekiyele 11:19.

¹⁰ Ohɔsa dia womoto ɔmɔtshi lotshukami ekɔ lo tasombe diangɔ ko nde ambɛna lokolo lɔmɔtshi la losabata la dimɛna efula. Koko lɔ lekɔ oshinga wolo. Kaanga mbele omɛnde bu kaamɛ la nde, nde mbeyaka kɛnɛ kayokanyiya omɛnde naka nde nshisha falanga y’efula shɔ. Ngande weyande dui sɔ? Nde ambotshukana la nde lo tshanda mɔtshi, ndo nde mbeyaka yoho yalanga omɛnde dia vɔ nkamba la falanga yakondjawɔ. Woho akɔ waamɛ mbele, naka sho mbeya woho wakanyiya Jehowa ndo woho wakandasalaka akambo lo nshi yakete, kete tayeya kɛnɛ kalangande dia sho nsala la ntondo k’akambo wotshikitanyi.

11. Ambola akɔna wakokaso ndjaoka etena kasalaso wadielo kana wekelo wa Bible w’onto ndaamɛ? (Enda kiombo yele l’ɔtɛ a dui ɔnɛ: “ Etena kekayɛ Bible, yambola wate.”)

¹¹ Ngande wakokaso mbeya kɛnɛ kakanyiya Jehowa? Dui dioleki ohomba diakokaso nsala ele, mbadiaka ndo mbekaka Bible mbala la mbala. Etena keso lo nsala dui sɔ, sho koka ndjambola ɔnɛ: ‘Dui nɛ ambetshadiɔ lo kɛnɛ kendana la Jehowa? Lande na kakandasale akambo lo yoho shɔ?’ Ndo l’ɛnyɛlɔ ka Davidɛ, sho pombaka nɔmba  Jehowa dia nde tokimanyiya dia sho mbeeya dimɛna. Davidɛ akafunde ate: ‘Jehowa le, ombetsha mboka yayɛ; ombetsha ɛsɛsɛ ayɛ. Ɔnkɛndjakɛndja lo mɛtɛ kayɛ ndo ombetsha, nɛ dia wɛ kele Nzambi kami ka panda. Le yɛ kalongamɛmi lushi l’otondo.’ (Osambu 25:4, 5) Etena kekaso dui dimɔtshi diendana la Jehowa, sho kokaka nkana yimba l’akambo wakokaso nkamba la dui diakɔ. Onde sho koka nkamba la diɔ lo nkumbo, l’olimu, la kalasa, kana l’esambishelo? Naka sho nkana yimba lo dui dimɔtshi shikaa, kete ayonga dui dia wɔdu efula le so dia mbeya woho wayolanga Jehowa sho nkamba la dui diakɔ.

12. Ngande wakoka ekanda aso ndo nsanganya tokimanyiya dia sho mbeya kanyi ya Jehowa lo akambo wotshikitanyi?

¹² Yoho kina yakokaso mbeya woho wakanyiya Jehowa ele lo mbidja yimba lo kɛnɛ katetsha okongamelo ande oma lo Bible. Ɛnyɛlɔ, etena kalangaso mbɔsa yɛdikɔ mɔtshi, Index des publications des Témoins de Jéhovah ndo Dibuku di’eyangelo di’Ɛmɛnyi wa Jehowa koka tokimanyiya dia mbeya kɛnɛ kakanyiya Jehowa. Sho koka nto nkondja wahɔ oma lo nsanganya y’Akristo etena kayihokamɛso la yambalo tshɛ, kashaso kɔmatɛrɛ ndo etena kakanaso yimba la kɛnɛ ketshamaso. Dui sɔ diayotokimanyiya dia  sho mbeka dia nkanyiya woho wakanyiya Jehowa. Etombelo wayonga la dui sɔ ele, tayonga l’akoka wa mbɔsa tɛdikɔ tayowɔngɛnyangɛnya ndo nde ayotɔtshɔkɔla.

13. Sha ɛnyɛlɔ kɛmɔtshi kɛnya woho wakokaso mbɔsa yɛdikɔ ya lomba etena kasɛdingolaso kanyi ya Jehowa.

¹³ Nyɛsɔ tɔsɛdingole ɛnyɛlɔ kɛmɔtshi ka woho wakokaso mbɔsa yɛdikɔ mɔtshi ya lomba etena kasɛdingolaso kɛnɛ kakanyiya Jehowa. Ondo wɛ nangaka nkoma ombatshi mboka. Wɛ akasale etshikitanu ɛmɔtshi lo lɔsɛnɔ layɛ dia wɛ nyomoleka mbetshaka wenya efula l’esambishelo. Koko wɛ bu l’eshikikelo kaanga yema ɔnɛ wɛ ayonga l’ɔngɛnɔngɛnɔ la yema ya dikuta tshitshɛ yakondjayɛ ndo yema ya diangɔ tshitshɛ diele layɛ. Lo mɛtɛ, Bible hate dia paka sho kongi ombatshi mboka ko sho kambɛ Jehowa. Sho koka ntetemala mbokambɛ la kɔlamelo oko apandjudi. Koko lo wedi okina, Yeso akate dia Jehowa tshɔkɔlaka wanɛ wakayahondja dikambo dia wahɔ wa Diolelo. (Adia Luka 18:29, 30.) Bible mbutaka nto dia Jehowa ngɛnangɛnaka etena kasalaso kɛnɛ tshɛ kakokaso nsala dia mbotombola ndo nde nangaka dia sho monga l’ɔngɛnɔngɛnɔ etena kokambɛso. (Osambu 119:108; 2 Kɔrɛtɔ 9:7) Lo nɔmbaka dia awui asɔ ndo lo kanaka la wɔ yimba, sho koka mbɔsa yɛdikɔ y’oshika l’akambo asɔ ndo Jehowa ayotɔtshɔkɔla.

14. Ngande wakokaso nshikikɛ dia kana yoho y’ɔlɔtɔ mɔtshi ngɛnyangɛnyaka Jehowa?

¹⁴ Tɔshi ɛnyɛlɔ kekina: Wɛ nangaka yoho mɔtshi y’ahɔndɔ, koko wɛ mbeyaka di’anto amɔtshi wa l’etshumanelo mbeyaka momala naka wɛ ndɔta ahɔndɔ asɔ. Bible hate oseka dui tshɛ diendana la toho tɔmɔtshi t’ɔlɔtɔ shikaa. Ko ngande wakokayɛ mbeya woho wakanyiya Jehowa? Bible totɛka ɔnɛ: “Woho akɔ waamɛ mbele dimi kombolaka dia wamato ndjalɛnga la ɔlɔtɔ wa kɔmba, wele la wɛdimo ndo la yimba y’ɔlɔlɔ, aha la tosambo ta laande ta mbɛla divo, la paonyi kana la adidi kana la ahɔndɔ w’oshinga wolo efula, koko lo yoho yɔtɔnɛ la wamato wata dia wekɔ lo mamema Nzambi, mbuta ate oma lo etsha w’ɛlɔlɔ.” (1 Timɔte 2:9, 10) Lo mɛtɛ, ekambi waki Jehowa tshɛ mbidja ndo apami kokaka nkondja wahɔ oma l’ɛtɛkɛta ɛsɔ. Etena keso la wɛdimo, sho mbidjaka yimba lo woho wakoka anto akina ndjaoka lo kɛnɛ kendana l’ahɔndɔ wasɔnaso dia ndɔta. Ndo lam’ele sho mbokaka anangɛso ngandji, sho mbewɔka dia mbaomadja kana mbakiyanya. (1 Kɔrɛtɔ 10:23, 24; Filipɛ 3:17) Naka sho nsɛdingola kɛnɛ kata Bible ndo woho wakanyiya Jehowa, kete sho koka mbɔsa tɛdikɔ tayowɔngɛnyangɛnya.

15, 16. a) Ngande wayaoka Jehowa etena katetemalaso nkanyiya awui wa mindo wa dieyanelo? b) Etena kasɔnaso kɛnyɔ mɔtshi, ngande wakokaso mbeya kɛnɛ kangɛnyangɛnya Jehowa? c) Ngande wahombaso mbɔsaka tɛdikɔ ta weke?

¹⁵ Oma lo Bible, sho mbekaka dia Jehowa mongaka la lonyangu efula etena kasala anto awui wa kɔlɔ ndo etena kakanyiyawɔ dia nsala akambo wa kɔlɔ. (Adia Etatelu 6:5, 6.) Mbokɛmaka hwe dia Jehowa halange dia sho kanyiyaka lo kɛnɛ kendana l’awui wa mindo wa dieyanelo. Lo mɛtɛ, naka sho ntetemala kanyiyaka awui asɔ, sho mbeyaka ndjokoma dia mbasala. Koko, Jehowa nangaka dia sho kanyiyaka awui wele pudipudi ndo w’amɛna. Ombeki Jakɔba akafunde dia lomba la Jehowa “lekɔ ntondotondo  pudipudi, oma laasɔ lɔ lekɔ wɔladi, ekanelo k’ɔlɔlɔ, suke dia nkitanyiya, lɔ ndola tɔɔ la kɛtshi ndo la elowa w’ɛlɔlɔ, lɔ keema la shɔnɔdi ndo keema la dungi pende.” (Jakɔba 3:17) Ɔnkɔnɛ Bible tetshaka ɔnɛ sho pombaka mbewɔ oseka kɛnyɔ tshɛ yakoka ndjotokonya dia nkanyiya kana nkombola awui wa mindo ndo wa kɔlɔ. Ndo naka sho nshihodia dimɛna kɛnɛ kalanga Jehowa ndo kahetshande, kete ayonga dui dia wɔdu le so dia sho mbeya ɛnyɛlɔ oko abuku, wa filmɛ kana tɔkɛnyɔ takokaso nsɔna. Hatotonga l’ohomba wa mimbola anto akina kɛnɛ kahombaso nsala.

¹⁶ Etena kalangaso mbɔsa yɛdikɔ mɔtshi, mbala efula sho mongaka l’ɛsɔnwɛlɔ efula wakokaso nsɔna wayɔngɛnyangɛnya Jehowa. Koko, etena kalangaso mbɔsa yɛdikɔ mɔtshi y’ohomba efula, koka monga ohomba dia mimbola ekumanyi kɛmɔtshi ka l’etshumanelo kana ɔnangɛso ɔmɔtshi lambohokɔ akambo kana kadiyɛso dia tosha alako amɔtshi. (Tito 2:3-5; Jakɔba 5:13-15) Lo mɛtɛ, hatohombe nɔmba onto akɔ dia nde tɔsɛ yɛdikɔ. Koko, sho pombaka nkana yimba dimɛna efula lo kɛnɛ keyaso oma lo Bible ko oma laasɔ sho mbɔsa yɛdikɔ yaso hita. (Hɛbɛru 5:14) Ɔpɔstɔlɔ Pɔɔlɔ akate ate: ‘Onto l’onto ayɛmba wotsho ande hita.’—Ngalatiya 6:5, nɔtɛ ka l’ɛse ka dikatshi.

17. Wahɔ akɔna wakondjaso lo mbɔsa tɛdikɔ tangɛnyangɛnya Jehowa?

¹⁷ Etena kɔsaso tɛdikɔ tangɛnyangɛnya Jehowa, sho ndekaka ndjasukanya la nde, sho mbetawɔmaka ndo tshɔkɔmaka oma le nde. (Jakɔba 4:8) Oma laasɔ mbetawɔ kaso otsha le Jehowa keketalaka. Ɔnkɔnɛ, nyɛsɔ tokanake yimba lo kɛnɛ kadiaso oma lo Bible l’oyango wa sho nshihodia woho wele tokanyi tande. Lo mɛtɛ, tayongaka mbala tshɛ la dui dimɔtshi di’oyoyo dia mbeka lo kɛnɛ kendana la Jehowa. (Jobo 26:14) Koko naka sho nsala la wolo dia mbeka awui wendana la nde oma ko kakianɛ, kete tayonga akanga wa tomba ndo tayonga l’akoka wa mbɔsaka tɛdikɔ t’amɛna. (Tukedi 2:1-5) Tokanyi ndo asangwelo w’anto tshikitanaka, koko ta Jehowa hatotshikitanaka pondjo. Omembi w’esambo akate ate: ‘Tɛdikɔ ta Jehowa tayotshikalaka pondjo, tokanyi ta l’otema ande tshikalaka lo lɔlɔnga la lɔlɔnga.’ (Osambu 33:11) Mbokɛmaka hwe dia sho koka mbɔsa tɛdikɔ toleki amɛna tshɛ etena kekaso woho wakanyiya Jehowa ko oma laasɔ sho nsala kɛnɛ kɔngɛnyangɛnya.