Biibili inuuninnik suli allannguisitsisarpa?
‘Allanngoritsi isummassigut nutaanngortitaajuarlusi.’ – ROM 12:2.
1-3. (a) Kuisinnitta kingorna suut allanngortikkuminaatsissinnaavavut? (b) Pissuserinnerulerniarnerput ilimagisamit artornarneruppat suut apeqqutaalersinnaappat? (Allaaserisap aallaqqaataani assit takukkit).
KEVIN ukiorpassuarni aningaasanoortarlunilu pujortartarlunilu imerpallaartarlunilu ikiaroortarpoq. [1] Jehova ilisarisimaleramiuk taassumunnga ikinngutaarusulerpoq. Ikinngutaalissagunili inuunermini allannguerujussuartariaqarpoq. Jehovap ikiuineratigut taassumalu oqaasiata, Biibilip, sunniineratigut allannguisinnaasimavoq. – Hebr 4:12.
2 Kevin kuisereerluni kristumiuulluarnerulerumalluni pissusiminik suli allannguisariaqarsimavoq. (Ef 4:31, 32) Assersuutigalugu kamajasuusimavoq. Isumaloqqajaasarnermi aqunnissaata ilikkaruminaannera uissuummissutigaa. Aap, Kevin oqarpoq kuisinnginnermini ajortuliarisartakkaminik unitsitsisimanerminit kamaammertarnermi aqunnissaata ilikkarnissaa erloqinarnerusoq! Jehovamulli ilungersorluni ikioqqusarnikkut Biibilimillu atuaqqissaartarnikkut allannguisinnaasimavoq.
3 Amerlanersavut kuisitsinnatik Biibilimi allassimasunut naapertuuttumik inooriaaseqarumallutik allannguerujussuarsimapput. Nalunngilarpulli maanna suli Guuti Kristusilu ilaarsinnaanerujumallugit annikinnerusunik allannguisariaqarluta. (Ef 5:1, 2; 1 Petr 2:21) Assersuutigalugu immaqa malugaarput naammagittaallioqqajaasarlutalu oqaatissuaasarluta. Ilaannikkulluunniit allat qanoq eqqarsarnersut oqarnersulluunniit isumakuluutigingaaratsigu eqqortuliunngitsoortarpugut. Immaqa ukiorpassuarni allannguiniarsimagaluarluta kukkussutigisartakkavut suli kukkussutigisarpavut. Imaassinnaavoq ima eqqarsartugut: ‘Sooq annikinnerusutigut allannguiniarneq taama ajornakusoortigaa? Pissuserinnerulerumallunga Biibilimi allassimasut qanoq maleruarsinnaavakka?’
JEHOVA NUANNAARTISSINNAAVAT
4. Sooq sutigut tamatigut Jehova nuannaartissinnaanngilarput?
4 Jehova asavarput uummatikkullu iluunngarluta nuannaartikkusullugu. Ajoraluartumilli naammalluinnanngitsuugatta nuannaartittuaannarsinnaanngilarput. Apustilitut Paulusitut misigigajuppugut, taanna ima allappoq: “Piumassuseqaraluarpunga, ajunngitsumilli iliuuseqarneq saperpunga.” – Rom 7:18; Jaak 3:2.
5. Kuisitsinnata qanoq allannguisimavugut, sanngiissutilli suut suli akiortariaqarsinnaavavut?
5 Ilagiinnut ilaasinnaalertinnata Jehovap uumigisaatut iliortarunnaartariaqarpugut. (1 Kor 6:9, 10) Sulili naammalluinnanngitsuuvugut. (Kol 3:9, 10) Ukiorpassuarnilu kuisimareeraluarluta kukkussuteqartuarpugut. Ilaannikkut eqqunngitsunik pilerissuseqalertarlutalu misigissuseqalertarpugut, pissusitsigulluunniit sanngiissuterput aqukkuminaatsissinnaavarput. Aap, ukiorpassuarni sanngiissut akiorsimasinnaavarput.
6, 7. (a) Ajortiliugaluarluta sooq Jehovamut ikinngutaasinnaavugut? (b) Sooq Jehovamut isumakkeerfigeqqunissaq tunuarsimaarutigissanngilarput?
6 Naammalluinnanngitsuugaluarluta Jehova suli ikinngutigisinnaallugulu kiffartorfigisinnaavarput. Jehovamut qanoq ikinngutaaleqqaarnerit eqqaamajuaruk. Taassuma ajunngitsortaqartutit takuaa ilisarisimalissaginnilu kissaatigalugu. (Joh 6:44) Aamma nalunngilaa kukkussuteqartarlutillu sanngiissuteqartutit sulilu kukkusassasutit. Taamaakkaluartoq Jehovap ikinngutigerusuppaatit.
7 Jehovap asangaaramisigut erlinnangaartumik tunivaatigut. Erni nunarsuarmut aallartippaa Jiisusip inuunini ajortitta utertinneqaatissaattut tunniuteqqullugu. (Joh 3:16) Kukkussuteqaraangatta isumakkeerfigeqqulluta Jehovamut qinusinnaavugut. Utertitsissullu pissutigalugu isumakkeerfigissagaatigut taannalu ikinngutigiuarsinnaagipput qularinngilarput. (Rom 7:24, 25; 1 Joh 2:1, 2) Eqqaamajuk ajortuliortut peqqissimisut pillugit Jiisusi toqusoq. Taamaattumik ajortuliorujussuarsimalluta misigigaluarluta isumakkeerfigeqqulluta Jehovamut qinujunnaanngisaannassaagut. Isumakkeerfigeqqulluta qinunngikkutta assigiinnassavaa assavut ipertuujusut errortorumanngitsugut. Naammalluinnanngitsuugaluartugut Jehovamut ikinngutaasinnaanerput taassuma ajornartinngimmagu qujamasuutigingaarparput! – 1 Timotheusi 1:15 atuaruk.
Jehovamut qanillerusukkutta taanna erneralu ilaarniartuartariaqarpavut
8. Sooq sanngiissutivut soqutiginngitsuusaaginnassanngilavut?
8 Soorunami sanngiissutivut soqutiginngitsuusaaginnarsinnaanngilavut tamakkuluunniit pillugit utoqqatsissutissarsiortuaannarsinnaanata. Jehovap ikinngutigerusutani inuttut qanoq ittuussanersut oqaluttuuppaatigut. (Tuss 15:1-5) Taamaattumik taassumunnga qanillerusukkutta taanna erneralu ilaarniartuartariaqarpavut. Aamma eqqunngitsumik pilerissuseqaqqajaasarutta tamanna aqunniartariaqarparput, taamaaliortaruttalu pilerissusipalaat ilaat ajugaaffigisinnaavavut. Qanorluunniit sivisutigisumik kuisimareeraluarutta pissuserinnerulerniartuartariaqarpugut. – 2 Kor 13:11.
9. Qanoq nalunngilarput inuttut pissusitsigut nutaanngortitaajuarsinnaasugut?
9 Apustili Paulusi kristumiunut ima allappoq: ‘Inutoqaq manna tikillugu inuuserisassinniittoq pileritsannernillu nakutitsissutaasunit aserorneqartoq iperarsiuk, isumassigullu anersaassigullu nutaanngortigitsi atillugulu inuk nutaaq Guuti assilillugu pinngortitaq iluarsuseqarlusi upperluarlusilu sallusuissutsip piinik.’ (Ef 4:22-24) Versini taakkunani oqaatsimi grækerisuumi ‘nutaanngortinnermik’ nutserneqarsimasumi pineqarpoq nutaanngortitaajuarnissaq. Tassa qanorluunniit sivisutigisumik Jehovamut kiffartorsimagaluarutta taassuma pissusii pillugit ilinniartuarsinnaavugut. Aamma taassumatut pissuseqarnerujumalluta allannguiniartuarnitsinni Biibili iluaqutigisinnaavarput.
SOOQ TAAMA AJORNAKUSOORTIGAA?
10. Biibili iluaqutigalugu allannguiuarumalluta susariaqarpugut, qanorlu aperisoqarsinnaava?
10 Tamatta Biibilimi allassimasut maleruarusuppavut. Allannguiuarumallutali ilungersortariaqarpugut. Sooq taama assoruutsigissaagut? Sooq Jehovap eqqortuliornissarput uagutsinnut ajornaatsuutinngilaa?
11-13. Sooq sanngiissutitta ajugaaffiginiarnissaat ilungersuutigissagipput Jehovap piumasaraa?
11 Avataarsuaq tamatumaniittullu tamaasa eqqarsaatigigaangatsigit Jehova qanorluunniit iliornissaminut pissaaneqartoq qularineq ajorparput. Assersuutigalugu seqineq nukissiorferujussuartut ittoq taassuma pinngortippaa. Sekundit tamaasa seqernup qaamaneq kiassuserlu naammangaartut pilersittarpai, tamakkuali ilaminiinnanngui nunarsuarmi uumassuseqarnissamut pisariaqarput. (Tuss 74:16; Es 40:26) Aamma Jehovap kiffani nunamiittut pisariaqartitsigaangata nakussatsittarpai. (Es ) Erseqqippoq Jehova piumagaluaruni sanngiissutitsinnik akiuinerput pilerissusipalaaqarunnaarnissarpullu ajornannginneerarsuutissinnaagaluaraa. Taavami sooq oqitsuutinngilaa? 40:29
12 Jehovap uagut piumasatsitut iliorsinnaatippaatigut. Taanna naalassanerlutigu naalassannginnerlutiguluunniit nammineq aalajangersinnaatippaatigut. Naalakkumallugu aalajangeraangatta piumasaatullu iliorniarluta ilungersoraangatta ersersittarparput asallugulu nuannaartikkusukkipput. Saatani oqarpoq Jehova naalakkersuisussaatitaanngitsoq. Jehovali naalakkaangatsigu ersersittarparput taanna naalagarerusullutigu. Taassumunngalu naalanniarluta ilungersornivut tamaasa Ataatatta asannittup pingaartikkai upperilluinnarsinnaavarput. (Job 2:3-5; Uss 27:11) Sanngiissutitta aqunnissaat oqitsuinnaanngikkaluartoq aqunniarlugit ilungersoraangatta Jehova ilumoorfigalugulu naalagarerusullugu ersersittarparput.
13 Jehovap oqaluttuuppaatigut pissusiminik ilaarsiniarnitsinni ilungersussasugut. (Kol 3:12; 2 Petrusi 1:5-7 atuakkit). Aamma eqqarsaativut misigissutsivullu aqunniarlugit ilungersussasugut piumasaraa. (Rom 8:5; 12:9) Allannguiniarluta ilungersornitsinni iluatsikkaangatta nuannaangaartarpugut.
GUUTIP OQAASIANIT ALLANNGORTITAAJUARIT
14, 15. Pissuserineqartussat Guutip iluarisai ineriartortinniarlugit susinnaavugut? (Ungalusaq “ Biibili qinunerlu allannguissutigaat” takuuk).
14 Pissusinik Jehovap nuannarisaanik ineriartortitsiumalluta susariaqarpugut? Romamiunut allakkat 12:2-mi ima allassimavoq: “Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.” Jehovap suna piumasarineraa paasiumallugu iluaqutissatsitut taassuma pilersitai tutsuigisariaqarpavut. Ullut tamaasa Biibili atuartariaqarparput, atuakkavut eqqarsaatigeqqissaartariaqarpavut anersaarlu illernartoq Jehovamut qinnutigalugu. (Luk 11:13; Gal 5:22, 23) Taamaaliorutta Jehovap suna iluarineraa paasisinnaavarput, taassumalu eqqarsartaasiatut eqqarsarneq ilikkarsinnaallutigu. Tamatuma kingunerisaanik eqqarsaativut, oqaatsivut iliuutsivullu Jehovamut nuannaarutaanerussapput, sanngiissutittalu qanoq aqunnissaat ilikkassavarput. Sanngiissutivulli akiortuartariaqarpavut. – Uss 4:23.
Suut allanngortittariaqarnerlugit nammineq nalilerniarsarinagu Guutimit siulersortittariaqarpugut.Allaaserisat Biibilimilu allassimaffiit sanngiissutinnik akiuininni iluaqutigisatit atuaqattaarsinnaaniassagakkit katersukkit (Immikkoortoq 15 takuuk)
15 Ullut tamaasa Biibilimik atuartarnitta saniatigut atuagassiaativut, soorlu Napasuliaq Alapernaarsuiffik aamma Vågn op!, atorlugit Biibilimik atuaqqissaartariaqarpugut. Atuagassiani tamakkunani allaaserisarpassuarni Jehovap pissusiisa ilaarnissaat sanngissutittalu qanoq akiornissaat pillugit ilinniartinneqarpugut. Allaaserisanik
allassimaffinnilluunniit nammineq iluaqutigilluarsinnaasatsinnik nassaarsinnaavugut. Atuaqqittaqattaarsinnaaniassagatsigit arlaatigut katersorsinnaavavut.16. Allannguipallassinnaanngikkutta sooq nikallussanngilagut?
16 Jehovap pissusiinik ilaarsineq ingerlaannaq ilikkagassaanngilaq. Taamaattumik misigiguit kissaatigisattut allannguitigisimanak nikalloqinak. Aallaqqaammut Biibilimi allassimasutut iliorniarlutit imminut pinngitsaalisariaqarsinnaavutit. Jehovalli piumasaatut eqqarsarnerujartortillutillu iliuuseqarnerujartortillutit taassuma eqqarsartaasiatut eqqarsarniarneq eqqortuliorniarnerlu ajornannginnerulissapput. – Tuss 37:31; Uss 23:12; Gal 5:16, 17.
SIUNISSARPUT NUANNINGAARTOQ EQQARSAATIGIUK
17. Jehova ilumoorfigigutsigu siunissaq qanoq ittoq qilanaarisinnaavarput?
17 Naammalluinnartunngornissarput naassaanngitsumullu Jehovamut kiffartornissarput qilanaaraarput. Taamanikkussamut sanngiissutit akiortariaqassanngilavut, Jehovallu ilaarnissaa ajornannginneerarsuussaaq. Maannangaarli Jehova pallorfigisinnaavarput utertitsissummik tunimmatigut. Naammalluinnanngitsuugaluarluta allannguiniarluta ilungersortuarutta Jehovallu Biibilimi ilinniartitsissutai maleruartuarutsigit taanna nuannaartissinnaavarput.
18, 19. Sooq allannguinissatsinnut Biibili sunniisinnaassuseqartoq qularinngissinnaavarput?
18 Kevinip kamaammertarnermi aqunnissaa sapinngisaminik ilinniarniarsaraa. Biibilimi atuakkani eqqarsaatigeqqissaartarpai allannguiniarlunilu ilungersungaartarluni. Aamma kristumioqatimi siunnersuutaat malittarpai. Kevin ukiualunni pissuserinnerulerniarsarereerluni iluatsikkami piffissap ingerlanerani ilagiinni kiffartortunngorsinnaalerpoq. Ukiullu 20-t kingulliit utoqqaanertatut kiffartorpoq. Nalunngilaali sanngiissutini suli akiortuartariaqarlugit.
19 Kevinitulli pissuserinnerulerniartuarsinnaavugut. Taamaaliorutta Jehovamut qaninnerujartuinnassaagut. (Tuss 25:14) Nuannaartinniarlugulu sapinngisatsinnik allannguiniarutta ikiorluta iluatsilluartissavaatigut. Upperilluinnarsinnaavarput Biibili iluaqutigalugu allannguiuarsinnaalluta. – Tuss 34:9.
^ [1] (immikkoortoq 1) Ateq allanngortitaavoq.