Shina Mbimbiliya Muyichinunga ni Kwalumuna Mwono We?
“Alumukenu ku kupwisa chaha cha kunyonga chenu.”—A-ROMA 12:2.
MIASO: 29, 52
1-3. (a) Yitanga yika muyihasa kupwa yikalu kwalumuna muze hatupapachisa? (b) Nyi chinakaliwa kwalumuna yitanga yetu, yihula yika mutuhasa kulihula? (Tala chizulie cha hauputukilo.)
HA MIAKA yinji kunyima, Kevin te kakuta yiheho ya mbongo hanji batota, kunwa makanya, kunwa walwa unji hamwe ni droga. [1] (Tala maliji akusongo.) Alioze muze alilongesele hakutwala kuli Yehova, iye yazanga kupwa sepa lienyi. Mba achilinge, iye katambile kwalumuna yuma yinji ku mwono wenyi. Ha chino iye kahashile kwalumuna mwono wenyi ni ukwaso wa Yehova ni ndundo ja Liji lienyi Mbimbiliya.—A-Hepreu 4:12.
2 Muze Kevin te hamupapachisa, aye te katamba kununga ni kwalumuna yitanga yenyi hanga apwe mukwa-Kristu mupema. (A-Efwesu 4:31, 32; ) Chakutalilaho, te kakwivwa uli kawashi-washi. Kakomokene ha kumona chize chapwa chikalu kwehuka kwivwa-vwa uli. Ha chino, Kevin yamba ngwenyi, kunyingika kwehuka uli wenyi chapwile chikalu chinji kuhiana kwecha yuma yipi yize apwile ni kulinga shimbu te kanda achimupapachisa! Alioze kahashile kwalumuna yitanga yacho ha kujikijila ku ukwaso wa Yehova ni ku longeso lia Mbimbiliya.
3 Shimbu te kanda atuchipapachisa, anji akuli yetu twalumwine yitanga yinji ku mwono wetu hanga twende kulita Mbimbiliya. Alioze chipwe haliapwila, mutuhasa kumona ngwetu nihindu kuchili yimwe yuma yikehe-yikehe yize twatamba kwalumuna hanga twimbulule Zambi ni Kristu. (A-Efwesu 5:1, 2; 1 Petulu 2:21) Chakutalilaho, hanji mutuhasa kumona ngwetu twakulinyenyeta chinji hanji kuyenga-yenga akwetu ni kwamba-mba yuma yize kuyalitele. Hanji mutuhasa kwivwa woma ha yize akwetu manyonga hanji kwamba ngwo kutushi kulinga yuma yize yalita. Kota twaputukile kulu kwalumuna yitanga yetu alioze kota mutuchinunga ni kulinga yuma yoyene. Kashika mutuhasa kulihula ngwetu: ‘Mumu liaka chili chikalu kwalumuna ndako jino jikehe-jikehe? Yika natamba kulinga hanga ngukaule yize Mbimbiliya yakwamba mba nguhase kununga ni kululieka utu wami?’
YENA MUHASA KWIVWISA YEHOVA KUWAHA
4. Mumu liaka chili chikalu kwivwisa Yehova kuwaha mashimbu eswe?
4 Twakuzanga Yehova, nawa tunazange kumwivwisa kuwaha ni mbunge yetu yeswe. Alioze, kutuchi kuhasa kumwivwisa kuwaha mashimbu eswe, mumu tuli akwa-uhenge. Twakwivwa ngwe chize evwile postolo Paulu, wambile ngwenyi: “Mumu kupala na kupala, alioze kulinga chize chinapeme chachihashile.”—A-Roma 7:18; Tiangu 3:2.
5. Yitanga yika twalumwine shimbu te kanda achitupapachisa, alioze yitanga yika yipi yize kota mutuchinunga ni kupinda nayo?
5 Muze twazangile kupwa Yela ja Yehova, twechele yuma yipi yize Yehova keshi kuzanga. (1 A-Korindu 6:9, 10) Alioze nihindu tuchili akwa-shili. (A-Kolosu 3:9, 10) Kashika twakununga ni kulinga yuma ya uhenge chipwe ngwe hanatupapachisa kulu. Ha mashimbu amwe hanji mutuhasa kupwa ni manyonga api chipwe kumona ngwe chili chikalu kwehuka yitanga yipi ya utu wetu. Kwamba umwenemwene, kota twakupinda chinji ni yitanga yoyene ha miaka yinji.
6, 7. (a) Chipwe ngwe tuli akwa-shili yika yakupwisa chashi hanga tupwe masepa a Yehova? (b) Mumu liaka kutwatambile kwecha kwita ukonekeno kuli Yehova?
6 Chipwe ngwe tuli akwa-shili, nihindu mutuhasa kupwa ni usepa upema ni Yehova ni kumuwayila. Iwuluka mashimbu eswe chize chakukwashile kupwa sepa lia Yehova. Iye Mwe wamwene yitanga yipema muli yena nawa kazangile hanga umunyingike. (Yoano 6:44) Nawa iye kanyingikine ngwenyi uli chihenge, ukwete ulelu nawa ngwenyi mashimbu amwe mupwa ni kulinga yuma yize kuyalitele. Chipwe chocho, nihindu Yehova kazangile hanga upwe sepa lienyi.
7 Yehova katuzangile chinji kashika watwehele chimwe chawana chipema. Iye katumine Mwanenyi Yesu, hano hashi hanga ahane mwono wenyi ngwe ukuule ha mukunda wa shili yetu. (Yoano 3:16) Nyi twalinga umwe upi, mutuhasa kwita kuli Yehova hanga atukonekene. Nawa ha mukunda wa ukuule, mutuhasa kupwa ni shindakenyo ngwetu iye matukonekena nawa ngwetu mutununga ni kupwa masepa jenyi. (A-Roma 7:24, 25; 1 Yoano 2:1, 2) Iwuluka ngwe, Yesu kafwile ha mukunda wa akwa-shili waze akulikonyeka. Chipwe mutumona ngwetu yize twalinga yili yipi chinji, nihindu kutwatambile kwecha kulemba kuli Yehova hanga atukonekene. Nyi kutwetele ukonekeno, muchipwa ngwe tunalituna kusana ku moko jetu waze ali ni majilo. Twakuwahilila chinji ha kunyingika ngwetu, Yehova kakupwisa chashi hanga tupwe masepa jenyi, chipwe ngwe tuli akwa-shili!—Tanga 1 Timoteu 1:15.
8. Mumu liaka kutwatambile kulengulula uhenge wetu?
8 Alioze, kutwatambile kulengulula uhenge wetu hanji kufupa uchinyino. Yehova kakutulweza mutapu wa atu waze iye anazange hanga apwe masepa jenyi. (Samu 15:1-5) Kashika nyi mutuzanga kukundama kuli iye, twatamba kununga ni kwimbulula yitanga yenyi ni ya Mwanenyi. Twatamba nawa kwehuka usolo upi, nyi twalinga chocho mutuhasa kupwa ni uhashi wa kwehuka kulinga yimwe yitanga yacho. Chipwe ngwe hanatupapachisa kulu, nihindu twatamba kununga ni kululieka utu wetu.—2 A-Korindu 13:11.
Nyi tunazange kukundama kuli Yehova, twatamba kusa tachi hanga tumwimbulule iye ni Mwanenyi.
9. Kuchi tunanyingika ngwetu mutuhasa kununga ni kuzala utu waha?
9 Postolo Paulu kalwezele akwa-Kristu ngwenyi: “Zulenu mutu mukulu, yoze wakulipihisa nikulita ni usolo wa kwonga, nikulita ni kwenda chenu cha kunyima; nukapwe nuli atu aha mu spiritu ya kunyonga chenu, nukazale mutu mwaha, yoze hanamutange mu ululi ni usandu wamwenemwene nikulita ni Zambi.” (A-Efwesu 4:22-24) Chino chinalumbunuka ngwo twatamba kununga ni kusa tachi hanga kwalumuna yitanga yetu ni ‘kuzala mutu mwaha.’ Chipwe ngwe twakuwayila Yehova ha miaka yinji, nihindu mutuhasa mashimbu eswe kulilongesa chinji hakutwala ku yitanga yenyi. Nawa Mbimbiliya muyihasa kutukwasa hanga tununge ni kwalumuna yitanga yetu, yipwe ngwe ya Zambi.
MUMU LIAKA CHILI CHIKALU CHINJI?
10. Yika twatamba kulinga hanga tununge ni kwalumuna yitanga yetu ni ukwaso wa Mbimbiliya, nawa yihula yika mutuhasa kulihula?
10 Yetweswe twakuzanga kukaula yize Mbimbiliya yakulongesa. Alioze twatamba kukalakala chinji hanga tununge ni kwalumuna yitanga yetu. Mumu liaka twatamba kusa tachi ja mutapu au? Shina Yehova mahasa kupwisa chashi hanga tulinge yuma yize yalita?
11-13. Mumu liaka Yehova anazange hanga tuse tachi hanga twehuke uhenge wetu?
11 Muze twakunyonga mu chifuchi ni yuma yeswe yize yatwamamo, kutushi kuyambashana ngwetu Yehova kali ni ndundo ja kulinga yuma yeswayo. Chakutalilaho, tangwa likwete ndundo jinji. Ha segundu jeswe, tangwa liakutuhwisa pangu linji hamwe ni kusasaminya, alioze kahia kakehe wika ke kanafupiwa hano hashi mba hapwe mwono. (Samu 74:16; Izaia 40:26) Yehova nawa kakuhana ndundo kuli tuvumbi twenyi hano hashi muze ayo mafupa ukwaso wenyi. (Izaia 40:29) Chochene, nyi Yehova te mazanga kuchilinga, iye te mahasa kuchipwisa chashi hanga twehuke yitanga ni usolo wetu upi. Alioze mumu liaka iye keshi kuchilinga?
12 Yehova hanatwehe nyonga lia kusakula yize mutulinga. Aye kakutwecha hanga tusakule yetwene nyi mutukaula shimbi jenyi nyi ka. Muze mutusakula kwononokena Yehova ni kusa tachi hanga tulinge upale wenyi, mutusolola ngwetu, twakumuzanga nawa tunazange kumwivwisa kuwaha. Satana kakwamba ngwenyi, Yehova keshi ni ulite wa kuyula. Alioze muze mutwononokena Yehova, mutusolola ngwetu, twakuzanga hanga apwe Mwata wetu. Nawa mutuhasa kupwa ni shindakenyo ngwetu, Tata yetu wa zango kakulemesa chinji tachi jize twakusa hanga tukaule shimbi jenyi. (Yombi 2:3-5; Yishima 27:11) Muze mutusa tachi hanga twehuke yitanga yetu yipi chipwe ngwe hi chashi ko kuchilinga, twakushishika kuli Yehova ni kusolola ngwetu, twakuzanga hanga iye apwe Mwata wetu.
13 Yehova kanatulweze ngwenyi, twatamba kusa tachi hanga twimbulule yitanga yenyi. (A-Kolosu 3:12; tanga 2 Petulu 1:5-7.) Nawa kanashimbwila hanga tusongwele kanawa manyonga jetu ni yize twakwivwa ku mbunge. (A-Roma 8:5; 12:9) Muze twakusa tachi hanga twalumune yitanga yetu twakuyuka, nawa twakwivwa chiseke.
ECHA HANGA LIJI LIA ZAMBI LINUNGE KWALUMUNA MWONO WE
14, 15. Yika mutuhasa kulinga hanga tupwe ni yitanga yize Yehova akuzanga? (Tala kasha “Mbimbiliya ni Kulemba Yalumwine Mwono wo.”)
14 Yika twatamba kulinga mba tupwe ni yitanga yize Yehova akuzanga? Shimbu tukwate yetwene chiyulo cha chize twatamba kwalumuna yitanga yetu, twatamba kwecha hanga Zambi atusongwele. Mukanda wa A-Roma 12:2, unambe ngwo: “Kanda nuliendela ni ndako ja mwakono, alioze alumukenu ku kupwisa chaha cha kunyonga chenu, hanga nukase chinyingi chize wapwa upale upema ni ungunu wa Zambi ni uze wamupemena.” Kashika mba tunyingike yuma yize Yehova akuzanga, twatamba kujikijila mu ukwaso uze iye akutwaha. Twatamba kutanga Mbimbiliya matangwa eswe, kupukuna ha yize tunatange, ni kulemba kuli Yehova hanga twite spiritu yisandu. (Luka 11:13; A-Ngalishia 5:22, 23) Nyi twalinga chocho, Yehova mahasa kutukwasa hanga tunyingike yize iye akuzanga, nawa mutuhasa kulilongesa kunyonga ngwe chize iye akunyonga. Ha chino, yize mutunyonga, mutuhanjika, ni yize mutulinga muyiwahilila Yehova, nawa mutulilongesa chize mutwehuka yitanga yipi. Chipwe chocho, nihindu mutununga ni kupinda ni yitanga yacho.—Yishima 4:23.
Sakula yikuma ha mikanda yetu hanji yisoneko ya Mbimbiliya yize muyikukwasa kwehuka yuma yipi ni kuyitanga ha shimbu ni shimbu (Tala paragrafu 15)
15 Chikwo nawa mba tutange Mbimbiliya matangwa eswe, twatamba kulilongesayo ha kuzachisa mikanda, ngwe Kaposhi wa Kutalila ni Despertai! Mitwe yinji ya mikanda yacho yakutulongesa hanga twimbulule yitanga ya Yehova ni chize mutuhasa kwehuka yuma yipi. Mutuhasa kuwana yimwe mitwe hanji yisoneko yize muyihasa kutukwasa chinji. Mutuhasa kusakula yisoneko ni mitwe yacho hanga tuyitange nawa ha shimbu ni shimbu.
16. Mumu liaka kutwambile kuhonga ku mbunge muze mutumona ngwetu kutushi kwalumuna yitanga yetu kwashi-washi?
16 Kulilongesa kwimbulula yitanga ya Yehova chakumbata mashimbu anji. Kashika nyi munyonga ngwenyi kuwalumwine yitanga yinji ku mwono we ngwe chize te wakuzanga, pwako ni uhomboloji. Chitangu yena kota watamba kusa tachi hanga ulinge yize Mbimbiliya yakulongesa. Alioze, nyi munyonga chinji ni kulinga yuma yize Yehova akuzanga, muchipwa chashi kunyonga ngwe chize iye akunyonga ni kulinga yuma yize yalita.—Samu 37:31; Yishima 23:12; A-Ngalishia 5:16, 17.
TUNYONGENU HA YIWAPE YETU YIPEMA YA KULUTWE LIA MATANGWA
17. Nyi twashishika kuli Yehova, yuma yika yipema yize mutuhasa kushimbwila kulutwe lia matangwa?
17 Tunashimbwila shimbu lize mutukapwa atu angunu ni kuwayila Yehova ku miaka yeswe. Ha shimbu liacho, kutuchi kapinda nawa ni kulinga yuma yipi, nawa muchikapwa chashi kuli yetu kwimbulula Yehova. Alioze chipwe haliapwila mutuhasa kuwayila kanawa Yehova mumu iye hanatwehe chawana cha ukuule. Chipwe ngwe tuli akwa-shili, mutuhasa kwivwisa Yehova kuwaha nyi twanunga ni kusa tachi hanga twalumune yitanga yetu ni kukaula yize Mbimbiliya yakutulongesa.
18, 19. Kuchi mutuhasa kupwa ni shindakenyo ngwetu Mbimbiliya yili ni ndundo ja kununga ni kwalumuna mwono wetu?
18 Kevin, kasele tachi jinji hanga alilongese chize te mahasa kwehuka kwivwa-vwa uli. Aye yapukuna ha yize te akutanga mu Mbimbiliya, ni kusa tachi hanga alumune yitanga ku mwono wenyi. Nawa yakaula yiyulo yize mandumbu jenyi akwa-Kristu amwehele. Chipwe chocho, kwapalikile yimwe miaka mba Kevin alumune yitanga yenyi, hi hakupalika cha amwe mashimbu yapwa kavumbi wa mu chikungulwila. Hikwapalika miaka 20 chize haze aputukile kukalakala ngwe mukulwana wa mu chikungulwila. Chipwe haliapwila iye kananyingika ngwenyi katamba kununga ni kwehuka ulelu wenyi.
19 Mutuhasa kununga ni kwalumuna yitanga yetu ngwe chize alingile Kevin. Nyi twachilinga, mutununga ni kukundama kuli Yehova. (Samu 25:14) Nawa ni twalinga chocho, mutununga ni kululieka yitanga yetu hanga tuvwise Yehova kuwaha, iye matukwasa hanga tuchilinge. Mutuhasa kupwa ni shindakenyo ngwetu, ni ukwaso wa Mbimbiliya mutununga ni kwalumuna yitanga ya ku mwono wetu.—Samu 34:8.
^ [1] (paragrafu 1) Jina liapwa kwalumuna.
