1-3. (a) Kenca iperidiken, kai piga-piga kelemahen si banci saja mesera siakap mperobahisa? (b) Paksa mesera siakap erbahan perubahen, penungkunen kai si banci saja turah? (Nehen gambar pemena artikel.)

ERTAHUN-TAHUN dekahna, Kevin erjudi, ngisap, mabuk, janah make narkoba. ^[1] (Nehen penjelasen tambahen.) Kenca si e, ia erlajar kerna Jahwe janah atena jadi teman Dibata. Tapi guna ngelakoken si e, arus ibahanna perubahan si mbelin i bas geluhna. Alu penampat Jahwe ras Pustaka si Badia, ia ngasup erbahan perubahen.​—Heber 4:12.

² Kenca Kevin iperidiken, arus denga iperubahina sifat-sifatna gelah ia banci jadi kalak Kristen si lebih mehuli. (Epesus 4:31, 32) Contohna, mbarenda ia mesukah merawa. La isangkana maka mesera kal ngendaliken emosina. Ikataken Kevin maka seran ngendaliken emosina e asangken mpengadi kebiasan si la mehuli si ilakokenna sope ia iperidiken! Tapi, dungna banci ia berhasil erkiteken mindo penampat Jahwe janah rusur erlajar Pustaka si Badia.

 ³ Sope iperidiken, melala i bas kita si arus erbahan perubahen si mbelin gelah banci nggeluh sentudu ras nasehat Pustaka si Badia. Tapi gundari pe, sisedari maka lit denga kelemahen si perlu siperobahi gelah banci siusih Dibata ras Kristus. (Epesus 5:1, 2; 1 Petrus 2:21) Misalna, banci saja megati denga kita jungut-jungut ntah pe cekurak janah ngataken kai si la mehuli kerna kalak si deban. Entah, banci saja la silakoken kai si mehuli erkiteken mbiar nandangi pandangen ntah pe pendapat kalak. Mungkin nggo ertahun-tahun kita erusaha guna mperobahisa tapi tetap denga kita la berhasil. Emaka banci kita tersungkun-sungkun, ’Engkai maka mesera kal nadingken kelemahen e? Uga carana aku banci terus mperobahi diringku alu penampat Pustaka si Badia?’

4. Engkai maka maun-maun banci sibahan Jahwe kecewa?

⁴ Erkiteken keleng ateta Jahwe, sisenangken ateta Ia alu bulat ukur. Tapi sayangna, maun-maun banci sibahan Ia kecewa erkiteken kita la sempurna. Rusur sigejapken kai si igejapken rasul Paulus, nina, ”Aminna lit gia sura-surangku erbahan si mehuli, si kudalanken labo bage.”​—Roma 7:18; Jakup 3:2.

5. (a) Perubahen kai si nggo sibahan sope kita iperidiken? (b) Kelemahen kai si arus denga silawan?

⁵ Sope lenga jadi anggota runggun, arus sipengadi perbahanen si segat ate Jahwe. (1 Korinti 6:9, 10) Tapi tetap denga kita la sempurna. (Kolose 3:9, 10) Emaka terus denga sibahan kesalahen amin gia nggo ertahun-tahun kita iperidiken. Banci saja lit denga perasan ras sura-sura si salah, ntah pe banci saja mesera siakap ngendaliken sifatta si la mehuli. Situhuna, banci saja arus silawan kelemahen si seri ertahun-tahun dekahna.

6, 7. (a) Engkai maka kita banci jadi teman Jahwe amin gia kita la sempurna? (b) Engkai maka kita la perlu sangsi mindo pengalemen Jahwe?

⁶ Amin gia la sempurna, banci kita tetap jadi teman Jahwe ras ngelayani Ia. Ingetlah rusur uga tangtangna kam jadi teman Jahwe. Ia me si ngidah kiniulin i bas dirindu, janah ateNa itandaindu Ia. (Johanes 6:44) IetehNa ka maka lit kelemahenndu janah kam pe pasti erbahan kesalahen. Tapi tetap denga ate Jahwe kam jadi temanNa.

⁷ Keleng kal ate Jahwe kita emaka iberekenNa sada pemere si meherga. IutusNa AnakNa, Jesus, guna nebus dosa-dosanta. (Johanes 3:16) Adi kita erbahan salah, banci sipindo pengalemen Jahwe. Janah erkiteken tebusen, banci kita tek maka ialemiNa kita janah kita pe tetap jadi temanNa. (Roma 7:24, 25; 1 Johanes 2:1, 2) Ingetlah, Jesus mate guna kalak si erdosa si ertobat. Emaka amin gia jahat kal siakap perbahanenta, ula pernah kita ngadi ertoto mindo gelah Jahwe ngalemi kita. Adi la kita nggit mindo pengalemenNa, enda bali bagi la kita nggit mburihi tanta si melket. Ngataken bujur kal kita erkiteken kita tetap banci erteman ras Jahwe amin gia kita la sempurna.​—Oge 1 Timotius 1:15.

8. Engkai maka la banci sianggap sepele kelemahenta?

⁸ Tentu saja, la banci sianggap sepele kelemahenta ntah pe terus erbahan alasen kerna si e. Enggo ipebetehken Jahwe man banta jelma si uga kin si ateNa jadi temanNa. (Masmur 15:1-5) Emaka adi reh rembakna ateta ras Ia, arus terus siusahaken  ngusih Ia ras AnakNa. Arus ka siusahaken ngendaliken sura-suranta si salah janah ngambekkenca. La soal nggo asa kai dekahna kita iperidiken, arus terus sipesikap sifat-sifatta.​—2 Korinti 13:11.

9. Janari banci sieteh maka banci terus sipesikap sifat-sifatta?

⁹ Ipebetehken rasul Paulus man kalak Kristen, ”Sabap enggo itangtangindu manusia si male ras kerina kebiasanna, janah genduari enggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken tempasNa jine. Tujunna e me gelah itandaindu alu serta Dibata.” (Kolose 3:9, 10) Enda ertina kita perlu terus erupaya erbahan perubahen janah ’make manusia si mbaru’. La soal nggo asa kai dekahna kita ngelayani Jahwe, banci rusur sipelajari terbuen kerna sifat-sifatNa. Janah Pustaka si Badia banci nampati kita guna terus mpesikap sifat-sifatta gelah banci lebih siusih Jahwe.

10. (a) Kai si arus silakoken gelah banci terus mpesikap dirinta? (b) Penungkunen kai si banci saja turah?

¹⁰ Ateta kerina ndalanken pedah i bas Pustaka si Badia guna terus mpesikap dirinta. Tapi, kita perlu erusaha asa ngasupta. Engkai maka perlu? Engkai maka la isasapken Jahwe saja sifatta si la mehuli?

11-13. Engkai maka la isasapken Jahwe saja sifatta si la mehuli?

¹¹ Adi siukuri alam semesta ras kerina isina, tek kita maka lit kuasa Jahwe guna ngelakoken kai pe. Contohna, itepaNa matawari, si luar biasa kal gegehna. Tiap detik, seh kal buena cahaya ras panas si ihasilken matawari. Tapi sitik ngenca i bas energi e si iperluken guna kegeluhen  i doni. (Masmur 74:16; Jesaya 40:26) Jahwe pe mereken gegeh man umatNa i doni paksa iperluken. (Jesaya 40:29) Jelas me, adi nggit Jahwe, banci isasapkenNa kelemahen ras sura-suranta si salah emaka lanai kita perlu erjuang. Tapi ngkai maka la ilakokenNa?

¹² Jahwe mereken man banta kebebasen guna milih nggit ntah lang kita patuh man baNa. Adi sipilih patuh man baNa janah erjuang ngelakoken peratenNa, sibuktiken maka tuhu-tuhu sikelengi Ia janah sisenangken ateta Ia. Nina Setan, la lit hak Jahwe merentah. Tapi adi sipatuhi Jahwe, sicidahken maka nggit kita Ia si jadi Penguasanta. Banci kita tek maka Bapanta si perkeleng ngergai kerina upayanta guna patuh man baNa. (Jop 2:3-5; Kuan-kuanen 27:11) Adi isasapken Jahwe saja sifatta si la mehuli, la banci sibuktiken maka kita setia man Jahwe janah Ia ateta si jadi Penguasanta.

¹³ Ipindo Jahwe man banta gelah kita erjuang ngusih sifat-sifatNa. (Kolose 3:12; oge 2 Petrus 1:5-7.) IarapkenNa ka kita gelah erjuang guna ngendaliken perukuren ras perasanta. (Roma 8:5; 12:9) Berhasil kenca kita erbahan perubahen, meriah kal ukurta.

14, 15. Kai si banci silakoken gelah sifat-sifatta ngena ate Jahwe? (Nehen kotak ” Pustaka si Badia ras Pertoton Ngubah Kalak e”.)

¹⁴ Gelah sifat-sifatta ngena ate Jahwe, arus kita erjuang janah nggit ibimbing Dibata. Nina Roma 12:2, ”Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna.” Emaka guna meteh peraten Jahwe, perlu sigunaken penampat si nggo isikapkenNa. Arus sioge Pustaka si Badia tiap wari, ngukurisa alu mbages, janah ertoto mindo kesah si badia. (Lukas 11:13; Galati 5:22, 23) Alu bage, banci isampati Jahwe kita meteh kai si ngena ateNa. Kita pe banci erlajar gelah caranta rukur bali bagi Jahwe. Hasilna, rananta, perukurenta, bage pe perbahanenta banci lebih erbahan meriah ukur Jahwe. Kita pe banci berhasil ngendaliken kelemahenta. Tapi amin gia bage, perlu terus silawan kelemahenta e.​—Kuan-kuanen 4:23.

¹⁵ Selain ngoge Pustaka si Badia tiap wari, perlu ka sipelajari alu penampat publikasinta, misalna Sora Ermomo ras Sadarlah! Melala artikel i bas majalah enda  si ngajari kita uga carana ngusih sifat-sifat Jahwe janah ngatasi kelemahenta. Banci saja sidatken artikel ntah pe ayat si cocok kal ras keadanta. Banci sipepulung e gelah banci mulih-ulih sioge.

16. Engkai maka ula kitik ukurta adi la banci meter sibahan perubahen?

¹⁶ Iperluken waktu guna ngusih sifat-sifat Jahwe. Emaka adi iakapndu lenga mbue ibahanndu perubahen, ersabarlah. Tangtangna, banci saja perlu ipaksandu dirindu guna ngelakoken pedah Pustaka si Badia. Tapi adi reh rusurna perukurenndu bali bagi si niarapken Jahwe, banci reh nukahna iakapndu ngelakoken kai si ngena ateNa.​—Masmur 37:31; Kuan-kuanen 23:12; Galati 5:16, 17.

17. Adi kita setia man Jahwe, kai si banci sidatken i bas wari si pepagi?

¹⁷ Sitimai waktuna paksa kita sempurna janah ngelayani Jahwe seh rasa lalap. Kita lanai perlu ngelawan kelemahen kai pe. Janah banci reh nukahna siakap ngusih Jahwe. Tapi gundari pe, banci kita nembah Jahwe erkiteken iberekenNa tebusen man banta. Amin gia la sempurna, banci sibahan meriah ukurNa adi terus kita erjuang guna erbahan perubahen janah ndalanken ajaren Pustaka si Badia.

18, 19. Engkai banci kita tek maka Pustaka si Badia banci terus ngubah dirinta?

¹⁸ Iusahaken Kevin asa ngasupna guna ngendaliken emosina. Iukurina ayat-ayat Pustaka si Badia janah iusahakenna erbahan perubahen i bas geluhna. Idalankenna ka pedah i bas turang seninana nari. Iperluken Kevin piga-piga tahun dekahna guna erbahan perubahen. Tapi dungna, ia banci ngelayani jadi sinampati perpulungen. Janah i bas 20 tahun enda, ia nggo ngelayani selaku pertua. Amin gia bage, ietehna maka perlu terus ilawanna kelemahenna.

¹⁹ Bali bagi Kevin, banci terus sipesikap sifat-sifatta. Adi silakoken e, banci kita reh rembakna ras Jahwe. (Masmur 25:14) Emaka, ula nerah guna terus erbahan perubahen janah erbahan meriah ukurNa. Pasti isampatiNa kita gelah berhasil. Emaka banci kita tek alu penampat Pustaka si Badia, banci terus sibahan perubahen i bas dirinta.​—Masmur 34:9.