1-3. (1) ?Wanem sam slak fasin we yumi mas traehad blong jenisim afta we yumi baptaes? (2) ?Wanem ol kwestin we maet yumi save tingbaot taem i had blong yumi mekem ol jenis? (Yu luk pija long stat blong stadi.)

YU TRAEM tingbaot Kevin. Bifo we hem i kam long trutok, hem i mekem plante nogud fasin. Hem i stap dring bitim mak, i smok, i stap tekem drag mo tu, hem i stap plei kad blong winim plante mane. Hem i mekem olsem, blong plante yia. ^[1] (Yu luk ol not, pej 26.) Biaen hem i lanem ol fasin blong Jehova, mo hem i wantem kam fren blong Jehova. Be blong mekem olsem, hem i mas mekem sam bigfala jenis long laef blong hem. Jehova nao i givhan long hem blong mekem ol jenis ya, mo Baebol tu i givhan long hem.—Hibrus 4:12.

² Afta we Kevin i baptaes, hem i gohed yet blong jenisim  ol fasin blong hem, blong hem i save kam wan gudfala man blong God. (Efesas 4:31, 32) Eksampol, hem i gat fasin ya blong kros kwik. Be hem i faenem i had blong blokem fasin ya. Kevin i talem se, i had moa blong lego fasin ya, i bitim we hem i lego ol nogud fasin we hem i mekem bifo we hem i baptaes. Be hem i naf blong mekem ol jenis ya, from we hem i askem Jehova blong i givhan long hem, mo tu from we hem i stadi gud long Baebol.

³ Plante long yumi oli mekem ol bigfala jenis long laef blong olgeta, bifo we oli baptaes. Hemia blong mekem se laef blong olgeta i laenap wetem ol rul blong Baebol. Be naioa, maet yumi luksave se i gat sam fasin we yumi mas gohed blong jenisim, blong yumi save folemgud fasin blong Jehova mo Jisas. (Efesas 5:1, 2; 1 Pita 2:21) Eksampol, maet yumi luksave se yumi stap komplen oltaem, no maet yumi stap tokbaot ol narafala mo yumi talem sam tok we oli no stret. Mo tu, maet yumi fraet se ol narafala bambae oli tokbaot yumi, se yumi no stap mekem ol samting we i stret. Maet yumi traehad plante yia finis blong jenisim fasin blong yumi, be yumi stap gohed yet blong mekem ol sem mastik nomo. Taswe, maet yumi save gat tingting se: ‘?From wanem i had tumas blong mi jenisim ol fasin blong mi? ?Mi mas mekem wanem blong folem ol advaes blong Baebol, blong mi save gohed blong jenisim ol fasin blong mi?’

4. ?From wanem yumi no save mekem Jehova i glad long evri samting we yumi mekem?

⁴ Yumi lavem Jehova, mo yumi wantem tumas blong mekem hem i glad. Be sore tumas, yumi no save mekem Jehova i glad long evri samting we yumi mekem, from we yumi sinman. Oltaem yumi harem olsem aposol Pol we i talem se: “Mi wantem mekem ol gudgudfala fasin, be mi no naf blong mekem.”—Rom 7:18; Jemes 3:2.

5. ?Wanem ol nogud fasin we yumi mas lego bifo we yumi baptaes? ?Wanem samting i save mekem se yumi harem nogud yet?

⁵ Yumi mas lego ol nogud fasin we Jehova i no laekem, bifo we yumi baptaes. (1 Korin 6:9, 10) Be yumi sinman yet. (Kolosi 3:9, 10) Taswe, yumi save mekem mastik, nating se yumi baptaes plante yia finis. Samtaem, yumi save gat ol rong tingting mo filing, no maet yumi harem se i had blong yumi bos long ol slak fasin blong yumi. Maet, yumi mas traehad plante yia blong winim ol slak fasin ya.

6, 7. (1) ?Wanem i mekem se yumi save fren gud wetem Jehova, nating se yumi sinman? (2) ?From wanem yumi no mas fraet blong askem Jehova blong i fogivim yumi?

⁶ Yumi evriwan i sinman, be yumi save gohed yet blong fren gud wetem Jehova mo mekem wok blong hem. Oltaem, yu mas tingbaot faswan taem we yu stat blong fren gud wetem Jehova. Hem i luk hat blong yu mo i wantem se yu save hem. (Jon 6:44) Mo tu, hem i save se yu gat ol slak fasin mo yu save mekem mastik. Be Jehova i wantem yet se yu fren blong hem.

⁷ Jehova i lavem yumi tumas mo i givim wan sas presen long yumi. Hem i sanem Pikinini blong hem i kam long wol, blong i ded olsem wan ransom sakrefaes blong pemaot sin blong yumi. (Jon 3:16) Taem yumi mekem wan mastik, yumi save askem long Jehova blong i fogivim yumi. Sakrefaes blong Jisas i mekem yumi sua se, Jehova bambae i fogivim yumi mo bambae yumi gohed blong fren gud wetem hem. (Rom 7:24, 25; 1 Jon 2:1, 2) Yumi mas tingbaot se Jisas i ded from ol man we oli tanem tingting blong olgeta from sin blong olgeta. Taswe, sipos yumi harem se yumi mekem i no stret, yumi mas gohed blong prea  long Jehova mo askem hem blong i fogivim yumi. Sipos yumi no askem long Jehova blong fogivim yumi, i olsem we yumi no wantem wasem han blong yumi taem i doti. Yumi glad tumas se Jehova i openem rod blong yumi save fren gud wetem hem, nating se yumi sinman.—Ridim 1 Timoti 1:15.

8. ?From wanem yumi mas traehad blong winim ol slak fasin blong yumi?

⁸ I tru, yumi evriwan i gat ol slak fasin blong yumi, be yumi mas traehad blong wokem ol gudfala fasin. Jehova i talemaot ol fasin we hem i wantem se ol fren blong hem oli mas gat. (Ol Sam 15:1-5) Taswe, sipos yumi wantem fren gud wetem Jehova, yumi mas traehad blong folem ol fasin blong hem mo Jisas. Mo tu, yumi mas traehad blong bos long ol nogud samting we yumi wantem, nao bambae yumi naf blong winim sam long olgeta. Nating se yumi baptaes longtaem finis, no yumi jes baptaes nomo, i gud yumi gohed blong wokem ol gudfala fasin.—2 Korin 13:11.

9. ?Olsem wanem yumi save se ol jenis we yumi mekem blong kam wan niufala man, i wan samting we i gohed oltaem?

⁹ Aposol Pol i talem long ol Kristin se: ‘Yufala i mas finis long olfala laef ya blong yufala bifo, we yufala i stap folem ol fasin blong yufala nomo. Olfala laef ya i stap mekem yufala i wantem tumas ol samting we oli blong giaman nomo, mo we oli stap spolem yufala nomo. Laef blong yufala mo tingting blong yufala i mas gohed blong kam niuwan olgeta, nao bambae yufala i kam niufala man, we God i mekem yufala i kam olsem hem. Nao bambae ol man oli luksave se laef blong yufala i folem trutok blong hem, mo i stret gud, i tabu, i blong hem nomo.’ (Efesas 4:22-24) Hemia i min se yumi mas gohed blong jenisim ol fasin blong yumi, blong “kam niufala man.” Taswe, sipos yumi mekem wok blong Jehova longtaem finis, no yumi jes stat nomo, be yumi save gohed blong lanem ol gudfala fasin blong hem. Baebol nao i save givhan long yumi blong gohed blong wokem ol fasin olsem blong Jehova.

10. ?Yumi mas mekem wanem blong letem Baebol i gohed blong jenisim laef blong yumi? ?Wanem ol kwestin we yumi save gat?

¹⁰ Yumi evriwan i wantem folem ol samting we Baebol i talem. Be blong mekem olsem, yumi mas traehad blong mekem ol jenis long laef blong yumi. ?From wanem yumi mas traehad olsem? ?From wanem Jehova i no mekem se i isi nomo blong yumi wokem ol gudfala fasin?

11-13. ?From wanem Jehova i no mekem se i isi blong yumi winim ol slak fasin blong yumi?

¹¹ Taem yumi tingbaot wol blong yumi, mo ol narafala samting antap long skae, yumi luksave se Jehova i gat paoa blong mekem eni samting we hem i wantem. Eksampol, Jehova i wokem san, mo paoa blong san i strong tumas. Evri seken, san i stap givimaot plante laet we paoa blong hem i strong. Be wol blong yumi i nidim smol laet blong san, blong mekem se i gat laef. (Ol Sam 74:16; Aesea 40:26) Mo tu, Jehova i stap givim paoa long ol man  blong hem, blong mekem oli strong bakegen. (Aesea 40:29) Sipos Jehova i wantem, hem i save mekem i isi blong yumi winim ol slak fasin blong yumi, mo blokem ol nogud tingting we yumi save gat. ?Be from wanem Jehova i no mekem olsem?

¹² Jehova i letem yumi blong jusum samting we yumi wantem. Hem i letem blong yumi jusum, sipos yumi wantem obei long hem no nogat. Taem yumi jusum blong obei long hem mo mekem wok blong hem, yumi soemaot se yumi lavem hem mo yumi wantem mekem hem i glad. Setan i talem se Jehova i no gat raet blong rulum ol man. Be taem yumi obei long Jehova, yumi soemaot se yumi wantem hem i Rulum yumi. Mo yumi save se Jehova i tinghae long evri samting we yumi mekem, blong obei long hem. (Job 2:3-5; Ol Proveb 27:11) I no isi blong yumi winim ol slak fasin blong yumi, be taem yumi traehad blong mekem samting we i stret, yumi soemaot se yumi lavem Jehova mo yumi wantem se hem nomo i Rulum yumi.

¹³ Jehova i wantem se yumi traehad blong folem ol fasin blong hem. (Kolosi 3:12; ridim 2 Pita 1:5-7.) Mo hem i wantem se yumi traehad blong bos long ol tingting mo ol filing blong yumi. (Rom 8:5; 12:9) Taem yumi traehad blong mekem ol jenis ya long laef blong yumi, bambae yumi harem gud tumas.

14, 15. ?Yumi save mekem wanem blong wokem ol gudfala fasin we Jehova i laekem? (Luk bokis ya, “Baebol mo Prea i Jenisim Laef Blong Olgeta.”)

¹⁴ ?Yumi mas mekem wanem blong wokem ol fasin we Jehova i wantem? Yumi mas letem Jehova i lidim yumi, i bitim we yumi jusum wanem fasin we yumi wantem jenisim. Rom 12:2 i talem se: “Yufala i no mas letem fasin  blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” Taswe, blong faenemaot ol tingting blong Jehova, yumi mas dipen long ol samting we hem i givim blong givhan long yumi. Yumi mas ridim Baebol evri dei, yumi tingting dip long hem, mo yumi prea long Jehova blong hem i givim tabu spirit blong hem long yumi. (Luk 11:13; Galesia 5:22, 23) Long rod ya, Jehova bambae i givhan long yumi blong kasemsave ol samting we hem i wantem yumi blong mekem, mo hemia i givhan long yumi blong save ol tingting blong Jehova. From samting ya, Jehova bambae i glad long samting we yumi mekem, yumi talem, mo yumi tingbaot. Mo bambae yumi lanem blong bos long ol slak fasin blong yumi. Be, i gud we yumi gohed blong faet agensem ol slak fasin blong yumi.—Ol Proveb 4:23.

¹⁵ Mo tu, yumi mas ridim ol buk blong yumi we oli tokbaot Baebol olsem, Wajtaoa mo Wekap! Plante haf insaed long ol magasin ya, oli tijim yumi blong folem ol fasin blong Jehova mo faet agensem ol slak fasin blong yumi. Maet yumi faenem sam atikol no sam vas blong Baebol, we oli save givhan long yumi. Yumi save raetem daon ol vas we yumi faenem, mo ol atikol we yumi ridim finis, blong yumi save ridim olgeta bakegen.

16. ?From wanem tingting blong yu i no mas foldaon, sipos yu no kwik blong mekem plante jenis long laef blong yu?

 ¹⁶ I no isi blong folem ol fasin blong Jehova. Taswe, yu mas gat longfala tingting sipos yu harem se yu no mekem plante jenis long laef blong yu, olsem we yu wantem. Fastaem, maet yu harem se i had blong folem ol rul blong Baebol. Be taem yu traehad blong mekem ol fasin we Jehova i wantem, bambae i isi moa blong yu save ol tingting blong Jehova mo mekem ol samting we oli stret.—Ol Sam 37:31; Ol Proveb 23:12; Galesia 5:16, 17.

17. ?Sipos yumi obei oltaem long Jehova, bambae yumi kasem wanem blesing long fiuja?

¹⁷ Yumi wantem tumas blong stap long niufala wol, mo mekem wok blong Jehova blong olwe. Long taem ya, bambae yumi no moa gat ol slak fasin, mo bambae i isi blong yumi folem ol fasin blong Jehova. Be tede yumi save wosipim Jehova, from presen we hem i givim long yumi, hemia ransom sakrefaes blong Jisas. Nating se yumi sinman, yumi save traehad blong jenisim ol fasin blong yumi blong folem ol tijing blong Jehova long Baebol.

18, 19. ?Olsem wanem yumi save se Baebol i gat paoa blong jenisim laef blong yumi?

¹⁸ Kevin i traehad long evri rod, blong hem i save lego fasin ya blong kros kwik. Hem i tingting dip long ol tok we hem i ridim long Baebol mo hem i traehad blong jenisim fasin blong hem. Mo tu, hem i folem advaes we ol brata mo sista oli givim long hem. Kevin i traehad plante yia blong jenisim fasin blong hem, biaen hem i kam wan man blong givhan. Mo long ol 20 yia we oli pas, Kevin i mekem wok olsem wan elda. Nating se i olsem, hem i save se hem i mas gohed yet blong faet agensem ol slak fasin blong hem.

¹⁹ Stori blong Kevin i soemaot se, yumi save gohed blong jenisim ol fasin blong yumi. Taem yumi mekem olsem, yumi kam klosap moa long Jehova. (Ol Sam 25:14) Jehova bambae i givhan long yumi, taem yumi traehad blong mekem ol samting we i leftemap nem blong hem. Mo yumi sua se taem yumi folem ol advaes blong Baebol, hemia i save givhan long yumi blong jenisim ol fasin blong yumi.—Ol Sam 34:8.